Refrens Blong Kristin Wok Mo Laef Buk Blong Miting
6-12 JENUWARE
OL GUDGUDFALA SAMTING LONG BAEBOL | JENESIS 1-2
“Jehova i Wokem Ol Laef Samting Long Wol”
it-1 pej 527-528
Ol Samting We God i Wokem
Long Dei Wan taem God i talem se, “I mas gat delaet,” i gat smol laet i pastru long ol klaod nating se ol stamba blong laet ya, olsem san, mun mo ol sta, man i no save luk yet. I luk olsem se samting ya i hapen sloslo, olsem we transleta ya J. W. Watts i talem: “Nao sloslo delaet i kamtru.” (Je 1:3, A Distinctive Translation of Genesis) God i seraotem delaet mo tudak, nao hem i putum nem blong delaet se Dei mo tudak se Naet. Hemia i soemaot se wol ya i lei smol mo i stap tantanem raon taem i stap go raon long san, blong mekem se haf blong is mo wes, i save gat delaet mo tudak.—Je 1:3, 4.
Long Dei Tu God i wokem wan samting olsem bigfala ruf we i raon blong “mekem wota i seraot, nao haf wota i stap antap long hem, mo haf wota i stap aninit long hem.” I gat sam haf blong wota we i stap long wol, be bighaf blong wota i stap antap, mo long medel blong tufala wota ya i gat wan open spes. God i putum nem blong open spes ya se Heven, be hemia i joen wetem wol ya, from we Baebol i no tokbaot se wota ya we i stap antap long open spes i joen wetem ol sta mo ol narafala samting long spes.—Je 1:6-8; yu luk EXPANSE.
Long Dei Tri God i mekem olgeta wota we i stap long wol oli kam wanples mo draeples i kamaot, nao God i putum nem blong draeples ya se Graon. Mo long sem dei ya, God i seraotem ol gas we oli stap long wol blong laet i save kasem graon, nao gras, ol plant mo ol frut tri oli save gru. Wanwan long ol samting ya oli naf blong karem kakae mo sid we i sem mak long hem. Olgeta samting ya oli no kamaot olsem nomo, be God nao i wokem olgeta.—Je 1:9-13.
it-1 pej 528 haf 5-8
Ol Samting We God i Wokem
I gud blong makem se Jenesis 1:16 i no yusum Hibru veb ya ba·raʼʹ, we i minim “wokem.” Be, i yusum Hibru veb ya ʽa·sahʹ, we i minim “mekem.” From we san, mun, mo ol sta oli pat blong “heven” we Jenesis 1:1 [NW] i tokbaot, ol samting ya God i wokem longtaem finis bifo long Dei Fo. Long namba fo dei, God i “mekem” se ol samting ya oli save givim samting we wol i nidim. Taem Baebol i se, “[God] i putum olgeta oli stap long skae, nao oli saenaot i kam long graon ya, oli mekem i gat laet,” hemia i soemaot se naoia man i save luk san, mun mo ol sta. Mo tu, “ol samting ya bambae oli blong makem ol dei, mo ol yia, mo ol taem blong lafet,” we biaen, oli save givhan long ol man tu.—Je 1:14.
Long Dei Faef God i wokem ol animol long wol ya. Hem i no wokem wan kaen animol nomo we i jenis i kam ol defren animol, be hem i yusum paoa blong hem blong wokem plante defren kaen animol. Baebol i se: “Hem i mekem ol bigbigfala fis blong solwota, wetem ol naranarafala fis we oli stap long solwota mo long wota, mo i mekem ol naranarafala pijin tu.” God i glad tumas long ol wok ya we hem i mekem, nao hem i blesem ol animol ya, i talem long olgeta se, “I gud yufala i gat plante pikinini.” Samting ya i kamtru from we God i wokem ol animol ya long wan fasin we oli save gat pikinini we i sem mak long olgeta.—Je 1:20-23.
Long Dei Sikis “[God] i mekem ol naranarafala samting we i gat laef we oli stap long graon ya. Ol animol blong vilej wetem ol animol blong bus, i stat long olgeta we oli bigbigfala, i go kasem olgeta we oli smosmol,” mo ol wok ya oli gud tumas, sem mak olsem ol narafala samting we God i wokem.—Je 1:24, 25.
