Ol Refrens Blong Kristin Wok Mo Laef—Buk Blong Miting
2-8 EPREL
OL GUDGUDFALA SAMTING LONG BAEBOL | MATIU 26
“Pasova Mo Memorial—Samting We i Semak Mo Samting We i Defren”
nwtsty pija mo video
Kakae Blong Pasova
Ol samting we oli yusum long lafet blong Pasova hemia: smol sipsip we oli rusum (oli no mas brekem bun blong hem) (1); bred we i no gat is (2); mo ol lif we i konkon (3). (Eks 12:5, 8; Na 9:11) Ol lif we i konkon, long buk blong Misna maet hemia letes, chicory, pepperwort, endive, mo dandelion. Ol lif ya i blong mekem ol laen blong Isrel oli tingbaot hadtaem ya we oli bin stap olsem slef long Ijip. Jisas i yusum bred we i no gat is, olsem pija blong bodi blong hem we i no gat sin. (Mt 26:26) Mo aposol Pol i singaot Jisas se: “Smol sipsip blong yumi blong Pasova.” (1Ko 5:7) Long faswan handred yia, oli yusum waen (4) long lafet blong Pasova. Jisas i yusum waen olsem pija blong blad blong hem, we bambae i ron olsem wan sakrefaes.—Mt 26:27, 28.
nwtsty not blong stadi long Mt 26:26
minim: Grik tok ya e·stinʹ (prapa tok, “i”) long ples ya, i save minim wan long ol tok ya, “i saen blong; i pija blong; i minim; i representem.” Ol aposol oli kasemsave long mining blong tok ya, from long taem ya prapa bodi blong Jisas i stap long fored blong olgeta, mo bred we i no gat is tu i stap, we i no longtaem bambae oli kakae. Taswe, bred ya i no minim prapa bodi blong Jisas. I gud blong makem se semfala Grik tok ya i stap tu long Mt 12:7, mo plante Baebol oli transletem tok ya se, “i minim.”
nwtsty not blong stadi long Mt 26:28
blad blong kontrak: Niufala kontrak we Jehova i mekem wetem ol tabu Kristin, i stanap tru long sakrefaes blong Jisas. (Hib 8:10) Jisas i yusum semfala tok we Moses i yusum, taem hem i wok olsem man blong tekem kontrak mo givim Loa blong kontrak long ol man Isrel long Hil ya Sinae. (Eks 24:8; Hib 9:19-21) Blad blong ol bul mo nani i mekem kontrak blong Loa we God i mekem wetem neson blong Isrel i stanap. Long sem fasin, blad blong Jisas i mekem niufala kontrak we Jehova i mekem wetem ol tabu Kristin i stanap. Kontrak ya i stanap long Pentekos 33 Kristin taem—Hib 9:14, 15.
Traem Faenem Ol Gudfala Samting Ya
nwtsty not blong stadi long Mt 26:17
Long fas dei blong Lafet Blong Bred We i No Gat Is: Lafet Blong Bred We i No Gat Is, i stat long Nisan 15, hemia afta long dei blong Pasova (Nisan 14), mo i gohed blong seven dei. (Lukluk App. B15.) Long taem blong Jisas, lafet blong Pasova i joen wetem Lafet Blong Bred We i No Gat Is, we i gohed blong eit dei, kasem Nisan 14, mo samtaem oli singaot se “Lafet Blong Bred We i No Gat Is.” (Lu 22:1) Long haf ya, tok ya “Long fas dei” i save minim, “Long dei bifo.” (Skelem wetem Jon 1:15, 30, Grik tok ya [proʹtos] we i minim “faswan,” oli tanem i kam “stap finis”, we i givim sem tingting taem oli raetem se “hem i stap finis [proʹtos] taem we mi mi no bon yet.”) Taswe long olfala lanwis Grik mo long kastom blong ol man Jiu, ol disaepol oli askem kwestin long Jisas long Nisan 13. Long dei blong Nisan 13, ol disaepol oli mekemrere from lafet blong Pasova, mo biaen oli mekem lafet ya “long sapa,” hemia stat blong Nisan 14.—Mk 14:16, 17.
nwtsty not blong stadi long Mt 26:39
tekemaot kap ya: Long Baebol, plante taem tok ya “kap” i minim mekem samting we God i wantem o “wan wok” we narafala i mas mekem. (Lukluk not blong stadi long Mt 20:22.) I sua se Jisas i wari bigwan long saed blong ol nogud tok we ol man bambae oli talem from ded blong hem mo ol samting we ol man bambae oli mekem agensem God, taswe hem i prea blong God i tekemaot “kap” ya long hem.
