Refrens Blong Kristin Wok Mo Laef Buk Blong Miting
7-13 OKTOBA
OL GUDGUDFALA SAMTING LONG BAEBOL | JEMES 3-5
“Soemaot Waes Blong God”
cl pej 221-222 haf 9-10
?“Waes We i Kamaot Long Heven” i Stap Wok Long Laef Blong Yu?
9 “Nambawan samting . . . se hem i klin gud.” Blong stap klin i min se olgeta fasin mo tingting blong yumi oli mas tabu o klin. Baebol i tokbaot se waes i joen wetem hat, be waes ya we i kamaot long heven, i no save go insaed long wan hat we i fulap wetem ol rabis tingting, filing, mo fasin. (Proveb 2:10; Matiu 15:19, 20) Nating se yumi sin man, be sipos yumi traehad blong gat wan hat we i klin, bambae yumi ‘tanem baksaed long ol rabis fasin, mo mekem ol samting we i gud.’ (Sam 37:27; Proveb 3:7) From samting ya, i stret nomo we klin fasin i faswan long ol fasin we i kamaot long waes blong heven. Taswe sipos fasin mo wosip blong yumi i no klin, ?olsem wanem yumi save soemaot ol narafala fasin ya we oli kamaot long heven?
10 “I mekem man i gat pis.” Waes we i kamaot long heven i pusum yumi blong gohed blong mekem pis, we i wan long ol frut blong tabu spirit blong God. (Galesia 5:22) Yumi no wantem mekem eni samting we i save spolem “pis” ya we i joenem ol man blong Jehova. (Efesas 4:3) Mo tu, yumi mekem bes blong yumi blong putumbak pis taem wan samting i spolem. ?From wanem hemia i impoten? Baebol i talem se: “Yufala i gohed blong stap long pis, nao God ya we i God blong lav mo pis, bambae i stap wetem yufala.” (2 Korin 13:11) Sipos yumi gohed blong stap long pis, God blong pis bambae i stap wetem yumi. Fasin we yumi mekem long ol narafala Kristin, i save gat paoa long fasin fren blong yumi wetem Jehova. ?Olsem wanem yumi save kam wan man blong mekem pis? Traem tingbaot eksampol ya.
cl pej 223-224 haf 12
?“Waes We i Kamaot Long Heven” i Stap Wok Long Laef Blong Yu?
12 “I rere blong lego prapa tingting blong hem.” ?I minim wanem se man i lego prapa tingting blong hem? Sam man blong stadi dip long Baebol oli talem se i had blong transletem Grik wod ya we oli tanem i kam “lego prapa tingting,” we i stap long Jemes 3:17. From samting ya, sam transleta oli yusum ol wod olsem “kaen,” “longfala tingting,” mo “tingbaot narafala.” Wan futnot long Niu Wol Translesen (Inglis) i soem se prapa tok blong wod ya i min se man “i no bitim mak long samting we hem i ting se man i mas mekem.” ?Olsem wanem blong soemaot se fasin ya we i kamaot long waes blong heven i stap wok long laef blong yumi?
cl pej 224-225 haf 14-15
?“Waes We i Kamaot Long Heven” i Stap Wok Long Laef Blong Yu?
14 “Rere blong obei.” Grik wod ya we oli tanem i kam “rere blong obei” i no gat long ol narafala vas long Grik haf blong Baebol. Wan man blong stadi dip long Baebol i talem se “plante taem oli yusum wod ya blong stretem ol man we oli joen long ami.” Hemia i givim tingting blong “wantem blong folem” mo “stap aninit.” Man we i letem waes blong heven i lidim hem, hem i rere nomo blong folem olgeta samting we Baebol i talem. Be hem i no olsem man we i mekem desisen mo i no wantem letem eni nara samting i jenisim desisen ya blong hem, nating se hem i rong. Defren olgeta, hem i kwik blong mekem sam jenis taem hem i luksave se samting we hem i wantem mekem o tingting blong hem i no laenap wetem Baebol. ?Olsem wanem? ?Ol narafala oli luk se yu yu wan man we i rere blong obei?
