Refrens Blong Kristin Wok Mo Laef Miting Wokbuk
3-9 MEI
OL SAS SAMTING LONG BAEBOL | NAMBA 27-29
“Mekem i Sem Mak Long Olgeta Man Olsem Jehova”
Yumi Mas Tinghae Long Ol Fasin Blong Jehova
14 Ol faef gel ya oli kam luk Moses mo oli askem long hem se: ‘?Papa blong mifala i no gat pikinini boe blong hem, be from wanem nem blong hem bambae i mas lus?’ Oli talem strong se: “Mifala i wantem se taem yufala i givim graon long ol famle blong papa blong mifala, bambae yufala i makemaot haf i blong mifala.” ?Olsem wanem? ?Yu ting se Moses i talem long olgeta se, samting we oli askem i agensem loa? Nogat. Moses i “talemaot tingting ya blong olgeta long [Jehova].” (Nam. 27:2-5) ?Wanem ansa blong Jehova? Hem i talem long Moses se: “Samting ya we olgeta oli askem i stret ya. Sipos yufala i givim graon long ol famle blong papa blong olgeta, bambae yufala i mas makemaot haf i blong olgeta. Graon we i blong go long olfala blong olgeta, bambae i mas go long olgeta.” Jehova i no talem hemia nomo, be hem i mekem tok blong hem i kam wan loa, mo i talem long Moses se: “Sipos man i ded we i no gat pikinini boe blong hem, graon blong hem bambae i mas go long ol dota blong hem.” (Nam. 27:6-8; Jos. 17:1-6) Stat long taem ya, evri woman we oli fesem wan problem olsem, oli stap gud nomo.
Yumi Mas Tinghae Long Ol Fasin Blong Jehova
15 Fasin ya we Jehova i mekem, i soemaot se hem i kaen mo hem i mekem i sem mak long olgeta man. !Hemia i nambawan tumas! I isi nomo blong man i spolem ol gel ya. Be samting we Jehova i mekem i soemaot se hem i tinghae long olgeta, olsem we hem i mekem long ol narafala man Isrel. (Sam 68:5) Hemia wan long ol stori blong Baebol we i soemaot nambawan trutok ya se: Jehova i mekem i sem mak long olgeta man blong hem.—1 Saml. 16:1-13; Wok 10:30-35, 44-48.
Yumi Mas Tinghae Long Ol Fasin Blong Jehova
16 ?Yumi save folem fasin blong Jehova olsem wanem? Yumi mas tingbaot se sipos yumi wantem mekem i sem mak long ol narafala, fastaem yumi mas tingbaot blong mekem i sem mak long evri man. Maet yumi wanwan i ting se yumi gat fasin ya. Be ating, yu agri se i no isi blong soemaot ol fasin ya. Taswe, ?yumi save mekem wanem blong faenemaot sipos yumi gat ol fasin ya? I gud yumi mekem olsem Jisas. Taem hem i wantem save se ol man oli tingbaot hem olsem wanem, hem i askem long ol gudfala fren blong hem se: “?Ol man oli stap tokbaot mi, mi Pikinini blong Man, se mi hu?” (Mat. 16:13, 14) Yumi save mekem sem mak. Yumi save askem long wan gudfala fren blong yumi se, “?Ol man oli tingbaot mi se mi gat wanem fasin?” Ale, sipos hem i talem long yumi se yumi no mekem i gud long ol man from kala blong skin blong olgeta, from kantri blong olgeta, from kastom blong olgeta, ?bambae yumi mekem wanem? Long taem olsem, i gud yumi wanwan i prea long Jehova, yumi talemaot long hem olgeta samting we oli stap long hat blong yumi. Mo yumi plis long hem blong i givhan long yumi, blong yumi jenisim fasin blong yumi. Olsem nao, yumi save folem fasin ya blong hem, blong mekem i sem mak long olgeta man.—Mat. 7:7; Kol. 3:10, 11.
Ol Gudgudfala Samting
it-2 528 ¶5
Ol Ofring
Ol dring ofring. Taem ol man Isrel oli stap long Promes Lan, oli givim ol dring ofring wetem plante narafala ofring blong mekem sakrefaes. (Na 15:2, 5, 8-10) Dring ofring ya hemia waen mo oli kafsaedem antap long olta. (Na 28:7, 14; skelem wetem Eks 30:9; Na 15:10.) Aposol Pol i raet i go long ol Kristin blong Filipae se: “Be nating sipos mi olsem dring ofring we oli kafsaedem i go long sakrefaes mo tabu wok ya we bilif blong yufala i pulum yufala blong mekem, bambae mi mi glad.” Pol i yusum pijatok blong dring ofring blong soemaot se hem i rere blong givim laef blong hem long bihaf blong ol Kristin. (Fil 2:17) Bifo we hem i ded, hem i raet i go long Timoti se: “Mi mi olsem dring ofring we oli kafsaedem finis i go long olta, mo klosap nao bambae mi mi fri.”—2Ti 4:6
10-16 MEI
OL SAS SAMTING LONG BAEBOL | NAMBA 30-31
“Holemtaet Promes Blong Yu”
it-2 1162
Promes
Man Hem Wan i Mekem, Be i Mas Holemtaet. Plante taem, ol man nomo oli jusum blong mekem promes. Mo folem loa, taem oli mekem, oli mas holemtaet. Taswe, man we i mekem promes, ‘laef blong hem i joen’ long promes ya. (Na 30:2; yu luk tu Ro 1:31, 32.) From we laef blong man i joen wetem promes, yumi kasemsave from wanem Baebol i talem se man i mas tingting gud bifo we i mekem wan promes. Loa i talem se: “Sipos yu mekem wan strong promes long Jehova . . . God blong yu, bambae i askem samting ya long yu. Sipos yu no holemtaet promes blong yu, yu yu mekem sin. Be sipos yu no mekem wan strong promes, bambae yu no mekem sin.”—Du 23:21, 22.
