Refrens Blong Kristin Wok Mo Laef Buk Blong Miting
5-11 SEPTEMBA
OL SAS SAMTING LONG BAEBOL | 1 KING 9-10
“Presem Jehova From waes Blong Hem”
Wan Visit We i Karem Gudfala Frut
Taem kwin ya i mitim Solomon hem i askem plante “strong kwestin.” (1 King 10:1) Narafala rod blong talem Hibru tok we oli yusum long ples ya, hemia se “ridel.” Be samting ya i no minim se kwin i plei long wan gem wetem Solomon. Ol Sam 49:4 i yusum semfala Hibru tok ya blong tokbaot sam bigfala kwestin long saed blong sin, ded, mo rod blong pemaot man. Taswe, i luk olsem se kwin blong Seba i tokbaot sam impoten samting wetem Solomon. Hem i wantem luksave se waes blong Solomon i bigwan olsem wanem. Baebol i talem se kwin ya i “askem ol strong kwestin.” Mo Solomon “i ansa long olgeta evriwan, we i no gat wan long olgeta nating we i strong blong i talemaot mining blong hem.”—1 King 10:2b, 3.
Taem Fasin Blong Givim i Kam Bigwan
From we kwin ya i sapraes tumas long samting we hem i harem mo we i luk, hem i talem, wetem tingting daon se: “Ol woman blong yu mo ol man blong wok blong yu oli laki tumas we oli stap wetem yu oltaem, nao oli gat gudfala janis blong harem ol waestok blong yu.” (1 King 10:4-8) Kwin i no talem se ol man blong wok blong Solomon oli hapi from we oli stap long wan naesfala ples, nating se samting ya i tru. Be, ol man blong wok blong Solomon oli haremgud from we oltaem oli save harem ol waestok we God i givim long Solomon. Kwin blong Seba i soem wan gudfala eksampol long ol man blong Jehova tede, we oli stap haremgud from waes we God hem wan mo Pikinini blong hem, Jisas Kraes, tufala i stap givim!
Wan Visit We i Karem Gudfala Frut
Taem kwin blong Seba i luk se Solomon i waes tumas mo kingdom blong hem i rij we i rij, kwin ya i ‘sapraes tumas, i no moa askem wan samting bakegen.’ (1 King 10:4, 5) Sam man oli talem se tok ya i minim we kwin “i no moa save toktok.” !Wan man blong stadi i talem tu se, maet ae blong hem i dak! Nating se i olsem wanem, be i sua se olgeta samting we kwin ya i luk mo i harem oli mekem hem i sapraes bigwan. Hem i talem se ol man blong wok blong Solomon oli laki tumas blong harem ol waestok blong king ya, mo hem i presem Jehova we i putumap Solomon olsem king. Biaen, hem i givim plante sas presen i go long king ya. Gol we hem i givim i kasem samwe long 40,000,000 dola, long mane blong tede. Solomon tu i givim presen, “ol samting we kwin ya i askem, king i givim olgeta i go long hem, mo i givim sam moa samting bakegen long hem long gladhat blong hem.”—1 King 10:6-13.
Ol Gudgudfala Samting
?Yu Yu Save?
?King Solomon i gat hamas gol?
Baebol i talem se Hiram, king blong Taea i sanem fo tan blong gol i go long Solomon, mo kwin blong Seba tu i sanem sem amaon i go long hem, mo Solomon i sanem ol sip blong hem i go long Ofiri blong tekem 15 tan blong gol. Baebol i talem se: “Wet blong ol gol we Solomon i stap kasem evri yia, hem i 666 talen blong gol,” o moa long 25 tan. (1 King 9:14, 28; 10:10, 14) ?Olsem wanem, i posibol blong wan king long taem bifo i gat plante gol olsem?
Ol skola oli bilif se samting ya i tru, from oli faenem wan olfala hanraet we tokbaot se Fero Thutmose III blong Ijip (ol yia 1,000 B.K.T.) i givim samwe 13.5 tan gol i go long tempol blong Amun-Ra long Karnak. Long ol yia 800 B.K.T., King Tiglath-pileser III blong Asiria i kasem bitim 4 tan blong gol we i kam long Taea, mo tu Sargon II i givim sem amaon blong gol olsem presen i go long ol god blong Babilon. Evri yia, long Pangaem long Tres, ol man oli stap digim bitim 28 tan blong gol blong givim long King Philip II blong Masedonia (359-336 B.C.E.)
Taem boe blong Philip hemia Bigfala Alexanda (336-323 B.C.E.) i winim Susa we i taon blong ol man Pesian, hem i tekem samwe 1,180 tan blong gol long ples ya mo i tekem klosap 7,000 tan blong gol long ful eria blong Pesia. So, taem yumi skelem ol ripot ya, yumi luksave se taem Baebol i talem se King Solomon i gat plante gol, hem i tok tru nomo.
12-18 SEPTEMBA
OL SAS SAMTING LONG BAEBOL | 1 KING 11-12
“Jusum Gud Boe o Gel We Bambae Yu Maredem”
‘?Hu i Stap Long Saed Blong Jehova?’
