Refrens Blong Kristin Wok Mo Laef Buk Blong Miting
2-8 SEPTEMBA
OL GUDGUDFALA SAMTING LONG BAEBOL | HIBRUS 7-8
“Wan Pris Olsem Melkisedek . . . Gogo i No Save Finis”
it-2 pej 366
Melkisedek
King blong taon ya Salem bifo mo hem i pris blong “God ya we i hae we i hae,” hemia Jehova. (Je 14:18, 22) Hem i faswan pris we Baebol i tokbaot, mo hem i mekem wok ya samwe long ol yia 1933 Bifo Kraes. Hem i king blong taon ya Salem, we i minim “Pis,” mo aposol Pol i tokbaot Melkisedek se hem i “King Blong Pis” from we nem blong hem i minim, “King Blong Stret Fasin.” (Hib 7:1, 2) Ol man oli ting se taon ya we bifo oli singaot se Salem, i kam Jerusalem, mo tok ya i stap insaed long nem ya Jerusalem, taswe samtaem oli singaotem se “Salem.”—Sam 76:2.
Afta we Ebram (Ebraham) i winim king Kedolaoma mo ol narafala king, hem i kamtru long bigfala levelples ya we nem blong hem Sabe o “Ples blong king.” Long ples ya Melkisedek i “givim bred mo waen” mo i blesem Ebraham, i talem long hem se: “Ebram. Prea blong mi, we God ya we i hae we i hae, we i mekem skae mo graon, hem bambae i blesem yu. Hem nao i mekem yu yu winim ol enemi blong yu long faet. !Yumi presem hem!” Nao Ebraham i hivimap ol samting we hem i winim long “ol fo king ya” i go long “ten hip,” mo i givim wan hip i go long Melkisedek we i king mo pris.—Je 14:17-20; Hib 7:4.
it-2 pej 367 haf 4
Melkisedek
?Olsem wanem Melkisedek i ‘no gat stori we i tokbaot taem we hem i bon mo taem we hem i ded’?
Pol i tokbaot wan intresting samting long saed blong Melkisedek, i se: “Hem i no gat papa mo mama, mo i no gat laen blong hem. Mo i no gat stori we i tokbaot taem we hem i bon, mo taem we hem i ded. Be hem i kam olsem Pikinini blong God, nao hem i wan pris blong olwe.” (Hib 7:3) Olsem ol narafala man, Melkisedek i bon mo i ded. Be oli neva tokbaot nem blong papa mo mama blong hem, laen we hem i kamaot long hem mo ol pikinini we oli kamaot biaen long hem, mo tu Baebol i no talem eni samting long saed blong taem we hem i bon mo taem we hem i ded. Taswe, i stret we Melkisedek i pija blong Jisas Kraes, we i pris blong olwe, from we Baebol i no tokbaot se Melkisedek i tekem ples blong hu o hu i tekem ples blong hem afta we hem i ded. Long sem fasin, Jisas tu i no kamaot long wan laen blong pris, mo Baebol i talem se bambae i neva gat wan man i tekem ples blong hem. Nating se Jisas i bon long Juda long laen blong king Deved, be olgeta ya oli no laen blong pris, o i neva gat wan man long laen ya we i pris mo i king long semtaem. Ol samting ya oli soemaot klia se Jehova nao i putumap hem.
it-2 pej 366
Melkisedek
I Pija Blong Kraes We i Pris. Long wan impoten profet tok we i tokbaot Mesaea, Deved i talemaot strong promes we Jehova i mekem long “Masta” blong hem, i se: “Yu yu pris olsem pris ya Melkisedek bifo, mo bambae yu holem wok blong pris oltaem gogo i no save finis.” (Sam 110:1, 4) Ol tok ya blong Deved i mekem ol man Hibru oli sua fulwan se Mesaea nao i man ya we bambae i mekem wok blong pris mo king long semtaem. Long leta we Pol i raetem i go long ol man Hibru, hem i kliarem tu tingting we olgeta oli gat, taem hem i talem se “[Jisas], i kam hae pris olsem Melkisedek, mo bambae hem i pris oltaem gogo i no save finis.”—Hib 6:20; 5:10; yu luk KONTRAK.
