Refrens Blong Kristin Wok Mo Laef Miting Wokbuk
7-13 NOVEMBA
OL SAS SAMTING LONG BAEBOL | 2 KING 5-6
“Olgeta We Oli Stap Wetem Yumi Oli Plante Moa”
it-1 716 ¶4
Elisa
God i Protektem Isrel Long Ol Man Siria. Long taem blong King Jehoram blong Isrel, ol man Siria oli plan blong atakem Isrel long taem we oli no tingbaot. Be evritaem we Benadad i mekem sikret plan blong go faet, Elisa i stap talemaot plan ya long King Jehoram. Fastaem Benadad i ting se wan long ol man blong hem i stap talemaot plan blong olgeta long ol enemi. Be taem hem i faenemaot se Elisa nao i stap mekem samting ya, hem i sanem ol ami i go long Dotan nao oli raonem taon ya wetem ol hos mo jariot blong holem Elisa. (PIJA, Vol. 1, p. 950) Man blong wok blong Elisa i fraet we i fraet, nao Elisa i prea blong God i openem ae blong man ya, “nao taem hem i lukluk i go, hem i luk we rijen blong ol hil i fulap long ol hos mo ol jariot blong faet we oli laet olsem faea, mo oli stap raonabaot long Elisa.” Nao taem ol ami ya blong Siria i kam klosap long hem, Elisa i prea blong God i mekem wan narafala merikel, i se: “Plis, yu mekem nesen ya i blaen.” Nao Elisa i talem long ami blong Siria se: “Yufala i folem mi,” be hem i no nid blong holem han blong olgeta, hemia i soem se tingting blong olgeta i paspas be i no ae blong olgeta we i blaen. Oli no luk save Elisa ya we oli kam blong tekem hem, mo tu oli no save se hem i stap tekem olgeta i go wea.—2Ki 6:8-19.
Elisa i Luk Faea We i Olsem Kat Blong Faet—?Yu Tu Yu Luk?
Long Dotan, ol enemi oli raonem gud ples we Elisa i stap long hem. Nating se i olsem, Elisa i stap kwaet mo i no fraet. ?From wanem? From we longtaem finis i kam, hem i bilif strong long Jehova. Yumi tu yumi mas bilif olsem. Taswe i gud yumi prea blong askem tabu spirit blong God, blong yumi save soemaot bilif mo wokem ol narafala fasin we oli olsem frut blong tabu spirit.—Lu 11:13; Ga. 5:22, 23.
it-1 343 ¶1
Blaen
Taem Elisa i prea blong ol ami blong Siria oli kam blaen, i klia se oli kam blaen long tingting. Sipos ol ae blong ol ami ya i kam blaen, bambae oli nidim blong narafala i holem han blong olgeta mo lidim olgeta. Be long stori ya, Elisa i talem long olgeta se: “Hemia i no stret rod, mo i no taon we yufala i stap lukaotem. Yufala i folem mi.” William James i tokbaot samting ya long buk blong hem, Principles of Psychology (1981, Vol. 1, p. 59) se: “Wan intresting problem we i save kamaot long bren hemia, blaen long tingting. Hemia i no min se man i no save lukluk long prapa ae blong hem be i min se hem i no naf blong kasemsave mining blong ol samting. Bren i no mekem koneksen bitwin ol samting we man i luk mo samting we hem i sud mekem. Mo tingting blong hem i lus nao hem i no save tekem aksen.” I klia se hemia nao samting we Jehova i mekem long ol ami blong Siria taem oli kasem Sameria. (2Ki 6:18-20) Maet ol man Sodom oli kam blaen olsem tu. Ol man ya oli no harem nogud from we ae blong olgeta i blaen be oli blaen long tingting from oli stap traehad blong faenem doa blong haos blong Lot.—Je 19:11.
