Las Storian Bifo Baptaes

Klosap oltaem, i gat baptaes long ol asembli blong ol Witnes blong Jehova. Long en blong tok blong baptaes, brata i askem long olgeta we oli wantem baptaes, blong oli stanap mo ansarem tufala kwestin ya long klia voes:

1. ?Yu yu tanem tingting blong yu from ol sin blong yu mo givim laef blong yu i go long Jehova, mo akseptem rod we hem i yusum blong sevem yu tru long Jisas Kraes?

2. ?Yu yu kasem save se taem yu baptaes, yu kam wan Witnes blong Jehova mo yu stap insaed long oganaesesen blong hem?

Taem olgeta we oli wantem baptaes oli talem ‘yes’ long tufala kwestin ya, oli stap “talemaot long fes blong ol man” se oli bilif long ransom sakrefaes, mo oli bin givim laef blong olgeta i go fulwan long Jehova. (Rom 10:9, 10) Oli mas prea mo tingting dip long ol kwestin ya bifo long dei blong baptaes, blong oli save talemaot prapa bilif blong olgeta taem oli ansa.

?Yu yu prea finis blong givim laef blong yu long Jehova, mo yu promes blong wosipim hem nomo mo putum wok blong hem long fasples long laef blong yu?

?Naoia yu sua gud se yu rere blong baptaes?

?Wanem klos i stret blong werem taem yu baptaes? (1 Tim. 2:9, 10; Jon 15:19; Fil. 1:10)

Yumi mas werem klos we i soemaot “respek mo stret tingting,” blong ol narafala oli luksave se yumi man blong “wosipim God.” Taswe, olgeta we oli baptaes, oli no mas putum klos blong swim we i soemaot bodi blong olgeta o klos we i gat raeting long hem. Oli mas putum klos we i gud, i klin, i no pulum ae, mo i stret blong werem blong baptaes.

?Wanem fasin i stret blong wan Kristin i mekem taem hem i baptaes? (Luk 3:21, 22)

Ol Kristin tede oli mas folem eksampol blong Jisas taem hem i baptaes. Hem i tinghevi long baptaes, mo i soemaot samting ya long ol fasin blong hem mo ol samting we hem i mekem. Taswe, ples blong baptaes i no wan ples blong tok fani, pleplei, swimswim, o mekem narafala fasin we i no soemaot respek. Mo tu, Kristin we i baptaes bambae i no mekem olsem we hem i win finis. I tru se baptaes i wan taem blong glad, be yumi mas soemaot glad ya long fasin we i stret.

Sipos yu go oltaem long miting mo joen wetem kongregesen, ?olsem wanem samting ya bambae i givhan long yu blong holem promes ya we yu givim laef blong yu long Jehova?

Afta we yu baptaes, ?from wanem i impoten we yu gohed blong folem wan program blong stadi yu wan mo joen oltaem long wok blong prij?

ADVAES YA I GO LONG OL ELDA

Taem wan pablisa i talemaot long ol elda se hem i wantem baptaes, oli mas pulum hem blong i stadi gud long haf ya “Ol Kwestin Blong Baptaes,” long pej 12-49 blong buk ya. Oli talem long hem blong i lukluk haf ya “Tok Ya i Go Long Pablisa We i No Baptaes,” long pej 7, we i eksplenem olsem wanem blong rere blong storian wetem ol elda. Olsem haf ya i talem, long storian ya, hem i save yusum buk ya mo ol not we hem i raetem. I no nid blong wan narafala i tokbaot ol kwestin ya wetem hem, bifo we hem i storian wetem ol elda.

Pablisa i mas talemaot long kodineta blong ol elda se hem i wantem baptaes. Afta we hem i stadi long “Ol Kwestin Blong Baptaes,” kodineta bambae i askem sipos hem i prea finis blong givim laef blong hem long Jehova blong mekem samting we Hem i wantem. Sipos hem i talem yes, kodineta bambae i mekem plan blong tu elda i storian wetem hem long “Ol Kwestin Blong Baptaes.” Wan elda i mekem fas haf blong ol kwestin ya mo narafala elda i mekem seken haf. Tufala i save mekem olsem enitaem, i no nid blong wet kasem taem we oli talemaot se bambae i gat wan asembli.

I nidim blong storian tu taem nomo blong mekem ol kwestin blong baptaes, wanwan storian i samwe long wan aoa. Be sipos i nidim moa taem, i oraet nomo. Oli mas statem mo finisim tufala storian ya wetem prea. Pablisa o elda i no mas hariap blong finisim ol kwestin. Tufala elda we i mekem ol kwestin ya, tufala i mas luksave se hemia wan impoten wok long program blong olgeta.

I moagud blong askem ol kwestin long ol pablisa wanwan, i no long wan grup. Taem pablisa i ansa long ol kwestin, elda i luksave klia sipos hem i kasem save gud long ol poen, mo sipos hem i rere blong baptaes. Mo tu, taem elda i storian wetem ol pablisa wanwan, ating oli no save fraet blong toktok. Sipos hasban mo waef tugeta i wantem baptaes, maet elda i askem ol kwestin long tufala wantaem.