‘Gat Sore Mo Mekem Ol Gudfala Wok Blong Givhan Long Narafala’
15 “I gat sore oltaem mo i mekem ol gudfala wok blong givhan long narafala.” Sori i wan impoten fasin we i joen wetem waes blong heven, mo waes olsem “i gat sore oltaem.” Makem se “sori” mo “ol gudfala wok” oli stap wanples. Mo hemia i stret nomo, from we plante taem long Baebol, oli yusum tok ya sori blong tokbaot filing we i pusum man blong mekem i gud long narafala. Wan refrens i talem mining blong sori se, “wan filing we i mekem yu harem nogud from nogud samting we i kasem wan man mo hemia i pulum yu blong mekem wan samting blong givhan long man ya.” Taswe, waes blong God i no wan samting we i no gat filing, i no kaen, o i kamaot long save blong man nomo. Defren olgeta, hem i gat lav, i kaen, mo i kasem save filing blong narafala. ?Olsem wanem yumi save soemaot se yumi gat sori oltaem?
cl pej 226-227 haf 18-19
?“Waes We i Kamaot Long Heven” i Stap Wok Long Laef Blong Yu?
18 “Hem i no mekem i moagud long wan man i bitim narafala man.” Waes blong God i no mekem se ol man oli seraot from kala mo oli flas from kantri blong olgeta. Sipos yumi letem waes ya i lidim yumi, bambae yumi rutumaot eni filing o tingting long hat blong yumi we i mekem se yumi laekem moa wan kaen grup blong ol man. (Jemes 2:9) Yumi no mas laekem ol man nomo we oli skul gud, oli gat fulap mane, o oli holem sam wok insaed long kongregesen; mo yumi no mas luklukdaon long ol narafala long kongregesen we oli nogat plante samting. Sipos Jehova i soemaot se hem i lavem olgeta, yumi tu yumi mas soemaot se yumi lavem olgeta.
19 “Hem i no gat tu fes.” Grik tok ya “tu fes” i save minim “wan man we i stap aktem drama.” Long taem bifo, ol man Grik mo Rom oli werem ol bigfala mask taem oli aktem ol drama. From samting ya, lanwis Grik i yusum tok ya “tu fes” blong tokbaot ol man ya, we oli werem ol bigfala mask o giaman fes. Taswe sipos yumi gat waes ya blong God, hemia bambae i no pulum yumi nomo blong save olsem wanem blong mekem i sem mak long evri man, be bambae i gat paoa tu long filing we yumi gat long olgeta.
Traem Faenem Ol Gudfala Samting Ya
w08 1/11 pej 30 haf 6
Ol Bigfala Poen Long Ol Leta Blong Jemes Mo Pita
4:5—?Tok we Jemes i talem long vas ya i stap wea bakegen long Baebol? Jemes i no karem ol tok ya stret long wan vas blong Baebol. Be maet ol tok ya we God i pulum hem blong raetemdaon oli stap long bigfala tingting blong ol vas olsem Jenesis 6:5; 8:21; Ol Proveb 21:10; mo Galesia 5:17.
w97 15/11 pej 20-21 haf 8
Bilif i Mekem Se Yumi Gat Longfala Tingting Mo Yumi Prea Oltaem
8 I wan sin blong tok agensem ol Kristin brata mo sista blong yumi. (Jemes 4:11, 12) Be, maet samfala oli stap tok agensem ol narafala Kristin blong traem soem se oli stret man, no maet oli daonem narafala blong traem leftemap olgeta nomo. (Ol Sam 50:20; Proveb 3:29) Grik tok we yumi tanem i kam ‘tok agensem’ i minim strong fasin agens, tok we i bitim mak mo i no tru. Hemia i sem mak long fasin blong jajem brata blong yumi. ?Olsem wanem man we i mekem samting ya i ‘stap tok nogud long loa blong God, i stap jajem loa ya se i rabis’? Tingbaot ol tija blong Loa mo ol Farisi we oli gat flas fasin, nao ‘oli livim loa we God i givim,’ mo oli yusum ol rul blong olgeta nomo blong jajem narafala. (Mak 7:1-13) Sem mak nao, sipos yumi jajem wan brata we Jehova i no jajem, yumi stap ‘jajem loa blong God.’ Yumi mekem wan sin, from i olsem we yumi stap talem se loa blong God i no naf. Mo tu, taem yumi talem ol tok we i no stret blong daonem Kristin brata no sista blong yumi, yumi no stap folem loa blong lav.—Rom 13:8-10.