Ol Gudgudfala Samting
Ol Bigfala Poen Long Buk Blong Seken King
5:15, 16—?From wanem Elisa i no wantem tekem presen blong Neman? Elisa i no wantem karem presen ya from hem i luksave se merikel ya we hem i mekem long bodi blong Neman i kamaot long paoa blong Jeova be i no paoa blong hem. Yes Elisa i no wantem nating blong yusum paoa ya we God i givim long hem blong kasem mane no wan nara samting, nogat. Ol trufala man blong God tede oli no mekem wok blong Jeova from we oli wantem nomo blong kasem samting. Oli traehad blong folem advaes blong Jisas se: “Paoa ya, yufala i kasem we yufala i no pem, mo yufala i mas yusum, we oli no pem yufala from.”—Matiu 10:8.
14-20 NOVEMBA
OL SAS SAMTING LONG BAEBOL | 2 KING 7-8
“Jehova i Mekem Samting We Yu No Ekspektem i Hapen”
it-1 716-717
Elisa
Be biaen, Benadad II i faet agensem Sameria i no wetem smol ami be ful ami blong hem mo oli stap raonem taon blong Sameria. Oli blokemgud taon ya mekem se wan ripot we i go long King i se, wan woman i kakae boe blong hem. King Jehoram we i boe blong Ehab, “man ya we i stap kilim ol man i ded,” i talem wan strong promes se bambae hem i kilim Elisa. Be hem i no mekem promes ya blong hem i kamtru. Taem hem wetem soldia blong hem oli kasem haos blong profet, hem i talem se hem i no moa gat hop blong kasem help blong Jehova. Elisa i promes long king se long nekis dei bambae i gat plante kakae. Be soldia we i stap givhan long king i laf long promes ya, nao Elisa i talem long hem se: “Bambae yu yu luk samting ya wetem prapa ae blong yu, be bambae yu no kakae.” Jehova i mekem ol ami blong ol man Siria oli harem wan bigfala noes, nao oli ting se wan bigfala ami blong ol nesen i joen blong faet agensem olgeta, nao oli ronwe we oli livim ol tent mo kakae blong olgeta i stap. Taem king i faenemaot se ol ami blong Siria oli ronwe, hem i putum soldia ya we hem i trastem, i gad long get blong Sameria, mo long ples ya ol hip man Isrel oli resis i kam from oli hanggri tumas mo oli purumbut long hem, nao hem i ded long ples ya. Hem i luk ol kakae ya be hem i no kakae.—2Ki 6:24–7:20.
Ol Gudgudfala Samting
it-2 195 ¶7
Laet
Ol King Blong Laen Blong Deved. Jehova God i putumap King Deved i sidaon long tron blong rulum Isrel, mo folem daereksen blong God, Deved i soem se hem i wan waes lida blong nesen ya. From samting ya, Baebol i talem se hem i “laet blong ol man Isrel.” (2Sa 21:17) Jehova i mekem wan promes blong Kingdom wetem Deved, i se: “Mo jea blong yu blong king, bambae i stap strong blong olwe.” (2Sa 7:11-16) Taswe, ol rula we oli kamaot biaen long laen blong Deved, oli kamaot long boe blong hem Solomon we hem i olsem “laet” long ol man Isrel.—1Ki 11:36; 15:4; 2Ki 8:19; 2Kr 21:7.
21-27 NOVEMBA
OL SAS SAMTING LONG BAEBOL | 2 KING 9-10
“Strong Tingting Blong Tekem Aksen”
w11 11/15 3 ¶2
Jehu i Leftemap Klin Wosip
Jehu i kasem wan wok long taem we situesen blong ol man Isrel i nogud. Fasin blong Jesebel i nogud mo hem i gat paoa long kantri ya. Jesebel i wido blong Ehab, mo King Jehoram we i stap rul, i boe blong hem. Jesebel i lego wosip blong Jehova mo i promotem wosip blong Bal, hem i kilim ol profet blong God, mo hem i spolem tingting blong ol man tru long wok blong “prostitut” mo bisnes blong “posen mo kleva.” (2 Ki. 9:22; 1 Ki. 18:4, 13) Jehova i talemaot se bambae hem i kilim i ded evri famle blong Ehab wetem pikinini blong hem Jehoram mo Jesebel. Jehu nao bambae i lidim ol man blong mekem samting ya.
