Ol Refrens Blong Kristin Wok Mo Laef—Buk Blong Miting
1-7 JENUWARE
OL GUDGUDFALA SAMTING LONG BAEBOL | MATIU 1-3
“Kingdom Blong Heven i Kam Klosap Finis”
nwtsty ol not blong stadi long Mt 3:1, 2
prij: Long lanwis Grik, tok ya i minim “wan mesenja we i go talemaot wan tok long ol man long pablik.” Hem i soemaot fasin blong man ya blong talemaot tok ya: Plante taem hem i go toktok long ol man olbaot long pablik, be i no wan tok we hem i givim long wan grup blong ol man.
Kingdom: Hemia fastaem we Grik tok ya ba·si·leiʹa, i kamaot. Tok ya i minim wan gavman we wan king i rul long hem. Mo i minim ol ples mo ol man we oli stap aninit long rul blong wan king. Grik tok ya i kamaot 162 taem long Matiu kasem Revelesen. Long buk blong Matiu, tok ya i kamaot 55 taem, mo plante taem oli tokbaot rul blong God long heven. Matiu i yusum tok ya oltaem, taswe oli singaot Gospel blong hem se Gospel blong Kingdom.
Kingdom blong heven: Tok ya i kamaot 30 taem, mo i kamaot nomo long Gospel blong Matiu. Be Gospel blong Mak mo Luk, i yusum narafala tok ya “Kingdom blong God,” mo hemia i soemaot se “Kingdom blong God” mo rul blong hem i stap long heven.—Mt 21:43; Mk 1:15; Lu 4:43; Da 2:44; 2Ti 4:18.
i kam klosap: Tok ya i soemaot se Rula long Kingdom blong heven bambae i kamtru i no longtaem.
nwtsty pija mo video
Klos Blong Jon Baptaes Mo Bodi Blong Hem
Jon i werem wan klos we oli wokem long hea blong kamel mo i fasem long wan strap we oli wokem long skin blong anamol o wan strap we oli wokem long kaliko, mo hem i save yusum strap ya blong karem sam smosmol samting. Profet Elaeja tu i werem klos olsem. (2Ki 1:8) Ol klos olsem oli rafraf mo ol puaman oli stap werem. Be ol rijman oli werem ol klos we oli sofsof mo oli wokem long linen o silik. (Mt 11:7-9) Jon i wan Nasiraet taem hem i bon, taswe maet oli neva katem hea blong hem. Klos mo bodi blong hem i soemaot se hem i gat wan laef we i no fasfas, mo hem i yusum ful laef blong hem blong mekem wok blong God.
Ol Lokis
Baebol i yusum tok ya “ol lokis” blong tokbaot ol defren kaen grasopa we oli gat ol sot antena long hed blong olgeta, speseli olgeta we oli stap flae long wan ples i go long narafala ples long bigfala grup. Wan ripot long Jerusalem i soemaot se ol lokis blong draeples, oli gat 75 pesen blong protin. Tede ol man oli kakae jes blong lokis nomo, be oli sakemaot hed, ol leg, ol wing, mo bel blong hem. Oli save kakae we i no tan o oli save kukum. Ol man oli talem se tes blong olgeta i olsem naura o krab, mo oli gat plante protin.
Hani Blong Bus
Pija ya i soem wan nes blong ol sugabag blong bus (1) mo hani (2). Maet hani we Jon i kakae i kamaot long wan kaen sugabag blong bus we nem blong hem Apis mellifera syriaca, we i stap long ples we Jon i stap long hem. Sugabag ya i naf blong laef long draeples blong Juda, be hem i no save stap long ples we man i lukaot long hem, from we oli stap atakem ol man. Be ol man we oli stap long Isrel bifo, long ol yia 800 bifo Kraes, oli putumgud ol sugabag insaed long ol graonpot we oli longfala mo oli raon, mo ol sugabag ya oli wokem nes blong olgeta insaed long ol graonpot ya. Plante long ol nes ya, oli faenem long medel blong wan taon (naoia oli kolem taon ya se Tel Rehov), we i stap long levelples klosap long Jodan Reva. Hani we i kamaot long ol nes ya i kam long wan kaen sugabag we maet oli karem long ples we tede yumi kolem Teki.
