Refrens Blong Kristin Wok Mo Laef Buk Blong Miting
4-10 NOVEMBA
OL GUDGUDFALA SAMTING LONG BAEBOL | 1 JON 1-5
“No Lavem Wol Mo Ol Samting We Oli Stap Long Hem”
Folem Eksampol Blong Jisas
13 Maet samfala oli talem se i no olgeta samting blong wol ya we oli nogud, be sam samting nomo. I tru, be wol ya wetem ol samting blong hem oli save pulum ae blong yumi isi nomo, nao yumi no moa tinghevi long wok blong Jehova. I no gat wan samting nating blong wol ya we i save pulum yumi blong kam klosap long God. Taswe, sipos yumi stat laekem sam samting blong wol ya, nating sipos oli no rong be yumi stap long rod blong kasem trabol. (1 Timoti 6:9, 10) Plante samting blong wol ya oli nogud nomo mo oli save spolem yumi. Sipos yumi lukluk ol stori long televisin we oli soemaot faet, oli leftemap fasin blong ronem ol sas samting, mo oli soem ol rabis fasin long saed blong seks, yumi save stat blong ting se ol samting ya oli oraet nomo. Nao sloslo ol samting ya oli save pulum yumi. Sipos yumi stap joen wetem ol man we bigfala tingting blong olgeta i blong mekem laef blong olgeta i kamgud moa, no oli stap lukaot rod oltaem blong kasem moa mane, ale yumi save stat blong ting se ol samting ya nao oli moa impoten i winim ol narafala samting.—Matiu 6:24; 1 Korin 15:33.
w13 15/8 pej 27 haf 18
Yufala i Mas Luklukgud Long Laef Blong Yufala
18 Wan narafala samting we i save givhan long yumi blong stanap strong, hemia blong tingbaot ol tok blong aposol Jon we i talem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17) I luk olsem se wol blong Setan mo ol samting we oli stap long hem oli tru mo bambae oli stap blong olwe. Be bambae oli mas finis wan dei. Sipos yumi tingbaot samting ya, bambae yumi no foldaon long ol trik blong Setan.
Traem Faenem Ol Gudfala Samting Ya
w13 15/9 pej 10 haf 14
Yumi Save Trastem Ol Tok Blong Jehova
14 Long Grik haf blong Baebol, i gat plante tok we oli mekem yumi tingbaot se yumi mas lavlavem yumi. Jisas i talem se nambatu loa we i hae moa long ol narafala loa, hemia blong ‘lavem ol man raonabaot long yumi, olsem we yumi stap mekem i gud long yumi.’ (Mat. 22:39) Jemes we i haf brata blong Jisas, i talem se lav hem i “stamba blong ol narafala loa.” (Jem. 2:8) Aposol Jon i talem se: “Ol brata mo sista. Loa ya we mi stap raetem i kam long yufala, hem i no wan niufala loa, i wan olfala loa we yufala i harem finis, taem yufala i kasem gud nius ya fastaem. Be i tru, loa ya we mi stap raetem i kam long yufala, hem i wan niufala loa tu.” (1 Jon 2:7, 8) ?Taem Jon i tokbaot “olfala loa,” hem i minim wanem? Loa ya i stap minim loa blong lavem narafala. Hem i “olfala” from we ‘taem [ol man blong Jisas] oli harem gud nius fastaem,’ Jisas i givim loa ya long olgeta. Be hem i “niufala” tu from we lav i mas pulum ol disaepol blong oli no tingbaot olgeta nomo, taem bambae oli fesem sam samting we oli neva fesem bifo. Tede, yumi glad tumas long ol woning we oli givhan long yumi blong yumi no tingbaot yumi nomo, olsem ol man blong wol, be yumi lavem ol man.