it-2 1162
Promes
Wan promes, man hem wan i mekem. Be wan spesel promes, hemia wan strong promes we man i mekem o i talem nem blong wan samting blong mekem promes blong hem i strong, mo samtaem Baebol i yusum tufala tok ya wanples. (Na 30:2; Mt 5:33) “Promes” i joen moa wetem samting we man i wantem mekem, be “strong promes” plante taem hemia wan promes we man i mekem long wan haeman, hem i mekem promes ya blong soemaot se wan samting i tru o se bambae hem i mekem o i no mekem wan samting. Plante taem man i mekem wan strong promes blong mekem wan kontrak i stanap.—Je 26:28; 31:44, 53.
Ol Bigfala Poen Long Buk Blong Namba
30:6-8—?Wan Kristin man i save blokem promes we woman blong hem i mekem? Long saed blong ol strongfala promes, Jehova i dil wetem ol man blong hem wanwan. Eksampol, taem wan man i givim laef blong hem i go long Jehova, hemia wan promes we hem wan i mekem long God. (Galesia 6:5) Hasban i no gat raet blong blokem no kanselem wan promes olsem. Be, wan waef i no mas mekem wan promes we i agens long Tok blong God o ol wok we hem i mas mekem blong hasban blong hem.
Ol Gudgudfala Samting
it-2 28 ¶1
Jeftaha
Oli save givim man i go long Jehova blong mekem wok long tabu ples. Ol papa mama tu oli gat raet blong mekem samting ya. Mo hemia nao samting we Hana i mekem bifo we Samuel i bon. Hem i promes blong givim Samuel blong wok long tabenakel. Elkana we i hasban blong Hana, i agri long promes ya. Taem Samuel i kam bigwan mo i livim titi, Hana i tekem hem i go blong wok long tabenakel, mo i tekem wan animol tu blong givim olsem sakrefaes. (1Sa 1:11, 22-28; 2:11) Samson i wan narafala pikinini we oli givim hem blong mekem wok blong God olsem wan Nasiraet.—Ja 13:2-5, 11-14.
17-23 MEI
OL SAS SAMTING LONG BAEBOL | NAMBA 32-33
“Ronemaot Olgeta Man We Oli Stap Long Kantri Ya”
?Yu Yu Save?
?Wanem ya ol “ol hae ples” we Hibru haf blong Baebol i tokbaot?
Bifo we ol man Isrel oli go insaed long Promes Lan, Jehova i talem long olgeta blong oli spolem evri ples blong wosip blong ol man Kenan long ples ya. Hem i talem se: “Yufala i mas . . . spolem evri pija we oli katem long ston, olgeta aedol we oli wokem long aean, mo yufala i mas brekemdaon ol hae ples blong wosip blong olgeta.” (Namba 33:52) Ples blong ol giaman wosip ya maet oli wokem long ol open ples long ol top blong ol hil, o aninit long ol tri, o insaed long ol taon. (1 King 14:23; 2 King 17:29; Esikel 6:3) Long ol ples blong wosip ya, maet oli wokem ol samting olsem ol olta, ol tabu ston o pos, ol pija, ol olta blong bonem insens, mo ol narafala samting blong wosip.
w08 2/15 27 ¶5-6
Lanem Samting From Mastik Blong Ol Man Isrel
Tede yumi fesem plante traem we i klosap sem mak olsem blong ol man Isrel bifo. I gat plante samting we i save kam olsem aedol blong ol man. Ol samting olsem mane, ol samting blong mekem man i haremgud, spot, politik, sam lida blong jos, mo iven ol memba blong famle. Eni long ol samting ya i save kam olsem impoten samting long laef blong yumi. Sipos yumi frengud wetem ol man we oli no lavem Jehova, hemia i save spolem frensip blong yumi wetem Jehova.
Wan samting we i pulum plante man Isrel bifo blong wosipim Bal, hemia nogud fasin blong seks. Mo hemia semfala trap we plante man blong God tede oli foldaon long hem. Eksampol, taem man i stap hem wan, i isi nomo blong hem i lukluk ol doti pija long kompiuta we i save spolem gudfala tingting blong hem. !I rili wan nogud samting sipos wan Kristin i foldaon long trap ya blong lukluk ponografi long intenet!
it-1 404 ¶2
Kenan
Josua “i mekem evri samting we Jehova i talem long Moses” blong spolem ol man Kenan. (Jos 11:15) Be ol man Isrel oli no folem gudfala eksampol blong Josua, mo oli no spolem evri nogud samting long Kenan. Samting ya i mekem se nogud fasin blong ol man Kenan i spolem ol man Isrel, mo hemia i mekem we plante man Isrel oli lusum laef blong olgeta (hemia i no inkludum ded from fasin blong brekem loa, nogud fasin blong seks, mo fasin blong wosipim aedol) we samting ya i no save hapen sipos oli bin lesin long tok blong Jehova blong spolem ol man Kenan. (Na 33:55, 56; Ja 2:1-3, 11-23; Sam 106:34-43) Jehova i givim woning long ol man Isrel se jastis mo jajmen blong hem bambae i sem mak nomo. Sipos ol man Isrel oli fren wetem ol man Kenan, oli mared wetem olgeta, oli folem bilif mo kastom blong olgeta, bambae oli kasem trabol mo hem i save ‘aotem’ olgeta tu long kantri ya.—Eks 23:32, 33; 34:12-17; Le 18:26-30; Du 7:2-5, 25, 26.
