Kwestin
?From wanem ol enemi blong Jisas oli folem kastom blong wasem han?
Ol enemi blong Jisas oli stap agensem hem mo ol disaepol blong hem from plante samting, mo hemia wan long olgeta ya. Loa blong Moses i talem samting we i mekem man i kam doti, olsem, taem man i gat wan sik long tabu haf blong bodi blong hem mo taem woman i kasem sik blong hem, mo leprosi, mo taem man i tajem wan dedman no ded anamol. Mo tu, Loa i talem samting we man i mas mekem blong hem i kam klin bakegen. Hemia taem man i givim sakrefaes, i swim, mo oli saksakem wota long hem.—Levitikas, japta 11-15; Namba, japta 19.
Ol tija blong Loa, we ol man oli singaot olgeta se ol rabae, oli ademap sam rul blong olgeta antap long ol loa ya. Wan buk i talem se ol rabae oli ademap sam moa smosmol rul long samting we i mekem man i kam doti, mo olsem wanem hem i save mekem ol narafala i kam doti. Mo tu, oli mekem ol rul long saed blong ol samting we oli klin mo ol samting we oli no klin, mo ol kastom we man i mas folem blong kam klin bakegen.
Ol enemi blong Jisas oli askem long hem se: “?From wanem ol man blong yu oli no folem kastom blong yumi we ol olfala blong yumi bifo oli tijim yumi long hem? Olgeta oli stap kakae, be long kastom blong yumi, han blong olgeta i doti.” (Mak 7:5) Ol Farisi ya oli no stap tokbaot fasin ya blong wasem han bifo kakae. Be oli mekem rul se bifo we man i kakae, oli mas kafsaedem wota antap long han blong hem. Fasin ya i olsem wan kastom blong olgeta. Buk ya we yumi tokbaot finis i gohed se, ol rabae oli “raorao tu long saed blong weswan botel we oli save yusum blong kafsaedem wota, mo weswan wota i stret blong yusum, mo hu i mas kafsaedem, mo oli mas wasem han kasem weples.”
?Wanem tingting we Jisas i gat long ol rul ya? Hem i talem long ol lida blong skul blong ol man Jiu se: “Taem Profet Aesea i talemaot tok we God i givim long hem, hem i makemgud yufala ya we yufala i man blong giaman. Hem i talemaot we God i talem se, ‘Ol man ya oli stap ona long mi long ol toktok blong olgeta nomo, be tingting blong olgeta i longwe tumas long mi. Oli stap mekem wosip long mi blong nating nomo, from we taem oli tijim ol man oli talem se tok ya i blong mi, be i tingting blong man nomo.’ Mo Jisas i talem se, ‘Yufala i stap livim loa we God i givim, nao yufala i stap folem ol kastom blong man nomo.’”—Mak 7:6-8.