Traem Faenem Ol Gudfala Samting Ya
w00 15/8 pej 14 haf 11
Ol Sakrefaes We God i Glad Long Hem
11 Aposol Pol i talem se: “Ol narafala hae pris ya, God i putumap olgeta blong oli stap givim presen long hem, mo blong oli stap kilim animol blong mekem sakrefaes blong tekemaot ol sin blong ol man.” (Hibrus 8:3) Makemgud se long vas ya, Pol i tokbaot tu defren samting we ol pris blong Isrel oli givim i go long God, hemia “presen” mo “sakrefaes,” no “sakrefaes blong tekemaot ol sin.” (Hibrus 5:1) Plante taem, ol man oli givim presen blong soem lav mo fasin tangkiu, mo tu blong frengud wetem narafala, no blong mekem narafala i glad long olgeta no akseptem olgeta. (Jenesis 32:20; Ol Proveb 18:16) I sem mak, plante long ol sakrefaes we Loa i askem, oli olsem “presen” we ol man oli givim blong mekem God i akseptem mo i glad long olgeta. Man we i brekem Loa, i mas givim “sakrefaes blong tekemaot ol sin,” blong stretem rong ya. Ol faef faswan buk blong Baebol, antap moa, buk blong Eksodas, Levitikas, mo Namba, oli tokbaot fulap samting we ol man oli yusum blong mekem ol defren kaen sakrefaes mo presen. I no isi blong kasem fulwan save mo rimemba olgeta samting long saed ya. Nating se i olsem, i impoten tumas blong tingting gud long sam bigfala poen long saed blong ol defren sakrefaes ya.
it-1 pej 523 haf 5
Kontrak
?Olsem wanem Loa blong kontrak i kam “olfala”?
Loa blong kontrak i kam “olfala” taem God i yusum profet Jeremaea blong talemaot se bambae i gat wan niufala kontrak. (Jer 31:31-34; Hib 8:13) Long yia 33 Kristin Taem, Loa blong kontrak i finis taem Kraes i ded long pos (Kol 2:14), mo niufala kontrak i tekem ples blong hem.—Hib 7:12; 9:15; Wok 2:1-4.
Kamgud Moa Long Wok Blong Prij
it-1 pej 524 haf 3-5
Kontrak
Niufala Kontrak. Long yia 600 Bifo Kraes, Jehova i yusum profet Jeremaea blong i talemaot wan niufala kontrak o niufala promes. Hem i talem se kontrak ya bambae i no olsem Kontrak blong Loa we ol man Isrel oli brekem. (Jer 31:31-34) Long naet bifo we Jisas i ded long Nisan 14 long yia 33 Kristin Taem, hem i mekem lafet blong Kakae Blong Masta wetem ol disaepol blong hem mo hem i talemaot niufala kontrak, we sakrefaes blong hem i mekem i stanap. (Lu 22:20) Fifti dei afta we Jisas i laef bakegen, mo 10 dei afta we hem i go luk Papa blong hem long heven, hem i sanem tabu spirit we Jehova i givim long hem, long ol disaepol blong hem, taem oli joen tugeta long Jerusalem long wan rum antap.—Wok 2:1-4, 17, 33; 2Ko 3:6, 8, 9; Hib 2:3, 4.
Jehova i mekem niufala kontrak wetem “Isrel blong God,” hemia ol tabu Kristin we oli joen wetem Kraes blong mekemap wan kongregesen o bodi. (Hib 8:10; 12:22-24; Ga 6:15, 16; 3:26-28; Ro 2:28, 29) Niufala kontrak i wok from we blad (sakrefaes blong man) blong Jisas Kraes i ron. Jisas i givim praes ya i go long Jehova afta we hem i go antap long heven. (Mt 26:28) Taem God i jusum wan man blong i go long heven (Hib 3:1), God i tekem man ya i go long kontrak blong hem tru long sakrefaes blong Kraes. (Sam 50:5; Hib 9:14, 15, 26) Jisas Kraes i tekem niufala kontrak i kamtru (Hib 8:6; 9:15) mo hem nao i pikinini blong Ebraham. (Ga 3:16) Taem Jisas i tekem niufala kontrak i kamtru, hem i givhan long olgeta we oli stap long kontrak ya blong oli kam stret pikinini blong Ebraham, (Hib 2:16; Ga 3:29) from we hem i fogivim ol sin blong olgeta. Nao Jehova i talemaot se oli stret man.—Ro 5:1, 2; 8:33; Hib 10:16, 17.