Ol Gudgudfala Samting
it-1 359 ¶2
Boda
Afta we ol spesel ston ya oli soemaot ples we wan traeb bambae i stap long hem, naoia bambae oli lukluk long saes blong teritori folem seken samting: saes blong traeb. “Yufala i mas sakem ol spesel ston blong seraotem ol graon long kantri ya, blong givim long ol famle blong yufala. Olgeta we oli plante, yufala i mas givim bigfala graon long olgeta, mo olgeta we oli no plante, yufala i mas givim smol graon nomo long olgeta. Ol spesel ston ya bambae oli soem graon we yufala evriwan bambae i kasem.” (Na 33:54) Desisen we i kamaot folem ol spesel ston ya, oli blong soemaot nomo stret ples blong ol wanwan traeb, be oli save mekem sam jenis long saes blong graon. Eksampol, taem oli faenemaot se graon blong ol laen blong Juda i bigwan tumas, oli serem sam haf blong hem i go long traeb blong Simeon.—Jos 19:9.
24-30 MEI
OL SAS SAMTING LONG BAEBOL | NAMBA 34-36
“Go Long Jehova Blong Haed”
?Yu Stap Go Haed Long Jehova?
4 ?Olsem wanem sipos wan man Isrel i no minim blong kilim narafala i ded? I tru se i wan aksiden, be hem i tekemaot laef blong wan man yet. (Jenesis 9:5) Nating se i olsem, Jehova i talem se i no nid blong hem i ded. Hem i save ronwe i go long wan long ol sikis taon blong haed, bifo we famle blong dedman ya i kasem hem. Mo blong stap sef, hem i mas stap long taon ya oltaem gogo kasem we hae pris i ded.—Namba 35:15, 28.
?Yu Stap Go Haed Long Jehova?
6 Sipos wan man Isrel i no minim blong kilim narafala i ded, hem i mas resis i go long wan taon blong haed, mo ‘talemaot bisnes ya’ long ol elda long get blong taon ya. Ol elda oli mas welkamem hem. (Josua 20:4) Samtaem biaen, bambae oli sanem hem i gobak long ol elda long taon ya we aksiden i hapen, blong oli faenemaot sipos man ya i minim blong kilim narafala i ded no i wan aksiden nomo. (Ridim Namba 35:24, 25.) Sipos i wan aksiden, bambae oli sanem hem i gobak long taon blong haed.
?Yu Stap Go Haed Long Jehova?
13 Taem man i kasem wan taon blong haed, hem i sef. Jehova i talem se: ‘Man ya i save haed long wan long ol taon ya.’ (Josua 20:2, 3) Jehova i no talem se oli mas mekem kot long hem bakegen, nogat. Mo tu, famle blong dedman i no save kam insaed long taon ya blong kilim hem i ded. Hem i sef from we Jehova i protektem hem. Hem i no olsem wan prisena, be hem i save wok, givhan long ol narafala, mo wosipim Jehova. !Hem i save gat wan gudfala laef we i glad mo i gat pis!
Ol Gudgudfala Samting
Wan Ransom We i Stret Long Evriwan
13 Adam mo Iv i no kasem blesing from ransom. Loa blong Moses i talem se: “Yufala i no mas tekem ransom from laef blong wan man we i mas ded.” (Namba 35:31) Setan i no trikim Adam, be Adam nomo i jusum blong mekem sin. (1 Timoti 2:14) Hemia i olsem we hem i kilim i ded olgeta pikinini blong hem, from we naoia olgeta tu oli gat sin mo oli mas ded from. Taswe, i stret nomo we Adam i ded from we hem i stret gud be i jusum blong no obei long loa blong God. Sipos Jehova i letem blong Adam i kasem blesing from ransom, hemia bambae i go agensem ol stret rul blong Jehova. !Be from we Adam i kasem panis finis from sin blong hem, naoia ol pikinini blong hem oli save kasem blesing from ransom! (Rom 5:16) Taswe folem loa, Jehova i katemaot panis blong sin ya long stat. From samting ya, man we i givim laef blong hem olsem ransom “long bihaf blong evri man,” i mekem se ol pikinini we oli kamaot biaen long Adam oli kam fri long sin.—Hibru 2:9; 2 Korin 5:21; 1 Pita 2:24.
