Japta 97

Ol Man We Oli Go Wok Long Plantesen

JISAS i jes talem se: “Plante man we oli stap holem nambawan ples, bambae oli mas godaon long las ples. Mo plante we oli stap long las ples, bambae oli mas kam tekem nambawan ples.” Nao hem i talem wan store blong eksplenem tok ya. Hem i se: “[Kingdom blong heven, GNB] i olsem wan masta we i gat plantesen blong hem. Masta ya, hem i go long eli moning blong tekem sam man blong oli kam wok kontrak long plantesen blong hem.”

Jisas i gohed long store ya i se: “Hem [masta] i promes blong pem olgeta, wan denariasa wan man blong wan dei, nao i sanem olgeta oli go long plantesen blong hem. Nao long naen kilok, hem i go long open ples long velej bakegen, i luk sam narafala man oli stap stanap nomo, oli no mekem wan samting. Nao hem i talem long olgeta, i se ‘I gud yufala tu i kam wok long plantesen blong mi. Bambae mi mi pem yufala i stret.’ Nao olgeta ya oli go. Nao long twelef kilok, mo long tri kilok long aftenun, masta ya i gobak, i mekem sem fasin ya bakegen. Mo long faef kilok long aftenun, hem i gobak long open ples ya bakegen, i luk sam man we oli stap stanap long ples ya yet. Nao hem i talem long olgeta, i se ‘?From wanem yufala i stap westem ful dei long ples ya, yufala i no mekem wan samting?’ Olgeta oli ansa se ‘Be i no gat man i singaot mifala blong wan wok.’ Nao hem i talem long olgeta, i se ‘Ale, yufala tu i kam wok long plantesen blong mi.’ ”

Masta ya we i gat plantesen blong hem, hemia Jeova God. Plantesen ya i minim laen blong ol man Isrel bifo. Ol man blong wok kontrak long plantesen ya, i minim ol man we Jeova i mekem kontrak blong Loa wetem olgeta. Hemia ol man Jyu long taem blong ol aposol blong Jisas. Hem i promes blong pem olgeta wan denarias wan man long wan dei. Hem i mekem promes ya long olgeta we oli kam wok ful dei nomo. Ale, olgeta we masta i singaot olgeta long naen kilok, oli wok naen haoa. Olgeta we oli stat wok long twelef kilok, oli wok sikis haoa. Olgeta we hem i singaot olgeta long tri kilok oli wok tri haoa nomo, mo olgeta we oli stat wok long faef kilok, oli wok wan haoa nomo.

Olgeta we oli wok ful dei, olsem twelef haoa, hemia ol lida blong ol man Isrel we oltaem oli bisi blong mekem sam wok long skul blong olgeta. Be ol disaepol blong Jisas oli defren. Fastaem oli bin mekem wok blong pulum fis no sam narakaen wok bakegen. Long en blong yia 29 K.T. nomo, “masta” i sanem Jisas Kraes blong singaot olgeta oli kam disaepol blong hem. Taswe olgeta oli stap long “las ples,” no oli stat wok long plantesen long faef kilok nomo.