w11 11/15 4 ¶2-3
Jehu i Leftemap Klin Wosip
Jehu i no wantem toktok wetem tu mesenja we oli kam long hem, be hem i go stret long King Jehoram mo fren blong hem Ahasia, king blong Juda, we tufala i stap ron long prapa jariot blong tufala. Nao Jehoram i askem se: “Jehu ?yu yu kam long pis?” be Jehu i ansa se: “?Olsem wanem i save gat pis taem mama blong yu Jesebel i gohed blong mekem wok blong prostitut, mo i stap mekem ol bisnes blong posen mo kleva?” Jehoram i sek long ansa ya, nao hem i ronwe. !Be Jehu i spid moa bitim hem! Hem i tekemaot bonara mo i sutum ara i gotru long hat blong Jehoram mo king i foldaon i ded long jariot blong hem. Nating se Ahasia i ronwe be Jehu i faenem hem mo i kilim hem tu i ded.—2 Ki. 9:22-24, 27.
Biaen hem i mas go kilim i ded rabis kwin ya Jesebel we i famle blong Ehab. I stret nomo we Jehu i singaotem hem se: “rabis woman ya.” Taem Jehu i stap ron i go long Jisrehel, hem i luk Jesebel i stap long windo i stap lukluk i kamdaon. Kwiktaem Jehu i odarem ol haeman blong sakemaot Jesebel i kamdaon. Ale Jehu i mekem ol hos blong hem oli purumbut long woman ya. Afta long hem, Jehu i gohed blong kilim plante famle mo ol man long haos blong rabis man ya Ehab.—2 Ki. 9:30-34; 10:1-14.
w11 11/15 5 ¶3-4
Jehu i Leftemap Klin Wosip
I tru, Jehu i kilim plante man i ded. Be yet, Baebol i tokbaot hem olsem wan man we i gat strong tingting blong mekem ol man Isrel oli fri long rul blong Jesebel mo famle blong hem we oli mekem i nogud long ol man. Sipos wan lida blong Isrel i wantem mekem samting we Jehu i mekem, hem i mas wan man blong aksen mo gat strong tingting. Wan Baebol diksonari i talem se: “Man we i mekem wok olsem, i mas wan man we i nogat sore mo i gat strong tingting blong finisim gud wok ya.” “Man we i hat blong hem i sofsof tumas, maet hem i no save finisim fulwan wosip blong Bal long Isrel.”
Ating yu luksave se tede ol Kristin oli nidim sam fasin olsem blong Jehu blong fesem sam situesen. Eksampol, ?wanem aksen we yumi mas tekem sipos yumi wantem joen long sam aktiviti we Jehova i agensem? Yumi mas kwik blong tekem aksen mo gat strong tingting blong no joen. Long saed blong wosip, yumi no wantem wan narafala samting i kam moa impoten i bitim Jehova.
Ol Gudgudfala Samting
w11 11/15 5 ¶6-7
Jehu i Leftemap Klin Wosip
From we Kingdom blong Isrel i seraot long Kingdom blong Juda, maet Jehu i ting se tufala i mas gat prapa relijen blong tufala. Taswe, olsem ol faswan king blong Isrel, hem i letem wosip blong bul i gohed. Hemia i soem se hem i no trastem Jehova we i mekem hem i kam king.
Jehova i talem ol gudfala toktok long saed blong Jehu from hem i ‘mekem samting we i gud long ae blong Hem.’ Nating se i olsem, Jehu “i no wokbaot folem Loa blong Jehova we i God blong Isrel wetem olgeta hat blong hem.” (2 Ki. 10:30, 31) Taem yu stap tingting long ol gudfala samting we Jehu i mekem bifo, maet yu sapraes o harem nogud long ol samting we hem i mekem afta. Be yumi save lanem samting from. Yumi no mas ting nating long frensip blong yumi wetem Jehova. Evri dei, yumi mas traehad blong fren moa wetem God taem yumi stadi long Baebol, tingting dip long hem, mo prea long hem wetem fulhat blong yumi. Yes, i gud yumi traehad mo lukaotgud oltaem blong obei long ol Loa blong Jehova long fulhat blong yumi.—1 Ko. 10:12.