9-15 EPREL
OL GUDGUDFALA SAMTING LONG BAEBOL | MATIU 27-28
“Go Pulum Ol Man Oli Kam Disaepol—?From Wanem, Weples, Mo Olsem Wanem?”
‘Go Pulum Ol Man Oli Kam Disaepol’
4 Jisas i hed blong kongregesen blong hem, mo stat long 1914 hem i king long niufala Kingdom ya we God i stanemap. (Kolosi 1:13; Revelesen 11:15) Hem i jif blong ol enjel mo i gat wan bigfala ami blong plante milian enjel oli stap aninit long paoa blong hem. (1 Tesalonaeka 4:16; 1 Pita 3:22; Revelesen 19:14-16) Papa blong hem i givim paoa long hem blong bambae hem i finisim “olgeta gavman, mo olgeta haeman, mo olgeta paoa” we oli agensem ol stretfala rul blong hem. (1 Korin 15:24-26, NW; Efesas 1:20-23) Jisas i gat paoa antap long ol man we oli laef, be i no hemia nomo. Hem i gat paoa tu blong “jajem olgeta man, olgeta we oli stap laef wetem olgeta we oli ded finis,” mo God i givim paoa long hem blong i mekem olgeta man we oli slip long ded oli laef bakegen. (Ol Wok 10:42; Jon 5:26-28) Tru ya, sipos yumi kasem oda long wan man we i gat bigfala paoa olsem, ating bambae yumi tinghae long oda ya. Taswe, yumi gat respek mo yumi rere blong obei long oda ya blong Jisas blong ‘go pulum ol man oli kam disaepol.’
nwtsty ol not blong stadi long Mt 28:19
pulum ol man oli kam disaepol: Grik tok ya ma·the·teuʹo, i save minim “tijim,” we i givim tingting ya blong pulum ol man oli kam disaepol. (Skelem olsem wanem oli yusum tok ya, long Mt 13:52, we oli tanem i kam “save long.”) Tufala tok ya “baptaesem” mo “tijim,” oli soemaot samting we i joen wetem wok ya blong “pulum ol man oli kam disaepol.”
ol man blong olgeta neson: Prapa tok hemia, “olgeta neson,” be ol toktok insaed long haf ya oli soemaot se tok ya “olgeta neson” i minim wanwan man long olgeta neson. Long lanwis Grik, tok we oli tanem i kam “olgeta,” we i stap long tok ya baptaesem olgeta, i minim wanwan man, be i no stap minim plante man o “neson.” Tok ya, go long “ol man blong olgeta neson,” hem i wan niufala tok. Bifo we Jisas i mekem wok blong hem, Baebol i soemaot se taem ol man blong narafala kantri oli kam long Isrel blong mekem wok blong Jehova, ol man Isrel oli letem olgeta oli stap long Isrel. (1Ki 8:41-43) Taswe, Jisas i stap talem long ol disaepol blong hem blong oli mekem wok blong prij i go kasem ol man blong narafala kantri, we oli no ol man Jiu. Hem i makemgud se wok ya we ol Kristin oli mekem, blong pulum man i kam disaepol, i mas go long olgeta ples long wol.—Mt 10:1, 5-7; Re 7:9; lukluk not blong stadi long Mt 24:14.
nwtsty not blong stadi long Mt 28:20
tijim olgeta: Grik tok we oli tanem i kam “tijim,” i save minim advaes, eksplenem wan samting, rao blong soem wan samting, mo pruvum wan samting. (Lukluk not blong stadi long Mt 3:1; 4:23.) Tok ya se oli mas tijim olgeta blong “oli folem olgeta tok” we Jisas i talem, i minim wan wok we i gohed nomo. Hemia i minim, tijim man long samting we Jisas i tijim, mekem tijing ya i wok long laef, mo folem eksampol blong Jisas.—Jon 13:17; Ef 4:21; 1Pi 2:21.
