Ol Refrens Blong Kristin Wok Mo Laef—Buk Blong Miting
5-11 MAJ
OL GUDGUDFALA SAMTING LONG BAEBOL | MATIU 20-21
“Sipos Wan i Wantem Kam Hae Moa, Hem i Mas Kam Man Blong Wok”
nwtsty pija mo video
Ples Blong Maket
Sam ples blong maket olsem hemia we i stap ya, oli stap long saed blong rod. Samtaem ol man blong salem samting oli putum plante samting long rod, mekem se oli blokem rod. Ol man oli save pem ol gudfala samting blong haos, ol graon pot, ol sas samting we oli wokem long glas, mo tu ol fres kakae. From we i no gat aesbokis, oltaem ol man oli mas go long maket blong pem samting. Long ples ya ol man blong pem samting oli save harem nius we ol bisnes man o ol visita oli karem i kam, mo ol pikinini oli save pleplei, mo ol man we oli no gat wok oli stap wet blong kasem wan wok. Long maket, Jisas i hilim ol sikman mo Pol i prij. (Wok 17:17) Be, ol flas tija blong loa mo ol Farisi oli laekem blong soem olgeta long ol pablik ples olsem.
nwtsty ol not blong stadi long Mt 20:20, 21
waef blong Sebedi: Hem i mama blong aposol Jemes mo Jon. Folem stori long buk blong Mak, Jemes mo Jon nao tufala i go luk Jisas. Be tufala i yusum mama blong tufala, hemia Salome, we i wan mama blong Jisas, blong hem i go askem samting we tufala i wantem long Jisas.—Mt 27:55, 56; Mk 15:40, 41; Jon 19:25.
wan long raet saed mo wan long lef saed blong yu: Tufala saed ya i soemaot ona mo paoa, be oltaem raet saed nao i kasem moa ona.—Sam 110:1; Wok 7:55, 56; Ro 8:34.
nwtsty ol not blong stadi long Mt 20:26, 28
man blong wok: Samtaem Baebol i yusum Grik tok ya di·aʹko·nos blong tokbaot wan man we i gat tingting daon blong mekem wok long bihaf blong ol narafala. Tok ya i blong tokbaot Kraes (Ro 15:8), ol man blong wok blong hem (1Ko 3:5-7; Kol 1:23), ol man blong givhan (Fil 1:1; 1Ti 3:8), mo ol man blong mekem wok long haos (Jon 2:5, 9) mo ol man blong wok long gavman (Ro 13:4).
Traem Faenem Ol Gudfala Samting Ya
nwtsty not blong stadi long Mt 21:9
plis yu sevem: PT., “Hosana.” Grik tok ya i kamaot long wan Hibru tok we i minim “plis yu sevem” o “plis, sevem.” Oli yusum tok ya olsem wan rod blong askem God blong i sevem olgeta o blong i mekem oli win. Mo tu i save minim, “plis yu mekem hem i sef.” Biaen, oli yusum tok ya taem oli prea, mo taem oli presem narafala. Hibru tok ya i kamaot long Sam 118:25, we i wan haf blong singsing we oli singsing long hem oltaem long taem blong Pasova. Taswe, taem yumi tokbaot Pasova, yumi tingbaot ol tok ya. Wan rod we i soemaot se God i ansarem prea ya, blong sevem pikinini blong Deved, hemia taem hem i mekem Jisas i laef bakegen long ded. Long Mt 21:42, Jisas i talem bakegen ol tok blong Sam 118:22, 23 mo i soemaot se ol vas ya oli tokbaot Mesaea.
