Sam Bigfala Lafet We Oli Makemgud Histri Blong Isrel Bifo

“Tri taem long wan yia, olgeta man long medel blong yufala oli mas kam fored long Jeova, God blong yufala, long ples we bambae hem i jusum . . . , mo evriwan oli mas karem wan samting i kam long Jeova.”​—DUTRONOME 16:16.

1. ?Yumi save talem wanem long saed blong ol lafet we ol man oli mekem long taem blong Baebol?

WANEM i kam long tingting blong yu taem yu tingbaot wan lafet? Samfala lafet long taem bifo, oli fulap long rabis fasin long saed blong seks, mo ol man oli bitim mak long ol pleplei mo ol samting we oli mekem blong haremgud. Samting ya i sem mak long samfala lafet long taem blong yumi tu. Be ol lafet we Loa blong God i talem long ol man Isrel blong mekem, oli defren. Ol lafet ya oli givim bigfala glad long ol man, be yumi save talem tu se oli ol “tabu asembli.”​—Levitikas 23:2.

2. (a) ?Ol man long Isrel oli mas mekem wanem tri taem long wan yia? (b) ?Wanem ya wan “lafet,” olsem we Dutronome 16:16 i tokbaot?

² Ol man long Isrel we oli strong long bilif, oli haremgud blong wokbaot i go long Jerusalem, ‘ples ya we Jeova i jusum,’ mo plante taem, famle blong olgeta i folem olgeta tu. Ol man ya oli karem fulap presen i go blong sapotem trifala bigfala lafet. (Dutronome 16:16) Buk ya, Old Testament Word Studies, i talem mining blong Hibru tok we oli tanem i kam “lafet” long Dutronome 16:​16, se wan “taem blong bigfala glad . . . mo wan taem we olgeta man oli mekem sakrifaes mo lafet blong tingtingbak long wan bigfala wok we God i bin mekem blong olgeta.”a

?From Wanem Ol Bigfala Lafet Ya Oli Impoten?

3. ?Trifala lafet ya evri yia oli pulum ol man blong tingbaot wanem blesing?

³ From we ol man Isrel oli man blong wokem garen, oli dipen bigwan long blesing blong ren we God i givim. Trifala bigfala lafet long Loa blong Moses oli laenap wetem taem blong karem kakae long garen. Taem ol tri oli stat putum flaoa, oli hivimap bale. Long en blong taem ya we ol tri oli putum flaoa, oli hivimap wit. Mo long en blong hot taem, oli hivimap olgeta narafala kakae blong garen. Hemia ol taem we ol man Isrel oli glad bigwan mo oli soemaot tangkyu long Man ya we i Givim ren mo i Wokem graon ya we i karem kakae. Be i gat plante moa samting bakegen we oli joen long ol lafet ya.​—Dutronome 11:11-​14.

4. ?Faswan lafet blong yia i blong makem wanem spesel samting we i bin hapen bifo?

⁴ Oli mekem faswan lafet long Naesan 15 kasem 21, hemia faswan manis long kalenda blong Baebol we ol man oli yusum bifo. Hem i laenap wetem en blong manis Maj mo stat blong manis Epril long taem blong yumi. Nem blong lafet ya, hemia Lafet Blong Bred We i No Gat Is Long Hem. From we hem i kam stret afta long Pasova blong Naesan 14, oli putum nem ya long hem tu se “lafet blong Pasova.” (Luk 2:​41; Levitikas 23:​5, 6) Lafet ya i mekem ol man Isrel oli tingtingbak long taem ya we oli bin gofri long olgeta trabol we oli kasem long Ijip. Hemia from wanem oli putum nem blong bred we i no is long hem se, “bred blong trabol taem.” (Dutronome 16:3) Lafet ya i mekem olgeta oli tingbaot se taem oli bin ronwe long Ijip oli hareap tumas, nao oli no gat taem blong putum is long bred mo wet blong i solap. (Eksodas 12:34) Long taem blong lafet ya, ol man Isrel oli no mas gat wan bred we i gat is long hem, long haos blong olgeta. Eniman we i joen long lafet ya, wetem ol strenja tu we oli stap wetem ol man Isrel, oli save kasem panis blong ded sipos oli kakae bred we i gat is long hem long taem ya.​—Eksodas 12:19.