31 MEI–6 JUN
OL SAS SAMTING LONG BAEBOL | DUTRONOME 1-2
“Jajmen i Kamaot Long God”
Jehova—Wan God We i Laekem Fasin We i Stret Mo Stret Fasin Blong Jajem Man
Ol elda we tabu spirit i putumap long kongregesen, oli mas jajem man we i mekem bigfala sin. (1 Korin 5:12, 13) Taem oli jajem hem, oli tingbaot se stret fasin blong God blong jajem man, i blong soem sore taem i nidim blong mekem olsem. Sipos i no gat risen blong soem sore—olsem taem wan man i no wantem tanem tingting from sin blong hem—oli no save soem sore. Be taem ol elda oli sakemaot man ya long kongregesen, hemia i no from we oli wantem givimbak long hem. Oli hop se fasin ya we oli sakemaot hem, bambae i mekem hem i tanem tingting blong hem. (Skelem wetem Esikel 18:23.) Aninit long Kraes we i olsem hed, ol elda oli wok blong mekem stret fasin i stap, mo samting ya i minim tu se oli olsem “wan ples blong haed long hem taem i gat bigfala win.” (Aesea 32:1, 2) From samting ya, oli mas mekem i stret long evriwan mo oli no mas mekem i strong tumas long narafala.—Dutronome 1:16, 17.
Stap Tru Mo Obei Long Olgeta We God i Putumap
4 Jaj i mas gat save long saed blong Loa, be i gat plante moa samting tu we oli joen wetem wok blong hem. Ol olfala ya oli no stret gud olgeta. Taswe, oli mas lukaot gud blong stretem eni fasin we maet i mekem se oli no jajem gud ol man. Hemia ol fasin olsem, fasin blong tingbaot olgeta fastaem, fasin blong mekem i moa gud long samfala i bitim ol narafala, mo fasin blong wantem plante tumas samting. Moses i talem long olgeta se: “Bambae yufala i no mas mekem wan fasin long wan man, mo narafala fasin long narafala man, yufala i mas jajem evri man long sem fasin, from we toktok we bambae yufala i talem i no kamaot long yufala, i kamaot long God nomo.” Yes, ol jaj long Isrel oli stap wok long nem blong God. !Hemia wan nambawan blesing we oli mas tinghevi long hem!—Dutronome 1:16, 17.
Ol Gudgudfala Samting
Yumi Save Trastem Ol Tok Blong Jehova
9 Taem ol man Isrel oli rere blong wokbaot long draeples blong 40 yia, Jehova i no eksplenem long olgeta se bambae hem i lidim olgeta olsem wanem, mo bambae i lukaot long olgeta olsem wanem. Be hem i mekem plante samting blong soemaot long olgeta se sipos oli trastem hem mo oli obei long ol tok blong hem, bambae oli kasem blesing. Long dei, hem i lidim olgeta wetem wan klaod mo long naet wetem faea. Long rod ya, hem i mekem ol man Isrel oli tingbaot se hem i stap givhan long olgeta. (Dut. 1:19; Eks. 40:36-38) Mo hem i givim evri samting we oli nidim. “Oli no sot long wan samting nating. Klos blong olgeta i no brobrok, mo leg blong olgeta i no soa, i no solap.”—Neh. 9:19-21.
7-13 JUN
OL SAS SAMTING LONG BAEBOL | DUTRONOME 3-4
“Ol Loa Blong Jehova Oli Stret Mo Oli Waes”
it-2 1140 ¶5
Kasemsave
Man we i stadi gud mo i folemgud Tok blong God, hem i save kam waes moa i bitim ol tija blong hem mo i kasemsave samting moa i bitim olgeta we oli olfala moa long hem. (Sam 119:99, 100, 130; skelem wetem Lu 2:46, 47.) Hemia from we waes mo fasin blong kasemsave samting, oli stanap long ol rul mo ol stret fasin blong God. Taswe, taem ol man Isrel oli folemgud ol rul blong God, ol nesen raonabaot oli luk olgeta se “oli waes mo oli naf blong kasem save long ol samting.” (Du 4:5-8; Sam 111:7, 8, 10; skelem wetem 1Ki 2:3.) Man we i kasemsave samting, i luksave se Tok blong God i tabu mo i wantem folem long laef blong hem, mo i askem long God blong i halpem hem. (Sam 119:169) Hem i letem Tok blong God i go dip insaed long hat blong hem (Mt 13:19-23), i raetemdaon ol tok ya long hat blong hem (Pro 3:3-6; 7:1-4), mo i lanem blong “no laekem nating rod we i no stret” (Sam 119:104). Taem Jisas i stap long wol, hem i soem se hem i kasemsave ol samting ya taem hem i rere nomo blong ded, blong mekem ol tok blong Baebol oli kamtru.—Mt 26:51-54.
Taem Fasin Blong Givim i Kam Bigwan
From we kwin ya i sapraes tumas long samting we hem i harem mo we i luk, hem i talem, wetem tingting daon se: “Ol woman blong yu mo ol man blong wok blong yu oli laki tumas we oli stap wetem yu oltaem, nao oli gat gudfala janis blong harem ol waestok blong yu.” (1 King 10:4-8) Kwin i no talem se ol man blong wok blong Solomon oli hapi from we oli stap long wan naesfala ples—nating se samting ya i tru. Be, ol man blong wok blong Solomon oli haremgud from we oltaem oli save harem ol waestok we God i givim long Solomon. Kwin blong Seba i soem wan gudfala eksampol long ol man blong Jehova tede, we oli stap haremgud from waes we God hem wan mo Pikinini blong hem, Jisas Kraes, tufala i stap givim!