Pikinini ya blong Deved: Hemia wan tok we i soemaot se oli save laen blong Jisas mo wok blong hem olsem Mesaea we Baebol i tokbaot.
jy pej 244 haf 4-6
Wan Figtri We i Blong Tijim Yumi Long Saed Blong Bilif
?Be from wanem Jisas i mekem tri ya i kam drae? Hem i talemaot risen long ansa blong hem se: “Tru mi talem long yufala, sipos yufala i gat bilif mo yufala i no gat tu tingting, bambae yufala i mekem sem samting we mi mi mekem long figtri ya, mo tu, sipos yufala i talem long bigfala hil ya se: ‘Yu kamaot mo yu go draon long solwota,’ samting ya bambae i hapen. Mo olgeta samting we yufala i prea blong askem wetem bilif, bambae yufala i kasem.” (Matiu 21:21, 22) Hem i talemaot bakegen tok we hem i bin talem fastaem long saed blong bilif we i save muvum wan hil.—Matiu 17:20.
Taem Jisas i mekem tri ya i kam drae, hem i soemaot wan impoten lesen long saed blong bilif we man i mas gat long God. Hem i se: “Olgeta samting we yufala i askem long prea, yufala i mas bilif se yufala i kasem finis, nao bambae yufala i save kasem.” (Mak 11:24) !Hemia wan impoten lesen blong olgeta man blong Jisas! Tok ya i go speseli long ol aposol, from ol traem we bambae oli fesem i no longtaem. I gat wan nara samting long saed blong figtri we i drae we i joen wetem bilif.
Olsem figtri ya, neson blong Isrel i gat fasin tu fes. Ol man blong neson ya oli mekem kontrak blong fren wetem God mo blong folem ol loa blong hem. Be ful neson ya, oli soemaot klia se oli nogat bilif mo ol gudfala fasin. !Mo tu oli no wantem nating Pikinini blong God! Taswe, taem Jisas i mekem figtri ya i drae, hem i soemaot samting we bambae i hapen long neson ya we i nogat bilif.
12-18 MAJ
OL GUDGUDFALA SAMTING LONG BAEBOL | MATIU 22-23
“Obei Long Tufala Loa We i Hae Moa”
nwtsty not blong stadi long Mt 22:37
hat: Tok ya i save minim wan samting insaed long man. Be sipos tok ya i joen wetem “laef” mo “tingting,” hemia i save minim plante samting olsem filing blong wan man mo samting we hem i wantem. Ol trifala tok ya (hat, laef mo tingting), oli yusum blong makemgud samting we man i mas mekem blong lavem God.
laef: O “ful bodi.”
tingting: Hemia fasin blong man blong yusum tingting blong hem. Wan man i mas yusum prapa tingting blong hem blong save God mo blong gat fasin blong lavem hem. (Jon 17:3, futnot; Ro 12:1) Long Du 6:5, oli yusum tri Hibru tok, hemia ‘hat, laef, mo paoa.’ Be long buk blong Matiu we i kamaot long Grik, oli yusum tok ya “tingting” long ples blong tok ya “paoa.” Maet i gat sam risen from wanem oli yusum ol defren tok. Faswan, nating se long olfala Hibru i nogat wan prapa tok blong wod ya “tingting,” be mining blong hem i stap insaed long Hibru wod we i tokbaot “hat.” Tok ya i save minim samting we i haed insaed long wan man, olsem tingting blong man, ol filing, ol fasin blong hem mo ol aksen blong hem. (Du 29:4; Sam 26:2; 64:6; yu luk not blong stadi long tok ya hat long vas ya) Taswe from samting ya, Hibru i yusum tok ya “hat,” mo Grik Septuagint i yusum tok ya “tingting.” (Jen 8:21; 17:17; Pro 2:10; Aes 14:13) Mo wan narafala risen from wanem Matiu i yusum Grik tok we oli tanem i kam “tingting” i bitim we i yusum tok ya “paoa” taem hem i tokbaot bakegen vas blong Du 6:5, hemia from we Hibru tok we oli tanem i kam “paoa [o, “paoa blong mekem wan wok”]” i save minim paoa blong bodi mo tingting o save. Nating se i olsem, ol save ya blong Hibru mo Grik tok oli givhan blong eksplenem from wanem ol man we oli raetem ol Gospel, oli no yusum semfala tok taem oli raetem bakegen ol tok we i stap long Dutronome.
