Refrens Blong Kristin Wok Mo Laef Miting Wokbuk
2-8 MEI
OL SAS SAMTING LONG BAEBOL | 1 SAMUEL 27-29
“Plan Blong Faet Blong Deved”
it-1 41
Akis
Long tufala taem we Deved i stap ronwe long Sol, hem i go haed long eria blong King Akis. Long faswan taem, oli ting se hem i wan enemi, be Deved i giaman se hem i krangke, mo Akis i letem hem i go from i talem se hem i wan krangke man. (1Sa 21:10-15; Sam 34:Sup; 56:Sup) Long seken taem, Deved i go wetem 600 strong man blong faet, wetem ol famle blong olgeta, mo Akis i givim ples ya Jiklag blong oli stap long hem. Blong wan yia mo fo manis we Deved mo ol man blong hem oli stap long ples ya, Akis i ting se Deved i stap go mekem faet long ol taon blong Judia, be rili se Deved i stap go faet agensem ol man Gesuru, Girisi, mo Amalek. (1Sa 27:1-12) Plan blong Deved blong trikim Akis i wok gud, mo hem i putumap Deved i kam bodigad blong hem taem ol man Filistia oli mekem plan blong atakem King Sol, be biaen “ol rula” blong ol man Filistia oli talem long Akis se hem i mas sanem Deved mo ol man blong hem oli gobak long Jiklag. (1Sa 28:2; 29:1-11) Taem Deved i kam king mo i go faet agensem Gat, i luk olsem se oli no kilim Akis i ded, mo hem i laef kasem taem we Solomon i rul.—1Ki 2:39-41.
Yang Man—?Olsem Wanem Blong Winim Tras Blong Ol Narafala?
8 Tingbaot wan narafala jalens we Deved i fesem. Afta we oli makemaot hem blong i kam king, hem i mas wet plante yia bifo we hem i rul long Juda. (1 Saml. 16:13; 2 Saml. 2:3, 4) Long ol yia ya, ?wanem i halpem hem blong i wet wetem longfala tingting? Deved i fokas long samting we hem i save mekem, i bitim we tingting blong hem i foldaon nao i no mekem wan samting. Eksampol, taem hem i stap haed long teritori blong ol man Filistia, hem i tekem janis ya blong faet agensem ol enemi blong Isrel. Taem hem i mekem olsem, hem i stap protektem ol boda blong teritori blong Juda.—1 Saml. 27:1-12
it-2 245 ¶6
Giaman
Nating se Baebol i agensem fasin ya blong giaman, be hemia i no min se wan man i mas talemaot evri infomesen long wan man we i no gat raet blong save. Jisas Kraes i talem se: “Yufala i no givim samting we i tabu i go long ol dog, mo yufala i no sakem ol perel blong yufala i go long ol pig, from we bambae oli purumbut nomo long olgeta, mo biaen oli tanraon, oli terterem yufala.” (Mt 7:6) Hemia nao from wanem samtaem Jisas i no givim evri infomesen o stret ansa long sam kwestin, taem hem i save se hemia i save mekem trabol i kamaot. (Mt 15:1-6; 21:23-27; Jon 7:3-10) Ebraham, Aesak, Rehab, mo Elisa oli mekem olsem, oli haedem o no talemaot sam infomesen long ol man we oli no wosipim Jehova, mo yumi save folem eksampol blong olgeta.—Je 12:10-19; jap 20; 26:1-10; Jos 2:1-6; Jem 2:25; 2Ki 6:11-23.
Ol Gudgudfala Samting
?Dedman i Save Halpem Man We i Laef?
Baebol i talem se taem man i ded “hem i gobak long graon” mo se “ol tingting blong hem oli finis.” (Ol Sam 146:4) Sol mo Samuel oli savegud se God i agensem fasin ya blong toktok wetem ol dedman. !Be Sol i traem blong toktok wetem spirit blong dedman!—Levitikas 19:31.
Traem tingbaot. Sipos Samuel i stap laef yet, ?yu ting se bambae hem i brekem loa blong God, mo i go luk wan kleva blong traem mekem hem i toktok wetem Sol we i ded finis? Jehova i no wantem blong toktok wetem Sol. ?Taswe yu ting se wan kleva i save fosem God Ya We i Gat Paoa blong toktok wetem Sol tru long Samuel we i ded finis? Nogat. I klia se hemia i no “Samuel” we i gudfala profet blong God, be hem i wan rabis spirit we i mekem olsem se hem nao i Samuel ya we i ded finis.
9-15 MEI
OL SAS SAMTING LONG BAEBOL | 1 SAMUEL 30-31
“Jehova Bambae i Mekem Yu Kam Strong Bakegen”
!Fraet Long Jehova Mo Stap Glad!