28 NOVEMBA–4 DISEMBA
OL SAS SAMTING LONG BAEBOL | 2 KING 11-12
“Wan Rabis Woman We i Flas i Mas Kasem Panis”
it-1 209
Atalia
Atalia i folem eksampol blong mama blong hem Jesebel. Taem hasban blong hem Jehoram i rul blong 8 yia, hem i pulum hem blong mekem samting we i nogud long ae blong Jehova. (1Ki 21:25; 2Kr 21:4-6) Mo tu, olsem mama blong hem, Atalia i no kea long ol man we hem i kilim i ded. Taem boe blong hem Ahasia i ded afta we hem i rul blong wan yia, Atalia i kilim i ded ol narafala long laen blong king. Be i no kilim Jehoas from we hae pris mo waef blong hem we i anti blong Jehoas, tufala i haedem hem. Afta, Atalia i putumap hem wan olsem kwin mo i rul sikis yia, stat long 905 kasem 899 B.K.T. (2Kr 22:11, 12) Ol boe blong hem oli stilim ol samting long haos blong Jehova mo oli yusum blong mekem wosip long Bal.—2Kr 24:7.
it-1 209
Atalia
Taem Jehoas i kasem 7 yia blong hem, Hae Pris ya Jehoeada i tekemaot hem long ples we i haed long hem mo i putumap hem i king stret folem laen blong ol king. Atalia i harem bigfala noes, mo i resis i go long tempol nao i luk samting we i hapen, mo hem i singaot se: “!Oli agensem kwin! !Oli agensem kwin!” Hae Pris ya Jehoeada i givim oda blong oli tekemaot hem long yad blong tempol mo kilim hem i ded long get blong hos, long pales blong king. Maet hem i laswan long haos blong rabis man ya Ehab blong i ded. (2Ki 11:1-20; 2Kr 22:1–23:21) Hemia i pruvum se: “Evri tok blong Jehova we Jehova i bin talemaot agensem haos blong Ehab, oli kamtru.”—2Ki 10:10, 11; 1Ki 21:20-24.
Ol Gudgudfala Samting
it-1 1265-1266
Jehoas
Biaen, taem Hae Pris ya Jehoeada i laef yet mo i lukaot long Jehoas olsem wan papa mo advaesa blong hem, laef blong yangfala king ya i gohed gud. Hem i mared taem hem i gat 21 yia mo hem i gat 2 waef. Wan long tufala hem i Jehoadan, we i bonem ol boe mo ol gel blong Jehoas. Klosap laen blong Deved i lus, be naoia laen we Mesaea i kamaot long hem i kam strong bakegen.—2Ki 12:1-3; 2Kr 24:1-3; 25:1.
5-11 DISEMBA
OL SAS SAMTING LONG BAEBOL | 2 KING 13-15
“Taem Yu Wok Wetem Fulhat Bambae Yu Kasem Ol Blesing”
?Yu Yu Mekem Evri Samting We Yu Naf Blong Mekem, Blong Folem Kraes?
11 Blong soemaot se i impoten blong mekem wok blong God wetem strong tingting, tingbaot wan samting we i hapen long laef blong King Joas long Isrel. Joas i stap wari se ol man Siria bambae oli winim Isrel long faet, ale hem i go krae long Elisa. Profet Elisa i talem long hem blong openem windo long saed i go long Siria mo sutum wan ara i go. Hemia i blong soemaot se Jeova bambae i givhan long ami blong Isrel blong winim ol man Siria. Tok ya i mas mekem se tingting blong king ya i kam strong. Nao Elisa i talem bakegen long Joas blong karem ol ara blong hem mo kilim graon wetem olgeta. Be Joas i kilim graon tri taem nomo. Elisa i kros long hem, i talem se sipos hem i kilim graon faef no sikis taem, bambae hem i save “winimgud” ol man Siria. Be from we hem i kilim smol nomo, bambae hem i winim olgeta tri taem nomo. Joas i no mekem wok ya wetem strong tingting, taswe hem i win smol nomo. (2 King 13:14-19) ?Yumi lanem wanem long stori ya? Yumi lanem se, sipos yumi wantem we Jeova i blesem yumi bigwan, yumi mas wok wetem olgeta hat blong yumi mo wetem strong tingting.
