Refrens Blong Kristin Wok Mo Laef Buk Blong Miting
4-10 MAJ
OL GUDGUDFALA SAMTING LONG BAEBOL | ROM 12-14
“?Olsem Wanem Blong Soem Kristin Lav?”
it-1 pej 55
Lav
Lav blong ol brata (Grik: phi·la·del·phiʹa, prapa tok, “lav we yumi gat long wan brata o sista”) i mas stap long medel blong ol brata mo sista long kongregesen. (Ro 12:10; Hib 13:1; yu luk tu 1Pe 3:8.) Taswe, evriwan long kongregesen oli mas lavlavem olgeta mo oli frengud olsem wan famle nomo. Nating se evriwan long kongregesen oli lavlavem olgeta finis, be oli mas mekem moa.—1Te 4:9, 10.
Grik tok ya phi·loʹstor·gos, i minim “lavlavem yufala,” i blong tokbaot wan man we i fren gud wetem narafala. Wan narafala fasin we i joen wetem hemia, sterʹgo, we plante taem i blong tokbaot lav we man i soem insaed long famle. Mo aposol pol i talem se ol kristin oli mas gat lav ya. (Ro 12:10) Mo tu, Pol i talem se long ol lasdei bambae ol man “oli no gat lav long ol narafala” (Gr. aʹstor·goi) mo se ol man ya oli stap long rod blong ded nomo.—2Ti 3:3; Ro 1:31, 32.
w09 1/10 pej 16 haf 3
“Gat Pis Wetem Olgeta Man”
3 Ridim Rom 12:17. Pol i eksplenem se taem ol man oli mekem i nogud tumas long yumi, yumi no mas givimbak long olgeta. I impoten tumas we ol famle we ol memba blong olgeta oli no gat sem bilif, oli folem advaes ya. Sipos hasban i sakem wan rabis tok long Kristin waef blong hem mo i no kaen long hem, maet Kristin waef ya i harem se i wantem sakem bak wan nogud tok long hasban blong hem, mo mekem i nogud long hem. Be hem i no mas mekem olsem. Gudfala samting i no save kamaot sipos yumi “givimbak” nogud samting we narafala i mekem long yumi. Defren olgeta, fasin ya bambae i mekem trabol ya i kam bigwan moa.
‘No Givimbak Fasin Nogud’ We Man i Mekem Long Yu
12 Nekis advaes we Pol i givim long saed blong fasin we yumi mas mekem long ol Kristin brata sista mo ol man raonabaot, hemia: “Sipos wan man i mekem i nogud long yufala, bambae yufala i no givimbak fasin ya long hem.” Tok ya i laenap gud wetem wanem we hem i bin talem bifo, se: “Yufala i mas agens long ol rabis fasin.” Tru ya, sipos wan man i talem se hem i agens long rabis fasin, se hem i no laekem nating rabis fasin, ale, hem i no save yusum rabis fasin blong givimbak long man we i spolem hem. Sipos hem i givimbak, i min se lav blong hem i “giaman.” Afta long hemia, Pol i talem se: “Oltaem yufala i mas traem blong mekem ol fasin we olgeta man oli luk se i stret.” (Rom 12:9, 17) ?Olsem wanem yumi save mekem ol tok ya oli wok long laef blong yumi?
13 Ol man oli bin mekem bigfala trabol long ol aposol, ale long leta we Pol i raetem i go long ol Kristin long Korin, hem i talem se: “I olsem we mifala i stap stanap long fes blong olgeta enjel, mo long fes blong olgeta man blong wol tu, blong oli save luk ol trabol blong mifala . . . Taem ol man oli tok nogud long mifala, be mifala i no givimbak olsem, mifala i stap blesem olgeta. Taem ol man oli ronem mifala blong spolem mifala, be mifala i stap stanap strong. Taem ol man oli spolem nem blong mifala long ol rabis tok, be mifala i stap toktok gud nomo long olgeta.” (1 Korin 4:9-13) Tede tu, ol man blong wol ya oli stap wajem fasin blong ol trufala Kristin. Taem oli luk ol gudfala samting we yumi mekem nating se ol man oli spolem yumi, maet samting ya i save pulum olgeta blong oli rere moa blong lesin long gud nius we yumi stap talemaot.—1 Pita 2:12.