7 Solomon i frengud wetem Jehova taem hem i yang. Jehova i givim bigfala waes long Solomon mo i givim wan impoten wok long hem, hemia blong wokem naesfala tempol long Jerusalem. Be Solomon i lusum fasin fren blong hem wetem Jehova. (1 King 3:12; 11:1, 2) Loa blong God i talem se wan king “i no mas gat plante woman blong hem, from we sipos hem i tekem plante woman, bambae ol woman ya oli tanem tingting blong hem i gowe long Hae God.” (Dutronome 17:17) Solomon i no obei long loa ya. !Hem i gat 700 waef mo 300 narafala woman! (1 King 11:3) Plante long olgeta oli no blong Isrel mo oli wosipim ol giaman god. Solomon i no obei tu long loa ya se oli no mas maredem ol woman blong narafala kantri.—Dutronome 7:3, 4.
?Olsem Wanem Blong Lukaot Gud Long Hat Blong Yu?
6 Setan i wantem se yumi kam olsem hem—wan stronghed we i tingbaot hem wan mo i no wantem mekem samting we Jehova i glad long hem. Be Setan i no save fosem yumi blong tingting olsem hem mo folem fasin blong hem. Taswe hem i traem winim yumi long ol narafala rod. Wan rod: Hem i mekem yumi stap long medel blong ol man we oli gat tingting olsem hem. (1 Jon 5:19) Hem i hop se bambae yumi spenem taem wetem olgeta, nating we yumi save finis se ol rabis fren oli save “spolem” tingting mo fasin blong yumi. (1 Kor. 15:33) Hem i yusum trik ya long King Solomon. Solomon i maredem plante woman we oli no wosipim Jehova, mo sloslo oli “pulum hem i gowe long Hae God” Jehova.—1 King 11:3.
‘?Hu i Stap Long Saed Blong Jehova?’
9 Be Jehova i no jes lego ol sin oli go olsem nomo. Baebol i talem se: ‘Hae God i kros tumas long Solomon, from we hem i stap mekem wosip long ol narafala god.’ Yes, God i bin wantem blong halpem Solomon. Mo “hem i kamtru long King Solomon tu taem finis, mo i givim strong tok long hem, se bambae i no mekem wosip long ol narafala god, be hem i girap, i gowe long hem, i no obei long hem nating.” From samting ya, God i no moa glad long hem mo i no moa sapotem hem. Jehova i no moa letem ol laen blong Solomon blong oli rul long ful nesen blong Isrel, mo oli bin gat plante nogud problem blong plante handred yia.—1 King 11:9-13.
Ol Gudgudfala Samting
Hem i Gat Janis Blong Mekem God i Glad
Ol man oli girap agensem Rehoboam, nao hem i singaot ol ami blong hem blong oli go faet agensem olgeta. Be Jehova i sanem profet Semaea blong talem long Rehoboam se: “Yufala i no save go mekem faet long olgeta . . . from we mi nomo, mi mekem samting ya i kamtru.”—1 King 12:21-24.
?Olsem wanem? ?I isi blong Rehoboam i lesin long Jehova? Sipos king ya i obei, ?ol man bambae oli gat wanem tingting long hem? !Hem i talem finis se bambae hem i wipim olgeta long “wip blong hos,” be naoia hem i no mekem wan samting blong stopem rebelian ya! (Skelem wetem 2 Kronikel 13:7.) Nomata wanem tingting blong ol man, be king mo ol ami blong hem oli “obei long tok ya blong Hae God, oli gohom bakegen.”
?Yumi lanem wanem? Oltaem i waes blong obei long God, nating se ol man oli jikim yumi. God bambae i blesem yumi sipos yumi obei.—Dutronome 28:2.
?Olsem wanem? ?Rehoboam i kasem blesing from we hem i obei? Rehoboam i gohed blong rul long tufala laen ya Juda mo Benjamin. Hem i wokem sam niufala taon tu, mo i mekem sam taon oli kam strong moa. (2 Kronikel 11:5-12) Samting we i moa impoten, hem i obei long ol loa blong Jehova. Ol ten laen oli stat blong wosipim ol aedol, be plante man long ol laen ya oli stap go long Jerusalem blong sapotem Rehoboam mo mekem tru wosip. (2 Kronikel 11:16, 17) Taswe, taem Rehoboam i obei long Jehova, kingdom blong hem i kam strong moa.
19-25 SEPTEMBA
OL SAS SAMTING LONG BAEBOL | 1 KING 13-14
“?From Wanem Yumi Mas Harem Gud Mo Gat Tingting Daon?”