nwtsty not blong stadi long Mt 22:39
Mo sekenwan: Mt 22:37, i tokbaot stret ansa we Jisas i talem long ol Farisi, be hem i go moa taem hem i tokbaot bakegen seken loa. (Le 19:18) Hem i tijim se tufala loa ya i joengud tugeta mo se tufala i stamba blong olgeta Loa, wetem Ol Tok Blong Profet.—Mt 22:40.
ol man raonabaot long yu: Grik tok we oli tanem i kam “ol man raonabaot long yu” (pt., “wan we i laef klosap”) i no minim nomo olgeta we oli laef klosap long yu. Be i save minim eni man we yu mitim hem.—Lu 10:29-37; Ro 13:8-10.
nwtsty not blong stadi long Mt 22:40
Loa . . . mo ol tok blong profet: “Loa,” hemia buk blong Jenesis kasem Dutronome. “Ol tok blong Profet,” hemia ol buk blong profet we i stap long Hibru haf blong Baebol. Be, taem oli tokbaot tufala tok ya tugeta, hemia i save minim ful Hibru haf blong Baebol.—Mt 7:12; 22:40; Lu 16:16.
stamba: Grik tok we oli tanem i kam “stamba,” i save minim “dipen long hem; i stanap long.” Taswe, Jisas i no jes tokbaot nomo Loa wetem Ten Komanmen, be hem i tokbaot se ful Hibru haf blong Baebol i stanap long Lav.—Ro 13:9.
Traem Faenem Ol Gudfala Samting Ya
nwtsty not blong stadi long Mt 22:21
ol samting we oli blong Sisa, yufala i givimbak long Sisa: Ansa ya we Jisas i talem, mo long semfala stori we i stap long buk blong Mk 12:17 mo Lu 20:25, i soemaot se hemia nomo tok we Jisas i talem long saed blong rula blong Rom. “Ol samting we oli blong Sisa” i save minim pem takis long Gavman mo blong ona mo mekem ol samting blong soem respek long ol hae man.—Ro 13:1-7.
ol samting we oli blong God, yufala i givimbak long God: Hemia i save minim man we i mekem wosip wetem fulhat, i lavem God long ful laef blong hem, mo i gat fasin obei.—Mt 4:10; 22:37, 38; Wok 5:29; Ro 14:8.
nwtsty not blong stadi long Mt 23:24
Taem yufala i dring wota, yufala i tekemaot moskito long wota, be yufala i solemdaon kamel: Moskito mo Kamel oli stap insaed long grup blong ol smol anamol mo ol bigfala anamol we ol man Isrel oli luk se oli no klin. (Le 11:4, 21-24) Jisas i talem strong tok olsem blong soemaot se ol lida blong skul oli klinim wota blong olgeta blong oli no kam doti from moskito, be aksen blong olgeta i soemaot se oli no stap folem Loa nating, hemia i semak olsem we oli stap solemdaon kamel.
19-25 MAJ
OL GUDGUDFALA SAMTING LONG BAEBOL | MATIU 24
“Gohed Blong Wekap Gud Long Ol Lasdei”
it-2 pej 279 haf 6
Lav
Ol man bambae oli no moa lavem narafala. Jisas Kraes i talemaot long ol disaepol blong hem ol samting we bambae oli hapen i no long taem, hem i se plante man we oli talem se oli bilif long God, bambae oli no moa lavem (a·gaʹpe) narafala. (Mt 24:3, 12) Aposol Pol i talem se wan saen we i soemaot se en i klosap hemia se, ol man bambae “oli laekem mane tumas.” (2Ti 3:1, 2) Samting ya i soemaot klia se wan man i save lusum stret fasin, mo lav we hem i bin gat fastaem i save go daon. Hemia i soemaot se i impoten blong yumi traehad oltaem blong wokem lav taem yumi tingting dip long tok blong God mo yumi laef folem ol rul blong hem.—Ef 4:15, 22-24.
w99 15/11 pej 19 haf 5
?Yu Yu Stap Mekemgud Olgeta Wok Ya Blong God?