Bifo long en blong namba sikis dei, God i wokem wan laef samting we i spesel, we i hae moa long ol animol, be i daon moa long ol enjel. Hemia man, we God i wokem blong i tekem ol fasin blong hem. Jenesis 1:27 i tokbaot smol nomo se “[God] i mekem tu man nomo, wan we i man mo wan we i woman,” mo Jenesis 2:7-9 i tokbaot moa se Jehova God i tekem graon mo i wokem man long hem, i blu long nus blong hem blong mekem hem i gat laef, mo hem i laef long wan naesfala ples we i gat plante kakae long hem. I klia se Jehova i yusum graon nomo blong wokem ol samting long wol ya, mo biaen i wokem man. Mo hem i yusum wansaed rib blong Adam blong wokem wan woman. (Je 2:18-25) Taem God i wokem woman, hemia i mekem se man i naf blong gat ol pikinini we oli kamaot biaen long tufala.—Je 5:1, 2.
Traem Faenem Ol Gudfala Samting Ya
?Olsem Wanem Sayens i Gat Paoa Long Laef Blong Yu?
Yia blong wol mo yunives
Ol saentis oli ting se yunives i stat samwe long 13 kasem 14 bilian yia i pas, mo wol ya i olfala samwe long 4 bilian yia. Baebol i no talem stret dei we God i wokem yunives. Mo tu, hem i no talem se wol ya i jes stat sam taosen yia nomo. Faswan vas blong Baebol i talem se: “Bifo we bifo olgeta, God i mekem skae mo graon wetem olgeta samting we i stap long tufala.” (Jenesis 1:1) Ol tok ya blong Jenesis i givim sam tingting blong ol saentis oli yusum save blong olgeta blong faenemaot yia blong wol.
it-2 pej 52
Jisas Kraes
I No Man Blong Wokem Ol Samting. Nating se Jisas i givhan long Papa blong hem blong wokem olgeta samting, hemia i no min se hem tu i Man Blong Wokem Ol Samting olsem God. God i yusum paoa blong hem, hemia tabu spirit, blong i wokem olgeta samting. (Je 1:2; Sam 33:6) Mo from we Jehova i Stamba blong laef, olgeta laef samting we yumi save luk mo olgeta we yumi no save luk, laef blong olgeta evriwan i blong hem. (Sam 36:9) Taswe Jisas i no Man Blong Wokem Ol Samting, be hem i man, o wan tul, we God i yusum blong wokem olgeta samting. Olgeta vas blong Baebol, mo Jisas tu, i talem se God nao i wokem olgeta samting.—Mt 19:4-6; yu luk CREATION.
13-19 JENUWARE
OL GUDGUDFALA SAMTING LONG BAEBOL | JENESIS 3-5
“Ol Nogud Samting Oli Kamaot From Fas Giaman”
!Stamba Tingting Blong Jehova Bambae i Kamtru!
9 Devel Setan i yusum wan snek blong trikim Iv, blong i no moa obei long Papa blong hem, Jehova. (Ridim Jenesis 3:1-5; Revelesen 12:9) Setan i askem sipos i tru se God i putum tabu long ol “frut blong ol tri,” blong tufala pikinini blong hem i no kakae.I olsem we hem i stap talem se: ‘?Yutufala i no save mekem samting we yutufala i wantem?’ Biaen, hem i giaman long Iv se: “Yutufala i no save ded.” Nao hem i traem blong pulum Iv blong i no obei long God, i se: “Hem i talem olsem from we i save se sipos yutufala i kakae frut ya, bambae ae blong yutufala i open.” Setan i talem se Jehova i no wantem we tufala i kakae frut ya, from we bambae tufala i kasem sam spesel save. Afta, hem i mekem giaman promes ya se: “Bambae yutufala i kam olsem hem, we i save ol fasin we i nogud mo ol fasin we i gud.”