Stap Tru Oltaem Wetem Wan Tingting Nomo Long Hat Blong Yumi
4 Biaen, Jeroboam i talem long man ya blong trufala God se: “Yu kam wetem mi, yumitu go kakae smol long haos, mo bambae mi givim smol presen long yu.” (1 King 13:7) ?Profet ya i mekem wanem? ?I stret we hem i go kakae wetem king ya afta we hem i jes talemaot jajmen blong God long hem? (Sam 119:113) ?No i stret we hem i no lesin long king ya, nating we i luk olsem se king ya i sore from sin blong hem? I tru se Jeroboam i rij mo hem i naf blong givim ol sas presen long ol fren blong hem. Taswe, sipos profet ya blong God i stap laekem tumas ol sas samting, ating toktok ya blong king i save kam olsem wan bigfala traem long hem. Be Jehova i bin talem long profet ya se: ‘Bambae yu no kakae mo yu no dring long ples ya, mo bambae yu no gohom long sem rod ya we yu kam long hem.’ Taswe, profet ya i ansa strong mo i talem klia se: “King, nating sipos yu givim stret haf blong ol gudgudfala samting blong yu long mi, be bambae mi no save go wetem yu. Bambae mi no save kakae wetem yu, mo mi no save dring wan samting wetem yu tu.” Nao profet ya i pas long wan narafala rod blong goaot long Betel. (1 King 13:8-10) ?Desisen blong profet ya i tijim wanem long yumi long saed blong fasin blong stap tru long God wetem fulhat blong yumi?—Rom 15:4.
Stap Tru Oltaem Wetem Wan Tingting Nomo Long Hat Blong Yumi
15 ?Wanem narafala samting we yumi save lanem from mastik blong profet ya blong Juda? Ol Proveb 3:5 i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.” Long stori ya, profet blong Juda i no moa trastem Jehova olsem bifo, be hem i trastem prapa waes blong hem nomo. Mastik ya i mekem se hem i lusum laef blong hem mo hem i no moa gat gudnem long fes blong God. !Stori ya i soem se i impoten tumas we yumi no trastem yumi wan mo yumi stap tru long Jehova taem yumi stap mekem wok blong hem!
Stap Tru Oltaem Wetem Wan Tingting Nomo Long Hat Blong Yumi
10 Profet ya blong Juda i sud luksave se olfala profet ya i stap trikim hem. Hem i save tingting mo askem se: ‘?From wanem Jehova bambae i sanem wan enjel i go long wan narafala man bakegen blong i talemaot ol niufala save we mi mi mas folem?’ Profet ya i save askem stret long Jehova blong i soemaot klia wanem samting we hem i mas mekem, be Baebol i no talem se hem i mekem olsem. Defren olgeta, “profet ya i go wetem [olfala man ya], mo i kakae wetem hem.” Jehova i no glad long samting ya. Taem profet ya i stap gobak long rod blong hem blong go long Juda, wan laeon i faenem hem mo i kilim hem i ded. !Wok blong profet ya i finis long wan fasin we i nogud olgeta!—1 King 13:19-25.
Ol Gudgudfala Samting
Hem Luk Gudfala Fasin Blong Man
Ol tok blong 1 King 14:13 oli soemaot wan nambawan samting long saed blong Jehova mo se hem i stap luk ol gudfala fasin blong yumi wanwan. Tingbaot se Jehova i “faenem” wan gudfala samting long Abaejah. Jehova i lukluk insaed long hat blong Abaejah mo Hem i faenemaot se hem i gat sam gudfala fasin. Wan skola i komperem Abaejah wetem ol famle blong hem mo i talem se Abaejah i olsem wan perel “we i stap long medel blong ol narafala ston.” Jehova i tinghae long gudfala fasin blong hem mo i blesem hem, taem i soem sore long hem, nating se hem i kamaot long wan famle we i nogud.
26 SEPTEMBA–2 OKTOBA
OL SAS SAMTING LONG BAEBOL | 1 KING 15-16
“?Yu Yu Gat Strong Tingting Olsem Asa?”
w12 8/15 8 ¶4
“Bambae Yu Kasem Blesing From Wok Blong Yu”
Long ol 20 yia afta we Isrel i seraot i kam tu Kingdom, Juda i stap mekem ol samting we i no stret, taem hem i wosipim ol narafala god. Taem Asa i kam king long 977 B.K.T., haos blong king i kam doti from ol man oli stap wosipim ol god blong ol man Kenan, we oli bilif se hem i save mekem man i gat plante kakae mo pikinini. Be Baebol i talem se taem Asa i kam king, hem “i mekem samting we i gud mo i stret long ae blong Jehova we i God blong hem.” Asa “i aotem ol olta blong ol god blong narafala kantri, ol hae ples blong wosip, i smasem ol tabu ston, mo i katemdaon ol tabu pos.” (2 Kron. 14:2, 3) Mo tu, Asa i aotem ol man we oli “ol tempol prostitut,” long kingdom blong Juda, we oli stap mekem ol rabis fasin blong seks long wosip blong olgeta. Asa i no mekem hemia nomo, hem i pulum ol man tu blong oli ‘lukaotem Jehova we i God blong ol olfala blong olgeta, mo blong oli obei long Loa mo komanmen blong God.’—1 King 15:12, 13; 2 Kron. 14:4.
!Mekem Wok Blong Jehova Long Olgeta Hat Blong Yu!