5 Jisas Kraes i tokbaot taem blong yumi se: “Long taem ya we mi, mi Pikinini blong Man mi kamtru, bambae i olsem taem blong Noa bifo, we ol man oli no rere. Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong Man mi kamtru, bambae i sem mak nomo.” (Matiu 24:37-39) Sipos man i no bitim mak, i no gat samting i rong wetem fasin blong kakae mo dring, mo mared i wan plan we God hem wan i bin stanemap fastaem. (Jenesis 2:20-24) Be, sipos yumi luksave se ol samting blong laef oli kam olsem impoten samting long tingting blong yumi, i gud blong tokbaot samting ya long prea blong yumi. Jehova i save halpem yumi blong putum ol wok blong Kingdom fastaem, hem i save halpem yumi blong mekem samting we i stret, mo blong gohed blong mekem gud olgeta wok we yumi mas mekem i go long hem.—Matiu 6:33; Rom 12:12; 2 Korin 13:7.
jy pej 259 haf 5
Ol Aposol oli askem blong luk wan saen
Hem i talem se ol disaepol blong hem oli mas gohed blong lukaotgud, mo stap wekap mo rere. Jisas i yusum wan narafala pijatok blong makemgud woning ya, hem i se: “Yufala i mas save wan samting: Sipos man blong haos i save wanem taem long naet, stilman bambae i kam, bambae hem i stap wekap mo i no save letem stilman i kam insaed long haos blong hem. Nao from samting ya, yufala tu i mas rere oltaem from we Pikinini blong man bambae i kam long taem we yufala i no tingbaot.”—Matiu 24:43, 44.
Traem Faenem Ol Gudfala Samting Ya
nwtsty not blong stadi long Mt 24:8
stat nomo blong ol trabol: Grik tok we oli tanem i kam ‘stat nomo blong ol trabol,’ i minim filing ya we woman i harem i soa bigwan taem hem i bonem pikinini. Tok ya i save minim tu fasin blong harem nogud, bodi i soa, mo fasin safa. Taswe, olsem woman we i stat blong harem bodi blong hem i soa kasem taem we hem i bonem pikinini, ol trabol mo fasin safa we Baebol i talemaot, bambae oli stap kam bigwan moa go kasem taem blong bigfala trabol we Mt 24:21 i tokbaot.
nwtsty not blong stadi long Mt 24:20
long taem blong kolkol: Bigfala ren, bigfala wota we i ron, mo taem blong kolkol, i mekem se i had blong go long wan narafala ples mo i had blong faenem kakae mo wan ples blong haed.—Esr 10:9, 13.
long Sabat dei: Long ol teritori olsem Judia, i gat ol rul we i joen wetem loa blong sabat, we i mekem se i had blong wan man i save wokbaot i go longwe mo karem plante samting, mo tu, oltaem ol get blong taon oli sat nomo long dei blong Sabat.—Yu luk, Wok 1:12 mo Ap. B12.
26 MAJ–1 EPREL
OL GUDGUDFALA SAMTING LONG BAEBOL | MATIU 25
“Gohed Blong Lukaot Gud”
Traem Faenem Ol Gudfala Samting Ya
w15 15/3 pej 26 haf 7
Yumi Sapotem Gud Ol Brata Blong Kraes
7 Tede, yumi kasem save klia moa long parabol blong sipsip mo nani. Yumi save se “Pikinini blong Man” no “King” hemia Jisas. ‘Ol brata blong King,’ hemia ol Kristin we tabu spirit i makemaot olgeta, we bambae oli rul wetem Jisas long heven. (Rom 8:16, 17) “Ol sipsip” mo “ol nani” hemia ol man blong olgeta kantri. Jisas bambae i jajem olgeta klosap long en blong bigfala trabol we bambae i stat i no longtaem. Mo Jisas bambae i jajem ol man folem fasin we oli mekem long ol tabu Kristin we oli stap yet long wol. !Yumi glad tumas se Jehova i givhan long yumi long ol yia we i pas, blong yumi kasem save long parabol ya mo ol narafala parabol long Matiu japta 24 mo 25!