it-1 pej 862 haf 5
Fasin Blong Fogif
I stret nomo blong prea long bihaf blong ol narafala, o blong ful kongregesen blong God i fogivim olgeta. Hemia nao samting we Moses i mekem long nesen blong Isrel, hem i talemaot sin blong olgeta mo i askem God blong i fogivim olgeta, mo Jehova i harem prea ya. (Na 14:19, 20) Mo tu, taem oli mekem opening blong haos prea long Jerusalem, Solomon i prea long Jehova mo i askem hem blong i fogivim ol man blong hem, sipos oli mekem sin mo oli tanem tingting blong olgeta. (1Ki 8:30, 33-40, 46-52) Esra i prea long bihaf blong ol man Jiu long pablik ples mo i talemaot ol sin blong olgeta. Prea blong hem mo advaes we hem i givim, i pusum ol man blong oli tekem aksen blong Jehova i save fogivim olgeta. (Esr 9:13–10:4, 10-19, 44) Jemes i leftemap tingting blong man we i sik long saed blong spirit, blong i go luk ol elda long kongregesen blong oli prea long hem, mo “sipos hem i bin mekem sam sin, bambae God i fogivim hem.” (Jem 5:14-16) Nating se i olsem, i gat wan “sin we i blong ded,” hemia sin we man i mekem agens long tabu spirit o sin we man i minim blong mekem we God i no save fogivim hem from. Wan Kristin i no mas prea from ol man we oli mekem kaen sin ya.—1Jo 5:16; Mt 12:31; Hib 10:26, 27; yu luk SIN, I; SPIRIT.
11-17 NOVEMBA
OL GUDGUDFALA SAMTING LONG BAEBOL | 2 JON 1–JUD
“Yumi Mas Faet Blong Stap Long Trutok”
w04 15/9 pej 11-12 haf 8-9
‘Yumi Mas Joen Long Masta Blong Kasem Paoa’
8 Yumi savegud ol plan blong Setan from we Baebol i soemaot ol trik blong hem long yumi. (2 Korin 2:11) Taem Setan i agensem Job, hem i yusum olkaen trabol, olsem trabol long saed blong mane, ded insaed long famle, stret famle blong hem i agensem hem, sik we i spolem bodi blong hem, mo ol fren we oli tok jik. Tingting blong Job i foldaon mo hem i harem olsem se God i lego hem. (Job 10:1, 2) Tede, Setan i no stamba blong evri trabol we oli kamaot long ol Kristin. Be hem i save yusum sam long ol hadtaem ya we oli kasem wan Kristin, blong mekem Kristin ya i foldaon.
9 Long taem blong en, ol denja we oli save mekem yumi foldaon long saed blong spirit, oli kam plante we plante. Yumi laef long wan wol we ol man blong hem oli laekem moa blong ronem ol sas samting blong bodi i bitim ol samting long saed blong spirit. Oltaem nomo, ol buk, televisin, niuspepa mo radio oli tokbaot olkaen nogud fasin long saed blong seks. Plante taem oli soemaot fasin ya olsem wan rod blong man i hapi, be oli no talem se fasin ya i save karem trabol. Mo bighaf blong ol man oli ‘laekem moa ol pleplei, i winim we oli laekem God.’ (2 Timoti 3:1-5) Sipos yumi no ‘faet strong blong holem bilif,’ olkaen tingting ya oli save mekem we yumi no moa stanap strong long saed blong spirit.—Jud 3.
Traem Faenem Ol Gudfala Samting Ya
it-2 pej 279
Lafet Blong Soemaot Lav
Baebol i no talem olsem wanem oli mekem lafet ya blong soemaot lav o se oli mekem hamas taem. (Jud 12) Masta Jisas Kraes mo ol aposol blong hem tu oli no talem long ol man blong mekem lafet ya, mo i klia se hemia i no wan lafet we ol man oli mas mekem. Sam man oli talem se hemia wan taem we ol Kristin we oli gat plante samting, oli mekem ol bigfala lafet mo oli invaetem ol narafala Kristin we oli pua. Olgeta evriwan, ol pikinini we oli no gat papa, ol wido, ol rij man mo olgeta we oli no gat tumas samting, oli joen wanples blong kakae, olsem wan famle long saed blong spirit.
it-2 pej 816
Rif
Narafala Grik tok ya, spi·lasʹ, oli yusum blong tokbaot wan ston o rif we i haed aninit long solwota. Jud i yusum pija tok ya blong tokbaot sam man we oli kam insaed long Kristin kongregesen wetem rabis tingting. Olsem ol rif we oli haed we oli save mekem bigfala trabol long ol sip, ol man ya oli denja tumas mo oli save spolem ol narafala long kongregesen. Jud i tokbaot ol man ya se: “Taem ol man ya oli kam kakae wetem yufala, oli olsem ol rif we oli haed aninit long solwota.”—Jud 12.