Ol brata blong Kraes we tabu spirit i makemaot olgeta, oli mekem wok blong pris aninit long Hae Pris, oli olsem “wan grup blong ol king we oli pris.” (1Pi 2:9; Re 5:9, 10; 20:6) Olgeta ya oli mekem wok blong pris, wan “wok blong givhan long ol man” (Fil 2:17, futnot), mo oli singaot olgeta se ol “man blong wok long niufala kontrak.” (2Ko 3:6) Olgeta ya oli mas folemgud trak blong leg blong Kraes, mo oli mas holemstrong kasem we oli ded; biaen Jehova bambae i mekem olgeta oli kam ol pris long kingdom blong hem, oli kam ol spirit we oli kasem haenem blong hem, mo bambae hem i givim wan bodi we i no save roten mo we i no save ded samtaem taem oli joen blong rul wetem Kraes long heven. (1Pi 2:21; Ro 6:3, 4; 1Ko 15:53; 1Pi 1:4; 2Pi 1:4) Jehova i mekem kontrak ya blong tekemaot sam man blong ol nesen blong oli karem nem blong hem mo oli kam olsem “ol pikinini” long laen blong Ebraham. (Wok 15:14) Olgeta ya oli olsem “woman” blong Kraes mo bambae oli rul wetem hem long kingdom, from we Kraes i bin mekem kontrak blong Kingdom wetem olgeta. (Jon 3:29; 2Ko 11:2; Re 21:9; Lu 22:29; Re 1:4-6; 5:9, 10; 20:6) Niufala kontrak ya bambae i gohed kasem we olgeta memba blong “Isrel blong God” oli laef bakegen long wan bodi we i no save ded samtaem long heven.
9-15 SEPTEMBA
OL GUDGUDFALA SAMTING LONG BAEBOL | HIBRUS 9-10
“Sado Blong Ol Gudfala Samting We Bambae i Kam”
it-1 pej 862 haf 1
Fasin Blong Fogivim
Folem loa we God i givim long nesen blong Isrel, sipos wan man i mekem sin agensem God o wan narafala man mo i wantem se God i fogivim sin blong hem, fastaem hem i mas hem i mas stretem rong ya we hem i mekem olsem we Loa i talem, mo plante taem, man ya i mas kilim animol blong blad blong hem i ron olsem sakrefaes i go long Jehova. (Le 5:5–6:7) From samting ya, Pol tu i talem se: “Yes, folem Loa, klosap evri samting oli mas yusum blad blong klinim, mo sipos i no gat blad i ron, bambae God i no save fogivim sin.” (Hib 9:22) Blong talem stret, blad blong wan animol i no save tekemaot ol sin mo mekem tingting blong wan man i kam klin. (Hib 10:1-4; 9:9, 13, 14) Be niufala kontrak we i stanap long ransom sakrefaes blong Jisas Kraes, hemia nao i save fogivim ol sin fulwan. (Jer 31:33, 34; Mt 26:28; 1Ko 11:25; Ef 1:7) Taem Jisas i stap long wol, hem i soemaot klia se hem i save fogivim ol sin, taem hem i mekem wan man we bodi blong hem i ded, i kamgud bakegen.—Mt 9:2-7.
cf pej 183 haf 4
“Yu Gohed, Yu Folem Mi”
4 Baebol i no tokbaot olsem wanem oli welkamem Jisas, mo glad we hem i kasem taem hem i gobak long heven blong joen bakegen wetem Papa blong hem. Be, Baebol i bin talemaot finis samting we bambae i hapen stret afta we Jisas i gobak long heven. Blong plante yia finis, oltaem ol man Jiu oli luk wan tabu seremoni. Wan taem evri yia long Dei Blong Stretem Sin, hae pris i stap go insaed long rum we i tabu we i tabu blong saksakem blad antap long bokis blong kontrak. Long dei ya, wok we hae pris i mekem i pija blong Mesaea. Jisas i mekem mining blong seremoni ya i kamtru wan taem nomo mo blong olwe, taem hem i gobak long heven. Hem i go insaed long tabu ples we Jehova i stap long hem long heven, mo i givim blad blong ransom sakrefaes blong hem i go long Papa blong hem. (Hibrus 9:11, 12, 24) ?Olsem wanem? ?Jehova i glad long sakrefaes ya?
it-2 pej 602-603
Stret Gud Olgeta
Loa Blong Moses i Stret Gud. Loa we Jehova i givim long ol man Isrel tru long Moses i tokbaot tu olsem wanem blong putumap wan pris, mo wok blong mekem ol sakrefaes. Nating se God nao i givim Loa ya mo i stret gud, be Loa ya wetem wok blong ol pris mo ol sakrefaes we oli mekem oli no save mekem ol man we oli folem Loa ya, oli kam stret gud olsem we aposol i talem. (Hib 7:11, 19; 10:1) Loa i no mekem se yumi kam fri long sin mo ded, be i soemaot klia se sin i wanem. (Ro 3:20; 7:7-13) Nating se i olsem, ol samting we Loa i talem i blong mekem ol samting we Jehova i wantem; Loa i olsem wan “tija” we i lidim ol man oli go long Kraes, we i olsem wan “sado nomo blong ol gudfala samting we bambae i kam.” (Ga 3:19-25; Hib 10:1) Taswe, taem Pol i talem se “Loa i no save mekem from we ol man oli sinman” (Ro 8:3), hem i tokbaot wan hae pris we i man Jiu (we oli putumap hem folem Loa blong mekem ol sakrefaes insaed long Rum we i Tabu we i Tabu long Dei Blong Stretem Sin wetem blad blong animol) we i ‘no naf gud blong sevem ol man,’ olsem Hibrus 7:11, 18-28 i tokbaot. Nating se ol pris long laen blong Eron oli mekem ol sakrefaes blong man i kam stret long fes blong God, be hemia i no mekem oli fri fulwan long tingting ya we i stap stikim olgeta from sin. Aposol i tokbaot sakrefaes ya blong stretem sin se i “no naf blong mekem ol man we oli wosipim God, oli kam stret gud olgeta” hemia i minim tu, i stretem tingting we i stikim man from sin. (Hib 10:1-4; skelem wetem Hib 9:9.) Wan hae pris i no naf blong givim wan ransom we i save tekemaot sin fulwan. Be wok blong Kraes nomo olsem wan pris i naf blong givim sakrefaes blong mekem samting ya.—Hib 9:14; 10:12-22.
