Ol Refrens Blong Kristin Wok Mo Laef—Buk Blong Miting
5-11 FEBRUARI
OL GUDGUDFALA SAMTING LONG BAEBOL | MATIU 12-13
“Parabol Blong Gudfala Sid Mo Rabis Gras”
w13 15/7 pej 9-10 haf 2-3
“Bambae Mi Stap Wetem Yufala Oltaem”
2 Ol samting we oli hapen long garen blong masta ya oli soemaot olsem wanem mo wanem taem bambae Jisas i karem ol gudfala kakae. Ol gudfala kakae ya hemia ol tabu Kristin we bambae oli rul wetem hem long Kingdom. Wok ya blong planem ol sid i stat long taem blong Pentekos long yia 33. Wok ya blong karem ol gudfala kakae i go long haos, bambae i finis taem ol tabu Kristin we oli laef long en blong wol ya, oli kasem laswan mak blong olgeta mo oli go long heven. (Mat. 24:31; Rev. 7:1-4) Parabol ya i givhan long yumi blong luksave ol samting we bambae oli hapen blong samwe 2,000 yia. Hem i tokbaot taem we man i planem sid, taem we sid i gru, mo taem blong tekemaot kakae. Be stadi ya bambae i tokbaot moa, taem blong tekemaot kakae.
JISAS I LUKAOTGUD LONG OL TABU KRISTIN
3 Afta long yia 100, ol giaman Kristin oli stat kamaot klia, olsem we “ol rabis gras oli gru, oli kam bigwan.” (Mat. 13:26) Afta long yia 300, namba blong ol Kristin we oli olsem rabis gras i plante moa i bitim ol tabu Kristin. Long parabol blong Jisas, ol man blong wok oli askem long masta sipos oli save go pulumaot ol rabis gras. (Mat. 13:28) ?Masta i talem wanem?
w13 15/7 pej 10 haf 4
“Bambae Mi Stap Wetem Yufala Oltaem”
4 Jisas i tokbaot gudfala sid mo rabis gras, i se: “Tufala i save gru wantaem gogo kasem taem blong tekemaot ol kakae long garen.” Tok ya i soemaot se stat long taem blong ol aposol i kam, i gat sam tabu Kristin long wol. Mo tu, Jisas i talem long ol disaepol blong hem se: “Mi bambae mi stap wetem yufala oltaem, gogo wol ya i finis.” (Mat. 28:20) Taswe Jisas bambae i lukaotgud long ol tabu Kristin oltaem, gogo kasem taem blong en. Be long ol yia ya, yumi no save stret se hu nao i stap long grup blong ol gudfala sid, from we ol giaman Kristin oli plante. Be samwe 30 yia bifo long taem blong tekemaot kakae long garen, yumi luksave klia se hu ya grup blong ol tabu Kristin. ?Yumi luksave samting ya olsem wanem?
w13 15/7 pej 12 haf 10-12
“Bambae Mi Stap Wetem Yufala Oltaem”
10 Faswan samting se, oli katem ol rabis gras. Jisas i talem se: “Long taem ya, bambae mi save talem long ol man we oli go blong tekemaot ol gudfala kakae ya, blong oli go katem ol rabis gras ya fastaem, oli fasem long bandel.” Afta long 1914, ol enjel oli stat blong “katem” rabis gras, hemia ol giaman Kristin. Oli seraotem olgeta long “ol pikinini blong kingdom.”—Mat. 13:30, 38, 41, NW.
