Toktok Long Fasin We i Isi Blong Man i Kasem Save

TAEM yu toktok, yu no mas givim save nomo. Yu mas traehad blong mekem i isi blong ol man oli kasem save long ol tok blong yu. Fasin ya i save givhan long yu blong yu talemaot klia ol tingting blong yu, nating se yu stap toktok long kongregesen no long ol man we oli no Witnes blong Jehova.

I gat plante samting we oli save mekem i isi blong ol man oli kasem save long ol tok blong yu. Sam long ol samting ya oli stap long Poen 26, “Joenem Gud Ol Save Blong Mekem Tok i Klia.” Sam narafala samting oli stap long Poen 30, “Traehad Blong Save Ol Man.” Naoia bambae yumi tokbaot sam moa samting we yumi save mekem.

Yu Yusum Ol Wod We Oli No Strong Tumas, Mo Yu Toktok Long Fasin We i No Had Blong Kasem. Tufala samting we oli givhan gud long yumi blong talemaot tingting blong yumi long narafala, hemia ol wod we oli no strong tumas, mo ol toktok we i sot. Bigfala Toktok blong Jisas antap long hil, i nambawan eksampol blong wan tok we olgeta man oli naf blong kasem save long hem, nomata se oli hu no oli stap wea. Maet ol man oli neva harem ol tingting insaed long ol tok ya. Nating se i olsem, oli kasem save from we Jisas i tokbaot ol samting we yumi evriwan i tingbaot: wanem we yumi mas mekem blong kasem glad, blong fren gud wetem ol narafala, blong winim wari, mo blong harem gud long laef. Mo taem hem i talemaot tingting blong hem, hem i yusum ol tok we i isi blong man i kasem. (Mat., japta 5-7) Baebol i givim plante eksampol blong ol defren fasin blong joenem ol tok, mo ol tok we sam oli longfala mo sam oli sot. Bigfala samting we yu wantem mekem, i blong talemaot ol tingting long fasin we i klia, blong ol man oli kasem save gud.

Taem yu tokbaot ol save we i dip, ol man bambae oli kasem moa sipos yu toktok long fasin we i isi nomo. ?Yu mas mekem wanem blong yu kam naf blong toktok isi olsem? Yu no mas talem tumas smosmol samting we i no nid blong talem. Yu mas putum ol save long stret ples blong olgeta, blong oli givhan blong eksplenem ol bigfala poen. Yu mas jusum gud ol stamba vas we bambae yu yusum. I nogud yu hareap blong finisim wan vas mo go long narawan. I moa gud yu ridim wan vas mo eksplenem. Be yu no mas toktok tumas nao yu kavremap wan gudfala tingting.

Taem yu mekem Baebol stadi long wan man, long taem ya tu yu save folem ol advaes ya. Yu no mas traem eksplenem evri smosmol samting. Yu mas givhan long man ya blong i kasem save gud long ol bigfala tingting long stadi. Biaen, long prapa stadi blong hem mo long ol miting blong kongregesen, bambae hem i kasem ol smosmol save bakegen.

Sipos yu wantem se i isi blong ol man oli kasem save long tok blong yu, yu mas rere gud fastaem. Yu mas kasem save gud long samting we bambae yu tokbaot. Olsem nao, yu save mekem se ol narafala oli kasem save long hem tu. Taem yu kasem save gud long wan samting, yu save givim ol risen from wanem samting ya i olsem. Mo tu, yu save eksplenem long prapa tok blong yu.

Yu Mas Eksplenem Ol Tok We Man i No Save. Samtaem yu mas eksplenem mining blong ol tok we ol man oli no save. Yu no mas ting se olgeta man oli gat bigfala save. Be yu no mas ting se oli no gat hed tu. From we yu yu stadi Baebol, maet yu talem sam tok we i narakaen long ol man we oli no Witnes blong Jehova. Sipos yu no eksplenem ol tok olsem “smol kampani,” ‘slef we i stret mo waes,’ “ol narafala sipsip,” mo “bigfala kampani,” ol man we oli no Witnes blong Jehova bambae oli no kasem save. (Rom 11:5; Mat. 24:45, NW; Jon 10:16; Rev. 7:9, NW) Sem mak long ogenaesesen blong ol Witnes blong Jehova. Sipos wan man i no save wan samting long saed ya, ating bambae hem i no kasem save long ol tok olsem “pablisa,” “paenia,” “seket elda,” mo “Memoriol.”

Maet yu mas eksplenem sam tok blong Baebol, we ol man we oli no Witnes, olgeta tu oli yusum. Long tingting blong plante man, tok ya “Amagedon” i minim wan bigfala faet, we bambae ol man oli mekem ol bigbigfala bom oli bosta. Sam man oli no ting se “Kingdom blong God” i wan gavman, be oli ting se hem i wan samting we i stap long hat blong man nomo, no maet oli ting se Kingdom ya hem i heven. Taem sam man oli harem tok ya “spirit,” maet oli tingbaot wan samting insaed long man we i gohed blong laef afta we bodi i ded. Plante milian man oli kasem tijing ya se “tabu spirit” i wan man we i haf blong Triniti. Mo tu, plante man oli sakemaot ol gudfala fasin we Baebol i leftemap, taswe maet yu mas givhan long olgeta blong oli kasem save long ol fasin we Baebol i stap tokbaot, taem i talem se: “Bambae yufala i no moa mekem fasin nogud wetem woman.”—1 Kor. 6:18.