12 Deved i fraet long Jehova, nao fasin ya i blokem hem blong i no mekem i rong. Be i no hemia nomo. Taem Deved i fesem trabol, fraet long Jehova i mekem tingting blong hem i strong blong girap mo tekem aksen we i waes. Taem Sol i stap ronem Deved, Deved mo ol man blong hem oli haed wan yia fo manis, long taon ya Jiklag we i ples blong ol man Filistia. (1 Samuel 27:5-7) Wan dei, Deved mo ol man blong hem oli no stap, nao ol man Amalek oli kam bonem taon ya. Oli karem waef mo ol pikinini blong Deved i go, wetem ol waef mo pikinini blong ol man blong hem, mo ol animol blong olgeta tu. Taem Deved mo ol man blong hem oli kambak, oli luk samting we ol man Amalek oli mekem, nao oli krae. Biaen, ol man blong Deved oli kros long hem mo oli wantem stonem hem. Deved i harem nogud tumas, be hem i no lusum hop. (Ol Proveb 24:10) Hem i fraet long God, nao from samting ya, hem i lukluk i go long Jehova mo ‘Jehova i mekem tingting blong hem i kam strong bakegen.’ Ale God i givhan long Deved mo ol man blong hem blong oli ronem ol man Amalek, oli kasem olgeta, mo oli tekembak evri samting we oli bin stilim.—1 Samuel 30:1-20
Jehova i Lukaot Gud Long Yumi Blong Sevem Yumi
14 Deved i kasem plante hadtaem long laef blong hem we i mekem hem i harem nogud. (1 Saml. 30:3-6) Baebol i soemaot we Jehova i save se Deved i harem olsem wanem. (Ridim Ol Sam 34:18; 56:8.) Jehova i save tu se yumi harem olsem wanem. Yumi mas tingbaot se Jehova i save we tingting blong yumi “i kam nogud” mo “i foldaon olgeta.” Bambae hemia i leftemap tingting blong yumi, sem mak olsem we i leftemap tingting blong Deved. Deved i singsing se: “Bambae mi mi hapi, mi glad tumas, from fasin ya blong yu we oltaem yu lavem man tumas. Taem mi mi harem nogud, be yu yu luk, mo taem mi mi stap long trabol, be yu yu save.” (Sam 31:7) Be Jehova i no stap tingbaot ol trabol blong yumi nomo. Hem i leftemap tingting blong yumi mo i mekem yumi harem gud bakegen, blong yumi stanap strong. Hem i yusum ol Kristin miting blong mekem olsem.
Ol Gudgudfala Samting
Ol Bigfala Poen Long Buk Blong Fas Samuel
30:23, 24. Desisen ya we i stanap long Namba 31:27 i soemaot se, long lukluk blong Jehova, olgeta we oli mekem ol wok blong givhan long narafala insaed long kongregesen, oli sas tumas. Long wanem wok we yumi mekem, be i gud yumi ‘mekem long gladhat blong yumi, olsem we yumi stap wok blong Masta blong yumi, yumi no stap wok blong ol man nomo.’—Kolosi 3:23.
16-22 MEI
OL SAS SAMTING LONG BAEBOL | 2 SAMUEL 1-3
“?Yumi Lanem Wanem Long ‘Bonara’?”
Ona Long Olgeta We Oli Gat Raet Blong Lidim Yumi
9 ?Deved i harem nogud, from we ol man oli mekem nogud long hem? Hem i krae long Jehova se: “Ol raf man oli stap traem blong kilim mi.” (Ol Sam 54:3) Hem i talemaot long Jehova, olgeta samting we i stap long hat blong hem, i se: “God blong mi, plis yu sevem mi, blong ol enemi blong mi oli no spolem mi. . . . Ol rabis man ya oli stap go wanples, oli agens long mi, nao oli stap wet blong kilim mi. Olgeta oli ron kwik blong mekemrere blong faet, be i no from wan rong blong mi, i no from wan samting nogud we mi mi mekem.” (Ol Sam 59:1-4) ?Yu yu harem olsem Deved samtaem, we yu no mekem i rong long wan haeman, be man ya i gohed nomo blong mekem trabol long yu? Deved i neva lego fasin blong soem respek long Sol. Taem Sol i ded, Deved i no jamjam from glad, be hem i raetem wan singsing blong soemaot sore blong hem. Hem i se: “King Sol mo Jonatan, tufala i gud tumas, mo ol man oli laekem tufala tumas . . . Tufala i save ron kwik winim bigfala pijin ya namala, mo tufala i strong winim laeon. !Ol woman Isrel! !Yufala i krae from King Sol!” (2 Samuel 1:23, 24) !Hemia wan nambawan eksampol blong soem trufala respek long wan we Jehova i jusumaot, nating se Sol i no mekem i stret long Deved!