11 Taem wok ya blong katem ol rabis gras i stap gohed, i kam moa klia se hu ya ol tabu Kristin mo hu ya ol giaman Kristin. (Rev. 18:1, 4) Long 1919, Bigfala Babilon i foldaon. ?Wanem i mekem se ol tru Kristin oli defren long ol giaman Kristin? Hemia wok blong prij. Olgeta we oli lidim wok blong ol Baebol Studen, oli talemaot se i impoten blong joen long wok blong talemaot Kingdom. Wan buklet (To Whom the Work Is Entrusted) we oli wokem long 1919, i talem se olgeta tabu Kristin oli mas go prij long ol haos wanwan. Buklet ya i gohed i se: “I luk olsem se wok ya i bigwan tumas, be hem i wok blong Masta, mo hem bambae i givim paoa long yumi blong mekem wok ya. Yu yu mas harem gud blong joen long wok ya.” ?Ol Baebol Studen oli mekem wanem? Wajtaoa blong 1922 i talem se, stat long taem ya, ol Baebol Studen oli wok strong long wok blong prij. Mo tu, stat long taem ya, ol man oli luksave olgeta from wok blong prij we oli mekem long ol haos wanwan. Tede yet, ol man oli save yumi from wok ya.
12 Namba tu samting se, oli tekemaot ol gudfala kakae. Jisas i talem long ol enjel blong hem se: “Oli save go tekemaot ol gudfala kakae blong karem i kam long haos.” (Mat. 13:30) Stat long 1919, oli tekemaot ol tabu Kristin mo karem olgeta i kam insaed long haos ya, hemia Kristin kongregesen we naoia hem i klin. ?Olsem wanem long ol tabu Kristin we oli laef long en blong wol? Taem olgeta ya oli go long heven, hemia en blong taem ya we oli tekemaot ol gudfala kakae i kam.—Dan. 7:18, 22, 27.
Traem Faenem Ol Gudfala Samting Ya
nwtsty not blong stadi we i stap long Mt 12:20
Wik blong laet we faea blong hem klosap i ded: Laet we ol man long faswan handred yia oli yusum, hem i wan smol graonpot we i gat oel blong oliftri long hem. Mo i gat wan wik long hem we i stap pulum oel i go antap blong laet i save stap laet. Maet Grik tok ya “wik blong laet we faea blong hem klosap i ded” i minim wan wik we i mekem smok from we laet blong wik ya i stap laet yet be faea blong hem klosap i ded. Profet tok blong Aesea 42:3 i talemaot se bae Jisas i gat sore long ol man. Bae hem i no save mekem se smol hop blong ol man we ol narafala oli stap spolem olgeta mo olgeta we oli gat tingting daon i lus.
?Yu Yu Save?
?I tru se long taem bifo, man i planem rabis gras long garen blong narafala man blong spolem hem?
LONG Matiu 13:24-26, Jisas i talem wan pijatok long saed blong Kingdom, i se: “I gat wan masta we hem i go planem ol gudfala sid long garen blong hem. Be long naet, taem ol man oli slip, wan enemi blong hem i kam, i planem ol sid blong wan rabis gras long garen ya, nao i gowe. Nao ol gudfala sid ya oli gru, oli kam bigwan, oli gat kakae, be long semtaem tu, ol rabis gras ya oli gru, oli kam bigwan.” Sam man oli ting se samting ya i no save hapen. Be sam buk blong kot blong Rom bifo, i tokbaot ol samting olsem.
Wan diksonari blong Baebol i talem se i agensem loa blong Rom blong planem rabis gras long garen blong narafala man, blong givimbak long hem. Sipos i gat wan loa olsem, hemia i soemaot se samting ya i bin hapen. Wan man blong stadi long loa, Alastair Kerr, i talem se long yia 533, hedgavman Justinian blong Rom, i printim buk blong hem Digest. Buk ya i tokbaot ol loa blong Rom, mo i talem sam tok blong ol man we oli savegud ol loa long ol yia 100-250. Wan long ol man ya, nem blong hem Ulpian, i tokbaot samting we i hapen long ol yia 100. Wan man i planem rabis gras long garen blong narafala man, mo i spolem kakae blong hem. Buk ya i tokbaot ol samting we man blong garen ya i save mekem folem loa, blong kasem mane long man we i planem rabis gras, blong pem ol kakae we hem i lusum.
Yes, i tru se samting ya i hapen long Rom bifo, taswe pijatok blong Jisas i stret long samting we i hapen.