5. ?Ating namba tu lafet i mekem ol man Isrel oli rimemba wanem spesel blesing we oli gat, mo hu bakegen i mas haremgud long taem ya?

⁵ Oli mekem namba tu lafet seven wik (49 dei) afta long Naesan 16. Hem i foldaon long namba 6 dei blong namba tri manis, hemia Sivan. Hemia i laenap wetem en blong manis Mei long taem blong yumi. (Levitikas 23:15, 16) Nem blong lafet ya, hem i Lafet Blong Ol Wik (long taem blong Jisas, narafala nem blong hem se Pentekos, we i minim “Fefte” long lanwis Grik). Oli mekem lafet ya kolosap long taem blong yia we Isrel i joen long kontrak blong Loa long Hil ya Sinae. (Eksodas 19:​1, 2) Long taem blong lafet ya, maet ol man Isrel we oli gat strong bilif, oli stap tingting dip long blesing we oli gat blong stap olsem tabu nesen we God i jusumaot olgeta oli blong hem. From we oli stap olsem spesel nesen blong God, oli mas obei long Loa blong God. Wan haf blong Loa ya i talem se oli mas soemaot lav mo keagud long ol man we oli trabol tumas, blong mekem se ol man ya tu oli save haremgud long taem blong lafet ya.​—Levitikas 23:22; Dutronome 16:10-​12.

6. ?Namba tri lafet i mekem ol man blong God oli tingbaot wanem samting we i bin hapen long olgeta?

⁶ Laswan blong ol trifala bigfala lafet blong yia, hemia Lafet Blong Karem Kakae i Kam, no Lafet Blong Ol Wansaed Haos. Oli mekem lafet ya long namba seven manis ya Tisri, we narafala nem blong hem Etanim, stat long namba 15 kasem namba 21. Hemia i laenap wetem fashaf blong manis Oktoba long taem blong yumi. (Levitikas 23:34) Long taem ya, ol man blong God oli slip afsaed no long ruf blong haos blong olgeta, long sam smosmol haos (wansaed haos) we oli wokem wetem ol han mo lif blong tri. Samting ya i mekem olgeta oli tingtingbak long trep blong olgeta blong 40 yia, stat long Ijip go kasem Promes Lan. Long taem ya, nesen blong Isrel i mas lanem blong trastem God fulwan se bambae hem i givim olgeta samting we oli nidim blong laef evri dei.​—Levitikas 23:42, 43; Dutronome 8:​15, 16.

7. ?Sipos yumi luklukbak long ol lafet blong Isrel bifo, olsem wanem samting ya i save givhan long yumi?

⁷ I gud yumi lukluk moa long samfala lafet we oli makemgud histri blong ol man blong God bifo. Samting ya i mas leftemap tingting blong yumi tede, from we God i singaot yumi tu, blong yumi kam wanples evri wik, mo long ol bigfala asembli tri taem evri yia.​—Hibrus 10:24, 25.

Taem Blong Ol King Long Laen Blong Deved

8. (a) ?Wanem lafet we i makem histri blong ol man Isrel i kamaot long taem blong King Solomon? (b) ?Yumi stap wet blong luk wanem samting i kamtru fulwan we i olsem Lafet Blong Ol Wansaed Haos?

