?Ol Man Oli Lanem Wanem Taem Oli Lukluk Fasin Blong Yu?
1. ?Ol disaepol blong Jisas oli lanem wanem, taem oli luk ol samting we hem i mekem?
1 Jisas i talem se: “Yufala i kam joen wetem mi blong karem yok blong mi, mo yufala i lan long mi.” (Mat. 11:29, NW, futnot) I klia se ol man oli lanem samting taem oli luk gudfala fasin blong Jisas, i no long ol toktok blong hem nomo. Tingbaot wanem we ol disaepol blong hem oli lanem taem oli lukluk hem. Jisas i wan kwaet man, i kaen, mo i lavem ol man. (Mat. 8:1-3; Mak 6:30-34) Hem i soemaot trufala tingting daon. (Jon 13:2-5)Taem ol disaepol oli wokbaot wetem Jisas long wok blong prij, oli stap luk olsem wanem hem i wok strong, mo i tijim gud ol narafala long ol trutok. (Luk 8:1; 21:37, 38) ?Olsem wanem fasin blong yumi long wok blong prij, i save gat paoa long olgeta we oli lukluk yumi?
2. ?Olsem wanem ol klos mo fasin blong yumi, i save gat paoa long ol man we yumi prij long olgeta?
2 Ol Man We Yumi Prij Long Olgeta: Sipos man blong haos i luk se yumi werem ol klos we i stret, yumi gat respek, mo yumi intres long hem, hemia i save gat bigfala paoa long hem. (2 Kor. 6:3; Fil. 1:27) Oli mas luksave se yumi yusum Baebol oltaem. Samfala oli sapraes blong luk we yumi lesin long olgeta wetem respek taem oli stap toktok. Yumi no mas ting nating long ol gudfala fasin ya. Oli save pulum ol man blong lesin long gud nius blong Kingdom we yumi stap talemaot.
3. ?Ol gudfala fasin blong yumi oli save gat paoa olsem wanem long ol Kristin brata sista blong yumi?
3 Ol Brata Mo Sista Blong Yumi: Tingbaot olsem wanem gudfala fasin blong yumi i save gat bigfala paoa tu, long ol Kristin brata mo sista blong yumi. Strong tingting blong yumi long wok blong prij, i save givhan long olgeta blong gat semfala tingting long wok ya. Olsem we naef i save sapenem naef, yumi tu, sipos yumi reregud ol defren fastok, bambae samting ya i pulum ol narafala tu blong oli kamgud moa long wok blong prij. (Prov. 27:17) Traehad we yumi mekem blong raetemdaon ol stret save long saed blong ol man we oli intres, mo blong gobak kwik blong luk olgeta bakegen, bambae i pulum narafala tu blong mekem sem mak. Fasin blong yumi blong wok strong blong finisim olgeta wok we God i givim long yumi blong mekem, i save gat paoa long ol brata mo sista blong yumi long saed blong wok blong prij.—2 Tim. 4:5.
4. ?From wanem i gud samtaem blong skelem ol samting we yumi mekem mo talem?
4 Samtaem i gud blong skelem samting we yu stap mekem mo talem, mo olsem wanem fasin blong yu i gat paoa long narafala. Gudfala eksampol blong yumi bambae i mekem Jeova i glad, mo bambae i mekem se yumi save talem sem samting olsem aposol Pol, se: “Oltaem, yufala i mas folem fasin blong mi, olsem we mi mi stap folem fasin blong Kraes.”—1 Kor. 11:1.