w12 1/11 pej 31 haf 13
Yu Mas Rere Blong Fogivim Narafala
13 Ating wan man we i no Kristin i mekem samting we i no stret long yu. Fasin we yu mekem long taem ya, i save givhan long hem blong i wantem save long ol tijing blong Baebol. Aposol Pol i raetem se: “Sipos wan enemi blong yu i hanggri, yu mas givim kakae long hem. Sipos hem i tosta, yu mas givim wota long hem. Long fasin ya, bambae yu mekem hem i sem we i sem. Yufala i mas holemstrong ol stret fasin blong yufala, blong winim ol rabis fasin.” (Rom 12:20, 21) Tok ya “mekem hem i sem we i sem” i kamaot long wan Grik tok we i min se “hivimap sakol we i red we i red antap long hed blong hem.” Hemia wan pijatok blong tokbaot fasin we oli stap mekem bifo blong bonem silva. Taem man i kros long yu nao yu yu kaen long hem, yu save mekem se hem i sem from fasin blong hem nao hem i kaen long yu. Sipos yu traem kasem save long man we i tok nogud long yu mo yu sore long hem, maet yu mekem se hem i wantem save moa long Baebol. Nomata se i olsem wanem, be taem yu yu kaen mo yu gat kwaet fasin, yu save mekem man ya i tingbaot se yu yu defren long ol narafala man, mo maet hem i wantem save from wanem i olsem.—1 Pita 2:12; 3:16.
Traem Faenem Ol Gudfala Samting Ya
Jusum Gud Ol Samting We Yumi Mekem Blong Harem Gud Mo Spel
5 Evri samting we yu mekem long laef blong yu i joen wetem wosip blong yu long Jehova. Taem Pol i raetem leta i go long ol Kristin long Rom, hem i yusum wan tok we i strong blong makem long tingting blong olgeta se wosip i joen wetem evri samting long laef blong olgeta. Hem i talem long olgeta wanem samting we oli mas mekem i se: “Yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo blong yufala i mekem long hem.” (Rom 12:1) Olgeta laef blong yu i minim tingting blong yu, hat blong yu, mo paoa blong yu. Ol samting ya nao we yu yusum long wok blong God. (Mak 12:30) Pol i tokbaot fasin blong mekem wok blong God wetem olgeta laef blong yumi, se i olsem wan sakrefaes. Tok ya “sakrefaes” we Pol i yusum i givim wan woning long yumi. Long Loa blong Moses, God i talem se hem i no wantem sakrefaes blong anamol we i gat wan samting i rong long bodi blong hem. (Levitikas 22:18-20) Long sem fasin, sipos wok we wan Kristin i givim i go long God olsem wan sakrefaes, i no fulwan no i gat samting nogud long hem, bambae God i no wantem sakrefaes ya. ?Wanem nao i save mekem we sakrefaes blong yumi i nogud?