Mo tu, makem narafala tok we kwin i talem long Solomon: “!Mi mi presem Hae God ya we i God blong yu!” (1 King 10:9) Kwin i luksave klia se Jehova nomo i bin givim waes long Solomon wetem olgeta sas samting we hem i gat. Samting ya i laenap wetem promes we Jehova i bin mekem longtaem bifo, long ol man Isrel. Sipos oli ‘obei long ol loa blong hem,’ God i talem se hemia “i soemaot long ol man blong ol narafala kantri we yufala i waes. Nao taem oli harem nius blong ol loa ya, bambae oli save talem se, ‘!Tru, ol laen blong Isrel ya oli gat save! !Olgeta oli waes we oli waes!’”—Dutronome 4:5-7.
?Yu Yu ‘Rijman Long Fes Blong God’?
13 Taem Jehova i mekem i gud, no i blesem, ol man blong hem, hem i givim samting we i beswan oltaem. (Jemes 1:17) Eksampol, kantri ya we Jehova i givim long ol man Isrel blong oli stap long hem, hem i wan kantri we ‘graon blong hem i gudfala tumas, mo ol kakae i save gru gud long hem.’ I tru se kantri blong Ijip tu i gat gudfala graon, be i gat wan samting we i mekem kantri ya we Jehova i givim long ol man Isrel i defren long Ijip. Moses i talem long ol man Isrel se, Jehova God ‘i stap lukaot long kantri ya.’ Tok ya i soemaot se ol man Isrel bambae oli gat gudfala laef long ples ya from we Jehova nao bambae i lukaot long olgeta. Sipos ol man Isrel oli obei long Jehova, bambae hem i blesem olgeta bigwan mo bambae oli harem gud long wan laef we i nambawan moa i bitim ol nesen raonabaot. Yes, blesing blong Jehova nomo i stap mekem ‘man i kam rijman.’—Namba 16:13; Dutronome 4:5-8; 11:8-15.
Ol Gudgudfala Samting
Ol Bigfala Poen Long Buk Blong Dutronome
4:15-20, 23, 24—?Taem God i talem se i tabu blong wokem ol aedol, hemia i min tu se i rong blong mekem pija blong enikaen samting, nating se pija ya i blong flasem haos nomo? No, i no minim olsem. God i talem se i tabu blong wokem ol pija blong mekem wosip long olgeta. God i no wantem we ol man Isrel ‘oli go mekem wosip long ol samting ya.’ Baebol i no talem se i tabu blong wokem no pentem sam pija, sipos pija ya i blong flasem wan ples nomo.—1 King 7:18, 25.
14-20 JUN
OL SAS SAMTING LONG BAEBOL | DUTRONOME 5-6
“Trenem Pikinini Blong i Lavem Jehova”
Papa Mama—Givim Samting We Famle Blong Yu i Nidim
11 Long saed ya, ating i gat wan vas blong Baebol we plante taem yumi tokbaot, hemia Dutronome 6:5-7. Plis openem Baebol blong yu mo ridim ol vas ya. Makem gud we fastaem ol papa mama nao oli mas wokem fasin fren blong olgeta wetem Jehova. Oli mas lavem Jehova mo tinghevi long ol tok blong hem. Yes, papa mo mama, yu yu mas wan man blong stadi long Baebol we yu tinghevi long fasin ya. Yu mas ridim Baebol evri dei mo tingting dip long hem blong mekem se yu kasem stret save long ol tingting blong Jehova, ol rul mo ol loa blong hem, mo blong yu lanem tu blong lavem ol samting ya. Taem yu mekem olsem, yu stap fulumap hat blong yu wetem ol nambawan trutok blong Baebol, we biaen bambae oli mekem yu yu harem se yu hapi, yu ona long Jehova, mo yu lavem hem. Nao bambae yu yu gat plante plante gudfala samting blong givim long ol pikinini blong yu.—Luk 6:45.
?Olsem Wanem Mi Save Tijim Gud Pikinini Blong Mi?
Ol plan, tingting, mo ol samting we yu laekem, oli no kamaot long ol toktok blong yu nomo be oli kamaot tu long ol aksen blong yu. (Rom 2:21, 22) Stat taem pikinini i smol nomo, hem i lanem ol samting taem i lukluk papa mama. Taem pikinini i luk samting we papa mama i luk se i impoten, olgeta tu bambae oli luk ol samting ya se oli impoten taem oli kam yangfala. Sipos yu rili lavem Jehova, bambae ol pikinini tu oli luksave samting ya. Eksampol, bambae oli luk se yu laekem blong ridim Baebol mo stadi long hem. Bambae oli luksave se yu putum Kingdom i stap fasples long laef blong yu. (Matiu 6:33) Taem yu go oltaem long ol miting mo wok blong prij, yu stap soemaot long olgeta se wosip blong yu long Jehova, hemia nao impoten samting long laef blong yu.—Matiu 28:19, 20; Hibru 10:24, 25.
Papa Mama—Givim Samting We Famle Blong Yu i Nidim
14 Olsem Dutronome 6:7 i soem, i gat plante defdefren taem we yufala ol papa mama i save tokbaot ol samting long saed blong spirit wetem ol pikinini blong yufala. Taem yufala i stap wokbaot i go long narafala ples, taem yufala i stap mekem ol wok tugeta, no taem yufala i stap spel nomo, yufala i gat janis blong givim samting we pikinini blong yufala i nidim long saed blong spirit. Be hemia i no min se yufala i “tok” long pikinini blong yufala oltaem long saed blong ol trutok blong Baebol. Defren olgeta, traem mekem we ol storian long famle oli leftemap tingting mo oli save bildimap bilif blong wanwan memba. Eksampol, ol stori insaed long Wekap! oli tokbaot fulap defdefren samting. Ol stori ya oli save openem rod long yumi blong storebaot ol animol we Jehova i wokem, sam naesfala ples long wol blong yumi, mo ol defdefren kaen kalja mo fasin blong laef blong ol man long nara kantri. Taem yumi storebaot ol samting ya we yumi ridim, yumi save pulum ol yangfala blong olgeta tu, blong oli wantem ridim ol buk blong slef we i stret mo waes.—Matiu 24:45-47.