‘God i Glad Tumas Long Hem’
?Inok i talemaot wanem profet tok? Hem i stap talem se: “!Yufala i luk! Jehova i kam wetem ol tabu enjel blong hem we oli plante we plante, blong jajem olgeta man, mo blong panisim olgeta man we oli no obei long God from olgeta samting nogud we oli mekem, mo from olgeta rabis tok we ol man ya we oli stap mekem sin oli talem agensem hem.” (Jud 14, 15, NW) Faswan samting we yumi makem, hemia se Inok i talem tok ya olsem se i pas finis, i olsem we God i mekem finis samting we hem i stap talemaot. Ol narafala profet tu oli folem sem fasin ya blong toktok. ?From wanem oli mekem olsem? Risen se: !Profet i tokbaot wan samting we i sua se bambae i kamtru, nao hem i tokbaot samting ya olsem se i kamtru finis!—Aesea 46:10.
‘God i Glad Tumas Long Hem’
Bilif blong Inok i save pulum yumi blong tingbaot sipos tingting blong yumi long saed blong wol i sem mak long tingting blong God. Jajmen we Inok i talemaot i stap sem mak yet; hem i stret yet long wol blong tede sem mak olsem long taem blong Inok. Folem woning blong Inok, Jehova i mekem Bigfala Wota i spolem gud ol man we oli no obei long God, long taem blong Noa. Mo trabol ya i olsem wan eksampol blong bigfala trabol we bambae i kamtru long fiuja. (Matiu 24:38, 39; 2 Pita 2:4-6) Olsem long taem bifo, tede tu God wetem ol enjel blong hem oli rere blong jajem ol man long wol ya we oli no obei long hem. I gud yumi wanwan i tingting dip long woning blong Inok, mo yumi talemaot long ol narafala. Maet ol famle mo ol fren blong yumi oli no laekem yumi. Mo samtaem yumi save harem se yumi stap yumi wan nomo. !Be Jehova bambae i neva lego yumi olsem i mekem long Inok bifo!
18-24 NOVEMBA
OL GUDGUDFALA SAMTING LONG BAEBOL | REVELESEN 1-3
“Mi Mi Save Ol Samting We Yu Mekem”
w12 1/10 pej 20 haf 8
?Yu Yu Stap Soemaot Wanem Tingting?
8 Yumi save blokem tingting ya sipos yumi tingbaot oltaem se Jisas i holem ‘ol seven sta oli stap long raethan blong hem.’ Ol “sta” ya, hemia ol elda we tabu spirit i makemaot olgeta. Be ol tok ya i stret tu long ol narafala elda long ol kongregesen. Jisas i save yusum ol “sta” long han blong hem, long enikaen rod we hem i luk se i stret. (Rev. 1:16, 20) Jisas i Hed blong kongregesen. Taswe hem i lidim gud ol elda long evri samting we oli mekem. Hem i save lukluk evri samting, from we “ae blong hem i olsem faea we i laet.” Taswe, sipos i gat nid blong stretem wan elda, Jisas bambae i lukluk long bisnes ya long stret taem blong hem mo long fasin we hem i wantem. (Rev. 1:14) Go kasem taem ya, yumi mas gat respek long ol elda we oli stap long “raethan” blong Jisas. Pol i talem se: “Yufala i mas ona long ol lida blong yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya olsem wanem. Yufala i mas mekem olgeta oli harem gud long wok ya. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.”—Hib. 13:17.