12-18 FEBRUARI
GUDGUDFALA SAMTING LONG BAEBOL | MATIU 14-15
“Wan Smol Grup i Givim Kakae Long Plante Man”
w13 15/7 pej 15 haf 2
Wan Smol Grup i Givim Kakae Long Plante Man
2 Taem Jisas i luk ol man ya, hem i sore tumas long olgeta, nao hem i mekem ol sik man blong olgeta oli gud bakegen, mo i tijim olgeta long Kingdom blong God. Long sapa, ol man blong Jisas oli talem long hem blong i sanemaot ol man ya oli gobak long ol vilej klosap long ples ya, blong pem kakae blong olgeta. Be Jisas i talem long ol man blong hem se: “I gud yufala nomo i givim kakae long olgeta.” Ating tok blong Jisas i mekem ol man blong hem oli stap tingting se, be olsem wanem oli save givim kakae long ol man ya, from we oli gat faef bred mo tu fis nomo.
w13 15/7 pej 15 haf 3
Wan Smol Grup i Givim Kakae Long Plante Man
3 Jisas i sore long ol man ya, nao hem i mekem wan merikel. Merikel ya i stap long fofala buk we oli kolem Gospel. (Mak 6:35-44; Luk 9:10-17; Jon 6:1-13) Jisas i talem long ol man blong hem blong oli mekem ol man ya oli sidaon long ol grup, we long sam grup i gat 50 man mo sam i gat 100. Afta we Jisas i talem tangkiu long God from kakae, hem i brekem bred mo fis. Jisas i no givim kakae stret long ol man ya, be hem “i givim long ol man blong hem, mo olgeta oli givimaot long olgeta man ya.” !Ol man ya oli kakae gogo oli fulap gud! Yu traem tingbaot: Jisas i yusum wan smol grup nomo blong givim kakae long plante taosen man. Smol grup ya hemia ol man blong hem.
nwtsty not blong stadi we i stap long Mt 14:21
be oli no kaontem ol woman mo ol pikinini: Matiu nomo i tokbaot ol woman mo ol pikinini taem hem i tokbaot merikel ya. I sua se namba blong olgeta man we oli kasem kakae long taem ya i save bitim 5,000 man.
w13 15/7 pej 15 haf 1
Wan Smol Grup i Givim Kakae Long Plante Man
YU TRAEM tingbaot samting ya. (Ridim Matiu 14:14-21.) Bifo long lafet blong Pasova long yia 32, wan bigfala hip blong man oli stap wetem Jisas mo ol disaepol blong hem long wan smol taon long not blong Lugun blong Galili, hemia Betsaeda. Namba blong ol man nomo i kasem samting olsem 5,000, be oli no kaontem ol woman mo ol pikinini.
Traem Faenem Ol Gudfala Samting Ya
nwtsty not blong stadi we i stap long Mt 15:7
gat tu fes: Bifo oli talem Grik tok ya hy·po·kri·tesʹ blong tokbaot ol man Gris (mo biaen ol man Rom) we taem oli aktem drama long stej, oli werem ol bigfala giaman fes we oli wokem blong mekem se voes blong man i bigwan taem hem i toktok. Naoia ol man oli yusum tok ya olsem wan pijatok blong tokbaot man we i haedem prapa tingting no fasin blong hem, nao i mekem wan gudfala samting blong ol man oli ting se hemia nao prapa fasin blong hem. Taswe long vas ya Jisas i talem se ol lida blong skul blong ol man Jiu oli gat “tu fes.”—Mt 6:5, 16.
nwtsty not blong stadi we i stap long Mt 15:26
pikinini . . . ol smol dog: Folem Loa blong Moses, dog i wan anamol we i no klin, taswe long Baebol, plante taem oli yusum tok ya blong daonem narafala. (Le 11:27; Mt 7:6; Fil 3:2; Re 22:15) Be long buk blong Mak (7:27) mo Matiu we i tokbaot ol toktok blong Jisas, tufala i yusum tok ya long wan fasin we i defren lelebet, we i minim “smol dog” no “dog blong haos,” mekem se tok ya i no spolem man. Taem Jisas i tokbaot ol anamol we oli stap long haos blong ol man we oli no man Jiu, maet hem i yusum wan tok we i kaen. Taem Jisas i talem se ol man Isrel oli olsem “ol pikinini” mo ol man we oli no man Jiu oli olsem “ol smol dog,” i klia se hem i wantem soemaot se weswan long tufala i moa impoten. Wan haos we i gat ol pikinini mo ol dog, fastaem man i mas givim kakae long pikinini.
