?Yu Yu Letem Tok Blong God i Lidim Yu Evri Dei?

Taem yu ridim Baebol evri dei, hemia i save givhan long yu blong yu holem strong mo i mekem bilif blong yu i kam strong moa. (Kol. 2:6, 7) Be, blong letem Tok blong Jehova i lidim yu, yu mas tingting dip long ol stamba trutok blong Baebol mo folem. (Hib. 4:12; Jem. 1:22-25) Josua 1:8 i tokbaot tri rod we oli save givhan long yu taem yu ridim Baebol: (1) Yu ridim Tok blong God “long dei mo long naet.” (2) Yu “ridim long smol voes, NW.” Hemia bambae i givhan long yu blong tingting dip mo blong tingbaot samting we i stap hapen long stori we yu ridim. (3) Yu mas traehad blong “mekem olgeta samting we hem i talem.” Taem yu folem trifala rod ya, bambae ‘ol wok blong yu i gat frut blong hem mo bambae yu save mekem samting we i waes.’