Man i Spolem Fren Blong Hem, Wan Saen Blong Ol Las Dei
8 Baebol i tokbaot stori blong plante man we oli tru fren. Bambae yumi tokbaot samting we yumi save lanem long stori blong tu man. Faswan hemia Jonatan we i stap tru long Deved. Jonatan i fasbon pikinini boe blong King Sol. Maet hem nao bambae i kam king blong ol man Isrel, afta long Papa blong hem. Be Jehova i jusum Deved blong i kam king. Jonatan i no jalus long Deved. Hem i folem plan we God i mekem. “Hem i laekem Deved we i laekem hem tumas,” mo Jonatan i promes se bambae hem i stap tru long hem. Hem i givim klos blong hem, naef blong faet blong hem, bonara, mo strap blong hem, long Deved. Hemia i blong soemaot se hem i ona long Deved olsem king. (1 Saml. 18:1-4) Jonatan i mekem evri samting we hem i save mekem blong givhan long Deved. Hem i putum laef blong hem long denja taem hem i blokem Deved blong Sol i no kilim hem. Jonatan i wan tru fren. Hem i talem long Deved se: “Yu nao bambae yu kam king blong Isrel, mo . . . mi bambae mi kam nambawan haeman blong yu.” (1 Saml. 20:30-34; 23:16, 17) Yumi no sapraes we afta long ded blong Jonatan, Deved i mekem wan singsing we i talemaot se hem i laekem Jonatan tumas mo i sore long hem.—2 Saml. 1:17, 26.
Ol Gudgudfala Samting
it-1 369 ¶2
Brata
Tok ya “brata” i aplae long ol man we oli joen gud, oli gat sem tingting mo plan. Eksampol, King Hiram blong Taea i singaot King Solomon se brata blong hem, i no from we oli gat sem rang mo posisen nomo, be tu maet from we tufala i gat sem intres blong givim ol timba mo ol narafala samting blong wokem tempol. (1Ki 9:13; 5:1-12) Deved i raetem se: “!Yufala i luk! !I gud tumas mo i naes tumas, taem ol brata oli stap wanples we oli joen gud!” Ol tok ya oli soemaot se eni man i save mekem pis mo oli joen gud nating se oli no ol stret brata. (Sam 133:1) Taswe Deved i singaot Jonatan se brata blong hem, i no from we tufala i gat wan mama mo papa, be from we tufala i lavlavem tufala mo kea long tufala. (2Sa 1:26) Ol man we oli gat ol semfala fasin mo tingting olsem, nating se samtaem oli mekem samting we i no stret, be oli stil singaot olgeta se brata.—Pro 18:9.
23-29 MEI
OL SAS SAMTING LONG BAEBOL | 2 SAMUEL 4-6
“Gohed Blong Fraet Blong No Mekem Jehova i Harem Nogud”
Ol Bigfala Poen Long Buk Blong Seken Samuel
6:1-7. Deved i wantem mekem wan gudfala samting, be hem i brekem loa blong God taem hem i putum Bokis blong Kontrak antap long wan kat we buluk i pulum. Trabol i kamaot from. (Eksodas 25:13, 14; Namba 4:15, 19; 7:7-9) Taem Usaha i holemtaet Bokis ya, hemia i soemaot se, nating we man i mekem samting wetem gudfala tingting, be hemia i no save jenisim loa we God i askem yumi blong folem.
Jehova i Mekem i Stret Oltaem
20 Long saed blong Usaha, hem i mas save gud Loa. Bokis ya i olsem wan saen se Jehova i stap wetem olgeta. Loa i talem klia se i tabu blong man i tajem Bokis ya sipos hem i no gat raet, mo Loa i givim woning se eniman we i mekem olsem bambae i mas ded. (Namba 4:18-20; 7:89) Taswe, ol man Isrel oli mas tinghevi long wok ya blong karem tabu Bokis ya i go long narafala ples. Usaha i wan Livaet (nating se hem i no wan pris), taswe hem i mas save gud Loa ya. Mo tu, plante yia bifo, oli bin tekem Bokis ya i go long haos blong papa blong Usaha, blong hem i lukaotgud long hem. (1 Samuel 6:20–7:1) Bokis ya i stap long ples ya blong 70 yia, nao Deved i tekem desisen blong karem i go long Jerusalem. Taswe, stat long taem we Usaha i pikinini nomo, hem i mas save ol loa long saed blong Bokis ya.