Traem Faenem Ol Gudfala Samting Ya
nwtsty not blong stadi long Mt 1:3
Tamara: Hem i faswan long ol faef woman we Matiu i raetem long laen blong Mesaea. Ol narafala fo woman, hemia Rehab mo Rut, we tufala i no blong Isrel (vas. 5); Batseba, “waef blong Uria” (vas. 6); mo Meri (vas. 16). Long laen ya i gat nem blong ol man nomo, be Matiu i putum nem blong ol sikis woman ya tu, from we oli mekem ol gudgudfala samting, nao oli kasem blesing ya we Jisas i kamaot long laen blong olgeta.
nwtsty not blong stadi long Mt 3:11
baptaesem yufala: NT: “draonem yufala.” Grik tok ya ba·ptiʹzo i min se “draonem.” Sam translesen blong Baebol oli tokbaot baptaes se i minim man i draon fulwan long wota. Wan taem, Jon i stap baptaesem ol man long levelples blong Jodan Reva, klosap long Salim, “from we i gat plante wota long ples ya.” (Jon 3:23) Taem Filip i baptaesem man Itiopia, tufala tugeta i “godaon long wota.” (Wok 8:38) Sem Grik tok ya i stap tu long Baebol ya Septuagint, long 2Ki 5:14, we i tokbaot stori blong Neman we i “draonem hem seven taem long wota.”
8-14 JENUWARE
OL GUDGUDFALA SAMTING LONG BAEBOL | MATIU 4-5
“Lanem Lesen Long Ol Samting We Jisas i Tijim Antap Long Hil”
nwtsty not blong stadi long Mt 5:3
Glad: Hemia i no jes wan filing we man i gat taem hem i gat wan gud taem. Be, hem i wan filing we man i gat taem God i blesem hem mo hem i save se God i glad long hem. Mo tu, tok ya i soemaot se God i olsem wanem, mo filing we Jisas i gat taem hem i kasem haenem long heven.—1Ti 1:11; 6:15.
olgeta we oli harem save se oli nidim God long laef blong olgeta: Long vas ya, Grik toktok ya “olgeta we oli haremsave,” we prapa tok blong hem i se, “olgeta we oli pua (olgeta we oli stap askem strong),” i minim olgeta we oli rili nidim wan samting mo oli kasem save long samting ya. Mo Baebol i yusum tok ya taem i tokbaot “puaman” ya Lasaros long Lu 16:20, 22. Sam Baebol oli transletem Grik toktok ya blong givim tingting se ol man oli haremsave se oli rili nidim save blong God, mo blong hem i givhan long olgeta.
nwtsty not blong stadi long Mt 5:7
sore: Baebol i yusum tok ya “gat sore” blong tokbaot man we i fogivim narafala o kot i no givim panis long man we i mekem i rong. Be plante taem Baebol i yusum tok ya blong tokbaot filing ya, o filing we i pusum man blong i givhan long narafala we i gat nid.
nwtsty not blong stadi long Mt 5:9
olgeta we oli man blong mekem pis: Hemia olgeta we oli holemtaet pis mo oli mekem pis wetem narafala.
Tijim Pikinini Blong Yu Blong Mekem Pis
Ol Kristin papa mama oli wantem tumas blong trenem ol pikinini blong olgeta blong oli ‘traehad blong mekem pis mo holemtaet.’ (1 Pita 3:11) Blong yumi save mekem pis wetem ol narafala, maet yumi mas traehad bigwan blong no gat nogud tingting long narafala, no harem nogud from samting we oli mekem, mo no badfren long ol narafala. Be yumi harem se i stret nomo we yumi traehad olsem, taem yumi luk glad we i kamaot from.
Traem Faenem Ol Gudfala Samting Ya
nwtsty not blong stadi long Mt 4:9
yu mekem wosip: Grik tok long vas ya we i talem se “mekem wosip,” i minim wan aksen we Jisas i mas mekem stret long taem ya. Grik tok we oli tanem i kam “mekem wosip,” i soemaot se Devel Setan i no askem long Jisas blong i gohed blong mekem wosip long hem, be hem i wantem se Jisas i “mekem wosip” long hem long taem ya nomo.
nwtsty not blong stadi long Mt 4:23
tijim . . . talemaot gud nius: Wok ya blong tijim man i defren long wok ya blong talemaot gud nius o prij. Wan Baebol tija i no talemaot gud nius nomo. Be hem i givim save, i eksplenem, i pulum ol man blong oli bilif, mo i soemaot ol pruf.
