Leta Blong Hed Kampani
Yufala Ol Gudfala Witnes Blong Jeova:
!Yumi glad tumas long spesel raet ya we yumi gat blong holem nem blong Jeova, Haefala King blong heven mo wol! Nem ya bambae i stap gogo i no save finis mo i no save lus samtaem. Mo i no gat nara nem tu we i olsem nem ya. Jeova nomo i givim nem ya long yumi. Mo stat long 1931 nao, ol man oli stat save yumi long nem ya we i makemaot yumi long ol narafala. (Aes. 43:10) Yumi praod blong talemaot se yumi ol Witnes blong Jeova.
Setan i traehad oltaem, we hem i neva spel, blong haedem nem blong God. Olgeta kantri blong wol ya oli stap aninit long paoa blong Setan, taswe oli sakemaot nem blong Jeova. Bigfala Babilon, we hemia olgeta giaman skul long wol, hem i no laekem nating nem blong God mo i karemaot nem ya finis long ol Baebol we hem i tanem. Jisas i mekem i defren olgeta. Hem i leftemap nem blong Papa blong hem. Taem hem i tijim ol man blong hem blong prea, faswan samting we hem i tokbaot long prea ya, hemia nem blong Papa blong hem. Hem i se: “Yufala i mas prea olsem: Papa blong mifala long heven, plis mekem we ol man oli holem nem blong yu i stap tabu.” (Mat. 6:9, NW) Long wan narafala taem bakegen, hem i prea long Papa blong hem i se: “Ol man ya we yu yu tekemaot olgeta long wol ya blong givim long mi, mi mi stap talemaot nem blong yu long olgeta blong mekem olgeta oli save yu.” (Jon 17:6) Yumi wantem folem fasin blong Jisas. Ale yumi mas gat strong tingting naoia, i bitim bifo, blong talemaot nem blong Jeova wetem ful paoa blong yumi long olgeta ples long wol.
Vas blong yia blong 2009 se: “Talemaot gud nius fulwan.” Vas ya i pulum yumi blong traehad moa blong talemaot gud nius long fasin we i fulwan. (Wok 20:24) I sua se Jeova i blesem bigwan ol traehad we yumi mekem long seves yia ya we i jes pas. Wok blong givim witnes raon long wol i gohed bigwan mo samting ya i leftemap nem blong Jeova. Wan niufala namba blong 7,313,173 pablisa oli wok blong talemaot gud nius. Oli tijim ol man we hat blong olgeta i stret, mo we oli wantem save olsem wanem blong winim ol problem we oli stap fesem evri dei. I gat 18,168,323 man we oli kam long Memoriol blong tingbaot ded blong Kraes. Namba ya i soemaot se maet plante milian man yet bambae oli kam Witnes blong Jeova bifo we rabis wol ya i lus.
Jeova i letem taem naoia, taswe yumi mas gohed blong wok strong blong talemaot gud nius blong Kingdom. Bambae yumi yusum evri rod blong go talemaot gud nius ya long ol man long ol teritori blong yumi. (Mat. 24:14; Mak 13:10) Nating se yumi prij long haos wanwan, long rod, taem yumi raetem leta mo yusum telefon, mo yumi tekem janis blong prij, be oltaem yumi mas traehad blong talemaot nem blong Jeova mo stamba tingting blong hem long olgeta man.
Yumi trastem Jeova se bambae hem i tekem aksen i no longtaem blong soemaot long olgeta man se nem blong hem i tabu. (Esik. 36:23) Long dei ya blong God we i stap kam kwiktaem, bambae God i satem maot blong ol man we oli stap spolem nem blong hem. !Long dei ya, ol man we oli holemstrong long Jeova mo we oli bin talemaot nem blong Jeova mo leftemap hae rul blong hem, bambae oli glad tumas!
Jeova i keagud long ol man blong hem. Hem i soemaot samting ya long ol Distrik mo Intenasnal asembli ya ‘!Lukaot Gud Oltaem!’ we i kamaot long plante ples long wol long yia 2009. Ol asembli ya oli rili wan bigfala samting long histri blong ol tiokratik wok blong yumi, from we oli pulum yumi blong tingbaot se i impoten tumas blong lukaot gud long dei blong Jeova.—Mak 13:37; 1 Tes. 5:1, 2, 4.
!Tru ya, Jeova i gud tumas! Hem i mekem yumi glad. Hem i putum yumi long ples we i gat gudfala gras long hem, blong yumi save spelgud. Hem i lidim yumi i go long kwaet ples.—Sam 23:1, 2; 100:2, 5.
!Yu save sua fulwan se Jeova bambae i gohed blong blesem yu taem yu bisi long ol wok blong Kingdom long ol manis we oli stap kam!
Mifala i sanem lav blong mifala i go long yufala evriwan we yufala i stap long bigfala famle ya blong ol Kristin brata sista long wol,
Ol brata blong yufala,
Hed Kampani Blong Ol Witnes Blong Jeova