w12 1/4 pej 30-31 haf 11
Jehova i Lukaot Gud Long Yumi Blong Sevem Yumi
11 Wan vison long Revelesen japta 2 mo 3 i tokbaot King Jisas Kraes se hem i luk samting we i stap hapen long seven kongregesen long Esia Maena. Kraes i luk se ol kongregesen ya oli olsem wanem. Be i no hemia nomo. Hem i tokbaot sam samting we i stap hapen long ol kongregesen ya wanwan, mo hem i tokbaot samfala we oli stap long ol kongregesen ya. Hem i talem ol gudfala toktok mo i givim advaes we i stret long olgeta. ?Vison ya i tijim yumi long wanem? Seven kongregesen ya i minim ol Kristin we tabu spirit i makemaot olgeta afta long 1914. Ol advaes we Kraes i givim, i go fastaem long ol tabu Kristin. Be ol advaes ya i save givhan tu long olgeta kongregesen blong ol man blong God tede. Taswe, yumi save talem se Jehova i stap yusum Pikinini blong hem blong i lidim ol man blong hem tede. ?Yumi mekem wanem blong letem Jehova i lidim yumi?
w01 15/1 pej 20-21 haf 20
Wokbaot Folem Oganaesesen Blong Jehova
20 Sipos yumi wantem wokbaot folem oganaesesen blong Jehova we i stap muf i go fored oltaem, yumi mas luksave se God i putumap Jisas Kraes olsem “hed blong [“kongregesen,” NW].” (Efesas 5:22, 23) Wan narafala samting tu blong tingbaot hemia tok blong Aesea 55:4 (NW) we i talem se: “!Yu luk! Mi [Jehova] mi putum hem i stap olsem wan witnes blong ol nesen, wan lida mo wan kapten blong olgeta nesen.” Jisas i save olsem wanem blong lidim ol man. Hem i save gud ol sipsip blong hem mo wok we oli mekem. Tru tumas, taem hem i jekem wok blong ol seven kongregesen blong Esia Maena, hem i talem faef taem long olgeta se: “Mi save finis fasin blong yufala.” (Revelesen 2:2, 19; 3:1, 8, 15) Jisas i save wanem samting we yumi nidim, olsem we Papa blong hem, Jehova, i save. Bifo we Jisas i tijim ol disaepol blong hem blong prea, hem i talem se: “Taem yufala i no askem ol samting long Papa blong yufala yet, be hem i save finis ol samting we yufala i sot long hem.”—Matiu 6:8-13.
Traem Faenem Ol Gudfala Samting Ya
Kingdom i Finisim Gud Ol Enemi Blong Hem
10 Jisas i seraot ol sipsip long ol nani. Nao ol enemi blong Kingdom blong God bambae oli luk samting we i mekem olgeta oli harem nogud moa. Jisas i talem se: “Bambae ol man oli save luk mi, mi Pikinini blong Man, mi kamaot long klaod, wetem olgeta paoa we mi mi gat, mo bigfala laet ya we bambae i saenaot raonabaot long mi.” (Mak 13:26) Samting ya we Jisas i mekem blong soemaot paoa blong hem, bambae i wan saen se hem i kam blong jajem ol man. Long sem profet tok ya blong ol las dei, Jisas i givim moa save long samting we bambae hem i mekem long taem ya. Hem i talem parabol blong ol sipsip mo ol nani. (Ridim Matiu 25:31-33, 46.) Ol man blong obei long Kingdom blong God, hemia “ol sipsip,” we bambae Jisas i putum olgeta long wan saed. Olgeta ya bambae oli ‘leftemap hed blong olgeta,’ from we oli save se ‘i no longtaem bambae hem i sevem olgeta.’ (Luk 21:28) Be olgeta we oli agensem Kingdom, “ol nani,” Jisas bambae i putum olgeta long wan saed. Olgeta ya bambae oli “krae,” from we oli save se bambae oli kasem “panis” blong ded.—Mat. 24:30; Rev. 1:7.
Ol Bigfala Poen Long Buk Blong Revelesen—Haf 1
2:7—?Wanem ya “Garen blong God”? Ol tok ya i go long ol Kristin we tabu spirit i makemaot olgeta. Taswe, garen we vas ya i tokbaot i mas minim gudfala ples long heven, klosap long God. Ol man blong God we tabu spirit i makemaot olgeta bambae oli kasem blesing ya blong kakae long “tri blong laef.” Olgeta ya bambae oli no moa save ded bakegen samtaem.—1 Kor. 15:53.