15-21 JENUWARE
OL GUDGUDFALA SAMTING LONG BAEBOL | MATIU 6-7
‘Yufala i Mas Gohed Blong Lukaot Kingdom Fastaem’
nwtsty not blong stadi long Mt 6:24
slef: Grik tok long vas ya i minim wan man we i wok olsem wan slef, mo se wan masta nomo i bos long hem. Long vas ya, Jisas i wantem makem se wan Kristin i no save mekem wosip long God, mo long semtaem i wantem ronem ol sas samting.
nwtsty not blong stadi long Mt 6:33
Yufala i mas gohed blong lukaot: Grik tok long vas ya i minim wan aksen o wan samting we man i gohed nomo blong mekem. Ol trufala man blong Jisas oli no lukaot Kingdom blong smoltaem nomo, mo afta oli go mekem wan narafala samting. Defren olgeta, oltaem oli mas putum Kingdom long fasples long laef blong olgeta.
Kingdom: Long sam olfala hanraet long lanwis Grik, oli raetem se “Kingdom blong God.”
blong hem: Hemia i minim God we i ‘Papa long heven’ we Mt 6:32 i tokbaot.
stret fasin: Olgeta we oli stap lukaotem stret fasin blong God oli rere blong mekem ol samting we hem i wantem mo oli folem ol rul blong hem long saed blong ol fasin we i stret mo fasin we i no stret. Tijing ya i defren olgeta long hemia blong ol Farisi, we oli stap traem soemaot se oli stret man.—Mt 5:20.
Traem Faenem Ol Gudfala Samting Ya
nwtsty ol not blong stadi long Mt 7:28, 29
oli sapraes tumas: Long lanwis Grik, tok ya i save minim se man i “sapraes bitim mak mo i no moa save mekem wan samting.” Tok ya i soemaot se ol toktok blong Jisas oli gohed blong gat bigfala paoa long ol man.
fasin blong hem blong tij: Tok ya i soemaot olsem wanem Jisas i stap tij, ol rod we hem i yusum blong tij, mo samting we hem i tijim, hemia ful tijing we hem i givim antap long Hil.
i no olsem tok blong ol tija blong Loa: Jisas i no yusum toktok blong ol rabae we ol man oli stap tinghae long olgeta, blong mekem se tok blong hem i gat paoa, olsem we ol tija blong Loa oli stap mekem. Be hem i toktok long nem blong God. Jisas i yusum Tok blong God blong tijim ol man, taswe tok blong hem i gat paoa.—Jon 7:16.
22-28 JENUWARE
OL GUDGUDFALA SAMTING LONG BAEBOL | MATIU 8-9
“Jisas i Lavem Ol Man”
nwtsty not blong stadi long Mt 8:3
hem i tajem hem: Loa blong Moses i talem se man we i gat leprosi i mas stap hem wan blong i no pasem sik blong hem long ol narafala. (Le 13:45, 46; Na 5:1-4) Be ol lida blong ol man Jiu oli ademap sam moa rul. Eksampol, man i mas stap samwe 1.8 meta longwe long man we i gat leprosi, be taem i gat win, man i mas stap samwe 45 meta longwe long sikman ya. Ol rul olsem oli mekem se ol man oli no moa kea long ol man we oli gat leprosi. Long kastom stori blong olgeta, oli tokbaot wan rabae we i haed long ol man we oli gat leprosi, mo wan narawan we i stonem ol man we oli gat leprosi blong blokem olgeta blong oli no kam klosap long hem. Be Jisas i defren olgeta, hem i sore tumas long man we i gat leprosi, nao i mekem samting we ol man Jiu bambae oli neva tingbaot, hem i tajem man ya. Hem i mekem olsem, nating se hem i naf blong toktok nomo blong mekem man ya i kam gud bakegen.—Mt 8:5-12.
mi mi wantem: Jisas i no jes go mekem samting we man ya i askem, be hem i talemaot se hem i wantem mekem samting ya. Hemia i soemaot se hem i no mekem from we i wok blong hem nomo, be hem i wantem tumas blong mekem, mo hemia i pusum hem blong tekem aksen.
nwtsty not blong stadi long Mt 9:10
kakae: NT: “sidaon long bed mo lei i go long tebol, blong kakae.” Blong sidaon wetem wan man long bed mo lei i go long tebol, blong kakae, i soemaot se yu frengud wetem man ya. Taswe, ol man Jiu long taem blong Jisas oli neva sidaon wetem olgeta we oli no man Jiu, blong kakae wetem olgeta.
