Stori 47

Wan Stilman Long Isrel

!YU LUK! !Man ya i stap berem sam samting insaed long haos tapolen blong hem! Wan naesfala klos, wetem sam gol mo silva. Hem i karem ol samting ya long taon ya Jeriko. ?Be oli mas mekem wanem wetem ol samting ya blong Jeriko? ?Yu yu rimemba?

Oli mas spolem olgeta, mo oli mas putum ol gol mo silva i stap wetem ol sas samting long haos tapolen blong Jeova. Ale, ol man ya oli no obei long God. Oli stilim samting we i blong God. Man ya, hem i Akan, mo olgeta we oli stap wetem hem, oli sam famle blong hem. Bambae yumi luk wanem i hapen.

Afta we Akan i stilim ol samting ya, Josua i sanem sam man oli go blong mekem faet long taon ya Eae. Be ol man blong taon ya oli winim olgeta. Oli kilim sam long olgeta i ded, mo ol narawan oli fraet mo oli ronwe. Taem Josua i harem nius ya, hem i harem nogud tumas. Hem i bodaon we fes blong hem i kasem graon, nao hem i prea long Jeova i se: ‘?From wanem yu yu letem samting ya i hapen long mifala?’

Jeova i talem long hem i se: ‘!Josua, yu girap! Ol man Isrel oli mekem wan bigfala sin. Ol samting we mi mi talem se oli mas spolem olgeta no putum olgeta long haos tapolen blong mi, be oli stilim sam long olgeta. Oli stilim wan naesfala klos mo oli haedem. Bambae mi mi no save blesem yufala, gogo yufala i spolem samting ya, mo spolem man ya we i bin stilim ol samting ya.’ Jeova i talem se bambae hem i soemaot long Josua hu ya man nogud ya.

Ale, Josua i singaot olgeta man oli kam wanples, mo Jeova i jusumaot rabis man ya Akan. Nao Akan i talem se: ‘Yes i tru. Mi mi mekem i no stret. Mi mi faenem wan flas klos, mo sam silva mo wan pis gol. Mi mi laekem tumas ol samting ya, nao mi karem olgeta. Sipos yufala i wantem luk olgeta, mi mi berem olgeta oli stap long haos tapolen blong mi.’

Sam man oli go faenem ol samting ya mo oli karem olgeta i kam long Josua. Nao Josua i talem long Akan se: ‘?From wanem yu yu mekem trabol i kam long yumi? !Naoia Jeova bambae i mekem trabol i kam long yu!’ Nao olgeta evriwan oli stonem man ya Akan wetem ol famle blong hem, gogo oli ded. Stori ya i soemaot se yumi neva mas tekem samting we i blong narafala man.

Nao ol man Isrel oli go mekem faet long taon ya Eae bakegen. Long taem ya, Jeova i givhan long olgeta, nao oli winim faet ya.

Josua 7⁠:​1-26; 8⁠:​1-29.

Stori 48

Ol Man Gibeon We Oli Waes

PLANTE taon long Kenan oli mekemrere blong faet agensem ol man Isrel. Oli ting se oli save winim ol man Isrel. Be ol man blong taon ya Gibeon oli no ting se oli save win. Oli luksave se God i stap givhan long ol man Isrel, mo oli no wantem faet agensem God. ?Yu yu save wanem samting ol man Gibeon oli mekem?

Oli mekem plan blong giaman long Josua se oli stap long wan kantri farawe. Ale, sam long olgeta oli werem ol klos we i brobrok, mo oli putum ol sandel we oli nogud finis. Oli tekem ol bred we oli drae nogud finis, oli fulumap long ol bag we oli brobrok, mo oli putum ol samting ya long ol dongki blong olgeta. Nao oli kam luk Josua mo oli talem se: ‘Mifala ya, mifala i aot long wan kantri longwe. Mifala i harem nius blong ol samting we God blong yufala, Jeova, i stap mekem. Mifala i harem nius blong ol samting we hem i mekem long ol man Ijip blong sevem yufala. Ale ol lida blong mifala oli talem long mifala, se mifala i mas mekemrere sam kakae blong rod, nao mifala i mas kam luk yufala, mo mifala i mas talem long yufala se: “Mifala i stap long han blong yufala nomo. Yufala i mas mekem promes se bambae yufala i no mekem faet long mifala.” Yu luk. Mifala i wokbaot longwe tumas. Ol klos blong mifala oli brobrok, mo ol bred ya we mifala i karem blong kakae long rod, oli drae nogud finis.’

Josua wetem ol narafala lida blong Isrel oli bilivim tok blong ol man Gibeon ya. Ale, oli mekem promes se bambae oli no save mekem faet long olgeta. Be biaen long tri dei, Josua olgeta oli jes harem se ples blong ol man Gibeon i stap klosap nomo.

Nao Josua i talem long olgeta se: ‘?Weswe yufala i giaman long mifala? Yufala i talem se ples blong yufala i longwe.’

Ol man Gibeon oli talem long hem se: ‘Masta, mifala i mekem olsem from we mifala i harem we God blong yufala Jeova i mekem promes long yufala, se bambae i givim kantri ya Kenan long yufala. From samting ya, mifala i fraet tumas long yufala, se bambae yufala i kam insaed long kantri ya, mo bambae yufala i kilim mifala evriwan i ded.’ Ol man Isrel oli holem promes blong olgeta, oli no kilim ol man Gibeon ya i ded. Be oli mekem olgeta oli kam slef blong olgeta.

Nao taem king blong Jerusalem i harem nius se ol man Gibeon oli mekem fren wetem ol man Isrel, hem i kros tumas. Ale hem i sanem toktok i go long fo narafala king i se: ‘Plis, yufala i kam givhan long mi, bambae yumi go mekem faet long ol man Gibeon.’ Ale, ol faef king ya oli joen wanples, nao oli mekem faet long ol man Gibeon. ?Olsem wanem? ?I waes we ol man Gibeon oli mekem fren wetem ol man Isrel? Samting ya i pulum ol king ya blong kam mekem faet long olgeta. Bambae yumi luk sipos oli waes no nogat.

Josua 9⁠:​1-27; 10⁠:​1-5.