Jehova i Mekem i Stret Oltaem
21 Olsem yumi tokbaot finis, Jehova i save lukluk long tingting blong man. Baebol i talem se Usaha i no “onagud long God.” Maet Jehova i luk wan nogud tingting blong Usaha we Baebol i no talem, olsem, maet Usaha i stap tingbaot hem wan nomo. Ating hem i stap flas, nao hem i ting se i oraet nomo blong hem i brekem ol stret rul lelebet. (Ol Proveb 11:2) Maet hem i praod from we hem i wokbaot fored long ol man blong lidim Bokis ya we famle blong hem i bin lukaot long hem longtaem. (Ol Proveb 8:13) Maet Usaha i sot long bilif, ale hem i ting se Jehova i no naf blong blokem tabu Bokis ya blong i no foldaon long graon. Nating se i olsem wanem, yumi save sua se Jehova i mekem i stret nomo. Ating hem i luk wan nogud fasin long hat blong Usaha, nao hem i givim strong panis ya from.—Ol Proveb 21:2.
Ol Gudgudfala Samting
Oltaem Yu Mas Putum Ol Trabol Blong Yu Long Jehova
Deved we hem i king, i gat sam fol from samting ya we i bin hapen. Fasin blong Deved i soemaot se nating we wan man i gat wan gudfala fasin fren wetem Jehova, be hem i save mekem sam fasin we oli no stret taem hem i fesem ol traem. Fastaem Deved i kam kros. Mo biaen, hem i fraet. (2 Samuel 6:8, 9) Fasin blong hem blong trastem mo fren wetem Jehova i kasem bigfala traem. From we hem i no folem ol oda blong Jehova long taem ya, i luk olsem se hem i no putum ol trabol blong hem long han blong Jehova. ?Ating samting ya i sem mak long yumi samtaem? ?Olsem wanem? ?Yumi stap talem se i fol blong Jehova taem yumi kasem ol trabol from we yumi no folem ol rul blong hem?—Proveb 19:3.
30 MEI–5 JUN
OL SAS SAMTING LONG BAEBOL | 2 SAMUEL 7-8
“Jehova i Mekem Wan Kontrak Wetem Deved”
“Kingdom Blong Yu i Stap Oltaem, Gogo i No Save Finis”
Samting we Deved i wantem mekem i tajem hat blong Jehova. Jehova i wantem mekem i gud long Deved from we Deved i onagud long Hem mo from stamba tingting we Jehova i gat. Ale, God i mekem wan promes wetem Deved se bambae Hem i jusum wan man long laen blong hem, blong bambae i rul gogo i no save finis. Natan i talemaot strong promes ya blong God long Deved se: “Olgeta ya we bambae oli stap kamaot biaen long yu, oltaem bambae mi mekem olgeta oli stap gud, mo bambae mi mekem kingdom blong yu i stap oltaem, gogo i no save finis. Mo oltaem, ol king blong yufala bambae oli stap kamaot long olgeta ya we bambae oli stap kamaot biaen long yu.” (Vas 16) ?Hu ya man long promes ya we bambae i stap blong olwe, mo i rul gogo i no save finis?—Ol Sam 89:20, 29, 34-36.
“Kingdom Blong Yu i Stap Oltaem, Gogo i No Save Finis”
Jisas blong Nasaret i kamaot long laen blong Deved. Taem wan enjel i talemaot se bambae Jisas i bon, hem i se: “Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.” (Luk 1:32, 33) Yes, promes we God i mekem wetem Deved i kamtru long Jisas Kraes. Taswe, i no ol man we oli jusum Jisas blong rul. God nao i mekem wan strong promes we i givim raet long hem blong rul blong olwe. Yumi mas rimemba se ol promes we God i mekem, oltaem oli kamtru.—Aesea 55:10, 11.
Yumi Save Bilif Strong Long Kingdom
14 Jehova i mekem wan promes no wan kontrak wetem Deved, we i king blong Isrel bifo. (Ridim 2 Samuel 7:12, 16.) Jehova i promes se Mesaea bambae i kamaot long laen blong Deved. (Luk 1:30-33) Olsem nao, Jehova i soemaot klia moa, hu olgeta we oli bubu blong Mesaea. Jehova i talem tu se Mesaea we i kamaot long laen blong Deved, bambae i “gat raet” blong kam King long Kingdom. (Esik. 21:25-27, NW) Rul blong King Deved bambae i stap olwe, from we Jisas, we i kamaot long laen blong Deved, ‘bambae i stap king olwe olsem we san i stap oltaem nomo.’ (Sam 89:34-37) !Yumi save gat strong tingting se rul blong Mesaea i no save kam nogud samtaem, mo se ol blesing we oli kamaot from rul ya, bambae oli stap gogo i no save finis!
