Japta 89

Spesel Trep Long Judia Blong Soemaot Sore

SAM wik bifo, long Lafet blong Dedikesen long Jerusalem, ol man Isrel oli traem kilim Jisas i ded. Ale hem i aot long ples ya, i wokbaot i go long not, go kasem wan ples we i kolosap long bigfala Lugun blong Galili.

Long ol dei we oli jes pas finis, hem i stap wokbaot i go long saot bakegen, long rod we i go kasem Jerusalem. Long rod ya, hem i stap prij long ol velej long wan ples long is saed blong Jodan Reva, nem blong hem Perea. Hem i talem finis pija tok long saed blong rijman mo Lasros. Mo naoia hem i gohed blong tijim ol disaepol blong hem long ol samting we hem i bin tijim bifo long Galili.

Hem i talem se sipos wan man i mekem trabol long wan man blong God we i “no gat paoa,” i mekem hem i foldaon long sin, sore tumas long man we i mekem samting ya. Jisas i talem se i moa gud sipos “oli fasem wan bigfala ston long nek blong man olsem, nao oli sakem hem long solwora.” Mo tu, hem i makem long tingting blong olgeta se oli mas fogivim narafala. Hem i se: “Sipos long wan dei nomo, [brata blong yu] i mekem i no stret long yu seven taem, nao seven taem hem i kambak bakegen long yu, i talem long yu se ‘Mi mi tanem tingting blong mi finis long samting ya,’ yu yu mas fogivim hem.”

Nao ol disaepol oli askem long Jisas se: “Plis yu mekem bilif blong mifala i kam strong moa.” Jisas i talem se: “Sipos bilif blong yufala i olsem sid ya blong nambangga we i smol tumas, yufala i save talem long nakatambol ya se ‘Yu aot long ples ya, yu go stap gru long medel solwora,’ nao tri ya bambae i obei long yufala.” Taswe smol bilif nomo i save mekem bigfala samting i kamaot.

Nao Jisas i tokbaot wan samting we i stap kamaot oltaem long laef blong olgeta. Hem i yusum samting ya olsem wan pija tok blong soemaot prapa fasin blong man blong wok blong Hae God. Hem i talem se: “?Hu man long yufala we i luk man blong wok blong hem, we i kambak long haos long naet, nao i save talem long hem se ‘Ale, yu kam kwik, yu sidaon, yu kakae’? !I no gat! Fasin blong masta, hem i save talem se ‘Ale, yu go mekem kakae blong mi i rere. Biaen yu go putum klos blong yu, nao yu tekem kakae i kam, blong mi kakae, mi dring. Biaen yu yu save kakae, yu save dring.’ ?Mo taem man olsem i mekem ol samting we masta blong hem i talem, yufala i ting se masta ya i mas talem tangkyu long hem from? No gat. Nao yufala i olsem ol man blong wok blong God. Taem yufala i mekem olgeta samting we hem i talem long yufala blong yufala i mekem, yufala i mas talem se ‘Be yumi ya, yumi man blong wok nomo blong hem. I stret nomo blong yumi mekem olsem.’ ” Taswe ol man blong wok blong God oli no mas gat tingting se oli mekem gudfala wok, nao i olsem we God i gat kaon long olgeta. No gat. Oltaem oli mas harem gud from we oli gat raet blong mekem wosip long hem, ale, oli stap insaed long famle blong hem, mo hem i trastem olgeta.

I luk olsem we Jisas i jes talem pija tok ya, nao wan man blong karem mesej i kamtru. Tufala sista blong Lasros, nem blong tufala Meri mo Mata, tufala i sanem man ya i kam. Tufala i stap long taon ya Betani long Judia. Man blong karem mesej i talem se: “Masta, fren ya blong yu we yu laekem hem tumas, hem i sik.”

Jisas i talem long hem, i se: “Lasros i sik, be sik blong hem i no blong ded, i blong soemaot bigfala paoa blong God. Sik ya, hem i rod blong God i leftemap nem blong mi, mi Pikinini blong hem.” Taem Jisas i kasem nyus ya we Lasros i sik, hem i stap tu dei bakegen long ples ya. Nao hem i talem long ol disaepol blong hem, i se: “Ale, yumi go long Judia bakegen.” Be ol man blong hem oli pulum tingting blong hem bakegen, oli se: “Tija, bifo ya i no longtaem, ol lida blong ol man Isrel oli wantem stonem yu gogo yu ded. ?Bambae yu yu gobak long ples ya bakegen?”

Jisas i ansa, i se: “?Olsem wanem? ?Long wan fuldei i no gat twelef haoa blong hem? Sipos man i stap wokbaot long dei, hem i no save bangem leg blong hem long ston, from we long wol ya, i gat delaet i stap, nao hem i save luk ol samting. Be sipos hem i stap wokbaot long naet, hem i save bangem leg blong hem, from we i no gat laet blong hem.”

Jisas i minim se “delaet”, no taem we God i makemaot blong Jisas i mekem minista wok long wol, i no finis yet. Mo i no gat man we i save mekem trabol long hem, gogo ol haoa blong delaet oli finis. Hem i mas yusum smol “delaet” we i stap yet, from we afta, “naet” bambae i kam, ale ol enemi blong hem bambae oli kilim hem i ded.

Nao Jisas i talem se: “Gudfala fren ya blong yumi Lasros, hem i stap slip. Be bambae mi mi go blong wekemap hem.”

From tok ya blong Jisas, ol disaepol blong hem oli ting se Lasros i stap spel, i stap slip nomo. Ale oli ting se sipos Lasros i slip gud olsemia, sik blong hem bambae i finis, bambae i kamgud bakegen. Taswe oli talem se: “Masta, sipos hem i stap slip, bambae sik blong hem i finis, hem i save kamgud bakegen.”

Nao Jisas i talemaot i klia, se: “Lasros i ded finis. Mo taem mi tingbaot yufala, mi glad we mi no stap wetem olgeta. Hemia bambae i givhan long yufala blong yufala i bilif long mi. Be i gud yumi go long hem.”

Tomas i save se maet oli kilim Jisas i ded long Judia. Be hem i wantem sapotem hem, taswe hem i leftemap tingting blong ol narafala disaepol i se: “Ale, yumi evriwan i go, blong yumi ded wantaem wetem hem.” Nating we oli save lusum laef blong olgeta, be ol disaepol blong Jisas oli biaen long hem, taem hem i mekem spesel trep long Judia blong soemaot sore. Luk 13:22; 17:1-10; Jon 10:22, 31, 40-42; 11:1-16.

▪ ?Long ol dei we oli jes pas finis, Jisas i prij wea?

▪ ?Wanem sam samting we Jisas i tijim bakegen long ol man? ?Wanem samting we i stap kamaot oltaem long laef blong olgeta we Jisas i yusum olsem wan pija tok? ?Hem i yusum pija tok ya blong tijim olgeta long wanem samting?

▪ ?Jisas i harem wanem nyus? ?Wanem mining blong tok ya “delaet” mo “naet”?

▪ ?Tomas i minim wanem taem hem i talem se: ‘Ale, yumi evriwan i go, blong yumi ded wantaem wetem hem’?