Traem Faenem Ol Gudfala Samting Ya
Kwestin
Pol i talem se blad i mas ron blong kontrak ya bitwin God mo ol man i stanap. Loa blong kontrak i wan eksampol blong samting ya. God i yusum Moses olsem medel man blong kontrak bitwin God mo ol man Isrel. Moses i gat bigfala wok blong mekem, hem nao i halpem ol man Isrel taem oli kam blong mekem kontrak wetem God. From samting ya, Moses i olsem man we i givhan blong mekem kontrak we i kam long Jehova. ?Be hemia i min se Moses i mas ded blong blad blong hem i ron blong stanemap Loa blong kontrak? Nogat. Blad blong ol animol we oli mekem i ron, i tekem ples blong blad blong Moses.—Hibrus 9:18-22.
?Olsem wanem long niufala kontrak bitwin Jehova mo nesen blong Isrel long spirit? Jisas Kraes nao i mekem bigfala wok long kontrak ya bitwin Jehova mo Isrel long spirit. Jehova i stamba blong kontrak, mo hem i stanemap tru long Jisas Kraes. Jehova i yusum Jisas taem hem i stap long wol olsem medel man bitwin God mo ol man ya we bambae oli faswan blong joen long kontrak ya. (Luk 22:20, 28, 29) Mo tu, Jisas i naf blong i ded olsem wan sakrefaes blong mekem kontrak ya i stanap. Hemia i no wan sakrefaes blong ol animol, be blong wan man we i stret gud olgeta. Taswe Pol i tokbaot Kraes se hem i wan man we i givhan blong mekem niufala kontrak. Afta we “[Kraes] i go insaed long heven stret, mo naoia hem i stap stanap long fes blong God blong toktok long saed blong yumi,” niufala kontrak ya i stanap.—Hibrus 9:12-14, 24.
Taem Pol i talem se Moses mo Jisas i man blong givhan blong mekem kontrak, hem i no stap minim se tufala nao i stamba blong ol kontrak ya, be hem i God. Tufala i help nomo olsem medel man blong mekem se ol kontrak ya oli stanap. Long tufala kontrak ya, i mas gat blad i ron, olsem long taem blong Moses oli yusum ol animol, mo long taem blong Jisas, hem i givim prapa laef blong hem blong olgeta we oli joen long niufala kontrak.
it-1 pej 249-250
Baptaes
Luk i talem se Jisas i stap prea taem hem i tekem baptaes. (Lu 3:21) Mo tu, man ya we i raetem leta i go long ol man Hibru i eksplenem se taem Jisas Kraes i “kam long wol” (hemia i no minim taem ya we hem i bon mo i no save rid mo i no save talem ol tok ya, be taem hem i kamtru blong tekem baptaes mo statem minista wok blong hem) hem i talem bakegen tok ya we i stap long Ol Sam 40:6-8 (LXX): “Yu yu no wantem sakrefaes mo presen, be yu yu rerem finis wan bodi blong mi. . . . God blong mi. !Yu luk! Mi mi kam (ol tok long skrol oli tokbaot mi) blong mekem samting we yu yu wantem.” (Hib 10:5-9) Jisas i bon olsem wan memba blong nesen blong ol man Jiu, hemia nesen ya we God i mekem wan spesel kontak wetem olgeta, hemia kontrak blong Loa. (Eks 19:5-8; Ga 4:4) From samting ya, Jisas i stap aninit long kontrak ya finis wetem Jehova, taem hem i kam long Jon blong i baptaesem hem. Be naoia, Jisas i kam blong mekem wan samting we i go moa long wanem we kontrak blong Loa ya i talem. Hem i kam blong baptaes blong givim hem wan long Papa blong hem, Jehova, blong mekem “samting we God i wantem,” mo hemia i minim tu se hem i “rerem finis” prapa bodi blong hem blong i finisim ol sakrefaes blong animol we oli stanap long Loa. Aposol Pol i talem se: “Folem ‘samting we God i wantem,’ yumi kam tabu from we Jisas Kraes i givim bodi blong hem olsem wan sakrefaes wan taem nomo mo blong olwe.” (Hib 10:10) Wan narafala samting we God i wantem, hemia blong Jisas i mekem wok we i joen wetem Kingdom, mo hemia tu i wan risen from wanem Jisas i baptaes blong givim laef blong hem wan. (Lu 4:43; 17:20, 21) Jehova i akseptem mo i luksave samting we Jisas i mekem, blong givim hem wan, taem i makemaot hem wetem tabu spirit mo i se: “Yu yu Pikinini blong mi. Mi mi lavem yu tumas, mo mi glad long yu.”—Mk 1:9-11; Lu 3:21-23; Mt 3:13-17.