Ol Gudgudfala Samting
it-2 206 ¶2
Las Dei
Profet Tok Blong Balam. Bifo we ol man Isrel oli go insaed long Promes Lan, profet Balam i talem long King Balak blong Moab se: “Yu kam, bambae mi talemaot long yu ol samting we ol man ya [ol man Isrel] bambae oli mekem long ol man blong yu long en blong ol dei. . . . Wan sta bambae i kamaot long Jekob, mo wan septa bambae i kamaot long Isrel. Mo bambae hem i brebrekem hed blong Moab, mo i smasem bun blong hed blong olgeta boe we oli stap mekem faet.” (Na 24:14-17; fut.) Long faswan haf blong profet tok ya, “sta” ya hemia King Deved, man ya we i winim ol man Moab. (2Sa 8:2) Taswe taem profet tok ya i kamtru, “en blong ol dei” i stat taem Deved i kam king. Mo from we Deved i pija blong Jisas olsem Mesaea King, profet tok ya i aplae tu long Jisas, long taem ya we bambae hem i winim ol enemi blong hem.—Aes 9:7; Sam 2:8, 9.
6-12 JUN
OL SAS SAMTING LONG BAEBOL | 2 SAMUEL 9-10
“Deved i Soem Lav Oltaem”
w06 6/15 14 ¶6
Yes, Yu Save Glad
Deved i raetem se: “Man we i soemaot se i tingbaot ol man we oli no gat nem, hem i glad, Jehova bambae i tekemaot hem, i sevem hem long dei blong trabol. Jehova bambae i lukaot gud long hem mo i holem hem i stap laef. Bambae ol man long wol oli talem se hem i glad.” (Ol Sam 41:1, 2) Lav we Deved i soemaot long boe blong gudfala fren blong hem Jonatan, hemia Mefiboset we tufala leg blong hem i nogud, i wan gudfala eksampol we yumi save folem blong soem lav long olgeta we oli no gat nem.—2 Samuel 9:1-13.
Ol Bigfala Poen Long Buk Blong Seken Samuel
9:1, 6, 7. Deved i holemtaet promes we hem i mekem. Yumi tu yumi mas traehad blong holemtaet ol promes blong yumi.
Oli Gohed Nating Se Nil Aranis i Stikim Olgeta
10 Sam yia biaen, King Deved i soem kaen gud fasin long Mefiboset from we hem i lavem tumas Jonatan. Deved i givimbak olgeta graon blong Sol i go long Mefiboset mo i putumap Jiba we i man blong wok blong Sol fastaem, blong hem i lukaot long graon ya. Mo tu, Deved i talem long Mefiboset se: “Mi glad tumas blong yu yu kam kakae wetem mi oltaem long haos blong mi.” (2 Samuel 9:6-10) Ating kaen gud fasin mo lav we Deved i soem oli mekem Mefiboset i harem gud lelebet mo i givhan smoltaem long hem blong i no tingting tumas long trabol ya we hem i gat se hem i no save wokbaot. !Hemia wan nambawan lesen long yumi! Yumi tu, yumi mas soem kaen gud fasin long olgeta we oli mas faet strong from we wan nil aranis i stap stikim olgeta.
Ol Gudgudfala Samting
it-1 266
Mustas
Long taem bifo, plante man we oli stap long Is, inkludum ol man Isrel, oli no sevemaot mustas blong olgeta from i wan saen blong soemaot respek. Loa we God i givim long ol man Isrel i talem klia se oli “no mas sevemaot hea long saed saed blong hed” blong olgeta, bitwin sora mo ae blong olgeta, o katem en blong mustas blong olgeta. (Le 19:27; 21:5) Loa ya i klia, from we long sam nesen hemia i wan fasin blong wosip blong ol hiten man.
13-19 JUN
OL SAS SAMTING LONG BAEBOL | 2 SAMUEL 11-12
“Yu No Letem Ol Rabis Tingting Oli Kontrolem Yu”
!Yu Save Ronwe Long Ol Trap Blong Setan!
10 Griri fasin i mekem King Deved i fogetem se Jehova nao i mekem hem i rij, i putumap hem i king, mo i mekem hem i winim plante faet. Fastaem, Deved i luksave se ol presen ya oli kam long God, mo hem i ‘no save tokbaot olgeta evriwan from oli plante tumas.’ (Sam 40:5) Be i gat wan taem we Deved i fogetem ol samting ya we Jehova i givim long hem. Hem i no moa glad long ol samting ya, be i wantem moa. Deved i gat plante woman finis, be yet, hem i wantem waef blong narafala man, nating se Jehova i talem se fasin ya i no stret. Woman ya hemia Batseba mo hasban blong hem Uria, wan laen blong Het. Deved i tingbaot hem wan, nao hem i slip wetem Batseba, ale Batseba i gat bel. !Antap long hemia, Deved i mekem plan blong oli kilim Uria i ded! (2 Saml. 11:2-15) ?Olsem wanem? ?Deved i ting se Jehova i no luk samting ya? Nating se Deved i mekem wok blong Jehova longtaem, be yet, hem i kam griri mo hemia i mekem hem i harem nogud bigwan. Biaen Deved i talemaot sin blong hem mo i tanem tingting blong hem. !I sua se hem i glad tumas se Jehova i fogivim hem!—2 Saml. 12:7-13.