Traem Faenem Ol Gudfala Samting Ya
nwtsty ol not blong stadi long Mt 27:51
bigfala kaliko: Hemia bigfala naes kaliko long tempol, we i seraotem Rum We i Tabu We i Tabu long Rum We i Tabu. Folem kastom blong ol man Jiu, longfala blong kaliko ya i samwe long 18 meta, mo bigfala blong hem i 9 meta, mo i tik samwe long 7.4 sentimeta. Taem Jehova i terem bigfala kaliko ya, hem i soemaot kros blong hem agens long ol man we oli kilim Pikinini blong hem, mo tu hemia i wan saen blong soemaot se naoia Jisas i save go long heven.—Hib 10:19, 20; yu luk Diksonari.
rum ya we i tabu we i tabu: Grik tok ya na·osʹ i minim wan impoten ples we i gat ol rum long hem we i Tabu, mo i Tabu We i Tabu.
nwtsty not blong stadi long Mt 28:7
talemaot long ol disaepol blong hem se hem i laef bakegen finis: Ol woman ya oli no ol faswan disaepol blong harem nius ya se Jisas i laef bakegen, be oli mas go talemaot long ol narafala disaepol se Jisas i laef bakegen. (Mt 28:2, 5, 7) Folem kastom blong ol man Jiu, ol woman oli no gat raet blong talemaot wan tok long taem blong kot. Be samting we enjel blong Jehova i mekem i defren olgeta, hem i letem olgeta oli mekem wan wok we i givim bigfala glad long olgeta.
16-22 EPREL
OL GUDGUDFALA SAMTING LONG BAEBOL | MAK 1-2
“Mi Mi Fogivim Ol Sin Blong Yufala Finis”
jy pej 67 haf 3-5
“Mi Mi Fogivim Ol Sin Blong Yufala Finis”
Jisas i stap tijim plante man long wan rum, nao i gat fo man oli karem wan man we bodi blong hem i ded, blong Jisas i hilim hem. Be from we i gat plante man tumas, “oli no save go klosap long Jisas.” (Mak 2:4) Traem tingbaot samting we oli mekem. Oli go antap long ruf blong haos, oli mekem wan hol mo oli slakem bed wetem sikman ya long hem, i godaon long Jisas.
?Olsem wanem? ?Jisas i kros long ol man ya from we oli distebem hem? Nogat. Hem i luksave se ol man ya oli gat strong bilif, ale hem i talem long sikman ya se: “Mi mi fogivim ol sin blong yu finis.” (Matiu 9:2) ?Be i tru se Jisas i save fogivim ol sin blong man? Ol tija blong loa mo ol Farisi oli stap tokbaot samting ya, mo oli talem se: “?Weswe man ya i toktok olsem? Hem i tok nogud ya, hem i mekem olsem se hem i God. God nomo i save fogivim sin blong man”—Mak 2:7.
Jisas i save tingting blong olgeta, ale hem i talem long olgeta se: “?From wanem yufala i gat ol tingting olsem long hat blong yufala? ?Wanem tok i isi moa blong talem long sikman ya? ?Hemia se, ‘Mi mi fogivim ol sin blong yu finis’ no hemia se, ‘Yu stanap, yu karem bed blong yu, mo yu wokbaot’?” (Mak 2:8, 9) Yes, sakrefaes we Jisas bambae i mekem i no longtaem, i soemaot se hem i save fogivim ol sin blong man.
nwtsty not blong stadi long Mk 2:9
I isi moa: I isi blong wan man i talem se hem i save fogivim ol sin blong man, hemia from we i no nid blong mekem wan samting blong pruvum tok ya. Be taem Jisas i talem tok ya se, Yu girap . . . mo yu wokbaot, hemia i min se hem i mas mekem wan merikel blong olgeta man oli luk se hem i gat paoa blong fogivim ol sin blong man. Stori ya, mo vas blong Aes 33:24, oli soemaot se ol sik oli kamaot from sin.
