Stori 67

Jehosafat i Trastem Jeova

?YU SAVE hu ya ol man ya? ?Mo oli stap mekem wanem? Oli stap go blong faet, mo ol man we oli wokbaot fastaem long olgeta oli stap singsing. Be maet yu wantem save se: ‘?From wanem ol man blong singsing oli no stap karem wan naef blong faet mo spia, blong olgeta tu oli save faet?’ Bambae yumi faenem ansa blong kwestin ya.

Jehosafat i king blong tufala laen blong Isrel. Hem i stap laef long semtaem we King Ehab mo Kwin Jesebel i rul long 10 laen blong Isrel long not. Be Jehosafat i wan gudfala king. Papa blong hem Asa, hem tu i bin rul long gudfala fasin. Taswe, blong plante plante yia, ol man long tufala laen blong Isrel long saot oli haremgud.

Be wan samting i hapen we i mekem ol man oli fraet. Sam man blong karem tok oli kam talem long Jehosafat se: ‘King. I gat plante soldia oli aot long Moab, Amon, mo Edom, oli stap kam blong mekem faet long yu.’ Nao plante man Isrel oli kam wanples long Jerusalem blong askem help blong Jeova. Oli go long haos blong God, mo long ples ya Jehosafat i prea se: ‘Jeova, yu yu God blong mifala. Mifala i no save se bambae mifala i mekem olsem wanem. Mifala i no naf nating long fes blong bigfala ami ya. Mifala i stap luk long yu blong yu halpem mifala.’

Jeova i lesin long prea ya, mo hem i sanem wan man blong hem blong i talem long olgeta se: ‘Faet ya, ansa blong hem i no stap long yufala, i stap long God. Bambae yufala i no go mekem faet long olgeta, yufala i stap stanap rere nomo, yufala i wet. Bambae yufala i luk we Jeova i mekem yufala i win.’

Long nekis dei, long eli moning, Jehosafat i talem long ol man se: ‘!Yufala i mas trastem Jeova!’ Nao hem i talem long ol man blong singsing blong oli wokbaot i go fastaem long ol soldia, oli singsing presem Jeova. ?Yu save wanem i hapen taem oli kam klosap long ol enemi blong olgeta? Jeova i mekem se ol enemi ya oli kilkilim olgeta bakegen. !Taem ol man Isrel oli kamtru, oli luk we olgeta soldia ya evriwan oli ded finis!

?Yu ting se Jehosafat i waes taem hem i trastem Jeova? Yumi waes tu sipos yumi trastem Jeova.

1 King 22⁠:​41-53; 2 Kronikel 20⁠:​1-30.

Stori 68

Tufala Boe i Laef Bakegen

?SIPOS yu yu ded nao yu laef bakegen, yu ting se mama blong yu bambae i haremgud? !Bambae hem i glad we i glad! ?Be wan dedman i save laef bakegen? ?Samting ya i kamaot finis no nogat?

Traem luk man, woman, mo smol boe long pija ya. Man ya, hem i profet Elaeja. Woman ya, hem i wan wido long taon ya Jarefat, mo boe ya, hem i pikinini blong woman ya. Wan dei, boe ya i sik we i sik gogo hem i ded. Ale, Elaeja i talem long woman ya se: ‘Yu givim boe ya long mi.’

Elaeja i karem boe ya i go antap long wan rum mo i putum hem long bed. Nao hem i prea se: ‘Jeova. Plis yu mekem pikinini ya i laef bakegen.’ !Nao boe ya i stat pulum win bakegen! Elaeja i tekem boe ya i godaon long wido ya, i talem long hem se: ‘!Hemia pikinini blong yu! !Hem i laef bakegen finis!’ Naoia yu save from wanem mama ya i glad we i glad.

Wan narafala impoten profet blong Jeova, hemia Elisa. Hem i wok wetem Elaeja blong givhan long hem. Afta we sam taem i pas, Jeova i givim paoa long Elisa tu blong i mekem merikel. Ale, wan dei Elisa i go long taon ya Sunem. Long ples ya, wan woman i mekem i gud tumas long hem. Biaen, woman ya i gat wan pikinini boe.

Taem pikinini ya i kam bigwan lelebet, wan dei, hem i go long garen blong lukaot papa blong hem we i stap wok long garen. Nao wantaem nomo, boe ya i krae bigwan i se: ‘!Papa, hed blong mi i soa!’ Oli karem boe ya i gobak long haos, be biaen hem i ded. !Mama blong hem i harem nogud tumas! Wantaem nomo, hem i go singaot Elisa.

Taem Elisa i kamtru, hem i go insaed long rum we dedbodi blong pikinini ya i slip long hem. Hem i prea long Jeova, nao i slip antap long pikinini ya. I no longtaem, bodi blong pikinini ya i stat kam wom, mo hem i snis seven taem. Mama blong boe ya i kam, nao i luk we boe blong hem i laef bakegen. !Hem i glad we i glad!

I gat plante, plante man we oli ded finis. Ol famle mo fren blong olgeta oli harem nogud tumas from. Yumi no gat paoa blong mekem ol dedman ya oli laef bakegen. Be Jeova i gat paoa. Long wan narafala japta, bambae yumi tokbaot olsem wanem bambae hem i mekem plante milian man oli laef bakegen.

1 King 17⁠:​8-24; 2 King 4⁠:​8-37.