Yumi Glad Blong Stap Aninit Long Jehova
15 Jehova i putumap Deved i kam hed blong ful nesen blong Isrel, i no blong famle blong hem nomo. From we Deved i king, hem i gat bigfala paoa. Samtaem, hem i no yusum gud paoa blong hem mo i mekem sam bigfala mastik. (2 Saml. 11:14, 15) Be hem i soemaot se hem i stap aninit long Jehova taem hem i lesin long olgeta we oli stretem hem. Hem i talemaot evri samting we i stap long hat blong hem taem i prea long Jehova. (Sam 51:1-4) Mo tu, hem i lesin wetem tingting daon long ol gudfala advaes blong ol man mo ol woman tu. (1 Saml. 19:11, 12; 25:32, 33) Deved i lanem lesen from ol mastik blong hem, mo i putum wosip blong Jehova long fasples long laef blong hem.
Trenem Tingting Folem Ol Loa Mo Ol Stamba Trutok Blong Baebol
7 Blong save wanem i stret mo wanem i no stret, i no nid blong brekem loa blong God mo kasem nogud frut. Yumi save lanem lesen from mastik blong sam man we Baebol i tokbaot. Ol Proveb 1:5 i talem se: “Ol tok ya i save mekem ol waes man oli gat save moa.” !Save ya i nambawan from we i kamaot long God! Traem tingbaot Deved we i harem nogud tumas taem hem i brekem loa blong Jehova mo i mekem rabis fasin wetem Batseba. (2 Samuel 12:7-14) Taem yu ridim stori ya, i gud yu askem se: ‘?Deved i sud mekem wanem blong blokem trabol ya? ?Sipos mi, bambae mi mekem wanem? Sipos wan samting olsem i traem mi, ?bambae mi mekem olsem Deved o Josef?’ (Jenesis 39:11-15) Sipos yumi tingting gud long rabis frut we i save kamaot, bambae yumi ‘tanem baksaed long fasin we i no stret.’
Ol Gudgudfala Samting
it-1 590 ¶1
Deved
Jehova i stap lukluk, mo i soemaot klia nogud samting we i bin hapen. Sipos Jehova i bin letem ol jaj oli dil wetem bisnes blong Deved mo Batseba folem Loa blong Moses, i sua se bambae oli kilim tufala tugeta i ded, mo bebi ya we Batseba i gat bel long hem from rabis fasin blong tufala, bambae hem tu i ded. (Du 5:18; 22:22) Be from we Jehova hem wan i dil wetem bisnes ya, hem i soem sore long Deved. Hem i mekem olsem from kontrak blong Kingdom we i bin mekem wetem hem (2Sa 7:11-16), i luk se Deved i soemaot se hem i rili sore (1Sa 24:4-7; skelem wetem Jem 2:13), mo i luk se tufala i tanem tingting blong tufala. (Sam 51:1-4) Be tufala i no save ronwe long ol panis we tufala i mas kasem. Jehova i yusum profet Natan blong talem se: “Bambae mi mekem trabol i kamaot long haos blong yu.”—2Sa 12:1-12.
20-26 JUN
OL SAS SAMTING LONG BAEBOL | 2 SAMUEL 13-14
“Amnon i Kasem Trabol From Samting We Hem i Wantem Tumas”
it-1 32
Absalom
Ded Blong Amnon. Sista blong Absalom, Tamara, hem i naes we i naes, taswe haf brata blong hem Amnon i laekem hem tumas. Amnon i giaman se hem i sik, ale i sanem toktok i go blong Tamara i kam long haos blong hem, blong rerem kakae blong hem, mo biaen Amnon i fosem hem blong i slip wetem hem. Be afta we hem i repem Tamara, hem i no moa laekem Tamara nating mo i sanemaot hem. Tamara i harem nogud tumas, i terem spesel klos ya we hem i werem we i makemaot se hem i no save man yet, mo i putum asis long hed blong hem. Taem brata blong hem Absalom i luk samting ya, kwiktaem nomo hem i tingbaot se maet Amnon i mekem wan samting we i no stret long hem, from we hem i save finis se haf brata blong hem i stap laekem sista blong hem, Tamara. Absalom i talem long sista blong hem blong i stap kwaet nomo, mo i tekem hem i go stap long haos blong hem.—2Sa 13:1-20.
