Lav​—Fasin We i Givhan Long Yumi Blong Karem Frut Long Wok Blong Prij

¹ “Yufala i kam long mi, nao mi bambae mi . . . mekem we yufala i spel gud.” (Mat. 11:28) Ol gudfala toktok ya oli soemaot dip lav we Jisas i gat long ol man. Long wol ya i no gat lav, taswe plante man oli harem nogud. Yumi ol Kristin we yumi wantem folem eksampol blong Jisas, yumi mas soemaot se yumi lavem ol man ya. ?Olsem wanem yumi save soemaot lav ya taem yumi stap talemaot gud nius?

² Long Ol Toktok: Jisas i laekem tumas ol man, mo samting ya i pusum hem blong tekem evri janis blong talemaot gud nius long olgeta. (Jon 4:​7-14) Sipos yumi fraet blong tekem janis blong prij, lav nao bambae i givhan long yumi blong winim fraet ya. Taem wan smol gel we i gat sikis yia blong hem i stap wet blong pas long hospital, hem i prij gud long woman we i sidaon klosap long hem. ?Wanem i pusum gel ya blong mekem olsem? Gel ya i eksplenem se: “Mi luk se woman ya i nidim blong save Jeova.”

³ Yumi soemaot se yumi intres long ol man taem yumi smael long olgeta mo taem yumi toktok kaen long olgeta. Long sem fasin, yumi soem se yumi lavem olgeta taem yumi lesin gud long ol samting we oli talem, yumi soemaot se yumi kasem save long ol wari blong olgeta, mo yumi rili intres long olgeta. (Prov. 15:23) Yumi mas pulum tingting blong olgeta i go long ol gudfala promes blong Kingdom mo long fasin sore mo lav we Jeova i gat long ol man. Sipos yumi mekem olsem, yumi stap folem fasin blong Kraes.​—Mat. 24:14; Luk 4:18.

⁴ Long Ol Wok: Jisas i kwik blong luksave ol nid blong ol narafala, mo hem i mekem sam samting blong givhan long olgeta. (Mat. 15:32) Yumi tu yumi save gat janis blong soem kaen fasin long ol man taem yumi stap long wok blong prij. Wan sista we i stap prij i luk wan woman i stap toktok long telefon. Woman ya i faenem i had blong kasem save long impoten samting we man i stap talem long telefon, from man ya i toktok long narafala lanwis. Sista i askem long woman ya sipos hem i save givhan long hem blong tanem ol toktok blong man ya. Lav we sista i soemaot i openem rod blong hem i storiangud long woman ya long saed blong Baebol, ale woman ya i agri blong stadi. Wan brata i gobak blong mekem visit long wan man. Man ya i stap traehad blong karem wan longfala hevi jea i gotru long doa, nao jea ya i fas long doa. Brata i givhan long man ya blong karem jea ya, mo man ya i glad tumas from. Ale biaen, brata i sidaon long jea ya mo i statem Baebol stadi wetem man ya.

⁵ Taem yumi joen long wok blong prij, yumi soemaot se yumi lavem Jeova mo ol man we oli stap raonabaot long yumi. (Mat. 22:​36-40) Sipos yumi soemaot lav ya long ol toktok mo ol wok blong yumi, bambae ol man we hat blong olgeta i stret oli luksave se yumi holem trutok.