Sipos elda i askem ol kwestin long wan sista, tufala i mas storian long wan ples we ol narafala oli save luk tufala, be oli no save harem ol tok blong tufala. Sipos i gat nid blong elda i tekem wan narafala i go wetem hem, hem i mas tekem wan elda o man blong givhan, i dipen long haf we tufala i mekem, olsem nekis paragraf i eksplenem.

Long sam kongregesen we i no gat naf elda, maet man blong givhan we i naf, mo we i gat fasin blong skelem gud mo luksave samting, i save mekem ol kwestin blong baptaes long “Haf 1: Ol Kristin Bilif.” Be elda nomo bambae i mekem “Haf 2: Kristin Laef.” Sipos i no gat naf brata, oli save talemaot long eria elda, nao hem bambae i luk sipos wan kongregesen klosap i save givhan.

Sipos hemia we i wantem baptaes i no kasem 18 yia yet, papa mo mama blong hem o wan long tufala we i stap long trutok, i mas stap long taem blong storian ya. Sipos papa o mama i no save stap, tu elda (o wan elda wetem wan man blong givhan, i dipen long wanem haf we oli stap mekem) i mas joen long storian ya.

Ol elda oli mas meksua se pablisa we i wantem baptaes i gat naf save long ol stamba tijing blong Baebol. Mo tu, oli mas luksave sipos hem i rili laekem trutok mo i gat bigfala respek long oganaesesen blong Jehova. Sipos pablisa i no gat naf save long ol stamba tijing blong Baebol, ol elda oli mekem plan blong narafala i givhan moa long hem, nao bambae hem i save kam naf blong baptaes nekis taem. Maet sam pablisa oli nidim moa taem blong tinghevi long wok blong prij mo obei long oganaesesen blong Jehova. Ol elda oli mas mekem plan olsem wanem blong yusum gud aoa ya blong storian, nao bambae oli luksave sipos pablisa i rere blong baptaes. Maet oli spenem moa taem long sam kwestin mo smoltaem long sam narafala kwestin. Nating se i olsem, oli mas askem olgeta kwestin.

Afta we tufala elda i finisim ol kwestin, bambae tufala i mekem wan miting blong tokbaot sipos pablisa ya i naf blong baptaes. Tufala i mas tingbaot fasin blong laef blong pablisa bifo, wanem we hem i naf blong mekem, mo sam narafala samting olsem. Tufala i wantem luksave sipos hem i stap traehad blong fren gud wetem Jehova, mo sipos hem i kasem save gud long ol stamba trutok blong Baebol. Sipos tufala elda i soemaot lav taem tufala i givhan long olgeta we oli wantem baptaes, bambae olgeta ya oli save kam ol man blong God we oli nafgud blong mekem impoten wok blong talemaot gud nius.

Biaen, wan long tufala elda ya o tufala tugeta, i mas go luk pablisa we i wantem baptaes, blong talem long hem sipos hem i naf blong baptaes. Sipos hem i naf, tufala i mas storian wetem hem long haf ya “Las Storian Bifo Baptaes” long pej 51-53. Sipos pablisa i no finisim yet buk ya !Enjoem Laef Olwe!, tufala elda i mas pulum hem blong i finisim gud buk ya afta we hem i baptaes. Talem long pablisa se bambae oli putum dei we hem i baptaes long Ripot Blong Pablisa Long Kongregesen. Talem long hem se ol elda oli mas kasem ol save ya long saed blong hem, blong oganaesesen i save gohed blong lukaot long wok blong ol Witnes blong Jehova long fulwol, mo blong hem i save joen long ol wok blong kongregesen mo kasem help blong ol elda. Mo tu, ol elda oli save rimaenem ol niufala pablisa se oli yusum ol save ya long saed blong olgeta, folem Global Data Protection Policy blong ol Witnes blong Jehova, we oli save faenem long jw.org. Storian ya i no mas bitim ten minit.

Wan yia afta we pablisa i baptaes, tu elda i mas go luk hem bakegen, blong leftemap tingting blong hem mo givim sam advaes blong givhan long hem. Wan long tufala elda ya, hemia elda we i lukaot long grup blong prij we pablisa i stap long hem. Sipos pablisa we i baptaes i no kasem 18 yia yet, papa mo mama blong hem o wan long tufala we i stap long trutok, i mas stap tu. Miting ya i mas leftemap tingting blong hem, mo mekem hem i harem gud. Tufala elda ya bambae i tokbaot olsem wanem hem i stap progres, mo givim sam advaes blong hem i gohed blong folem wan gudfala program blong stadi Baebol hem wan, ridim Baebol evri dei, mekem famle wosip evri wik, go oltaem long miting mo givim ansa, mo prij evri wik. (Efes. 5:15, 16) Sipos hem i no finisim buk ya !Enjoem Laef Olwe!, tufala elda bambae i mekem plan blong wan brata o sista i stadi wetem hem long buk ya. Tufala i mas soemaot lav mo talem plante gudfala toktok long hem. Plante taem, i naf blong givim wan o tu advaes nomo long hem.