Yumi Mas Bos Long Tingting Blong Yumi
11 Be Baebol i tokbaot sam narafala we oli no blokem tingting blong slip olbaot. Mo hem i soemaot nogud frut we i kamaot taem yumi no bos long tingting blong yumi. Sipos yu stap fesem samting we Kim i fesem, i gud yu tingbaot yangfala man ya we i no waes, we Ol Proveb japta 7 i tokbaot. Mo yu save tingbaot Amnon tu, mo ol nogud frut we hem i kasem. (2 Samuel 13:1, 2, 10-15, 28-32) Sipos ol papa mo mama oli tokbaot ol stori ya long famle wosip, oli save tijim pikinini blong i kam waes mo i wokem fasin ya blong bos long tingting.
it-1 33 ¶1
Absalom
Tu yia i pas. Naoia i taem blong katemaot hea blong ol sipsip, wan taem blong lafet, mo Absalom i plan blong mekem lafet blong samting ya long Balajoro we i stap samwe 22 kilometa long not not is blong Jerusalem, mo hem i invaetem evri boe blong king wetem Deved blong oli joen wetem hem long lafet ya. Taem papa blong hem i talem se bambae hem i no kam long lafet ya, Absalom i plis long hem blong i sanem Amnon, fasbon blong hem, blong i kam. (Pro 10:18) Long lafet ya, taem Absalom i luk we Amnon i “dring waen gogo hat blong hem i harem gud,” hem i givim oda long ol man blong wok blong hem blong oli kilim Amnon i ded. Ol narafala boe blong king oli gobak long Jerusalem, be Absalom i ronwe i go long Siria blong haed wetem abu man blong hem long kingdom blong Gesuru, we i stap long is blong Solwota Blong Galili. (2Sa 13:23-38) “Trabol” we profet Natan i bin talemaot, naoia i kasem “haos” blong Deved mo bambae i gohed olsem long ful laef blong hem.—2Sa 12:10.
Ol Gudgudfala Samting
g04 12/22 8-9
Samting We i Mekem Wan Man i Naes Moa
Traem tingbaot Absalom, we i wan long ol boe blong Deved. Nating se hem i naes we i naes be hem i no wan gudfala man. Baebol i tokbaot hem se: “Long olgeta ples long Isrel, i no gat wan man we oli presem hem olsem we oli presem Absalom, from we hem i naes we i naes. I no gat wan samting i rong long bodi blong hem, i stat long leg blong hem i go kasem hed blong hem.” (2 Samuel 14:25) Nating se i olsem, flas tingting we Absalom i gat i pulum hem blong rebel agensem papa blong hem, mo i traem tekem ples blong hem olsem king. Mo tu, hem i slip wetem ol woman blong papa blong hem. Ol samting we Absalom i mekem i pulum trabol i kam long hem, mo hem i ded long wan fasin we i nogud.—2 Samuel 15:10-14; 16:13-22; 17:14; 18:9, 15.
?Yu yu harem se yu save kam fren blong Absalom? Ating nogat. Hem i no wan gudfala man. Naesfala bodi blong hem i no givhan long hem nating blong i no flas, blong i holemstrong, mo blong i no kasem trabol. Baebol i tokbaot plante eksampol blong ol man we oli waes mo oli gat ol gudfala fasin, be i no tokbaot se oli luk olsem wanem. Samting we i moa impoten hemia se oli gat ol gudfala fasin.
27 JUN–3 JULAE
OL SAS SAMTING LONG BAEBOL | 2 SAMUEL 15-17
“Absalom i Flas Taswe Hem i Rebel”
it-1 860
Man We i Go Fastaem Blong Rerem Samting
Long taem bifo, i wan kastom blong gat ol man we oli stap ron i go fastaem blong talemaot long ol man se king i stap kam, mo blong oli givhan long hem. (1Sa 8:11) Hemia nao samting we Absalom mo Adonaejah i mekem blong soem tufala, mo blong mekem rabis plan ya blong tufala i wok, tufala i tekem 50 man blong oli ron long fored blong jariot blong tufala.—2Sa 15:1; 1Ki 1:5.
Yumi Wok Blong God Ya We i Mekem Yumi Fri
5 Baebol i tokbaot stori blong plante man we fasin blong olgeta i spolem ol narafala. Wan long ol man ya hemia Absalom, pikinini blong King Deved. Absalom i wan naes man. Be Absalom i letem nogud tingting i gru long hat blong hem. Hem i wantem kam king long ples blong papa blong hem, nating se hem i no gat raet blong mekem olsem. Absalom i traem blong kasem wanem we hem i wantem. Hem i trikim ol man blong oli ting se king i no wantem givhan long olgeta, be hem nao bambae i givhan long olgeta. Hem i mekem olsem Setan. Hem i mekem ol man oli ting se hem i stap tingbaot olgeta mo hem i talem ol giaman tok agens long papa blong hem Deved.—2 Saml. 15:1-5.
it-1 1083-1084
Hebron
Sam yia biaen, boe blong Deved Absalom i gobak long Hebron mo i statem rabis plan blong hem blong tekova long rul blong papa blong hem. (2Sa 15:7-10) Absalom i jusum taon ya blong stap long hem mo faet from tron blong king, maet from we bifo Hebron i bin kapital blong Juda, mo maet from we hem i bin gruap long ples ya. Samtaem biaen, King Rehoboam we i smol bubu blong Deved i bildim bak taon ya Hebron. (2Kro 11:5-10) Afta we ol man Babilon oli spolem Juda mo taem ol man Jiu oli kambak long Juda, sam long olgeta oli kam stap long Hebron (Kiriataba).—Neh 11:25.