‘God i Givim Pei Long Olgeta We Oli Traehad Blong Faenem Hem’
?Jehova i givim pei long hu? Pol i talem se: “Ol man we oli stap traehad blong faenem hem.” Wan refrens long saed blong transletem Baebol i talem se Grik tok we oli tanem i kam “traehad blong faenem” i no min se yu “go lukaot” be i min se man i kam long God “blong wosip.” Wan narafala refrens i eksplenem se Grik veb ya i minim se man i givim ful paoa blong hem mo i fokas gud. Yes, Jehova i givim pei long olgeta we oli trastem hem, lavem hem, wosipim hem long fulhat mo paoa blong olgeta.—Matiu 22:37.
?Olsem wanem Jehova i givim pei long ol man blong hem? Hem i promesem wan gudfala fiuja, hemia laef olwe long paradaes long wol. Samting ya i soemaot lav mo gladhat blong hem blong givim samting. (Revelesen 21:3, 4) Tede tu, olgeta we oli traehad blong faenem Jehova, oli kasem ol nambawan blesing. Tabu spirit mo waes advaes blong Baebol i givhan blong oli harem gud long laef.—Ol Sam 144:15; Matiu 5:3.
Ol Gudgudfala Samting
Ol Bigfala Poen Long Buk Blong Seken King
13:20, 21—?Merikel ya i sapotem fasin ya blong ona long ol dedman? Nogat. Baebol i no talem se ol man oli bin ona long ol bun blong Elisa. Paoa blong Jeova nao i mekem merikel ya mo i sem mak taem Elisa i laef yet, paoa blong Jeova nao i bin givhan long hem blong mekem ol merikel.
12-18 DISEMBA
OL SAS SAMTING LONG BAEBOL | 2 KING 16-17
“Jehova i Gat Longfala Tingting Be i Gat Limit”
it-2 908 ¶5
Salmanesa
Hem i Stap Bos Long Isrel. Long taem blong rul blong King Hosia (stat long 758 kasem 740 B.K.T.), Salmanesa V, i go insaed long kantri ya Palestaen mo hem i mekem Hosia i kam man blong wok blong hem mo i fosem hem blong pem takis evri yia. (2Ki 17:1-3) Be biaen Hosia i no pem takis ya mo Salmanesa i faenemaot se Hosia i plan wetem King So blong Ijip blong agensem hem. (Luk SO.) From samting ya, Salmanesa i fasem Hosia mo i putum hem long kalabus mo afta ol soldia oli raonem taon ya Sameria blong tri yia, nao oli winim taon ya mo tekem ol man Isrel oli go kalabus.—2Ki 17:4-6; 18:9-12; skelem wetem Ho 7:11; Esi 23:4-10.
it-1 414-415
Tekem Olgeta i Go Kalabus
Tufala kingdom ya, hemia ten traeb kingdom long not (Isrel) mo tu traeb kingdom long saot (Juda), oli go kalabus long ol narafala kantri, from we tufala i lego trufala wosip mo oli wosipim ol giaman god. (Du 28:15, 62-68; 2Ki 17:7-18; 21:10-15) Jehova i gohed blong sanem ol profet blong hem blong givim woning long tufala be oli no lesin. (2Ki 17:13) I nogat wan king long ol ten traeb kingdom blong Isrel we i finisim fulwan giaman wosip we faswan king blong olgeta Jeroboam, i stanemap. Kingdom blong Juda long saot, i no lesin long ol woning blong Jehova mo lanem lesen long eksampol blong kingdom blong Isrel long not we i foldaon mo i go kalabus long narafala kantri. (Jer 3:6-10) From samting ya, ol narafala kantri oli kam winim tufala kingdom ya wanwan mo tekem ol man blong olgeta oli go kalabus.