14-20 OKTOBA
OL GUDGUDFALA SAMTING LONG BAEBOL | 1 PITA 1-2
“Yufala i Mas Tabu”
Ransom—Wan ‘Nambawan Presen’ We Papa i Givim
5 ?Olsem wanem yumi save soemaot se yumi lavem nem blong Jehova? Tru long ol fasin blong yumi. Jehova i wantem se yumi tabu. (Ridim 1 Pita 1:15, 16.) Hemia i min se yumi wosipim hem nomo, mo yumi obei long hem long fulhat blong yumi. Nating se ol narafala oli mekem i nogud long yumi, be yumi traem bes blong yumi blong folem ol tijing blong Jehova. Taem yumi mekem ol loa blong Jehova i wok long laef blong yumi, yumi stap leftemap nem blong hem. (Matiu 5:14-16) Yumi pruvum se ol loa blong hem oli gud mo se Setan i wan man blong giaman. Yumi no stret gud olgeta, taswe bambae yumi mekem ol mastik. Be nating se i olsem, yumi tanem tingting blong yumi, mo yumi no moa mekem eni samting we i save sakem doti long nem blong Jehova.—Ol Sam 79:9.
Jusum gud Ol Samting We Yumi Mekem Blong Harem Gud Mo Spel
6 Pol i givim advaes ya long ol Kristin long Rom se: “Bambae yufala i no letem han blong yufala, mo leg blong yufala, mo ae blong yufala, mo wanem haf blong bodi blong yufala i gohed blong mekem sin.” Mo Pol i talem tu se oli mas ‘kilimaot ol rabis fasin ya we i kamaot long tingting blong olgeta.’ (Rom 6:12-14, NTB; 8:13) Long japta 3 long leta ya we hem i raetem i go long ol Kristin long Rom, hem i givim sam eksampol blong samting we i olsem ‘ol rabis fasin we i kamaot long tingting blong yumi.’ Yumi save ridim ol tok we hem i talem long saed blong fasin blong ol sinman i se: “Maot blong olgeta i fulap long ol tok swea ya we i kamaot long kros.” “[“Ol leg blong,” NW] olgeta oli save go kwik blong mekem blad blong man i ron.” “Neva olgeta oli bin lanem blong oli ona long God.” (Rom 3:13-18) Wan Kristin we i yusum ol ‘haf blong bodi blong hem’ blong mekem ol nogud fasin, i olsem we hem i mekem bodi blong hem i kam doti. Sipos wan Kristin tede i jusum blong wajem ol doti pija blong seks no blong lukluk ol rabis muvi we oli soemaot raf fasin we man i mekem blong spolem narafala, i olsem we hem i stap “letem [ae blong hem] i gohed blong mekem sin,” ale i stap mekem ful bodi blong hem i doti. Nating se Kristin ya i gohed blong wosipim God, be wosip blong hem i olsem wan sakrefaes we i no moa klin, i no moa tabu, mo God i no save agri long wan sakrefaes olsem. (Dutronome 15:21; 1 Pita 1:14-16; 2 Pita 3:11) Yes, Kristin ya i save kasem bigfala trabol sipos hem i jusum blong wajem ol samting we oli nogud.
Traem Faenem Ol Gudfala Samting Ya
w08 1/11 pej 31 haf 7
Ol Bigfala Poen Long Ol Leta Blong Jemes Mo Pita
1:10-12. Ol enjel oli wantem faenemaot mo kasem save olgeta dip save blong God we oli haed, we ol profet blong hem bifo oli raetem long saed blong kongregesen blong ol tabu Kristin. Be Jehova i stap soemaot klia ol samting ya tru long kongregesen ya nomo. (Efes 3:10, NW) ?Yu no ting se, yumi save folem eksampol blong ol enjel ya blong lukaot ‘ol tingting blong God we man i no save faenemaot, be spirit ya i save faenemaot olgeta’?—1 Kor. 2:10.