7 ?Olsem wanem blong save sipos yumi stap mekem wok blong Jehova long olgeta hat blong yumi? Yumi mas tingting gud long ol kwestin ya: ‘?Mi mi obei long Jehova taem i had blong mekem samting we hem i askem? ?Mi mi gat strong tingting blong mekem kongregesen i stap klin?’ Traem tingbaot strong tingting we Asa i gat, blong karemaot olfala bubu woman blong hem long jea blong kwin. Maet yu tu yu nidim strong tingting olsem. Yu traem tingbaot sipos wan famle no gudfala fren blong yu i mekem bigfala sin mo i no tanem tingting, nao kongregesen i mas putumaot hem. ?Olsem wanem? ?Yu yu gat strong tingting blong no moa joen wetem hem? ?Hat blong yu i pusum yu blong mekem wanem?
it-1 184-185
Asa
Nating se samtaem Asa i no waes mo i no lukaot tingting blong Jehova, be Jehova i luk hem olsem wan long ol gudfala king long laen blong Juda, from we hem i gat ol gudfala fasin, mo i no joen long apostasi. (2Kr 15:17) Asa i rul 41 yia, mo hemia i kavremap ol yia we ol narafala 8 king oli bin rul long Isrel: Jeroboam, Nadab, Bahasa, Elaha, Simri, Omri, Tibni (we i rul long smol haf blong Isrel mo i agensem Omri), mo Ehab. (1Ki 15:9, 25, 33; 16:8, 15, 16, 21, 23, 29) Taem Asa i ded, boe blong hem Jehosafat i kam king.—1Ki 15:24.
Ol Gudgudfala Samting
?God i Rili Tru Long Tingting Blong Yu?
Eksampol, traem ridim profet tok we i tokbaot panis blong man we bambae i bildim bakegen Jeriko, mo biaen, tingbaot olsem wanem tok ya i kamtru. Josua 6:26 i talem se: “Josua i mekem wan strong tok long nem blong Hae God, i talem se: ‘Sipos wan man i traem blong wokem taon ya Jeriko bakegen, [Jehova] bambae i mekem hem i kasem bigfala trabol. Sipos man ya i putum fandesen blong stonwol blong hem bakegen, be fasbon pikinini boe blong hem bambae i lus. Mo sipos hem i wokem doa blong stonwol blong hem bakegen, be lasbon pikinini boe blong hem bambae i lus.’” Profet tok ya i kamtru samwe 500 yia biaen, olsem yumi ridim long 1 King 16:34: “Long taem we [King Ehab] i stap rul, wan man Betel, nem blong hem Hiel, hem i wokemgud taon ya Jeriko bakegen, mo taem hem i stap wokem fandesen blong hem, fasbon pikinini boe blong hem Abiram i ded, mo taem hem i stap wokem ol doa blong bigfala ston wol blong hem, lasbon pikinini boe blong hem Segub tu i ded. Samting ya i kamtru olsem we [Jehova] i bin talem bifo long Josua pikinini blong Nun blong i talemaot.” Wan trufala God nomo i save pulum wan man blong raetemdaon sam profet tok olsem ya, mo meksua se oli kamtru.
3-9 OKTOBA
OL SAS SAMTING LONG BAEBOL | 1 KING 17-18
“?Bambae Yufala i Jamjam Long Tu Defren Tingting Gogo Kasem Wetaem?”
!Soemaot Bilif Mo Mekem Waes Desisen!
6 Taem ol man Isrel oli stap long Promes Lan, oli mas mekem desisen se bambae oli wosipim Jehova no ol narafala god. (Ridim Josua 24:15.) I luk olsem se desisen ya i isi nomo. Nating se i olsem, be i save givim laef no ded long olgeta. Long taem blong ol jaj, ol man Isrel oli mekem plante nogud desisen. Oli no moa wosipim Jehova be oli wosipim ol giaman god. (Jajes 2:3, 11-23) Long taem blong profet Elaeja, ol man blong God oli mas mekem desisen se bambae oli wosipim Jehova no giaman god ya Bal. (1 King 18:21) Maet yu ting se hemia wan isi desisen from we oltaem i moa gud blong wosipim Jehova. Man we i waes i no wantem wosipim wan giaman god. Be Baebol i talem se ol man Isrel oli no save “mekemap tingting” blong olgeta, oli no save mekem wan desisen. Be Elaeja i waes, nao hem i pulum olgeta blong oli mekem wosip long tru God, Jehova.
ia 88 ¶15
Hem i Sapotem Tru Wosip
15 Ol pris blong Bal oli stat blong mekem ol samting we i narakaen, “oli stap singaot bigwan mo oli stap katkatem bodi blong olgeta long ol smol naef mo ol longfala spia folem kastom blong olgeta. Oli mekem olsem kasem we blad i ronaot olbaot long bodi blong olgeta.” !Oli mekem ol samting ya blong nating nomo! “I no gat wan voes mo i no gat man i ansa, mo god blong olgeta i no lesin long olgeta.” (1 King 18:28, 29) I klia se Bal i no wan trufala god. Hem i jes wan trik we Setan i yusum blong pulum ol man oli gowe long Jehova. Blong talem stret, sipos wan man i no jusum Jehova be i jusum wan narafala god o masta, bambae hem i harem nogud mo i sem.—Ridim Ol Sam 25:3; 115:4-8.
ia 90 ¶18
Hem i Sapotem Tru Wosip
18 Bifo we Elaejah i prea, maet ol man we oli stap long taem ya oli stap tingting se Jehova tu i wan giaman god nomo olsem Bal. Be afta we Elaejah i prea, ol man oli no moa nid blong gat tu tingting. Baebol i talem se: “Nao faea blong Jehova i kamdaon, i bonem ofring ya we i blong bon fulwan wetem ol faeawud, ol ston, mo das, mo i draemap wota we i stap long hol ya.” (1 King 18:38) !Hemia wan nambawan rod blong stretem tingting blong ol man ya! ?Afta long samting ya, ol man Isrel oli mekem wanem?