19-25 FEBRUARI
GUDGUDFALA SAMTING LONG BAEBOL | MATIU 16-17
“?Yu Yu Gat Tingting Blong Hu?”
Ol Hasban—Luksave Mo Folem Jisas Olsem Hed Blong Yu
17 Long wan narafala taem bakegen, Jisas i eksplenem long ol aposol blong hem se bambae hem i mas go long Jerusalem “mo ol elda blong ol laen blong Isrel, wetem ol jif pris mo ol tija blong Loa bambae oli mekem hem i harem nogud long plante samting. Bambae olgeta oli kilim hem i ded, mo long namba tri dei, bambae God i mekem hem i laef bakegen.” Taem Pita i harem samting ya hem i tekem Jisas i go long saed blong rod mo i stap tok strong long hem, i se: “Masta, God i mas blokem samting ya. Samting ya i no save kamtru long yu olsem.” Ol tok ya blong Pita oli soemaot klia se hem i letem ol filing blong hem oli bos long tingting blong hem. I nidim blong stretem tingting blong hem bakegen. Ale Jisas i talem long hem se: “Setan. Yu gowe long mi. Yu yu stap traem blong blokem mi nomo. Tingting blong yu i no tingting blong God, i tingting blong man nomo.”—Matiu 16:21-23.
w15 15/5 pej 7-8 haf 16-17
!Yu Mas Lukaot Gud, Setan i Wantem Kakae Yu!
16 Setan i save trikim ol man tu we oli wok strong long wok blong Jehova. Yu traem tingbaot samting we i hapen taem Jisas i talem long ol disaepol blong hem se bambae oli kilim hem i ded. Aposol Pita i lavem Jisas tumas, nao i talem long Jisas se: “Yu kaen long yu wan, Masta, samting ya bambae i no hapen long yu nating.” Mo Jisas i talem long Pita se: “Setan. Yu gowe long mi.” (Matiu 16:22, 23, NW) ?From wanem Jisas i kolem Pita se “Setan”? From we Jisas i save se i no longtaem, bambae hem i ded, blong givim laef blong hem olsem wan sakrefaes, mo bambae hem i pruvum se Setan i man blong giaman. Hemia wan spesel taem long histri blong man, taswe Jisas i mas rere gud. I no taem blong Jisas i “kaen” long hem wan. Setan bambae i glad tumas sipos Jisas i no moa lukaot gud.
17 En blong rabis wol ya i klosap, taswe yumi tu yumi mas rere gud mo yumi mas stanap strong. Setan i wantem se yumi “kaen” long yumi wan, yumi putum tingting blong yumi long ol samting blong wol ya. Hem i wantem se yumi fogetem we yumi laef long ol las dei mo yumi no moa lukaot gud. !Yu no mas letem samting ya i hapen long yu! Be yu “mas lukaot gud.” (Matiu 24:42) Yu no mas bilif long ol giaman toktok blong Setan se en i longwe yet, no i no save kam.