6 Pol i givim advaes ya long ol Kristin long Rom se: “Bambae yufala i no letem han blong yufala, mo leg blong yufala, mo ae blong yufala, mo wanem haf blong bodi blong yufala i gohed blong mekem sin.” Mo Pol i talem tu se oli mas ‘kilimaot ol rabis fasin ya we i kamaot long tingting blong olgeta.’ (Rom 6:12-14, NTB; 8:13) Long japta 3 long leta ya we hem i raetem i go long ol Kristin long Rom, hem i givim sam eksampol blong samting we i olsem ‘ol rabis fasin we i kamaot long tingting blong yumi.’ Yumi save ridim ol tok we hem i talem long saed blong fasin blong ol sinman i se: “Maot blong olgeta i fulap long ol tok swea ya we i kamaot long kros.” “[“Ol leg blong,” NW] olgeta oli save go kwik blong mekem blad blong man i ron.” “Neva olgeta oli bin lanem blong oli ona long God.” (Rom 3:13-18) Wan Kristin we i yusum ol ‘haf blong bodi blong hem’ blong mekem ol nogud fasin, i olsem we hem i mekem bodi blong hem i kam doti. Sipos wan Kristin tede i jusum blong wajem ol doti pija blong seks no blong lukluk ol rabis muvi we oli soemaot raf fasin we man i mekem blong spolem narafala, i olsem we hem i stap “letem [ae blong hem] i gohed blong mekem sin,” ale i stap mekem ful bodi blong hem i doti. Nating se Kristin ya i gohed blong wosipim God, be wosip blong hem i olsem wan sakrefaes we i no moa klin, i no moa tabu, mo God i no save agri long wan sakrefaes olsem. (Dutronome 15:21; 1 Pita 1:14-16; 2 Pita 3:11) Yes, Kristin ya i save kasem bigfala trabol sipos hem i jusum blong wajem ol samting we oli nogud.
w08 1/6 pej 31 haf 4
Ol Bigfala Poen Long Buk Blong Rom
13:1—?Long wanem rod ol haeman we oli stap rul oli ‘holem posisen ya from we God i letem’? Ol lida blong wol we oli stap rul “from we God i letem,” hemia i minim se God nomo i givim raet long olgeta blong rul mo samtaem, God i save finis se hu bambae i rul. Samting we Baebol i tokbaot long saed blong sam long ol man we oli rul i givim klia pruf long saed ya.
KAMGUD MOA LONG WOK BLONG PRIJ
w11 1/9 pej 21-22 haf 6
?Yumi Mas Pem Takis?
Long taem blong ol fas Kristin, wan haf blong ol takis we oli pem, i go blong sapotem wok blong ami. From samting ya, plante yia biaen Gandhi mo Thoreau oli no wantem pem takis.
Be makem se, ol Kristin oli folem loa blong Rom japta 13 i no from we oli fraet blong kasem panis, be from we oli no wantem se ‘tingting blong olgeta i stikim olgeta.’ (Rom 13:5) Taswe, tingting we stikim yumi, hem nao bambae i pulum yumi ol Kristin blong pem ol takis, nating se gavman i yusum mane ya long wan rod we i no stret. Maet i luk olsem se i narakaen, be yumi mas tingbaot se yumi gat wan tingting we i stikim yumi we i stap wok, tingting ya i stap talem long yumi sipos samting we yumi mekem i stret o i no stret.
Olsem Thoreau i talem finis, yumi evriwan i gat wan tingting we i stikim yumi, be i no oltaem we yumi save trastem tingting ya. Sipos yumi wantem mekem God i glad, tingting we i stikim yumi i mas laenap wetem ol rul blong Baebol. Plante taem yumi mas jenisim smol tingting blong yumi blong i laenap wetem tingting blong God, from we ol tingting blong hem oli hae moa long tingting blong yumi. (Ol Sam 19:7) Taswe yumi mas traehad blong kasem save tingting blong Jehova long saed blong ol gavman. ?Wanem tingting blong hem?
Yumi makem se aposol Pol i singaot ol gavman blong man se oli “man blong wok blong God.” (Rom 13:6) ?Hemia i minim wanem? I minim se stamba wok blong olgeta i blong mekem se i gat oda mo blong mekem sam gudfala wok long komuniti. Nating se sam gavman oli rili kruked, be oli mekem sam wok olsem postofis, pablik edukesen, faea proteksen, mo polis. Nomata se God i save gud ol rong blong olgeta, be hem i letem olgeta oli stap blong smol taem nomo, mo i wantem se yumi pem ol takis from we yumi respektem plan blong hem.
God i letem olgeta oli rul, be blong smol taem nomo. Hem i gat plan blong stanemap Kingdom blong hem we bambae i tekem ples blong ol gavman blong man, mo bambae i fiksim ol trabol we olgeta oli bin mekem taem oli rul. (Daniel 2:44; Matiu 6:10) Be kasem taem ya, Jehova i wantem se ol Kristin oli gohed blong pem takis mo ol narafala samting.