Ol Gudgudfala Samting
it-2 847
Man Sameria
Faswan taem we Baebol i yusum tok ya “ol man Sameria,” hemia afta we kingdom blong ol ten traeb long Sameria i lusum faet long yia 740 B.K.T. Afta we ol man Asiria oli winim faet ya, oli tekem ol man blong narafala ples oli kam stap long Sameria, so tok ya “ol man Sameria” i blong makem ol man we oli laef bifo long faet ya, be i no ol man we oli jes kam afta. (2Ki 17:29) I luk olsem se ol man Asiria oli no tekemaot evri man Isrel long ples ya, from we 2 Kronikel 34:6-9 (skelem wetem 2Ki 23:19, 20) i soem se i gat sam man Isrel i stap yet long ples ya, taem King Josaea i rul. Biaen, tok ya “ol man Sameria” i minim ol pikinini blong ol man Isrel mo pikinini blong olgeta ya we ol man Asiria oli tekem i kam. I sua se sam long ol pikinini ya oli blong ol man Isrel we oli maredem ol man narafala ples. Mo sam yia afta, nem ya i joen moa wetem fasin blong wosip, be i no moa karem tingting blong laen o politik. “Ol man Sameria” i minim ol man we oli joen long wan skul we i stap long ples ya Sekem mo Sameria bifo, mo sam long ol tijing blong olgeta i defren long tijing blong ol man Jiu.—Jon 4:9.
19-25 DISEMBA
OL SAS SAMTING LONG BAEBOL | 2 KING 18-19
“Ol Enemi Oli Wantem Mekem Yumi Fraet”
Ol Bigfala Poen Long Buk Blong Seken King
18:19-21, 25—?Olsem wanem? ?Hesekia i mekem wan kontrak wetem ol man Ijip? Nogat. Tok we haeman ya Rabsake i talem i giaman nomo, mo tu hem i giaman taem hem i talem se hem i kam long ples ya from we ‘Jeova nao i singaot hem.’ King Hesekia i dipen fulwan long Jeova.
w10 7/15 13 ¶3
“Yu No Fraet. Mi Bambae Mi Halpem Yu”
Rabsake i yusum plante toktok blong traem pulum man blong gat tu tingting. Hem i talem se: “?Be i no [Jehova] nao we Hesekia i bin karemaot ol hae ples blong hem mo ol olta blong hem? . . . Jehova hem wan i talem long mi se: ‘Yu go faet agensem ples ya mo yu spolem gud.’” (2 Ki. 18:22, 25) Yes, Rabsake i stap talem se Jehova bambae i no faet blong sevem ol man blong hem, from Hem i kros long olgeta. Be hemia i no tru. Jehova i glad long Hesekia mo ol man Isrel we oli kambak blong mekem tru wosip bakegen.—2 Ki. 18:3-7.
?Hu Ya Ol Nambawan Lida?
14 King blong Asiria mo ol ami blong hem, oli stap long taon ya Lakis, long saotwes blong Jerusalem. Nao hem i sanem tri haeman blong hem blong oli go talem long ol man long Jerusalem se oli mas putum olgeta long han blong hem. Wan long trifala ya we oli stap singaot hem se Rabsake, hem i toktok long ol man ya long lanwis blong olgeta. Fastaem, hem i traem blong pulum olgeta blong oli no lesin long King Hesekia, be oli obei long ol man Asiria. Biaen, hem i giaman long olgeta se bambae hem i putum olgeta long wan narafala kantri we i gat plante gudfala samting long hem, mo oli save harem gud long ples ya. (Ridim 2 King 18:31, 32.) Mo hem i talem se ol god blong ol narafala nesen oli no naf blong protektem ol man blong olgeta, taswe Jehova tu bambae i no naf blong sevem ol man Jerusalem. Be ol man Jerusalem oli waes, oli stap kwaet nomo, oli no talem wan tok nating. Tede, ol man blong Jehova oli stap folem eksampol blong olgeta.—Ridim 2 King 18:35, 36.
yb74 177 ¶1
Pat 2—Jemani
I intresting blong luk olsem wanem ol SS oli traem blong trikim ol Witnes blong saenem wan pepa blong talem se oli lego bilif, mo afta we oli saenem, oli stat blong mekem i nogud long olgeta bitim bifo. Karl Kirscht i talem se: “Oli yusum ol trik we i tagetem ol Witnes blong Jehova insaed long ol rabis kalabus, bitim ol narafala. Oli ting se long rod ya oli save pulum olgeta blong saenem pepa. Oli gohed blong askem mifala blong mekem samting ya. Samfala oli saenem, be plante oli mas wet bitim wan yia bifo we oli go fri. Mo taem oli stap wet, ol SS oli stap soemaot long evriwan se olgeta ya oli gat tu fes mo oli man blong fraet, mo tu oli mekem olgeta oli wokbaot raon (‘honor walk’) long ol brata blong olgeta bifo we oli aot long kamp.”
