Baebol i Talem Wanem

?From Wanem God i No Kilim Setan i Ded?

?SIPOS wan narafala man i harem nogud long wan trabol, bambae yu givhan long hem? Plante taem ol man oli hareap blong go long ples blong disasta, blong givhan mo sevem laef blong ol man we oli no save olgeta nating. Be maet wan man i askem se: ‘Setan i stamba blong plante trabol we i mekem ol man oli harem nogud. ?From wanem God i no hareap blong kilim hem i ded?’

Blong ansarem kwestin ya, maet i gud blong tingbaot wan bigfala kot. Man ya we kot bambae i jajem, i kilim wan man i ded. Be hem i wari mo i traehad blong stopem kot ya. Hem i talem se jaj i stap giaman. Mo tu, hem i talem se jaj ya i pem ol man we oli lesin long ol pruf mo mekem wan desisen, blong oli folem tingting blong hem nomo. Ale plante witnes oli girap, mo oli talemaot ol samting we oli save long saed blong bisnes ya.

Jaj i save se sipos kot i gohed longtaem, samting ya bambae i mekem tumas problem long ol man. Hem i wantem stretem trabol ya kwiktaem nomo. Be hem i save se, desisen we kot i mekem bambae i kam wan rul we oli save folem blong stretem ol narafala trabol long fiuja. Taswe, hem i givim taem long tufala saed, blong oli talemaot evri samting we i save givhan long olgeta.

Pijatok ya i soemaot wanem we “Setan,” “bigfala algita ya,” no “snek ya,” i mekem agensem Jeova, we i ‘Hae God, King blong olgeta ples long wol.’ (Revelesen 12:9; Ol Sam 83:18) ?Setan, hem i hu? ?Mo wanem nogud tok we hem i sakem agensem Jeova God? ?Mo tu, wetaem Jeova bambae i kilim hem i ded?

?From Wanem i Nidim Wan Rul Blong Folem Long Fiuja?

Fastaem, Setan i wan spirit we i stret gud olgeta, hem i wan long ol enjel blong God. (Job 1:6, 7) Enjel ya i kam Setan from we hem i tingbaot hem wan tumas, mo i wantem se ol man oli wosipim hem. Taswe, hem i talem se God i no gat raet blong rulum ol man. Mo hem i givim tingting ya tu se ol man oli no nid blong obei long God. Hem i talem se, ol man oli mekem wok blong God from we hem i stap blesem olgeta nomo. Mo hem i ting se, taem ol man oli kasem trabol, bambae oli “tok nogud” long Man ya we i Mekem Olgeta, stret long fes blong hem.—Job 1:8-11; 2:4, 5.

God i no save yusum paoa blong hem nomo blong ansa long ol nogud tok we Setan i sakem agensem hem. Sipos God i kilim Setan i ded wantaem nomo long garen blong Iden, maet bambae sam man oli ting se tok blong Setan i tru. From samting ya, God ya we i gat olgeta paoa, i mekem kot blong stretem bisnes ya we i mekem tingting blong ol man i trabol.

Jeova God i holemstrong long ol tok blong hem mo ol rul blong stret fasin. Hem i talemaot se tufala saed blong trabol ya oli mas gat ol witnes blong olgeta. Ol witnes ya bambae oli talemaot ol save blong pruvum se saed blong olgeta i stret. God i letem taem i pas blong givim janis long ol pikinini blong Adam, blong oli pruvum long laef blong olgeta, se oli stap long saed blong God. Oli mekem olsem taem oli jusum blong holemstrong long hem from we oli lavem hem, nomata wanem kaen trabol i kasem olgeta.

?Yumi Mas Wet Kasem Wetaem?

Jeova i save gud se taem kot ya i stap stretem bisnes ya, ol man oli gohed blong harem nogud. Nating we i olsem, hem i gat strong tingting blong finisim kot ya kwiktaem. Baebol i tokbaot Jeova se, hem i “Papa blong yumi we i gat sore, hem i God we i stamba blong fasin blong givhan.” (2 Korin 1:3) I klia se ‘God ya we i stamba blong fasin blong givhan,’ bambae i no letem Setan i stap laef taem i stretem trabol ya finis, mo bambae Hem i no letem ol trabol we Setan i mekem oli stap. Be taem bigfala kot long heven mo wol i stap gohed yet blong jajem trabol ya, God i no save spolem Setan.

Taem Jeova i stretem bisnes ya finis, hae rul blong hem bambae i win. Kot we God i mekem agensem Setan, bambae i stap olsem desisen we hem i folem gogo i no save finis. Sipos i gat wan trabol olsem we i kamaot bakegen long fiuja, rod we God i save yusum blong stretem trabol ya wetem Setan, hemia nao rod we bambae hem i folem. Bambae hem i no nid blong mekem kot bakegen.

I no longtaem, Jeova God bambae i yusum Pikinini blong hem blong kilim Setan i ded, mo blong karemaot ol rabis fasin we hem i putum long wol. Baebol i talemaot taem ya we “Kraes bambae i spolem ol jif blong ol devel we oli stap olbaot long wol ya, mo ol gavman blong olgeta, wetem olgeta we oli gat paoa, nao bambae oli lus olgeta, mo bambae hem i finis long king, i givimbak olgeta paoa blong hem long God, Papa blong hem. Be yumi save. Kraes i mas rul fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes. Mo laswan blong ol enemi ya we God bambae i winim olgeta, hemia ded.”—1 Korin 15:24-26.

Yumi glad long promes we Baebol i talemaot se, olgeta ples long wol bambae oli kam paradaes. !Ol man bambae oli laef long wan paradaes we i gat pis long hem. !Hemia nao paradaes ya we God i wantem fastaem! “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11, 29.

Yu traem tingbaot bigfala blesing we bambae ol man blong God oli wet blong kasem. Hemia nao blesing we Baebol i tokbaot, se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.

?YU YU BIN TINGBAOT?

● ?Wanem giaman toktok we Setan i talem blong spolem God mo ol man?—Job 1:8-11.

● ?Wanem sam fasin blong God we oli mekem yumi save se, hem bambae i spolem Setan long fiuja?—2 Korin 1:3.

● ?Baebol i talemaot wanem fiuja blong ol man?—Revelesen 21:3, 4.

[Tok blong pija long pej 10]

Desisen we kot i mekem bambae i kam wan rul we oli folem blong stretem ol narafala trabol long fiuja. Taswe, God i givim taem long tufala saed blong oli talemaot evri samting we i save givhan long olgeta