16-22 SEPTEMBA
OL GUDGUDFALA SAMTING LONG BAEBOL | HIBRUS 11
“?From Wanem Bilif i Impoten?”
Mekem Wok We i Soemaot Bilif Long Ol Promes Blong God
6 Hibrus 11:1 i eksplenem se bilif i olsem wanem. (Ridim.) (1) Man we i gat bilif “hem i sua se olgeta samting we hem i stap putum tingting blong hem i strong long olgeta, bambae oli mas kamtru.” Sam long ol samting ya, hemia ol promes blong God long fiuja. Taswe yumi sua se ol rabis fasin bambae oli finis mo niufala wol bambae i kamtru. (2) Man we i gat bilif i save se “i gat pruf i stap” blong soemaot se “ol samting ya oli tru, nating we hem i no save luk olgeta.” Yumi save se Jehova God, Jisas Kraes, ol enjel, mo Kingdom, oli stap long heven, nating se yumi no luk olgeta. (Hibrus 11:3) ?Yumi soemaot olsem wanem se yumi bilif long ol promes blong God mo ol samting we yumi no save luk? Yumi soemaot long fasin blong laef blong yumi, ol toktok blong yumi, mo long ol samting we yumi mekem.
‘God i givim pei long man we i traehad blong faenem hem’
?Yumi save mekem wanem blong Jehova i glad long yumi? Pol i raetem se: “Sipos man i no bilif, hem i no save mekem God i glad long hem.” Aposol Pol i no stap talem se sipos man i no bilif, bambae i had blong hem i mekem God i glad. Defren olgeta, hem i talem se man i no save mekem olsem. Hemia i min se man i nidim bilif blong mekem God i glad.
?Wanem kaen bilif i save mekem Jehova i glad? I gat tu samting we i mas joen wetem bilif blong yumi long God. Faswan, yumi “mas bilif we God i stap.” Sam narafala translesen oli talem se yumi “bilif se hem i tru” mo “bilif se hem i laef.” ?Olsem wanem yumi save mekem God i glad sipos yumi no sua se hem i laef i stap? I tru yumi mas bilif se God i laef i stap, be hemia i no naf, from we ol devel tu oli bilif se Jehova i laef i stap. (Jemes 2:19) Sipos yumi bilif se God i laef i stap, samting ya i mas pusum yumi blong tekem aksen blong pruvum bilif ya, olsem taem yumi mekem laef blong yumi i laenap wetem tingting blong God.—Jemes 2:20, 26.
Nambatu, yumi “mas bilif” se God nao “bambae i givim pei.” Wan man we i gat trufala bilif, i sua fulwan se ol traehad we hem i mekem long laef blong hem blong mekem Jehova i glad, oli no blong nating nomo. (1 Korin 15:58) ?Olsem wanem yumi save mekem Jehova i glad sipos yumi no sua se bambae hem i givim pei long yumi? (Jemes 1:17; 1 Pita 5:7) Man we i ting se God i no kea long yumi, i no glad long ol samting we yumi mekem, mo i no save givim samting long yumi, man ya i no save God ya we Baebol i tokbaot.
?Jehova i givim pei long hu? Pol i talem se long “ol man we oli stap traehad blong faenem hem.” Refrens blong wan Baebol i talem se Grik tok ya we oli tanem i kam “traehad blong faenem” i no minim se “yu go blong faenem” be i minim, kam “joen blong wosip” long God. Wan narafala refrens i eksplenem se Grik veb ya i save minim wan bigfala traehad we man i mekem blong kasem wan samting mo tingting blong hem i stap nomo long samting ya. Yes, Jehova i givim pei long ol man we bilif blong olgeta i pusum olgeta blong wosipim hem wetem fulhat mo strong tingting.—Matiu 22:37.