Traem Faenem Ol Gudfala Samting Ya
nwtsty Ol not blong stadi long Mk 1:11
wan voes i kamaot long heven: Hemia faswan long ol trifala eksampol long ol stori blong Gospel, we oli soemaot se Jehova i toktok stret wetem ol man.—Lukluk ol not blong stadi long Mk 9:7; Jon 12:28.
Yu yu pikinini blong mi: Jisas we i spirit, hem i Pikinini blong God. (Jon 3:16) Taem Jisas i bon olsem wan man, hem i “pikinini blong God,” hemia i semak olsem Adam we hem i bin stretgud. (Lu 1:35; 3:38) Be tok ya we God i talem long saed blong Jisas se i pikinini blong hem, i minim sam moa samting. Taem God i kafsaedem tabu spirit long Jisas, hem i soemaot se Jisas i stret spirit Pikinini blong hem, we i “bon bakegen” wetem hop blong go laef bakegen long heven. Mo tu, tabu spirit i makemaot hem olsem King mo Hae Pris blong God.—Skelem wetem Jon 3:3-6; 6:51; Lu 1:31-33; Hib 2:17; 5:1, 4-10; 7:1-3.
Mi glad long yu: O “Mi mi glad tumas long yu.” Semfala tok ya i stap long Mt 12:18, mo hem i wan tok we i kamaot long Aes 42:1, we i tokbaot Mesaea, o Kraes. Taem God i givim tabu spirit long Jisas mo i talemaot se hemia Pikinini blong hem, hemia i soemaot klia se Jisas nao i Mesaea ya we Baebol i tokbaot hem se bambae i kam.—Lukluk ol not blong stadi long Mt 3:17; 12:18.
nwtsty not blong stadi long Mk 2:28
Masta blong Sabat dei: Jisas i talem se hem nao i masta blong Sabat dei (Mt 12:8; Lu 6:5), hemia i blong soemaot se hem i save yusum Sabat dei blong mekem ol wok we Papa blong hem long heven i talem long hem. (Skelem wetem Jon 5:19; 10:37, 38.) Jisas i mekem sam bigfala merikel long Sabat dei, hemia i minim hilim sikman tu. (Lu 13:10-13; Jon 5:5-9; 9:1-14) Hemia ol pruf we oli soemaot samting we Jisas bambae i mekem taem hem i rul long Kingdom, we bambae i olsem wan sabat blong spel.—Hib 10:1.
23-29 EPREL
OL GUDGUDFALA SAMTING LONG BAEBOL | MAK 3-4
“Hilim Sikman Long Sabat Dei”
jy pej 78 haf 1-2
?I Stret Blong Mekem Wanem Folem Loa Blong Sabat?
Long wan narafala Sabat dei, Jisas i go long wan sinagog, maet hemia long Galili. Long ples ya, hem i faenem wan man we raet han blong hem i ded. (Luk 6:6) Ol tija blong loa mo ol Farisi oli stap wajem Jisas. ?From wanem? Oli soemaot samting we i stap long tingting blong olgeta, taem oli askem Jisas se: “?Folem Loa, i stret blong mekem sikman i kam gud bakegen long Sabat dei?”—Matiu 12:10.
Ol lida blong skul blong ol man Jiu oli talem se i tabu blong hilim wan sikman long Sabat dei, oli save mekem nomo sipos laef blong sikman i rili stap long denja. Eksampol, long Sabat dei i tabu blong fasemtaet bun o wan joen blong bodi we i kamaot, hemia ol samting we oli no save mekem man i ded. I klia nomo se ol tija blong loa mo ol Farisi oli no askem kwestin long Jisas blong save ol samting long saed blong man we i safa, be oli stap lukaot rod blong spolem Jisas.
jy pej 78 haf 3
?I Stret Blong Mekem Wanem Folem Loa Blong Sabat?