⁸ Taem pikinini blong Deved, King Solomon, i rul mo ol man Isrel oli gat plante samting, oli mekem wan bigfala Lafet Blong Ol Wansaed Haos, we i makem histri blong olgeta. “Wan bigbigfala kampani blong man” i aot long ol ples long Promes Lan we oli stap farawe, oli kam wanples blong mekem Lafet blong Ol Wansaed Haos, mo blong openem nyufala haos prea. (2 Kronikel 7:8) Taem lafet ya i finis, King Solomon i sanem olgeta man oli gobak long ples blong olgeta. Olgeta ya oli “talem ol gudfala tok blong blesem king, mo oli gobak long haos blong olgeta, we oli glad mo oli haremgud long hat blong olgeta from ol gudfala samting we Jeova i bin mekem long man blong wok blong hem Deved, mo long ol man blong hem Isrel.” (1 King 8:​66) Lafet ya i rili makem histri blong olgeta. Tede, ol man blong God oli stap wet long samting we i olsem Lafet Blong Ol Wansaed Haos, we bambae i kamtru fulwan long en blong Wan Taosen Yia Rul blong Bigfala Solomon, Jisas Kraes. (Revelesen 20:​3, 7-10, 14, 15) Long taem ya, ol man we oli laef long olgeta ples blong wol, wetem olgeta dedman we oli laef bakegen tu, mo olgeta man we oli laef tru long Amageden, bambae oli joengud wetem bigfala glad blong wosip long Jeova God.​—Sekaraea 14:16.

9-11. (a) ?Wanem i kamaot bifo long bigfala lafet we i makem histri blong ol man Isrel long taem blong King Hesekaea? (b) ?Plante man long ten laen blong Isrel long not oli soemaot wanem gudfala eksampel, mo samting ya i mekem yumi tingbaot wanem tede?

⁹ Nekiswan bigfala lafet we Baebol i tokbaot, hem i kamaot afta long rul blong rabis King ya Ehas, we i bin satem haos prea mo i lidim kingdom blong Juda blong lego trufala wosip mo folem gyaman bilif. Man we i rul biaen long Ehas, hemia gudfala King Hesekaea. Long faswan yia blong rul blong Hesekaea, taem hem i gat 25 yia, hem i statem wan bigfala wok blong mekem trufala wosip i stanap bakegen mo blong jenisim plante samting. Kwiktaem nomo, hem i openem haos prea bakegen, mo i mekem plan blong oli fiksimap haos ya. Nao, king ya i sanem leta i go long olgeta man Isrel we oli stap long ol ten enemi laen blong Isrel long not, blong singaot olgeta oli kam joen long lafet blong Pasova mo Lafet Blong Bred We i No Gat Is Long Hem. Plante oli kam, nating se ol manples blong olgeta oli jikim olgeta.​—2 Kronikel 30:​1, 10, 11, 18.

¹⁰ ?Lafet ya i gohed gud? Baebol i talem se: “Ale, ol man Isrel we oli stap long Jerusalem oli mekem lafet blong bred we i no gat is long hem blong seven dei wetem bigfala glad. Mo ol Livaet mo ol pris oli presem Jeova evri dei wetem myusek we i strong.” (2 Kronikel 30:21) !Ol man Isrel ya oli rili soemaot wan gudfala eksampel long ol man blong God tede, we plante blong olgeta oli kasem fasin agens, no oli mas wokbaot longwe blong joen long ol asembli!

¹¹ Wan eksampel, tingbaot Distrik Asembli ya “Fasgud Long God,” long tri defren ples long Polan long 1989. Long ol 166,518 man we oli joen long asembli ya, i gat sam bigfala grup we oli aot long Soviet Yunion mo ol narafala kantri long Is Yurop, blong kam long asembli ya. Oli kam long ol ples we long taem ya, gavman i putum tabu long wok blong ol Wetnes blong Jeova. Buk ya, Jehovah’s Witnesses​—Proclaimers of God’s Kingdom,b i talem se: “Samfala we oli kam long ol asembli ya, hemia faswan taem we oli joen long wan miting blong ol man blong Jeova we i gat bitim 15 no 20 man long hem. Hat blong olgeta i fulapgud wetem tangkyu taem oli luk plante taosen man oli sidaon long ol stad ya, oli joen wetem olgeta blong prea, mo blong singsing presem Jeova.”​—Pej 279.

