Wan Kwestin

?Yia blong Givimbak ol Samting (Jubili) we Levitikas japta 25 i tokbaot, i pija blong wanem samting?

Loa blong Moses i talem se ‘long namba seven yia, yufala i no mas yusum ol graon ya, yufala i mas livim i spel.’ Oda i go long ol man Isrel long saed blong yia ya se: “Long yia ya, yufala i no mas planem kakae long ol graon ya, mo yufala i mas livim ol plantesen blong grep blong yufala i stap. Ol kakae ya we i stap gru hem wan long ol olfala garen blong yufala, yufala i no mas go tekemaot olgeta blong kam putumgud long haos, yufala i mas livim i stap. Mo yufala i no mas go karemaot ol frut blong grep long ol plantesen blong yufala. Yia ya, hem i wan yia we ol graon ya blong yufala i mas spel gud.” (Levitikas 25:​4, 5) Taswe evri namba seven yia hem i wan yia we graon i spel, no wan Sabat yia. Oli holem ol Sabat yia ya wan taem evri seven yia, gogo oli mekem seven taem, hemia i minim go kasem foti naen yia. Ale, long namba fifti yia biaen long namba seven Sabat yia ya, hem i wan yia blong Givimbak ol Samting, we oli kolem Jubili. ?Wanem i hapen long yia ya?

Jeova i talem long ol man Isrel tru long Moses se: “Nao long fasin ya, bambae yufala i makemaot namba fifti yia, se hem i wan spesel yia blong mi, from we hem i yia blong talemaot long olgeta man long kantri blong yufala, se olgeta graon wetem olgeta narafala samting bambae i mas gobak long ol man we i blong olgeta fastaem. Long yia ya, olgeta graon we man i salem long narafala man bambae i mas kambak long man we i blong hem fastaem, no long ol pikinini blong hem, no long olgeta we oli kamaot biaen long hem. Mo long yia ya, olgeta laen blong Isrel we oli slef oli mas go fri, oli mas gobak long ol famle blong olgeta. Long yia ya, yufala i no mas planem ol kakae blong yufala, mo yufala i no mas go long ol plantesen blong grep blong yufala blong karem ol frut blong hem.” (Levitikas 25:​10, 11) Jubili ya, no Yia blong Givimbak ol Samting, i namba tu yia blong graon i spel. Be long ol man long kantri ya, i wan taem we oli go fri. Wan man Jiu we oli salem hem olsem wan slef, hem i mas go fri. Graon we wan man i bin salem bifo i mas kambak long famle blong hem. Jubili hem i wan yia blong mekem ol samting i kam niuwan bakegen mo blong ol man Isrel oli kam fri. ?Wanem mining blong ol samting ya long ol Kristin tede?

From we faswan man ya Adam i rebel, olgeta man oli kam slef long sin. Rod we God i yusum blong mekem ol man oli fri long sin, hemia tru long ransom sakrefaes blong Jisas Kraes.a (Matiu 20:28; Jon 3:16; 1 Jon 2:​1, 2) ?Wetaem ol Kristin oli fri long loa ya blong sin? Taem Pol i raet i go long ol tabu Kristin, hem i talem se: “Loa blong tabu spirit ya we i givim laef long yumi, we yumi joen long Jisas Kraes, i mekem yumi fri long loa ya blong sin mo ded.” (Rom 8:​2, NW ) Olgeta we oli gat hop blong laef long heven oli kasem fasin fri ya taem tabu spirit i makemaot olgeta. Nating we oli gat bodi blong mit mo blad, mo oli no stretgud olgeta, God i luk olgeta olsem we oli stret man finis mo i tekem olgeta oli kam olsem ol pikinini blong hem. (Rom 3:24; 8:​16, 17) Long grup ya blong ol tabu Kristin, Yia blong Givimbak ol Samting, no Jubili blong ol Kristin, i stat long Pentekos 33 K.T.

?Olsem wanem long ol “narafala sipsip” we oli gat hop blong laef olwe long wol ya? (Jon 10:16) Long Taosen Yia Rul blong Kraes nao bambae ol narafala sipsip oli kam fri mo ol samting i kam niuwan bakegen. Long Taosen yia ya blong Givimbak ol Samting, no Jubili blong Wan Taosen Yia, Jisas bambae i yusum ransom sakrefaes blong blesem ol man we oli bilif mo blong karemaot ol nogud samting we oli kamaot from sin. (Revelesen 21:​3, 4) Long en blong Taosen Yia Rul blong Kraes, olgeta man long wol bambae oli stretgud olgeta mo oli fri olgeta long sin mo ded. (Rom 8:21) Taem ol gudgudfala samting ya i kamtru, nao Jubili blong ol Kristin bambae i finis.

[Futnot]

[Tok blong pija long pej 26]

Jubili blong Wan Taosen Yia​—hem i wan taem blong ol samting i kam niuwan bakegen mo blong ol “narafala sipsip” oli kam fri

‘Man We i Gat Hed i Stap Tingting Gud Fastaem, Nao Biaen i Mekem Samting’

YUMI mas wantem we Tok blong God, Baebol, i lidim yumi. Yumi mas wantem samting ya moa “i winim we [yumi] wantem gol we i beswan.” (Ol Sam 19:​7-10) ?From wanem? From we “ol samting ya we waes man [Jeova] i stap tijim ol man long hem, hem i olsem springwota blong laef. Springwota ya i save sevem man we i stap long rod blong ded.” (Ol Proveb 13:14) Laef blong yumi i kam moa gud taem yumi folem ol advaes blong Baebol. Mo tu, ol advaes ya oli halpem yumi blong yumi stap longwe long ol samting we oli save spolem laef blong yumi. !Tru ya i impoten tumas we yumi lukaot save blong Baebol mo mekem ol save ya oli wok long laef blong yumi!

King Solomon blong Isrel bifo i raetem sam gudfala advaes long Ol Proveb 13:​15-25. Ol advaes ya oli save halpem yumi blong yumi tingting gud bifo we yumi mekem samting. Nao bambae yumi save gat wan laef we i hapi mo yumi save laef longtaem tu.a Hem i raetem ol sotfala proveb we oli soem olsem wanem Tok blong God i save halpem yumi blong gat fasin we i pulum narafala blong tinghae long yumi, i givhan long yumi blong mekem gud wok we God i givim long yumi, lesin long advaes we narafala i givim blong stretem yumi, mo jusum gud ol fren blong yumi. Mo tu, hem i soemaot se ol papa oli waes sipos oli rerem samting we oli save livim long ol pikinini blong olgeta taem oli ded, mo i soemaot olsem wanem ol papa oli save stretem pikinini blong olgeta wetem lav.

Man We i Gat Hed i Pulum Narafala Blong Ona Long Hem

Solomon i talem se: “Man we i gat gud hed, ol man oli save ona long hem, be man we ol man oli no trastem hem, rod blong hem i strong we i strong.” (Ol Proveb 13:15) Wan buk i talem se, long lanwis blong bifo, tok ya “gud hed” no fasin blong kasem save, i min se man i “naf blong yusum tingting blong hem, i save mekem ol gudfala disisen, mo i waes.” Wan man we i gat ol fasin olsem, kwiktaem nomo ol narafala bambae oli tinghae long hem.