Ol Gudgudfala Samting
w08 4/1 19, bokis
Hem i Stap Lukluk, Mo i Wet
?Draetaem Long Taem Blong Elaejah i Longfala Olsem Wanem?
Elaejah we i profet blong Jehova, i talemaot long King Ehab se klosap nao draetaem bambae i finis. Hem i talem tok ya long Ehab “long namba 3 yia,” hemia tri yia afta we hem i talemaot se bambae i gat draetaem. (1 King 18:1) I no longtaem afta we Elaejah i talemaot ol tok ya, Jehova i sanem ren i kam. Maet samfala oli ting se draetaem ya i finis bifo long en blong namba tri yia, mo se draetaem ya i no stap bitim tri yia. Be Jisas mo Jemes, tufala tugeta i talemaot se draetaem ya i gohed blong “tri yia mo sikis manis.” (Luk 4:25; Jemes 5:17) ?Hemia i min se ol tok blong Baebol oli agensem olgeta?
Nogat. Long Isrel bifo, draetaem i save stap blong sikis manis. I klia se long taem ya we Elaejah i kam talemaot long Ehab se bambae i gat draetaem, draetaem ya i stat finis mo i gat pruf se taem ya bambae i longfala moa i bitim ol narafala taem bifo, from we draetaem ya i bin gohed blong sikis manis finis mo i stap gohed yet. Taswe, taem Elaejah i talem se draetaem ya bambae i finis “long namba 3 yia,” we hem i stat kaontem taem ya long faswan taem we hem i talemaot draetaem ya, klosap tri ya mo sikis manis i pas finis. Ol “tri yia mo sikis manis” ya oli finis stret long taem ya we ol man oli kam wanples blong witnesem bigfala samting we i bin hapen long Hil Ya Kamel.
Traem tingbaot, Elaejah i jusum wan stret taem blong go luk Ehab blong talemaot se draetaem bambae i gohed. Ol man oli bilif se Bal i stap “sidaon long ol klaod,” mo se hem nao bambae i mekem ren i foldaon long en blong draetaem ya. Sipos draetaem ya i gohed longtaem moa, ol man bambae oli stat blong askem se: ‘?Wehem Bal? ?Wetaem bambae hem i mekem se i gat ren?’ Taem Elaejah i talemaot se bambae i no gat ren o wota blong naet, go kasem taem we hem i talem se bambae i gat, i sua se hemia i mekem ol man we oli wosipim Bal oli harem nogud tumas.—1 King 17:1.
10-16 OKTOBA
OL SAS SAMTING LONG BAEBOL | 1 KING 19-20
“Lukluk i Go Long Jehova Blong Yu Harem Gud”
Lukluk i Go Long Jehova Taem Yu Harem Nogud
5 Ridim 1 King 19:1-4. Elaeja i fraet taem Kwin Jesebel i talem se bambae i kilim hem i ded. Ale, hem i ronwe i go long Bereseba. Tingting blong hem i foldaon, mo hem i talem se: “Sipos mi mi ded nomo, bambae i moa gud.” ?From wanem hem i harem nogud olsem? Elaeja i no stret olgeta, hem i “wan man we i gat filing olsem yumi.” (Jem. 5:17) Elaeja i harem nogud tumas mo ating hem i taed. Maet hem i ting se ol hadwok blong hem blong leftemap tru wosip i blong nating nomo, i no gat wan samting we i kamgud long Isrel, mo hem wan nomo i stap gohed blong wosipim Jehova. (1 King 18:3, 4, 13; 19:10, 14) Maet yu sapraes we wan gudfala profet blong Jehova i gat ol filing olsem. Be Jehova i kasem save long filing blong Elaeja.
ia 103 ¶13
God Blong Hem i Mekem Hem i Harem Gud
13 ?Yu ting se Jehova i harem olsem wanem taem hem i stap long heven mo i luk gudfala profet blong hem i stap ledaon aninit long wan smol tri long draeples, mo i stap askem blong Jehova i tekemaot laef blong hem? Maet yu save ansa. Afta we Elaejah i slip ded, Jehova i sanem wan enjel i kam long hem. Enjel ya i tajem hem slo nomo blong wekemap hem, mo i se: “Yu girap mo yu kakae.” Ale, Elaejah i girap mo i kakae. Enjel ya i rerem wan smol kakae blong hem, wan bred we i wom wetem wota. ?Yu ting se hem i talem tangkiu long enjel ya? Baebol i talem nomo se profet ya i kakae, i dring, mo i gobak slip. ?Olsem wanem? ?Hem i harem nogud tumas nao i no save toktok? Nomata se i olsem wanem, enjel ya i wekemap hem seken taem, maet long eli moning, mo i talem wan moa taem long hem se, “yu girap mo yu kakae, from we rod we bambae yu folem i longwe tumas.”—1 King 19:5-7.