Taem yu toktok long wan man we i neva ridim Baebol, maet hem i no kasem save sipos yu talem nomo se: “Pol i raetem se . . .” no “Luk i talem se . . .” Maet i gat ol fren no ol man we oli laef klosap long hem we nem blong olgeta Pol mo Luk. Maet yu mas talem se yu stap tokbaot wan Kristin aposol no wan man we i raetem sam buk blong Baebol.

Nating se Baebol Long Bislama i yusum sam tok we yumi yusum tede olsem “lita” mo “kilometa,” plante taem yu mas givhan long ol man blong oli kasem save moa se wan samting i bigfala olsem wanem no i longfala olsem wanem. Yu traem tingbaot bigfala sip blong Noa. Baebol i talem se longfala blong hem i kasem 133 meta, bigfala blong hem i kasem 22 meta, mo hae blong hem i kasem 13 meta. (Jen. 6:15) Sipos yu eksplenem se 133 meta i sem mak olsem we yu stap long ples ya yu go kasem wan wud longwe no wan narafala samting olsem, ale ol man bambae oli luksave klia se sip blong Noa i longfala olsem wanem.

Yu Mas Eksplenem. Sipos yu wantem mekem sam tok i klia long ol man, maet i no naf blong talem mining blong tok ya nomo. Long Jerusalem, long taem blong Esra, oli ridimaot Loa long ol man mo oli eksplenem tu. Ol Livaet oli givhan long ol man blong oli kasem save long Loa ya, mo oli talem se Loa ya i joen olsem wanem long laef blong ol man. (Neh. 8:8, 12) Long sem fasin, yu mas eksplenem ol vas we yu ridim, mo yu mas talem se ol vas ya oli joen olsem wanem long laef blong ol man.

Taem Jisas i ded mo i laef bakegen, hem i eksplenem long ol disaepol blong hem, se samting we i hapen long hem i mekem ol tok blong Baebol i kamtru. Mo tu, hem i mekem i klia long tingting blong olgeta se oli gat wan wok blong mekem. Oli mas talemaot ol samting ya we oli luk finis. (Luk 24:44-48) Taem yu givhan long ol man blong oli luksave wanem we oli mas mekem blong folem ol tok blong Baebol long laef blong olgeta, bambae i isi moa blong oli kasem save long ol tok ya.

Hat i Givhan Long Man Blong i Kasem Save. Yes, i impoten blong eksplenem klia ol samting. Be i gat sam narafala samting tu we oli givhan long man blong i kasem save. Sipos man i no wantem long hat blong hem blong harem tok blong God, bambae i had blong hem i kasem mining blong ol tok ya. (Mat. 13:13-15) Ol man we oli skelem samting folem tingting blong man, oli stap luk ol save blong God olsem samting we i krangke nomo. (1 Kor. 2:14) Sipos yu luk se wan man i gat tingting olsem, ating i waes blong finisim storian blong yu. Maet nekis taem man ya i rere moa blong lesin.

Samtaem man i no wantem lesin long tok blong God from we hem i gat tumas trabol long laef blong hem. Be sipos man olsem i gat janis blong harem trutok blong Baebol plante taem bakegen, sloslo hem i save laekem, nao i wantem lesin. Taem Jisas i talem se bambae ol man oli wipim hem mo kilim hem i ded, ol aposol oli no kasem save. ?From wanem? !From we oli no tingbaot samting ya, mo oli no wantem nating se samting ya i hapen! (Luk 18:31-34) Be afta we sam taem i pas, 11 long ol aposol ya oli kasem save. Mo oli soemaot samting ya taem oli folem ol tok we Jisas i bin talem long olgeta.

Gudfala Eksampol i Gat Paoa. I no ol tok blong yumi nomo we i givhan long ol man blong oli kasem save, be ol fasin blong yumi tu. Plante man oli no moa save tingbaot ol tok we oli bin harem long fas taem we oli kam long Haos Kingdom. Be oli tingbaot yet fasin blong ol man blong lavlavem olgeta. Taem yumi prij tu, plante man oli luk we yumi glad tumas, nao samting ya i mekem se oli wantem harem ol trutok blong Baebol we yumi talemaot. Sam man oli luk se ol man blong Jehova oli lavlavem olgeta, oli kaen, mo oli givgivhan long olgeta taem oli fesem bigfala trabol, ale samting ya i mekem ol man ya oli luksave se skul blong ol Witnes i tru. Taswe, taem yu traehad blong givhan long ol man blong oli kasem save long trutok blong Baebol, yu mas tingbaot fasin blong yu blong eksplenem, mo eksampol we yu soemaot.