w00 15/11 pej 25-26
Yumi Save Lanem Sam Samting Long Faswan Man Mo Woman
?Iv i no naf blong blokem sin ya? !Yes, hem i naf! Putum yu wan long ples blong hem. Samting we snek ya i talem i defren olgeta long wanem we God mo Adam tufala i bin talem. ?Bambae yu harem olsem wanem sipos wan strenja i talem se man we yu lavem mo yu trastem, i man blong giaman? Iv i mas mekem i defren olgeta, hem i mas soem se hem i no laekem tok ya nating mo i mas kros, mo tu hem i no wantem lesin. Antap moa, snek ya i no gat raet nating blong tok agensem stret fasin blong God mo wanem we hasban blong Iv i talem long hem. Iv i no soem respek nating long rul we God i stanemap, we hasban i hed. Bifo we Iv i mekem enikaen desisen hem i mas askem advaes long hasban blong hem fastaem. Hemia nao samting we yumi mas mekem sipos wan dei yumi kasem sam tok we i go agensem ol advaes we God i givim. Nating se i olsem, Iv i trastem ol tok blong Man ya We i Traem hem, hem i wantem folem prapa tingting blong hem nomo, long saed blong wanem i gud mo wanem i nogud. Moa we hem i tingbaot ol tok ya blong snek, moa naes we ol tok ya i kam long tingting blong hem. !Hem i mekem wan bigfala mastik blong holemtaet wan rong tingting, mo i no sakemaot rong tingting ya no i no tokbaot samting ya wetem hed blong famle blong hem!—1 Korin 11:3; Jemes 1:14, 15.
Adam i Lesin Long Waef Blong Hem
I no longtaem biaen Iv i pulum Adam blong joen mo mekem sin wetem hem. ?Olsem wanem nao yumi save eksplenem slak tingting blong Adam we i agri long waef blong hem mo i no tok agensem samting ya nating? (Jenesis 3:6, 17) ?Adam i mas jusum blong stap tru long hu? ?Bambae hem i obei long Man We i Wokem hem, we i givim evri samting long hem, olsem waef blong hem Iv we hem i laekem tumas? ?Bambae Adam i lukaot help blong God long samting we hem i mas mekem naoia? ?No bambae hem i mekem desisen blong joen wetem waef blong hem? Adam i savegud se samting we Iv i hop blong kasem taem hem i kakae tabu frut ya, i neva save hapen. Tingting ya nao i pusum aposol Pol blong raetem se: “I no Adam we Setan i trikim hem bifo, be Iv ya, nao hem i brekem loa blong God.” (1 Timoti 2:14) Taswe Adam i jusum blong agensem Jehova. I klia se hem i fraet moa blong seraot long waef blong hem i bitim we hem i bilif se God nao i naf blong stretem problem ya.
w12 1/10 pej 4 haf 2
?I Tru Se God i Kea Long Ol Woman?
?God i stap panisim ol woman?
Nogat. God i givim “panis” long “snek ya blong bifo we nem blong hem ‘Setan.’” (Revelesen 12:9; Jenesis 3:14) Taem God i talem se Adam bambae i “bos” long woman blong hem, hem i no stap talem se man i mas luk woman blong hem olsem slef blong hem. (Jenesis 3:16) Be God i stap tokbaot nogud frut we i kamaot from sin blong fas man mo woman.
Ol Bigfala Poen Long Buk Blong Jenesis—Haf 1
3:17—?Olsem wanem God i spolem graon ya i mekem i kam nogud, mo fasin ya bambae i gohed kasem wetaem? Tok ya we God i talemaot blong spolem graon ya i min se graon nao i kam nogud mo man bambae i mas wok had blong kasem kakae long hem. Ol pikinini blong Adam oli mas wok had long graon ya we i fulap long ropnil mo rabis gras. Lamek, papa blong Noa i tokbaot ‘hadwok blong olgeta long graon ya we Hae God i jajem finis, i mekem i kam nogud.’ (Jenesis 5:29) Afta we Bigfala Wota i ron, Jehova i blesem Noa mo trifala pikinini blong hem, i talemaot plan blong Hem we bambae olgeta oli mas gat plante pikinini mo wol ya i kam fulap long man. (Jenesis 9:1) I luk olsem se God i karemaot tok blong spolem graon ya i mekem se graon ya i kam gud bakegen.—Jenesis 13:10.
it-2 pej 186
Soa We Woman i Harem Taem i Bonem Pikinini
Soa we woman i harem taem i bonem pikinini. Afta we Iv i mekem sin, God i talemaot long hem samting we bambae i hapen taem hem i bonem pikinini. Sipos hem i bin obei, bambae God i gohed blong blesem hem mo bambae hem i no save harem nogud taem i bonem pikinini, from we Baebol i se “blesing blong Jehova, hemia nao samting we i mekem man i rij. Mo hem i no givim soa wetem.” (Pro 10:22, NW) Be naoia, yumi stap harem i soa long bodi blong yumi from we yumi sinman. From samting ya, God i se (samtaem God i letem sam samting i hapen be hem nao i mekem): “Bambae mi mi mekem we long taem we yu yu gat bel, bambae yu harem nogud moa long bodi blong yu, mo long taem we yu bonem pikinini, bambae yu harem bak blong yu i soa moa.”—Je 3:16.