25 NOVEMBA–1 DISEMBA
OL GUDGUDFALA SAMTING LONG BAEBOL | REVELESEN 4-6
“Ol Fo Man We Oli Ron Long Hos”
Ol Fo Man Ya Long Hos ?Oli Hu?
?Hu ya man ya we i sidaon long waet hos? Buk blong Revelesen i tokbaot hem long sam japta we i kam biaen se hem i “Tok Blong God.” (Revelesen 19:11-13.) Taetel ya, Tok, i blong tokbaot Jisas Kraes, from hem i wok olsem man blong talemaot tok blong God. (Jon 1:1, 14) Mo tu, oli singaotem hem se “King blong ol king, mo Masta blong ol masta,” mo “Man We Yu Save Trastem, mo Man We i Talem Trutok.” (Revelesen 19:16) I klia se hem i wan king we i gat raet blong faet, be hem i no yusum paoa blong hem blong spolem narafala. Be, i gat sam moa kwestin.
wp17.3 pej 4 haf 5
Ol Fo Man Ya Long Hos ?Oli Hu?
?Ol hos ya oli stat ron wetaem? I gud blong makem se Jisas we i ron long faswan hos, i stat blong ron taem hem i kam king. (Revelesen 6:2) ?Hem i kam King long heven wetaem? Hem i no kam king stret afta we hem i gobak long heven. Baebol i soemaot se hem i mas wet. (Hibrus 10:12, 13) Jisas i tokbaot sam saen blong ol disaepol blong hem oli luksave en blong taem ya we hem i stap wet, mo stat blong taem we hem i rul long heven. Hem i talem se taem we hem i stat blong rul, ol trabol long wol ya bambae oli kam mowas. Bambae i gat ol faet, kakae i sot, mo ol strong sik. (Matiu 24:3, 7; Luk 21:10, 11) Afta long Wol Wo Wan long 1914, i kam klia se ol man oli laef kasem taem ya, we Baebol i singaotem se “ol las dei.”—2 Timoti 3:1-5.
Ol Fo Man Ya Long Hos ?Oli Hu?
Man we i sidaon long hos ya i pija blong ol faet. Makem se hem i tekemaot pis, i no long sam kantri nomo, be long fulwol. Long 1914, hem i fastaem long histri we i gat wan bigfala faet long fulwol. I no longtaem i gat namba tu bigfala faet long wol we i spolem plante moa man. Sam man oli ting se namba blong ol man we oli ded long ol bigbigfala faet mo ol narafala faet stat long 1914 i kam, i moa long 100 milian man. Mo antap long hemia, plante narafala man oli safa from ol kil we oli kasem.
Ol Fo Man Ya Long Hos ?Oli Hu?
“Mi luk wan blak hos, mo man we i sidaon long hem, hem i holem wan skel long han blong hem. Nao mi harem wan samting we i olsem wan voes i kamaot long medel blong ol fo jerubim ya, i talem se: “Wan kilo blong wit, praes blong hem i wan denarias, mo tri kilo blong bale, praes blong hem i wan denarias, be yu no mas spolem oel blong olif mo waen.”—Revelesen 6:5, 6.
Man we i sidaon long hos ya i pija blong hanggri. Vas ya i soemaot se bambae kakae i sot, i kasem mak ya we wan kilo blong wit, praes blong hem i wan denarias. !Hemia i olsem pei blong wan man blong wan fuldei long taem blong ol faswan Kristin! (Matiu 20:2) Sem mane ya i save pem tri kilo blong bale, we hem i no wan gudfala kakae olsem wit. ?Olsem wanem? ?Kakae ya i save fidim wan bigfala famle? Ol man oli kasem woning blong yusumgud kakae evridei, olsem ol man long taem bifo we oli mas yusumgud ol samting we oli gat olsem, oel blong olif mo waen.
wp17.3 pej 5 haf 7-9
Ol Fo Man Ya Long Hos ?Oli Hu?
Namba fo man long hos i pija blong ded we i kamaot from sik mo ol narafala samting. Smoltaem afta long 1914, flu blong Spen i kilim i ded plante milian man. Klosap 500 milian man oli kasem sik ya, i olsem se long evri 3 man we oli laef long wol, 1 long olgeta i gat sik ya.