man blong tekem takis: Plante man Jiu oli tekem takis blong givim long ol haeman blong Rom. Ol man oli no laekem nating ol man Jiu ya we oli stap tekem takis, from we oli wokgud wetem ol haeman we oli strenja, be i no hemia nomo. Oli stap mekem praes blong takis i go antap tu blong stilim ol man. Ol man Jiu oli no wantem joen wetem ol man blong tekem takis, oli luk ol man ya se oli sem mak long ol man blong mekem sin mo ol woman blong rod.—Mt 11:19; 21:32.
nwtsty not blong stadi long Mt 9:36
sore tumas: Tok ya i kamaot long Grik tok ya splag·khniʹzo·mai, we i joen wetem tok ya “ol gat” (splagʹkhna). Hem i blong soemaot wan dip filing we man i gat insaed long bodi blong hem. Hem i wan tok long Grik lanwis we i gat moa paoa i bitim ol narafala tok, blong soemaot sore.
Traem Faenem Ol Gudfala Samting ya
jy 70 ¶6
?From Wanem Ol Disaepol Blong Jisas Oli No Livim Kakae?
Jisas i stap givhan long ol disaepol blong Jon we i stap baptaesem ol man, blong oli no gat tingting ya se ol man blong Jisas oli mas folem olfala kastom blong skul blong ol man Jiu, olsem kastom ya blong livim kakae. Hem i no kam blong fiksimap wan olfala fasin blong wosip we klosap nao bambae God i sakemaot, mo blong mekem i gohed. Wosip we Jisas i pulum ol man blong oli folem, i no laenap wetem skul blong ol man Jiu long taem ya, wetem ol kastom blong hem we i kamaot long man nomo. Nogat, hem i no stap traem blong somap wan niufala pis klos i go long wan olfala klos, blong blokem hol long hem, o blong putum niufala waen i go insaed long olfala skin botel we i strong finis.
29 JENUWARE–4 FEBRUARI
OL GUDGUDFALA SAMTING LONG BAEBOL | MATIU 10-11
“Jisas i Singaot Ol Man Blong Oli Harem Gud”
nwtsty ol not blong stadi long Mt 10:29, 30
ol smol pijin: Grik tok ya strou·thiʹon i wan sot nem we i minim eni smol pijin, be plante taem i tokbaot smol pijin ya sparrow, we ol man oli stap pem blong kakae mo i jip moa long ol narafala pijin.
blong wan selen nomo: PT: “blong wan asarion,” hemia praes we wan wokman i kasem taem i wok 45 minit. (Yu luk Ap. B14.) Long taem ya, Jisas i go prij nambatri taem long Galili, mo hem i talem se praes blong tu smol pijin i wan asarion. Wan narafala taem, i luk se samwe wan yia afta, taem hem i stap prij long Judia, hem i talem se praes blong faef smol pijin ya i tu selen nomo. (Lu 12:6) Taem yumi skelem tufala stori ya, yumi lanem se ol smol pijin ya oli no sas nating long ae blong ol bisnesman, taswe oli givim namba faef pijin ya fri nomo.
ol hea blong hed blong yufala, hem i kaontem evriwan: Oli talem se namba blong ol hea we oli stap long hed blong wan man, i moa long 100,000. Jehova i savegud hamas hea i stap long hed blong yumi. Hemia i soemaot se hem i intres long evri man we oli biaen long Kraes.
nwtsty pija mo video
Smol Pijin
Ol smol pijin ya, ol man oli stap pem blong kakae mo oli jip moa long ol narafala pijin. Praes blong tu smol pijin ya i sem mak long praes we wan wokman i kasem taem i wok 45 minit. Long lanwis Grik, tok ya i save minim eni smol pijin, wetem smol pijin ya sparrow we i stap flae olbaot long haos (Passer domesticus biblicus) mo smol pijin ya sparrow blong Spen (Passer hispaniolensis), we oli stap yet olbaot long Isrel.
nwtsty not blong stadi long Mt 11:28
karem ol hevi samting: Olgeta we Jisas i singaot olgeta blong oli kam long hem, oli “karem ol hevi samting” olsem wari, mo oli stap hadwok tumas. Wosip we oli mekem long Jehova i kam hevi tumas from ol kastom we ol man oli ademap long Loa blong Moses. (Mt 23:4) Loa blong Sabat tu we i blong mekem oli spel, i kam wan hevi baden long olgeta.—Eks 23:12; Mk 2:23-28; Lu 6:1-11.