Traem Faenem Ol Gudfala Samting Ya
it-2 pej 192 haf 5
Lamek
Singsing we Lamek i wokem blong tufala waef blong hem (Je 4:23, 24) i soemaot raf fasin we i stap hapen long taem blong hem. Lamek i sing se: “Ada mo Jila, yutufala i lesin gud. Yutufala i woman blong mi, yutufala i lesin long tok blong mi. Mi mi kilim wan man i ded, from we hem i kilim mi. Man ya we i faetem mi i wan yang boe, nao mi mi kilim hem i ded. Sipos wan man i kilim Ken i ded, bambae seven man oli mas ded from. Be sipos wan man i kilim mi mi ded, bambae seventi seven man oli mas ded from.” I klia se long ples ya, Lamek i traem blong protektem hem wan, se fasin blong hem i no olsem ol narafala we oli minim blong kilim man i ded, olsem Ken. Lamek i talem se, from we hem i traem blong protektem hem wan, hem i kilim ded man we i kilim hem. Taswe singsing blong hem i blong blokem eni man we i wantem agensem hem, from we hem i kilim i ded man we i kilim hem.
it-1 pej 338 haf 2
Tok Nogud Long God
Ol man oli stat blong ‘yusum nem blong Jehova’ long taem blong Enos, bifo we Bigfala Wota i ron, be oli stap yusum nem ya long wan fasin we i no stret, from we longtaem bifo, Ebel tu i stap yusum nem blong God blong toktok long hem. (Je 4:26; Hib 11:4) Taswe, olsem we sam man blong stadi dip long Baebol oli talem, sipos ol man ya long taem blong Enos oli stap yusum nem blong God long wan fasin we i no stret, mo oli stap putum nem blong Jehova long ol man mo ol aedol, hemia i olsem we oli stap tok nogud long God.—Yu luk ENOSH, ENOS.
20-26 JENUWARE
OL GUDGUDFALA SAMTING LONG BAEBOL | JENESIS 6-8
“Noa i Mekem Olsem We God i Talem”
Yumi Mas Gat Bilif Mo Obei Olsem Noa, Daniel, Mo Job
4 Hadtaem we Noa i fesem. Long taem blong Inok we i wan olfala bubu blong Noa, ol man oli nogud finis. Oli stap talem plante “rabis tok” agensem Jehova. (Jud 14, 15) Sloslo, wol ya i kam moa nogud. Nao long taem blong Noa, “long evri ples, oli stap faet mo oli stap kilim man i ded.” Ol rabis enjel oli kamdaon long wol, oli tekem bodi blong man, mo oli mared wetem ol woman. Ol pikinini blong olgeta oli raf bitim mak, mo oli nogud tumas. (Jenesis 6:2-4, 11, 12) Be ol man oli luksave se Noa i defren. Baebol i talem se, ‘Jehova i stap glad long hem.’ Noa i no mekem olsem ol narafala man, be hem i wan stret man. Mo “oltaem hem i stap fren gud wetem God.”—Jen. 6:8, 9.
Hem i Wokbaot Wetem God
Noa i tekem bitim 40 kasem 50 yia blong wokem sip ya. Noa mo famle blong hem oli mas katem ol tri, karem ol wud, mekemrere ol timba, mo katem gud ol timba blong mekem se oli save joen gud. Sip ya i mas gat tri stori long hem, ol rum insaed long hem, mo wan doa long saed blong hem. Raon long sip ya antap, klosap long ruf blong hem, i gat ol windo. Mo tu, i mas gat wan ples antap long sip ya, we wota i save ronaot long hem.—Jenesis 6:14-16.