w06 1/4 pej 23 haf 9
‘Pulum Ol Man Oli Kam Man Blong Mi Mo Baptaesem Olgeta’
9 ?Taem yumi folem eksampol blong Jisas blong mekem olgeta samting we God i wantem, hemia i minim wanem? Jisas i talem long ol disaepol blong hem se: “Sipos wan man i wantem kam biaen long mi, hem i no mas tingbaot hem fastaem, mo i mas karem pos blong safa mo folem mi oltaem.” (Matiu 16:24, NW) Long ples ya, Jisas i tokbaot tri samting we yumi mas mekem. Faswan samting se, yumi “no mas tingbaot” yumi fastaem. Hemia i min se yumi sakemaot ol samting we yumi nomo i wantem mo ol samting we sin i pulum yumi blong mekem, nao yumi talem ‘yes’ long God blong folem olgeta advaes blong hem mo letem hem i lidim yumi. Seken samting we Jisas i talem, se “karem pos blong safa.” Long taem blong Jisas, pos ya we oli nilim man long hem, i minim sem mo fasin safa. Taswe taem yumi kam Kristin, yumi agri se sam samtaem bambae yumi safa from wok blong talemaot gud nius. (2 Timoti 1:8) Nating se ol man blong wol oli jikim yumi mo daonem yumi, yumi mekem olsem Kraes we i ‘no tingbaot bigfala sem’ ya, be yumi glad blong save se yumi stap mekem samting we God i agri long hem. (Hibrus 12:2) Namba tri samting, yumi folem Jisas “oltaem.”—Ol Sam 73:26; 119:44; 145:2.
Traem Faenem Ol Gudfala Samting Ya
nwtsty not blong stadi we i stap long Mt 16:18
Yu yu Pita mo . . . long ston ya: Grik tok ya peʹtros oli yusum blong tokbaot boe no man, we i minim “wan smol ston; wan ston.” Long vas ya oli yusum tok ya olsem wan prapa nem (Pita), hemia wan nem long lanwis Grik we Jisas i givim long Saemon. (Jon 1:42) Tok ya peʹtra we oli yusum nomo blong tokbaot gel no woman, oli tanem i kam “bigfala ston,” mo i save minim stamba blong ston, wan klif no wan bigfala ston. Grik tok ya i stap tu long Mt 7:24, 25; 27:60; Lu 6:48; 8:6; Ro 9:33; 1Ko 10:4; 1Pi 2:8. Pita i no luk hem wan olsem ston ya we Jisas bambae i wokem kongregesen blong hem long hem, from we hem i raetem long 1Pi 2:4-8 se Jisas nao i “bigfala ston long kona blong fandesen” we oli talemaot bifo finis, mo God hem wan i bin jusum. Long sem fasin, aposol Pol i tokbaot Jisas se hem i olsem “fandesen” mo ‘ston ya God i givim.’ (1Ko 3:11; 10:4) Taswe blong talem stret, i olsem we Jisas i stap talem se: ‘Yu we mi singaotem yu se Pita, wan Smol Ston, yu yu luksave finis se Kraes hem i “bigfala ston ya,” we bambae i olsem fandesen blong Kristin kongregesen.’
kongregesen: Hemia fastaem we Grik tok ya ek·kle·siʹa i kamaot. Tok ya i kamaot long tu Grik tok, ek, we i minim “aot,” mo ka·leʹo, we i minim “singaot.” Tok ya i blong tokbaot wan grup blong ol man we oli singaotem olgeta, no oli talem long olgeta blong oli joen wanples from wan risen no blong mekem wan wok. (Yu luk Diksonari.) Long vas ya, Jisas i stap tokbaot Kristin kongregesen, we insaed long hem i gat ol tabu Kristin we oli olsem “ol ston we i laef” nao oli “kam wan haos we spirit blong God i wokem.” (1Pi 2:4, 5) Oli yusum Grik tok ya plante taem long Septuagint Baebol, hem i sem mak long tok ya “kongregesen,” long lanwis Hibru we plante taem oli yusum blong tokbaot ful neson blong ol man blong God. (Dut 23:3; 31:30) Long Ol Wok 7:38, ol man Isrel we God i tekemaot olgeta long Ijip, oli tokbaot olgeta se oli olsem wan “kongregesen.” Long sem fasin, ol Kristin we God i ‘singaot olgeta oli aot long tudak’ mo hem i ‘jusumaot olgeta finis oli aot long wol ya,’ oli mekemap “kongregesen blong God.”—1Pi 2:9; Jon 15:19; 1Ko 1:2.
nwtsty not blong stadi we i stap long Mt 16:19
ol ki blong Kingdom blong heven: Long Baebol, olgeta we oli kasem wan ki, maet wan prapa ki no i wan pijatok nomo, i soemaot se man ya i kasem bigfala paoa blong mekem wan impoten wok. (1Kron 9:26, 27; Aes 22:20-22) Taswe tok ya “ki” i pija blong paoa mo wok we wan man i kasem. Pita i yusum “ol ki” ya we hem i kasem blong openem rod blong ol man Jiu (Wok 2:22-41), ol man Sameria (Wok 8:14-17), mo ol man we oli no man Jiu (Wok 10:34-38) blong oli gat janis blong kasem tabu spirit blong God, nao oli save go insaed long Kingdom blong heven.