?Be olsem wanem sipos yu gat sem filing olsem Gandhi we i harem se i no stret blong pem ol takis we haf mane i blong sapotem faet? Traem tingbaot. Sipos yu stanap longwe mo yu stap lukluk top blong wan hil, bambae yu neva save se hil ya i bigwan olsem wanem, go kasem taem we yu klaem long hil ya, bambae yu luksave se hem i hae we i hae. Long sem fasin, tingting blong God i hae moa long tingting blong yumi. Taswe yumi mas jenisim tingting blong yumi blong i laenap wetem tingting blong God. Profet Aesea i talem se: “Skae i antap we i antap, i antap olgeta long graon, mo long sem fasin, tingting blong mi i hae we i hae, i antap olgeta long tingting blong yufala, mo fasin blong mi i antap olgeta long fasin blong yufala.”—Aesea 55:8, 9.
11-17 MAJ
OL GUDGUDFALA SAMTING LONG BAEBOL | ROM 15-16
“Jehova Bambae i Mekem Yu Harem Gud Mo Yu Stanap Strong”
“Krae Wetem Olgeta” We Oli Stap Krae
11 Stori blong Lasaros i wan nomo long ol stori long Baebol we oli mekem yumi harem gud. Yumi no sapraes long samting ya, from we “olgeta tok we oli raetem bifo, oli blong tijim yumi. Nao yumi save gat hop from we ol tok blong Baebol oli mekem yumi harem gud mo oli mekem se yumi save stanap strong longtaem.” (Rom 15:4) Sipos yu tu yu stap krae from wan man we i ded, ol vas blong Baebol oli save mekem yu yu harem gud bakegen. Tingbaot sam long ol vas ya:
▪ “[Jehova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon.”—Ol Sam 34:18, 19.
▪ “[Jehova], taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.”—Ol Sam 94:19.
▪ “God ya we i Papa blong yumi, hem i lavem yumi, mo from we hem i kaen tumas, hem i save mekem yumi harem gud blong olwe, mo hem i givim gudfala hop long yumi. Mifala i prea se hem mo Masta blong yumi Jisas Kraes, tufala i mekem yufala i harem gud mo tufala i mekem yufala i strong.”—2 Tesalonaeka 2:16, 17.
Stanap Strong Gogo Kasem En Blong Rod
5 Yu askem long Jehova blong i mekem yu yu strong. Jehova “i save mekem tingting blong man i longfala, mo i save leftemap tingting blong hem.” (Rom 15:5) Hem nomo i save gud yumi, ol filing blong yumi, mo evri samting long laef blong yumi. Taswe hem i save wanem samting stret we yumi nidim blong stanap strong. Baebol i talem se: “Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta.” (Ol Sam 145:19) ?Be olsem wanem God i ansa, taem yumi askem long hem blong i mekem yumi strong?
w14 15/6 pej 14 haf 11
‘Yu Mas Lavem Jehova We i God Blong Yu’
11 Jehova i promes long yumi blong yumi laef olwe. (Rom 15:13) Promes ya blong God i givhan long yumi blong yumi stanap strong, taem yumi kasem trabol. God i promes se ol tabu Kristin bambae oli laef olwe long heven. (Rev. 2:10) Mo ol narafala man blong God, bambae oli laef olwe long Paradaes long wol. (Luk 23:43) ?Taem yumi tingbaot ol promes ya, yumi harem olsem wanem? Yumi glad tumas, yumi gat pis long tingting blong yumi, mo yumi lavem God ya we i givim “evri samting we oli gud mo evri presen we oli nambawan.”—Jem. 1:17.