ia 106 ¶21
God Blong Hem i Mekem Hem i Harem Gud
21 Ol situesen ya wanwan oli rimaenem yumi se Jehova i no stap insaed long ol bigbigfala samting we hem i mekem, olsem win, etkwek, mo faea. Elaejah i save se Jehova i no olsem giaman god ya Bal, we ol man oli ting se hem i “sidaon long ol klaod,” o hem i god blong ren. Jehova nao i Stamba blong olgeta samting long neija, mo hem i gat moa paoa i bitim ol samting we hem i wokem. !Nating se heven i bigwan we i bigwan, be i no naf long hem! (1 King 8:27) ?Ol samting ya oli givhan olsem wanem long Elaejah? Tingbaot se Elaejah i fraet. !Be from we Jehova i stap long saed blong hem, mo hem nao i God ya we i gat paoa long olgeta samting, hem i no nid blong fraet long Ehab mo Jesebel!—Ridim Ol Sam 118:6.
ia 106 ¶22
God Blong Hem i Mekem Hem i Harem Gud
22 Afta we faea i godaon mo ples i kam kwaet, Elaejah i harem “wan smol voes we i toktok kwaet nomo.” Voes ya i askem Elaejah blong i talemaot ol filing blong hem bakegen, mo hemia seken taem we hem i talemaot ol filing blong hem. Maet hemia i mekem hem i harem gud moa. I sua se taem Elaejah i harem “smol voes we i toktok kwaet nomo” i talem nekis samting we hem i mas mekem, hem i harem gud moa. Jehova i halpem Elaejah blong i luksave se Hem i tinghae long hem. ?Hem i mekem samting ya olsem wanem? God i talemaot long hem, evri samting we bambae hem i mekem blong finisim ol man we oli stap wosipim Bal long Isrel. I klia se evri wok we Elaejah i mekem oli no blong nating, from we plan blong God i stap gohed mo i no gat wan samting i save stopem. Antap long hemia, Jehova i wantem yusum Elaejah yet blong i mekem ol plan blong hem oli kamtru, taswe Hem i sanem hem i gobak mo i talem stret samting we hem i mas mekem.—1 King 19:12-17.
Ol Gudgudfala Samting
Eksampol Blong Stap Tru Mo Blong Lego Samting We Yumi Nomo i Wantem
Plante man blong wok blong God tede, oli soemaot semkaen tingting ya we oli rere blong lego plante samting blong mekem wok blong God. Samfala oli lego “garen” blong olgeta, wok we i givhan long olgeta blong kasem ol samting blong laef, blong talemaot gud nius long ol ples farawe, no blong kam memba blong famle blong Betel. Sam narafala oli wokbaot i go long ol kantri longwe blong givhan blong bildim ol haos blong Sosaeti. Plante oli glad blong mekem wok we yumi save talem se i smol nomo. Be, i no gat wan slef blong Jehova we wok blong hem i no impoten. Jehova i gat tangkiu long olgeta evriwan we oli glad blong mekem wok blong hem, mo bambae hem i blesem olgeta from we oli lego plante samting.—Mak 10:29, 30.
17-23 OKTOBA
OL SAS SAMTING LONG BAEBOL | 1 KING 21-22
“Folem Fasin Blong Jehova Blong Yusum Otoriti”
it-2 21
Jehova Komanda Blong Ol Ami
Taem Josua i stap klosap long Jeriko, hem i luk wan enjel mo i askem long hem sipos hem i stap long saed blong ol man Isrel o long saed blong ol enemi, be hem i ansa se: “No, mi mi wan prins blong ol ami blong Jehova, taswe mi kam.” (Jos 5:13-15) Profet Mikaea i talem long King Ehab mo King Jehosafat se: “Mi mi luk Jehova i stap sidaon long tron blong hem, mo olgeta ami blong heven oli stap stanap klosap long hem, long raetsaed mo long lefsaed blong hem.” I klia se hem i stap tokbaot ol spirit pikinini blong Jehova. (1Ki 22:19-21) Fasin blong talem tok ya “Jehova komanda blong ol ami” i stret nomo, from we taem oli tokbaot ol enjel, oli no seraotem olgeta nomo long ol grup olsem ol jerubim, ol seraf, mo ol enjel, (Aes 6:2, 3; Je 3:24; Re 5:11) be oli tokbaot olgeta tu olsem wan grup we oli oganaes gud. Hemia nao from wanem Jisas i talem se Jehova i save sanem “plante taosen enjel” oli kam. (Mt 26:53) Taem Hesekia i prea long Jehova blong i halpem hem, hem i singaotem Hem se “Jehova komanda blong ol ami, we yu God blong Isrel, yu yu stap sidaon long jea blong king antap long ol jerubim.” I klia se Hesekia i stap pijarem bokis blong kontrak mo tufala jerubim ya long lid blong bokis, we oli representem tron blong Jehova long heven. (Aes 37:16; skelem wetem 1Sa 4:4; 2Sa 6:2.) Man we i stap givhan long Elisa i harem gud tumas taem hem i luk wan vison we i soemaot se raonabaot long hil ya we Elisa i stap long hem, i “fulap long ol hos mo ol jariot blong faet we oli laet olsem faea,” we hemia i wan smol haf nomo blong ol enjel blong Jehova.—2Ki 6:15-17.