Ol Gudgudfala Samting
?Ol Infomesen Blong Yu Oli Tru?
11 Samtaem yumi harem nogud from sam stori we narafala i talem long saed blong yumi, be maet sam haf blong stori ya i no tru. Hemia nao samting we i hapen long Mefiboset. King Deved i givim evri graon blong Sol, i go long Mefiboset we i smol bubu blong Sol. (2 Samuel 9:6, 7) Be biaen Deved i harem wan stori we i no tru long saed blong Mefiboset. Deved i no traem blong faenemaot sipos stori ya i tru o nogat, be hem i girap i tekemaot evri samting blong Mefiboset. (2 Samuel 16:1-4) Biaen taem Deved i toktok wetem Mefiboset, hem i kasemsave se hem i mekem wan mastik. Ale, hem i givimbak sam samting blong Mefiboset. (2 Samuel 19:24-29) Sipos Deved i tekem taem blong kasem ol stret infomesen, maet bambae hem i no spolem Mefiboset.
“Blong Tijim Yumi”
Rom 15:4 i talem se: “Olgeta tok we oli raetem bifo, oli blong tijim yumi.” Taswe, i gud blong askem se, ?yumi save lanem wanem long eksampol blong Itai? Traem tingbaot samting we i pulum Itai blong i holemstrong long Deved. Nating se Itai i wan man Filistia mo i go laef klosap long Jerusalem, be hem i luksave se Jehova i God ya we i laef i stap, mo se Deved nao we Jehova i makemaot hem. Itai i no tingbaot nomo trabol we i stap bitwin ol man Isrel mo ol man Filistia. Mo hem i no tingbaot nomo se Deved i kilim bigfala man Filistia ya Golaeat mo plante man ples blong hem. (1 Saml. 18:6, 7) Be hem i luk Deved olsem wan man we i lavem Jehova mo i sua se hem i makem ol gudfala fasin blong Deved tu. From samting ya, Deved i tinghae long Itai. Mo taem Deved i seraotem ol man blong hem long tri grup, hem i letem “Itai i lidim wan grup” blong go faet agensem ol man blong Absalom.—2 Saml. 18:2.
Yumi tu yumi mas traehad blong luk ol gudfala fasin blong ol narafala, i bitim we yumi tingbaot nomo se kalja, kantri, kala blong skin, o bakgraon blong olgeta i defren. Fasin blong Deved blong frengud wetem Itai i soemaot se taem yumi save gud Jehova mo yumi lavem hem, hemia i save mekem se yumi fren gud wetem ol narafala nating se oli defren long yumi.
Taem yumi tingting dip long eksampol blong Itai, i gud yumi askem se: ‘?Mi mi soemaot se mi gat fasin ya blong holemstrong long Bigfala Deved, Kraes Jisas? ?Mi mi soemaot se mi holemstrong taem mi wok strong long wok blong prij mo mekem disaepol?’ (Mat. 24:14; 28:19, 20) ‘?Mi save mekem wanem moa blong pruvum se mi holemstrong long Jehova?’
Ol hed blong famle tu oli save kasem gudfala samting taem oli tingting dip long eksampol blong Itai blong holemstrong. Fasin blong hem blong holemstrong long Deved, mo desisen blong hem blong folem man ya we God i makemaot hem olsem king, i halpem ol man blong hem tu. Long sem fasin, ol desisen we ol hed blong famle oli mekem blong sapotem tru wosip, i save givhan long famle blong olgeta, mo maet samtaem i save mekem se oli kasem sam hadtaem tu. Nating se i olsem, yumi sua se: ‘Man we i holemstrong long Jehova, Jehova tu i holemstrong long hem.’—Sam 18:25.
Afta we Deved i winim Absalom long faet, Baebol i no moa tokbaot eni samting long saed blong Itai. Nating se i olsem, yumi lanem sam bigfala samting long fasin blong hem blong givhan long Deved taem hem i fesem sam hadtaem long laef blong hem. Stori blong Itai i pruvum se Jehova i luksave mo i blesem ol man we oli holemstrong long hem.—Hib. 6:10.