12. ?Wanem i kamaot bifo long bigfala lafet we i makem histri blong ol man Isrel long taem blong King Josaea?

¹² Afta we Hesekaea i ded, ol man Juda oli folem gyaman wosip bakegen, aninit long rul blong King Manase mo Amon. Nao, wan narafala gudfala king i stat rul, hemia yangfala Josaea. Hem i wok wetem fasin no fraet, blong stanemap trufala wosip bakegen. Taem Josaea i gat 25 yia, hem i givim oda se ol man oli mas fiksimap haos prea. (2 Kronikel 34:8) Taem wok ya i stap gohed, oli faenem Loa we Moses i bin raetem, i stap insaed long haos prea ya. Taem King Josaea i ridim Loa ya blong God, ol tok blong Loa ya i kasem hat blong hem, nao hem i mekem plan blong ridimaot Loa ya long olgeta man Isrel. (2 Kronikel 34:14, 30) Ale, folem tok blong Loa ya, hem i mekem plan blong lafet blong Pasova. Mo tu, king ya i soemaot wan nambawan eksampel taem hem i givim plante samting olsem presen, blong sapotem spesel taem ya. From samting ya, Baebol i talem se: “I neva gat wan pasova olsemia long Isrel, stat long taem blong profet Samuel i kam.”​—2 Kronikel 35:​7, 17, 18.

13. ?Ol lafet long taem blong Hesekaea mo Josaea oli mekem yumi tingbaot wanem tede?

¹³ Ol jenis we Hesekaea mo Josaea i mekem long taem blong tufala, oli laenap wetem nambawan wok blong stanemap trufala wosip bakegen, we ol trufala Kristin oli bin mekem stat long 1914, taem we Jisas Kraes i kam king. Sem mak olsem taem blong Josaea, tede tu, oli stanemap trufala wosip bakegen folem ol samting we Tok blong God i talem. Mo, sem mak long taem blong Hesekaea mo Josaea, wok blong stanemap trufala wosip bakegen long taem blong yumi i joen wetem ol asembli, we oli eksplenem klia sam nambawan profet tok mo ol gudfala rul blong Baebol we oli stret long taem blong yumi. Yumi glad blong lanem plante samting long ol asembli ya, be antap long hemia, yumi glad tumas blong luk bigfala namba blong man we oli tekem baptaes. Olsem ol man Isrel we oli tanem tingting from sin blong olgeta long taem blong Hesekaea mo Josaea, ol man we oli tekem baptaes tede oli tanem baksaed blong olgeta long ol rabis fasin blong Krisendomc mo ol narafala haf blong wol blong Setan. Long 1997, bitim 375,000 man oli tekem baptaes blong soemaot se oli givim laef blong olgeta long tabu God ya, Jeova​—namba ya i olsem 1,000 man evri dei.

Afta Long Kalabus

14. ?Wanem i kamaot bifo long bigfala lafet blong yia ya 537 B.K.T.?

¹⁴ Afta we Josaea i ded, nesen blong Isrel i joen bakegen long gyaman wosip. Ale, long 607 B.K.T.,d Jeova i panisim ol man blong hem taem hem i pulum ol ami blong Babilon blong faet agensem Jerusalem. Oli spolemgud taon ya mo haos prea blong hem, mo ples ya i kam nogud olgeta. Biaen, ol man Jyu oli go kalabus long Babilon blong 70 yia. Nao God i givim paoa long wan smol grup blong ol man Jyu we oli tanem tingting from ol sin blong olgeta, blong oli girap mo gobak long Promes Lan blong stanemap trufala wosip bakegen. Olgeta ya oli kamtru long Jerusalem we i nogud olgeta, long namba seven manis blong yia 537 B.K.T. Faswan samting we oli mekem, hemia se, oli bildim wan olta blong oli save mekem sakrifaes evri dei, olsem kontrak blong Loa i talem. Hemia i kamaot long stret taem blong mekem wan narafala impoten lafet we i makem histri blong ol man Isrel. “Nao oli mekem lafet blong ol wansaed haos folem tok we loa i talem.”​—Esra 3:​1-4.