“Kraes i Hed Blong Man”
9 Tingting daon. Jehova i waes moa long eni laef samting, be yet, hem i lesin long tingting blong ol man blong hem. (Jen. 18:23, 24, 32) Hem i letem olgeta we oli stap aninit long otoriti blong hem, blong oli givim sam tingting. (1Ki 22:19-22) Jehova i stret gud olgeta, be tede hem i no ekspektem se yumi mekem samting we i stret gud olgeta. Be, hem i givhan long ol man we oli no stret gud, blong oli mekemgud wok blong Hem. (Sam. 113:6, 7) Eksampol, Baebol i soem se Jehova i wan helpa. (Sam 27:9; Hib. 13:6) King Deved i luksave se hem i naf blong finisim ol bigfala wok, jes from we Jehova i gat tingting daon blong halpem hem.—2 Saml. 22:36.
it-2 245
Giaman
Jehova God i letem “tingting we i no stret” i go long ol man we oli laekem blong giaman “blong oli bilivim ol samting we oli giaman” nao oli no save bilif long gud nius blong Jisas Kraes. (2 Tes. 2:9-12) Samting we i hapen long King Ehab blong Isrel i soemaot samting ya. Ol giaman profet oli talem se Ehab bambae i winim faet agensem ol man Ramot long Gilead, be profet Mikaea i talemaot finis se hem i no save win. Mikaea i luk wan vison we Jehova i letem wan enjel blong hem blong i “trikim” ol giaman profet blong Ehab. Taswe enjel ya i pulum olgeta blong oli talem ol giaman toktok we i kamaot long tingting blong olgeta nomo mo samting we Ehab i wantem harem. Nating se hem i kasem woning long profet Mikaea, be hem i wantem moa blong lesin long ol giaman profet mo i lusum laef blong hem.—1Ki 22:1-38; 2Kr 18.
Ol Gudgudfala Samting
?Tanem Tingting i Rili Minim Wanem?
4 Naoia longfala tingting blong Jehova i kasem mak blong hem. Hem i sanem Elaejah blong i talemaot panis we bambae i kasem Ehab mo Jesebel. Hem i talem se bambae hem i finisim famle laen blong tufala. !Ol tok we Elaejah i talem, i mekem Ehab i harem nogud tumas! From samting ya, flas man ya i “mekem tingting blong hem i godaon.”—1 King 21:19-29.
5 Nating se Ehab i mekem tingting blong hem i godaon long taem ya, be fasin we hem i mekem afta i soemaot se hem i no rili tanem tingting blong hem. Hem i no traem blong finisim wosip blong Bal mo pulum ol man blong wosipim Jehova. Ehab i mekem sam narafala samting tu we i soemaot se hem i no tanem tingting blong hem.
6 Ehab i askem King Jehosafat, blong tufala i faet agensem Siria. Jehosafat i trastem Jehova, mo i talem se bambae tufala i askem advaes fastaem long wan profet blong Jehova. Be Ehab i no wantem, mo i talem se: “I gat wan narafala man we yumi save askem hem blong i faenemaot tingting blong Jehova. Be mi mi no laekem hem nating, from we hem i neva talemaot ol gudfala samting long saed blong mi, be i talemaot ol nogud samting nomo.” Nating se i olsem, tufala i askem advaes long profet Mikaea. !Ehab i talem tru, profet blong God i talemaot rabis nius nomo long saed blong hem! Ehab i no wantem tanem tingting mo askem Jehova blong i fogivim hem, be hem i girap i putum profet ya long kalabus. (1 King 22:7-9, 23, 27) Nating se hem i mekem olsem, be hem i no save blokem profet tok ya long saed blong hem blong i kamtru. Biaen, taem oli go faet, Ehab i ded.—1 King 22:34-38.
24-30 OKTOBA
OL SAS SAMTING LONG BAEBOL | 2 KING 1-2
“Wan Gudfala Eksampol Long Fasin Blong Kasem Trening”
Ol Elda Oli Trenem Narafala Blong Oli Nafgud Blong Wok
15 Stori blong Elisa i soemaot tu se, tede i impoten we ol brata oli respektem ol elda we oli stap longtaem long trutok. Afta we Elaeja mo Elisa tufala i go visitim wan grup blong ol profet long Jeriko, tufala i kam long Jodan Reva. Nao, “Profet Elaeja i tekemaot kot blong hem, i rolemap, i kilim wota ya long hem, mo wantaem nomo, wota ya i seraot long tu haf.” Mo tufala i wokbaot long drae graon i go kasem narasaed, mo taem ‘tufala i stap wokbaot i go, tufala i gohed blong storian.’ Elisa i lesin gud long evri samting we tija blong hem i talem, mo hem i gohed blong lanem ol samting ya. Elisa i neva gat tingting ya se, hem i save evri samting. Biaen, taem waelwin i tekemaot Elaeja i go, Elisa i gobak long Jodan Reva. Long ples ya, hem i kilim wota ya wetem kot blong Elaeja mo i talem se: “Hae God. Yu yu God blong Profet Elaeja. !Plis yu kam givhan long mi!” Mo wantaem nomo, wota ya i seraot long tu haf.—2 King 2:8-14.