Ol Gudgudfala Samting
Lav Mo Stret Fasin Long Isrel Bifo
11 Ol lesen we yumi lanem: Jehova i no luk fes mo bodi blong yumi nomo. Be hem i luk insaed long tingting mo hat blong yumi. (1 Saml. 16:7) Yumi no save haedem wan tingting o filing long hem. Hem i luk ol gudfala fasin blong yumi, mo i wantem se yumi kam gud moa yet. Be hem i wantem tu se yumi faenemaot ol nogud tingting ya, mo yumi bos long olgeta, bifo we oli pulum yumi blong mekem ol nogud samting.—2 Kron. 16:9; Mat. 5:27-30.
21-27 JUN
OL SAS SAMTING LONG BAEBOL | DUTRONOME 7-8
“Yu No Mas Mekem Eni Agrimen Blong Mared Wetem Olgeta”
?From Wanem God i Wantem Se Ol Man Blong Hem Oli Mared Nomo Long Ol Man We Oli Wosipim Hem?
Jehova i save se Setan i wantem spolem ol man blong hem, taem i pulum olgeta blong wosipim ol giaman god. Taswe God i givim woning long ol man Isrel, from we hem i save se samting ya bambae i spolem olgeta. Hem i se ol man ya we oli no bilif “bambae oli pulum ol boe blong yu oli gowe long mi, mo oli go wosipim ol narafala god.” Sipos nesen blong Isrel i wosipim ol narafala god, bambae Jehova i no moa glad mo protektem olgeta, mo bambae i isi blong ol enemi oli kam spolem olgeta. Sipos i olsem, bambae i had blong Mesaea we God i promes blong i kam, i kamaot long nesen blong Isrel. Taswe, i klia se hemia wan risen from wanem Setan i traem pulum olgeta blong maredem ol man blong narafala nesen.
Mared Long Wan “Man Blong Masta” ?Advaes Ya i Gud Yet?
Long Baebol, Jehova i talem se, yumi mas mared long man blong masta nomo. ?From wanem? Hemia from we hem i save samting we i stret long yumi, mo hem i wantem protektem yumi. Hem i no wantem se yumi mekem wan nogud desisen, we bambae i mekem yumi harem nogud. Long taem blong Nehemaea, plante man Jiu oli mared long ol woman we oli no wosipim Jehova. Taswe, Nehemaea i tokbaot rabis eksampol blong Solomon. Hem i talem se, ‘God i lavem Solomon, i putumap hem i kam king blong olgeta laen blong Isrel. Be ol woman afsaed nao oli pulum King Solomon blong i foldaon long rabis fasin ya.’ (Nehemaea 13:23-26) Jehova i save se ol advaes blong hem oli save givhan long yumi, from samting ya hem i talem long yumi ol Kristin blong mared long man blong Masta nomo. (Ol Sam 19:7-10; Aesea 48:17, 18) Yumi glad tumas long ol gudfala advaes we hem i givim long yumi, we oli kaen mo yumi save trastem. Taem yumi obei long Jehova olsem King blong yumi, hemia i soemaot se yumi agri blong letem hem i talem long yumi, samting we yumi mas mekem.—Ol Proveb 1:5.
Yu Jusum Gud Ol Fren Blong Yu Long Ol Lasdei Ya
12 Ol Kristin oli mas jusum gud man no woman we oli wantem mared long hem. Baebol i givim woning ya se: “Bambae yufala i no go joen wetem ol man we oli no Kristin, blong mekem wan wok, olsem we man i putum yok long tufala buluk blong mekem tufala i wok wanples. Fasin ya i no save wok. Stret fasin mo rabis fasin, tufala i no save joen nating, mo delaet mo tudak, tufala i no save stap wanples.” (2 Korin 6:14) Baebol i talem se ol man blong God oli mas mared nomo long “man blong Masta.” Hemia i min se man no woman ya i mas givim laef blong hem finis long Jehova mo i baptaes, mo i stap folem ol rul blong Jehova. (1 Korin 7:39) Taem yu mared long wan man we i lavem Jehova, bambae hem i givhan long yu blong yu gohed blong holemstrong long God.