15. ?Smol kampani blong ol man Jyu we oli kambak long ples blong olgeta long 537 B.K.T. oli gat wanem wok blong mekem, mo olsem wanem samting olsemia i bin hapen long 1919?

¹⁵ Ol man Jyu ya we oli aot long kalabus blong kambak long Jerusalem, oli gat wan bigfala wok blong mekem​—oli mas bildim bakegen haos prea blong God, mo Jerusalem wetem stonwol blong hem. Ol man raonabaot oli jelas long ol man Jyu ya mo oli mekem plante trabol long olgeta. Taem oli stap bildim haos prea ya, hemia i olsem “dei blong ol smol samting.” (Sekaraea 4:​10) Taem ya i laenap wetem samting we i hapen long ol gudfala tabu Kristin long 1919. Long impoten yia ya, oli aot long kalabus long saed blong speret, hemia Bigfala Babilon no olgeta gyaman skul blong wol. Long taem ya, namba blong olgeta i smol, sam taosen nomo, mo oli mas stanap strong tru long ol fasin agens blong ol man blong wol ya. ?Ol enemi blong God oli naf blong blokem trufala wosip? Ansa long kwestin ya i mekem yumi tingbaot tufala laswan lafet we Hibru haf blong Baebol i tokbaot.

16. ?Wanem samting i spesel long saed blong lafet blong 515 B.K.T.?

¹⁶ Ol man Jyu oli finisim wok blong bildim bakegen haos prea long manis Ada blong yia 515 B.K.T. Hemia stret taem blong mekem lafet blong Naesan long yia ya, long taem we ol tri oli putum flaoa. Baebol i talem se: “Oli gohed seven dei wetem bigfala glad blong mekem lafet blong bred we i no gat is long hem. Jeova nao i mekem olgeta oli glad, mo hem i pulum hat blong king blong Asiria i go long olgeta blong mekem han blong olgeta i strong blong wok long haos blong trufala God, we hem i God blong Isrel.”​—Esra 6:​22.

17, 18. (a) ?Wanem impoten lafet i kamaot long 455 B.K.T.? (b) ?Olsem wanem samting olsemia i kamaot long yumi tede?

¹⁷ Sikiste yia biaen, long 455 B.K.T., wan narafala impoten samting i kamaot. Lafet Blong Ol Wansaed Haos long yia ya, i makem en blong wok ya blong bildim bakegen stonwol blong Jerusalem. Baebol i talem se: “Grup blong man we oli aot long kalabus oli kambak, oli mekem ol wansaed haos mo oli slip long olgeta. Ol man Isrel oli no bin mekem samting ya stat long taem blong Josua, pikinini blong Nun, i kam kasem yia ya, taswe hemia wan taem blong bigfala glad.”​—Nehemaea 8:​17.

¹⁸ !Nating se ol man Jyu oli kasem bigfala fasin agens, wok ya blong stanemap trufala wosip blong God bakegen i wan taem we oli no save fogetem! Samting ya i sem mak tede. Nating se plante man oli mekem trabol mo oli agensem ol man blong Jeova, bigfala wok blong talemaot gud nyus blong Kingdom blong God i kasem olgeta ples blong wol, mo ol man we oli stap long ol ples farawe oli harem mesej long saed blong jajmen blong God. (Matyu 24:14) Kolosap nao, bambae God i putum laswan mak long smol haf blong ol 144,000 tabu man we oli stap yet long wol. Bitim faef milyan fren blong olgeta, ol “narafala sipsip,” we oli kamaot long olgeta nesen, oli bin hivap wetem ol tabu brata ya, olsem “wan kampani nomo.” (Jon 10:16; Revelesen 7:​3, 9, 10) !Lafet Blong Ol Wansaed Haos i pija blong nambawan samting ya! Mo bigfala wok ya blong hivimap ol man bambae i gohed long nyufala wol tu, taem plante bilyan dedman oli laef bakegen, mo bambae oli harem tok we i singaot olgeta blong joen long lafet ya we i olsem Lafet Blong Ol Wansaed Haos.​—Sekaraea 14:16-​19.