26 FEBRUARI–4 MAJ
GUDGUDFALA SAMTING LONG BAEBOL | MATIU 18-19
“No Mekem Yu Wan o Narafala i Foldaon”
nwtsty ol not blong stadi we i stap long Mt 18:6, 7
wan bigfala ston: NT: “wan bigfala ston blong granem wit.” PT: “wan bigfala ston blong granem wit we dongki i tantanem.” Ol ston olsem, oli bigwan olsem 1.2 kasem 1.5 meta, mo oli hevi tumas. Dongki nomo i mas tantanem.
sam samting we i save mekem man i foldaon: Bifo, stret mining blong Grik tok ya skanʹda·lon, oli tanem i kam “samting we i save mekem man i foldaon,” oli ting se hem i wan trap. Sam narafala oli ting se tok ya i blong tokbaot stik we i stap long wan trap we oli putum bet long hem. Be tu i save minim eni samting we i save blokem wan man, nao hem i stambol no i foldaon. Taem oli yusum olsem pijatok, hem i minim wan fasin we man i mekem nao i pulum hem long rod we i no stret, ale hem i stambol, no i mekem nogud fasin, no i mekem sin. Long Matiu 18:8, 9, oli yusum wan veb we i klosap sem mak, hemia skan·da·liʹzo, blong talem “mekem yu foldaon.” Mo tok ya i save minim tu “kam wan trap; mekem sin.”
nwtsty pija mo video
Ston blong granem wit
Ol man oli yusum bigfala ston blong granem wit no bale mo blong karemaot oel long ol olif. Sam long ol ston ya oli smol mo man nomo i save tantanem long han. Be sam narafala oli bigwan mo wan anamol nomo i naf blong tantanem. Maet saes blong ston ya i bigwan sem mak long hemia we ol man Filistia oli bin fosem Samson blong tantanem. (Jaj 16:21) Bigfala ston blong granem wit we anamol i tantanem i stap long Isrel mo long plante kantri tu we Rom i rul long olgeta.
Ston Antap mo Ston Aninit
Ston blong granem wit long pija ya, anamol nomo i save tantanem, olsem dongki, mo hem i blong granem wit no bale, no blong smasem ol olif. Ston we i stap antap maet i bigwan bitim 1.5 meta mo ston we i stap aninit long hem i bigwan moa.
nwtsty not blong stadi we i stap long Mt 18:9
Gehena: Tok ya i kamaot long Hibru tok ya geh hin·nomʹ, we i minim “krik ya Hinom,” we i stap long Wes mo Saot blong Jerusalem. (Yu luk buklet ya sgd, Haf 16, map “Jerusalem Mo Ol Ples Raonabaot.”) Long taem blong Jisas, krik ya i ples blong bonem doti, taswe i stret nomo blong yusum tok ya “Gehena” blong minim wan samting we i lus fulwan.
nwtstg Diksonari
Gehena
Hemia nem blong Krik Ya Hinom long lanwis Grik. Krik ya i stap long saotwes blong Jerusalem. (Jer 7:31) Baebol i yusum ples ya olsem profet tok blong tokbaot wan ples we ol dedbodi bambae oli stap olbaot long hem. (Jer 7:32; 19:6) I no gat wan samting i pruvum se oli bin sakem ol anamol no ol man we oli laef nomo i go long Gehena nao oli bonem olgeta, no oli mekem olgeta oli harem nogud. Taswe, Gehena i no minim wan ples we man i no save luk, mo i no minim wan ples we ol sol blong ol man oli stap harem nogud long hem blong olwe long faea. Be Jisas wetem ol disaepol blong hem, oli tokbaot Gehena blong minim panis we man bambae i kasem, hemia “seken ded.” Seken ded i minim lus blong olwe.—Re 20:14; Mt 5:22; 10:28.