w11 1/9 pej 21 haf 13
Yumi Mas Mekem Tingting Blong Yumi i Strong Blong Resis
13 ?Wanem i givhan long ol man ya blong Jehova blong oli gat strong tingting mo oli finisim resis blong olgeta? Yu traem tingbaot samting we Pol i talem long saed blong Noa. (Ridim Hibrus 11:7.) ‘Bigfala wota we bambae i draonem olgeta samting ya we i laef, blong spolem olgeta,’ i wan samting we Noa i neva luk bifo. (Jen. 6:17) Neva bifo i gat bigfala wota i ron. ?Be olsem wanem? ?Samting ya i mekem Noa i tingting se bigfala wota i no save ron? Nogat. ?From wanem hem i no tingting olsem? From we hem i bilif se oltaem samting we Jehova i talem i mas kamtru. Taswe Noa i no gat tingting ya se i strong tumas blong obei long Jehova. Hem i “mekem olgeta samting ya olsem we God i talem.” (Jen. 6:22) Noa i gat plante samting blong mekem. Hem i mas wokem bigfala sip, hem i mas mekem ol animol oli kam wanples, hem i mas hivimap ol kakae blong famle blong hem mo blong ol animol, hem i mas givim woning long ol man se bigfala wota bambae i ron, mo hem i mas givhan long famle blong hem blong oli bilif strong long Jehova. I no isi blong Noa i “mekem olgeta samting ya” we Jehova i talem long hem. Be Noa i bilif long Jehova, taswe hem i gat strong tingting blong mekem ol wok we hem i mas mekem. Nao Jehova i sevem hem mo famle blong hem, mo Jehova i blesem olgeta bigwan.
Traem Faenem Ol Gudfala Samting Ya
Ol Bigfala Poen Long Buk Blong Jenesis—Haf 1
7:2—?Wanem poen we oli yusum blong jajem se wan animol i klin mo wan animol i no klin? God i no jajem sam animol se oli klin mo sam se oli no klin, blong soemaot weswan animol we man bambae i save kakae mo bambae i no save kakae. I luk olsem se, God i seraot ol klin animol long olgeta we oli no klin, from we ol man bambae oli yusum ol klin animol blong mekem sakrefaes long wosip blong Hem. Bifo long taem we Bigfala Wota i ron, ol man oli no stap kakae mit. Taswe Loa blong Moses nomo i stat blong yusum tufala tok ya “klin” mo “no klin” long saed blong kakae, mo ol tabu we Loa ya i putum long sam kakae oli finis taem God i tekemaot Loa ya. (Ol Wok 10:9-16; Efesas 2:15) I klia se, Noa i gat save long saed blong weswan animol i stret blong yusum olsem sakrefaes long wosip blong Jehova. Taem hem i aot long sip, kwiktaem nomo hem “i wokem wan olta blong mekem wosip long Hae God, mo i tekem ol animol wetem ol pijin we oli klin long fes blong God, i mekem sakrefaes long olgeta. Hem i tekem wanwan long olgeta evriwan, mo i kilim olgeta, i bonem olgeta we oli bon evriwan long olta ya blong mekem wosip long hem.”—Jenesis 8:20.
Ol Bigfala Poen Long Buk Blong Jenesis—Haf 1
7:11—?Bigfala Wota we i kavremap wol long taem blong Noa i kam long weples? Long namba tu “dei,” taem God i wokem “samting olsem bigfala ruf” raon long wol, i gat wota “aninit long hem” mo wota “antap long hem.” (Jenesis 1:6, 7) Wota “aninit” hemia wota we i stap finis long wol ya. Wota “antap” hemia bigfala wota we i hang long klaod hae antap long wol ya, we i olsem “wan bigfala wota we i dip” (NW). Bigfala Wota ya nao i foldaon long wol long taem blong Noa.
27 JENUWARE–2 FEBRUARI
OL GUDGUDFALA SAMTING LONG BAEBOL | JENESIS 9-11
“Olgeta Ples Long Wol Oli Gat Wan Lanwis Nomo”
it-1 pej 239
Bigfala Babilon
Ol Samting Blong Olfala Taon Blong Babilon. Taem oli stat blong bildim taon blong Babilon long Levelples Blong Sina, longtaem ya tu oli wantem bildim Taoa Blong Babel. (Je 11:2-9) Samting we i pulum olgeta blong bildim taoa ya mo taon ya, i no blong leftemap nem blong God, be blong “mekem nem blong [olgeta] i go antap.” Ol bigfala taoa olsem oli no stap nomo long olfala taon blong Babilon bifo, be i gat tu long ol ples long Mesopotamia. Nating se oli wokem ol taoa ya long ol defren sep o stael, be hemia i pruvum se oli bildim Taoa Blong Babel olsem wan ples blong wosip o tempol. Aksen we Jehova God i mekem blong stopem wok blong bildim tempol ya, i soemaot klia se hem i no glad long olgeta from we long ples ya nao giaman wosip i stat. Long lanwis Hibru oli putum nem blong taon ya se Babel, we i minim “Paspas,” mo nem blong taon ya long lanwis Sumerian (Ka-dingir-ra) mo lanwis Akkadian (Bab-ilu), tugeta i minim “Get Blong God.” Ol man we oli laef long taon ya oli jenisim nem blong taon ya blong haedem mining blong nem blong hem bifo, be nating se i olsem niufala nem blong taon ya i joen yet wetem relijen o giaman wosip long taem bifo.