“Yufala i Fren Blong Mi”
16 Sipos yu stap tingting strong blong kasem laef long wol aninit long rul blong Kingdom blong God, ?wanem samting we yu save mekem blong soemaot se yu yu fren blong ol brata blong Kraes? Bambae yumi tokbaot tri samting nomo. Faswan se, yumi save mekem wok blong prij wetem fulhat blong yumi. Kraes i talem long ol brata blong hem blong oli talemaot gud nius long olgeta ples long wol. (Mat. 24:14) Be sipos wok ya i blong ol brata blong Kraes nomo we oli laef yet long wol, bambae hem i bigwan tumas. Taswe, evri taem we ol narafala sipsip oli joen long wok blong prij, oli stap halpem ol brata blong Kraes blong mekem tabu wok ya blong olgeta. Slef ya we i stret mo waes, mo Kraes tu, oli gat bigfala tangkiu from kaen fasin ya we ol narafala sipsip oli mekem blong fren wetem olgeta.
17 Seken samting we ol narafala sipsip oli save mekem blong halpem ol brata blong Kraes, hemia se oli save givim presen mane blong sapotem wok blong prij. Jisas i pulum ol man blong hem blong yusum “ol gudgudfala samting blong [olgeta] long wol ya” blong fren wetem ol man. (Luk 16:9) Be samting ya i no min se yumi save givim mane long Jisas mo Jehova blong tufala i fren wetem yumi. Nogat. Defren olgeta, i min se yumi no talem nomo se yumi wantem fren wetem Jisas mo Jehova, mo lavem tufala. Be yumi yusum mane blong yumi mo olting blong yumi blong givhan long wok blong Kingdom, mo long rod ya, yumi ‘mekem samting, blong soemaot’ we yumi lavem tufala tru. (1 Jon 3:16-18) Yumi yusum mane blong yumi mo olting blong yumi blong sapotem Kingdom taem yumi joen long wok blong prij, taem yumi givim presen mane blong bildim ol haos wosip mo lukaotgud long olgeta, mo taem yumi givim presen mane blong wok blong prij we i stap gohed long fulwol. Nating se yumi givim smol no bigwan, i sua se Jehova mo Jisas tufala i gat bigfala tangkiu from we yumi givim samting wetem gladhat.—2 Kor. 9:7.
18 Namba tri samting we yumi save mekem blong pruvum se yumi ol fren blong Kraes, hemia blong folem ol advaes we ol elda long kongregesen oli givim. Kraes i yusum tabu spirit blong putumap ol man ya. (Efes. 5:23) Aposol Pol i talem se: “Yufala i mas ona long ol man we oli stap lidim yufala, mo yufala i mas obei long ol tok blong olgeta.” (Hib. 13:17, Nyutesteman wetem Ol Sam long Bislama) Samtaem, maet i no isi blong obei long ol advaes blong Baebol we ol elda long kongregesen oli givim. Ating yumi save ol slak fasin blong olgeta, mo from samting ya, yumi save gat tingting we i no stret long ol advaes we oli givim long yumi. Be Kraes, we i hed blong kongregesen, hem i glad blong yusum ol sinman ya. Taswe, fasin blong yumi blong stap daon aninit long olgeta ya we oli lukaot long kongregesen i gat paoa long fasin fren blong yumi wetem Kraes. Taem yumi traehad blong no tingting tumas long ol slak fasin blong ol elda mo yumi glad blong folem advaes blong olgeta, yumi soem se lav blong yumi long Kraes i tru.