?Yu Yu Rere From Ol Disasta Long Saed Blong Weta?
1. ?From wanem i waes we yumi rere from ol disasta?
1 Evri yia, ol disasta olsem graon we i seksek, taetel wef, bigfala ren, hariken, mo wota we i kavremap olgeta ples, oli spolem plante milian man, wetem ol brata mo sista blong yumi tu. Plante taem ol disasta ya oli kamaot wantaem nomo mo oli save spolem yumi evriwan. Taswe i waes we yumi rere gud fastaem.—Prov. 21:5.
2. ?Sipos yumi muf i go long narafala haos no namba blong telefon blong yumi i jenis, from wanem yumi mas talemaot long ol elda?
2 Bifo We Disasta i Kam: Samtaem ol man we oli talemaot weta oli luksave se wan disasta i stap kam, ale oli givim woning from. I impoten we yumi lesin long ol woning ya. (Prov. 22:3) Long taem olsem, ol elda bambae oli traem blong kasem evriwan we oli joen long kongregesen, blong givhan long olgeta blong rere from disasta ya. Afta we disasta ya i pas, ol elda bambae oli traehad bakegen blong kasem evri brata sista, blong luk sipos oli sef mo blong kasem save wanem help nao we oli nidim. Sipos ol elda oli no save stret ples we ol brata sista oli stap long hem, bambae oli save westem plante taem blong faenem olgeta. Taswe, sipos pablisa i muf i go long narafala haos no telefon namba blong hem i jenis, i gud we hem i talemaot long sekretari mo long elda we i lukaot long buk stadi blong hem.
3. ?Olsem wanem yumi save sapotem ol elda sipos yumi laef long wan ples we disasta i stap kamaot long hem oltaem?
3 Sipos kongregesen i stap long wan ples we disasta i stap kamaot oltaem long hem, ol elda oli save askem long ol pablisa blong oli givim nem mo telefon namba blong wan famle no wan fren blong olgeta we i stap long wan defren ples mo we oli save kasem hem kwiktaem long taem blong disasta. Long rod ya, ol elda oli save faenem olgeta we oli aot long haos blong olgeta long taem blong disasta. Ol elda oli save mekem plan tu we kongregesen i save folem long taem blong disasta. Oli save mekem wan lis blong ol samting we wanwan pablisa i mas rerem, oli mekem ol plan blong muvumaot kwiktaem ol pablisa, mo plan blong givhan long olgeta we oli gat ol spesel nid. I impoten we yumi sapotem ol plan ya we ol elda oli mekem wetem lav.—Hib. 13:17.
4. ?Wanem samting yumi mas mekem sipos wan disasta i kasem ples blong yumi?
4 Afta Long Disasta: ?Bambae yu mekem wanem sipos wan disasta i kasem ples blong yu? Fastaem yu mas meksua se famle blong yu i kasem kwiktaem ol samting we oli nidim long saed blong bodi. Sipos yu yu naf, yu save givhan long ol narafala we disasta i spolem olgeta. Yu mas traehad kwiktaem blong toktok i go long elda we i lukaot long buk stadi blong yu. Yu mas mekem olsem, nating sipos yu yu sef nomo mo yu no nidim help. Sipos yu nidim help, yu mas save se ol brata blong yu bambae oli traehad blong givhan long yu. (1 Kor. 13:4, 7) Yu mas tingbaot se Jeova i save long trabol blong yu, mo yu mas dipen long hem blong i givhan long yu. (Sam 37:39; 62:8) Yu mas rere blong givhan long ol narafala long saed blong spirit mo blong leftemap tingting blong olgeta. (2 Kor. 1:3, 4) Yu mas kwik blong gohed bakegen long ol tiokratik wok blong yu.—Mat. 6:33.
5. ?Denja blong ol disasta i save mekem wanem long yumi ol Kristin?
5 Ol disasta oli mekem plante man long wol oli wari. Nating se i olsem, yumi save lukluk i go long fiuja wetem strong tingting. I no longtaem, olgeta disasta bambae oli finis. (Rev. 21:4) Go kasem taem ya, yumi save mekem bes blong yumi blong rere from ol trabol mo hadtaem, mo yumi mas gohed strong blong talemaot gud nius long ol narafala.