Mekem Bilif Blong Yu i Strong Moa Long Ol Promes Blong God
10 Long Hibrus japta 11, aposol Pol i talem se: “I gat sam woman we [God] i mekem ol pikinini blong olgeta oli laef bakegen long ded. Be sam narafala man . . . ol enemi blong olgeta oli stap mekem olgeta oli harem nogud tumas long bodi blong olgeta, be oli . . . no wantem lego bilif blong olgeta, blong oli save go fri, oli bilif se God bambae i mekem olgeta oli laef bakegen long wan laef we i gud moa.” (Hibrus 11:35) Plante man oli kasem bigfala trabol be oli no lego God, from we oli bilif strong long promes blong laef bakegen. Oli save se Jehova bambae i mekem olgeta oli laef bakegen, nao oli gat laef we i no save finis long wol ya. Yumi save tingbaot Nabot mo Sekaraea. Ol man oli stonem tufala i ded from we tufala i obei long God. (1 King 21:3, 15; 2 Kronikel 24:20, 21) Oli sakem Daniel i go long wan hol we i fulap long ol laeon, mo oli sakem ol fren blong hem oli go long faea we i hot we i hot. Olgeta ya oli rere blong ded bitim we oli lego Jehova. Oli gat strong bilif se Jehova bambae i givim tabu spirit long olgeta, mo givhan long olgeta blong oli stanap strong taem oli safa.—Daniel 3:16-18, 20, 28; 6:13, 16, 21-23; Hibrus 11:33, 34.
11 Plante profet olsem Mikaea mo Jeremaea, ol man oli jikim olgeta mo sakem olgeta oli go long kalabus. Sam narafala olsem Elaeja, oli stap olbaot “long draeples, mo long hil, mo long hol blong ston, mo long hol long graon.” Olgeta ya oli no lego Jehova, be oli stanap strong from we oli ‘sua se olgeta samting we oli putum tingting i stap strong long olgeta, bambae oli kamtru.’—Hibrus 11:1, 36-38; 1 King 18:13; 22:24-27; Jeremaea 20:1, 2; 28:10, 11; 32:2.
Traem Faenem Ol Gudfala Samting Ya
it-1 pej 804 haf 5
Bilif
Sam Man We Oli Gat Strong Bilif Long Taem Bifo. Evriwan long “bigfala hip blong ol witnes” we Pol i tokbaot, (Hib 12:1) oli gat wan gudfala risen blong strong bilif. Eksampol, Ebel i savegud promes blong Jehova long saed blong “pikinini” we bambae i smasem hed blong “snek.” Mo hem i luk olgeta samting we Jehova i bin talemaot long papa mo mama blong hem long garen blong Iden, oli stap kamtru. Afsaed long Iden, Adam mo famle blong hem oli mas wok had blong kasem kakae from we graon i nogud, mo i gat plante ropnil mo ol narafala rabis gras we oli gru long hem. Ebel i luk we Iv i stap wantem tumas hasban blong hem mo Adam i stap bos long waef blong hem. Mo i sua se hem i luk we mama blong hem i harem i soa taem hem i gat bel. Mo tu, i gat ol jerubim mo wan naef blong faet we faea i laet long hem oli stap gad long garen blong Iden. (Je 3:14-19, 24) Olgeta samting ya oli mekem Ebel i “trastem fulwan” se ol man bambae oli kam fri tru long ‘pikinini ya we Jehova i bin promes’ blong givim. Nao from bilif ya, “hem i givim wan sakrefaes long God” we i gud moa i winim hemia blong Ken.—Hib 11:1, 4.
‘God i Glad Tumas Long Hem’
?Wanem mining blong tok ya se God i “tekemaot” Inok, blong hem i no safa nao “i ded”? I luk olsem se Jehova tekemaot laef blong hem, nao hem i ded we i no safa. Be fastaem, God “i soemaot long hem se hem i glad long hem.” ?Olsem wanem hem i soemaot samting ya? Jes bifo we hem i ded, maet God i mekem hem i luk wan vison. Maet long vison ya, hem i luk wol i kam wan paradaes. Inok i luk saen ya we i soemaot se Jehova i glad long hem, nao biaen hem i slip long ded. Aposol Pol i tokbaot Inok mo ol narafala man mo woman we oli gat bilif, i se: “Olgeta ya oli bilif gogo kasem we oli ded.” (Hibrus 11:13, NW) Biaen, maet ol enemi blong hem oli lukaotem bodi blong hem, be “i no gat wan man i faenem,” from we Jehova i mekem i lus, blong oli no spolem bodi ya no oli yusum long giaman wosip.