Ol Gudgudfala Samting
Jehova i Givim Samting We Yumi Nidim Evri Dei
4 Prea ya we i blong askem kakae blong wan dei i mekem yumi tingbaot tu se yumi nidim kakae long saed blong spirit evri dei. Taem Jisas i no kakae blong plante dei mo i hanggri gud, Setan i traem pulum hem blong tanem ston i kam bred, be Jisas i no foldaon long trap ya. Jisas i stanap strong i se: “Baebol i talem se, ‘Man i no save laef long kakae nomo. Evri tok we God i talem, hemia nao samting blong mekem man i laef.’” (Matiu 4:4) Long ples ya Jisas i yusum ol tok blong Moses we hem i bin talem long ol man Isrel se: “[Jehova] i mekem we yumi gat hadtaem blong kasem kakae, mo hem i givim kakae ya mana long yumi blong yumi kakae. Be kakae ya, yumi ya wetem ol bubu blong yumi bifo, neva yumi luk. Hem i mekem olsem blong tijim yumi we kakae nomo i no save mekem man i laef. Evri tok we hem i talem, hemia nao i save mekem man i laef.” (Dutronome 8:3) Taem Jehova i stap mekem merikel blong givim mana long ol man Isrel, hem i mekem se oli gat kakae evri dei, be tu, hem i stap tijim olgeta long sam samting long saed blong spirit. Wan tijing we oli kasem, hemia se oli mas “pikimap kakae blong [olgeta] we i naf blong wan dei nomo.” Sipos oli pikimap moa i bitim we i naf blong wan dei, haf ya we i stap bambae i sting mo i gat fulap maget long hem. (Eksodas 16:4, 20) Be, long namba sikis dei, we nekis dei blong hem i Sabat dei, oli mas pikimap mana we i naf blong tu dei, be mana ya i no sting. (Eksodas 16:5, 23, 24) Taswe, mana ya i makem gud long tingting blong olgeta se oli mas obei, mo se laef blong olgeta i no dipen long kakae nomo be i dipen long ‘evri tok we Jehova i talem.’
28 JUN–4 JULAE
OL SAS SAMTING LONG BAEBOL | DUTRONOME 9-10
“?Jehova i Askem Wanem Long Yu?”
?Jehova i Askem Wanem Long Yumi?
?Wanem i save pulum yumi blong obei long God? Moses i tokbaot risen, i se: “Fraet long Jehova we i God blong yu.” (Vas 12) Hemia i no minim fraet blong kasem trabol, be i wan gudfala fraet we man i tinghevi long God mo i respektem ol rul blong hem. Sipos yumi gat bigfala respek long God bambae yumi no wantem mekem hem i harem nogud.
?Wanem stamba risen we i mas pulum yumi blong wantem obei long God? Moses i talem se: “Yu lavem [Jehova] . . . yu mekem wosip long Jehova we i God blong yu long olgeta hat blong yu mo olgeta sol blong yu.” (Vas 12) Lav blong God i no stanap nomo long ol filing. Wan buk i eksplenem se: “Hibru veb we oli yusum blong tokbaot ol filing, samtaem i save minim tu ol aksen we oli kamaot from ol filing ya.” Sem buk ya i talem se blong lavem God hemia i min se yumi mas “mekem samting blong soemaot lav” long hem. Yes sipos yumi rili lavem God, bambae yumi mekem ol samting we hem i glad long hem.—Ol Proveb 27:11.
?Jehova i Askem Wanem Long Yumi?
Sipos yumi glad blong obei, bambae yumi kasem ol blesing. Moses i raetem se: “Yu mas holemtaet ol komanmen . . . we mi mi stap talemaot long yu tede.” (Vas 13) Yes, evri komanmen blong Jehova—evri samting we hem i askem long yumi—oli blong mekem i gud long yumi. Hemia i tru from we Baebol i se “God hem i lav.” (1 Jon 4:8) Taswe, ol komanmen we hem i givim, oli blong mekem i gud long yumi blong olwe. (Aesea 48:17) Taem yumi folemgud olgeta samting we Jehova i askem long yumi blong mekem, bambae yumi blokem plante trabol naoia mo kasem plante blesing long fiuja aninit long Kingdom blong hem.
cl 16 ¶2
?I Tru Se Yu Save “Kam Klosap Long God”?
2 Ebraham i wan long ol man we i haremgud blong stap klosap long God, mo Jehova i singaot hem se “fren blong mi.” (Aesea 41:8) Yes, Jehova i luk Ebraham olsem gudfala fren blong hem, hemia from we Ebraham “i bilif long Jehova.” (Jemes 2:23) Tede tu, Jehova i lukaot rod blong “kam klosap” long olgeta we oli mekem wok blong hem from we oli lavem hem. (Dutronome 10:15) Baebol i se: “Yufala i mas kam klosap long God, nao hem bambae i kam klosap long yufala.” (Jemes 4:8) Ol toktok ya oli wan invetesen mo wan promes we i kam long Jehova God.
Ol Gudgudfala Samting
it-1 103
Ol Laen Blong Anak
Wan laen blong ol bigbigfala man we oli laef long rijen blong ol hil blong Kenan mo long ol eria klosap long solwota long saed i go long saot. I bin gat wan taem we ol trifala man ya, Ahiman, Sesae, mo Talmae, we oli kamaot long ol laen blong Anak oli stap long Hebron. (Na 13:22) Hemia nao ples we ol 12 spae blong Isrel oli luk ol laen blong Anak blong fastaem, mo 10 long ol spae ya oli givim wan ripot we i mekem ol man Isrel oli fraet, oli talem se ol man ya oli ol laen blong Nefilim, mo taem ol man Isrel oli skelem olgeta wetem ol man ya, oli luk se olgeta oli “olsem grasopa nomo.” (Na 13:28-33; Du 1:28) From we ol laen blong Anak oli ol bigbigfala man, ol man Isrel oli talem se oli sem mak olsem ol man Emim mo Refaem. Mo from we oli strong, ol man oli stap tokbaot olgeta se: “?Hu i save winim ol boe blong Anak?”—Du 2:10, 11, 20, 21; 9:1-3.