nwtsty not blong stadi we i stap long Mt 18:10
stap oltaem wetem Papa blong mi: NT: “gat raet blong go long Papa blong mi.” Ol enjel oli stap wetem God, taswe olgeta nomo oli save luk fes blong God.—Eks 33:20.
?Olsem Wanem Ol Enjel Oli Gat Paoa Long Yumi?
Jisas i soemaot se ol enjel oli kasem wok ya blong lukaot gud se ol man blong wok blong God oli fren gud oltaem wetem hem. Taswe, taem Jisas i givim woning long ol disaepol blong hem blong oli no mekem narafala i foldaon, hem i talem se: “Yufala i mas lukaot se yufala i no ting nating long wan long ol smolwan ya, from we ol enjel blong olgeta oli stap oltaem wetem Papa blong mi long heven.” (Matiu 18:10) Tok ya blong Jisas i no min se, ol man blong hem wanwan oli gat wan enjel, we wok blong hem i blong lukaot long olgeta, nogat. Be Jisas i soemaot se ol enjel we oli wok klosap wetem God oli intres bigwan long ol man we oli joen long Kristin kongregesen.
Traem Faenem Ol Gudfala Samting Ya
nwtsty not blong stadi we i stap long Mt 18:22
seventi seven taem: PT: “seventi taem seven.” Grik tok ya i save min se “70 mo 7” (77 taem) no “70x7” (490 taem). Sem tok ya i stap long Jenesis 4:24 long Septuagint Baebol, hem i tanem Hibru tok ya i kam “seventi seven taem,” mo hemia i sapotem tok ya “seventi seven taem.” Nomata se ol man oli kasem save long defdefren rod, be taem oli ripitim namba seven olsem, hem i minim “blong olwe” mo “i no gat en.” Taem Jisas i talem long Pita se i no 7 taem be 77 taem, hem i wantem tijim ol man blong hem se, taem oli fogivim narafala oli mas fogivim hem olwe we i no gat mak blong hem. Hemia i defren olgeta long samting we buk ya Talmud blong Babilon (Yoma 86b) i talem, i se: “Sipos wan man i mekem sin wan taem, tu taem, mo namba tri taem, yu save fogivim hem. Be sipos hem i mekem namba fo taem, yu no fogivim hem.”
nwtsty not blong stadi we i stap long Mt 19:7
pepa blong sanem woman i gowe: NT: “pepa blong divos.” Sipos man i wantem divos, loa i givim taem long hem blong i tingting gud bakegen long bigfala desisen ya, taem hem i talem se man ya i mas rerem wan pepa we i stret folem loa, mo maet hem i save go askem tingting blong ol elda. Blong talem stret, Loa ya i blokem man blong i no hareap blong divos, mo i protektem ol woman, i openem rod long olgeta blong oli save kasem ol samting we oli gat raet long hem. (Dut 24:1) Be long taem blong Jisas, ol lida blong skul oli mekem se i isi blong man i mekem divos. Long taem blong ol fas Kristin, Josefas, wan man blong histri mo i wan Farisi, hem tu i divos. Mo hem i talem se man i save divos “from eni samting nomo (mo plante long ol samting ya i hapen long ol man).”
nwtsty pija mo video
Pepa blong Divos
Pepa blong divos ya hem i blong yia 71 no 72 Kristin Taem, mo oli raetem long lanwis Arameik. Oli faenem long not blong Wadi Murabbaat, hemia wan reva long Draeples Blong Judia we i drae finis. Pepa ya i talem se, long namba sikis yia we ol man Jiu oli rebel agensem ol man Rom, Josef, pikinini blong Naksan, i mekem divos long Miriam, gel blong Jonatan we i stap long taon blong Masada.