it-2 pej 202 haf 2
Lanwis
Stori long buk blong Jenesis i tokbaot sam man we oli laef afta we bigfala wota i ron, se oli mekem wan samting we i agensem plan we God i talem long Noa mo ol boe blong hem. (Je 9:1) God i wantem se ol man oli go stap olbaot long evri ples mo oli ‘fulumap wol.’ Be ol man ya oli wantem hivimap olgeta man oli kam wanples, long Levelples Blong Sina long Mesopotamia. Mo biaen oli mekem taon ya i kam ples blong wosip blong olgeta, mo oli bildim wan taoa olsem tempol blong olgeta.—Je 11:2-4.
it-2 pej 202 haf 3
Lanwis
God ya we i gat olgeta paoa i stopem wok blong olgeta, taem i mekem lanwis blong olgeta i paspas blong oli no moa save joengud blong wok. Hemia i mekem se oli no save gohed blong wok, nao oli go wanwan olbaot long olgeta ples long wol. From we lanwis blong olgeta i paspas, hemia i save blokem o sloem daon ol rabis wok blong olgeta long fiuja, we i agensem ol plan blong God. Mo tu, hemia i blokem ol man blong oli no yusum waes mo paoa blong olgeta long fasin we i no stret, mo i mekem i had blong oli yusum ol save we i kamaot long ol man blong ol defdefren ples. Ol save ya oli no kamaot long God, be oli kamaot long ekspiriens mo risej we ol man oli mekem. (Skelem wetem Pri 7:29; Du 32:5.) Nating se lanwis blong ol man oli defdefren, be hemia i givhan long ol man blong oli no mekem samting we i denja mo i spolem narafala. (Je 11:5-9; skelem wetem Aes 8:9, 10.) Tede save blong man i kam antap bigwan, be oli yusum save ya blong mekem plante nogud samting. Taem yumi tingbaot samting ya, yumi kasemsave se God i save long taem finis se bambae ol man oli yusum ol nogud tingting blong olgeta blong mekem samting we i no stret. Taswe hem i stopem wok we ol man oli mekem long Babel.
it-2 pej 472
Ol Nesen
From we naoia i gat ol defdefren lanwis, wanwan grup blong ol lanwis ya i wokem prapa kalja, stael blong wokem samting, ol kastom, ol fasin blong laef, mo bilif blong olgeta. (Le 18:3) From we plante man oli no wosipim trufala God, oli wokem plante aedol blong ol giaman god blong olgeta.—Du 12:30; 2Ki 17:29, 33.
Traem Faenem Ol Gudfala Samting Ya
it-1 pej 1023 haf 4
Ham
I save hapen se Kenan hem wan i stap insaed long bisnes ya mo papa blong hem Ham, i no stretem hem. O Noa, i stap talemaot wan profet tok, we hem i luk olgeta we oli kamaot biaen long Kenan oli stap kakae frut blong nogud samting we Ham i bin mekem, mo maet samting ya i stat finis long taem blong boe blong hem Kenan. Haf blong tok panis ya i kamtru taem ol man Isrel we oli kamaot long laen blong Sem oli winim ol man Kenan. Olgeta we oli laef (eksampol, ol man Gibeon [Jos 9]) oli kam slef blong ol man Isrel. Plante handred yia biaen, tok panis ya i kamtru fulwan long ol pikinini blong Kenan, we i boe blong Ham, taem oli kam aninit long rul blong wol paoa blong Media mo Pesia, Gris, mo Rom, we oli ol laen blong Jafet.
Ol Bigfala Poen Long Buk Blong Jenesis—Haf 1
10:25—?Olsem wanem olgeta man long wol oli “seraot” long taem blong Peleg? Peleg i laef long ol yia 2269 kasem 2030 B.K.T. ‘Long taem blong Peleg,’ Jehova i mekem olgeta man long wol oli seraot taem hem i mekem lanwis blong olgeta we oli bildim Babel i paspas mo i ronemaot olgeta oli go stap olbaot long wol. (Jenesis 11:9) Taswe, “olgeta man long wol oli seraot” long taem blong Peleg.