Traem Faenem Ol Gudfala Samting Ya
w89 1/12 pej 24 haf 3
“Samting We i Traem Lav We Yu Gat”
I tru, ol brata we oli no man Isrel oli sud kwik blong givhan long ol Kristin we oli man Jiu. Taswe oli gat “kaon” long ol brata long Jerusalem. Gud nius i stat long Jerusalem mo i go aot long ol narafala nesen. Pol i luksave se “ol man we oli no laen blong Isrel oli kasem gudfala laef blong God long olgeta ya. Nao i stret nomo blong olgeta tu oli givim ol gudfala samting blong wol ya we oli gat, i go long ol laen blong Isrel.”—Rom 15:27, Baebol Long Bislama.
it-1 pej 858 haf 5
Oli Talemaot Bifo i Hapen
Mesaea, o Kraes nao i pikinini ya we bambae i blesem ol man long olgeta nesen long wol blong oli kam stret man. (Ga 3:8, 14) Faswan taem we oli tokbaot pikinini ya, hemia jes afta we sin i kamaot long garen blong Iden, bifo we Ebel i bon. (Je 3:15) Hemia samwe long 4000 yia bifo we oli talemaot “tabu tokhaed” ya se Mesaea nao i “pikinini” ya. Yes, “tokhaed ya i stap haed longtaem.”—Ro 16:25-27; Ef 1:8-10; 3:4-11.
18-24 MAJ
OL GUDGUDFALA SAMTING LONG BAEBOL | 1 KORIN 1-3
“?Yu Yu Gat Tingting Blong Man o Tingting Blong God?”
?Man We Spirit Blong God i Lidim Hem, i Olsem Wanem?
4 ?Man we i gat tingting blong man nomo, i olsem wanem? Hem i tingting olsem ol man blong wol, i min se hem i tingbaot samting we hem nomo i wantem. Pol i tokbaot tingting ya olsem ‘win we i stap wok naoia long ol man we oli no obei long God.’ (Efesas 2:2) Tingting ya i pulum ol man tede blong oli folem fasin blong wol. Oli mekem samting we olgeta nomo oli ting se i stret, mo oli no traehad blong folem ol rul blong God. Oli ting se haenem, mane, mo samting we oli gat raet blong mekem, oli impoten moa.
5 Man we i gat tingting blong man nomo, i folem ol fasin we Baebol i kolem, “ol wok we oli kamaot long tingting blong man.” (Galesia 5:19-21) Long fas leta we Pol i raetem long ol Kristin long Korin, hem i tokbaot sam narafala fasin blong man olsem. Man ya i save raorao, i pulum ol man blong oli seseraot mo mekem stronghed, i putum narafala Kristin long kot, i no respektem ol man we oli lidim hem, i ronem lafet, mo i no blokem ol nogud fasin we oli pulum hem. (Ol Proveb 7:21, 22) Jud i talem se man olsem i save lusum spirit blong Jehova.—Jud 18, 19.
?Man We Spirit Blong God i Lidim Hem, i Olsem Wanem?
6 ?Be wan man we spirit blong God i lidim, i olsem wanem? Hem i tingbaot oltaem blong fren gud wetem Jehova, mo i traehad blong folem fasin blong hem. (Efesas 5:1) Hem i kasem save tingting blong Jehova, mo i traehad blong tingting olsem hem. Hem i bilif strong se God i stap. Hem i defren long man we i gat tingting blong man, from we hem i folem ol rul blong God oltaem. (Ol Sam 119:33; 143:10) Hem i no mekem “ol wok we oli kamaot long tingting blong man nomo,” be i traehad blong mekem ‘ol gudfala fasin we oli kamaot long tabu spirit.’ (Galesia 5:22, 23) Wan bisnes man i tingbaot bisnes oltaem. Long sem fasin, wan man we spirit blong God i lidim, hem i tingbaot wosip blong God oltaem.
?Man We Spirit Blong God i Lidim Hem, i Olsem Wanem?
15 ?Olsem wanem blong folem fasin blong Kraes? Fas Korin 2:16 i talem se yumi mas “gat tingting blong Kraes.” Mo Rom 15:5 i talem se yumi mas gat “sem tingting we Kraes Jisas i gat.” Sipos yumi wantem folem fasin blong Kraes, yumi mas lanem blong tingting, gat filing, mo mekem samting olsem hem. Jisas i tingbaot moa blong fren gud wetem God i bitim ol narafala samting. Taem yumi folem fasin blong Jisas, yumi folem fasin blong Jehova. Taswe i impoten tumas we yumi traehad blong tingting olsem Jisas.