Be Jisas i save krangke tingting we oli gat. Hem i kasemsave se ol tija blong loa mo ol Farisi oli gat wan defren tingting long saed blong loa we i tokbaot samting we man i no mas mekem long Sabat dei. Be ol tingting ya oli no stanap long Baebol. (Eksodas 20:8-10) Ol Farisi oli agensem hem finis from ol gudfala wok we hem i stap mekem. Ale Jisas i mekem wan samting we i save mekem rao i kamaot, hem i talem long man ya we han blong hem i ded, se: “Yu kam stanap long medel ya.”—Mak 3:3.
nwtsty not blong stadi long Mk 3:5
hem i kros, nao i luklukraon long olgeta mo hem i harem nogud: Mak nomo i raetemdaon samting we i Jisas i mekem, long taem we Jisas i luksave samting we i stap long hat blong ol lida blong skul. (Mt 12:13; Lu 6:10) Pita i wan man we i gat ol dip filing, maet hem nao i tokbaot save ya long saed blong ol filing blong Jisas.—Lukluk “Fastok blong Mak.”
Traem Faenem Ol Gudfala Samting Ya
nwtsty ol not blong stadi long Mk 3:29
tok nogud agens long tabu spirit: Tok nogud i save minim, talem giaman tok blong spolem man, o talem ol nogud tok agensem God o agensem ol tabu samting. Tabu spirit i kamaot stret long God, taswe taem wan man i tok nogud long tabu spirit o i talem ol giaman tok long saed blong hem, hemia i olsem se hem i tok nogud long God. Mt 12:24, 28 mo Mk 3:22, i soemaot se ol lida blong skul blong ol man Jiu, oli luksave se spirit blong God i wok long Jisas taem hem i mekem ol merikel. Be yet, oli talem se paoa ya i kam long Devel Setan.
sin ya bambae i stap olwe: Hemia i blong tokbaot sin we man i wantem tumas blong mekem, we frut blong hem bambae i stap blong olwe. I no gat wan sakrefaes blong tekemaot sin ya.—Lukluk not blong stadi long, tok nogud agens long tabu spirit long vas ya mo not blong stadi long Mt 12:31, we i tokbaot semfala stori.
w14 15/12 pej 10-11 haf 6-8
?Yu Yu “Kasem Gud Mining Blong Ol Tok Blong Baebol”?
6 ?Yumi lanem wanem? Fas samting, yumi no save fosem ol Baebol stadi blong oli gohed gud long trutok. Nating se yumi mekem evri samting we yumi naf blong mekem blong givhan long olgeta, yumi neva mas fosem olgeta blong oli baptaes. Yumi mas mekem tingting blong yumi i stap daon, mo luksave se ol man wanwan oli mas mekem desisen ya blong givim laef blong olgeta i go long God. Man i mas mekem desisen ya from we hem i lavem Jehova tumas. Long taem ya nomo, Jehova i save glad long desisen blong hem.—Ol Sam 51:12; 54:6; 110:3.
7 Seken samting we yumi lanem, se tingting blong yumi i no mas foldaon taem yumi luk se Baebol stadi blong yumi i no gohed gud. Yumi mas mekem tingting blong yumi i longfala. (Jemes 5:7, 8) Sipos yumi mekem bes blong yumi blong givhan long wan stadi, be sid blong trutok i no gru long hat blong hem, hemia i no min se yumi wan rabis tija. Jehova i stap mekem sid blong trutok i gru long hat blong ol man nomo we tingting blong olgeta i stap daon, mo oli rere blong jenisim fasin blong olgeta. (Matiu 13:23) Taswe, yumi no mas ting se sipos yumi givhan long plante man blong oli kam long trutok, wok blong yumi i gud moa. Jehova i no makem wok blong yumi from namba blong ol man we yumi pulum olgeta oli kam long trutok. Long defren fasin, hem i tingbaot we yumi stap wok strong, mo hem i glad long samting ya.—Ridim Luk 10:17-20; 1 Korin 3:8.