23-29 SEPTEMBA
OL GUDGUDFALA SAMTING LONG BAEBOL | HIBRUS 12-13
“Fasin Stretem i Soemaot Se Jehova i Lavem Yumi”
w12 1/3 pej 29 haf 18
Yu No Mas Luklukbak Long “Ol Samting Biaen”
18 Advaes we i stikim yumi. Maet yumi stap tingbaot ol advaes we ol narafala oli givim long yumi long ol yia we oli pas. Hemia i save mekem tingting blong yumi i foldaon, yumi kros, mo yumi harem se bambae yumi no moa traehad. (Hib. 12:5) Nating se yumi sakemaot advaes ya wantaem nomo, no yumi traem folem smoltaem ale yumi lego, hemia i sem mak nomo. Yumi no letem advaes ya i givhan long yumi. I moa gud yumi mekem wanem we Solomon i talem, i se: “Yu holemtaet fasin stretem. Yu no lego. Yu mas lukaotgud long fasin ya, from we hemia nao laef blong yu.” (Prov. 4:13, NW) Olsem man we i draevem trak i obei long ol saen we oli stap long rod, yu mas glad long ol advaes we narafala i givim long yu, yu mas folem, mo yu mas go fored.—Prov. 4:26, 27; ridim Hibrus 12:12, 13.
w12 1/7 pej 21 haf 3
“Taem Yufala i Prea, Yufala i Talem Se: ‘Papa’”
Wan papa we i gat lav hem i stap stretem ol pikinini blong hem, from we hem i kea long laef blong olgeta taem bambae oli kam bigman. (Efesas 6:4) Maet hem i strong, be hem i neva stretem pikinini blong hem long wan fasin we i raf. Long sem fasin, maet samtaem yumi nidim we Papa blong yumi long heven i stretem yumi. Be oltaem fasin blong God blong stretem yumi i joen wetem lav mo hem i neva mekem i strong bitim mak. Jisas i olsem Papa blong hem, nating se ol disaepol blong hem oli slo blong folem samting we hem i wantem, be hem i neva strong bitim mak.—Matiu 20:20-28; Luk 22:24-30.
‘Lesin Long Advaes We i Stretem Yu Mo Kam Waes’
18 Yu save harem nogud taem oli stretem yu, be sipos yu no wantem lesin long advaes blong God, bambae yu harem nogud moa. (Hibrus 12:11) Rabis fasin blong Ken mo King Jedekia i tijim yumi long wan impoten samting. Taem God i luk we Ken i no laekem brata blong hem mo i wantem kilim hem i ded, hem i givim woning se: ‘?From wanem yu yu kros? Sipos fasin blong yu i stret, bambae mi glad long yu, be fasin blong yu i no stret. Sin blong yu i olsem wan wael animol we i rere blong kakae yu. Be yu mas winim hem.’ (Jenesis 4:6, 7) Ken i no lesin long advaes blong Jehova, nao i kilim brata blong hem i ded. From samting ya, hem i kasem nogud frut long ful laef blong hem. (Jenesis 4:11, 12) Sipos Ken i bin lesin long advaes blong God, bambae hem i no save harem nogud olsem.
Traem Faenem Ol Gudfala Samting Ya
w11 1/9 pej 20-21 haf 11
Yumi Mas Mekem Tingting Blong Yumi i Strong Blong Resis
11 Pol i talem se ol man blong Jehova we oli laef bifo long taem blong ol Kristin, ‘oli witnes, mo oli stap raonabaot long yumi we oli plante we plante.’ Olgeta ya oli gohed blong mekem wok blong Jehova kasem en blong laef blong olgeta. Eksampol blong olgeta i soemaot se ol Kristin oli save gohed blong mekem wok blong Jehova nating se oli kasem trabol. ‘Ol witnes ya we oli plante we plante’ oli olsem ol man blong resis we oli ron gud mo oli finisim resis blong olgeta. Eksampol blong olgeta i givhan long ol narafala blong oli gohed long resis blong olgeta mo blong finisim resis ya. Taswe, ol Hibru Kristin oli mas tingbaot eksampol blong ol man blong Jehova bifo. Samting ya bambae i givhan long olgeta blong oli no fraet mo blong oli tingbaot se oli save ‘resis we tingting blong olgeta i strong,’ mo oli save finisim resis blong olgeta. Yumi tu yumi save mekem olsem.
w89 15/12 pej 22 haf 10
Ol Sakrefaes We Oli Mekem Jehova i Glad
10 Ol man Hibru oli mas lukaot blong “no letem ol defdefren kaen tijing” blong ol lida blong skul blong ol man Jiu i lidim olgeta oli go rong. (Galesia 5:1-6) Tijing ‘blong God i save mekem tingting blong man i strong’ blong i holemtaet trutok, be i no ol tijing blong ol man ya. Samfala oli stap raorao long saed blong ol kakae mo ol sakrefaes, from we Pol i talem se tingting blong man i no save kam strong from ol “kakae. . . . Ol kakae ya oli no save givhan long ol man we oli stap bisi.” Man i kasem blesing long saed blong spirit from we hem i holem strong long God mo from fasin tangkiu we hem i gat long ransom, be i no from we hem i kakae sam kaen kakae mo i kipim wan dei se i impoten. (Rom 14:5-9) Antap moa, sakrefaes blong Kraes i finisim ol sakrefaes we ol Livaet oli stap mekem.—Hibrus 9:9-14; 10:5-10.