Be i no flu blong Spen nomo we i kilim man i ded. Ol man we oli stadi long ol sik, oli talem se plante milian man oli ded from sik ya smolpoks long ol yia 1900. Tede, plante milian man oli ded from AIDS, tibi, mo malaria, nating se ol dokta oli stadi plante long ol sik ya.
Nating se i gat faet, kakae i sot, mo i gat sik, be sem samting nomo i kamaot, hemia se ol man oli stap ded. Ded i kasem olgeta man, mo i mekem se ol man oli no moa gat hop.
Traem Faenem Ol Gudfala Samting Ya
Bigfala Jea Blong Jehova Long Heven i Naes Tumas
8 Jon i save se bifo, God i putumap sam pris blong mekem wok long olfala haos tapolen. Taswe maet hem i sapraes long nekiswan samting we hem i luk: “Mo raonabaot long bigfala jea ya blong king, i gat twantifo narafala jea, oli stap, we oli bigfala tu, nao long ol jea ya i gat twantifo elda oli stap sidaon long olgeta. Olgeta ya, klos blong olgeta i waet, mo oli putum hat olsem hat blong king we oli wokem long gol.” (Revelesen 4:4) Yes, i no gat pris. Be i gat 24 elda we oli sidaon long jea blong king mo oli putum hat olsem king. ?Hu ya ol elda ya? Hemia olgeta long Kristin kongregesen we tabu spirit i makemaot olgeta. Oli laef bakegen long ded, nao oli tekem ples long heven we Jehova i promes finis long olgeta. ?Olsem wanem yumi save samting ya?
Bigfala Jea Blong Jehova Long Heven i Naes Tumas
19 ?Ol fo animol ya oli minim wanem? Vison blong narafala profet Esikel i givhan long yumi blong ansarem kwestin ya. Long vison blong hem, Esikel i luk Jehova i stap sidaon long jea blong king long wan samting olsem wan kat long heven. Klosap long kat ya i gat ol animol we oli klosap sem mak long ol animol we Jon i luk. (Esikel 1:5-11, 22-28) Biaen, Esikel i luk bakegen kat ya wetem jea blong king i stap antap long hem, mo ol animol klosap long hem. Long taem ya hem i talem se ol animol oli jerubim. (Esikel 10:9-15) Taswe ol fo animol we Jon i luk oli mas minim ol jerubim blong God, hemia ol enjel we oli gat hae ples long oganaesesen blong hem long heven. Jon i no save sapraes we ol jerubim oli stap klosap long Jehova hem wan. From we long haos tapolen long taem bifo, tu jerubim we oli wokem long gol oli stap antap long led blong bokis blong kontrak, we i minim bigfala jea blong Jehova. Taem Jehova i talemaot ol oda mo loa long nesen blong Isrel, voes blong hem i kamaot long ples bitwin long tufala jerubim ya.—Eksodas 25:22; Ol Sam 80:1.
cf pej 36 haf 5-6
‘!Yu luk! Laeon we i kamaot long laen blong Juda’
5 Plante taem long Baebol, laeon i pijarem fasin blong no fraet. ?Yu yu stanap finis long fored blong wan man laeon? Sipos yes, maet hemia from we laeon i stap insaed long fenis long wan ples blong lukaot ol animol. Be yet, yu save harem se yu fraet. Taem yu luk fes blong bigfala laeon ya we i gat bigfala paoa mo hem i stap lukluk stret long yu, yu yu luksave se laeon ya i no fraet nating long wan samting. Baebol i tokbaot laeon se “i strong moa i winim ol narafala animol, mo i no save fraet nating.” (Ol Proveb 30:30) Kraes tu i gat fasin ya blong no fraet.
6 Bambae yumi tokbaot tri rod we i soemaot olsem wanem Jisas i soem se hem i olsem laeon we i no fraet: taem hem i stanap long saed blong trutok, taem hem i holem stret fasin, mo taem i fesem ol man we oli agensem hem. Bambae yumi luk tu se, yumi evriwan, nating se yumi no man blong fraet o yumi fraet, yumi save folem eksampol blong Jisas blong no fraet.