Stori 87

Yangfala Jisas Long Haos Blong God

TRAEM lukluk yangfala boe ya we i stap toktok long ol olfala man. Ol man ya, oli ol tija long haos blong God long Jerusalem. Mo boe ya, hem i Jisas. Naoia hem i bigwan lelebet. Hem i gat 12 yia blong hem.

Ol tija oli sapraes tumas long Jisas from we hem i save plante samting long saed blong God mo Baebol. ?Be from wanem Josef mo Meri i no stap long pija ya? ?Tufala i stap wea? Bambae yumi luk.

Evri yia, Josef i tekem famle blong hem i go long Jerusalem blong oli joen long spesel lafet ya Pasova. Trip ya, stat long Nasaret i go long Jerusalem, hem i longfala. Ol man long taem bifo oli no gat trak, mo i no gat plen tu. Bighaf blong ol man oli stap wokbaot long leg nomo. Ale, oli wokbaot tri dei, nao oli kamtru long Jerusalem.

Naoia, Josef i gat plante pikinini. Jisas i gat sam smol brata mo sista we Josef mo Meri i mas lukaot long olgeta tu. Ale, long yia ya, tufala i aot long Jerusalem wetem ol pikinini blong tufala, oli stap wokbaot i gobak long ples blong olgeta, Nasaret. Tufala i ting se Jisas i stap wetem bigfala hip blong ol man we oli stap wokbaot. Be long en blong dei, taem oli stop blong spel smol, tufala i no save faenem Jisas. !Tufala i traem lukaot hem long ol famle mo fren blong tufala, be tufala i no save faenem hem! Ale, tufala i tanraon, tufala i gobak long Jerusalem blong lukaot Jisas.

Tufala i lukaot Jisas gogo, tufala i faenem hem we i stap sidaon long medel blong ol tija. Hem i stap lesin long tok blong olgeta, mo i stap askem kwestin long olgeta. Mo olgeta evriwan we oli harem hem oli sapraes tumas long waes blong hem. Nao Meri i tok long hem se: ‘Pikinini blong mi. ?From wanem yu mekem long mitufala olsem? Mi wetem papa blong yu, mitufala i stap lukaot yu we mitufala i stap harem nogud tumas.’

Jisas i talem se: ‘?From wanem yutufala i stap lukaot mi? ?Yutufala i no save se mi mi mas stap long haos blong Papa blong mi?’

Yes, Jisas i laekem tumas blong stap long ples ya we hem i save kasem moa save long saed blong God. Yumi mas gat fasin ya tu. Taem oli gobak long Nasaret, Jisas i stap joen long ol miting blong wosip evri wik. Oltaem hem i lesingud, ale hem i kasem plante save long Baebol. I gud we yumi mekem olsem Jisas.

Luk 2⁠:​41-52; Matiu 13⁠:​53-56.

Stori 88

Jon i Baptaesem Jisas

LONG pija ya, i gat wan sotleg i stap antap long hed blong wan man. Man ya hem i Jisas. Long taem ya, hem i gat samwe long 30 yia blong hem. Mo narafala man ya hem i Jon. Yumi lanem wan samting finis long saed blong Jon. ?Yu tingbaot we Meri i bin go luk wan famle blong hem Elisabet, nao pikinini long bel blong Elisabet i muv from we hem i glad tumas? Pikinini ya hem i Jon we i stap yet long bel blong mama blong hem. ?Be Jon mo Jisas tufala i stap mekem wanem naoia?

Jon i jes draonem Jisas long wota blong Jodan Reva. Hemia nao fasin blong baptaesem man. Hem i draonem bodi blong Jisas fulwan, nao biaen, hem i leftemap Jisas i kamaot long wota bakegen. Hemia wok blong Jon, taswe ol man oli stap singaot hem se Jon Baptaes. ?Be from wanem Jon i baptaesem Jisas?

Jon i baptaesem Jisas from we Jisas i kam askem long hem blong mekem olsem. Jon i stap baptaesem ol man we oli wantem soem se oli sore from ol nogud samting we oli bin mekem. Be Jisas i no mekem wan nogud samting. Jisas i stret Pikinini blong God we i bin kamdaon long heven. Taswe, yumi save se hem i askem long Jon blong baptaesem hem from wan narafala risen. Bambae yumi luk wanem risen ya.

Bifo we Jisas i kam luk Jon, hem i wan kapenta. Kapenta i wan man we i stap wokem ol samting long wud, olsem ol tebol mo jea. Josef, man blong Meri, hem i wan kapenta, mo hem nao i tijim Jisas blong mekem wok ya. Be Jeova i no sanem Pikinini blong hem i kam long wol ya blong mekem wok blong kapenta. Hem i gat wan spesel wok blong Jisas, mo naoia i stret taem blong Jisas i statem wok ya. Ale Jisas i soem se hem i rere blong mekem wok blong Papa blong hem taem hem i kam askem long Jon blong i baptaesem hem. ?God i glad long Jisas?

Yes, hem i mekem wan samting blong soem se hem i glad long Jisas. Taem Jisas i kamaot long wota, voes blong God i kamaot long heven i se: ‘Hemia pikinini blong mi, we mi mi glad tumas long hem.’ Mo tu, i luk olsem we heven i open nao sotleg ya i kamdaon long Jisas. Be hem i no wan trufala sotleg. Hem i luk olsem wan sotleg, be hem i rili tabu spirit blong God.

Jisas i gat plante samting blong tingbaot, ale hem i go long wan ples we i no gat man long hem, mo i stap long ples ya blong 40 dei. Nao Setan i kam traem hem. Tri taem Setan i traehad blong pulum Jisas blong brekem loa blong God. Be Jisas i no wantem mekem samting ya.

Taem Jisas i stap wokbaot blong gohom, hem i mitim sam man we oli kam ol faswan man blong hem, no ol disaepol blong hem. Sam long olgeta, i gat Andru, Pita (we narafala nem blong hem Saemon), Filip mo Nataniel (narafala nem blong hem Batolomiu). Jisas mo ol niufala disaepol ya oli wokbaot i go long Galili. Oli stop long taon ya Kena we i ples blong Nataniel. Long ples ya, Jisas i go long wan bigfala lafet blong mared, mo i mekem faswan merikel blong hem. ?Yu yu save wanem merikel hem i mekem? Hem i jenisim wota i kam waen.

Matiu 3⁠:​13-17; 4⁠:​1-11; 13⁠:55; Mak 6⁠:3; Jon 1⁠:​29-51; 2⁠:​1-12.