it-2 pej 565 haf 3
Man Blong Lukaot
Hae Man Blong Lukaot. Fas Pita 2:25 i yusum ol tok blong Aesea 53:6 we i tokbaot olgeta we oli olsem “ol sipsip we oli lusum rod,” mo Pita i ademap se: “Be naoia yufala i kambak bakegen long man ya blong lukaot long sipsip we hem i man blong lukaot long laef blong yufala.” I sua se vas ya i stap tokbaot Jehova God, from we Pita i raetem ol tok ya i go long olgeta we oli lusum rod nao oli go longwe long Kraes Jisas, be bakegen tru long hem, hem i lidim olgeta oli kambak long Jehova God, we i Hae Man Blong Lukaot long ol man blong hem. (Sam 23:1; 80:1; Jer 23:3; Esi 34:12) Mo tu, Jehova i man ya we i stap lukaot mo i faenemaot [jekem] ol samting long saed blong yumi. (Sam 17:3) Tok ya faenemaot o jekem (Grik, e·pi·sko·peʹ) maet i joen wetem fasin blong God blong jajem ol man, olsem samting we i hapen long Jerusalem long faswan Kristin Taem, we ol man oli no luksave taem ya we God i kam “jekem [Grik, e·pi·sko·pesʹ]” olgeta. (Lu 19:44) O oli save haremgud mo kasem blesing, olsem olgeta ya we oli presem God long taem ya we hem i kam “jekem [Grik, e·pi·sko·pesʹ]” ol man.—1Pi 2:12.
21-27 OKTOBA
OL GUDGUDFALA SAMTING LONG BAEBOL | 1 PITA 3-5
“En Blong Evri Samting i Kam Klosap”
w13 15/11 pej 3 haf 1
Tingting Blong Yumi i Mas Wekap Blong Yumi Prea
WAN man we bifo hem i stap sekiuriti long naet, i talem se: “Jes bifo we i brok delaet, long taem ya nao i hadwok blong man i stap wekap.” Ating ol narafala man we oli stap sekiuriti long naet, oli agri long samting ya. Yumi save skelem samting ya wetem taem we yumi stap long hem. Yumi stap long taem ya we klosap nao wol blong Setan i lus. Hem i olsem tudak, mo ol Kristin oli mas traehad blong stap wekap. (Rom 13:12) Yumi save kasem trabol sipos yumi slip long saed blong spirit. !Taswe, i impoten tumas we yumi gohed blong ‘wekap we tingting blong yumi i klia gud, nao yumi save prea!’—1 Pita 4:7.
w99 15/4 pej 22 haf 2
Olsem Wanem Blong Luksave Mo Winim Ol Slak Fasin Long Saed Blong Spirit
Be tu, yumi no mas fogetem advaes we Pita i givim wetem lav se: “Yumi kam klosap finis long taem we ol samting blong wol ya bambae i lus. From samting ya, yufala i mas wekap we tingting blong yufala i klia gud, mo yufala i mas blokem ol samting we yufala nomo i wantem, nao yufala i mas prea. Antap long ol narafala samting, yufala i mas lavlavem yufala. Yufala i no mas kam slak long samting ya, from we man we i stap lavem narafala man, oltaem hem i save fogivim hem from ol sin blong hem.” (1 Pita 4:7, 8) I isi nomo blong letem ol slak fasin blong narafala no blong yumi wan oli kam insaed long hat mo tingting blong yumi, nao oli blokem yumi, oli mekem yumi foldaon. Setan i save gud ol slak fasin blong yumi. Wan long ol teknik blong hem, hemia blong pulum yumi blong agensem ol brata blong yumi. From samting ya, yumi mas kwik blong soem lav mo fogivim sin blong hemia we i mekem i nogud long yumi. Yumi no mas “givim janis long Setan.”—Efesas 4:25-27.
!Folem Gudfala Fasin Blong Tekem Narafala i Kam Long Haos!
2 Pita i pulum ol brata mo sista blong oli ‘welkamem olgeta.’ (1 Pita 4:9) Grik tok ya “welkamem” i min se man i “laekem mo i kaen long ol strenja.” Be Pita i pulum ol brata mo sista we oli save olgeta finis mo oli stap joen wanples blong mekem plante samting, blong oli ‘welkamem olgeta.’ ?Olsem wanem fasin ya i save givhan long olgeta?