Ol Elda Oli Trenem Narafala Blong Oli Nafgud Blong Wok
16 ?Yu yu makem se faswan merikel we Elisa i mekem, i sem mak long laswan merikel we Elaeja i mekem? ?Hemia i tijim yumi long wanem? Elisa i no gat tingting ya se, naoia we hem i profet, hem i mas mekem wan samting we defren long samting we Elaeja i mekem. Defren olgeta, hem i mekem ol samting, olsem we Elaeja i mekem. Elisa i soemaot se hem i respektem tija blong hem, mo hemia i givhan long ol narafala profet blong oli trastem hem. (2 King 2:15) Elisa i mekem wok blong profet blong 60 yia, mo Jehova i givim paoa long hem blong mekem plante moa merikel, i bitim Elaeja. ?Stori ya i tijim ol brata we oli kasem trening, long wanem samting?
Ol Gudgudfala Samting
Ol Bigfala Poen Long Buk Blong Seken King
2:11—?Wanem “heven” ya we ‘waelwin i tekem Elaeja i go antap long hem’? Hemia i no ples ya farawe long yunives mo tu hem i no ples blong ol spirit man we God mo ol enjel blong hem oli stap long hem, nogat. (Dutronome 4:19; Ol Sam 11:4; Matiu 6:9; 18:10) “Heven” ya we Elaeja i go long hem hemia skae. (Ol Sam 78:26; Matiu 6:26) Kat blong faet we ol hos i pulum i ron i kam pas nao wantaem nomo i tekemaot Elaeja i karem hem i go long wan narafala ples long wol ya nomo, mo hem i gohed blong laef long ples ya blong smoltaem. Ol yia i pas, ale, Elaeja i sanem wan leta i kam long king blong Juda, Jehoram.—2 Kronikel 21:1, 12-15.
31 OKTOBA–6 NOVEMBA
OL SAS SAMTING LONG BAEBOL | 2 KING 3-4
“Yu Kam Karem Boe Blong Yu”
“Mi Save Se Bambae Hem i Laef Bakegen”
7 Namba tu stori: Long taem blong profet Elisa, i gat wan woman Isrel we i no gat pikinini, i stap long taon ya Sunem. Oltaem hem i tekem profet Elisa i go long haos blong hem, ale Jehova i blesem hem mo man blong hem, i givim wan pikinini boe long tufala. Be sam yia biaen, boe ya i ded. Woman ya i harem nogud tumas, nao hem i wokbaot 30 kilometa blong go luk Elisa long Hil ya Kamel. Elisa i sanem man blong wok blong hem Gehasi, i go fastaem long Sunem blong mekem boe ya i laef bakegen. Be Gehasi i no save mekem. Nao Elisa i kamtru wetem mama blong boe ya.—2 King 4:8-31.
“Mi Save Se Bambae Hem i Laef Bakegen”
8 Elisa i go insaed long rum we boe ya i stap long hem, mo i prea. Jehova i ansarem prea ya nao i mekem boe ya i laef bakegen. !Taem mama blong boe ya i luk samting ya, hem i glad we i glad bitim mak! (Ridim 2 King 4:32-37.) Maet hem i tingbaot prea blong Hana, we fastaem hem i no save bonem pikinini, be biaen, Jehova i blesem hem wetem wan pikinini boe, Samuel. Hana i presem Jehova, se hem i “save sanem man i go” long beregraon, mo i save “tekem man i kambak, i laef bakegen.” (1 Samuel 2:6) Merikel we Elisa i mekem, i soemaot se Jehova i gat paoa blong mekem man i laef bakegen.
Ol Gudgudfala Samting
it-2 697 ¶2
Profet
“Ol Pikinini Blong Ol Profet.” Olsem buk ya Gesenius’ Hebrew Grammar i eksplenem (Oxford, 1952, p. 418), Hibru tok ya ben (pikinini blong) o benehʹ (ol pikinini blong) maet i save minim wan “memba blong wan grup o sosaeti (o blong wan traeb o blong wan spesel wok).” (Skelem wetem Neh 3:8, “wan man blong wokem oel” hem i “wan pikinini blong wan man blong wokem oel.”) Tok ya “ol pikinini blong ol profet” i save minim wan skul blong tijim olgeta we oli jusumaot olgeta blong mekem wok ya, o i wan asosiesen blong givhan long ol profet. I gat ol grup blong ol profet olsem long Betel, Jeriko, mo Gilgal. (2Ki 2:3, 5; 4:38; skelem wetem 1Sa 10:5, 10.) Samuel i lidim wan grup olsem long Rama (1Sa 19:19, 20), mo i luk olsem se Elisa tu i gat wan posisen olsem long taem blong hem. (2Ki 4:38; 6:1-3; skelem wetem 1Ki 18:13.) Sam buk oli talem se ol pikinini blong ol profet oli wokem prapa haos blong olgeta, mo oli yusum ol tul we oli boroem, mo hemia i soemaot se oli gat wan simpol laef. Plante taem oli serem rum mo kakae, mo maet olgeta wanwan oli kasem ol asaenmen blong go talemaot ol profet tok.—1Ki 20:35-42; 2Ki 4:1, 2, 39; 6:1-7; 9:1, 2.