bambae mi mi mekem we yufala i spel mo yufala kasembak paoa: Grik tok we toktok ya i kamaot long hem, i save minim spel (Mt 26:45; Mk 6:31) mo stop blong wok blong kasembak paoa (2Ko 7:13; Flm 7). Ol vas raonabaot oli soemaot se taem man i karem “yok” blong Jisas (Mt 11:29), hem i mas wok be i no spel. Grik tok ya i soemaot wan aksen we Jisas nao i mekem, mo i givim tingting se hem givimbak paoa long olgeta we oli taed tumas, mo i mekem oli kam strong bakegen, nao oli wantem karem yok blong hem we i no hevi mo i no strong.
nwtsty not blong stadi long Mt 11:29
Putum yok blong mi long solda blong yufala: Jisas i yusum tok ya “yok” blong soemaot se man i mas stap aninit long olgeta we oli gat paoa. Sipos hem i stap tingbaot wan yok we tu man i mas karem, wan we God i putum long Jisas, bae hem i singaot ol disaepol blong hem blong oli kam aninit long yok ya wetem hem, blong karem, mo bambae hem i givhan long olgeta. Sipos i olsem, hem i save talem se: “Yufala i kam aninit long yok blong mi blong joen wetem mi blong karem.” Sipos yok ya nao we Jisas i putum long ol narafala man, hemia i min se man ya i wan disaepol blong hem, mo i mas putum hem i stap aninit long Jisas we i gat paoa mo i lidim hem.
Traem Faenem Ol Gudfala Samting Ya
jy 96 ¶2-3
Jon i Wantem Save Moa Long Saed Blong Jisas
?Yu luk se kwestin ya i narakaen? Jon i wan man blong Jehova we i bin baptaesem Jisas tu yia i pas, mo i luk we spirit blong God i kamdaon long hem, mo i harem voes blong God we i talem se hem i glad long Jisas. Yumi no gat risen blong talem se bilif blong Jon i no strong. Sipos no, bae Jisas i no save leftemap Jon, olsem we hem i mekem long taem ya. ?Be sipos Jon i no gat tu tingting, from wanem hem i askem kwestin ya?
Maet Jon i wantem se Jisas hem wan i talem se hem i Mesaea. Hemia i save givhan long Jon taem hem i stap harem nogud long kalabus. Mo kwestin we Jon i askem i gat wan narafala mining blong hem. Hem i save ol profet tok blong Baebol we oli soemaot se Man we God i makemaot hem, bambae i kam king mo i sevem ol man. Be plante manis afta we Jisas i baptaes, Jon i stap long kalabus. So Jon i stap askem sipos i gat wan narafala man we i tekem ples blong Jisas, bambae i kam, mo i mekem olgeta profet tok long saed blong Mesaea oli kamtru.
jy 98 ¶1-2
Sore Long Ol Man Blong Tede We Oli No Mekem Wan Samting
Jisas i tinghae long Jon we i stap baptaesem ol man. ?Be wanem tingting blong ol man long saed blong Jon? Jisas i talem se “ol man blong tede” “oli olsem ol pikinini ya we oli stap sidaon long ples blong maket mo oli stap singsingaot long ol fren blong olgeta se: ‘Mifala i stap bloem flut, be yufala i no danis. Mifala i stap krae olsem se man i ded, be yufala i no kilkilim jes blong yufala olsem we yufala i harem nogud.’”—Matiu 11:16, 17.
?Jisas i minim wanem? Hem i eksplenem se: “Jon i kam, i stap livim kakae mo i no dring waen, be ol man oli talem se: ‘Rabis spirit i stap long hem.’ Mo taem Pikinini blong man i kam mo i stap kakae mo i dring, ol man oli stap talem se: ‘!Yufala i luk! Man ya i stap kakae bitim mak mo i man blong drong, hem i stap fren wetem ol man blong tekem takis mo ol man we oli stap mekem sin.’” (Matiu 11:18, 19) Jon i mekem laef blong hem i no fasfas from we hem i wan Nasiraet, mo hem i no dring waen tu, be ol man long taem ya oli talem se hem i gat rabis spirit. (Namba 6:2, 3; Luk 1:15) Mo long saed blong Jisas, hem i laef olsem ol narafala man nomo. Hem i kakae, i dring we i no bitim mak, be ol man oli talem se hem i bitim mak. I luk olsem se i hadwok blong mekem evri man oli glad.