Traem Faenem Ol Gudfala Samting Ya
it-2 pej 1193 haf 1
Waes
Waes blong wol i ting se samting we God i mekem tru long Jisas i krangke nomo. Nating se sam long ol haeman oli gudfala lida mo oli waes, be oli “kilim bigfala Masta blong yumi i ded long pos.” (1Ko 1:18; 2:7, 8) Be naoia, God i pruvum se waes blong wol ya i krangke nomo. Hem i mekem ol waes man oli sem taem hem i yusum “wan samting we i blong God we ol man oli luk se i krangke,” mo hem i yusum tu ol man we oli luk olgeta se ‘oli krangke, oli no gat paoa, mo oli no impoten,’ blong mekem stamba tingting blong hem i kamtru. (1Ko 1:19-28) Pol i rimaenem ol Kristin long Korin se “waes blong wol ya, no waes blong ol man we oli rul long wol ya” bambae i lus i no longtaem, from we waes ya i no joen wetem mesej ya we ol aposol oli stap talemaot. (1Ko 2:6, 13) Hem i givim woning long ol Kristin long Kolosi blong oli no letem “waes blong wol mo ol giaman tok we i blong nating nomo” i pulum olgeta.—Kol 2:8; skelem wetem vas 20-23.
w08 1/7 pej 11 haf 6
Ol Bigfala Poen Long Ol Leta Long Ol Man Korin
2:3-5. Taon ya Korin i wan stamba ples blong bilif mo lanem waes blong ol man Gris. From samting ya, taem Pol i prij long ples ya, maet hem i wari sipos toktok blong hem i save pulum ol man Korin blong oli bilif, no nogat. Nating se i olsem, Pol i no letem fraet mo eni slak fasin we hem i gat i blokem hem, blong hem i no gohed blong mekem wok we God i givim long hem. Long sem fasin, yumi tu yumi no mas letem eni samting we i had, no eni samting we yumi no lan long hem, i blokem yumi, blong yumi no gohed blong talemaot gud nius blong Kingdom blong God. Olsem Pol, yumi save lukluk i go long Jehova blong i halpem yumi.
25-31 MAJ
OL GUDGUDFALA SAMTING LONG BAEBOL | 1 KORIN 4-6
“Smol Is Nomo i Save Mekem Olgeta Flaoa Blong Bred i Solap”
it-2 pej 230
Is
Aposol Pol i yusum sem pijatok taem hem i talem long Kongregesen blong Korin blong i putumaot wan man long kongregesen we i mekem rabis fasin blong seks, i se: “I no stret we yufala i stap leftemap yufala. ?Yufala i no save se smol is nomo i save mekem olgeta flaoa blong bred i solap? Yufala i mas sakem olfala flaoa we i gat is long hem, blong yufala i kam olsem niufala flaoa we i no gat is long hem. Hemia from we Kraes we i smol sipsip blong yumi blong Pasova, hem i ded finis olsem sakrefaes.” Hem i eksplenem mining blong is i se: “Taswe taem yumi stap mekem lafet ya, yumi no mas yusum is we i olfala, mo yumi no mas yusum is blong sin mo rabis fasin, be yumi mas yusum bred ya nomo we i no gat is long hem, hemia ol samting we oli gud mo oli tru.” (1Ko 5:6-8) Long vas ya Pol i tokbaot mining blong Lafet Blong Bred We i Nogat Is afta long lafet blong Pasova. Olsem wan smol is nomo we i save mekem olgeta flaoa blong Bred i solap, kongregesen i save kam doti long ae blong Jehova sipos oli no putumaot wan man we i mekem sin. Oli mas kwik blong sakemaot “is” ya we i stap long medel blong olgeta, sem mak olsem we ol man Isrel oli no save lego is i stap insaed long haos long taem blong lafet ya.
it-2 pej 869-870
Setan
?I minim wanem blong ‘putum man we i mekem sin long han blong Setan blong tekemaot sin ya’?