3 Fasin ya bambae i mekem se oli laeklaekem olgeta moa. Maet yu save tingbaot wan gudfala taem we yu yu gat, taem narafala i singaot yu i go long haos blong hem. O maet yu tingbaot wan taem we yu yu singaot narafala i kam long haos blong yu, nao yu kasem save moa long hem mo yu laekem hem. Gudfala rod blong save gud ol brata mo sista, hemia blong welkamem olgeta. Ol Kristin long taem blong Pita oli mas laeklaekem olgeta moa, from we laef i stap kam strong moa. Long “ol las dei” ya, yumi mas mekem sem mak.—2 Timoti 3:1.
Traem Faenem Ol Gudfala Samting Ya
w13 15/6 pej 22
Kwestin
Baebol i talem se Jisas i ‘prij long ol spirit we oli stap long kalabus.’ (1 Pita 3:19, NTB) ?Tok ya i minim wanem?
▪ Aposol Pita i talem se ol spirit ya, hemia olgeta we long taem blong Noa, “God i stap wet long olgeta, we tingting blong hem i longfala, be olgeta oli no obei long hem.” (1 Pita 3:20) I klia se Pita i stap tokbaot ol enjel we oli jusum blong biaen long Setan, blong agensem God. Disaepol Jud tu i tokbaot ol enjel we oli “no glad blong holem hae nem we God i givim long olgeta, nao oli livim prapa ples blong olgeta, oli gowe long hem.” Hem i talem se God “i fasem olgeta long jen we i no save brok samtaem, mo i lokem olgeta long ples blong tudak. Nao oli stap wet long bigfala Dei ya we God bambae i jajem olgeta long hem.”—Jud 6.
?Long wanem fasin, ol enjel ya long taem blong Noa, oli no obei? Bifo we bigfala wota i ron, ol rabis enjel ya oli jenisim bodi blong olgeta i kam olsem man. Hemia wan samting we God i no talem long olgeta blong oli mekem. (Jen. 6:2, 4) Mo bakegen, ol enjel ya oli kamdaon long wol mo oli slip wetem ol woman. Hemia wan samting we i no stret nating blong oli mekem. God i no mekem ol enjel blong oli save slip wetem ol woman mo harem gud wetem olgeta. (Jen. 5:2) Long stret taem blong hem, God bambae i kilim i ded ol rabis enjel ya. Be naoia, olsem we Jud i talem, ol rabis enjel ya oli no moa fren gud wetem Jehova, i olsem we oli stap long wan kalabus we i “tudak.” Hemia i min se oli no moa save mekem wan samting.
?Wetaem Jisas i ‘prij long ol spirit we oli stap long kalabus’? ?Mo hem i prij long olgeta olsem wanem? Pita i talem se samting ya i hapen afta we “God i mekem Jisas i laef bakegen long laef blong hem long heven.” (1 Pita 3:18, 19) I gud blong makem se Pita i talem se Jisas i “prij.” Long olfala lanwis we oli raetem Baebol long hem, Pita i yusum wan tok we i soemaot se Jisas i prij long ol spirit ya, bifo we hem i raetem fas leta blong hem. Taswe, i luk olsem se, samtaem afta we Jisas i laef bakegen, hem i talem wan strong tok long ol rabis spirit ya no ol rabis enjel ya, from panis we bambae oli kasem. Hem i no prij long olgeta blong leftemap tingting blong olgeta. Be hem i prij long olgeta blong talemaot jajmen blong olgeta. (Jona 1:1, 2) Taem Jisas i stanap strong long bilif blong hem gogo kasem we hem i ded, mo biaen hem i laef bakegen, hem i soemaot se Setan i no gat paoa long hem. From samting ya, Jisas i save talemaot jajmen blong ol rabis enjel ya.—Jon 14:30; 16:8-11.
Long fiuja, bambae Jisas i fasem Setan mo ol rabis enjel blong hem, mo i sakem olgeta i go long bigfala hol ya we i godaon we i godaon. (Luk 8:30, 31; Rev. 20:1-3) Gogo kasem taem ya, olgeta rabis enjel ya oli stap long tudak long saed blong spirit mo bambae oli mas lus blong olwe.—Rev. 20:7-10.
w08 1/11 pej 31 haf 5
Ol Bigfala Poen Long Ol Leta Blong Jemes Mo Pita
4:6—“Gud nius i kasem olgeta we oli ded.” ?Hu olgeta ya? Hemia ol man ya we oli no harem gud nius yet, ale oli ded long saed blong spirit from we oli ‘no bin obei long God nao oli mekem sin.’ (Efes. 2:1) Be afta, taem oli bilif long gud nius, i olsem we oli stat blong “laef” from we oli frengud wetem Jehova.
