Japta 9

Laef Blong Jisas Taem Hem i Smol Boe

JISAS i stap gruap long Nasaret. Taon ya i smol nomo, hem i no impoten tumas. Hem i stap antap long ol hil long ples ya, Galili, kolosap long naesfala ples long medel blong tu laen blong hil, nem blong hem, Jisrel.

Taem Josef mo Meri tufala i aot long Ijip, nao tufala i kam long ples ya. Long taem ya, ating Jisas i gat samwe long tu yia nomo. Meri i gat wan pikinini nomo, hemia Jisas. Be i no longtaem, hem i bonem Jemes, mo afta Josef, Saemon, mo Judas. Mo Meri mo Josef tufala i gat sam pikinini gel tu, be yumi no save hameni. From samting ya, Jisas i gat sikis smol brata mo sista blong hem, no maet hem i gat moa.

Jisas i gat sam narafala famle tu. Yumi save se hem i gat wan bigfala kasen-brata, nem blong hem Jon. Ples blong Jon, Judia, i stap longwe long ples blong olgeta. Be wan sista blong Meri, nem blong hem Salome, hem i stap long Galili, i no longwe long ples blong olgeta. Hasban blong Salome, nem blong hem, Sebedi. Tufala i gat tu boe, Jemes mo Jon. Tufala boe ya i kasen-brata blong Jisas. Yumi no save sipos Jisas i spenem plante taem wetem tufala ya, taem hem i stap gruap. Be biaen, oli frengud.

Famle blong Josef i stap kam bigwan nao, taswe hem i mas wok had blong sapotem olgeta. Hem i wan kapenta. Josef i mekem olsem we Jisas i stret pikinini blong hem nomo. Taswe ol man oli kolem hem se “pikinini blong kapenta.” Josef i tijim Jisas olsem wanem blong wokem haos tu. Mo Jisas i lanem gud wok ya. Taswe biaen, ol man oli stap talem long saed blong Jisas se: “Hem i kapenta.”

Bigfala samting long laef blong famle blong Josef, hemia wosip blong Jeova God. Stret long loa blong God, Josef mo Meri tufala i tijim ol pikinini blong tufala long saed blong speret, ‘taem oli stap long haos, taem oli wokbaot long rod, taem oli slip, mo taem oli girap.’ Long Nasaret i gat wan haos prea, mo yumi save se oltaem Josef i stap tekem famle blong hem long ples ya, blong mekem wosip long God. Mo oltaem oli stap go long Jerusalem blong wosip long haos blong Jeova long ples ya. Oli laekem ol trep ya moa bitim ol narafala samting we oli stap mekem. Matyu 13:55, 56, NW; 27:56; Mak 15:40; 6:3, NW; Dutronome 6:6-9.

▪ ?Yumi save se Jisas i gat hamas smol brata mo sista? ?Wanem nem blong sam long olgeta?

▪ ?Hu ya trifala kasen-brata blong Jisas, we plante man oli savegud nem blong trifala?

▪ ?Jisas i lanem wanem wok? ?From wanem?

▪ ?Josef i tijim ol famle blong hem long wanem impoten samting?