Dei blong wok i finis taem Jisas i ded. Nao hem i stret taem blong givim pei long ol man blong wok. Masta i folem wan spesel rod blong pem ol man, se laswan blong stat long wok i kasem pei blong hem fastaem. Jisas i eksplenem se: “Nao long sapa, masta ya i talem long bosman blong hem, i se ‘Ale, yu singaot olgeta man ya blong wok oli kam, yu pem olgeta. Yu stat long olgeta ya we oli jes kam, gogo yu finis long olgeta ya we oli kam fastaem.’ Nao taem ol man ya we oli jes stat wok long faef kilok nomo oli kam, bosman ya i givim [wan denarias] wan man long olgeta. Mo taem olgeta we oli kam wok long eli moning oli kam, oli ting se bambae oli kasem antap, be bosman ya i givim [wan denarias] wan man long olgeta ya tu. Nao taem oli tekem pei ya, oli stap toktok smol agens long masta blong plantesen ya. Nao oli talem se ‘Olgeta ya we oli jes kam, oli wok wan haoa nomo, be mifala i wok ful dei long big san ya. ?Olsem wanem yu givim sem pei long olgeta, we yu givim long mifala?’ Be masta ya i ansa long wan long olgeta, i se ‘Maefren, mi mi no stilim yu. Yu yu agri long mi finis, blong yu wok wan ful dei blong [wan denarias]. Ale, yu tekem pei blong yu, yu gohom. Mi mi glad nomo blong givim sem pei ya we mi givim long yu long ol man ya we oli jes kam. ?Yu ting se mi no gat raet blong mekem olsem we mi mi wantem, long mane blong mi? ?Olsem wanem yu yu jelas long ol man ya we mi mi kaen long olgeta?’ ” Nao blong finisim parabol blong hem, Jisas i talem bakegen rul we i talem finis, i se: “Long fasin ya, olgeta we oli stap long las ples, bambae oli mas kam tekem nambawan ples. Mo olgeta we oli stap holem nambawan ples, bambae oli mas godaon long las ples.”

Olgeta oli no kasem pei stret long taem we Jisas i ded. Olgeta oli kasem pei long yia 33 K.T., long Pentekos, taem Kraes, we i “bosman,” i kafsaedem tabu speret long ol disaepol blong hem. Ol disaepol ya blong Jisas oli olsem olgeta we oli stat wok long faef kilok. Taswe olgeta oli stap long “las ples.” Pei blong olgeta, hemia wan denarias, i no minim tabu speret stret. Pei ya i wan samting we ol disaepol blong Jisas oli yusum taem oli stap long wol, wan samting we bambae oli kasem laef blong olwe from. Hemia i minim bigfala blesing we God i givim long olgeta, taem hem i singaot olgeta oli kam man Isrel long saed blong speret, nao hem i makemaot olgeta blong oli talemaot gud nyus blong Kingdom blong hem.

I no longtaem, olgeta we oli stat wok long eli moning oli luk se ol disaepol blong Jisas oli kasem pei blong olgeta. Nao oli luk we olgeta oli stap yusum samting we God i givim, we i olsem denarias. Be olgeta ya oli jelas. Oli no jes wantem tabu speret mo ol blesing long saed blong Kingdom wok. No gat. Oli wantem moa. Taswe oli toktok smol agens long masta, nao oli mekem trabol long ol disaepol blong Kraes, we oli ‘las’ blong statem wok long plantesen.

?Olsem wanem? ?Parabol ya i stret long ol man long taem blong Jisas nomo? No gat. Long laswan handred yia, ol lida blong ol skul we oli talem se oli Kristin, oli stap long ples we i olsem “fas ples.” From haenem mo wok blong olgeta, i olsem we oli gat fas jans blong wok long plantesen blong God. Olgeta oli ting se ol man we oli joen wetem Sosaete Watch Tower blong talemaot gud nyus, oli stap long “las ples.” Olgeta oli ting se oli laswan blong kasem wok long plantesen blong God. Nating we ol lida blong skul oli stap daonem olgeta mo oli no laekem olgeta, be olgeta nao oli kasem denarias. Yes, God i givim bigfala blesing long olgeta. Hem i makemaot olgeta blong oli karem tok blong Kingdom blong God we i stap long heven. Matyu 19:30 kasem 20:16.

[Futnot]

▪ ?Plantesen i minim wanem? ?Masta blong plantesen, hem i hu? ?Hu olgeta we oli wok blong twelef haoa? ?Hu olgeta we oli wok blong wan haoa nomo?

▪ ?Dei blong wok i finis wetaem? ?Ol man blong wok, oli kasem pei wetaem?

▪ ?Wanem mining blong denarias, we hem i pei blong olgeta?