30 SEPTEMBA–6 OKTOBA
OL GUDGUDFALA SAMTING LONG BAEBOL | JEMES 1-2
“Rod Blong Sin Mo Ded”
Samting We i Traem Yu
Samting we i traem yu hem i wan tingting we i pulum yu blong mekem wan samting we i nogud. Eksampol, yu stap pem ol samting long stoa, wantaem nomo yu luk wan naesfala samting. Wan tingting i kam long yu se, i isi nomo blong stilim samting ya mo bambae ol man oli no save faenemaot. !Be hat blong yu i stap stikim yu blong no karem! Ale yu sakemaot tingting ya we i pulum yu. Long rod ya, yu yu winim samting we i traem yu.
?BAEBOL I TALEM WANEM?
Taem wan samting i traem yu, hemia i no min se yu wan rabis man. Baebol i talem se ol samting oli traem yumi evriwan. (1 Korin 10:13) Samting we i impoten hemia aksen we yumi mekem taem wan samting i traem yumi. Samfala oli gohed blong tingting long ol nogud fasin, nao biaen oli mekem ol nogud fasin ya. Be sam narafala oli sakemaot ol nogud tingting ya kwiktaem, from we oli save se oli nogud.
“Ol samting blong traem man i save kam strong long hem taem hem i wantem tumas wan samting, nao samting ya i pulum hem, mo i trikim hem.”—Jemes 1:14.
Samting We i Traem Yu
Baebol i tokbaot ol samting we oli save lidim yumi blong mekem wan nogud samting. Jemes 1:15 i talem se: “Nao taem [nogud] tingting ya i kam strong long hem, hem i mekem sin.” Taswe, taem yumi gohed blong tingting long wan nogud samting, yumi kasem wan mak we nogud tingting ya i save pulum yumi blong tekem aksen. Be, blong yumi no kam slef blong ol nogud tingting, yumi mas bos long tingting blong yumi.
Traem Faenem Ol Gudfala Samting Ya
it-2 pej 253-254
Laet
Jehova i “Papa ya we i mekem olgeta laet long skae.” (Jem 1:17) Hem i “putum san, blong i laet long dei, mo i putum mun mo ol sta, blong oli saen long naet,” (Jer 31:35) be i no hemia nomo, hem i Stamba blong olgeta laet long saed blong spirit tu. (2Ko 4:6) Loa, stret fasin, mo tok blong God, oli olsem laet blong lidim ol man we oli glad blong folem. (Sam 43:3; 119:105; Pro 6:23; Aes 51:4) Man blong raetem sam i talem se: “From laet blong yu nao, mifala i stap luk delaet.” (Sam 36:9; skelem wetem Sam 27:1; 43:3.) Olsem laet blong san we i gohed blong kamaot klia stat long eli moning go kasem we i “delaet gud, mo san i kam antap,” waes blong God i olsem laet ya we i stap kam klia moa blong lidim man long stret rod. (Pro 4:18) Blong wokbaot long laet blong Jehova, hemia i min se yumi folem ol samting we hem i talem. (Aes 2:3-5) Be nao sipos wan man i stap lukluk ol samting we i no stret o we oli nogud, hem i stap long bigfala tudak long saed blong spirit. Olsem Jisas i talem: “Sipos ae blong yu i fas long plante samting wantaem, bambae ful bodi blong yu i fulap long tudak. Mo sipos laet we yu yu gat i kam tudak, !man, yu yu stap long tudak we i tudak olgeta!”—Mt 6:23; skelem wetem Du 15:9; 28:54-57; Pro 28:22; 2Pi 2:14.
it-2 pej 222 haf 4
Loa
“Loa Blong King.” “Loa blong king” i wan long ol loa we i nambawan mo i impoten olsem ol narafala loa we wan king i save putumap blong mekem ol man oli joengud. (Jem 2:8) Loa blong kontrak i joen long lav; mo loa ya se “yu mas lavem ol man raonabaot long yu olsem we yu stap mekem long yu wan,” (loa blong king) i seken loa we olgeta narafala loa mo ol tok blong profet oli stanap long hem. (Mt 22:37-40) Ol Kristin oli no moa stap aninit long Loa blong kontrak, be oli stap aninit long niufala kontrak we King Jehova mo Pikinini blong hem, King Jisas Kraes oli stanemap.