3-9 MEI 2020,
Mekem Ol Sakrefaes We God i Glad Long Olgeta
Buk ya The Mighty Aztecs i talem se: “Ol Astek oli bilif se laef i gohed nomo afta ded. Taswe long Mesoamerica, olgeta nao oli kilim plante moa man blong mekem sakrefaes.” Buk ya i gohed se: “Taem rul blong olgeta i stap kam bigwan moa, oli sakrefaesem plante moa man blong mekem ol man oli trastem rul blong olgeta.” Wan narafala buk i talem se long wan yia nomo, ol Astek oli sakrefaesem 20,000 man.
Stat bifo i kam, ol man oli mekem sakrefaes long ol god blong olgeta, maet from we oli fraet, mo oli no sua o oli gilti, mo oli rigret from nogud samting we oli bin mekem. Be Baebol i soemaot se i gat sam sakrefaes we Hae God Jehova i askem long ol man blong oli mekem. Taswe i stret nomo we yumi askem se: ?Wanem sakrefaes nao we God i glad long hem? ?Tede yumi mas givim ofring mo mekem sakrefaes olsem wan haf blong wosip?
Ol Ofring Mo Sakrefaes Long Tru Wosip
Taem Nesen blong Isrel i stat, Jehova i talem stret samting we ol man Isrel oli mas mekem blong wosipim mo hemia i inkludum ol ofring mo sakrefaes we oli mas givim. (Namba, japta 28 mo 29) Sam long ol ofring ya hemia ol kakae blong garen, mo sam narafala hemia sakrefaes blong ol animol olsem bul, sipsip, nani, pijin, mo sotleg. (Levitikas 1:3, 5, 10, 14; 23:10-18; Namba 15:1-7; 28:7) I gat ol ofring we oli mas bon fulwan long faea. (Eksodas 29:38-42) Mo tu, i gat ol sakrefaes blong pis, we olgeta we oli mekem ol sakrefaes ya oli save kakae haf sakrefaes ya we oli givim i go log God.—Levitikas 19:5-8.
Evri ofring mo sakrefaes we ol man oli mekem folem Loa Blong Moses, hem i wan wei blong wosipim God mo oli luksave hem olsem Hae Masta blong yunives. Ol sakrefaes ya we ol man Isrel oli mekem, oli wan rod blong talem tangkiu long Jehova from ol blesing mo proteksen blong hem, be tu blong hem i save fogivim ol sin blong olgeta. Sipos oli gohed blong obei gud long ol samting we Jehova i talem long saed blong wosip, bambae hem i blesem olgeta bigwan.—Ol Proveb 3:9, 10.
Samting we i moa impoten long Jehova, hemia fasin blong ol man we oli givim sakrefaes ya. Tru long profet Hosea, Jehova i talem se: “Mi mi glad long fasin ya blong lavem man oltaem, mo mi glad long save blong God, be i no ol ofring we oli bon fulwan.” (Hosea 6:6) From samting ya, taem ol man oli tanem baksaed long tru wosip mo oli stap mekem ol samting blong sem, mo oli kilim ded man we i no gat fol, ol sakrefaes we oli mekem i go long Jehova oli blong nating nomo. Taswe, Jehova i yusum Aesea blong talem long nesen blong Isrel se: “?Ol sakrefaes blong yufala oli mekem i gud long mi olsem wanem? Mi mi taed finis long ol ofring blong ol man sipsip mo ol gris blong ol animol we i fatfat gud, we yufala i bonem fulwan i kam long mi, mo mi mi no glad nating long blad blong ol yang bul mo ol yang sipsip mo ol nani.”—Aesea 1:11.
17-23 MEI,
w09 10/1 30, bokis
OL WO WE GOD I BLESEM
Nesen blong Isrel, hem i wan nesen nomo we God i jusumaot bifo we Kristianiti i kamtru. Samtaem hem i talem long olgeta blong tekem ol ami oli kam wanples mo oli go faet. Bifo we ol man Isrel oli go insaed long kantri ya Kenan, we God i promes blong givim long Ebraham, Moses i talem long olgeta se: “Jehova we i God blong yu bambae i putum olgeta [seven nesen] long han blong yu, mo bambae yu winim olgeta. Yu mas kilim olgeta evriwan oli ded. Yu no mas mekem eni kontrak wetem olgeta mo yu no mas mekem i gud long olgeta.” (Dutronome 7:1, 2) Taswe, Josua we i lidim ol man Isrel long taem ya, i winim ol nesen ya “stret olsem we Jehova God blong Isrel i talem long hem.”—Josua 10:40.
?Olsem wanem? ?Ol man Isrel oli strong tumas mo oli griri, taem oli winim ol kantri ya mo tekem i blong olgeta? Nogat. Ol nesen ya oli stap wosipim plante aedol, oli kilim i ded plante man, mo oli mekem enikaen doti fasin blong seks. Iven oli sakrefaesem ol pikinini blong olgeta long faea. (Namba 33:52; Jeremaea 7:31) From we God i tabu, i gat jastis, mo i lavem ol man blong hem, hem i mas tekemaot olgeta samting we i mekem kantri ya i doti. Be long semtaem, Jehova i stap lukluk hat blong olgeta man, mo i sevem olgeta we oli tanem baksaed long ol doti samting mo oli wantem wosipim hem. Tede i no gat wan komanda blong ami we i save mekem olsem.