28 OKTOBA–3 NOVEMBA
OL GUDGUDFALA SAMTING LONG BAEBOL | 2 PITA 1-3
“Bigfala Dei Blong Jehova i Klosap”
Jehova Bambae i “Stretem Problem Blong Olgeta”
11 ?Be wanem mining blong tok blong Jisas se Jehova bambae i “kwik” blong stretem ol problem? Tok blong God i soemaot se “nating we [Jehova] i gat longfala tingting,” be long stret taem blong hem, bambae hem i kwik blong givim panis blong stretem ol problem. (Luk 18:7, 8; 2 Pita 3:9, 10) Long taem blong Noa, ol rabis man oli ded wantaem nomo long Bigfala Wota we i ron. Long taem blong Lot, ol rabis man oli lus wantaem long faea we i kamdaon long heven. Jisas i talem se: “Long taem ya we mi, mi Pikinini blong Man mi kamtru, . . . bambae i sem mak nomo.” (Luk 17:27-30) Bakegen ol rabis man bambae oli lus “wantaem nomo.” (1 Tesalonaeka 5:2, 3) Tru ya, yumi save gat strong bilif se Jehova bambae i no letem rabis wol blong Setan i stap wan dei moa i bitim taem ya we hem i luk se i stret.
‘Bigfala Dei Blong Jehova i Kam Klosap Finis’
18 !Yumi kasem save from wanem aposol Pita i talem se yumi mas “tingting gud long taem ya we bambae dei blong Jehova” (NW) i kamtru! ?Olsem wanem yumi mekem olsemia? Yumi mas ol man we oli ‘tabu, yumi man blong God, mo yumi mas mekem ol fasin we hem i wantem.’ (2 Pita 3:11, 12) Sipos yumi stap bisi long ol wok we God i wantem, bambae yumi stap tingbaot mo wet long taem ya we ‘dei blong Jehova’ i kamtru. Grik tok long vas ya we i minim “tingting gud,” prapa mining blong hem se “mekem i kam kwik moa.” Yumi no save jenisim stret taem we dei blong Jehova bambae i kamtru. Be sipos yumi stap bisi long wok blong Jehova taem yumi stap wet long dei ya, bambae taem i pas kwik moa.—1 Korin 15:58.
Traem Faenem Ol Gudfala Samting Ya
w08 1/11 pej 32 haf 1
Ol Bigfala Poen Long Ol Leta Blong Jemes Mo Pita
1:19—“?Moningsta” ya i hu, mo hem i kamtru wetaem, mo olsem wanem yumi save we hem i kamtru? Jisas Kraes nao i “moningsta” ya, afta we hem i kam king long Kingdom blong God. (Rev. 22:16) Long 1914, Jisas i stat rul olsem Mesaea King antap long olgeta samting we God i wokem, i olsem we wan niufala dei i stat. Taem ya we bodi blong Jisas i jenis, i soemaot haenem mo bigfala paoa we Jisas bambae i kasem taem hem i kam King blong Kingdom. Samting ya i makemgud se ol profet tok oli sua blong kamtru. Taem yumi lesin long ol tok ya we i mekem laet blong Jisas i saenaot i kam kasem tingting blong yumi, long taem ya nao yumi kasem save we Moningsta ya i kamtru finis.
w08 1/11 pej 32 haf 2
Ol Bigfala Poen Long Ol Leta Blong Jemes Mo Pita
2:4—?Wanem ya “Tataros,” mo wetaem God i sakem ol enjel ya we oli agensem hem i go long Tataros? Taem ol spirit man oli go long Tataros i olsem we oli go kalabus, be ol man oli no go long Tataros. Hem i min se tingting blong ol spirit man ya i stap long tudak long saed blong plan blong God. Ol rabis enjel we oli stap long Tataros oli no save kasem laef long fiuja. Long taem blong Noa, God i sakem ol enjel we oli no obei long hem oli go long Tataros, mo bambae oli stap kalabus olsem gogo oli lus.