8 Namba tri samting, yumi no save luk ol jenis we oli stap hapen long hat blong man. Yu tingbaot wan man wetem woman blong hem we tufala i stadi wetem wan misinari. Tufala i talem long misinari ya se tufala i wantem kam pablisa. Be hem i talem long tufala se fastaem tufala i mas lego fasin blong smok. Hem i sek taem tufala i talem se tufala i lego plante manis finis. Tufala i luksave se sipos tufala i smok haed, Jehova i save luk, mo hem i no laekem nating man we i gat tu fes. Taswe, tufala i harem se i moagud blong smok long fored blong misinari i bitim we tufala i haedem. Ale, tufala i mekem desisen blong stop. Misinari ya i no save nating long bigfala jenis ya we tufala i mekem. Be sloslo tufala i lavem Jehova, nao samting ya i givhan long tufala blong tufala i mekem gudfala desisen.
30 EPREL–6 MEI
OL GUDGUDFALA SAMTING LONG BAEBOL | MAK 5-6
“Jisas i Gat Paoa Blong Mekem Ol Fren mo Famle Blong Yumi Oli Laef Bakegen”
nwtsty not blong stadi long Mk 5:39
hem i no ded, be hem i stap slip nomo: Long Baebol, ded i semak long slip. (Sam 13:3; Jon 11:11-14; Wok 7:60; 1Ko 7:39; 15:51; 1Te 4:13) Jisas i wantem mekem wan gel i laef bakegen. Taswe maet hem i talem tok ya, from we hem i wantem soemaot se ol man we oli ded oli save laef bakegen, semak olsem wan man we i slip, i save wekap bakegen. Paoa blong Jisas blong mekem gel ya i laef bakegen, i kam long Papa blong hem, we i “mekem dedman i laef bakegen, mo i tokbaot ol samting we oli no kamtru yet olsem we oli kamtru finis.”—Ro 4:17.
jy pej 118 haf 6
!Wan Yangfala Gel i Laef Bakegen!
Jisas i bin hilim sam man fastaem, mo hem i talem long olgeta wetem papa mo mama blong gel ya tu, blong oli no talemaot samting we hem i mekem. Nating se i olsem, papa mo mama blong gel mo ol narafala ya, oli go talemaot nius ya long “evri ples raonabaot.” (Matiu 9:26) ?Olsem wanem long yu? ?Bambae yu glad blong talemaot nius blong wan famle blong yu we i laef bakegen? Hemia seken stori we oli raetemdaon we i tokbaot Jisas we i mekem wan dedman i laef bakegen.
Traem Faenem Ol Gudfala Samting Ya
nwtsty not blong stadi long Mk 5:19
yu talemaot long olgeta: Plante taem Jisas i talem long ol man we hem i hilim olgeta blong oli no talemaot samting ya (Mk 1:44; 3:12; 7:36), be naoia i defren, Jisas i talem long man ya blong i go talemaot long ol famle blong hem, samting we i hapen long hem. Maet Jisas i mekem olsem from we oli askem hem blong i aot long ples ya mo bambae hem i no save prij long olgeta. Mo tu, maet hemia i blong daonem ol giaman ripot we ol man oli talem long saed blong ol pig we oli lus.
nwtsty not blong stadi long Mk 6:11
kilkilim leg blong yu blong das i kamaot: Hemia wan saen we i soemaot se ol disaepol oli no wantem kasem frut blong samting we God bambae i mekem. Semfala tok ya i stap long Mt 10:14; Lu 9:5. Be Mak mo Luk tufala i ademap tok ya, olsem wan woning long olgeta. Pol mo Banabas tufala i mekem samting ya taem tufala i stap long Antiok long Pisidia (Wok 13:51), mo taem Pol i mekem samting ya long Korin, hemia blong seksekem kot blong hem, hem i eksplenem mining blong samting we hem i mekem, i se: “Sipos yufala i ded, be i fol blong yufala nomo. Mi mi no gat poen from blad blong eni man.” (Wok 18:6) Maet ol disaepol oli save finis fasin ya blong kilkilim leg blong das i kamaot. Bifo, taem ol man Jiu oli go long ol narafala kantri, mo biaen oli kambak, oli mas kilkilim sandel blong olgeta bifo we oli stanap long graon blong kantri blong olgeta. Hemia from we oli talem se ol das blong narafala kantri oli doti. Be Jisas i gat defren tingting taem hem i talem tok ya long ol disaepol blong hem.