Long Faswan Handred Yia K.T.

19. ?Wanem i mekem se Lafet Blong Ol Wansaed Haos long 32 K.T. i spesel?

¹⁹ Long ol bigfala lafet we Baebol i tokbaot, ating olgeta we Pikinini blong God, Jisas Kraes, i joen long olgeta oli impoten moa. Tingbaot taem we Jisas i joen long Lafet Blong Ol Wansaed Haos (no, Haos Tapolen) long yia 32 K.T.e Hem i tekem jans ya blong tijim ol impoten trutok long ol man, mo hem i sapotem ol tok blong hem wetem ol vas we oli stap long Hibru haf blong Baebol. (Jon 7:​2, 14, 37-​39) Wan kastom we oli folem oltaem long lafet ya, hemia se oli laetem ol kandel we oli stap long fo bigfala ples blong holem laet, long yad we i stap insaed long haos prea. Ol laet ya oli mekem se ol man oli save gohed blong mekem lafet nating se tudak i kam. Ating Jisas i stap tingbaot ol bigfala laet ya taem hem i talem se: “Mi ya mi laet blong ol man long wol. Man we i biaen long mi, bambae hem i no wokbaot olsem we i stap long tudak nomo. Hem bambae i gat laet blong laef.”​—Jon 8:​12.

20. ?From wanem Pasova long 33 K.T. i spesel?

²⁰ Nao stret taem i kam blong mekem Pasova mo Lafet Blong Bred We i No Gat Is Long Hem, long impoten yia ya 33 K.T. Long dei ya blong Pasova, Jisas i ded long han blong ol enemi blong hem, mo hem i kam olsem Sipsip blong Pasova, we i ded blong tekemaot “sin blong olgeta man long wol.” (Jon 1:​29; 1 Korin 5:7) Tri dei biaen, long Naesan 16, God i mekem Jisas i laef bakegen wetem wan speret bodi we i no save ded samtaem. Samting ya i laenap wetem presen we ol man Isrel oli givim, hemia faswan kakae blong bale, olsem Loa i talem. Taswe, Masta Jisas Kraes we i laef bakegen long ded, hem i olsem ‘fas kakae ya we i rere long garen from we hem i faswan blong laef bakegen long ded.’​—1 Korin 15:⁠20.

21. ?Wanem i hapen long Pentekos 33 K.T.?

²¹ Wan lafet we i rili defren long ol narafala, hemia Pentekos long yia 33 K.T. Long dei ya, plante man Jyu mo proselaet oli hivap long Jerusalem, wetem 120 disaepol blong Jisas tu. Taem lafet ya i stap gohed, Masta Jisas Kraes we i laef bakegen long ded, i kafsaedem tabu speret blong God i go long ol 120 man ya. (Ol Wok 1:​15; 2:​1-4, 33) Long fasin ya, tabu speret i makemaot olgeta ya, mo oli kam nyufala nesen ya we God i jusumaot tru long kontrak we Jisas Kraes nao i tekem i kamtru long olgeta. Long taem blong lafet ya, hae pris blong ol man Jyu i givim tu bred we i gat is long hem i go long God, tufala bred ya oli wokem long ol fas kakae blong wit we oli karem long garen. (Levitikas 23:15-​17) Tufala bred ya we i gat is long hem, i pija blong ol 144,000 sinman we Jisas i ‘pemaot olgeta oli blong God,’ blong oli mekem wok olsem ‘wan kingdom mo ol pris . . . blong rul olsem ol king antap long wol ya.’ (Revelesen 5:​9, 10; 14:​1, 3) From we olgeta ya we bambae oli go rul long heven oli kamaot long tu defren grup blong man we oli gat sin, hemia ol man Jyu mo ol man blong ol narafala kantri, samting ya i laenap wetem tufala bred ya we i gat is long hem.