Taem aposol Pol i givim advaes long kongregesen blong Korin blong oli putumaot man ya we i mekem sin, we i bin tekem waef blong papa blong hem, hem i se: “Yufala i mas putum man olsem long han blong Setan blong tekemaot sin ya.” (1Ko 5:5) Hemia i min se oli putumaot hem long kongregesen, mo oli no mas joen wetem hem. (1Ko 5:13) Mo i olsem se oli putum hem i go long wol ya we Setan i rul long hem. Olsem wan “smol is nomo” we i mekem “olgeta flaoa blong bred i solap,” kongregesen i mas tekemaot “sin” we i stap long medel blong olgeta blong i no spolem ol narafala. (1Ko 5:6, 7) Long sem fasin, Pol i putum Haemenaeas mo Aleksanda long han blong Setan, from we tufala i no moa wantem bilif.—1Ti 1:20.
lvs pej 241, ol not
Putumaot man long kongregesen
Taem wan man i mekem wan bigfala sin mo i no wantem tanem tingting blong hem mo i no wantem folem ol rul blong Jehova, hem i no moa stap olsem wan memba blong kongregesen. Kongregesen i mas putumaot hem. Mo long taem olsem, yumi no moa save joen wetem hem mo yumi no moa save toktok long hem. (1 Korin 5:11; 2 Jon 9-11) Fasin ya blong putumaot wan man i protektem nem blong Jehova mo kongregesen. (1 Korin 5:6) Mo tu, taem kongregesen i putumaot wan man, hemia i givhan long hem blong i tanem tingting blong hem mo i kambak long Jehova.—Luk 15:17.
▸ Japta 3, haf 19
Traem Faenem Ol Gudfala Samting Ya
w09 1/5 pej 26 haf 16
Ol Enjel—‘Ol Spirit We Oli Mekem Wok Blong God’
16 Ol Kristin we oli kasem ol traem oli ‘stanap long fes blong olgeta enjel, blong ol enjel oli save luk ol trabol blong olgeta.’ (1 Kor. 4:9) Ol enjel oli harem gud tumas blong luk ol samting we yumi mekem blong stap tru long God mo oli glad tumas taem wan man nogud i tanem tingting blong hem from sin blong hem. (Luk 15:10) Ol enjel oli luk ol gudfala fasin we ol Kristin woman oli soemaot blong ona long God. Baebol i tokbaot se ol ‘woman oli mas kavremap hed blong olgeta blong soemaot long ol enjel, we olgeta oli stap long han blong man blong olgeta.’ (1 Kor. 11:3, 10) Yes, ol enjel oli glad blong luk we ol Kristin woman mo ol narafala man blong God oli folem tiokratik oda mo rul we God i stanemap long saed blong olgeta we oli hed. Fasin blong ol man blong God blong obei long saed ya i pulum ol pikinini blong God long heven blong tingbaot fasin obei we olgeta tu oli mas gat.
it-2 pej 211
Loa
Loa Blong Ol Enjel. Ol enjel oli hae moa long ol man, mo oli stap folem ol loa blong God. (Hib 1:7, 14; Sam 104:4) Mo tu, ol loa we Jehova i givim, enemi blong hem Setan tu i mas folem. (Job 1:12; 2:6) Maekel we i jif blong ol enjel i luksave mo i respektem Jehova olsem Bigfala Jaj taem hem i talem long Setan se: “Jehova bambae i tok long yu.” (Jud 9; skelem wetem Sek 3:2.) Jehova God nao i putum olgeta enjel aninit long Jisas. (Hib 1:6; 1Pi 3:22; Mt 13:41; 25:31; Fil 2:9-11) Taswe, Jisas nao i sanem wan enjel blong i go talemaot long Jon ol samting we bambae oli hapen. (Re 1:1) Be long 1 Korin 6:3, aposol Pol i talem se ol brata blong Kraes nao bambae oli jajem ol enjel, hemia from we bambae oli joen long wok ya blong jajem ol rabis spirit.