22. (a) ?From wanem ol Kristin oli no mekem ol lafet we oli joen wetem kontrak blong Loa? (b) ?Bambae yumi tokbaot wanem long nekiswan stadi?

²² Taem nyufala kontrak i stat wok long Pentekos 33 K.T., samting ya i minim se olfala kontrak blong Loa i no moa gat mining long ae blong God. (2 Korin 3:​14; Hibrus 9:​15; 10:16) Hemia i no min se ol tabu Kristin oli no gat loa. Oli kam aninit long loa blong God we Jisas Kraes i tijim mo we God i raetem long hat blong olgeta. (Galesia 6:2) Taswe, ol Kristin oli no moa mekem trifala lafet ya we ol man Jyu oli bin mekem evri yia, from we ol lafet ya oli haf blong olfala kontrak blong Loa. (Kolosi 2:​16, 17) Nating se i olsem, yumi save lanem plante samting from tingting we ol man blong God bifo long Kraes oli gat, long saed blong ol lafet mo ol narafala miting we oli mekem blong wosip. Long nekiswan stadi, bambae yumi tokbaot sam eksampel we oli sua blong pulum yumi evriwan blong luksave se, i impoten tumas blong joen oltaem long ol Kristin miting.

[Ol futnot]

Ol Kwestin Blong Tingtingbak

◻ ?From wanem ol man Isrel oli mekem tri bigfala lafet evri yia?

◻ ?Wanem i hapen long ol lafet long taem blong Hesekaea mo Josaea?

◻ ?Wanem impoten lafet we ol man Isrel oli mekem long 455 B.K.T., mo from wanem samting ya i leftemap tingting blong yumi?

◻ ?Wanem samting i spesel long saed blong Pasova mo Pentekos blong yia 33 K.T.?

[Bokis blong pija long pej 12]

Lafet Ya i Wan Lesen Long Yumi Tede

Olgeta man we oli wantem kasem blesing from sakrifaes blong Jisas we i karemaot sin blong man, oli mas mekem laef blong olgeta i laenap wetem mining blong Lafet Blong Bred We i No Gat Is Long Hem. Lafet ya blong bifo, hem i pija blong wan bigfala lafet we ol tabu Kristin oli glad blong joen long hem, from we ransom sakrifaes blong Jisas i mekem olgeta oli fri long rabis wol ya mo panis blong sin. (Galesia 1:4; Kolosi 1:​13, 14) Lafet ya blong bifo, i gohed blong seven dei​—wan namba we Baebol i yusum blong minim samting we i fulwan long saed blong speret. Bigfala lafet blong ol tabu man tede, i gohed long olgeta taem we tabu Kristin kongregesen i stap long wol ya, mo oli mas mekem lafet ya wetem “hat we i tru mo wetem trutok.” Samting ya i minim se ol man ya oli mas stap lukaotgud oltaem blong blokem samting we i olsem is. Baebol i yusum is olsem pija blong ol gyaman tijing, fasin tu fes, mo rabis fasin. Ol man we oli wosipim Jeova long trufala fasin, oli mas soemaot se oli no laekem nating is ya. Oli no mas letem hem i mekem laef blong olgeta i doti no i spolem Kristin kongregesen we i klingud.​1 Korin 5:​6-8; Matyu 16:​6, 12.

[Tok Blong Pija Long Pej 9]

Evri yia long Naesan 16, hemia semfala dei we Jisas i laef bakegen long ded, ol man oli mas givim wan bandel blong ol faswan bale, i go long God

[Tok Blong Pija Long Pej 10]

Ating Jisas i stap tingbaot ol laet blong lafet, taem hem i talem se hem i ‘laet blong wol ya’