Ol Gudgudfala Samting
it-1 155 ¶4
Akeoloji
Wan eksampol, Baebol i talem se Adramelek mo Sareja i kilim ded papa blong tufala, King Senakerib blong Asiria. Mo Esaradon we i narafala pikinini blong hem i kam king. (2Ki 19:36, 37) Be long histri blong Babilon oli talem se wan boe blong Senakerib i girap agensem hem mo i kilim hem i ded, long namba 20 blong manis Tebet. Berossus we i pris blong Babilon samwe 2,300 yia bifo, mo Nabonidus we i king blong Babilon samwe 2,600 yia bifo, tufala i talem sem samting se wan nomo long ol pikinini blong Senakerib i kilim hem i ded. Be biaen ol man oli faenem sam pis blong ston blong Esaradon (Prism of Esar-haddon), Esaradon ya i kam king long ples blong papa blong hem Senakerib. Hem i raetem klia long ston ya se tufala brata blong hem oli girap agensem papa blong olgeta mo kilim hem i ded, afta tufala i ronwe. Philip Biberfeld i tokbaot samting ya long buk ya Universal Jewish History (1948, Vol. I, p. 27), we i se: “Samting we Histri blong Babilon, Nabonid, mo Berossus i talem i no stret, be samting we Baebol i talem i tru. Oli pruvum se evri toktok blong Esaradon oli tru i bitim ol samting we histri blong Babilon i talem long saed blong ol samting we oli hapen long Babilon mo Asiria. Hemia i soemaot se i impoten tumas blong jekemgud ol histri we oli no laenap wetem samting we Baebol i talem.”
26 DISEMBA–1 JENUWARE
OL SAS SAMTING LONG BAEBOL | 2 KING 20-21
“Prea i Pulum Jehova Blong Givhan”
ip-1 394 ¶23
King i Kasem Blesing From Bilif Blong Hem
23 Samwe long faswan taem we Senakerib i kam blong agensem Juda, Hesekia i sik bigwan mo Aesea i talem long hem se bambae hem i ded. (Aesea 38:1) King ya we i gat 39 yia nomo, i harem nogud tumas. Hem i no wari nomo long sik blong hem, be hem i wari tu long ol man Jerusalem mo Juda. Oli stap long denja from ol man Asiria oli stap kam blong faet agensem olgeta. Sipos King Hesekia i ded, ?hu bambae i lidim faet? Long taem ya, Hesekia i nogat boe blong i rul long ples blong hem. Nao Hesekia i askem strong long Jehova blong i sore long hem.—Aesea 38:2, 3.
!Mekem Wok Blong Jehova Long Olgeta Hat Blong Yu!
16 Biaen, Hesekia i sik we klosap hem i ded. Long hadtaem ya, hem i prea long Jehova blong i givhan long hem, mo i askem long Jehova blong i tingbaot ol gudfala wok we hem i mekem. (Ridim 2 King 20:1-3.) Jehova i ansa long prea blong Hesekia, mo i tekemaot sik blong hem. Baebol i soemaot se tede God i no save mekem merikel blong tekemaot sik mo mekem laef blong yumi i longfala moa. Be olsem Hesekia, yumi save askem help blong Jehova. Yumi save talem se: “Hae God, plis yu tingbaot mi. Oltaem mi stap wok blong yu long olgeta paoa blong mi, mo long olgeta tingting blong mi.” ?Olsem wanem? ?Yu yu bilif se Jehova bambae i givhan long yu taem yu yu sik?—Sam 41:3.
g02 01 15 ¶4
?Olsem Wanem Prea i Save Givhan Long Mi?
Long saed blong sam man blong bilif we Baebol i tokbaot, God i ansa stret long prea blong olgeta, mo sam samtaem hem i mekem merikel blong ansa. Olsem nao, taem King Hesekia i kasem save se bambae hem i ded from sik blong hem, hem i prea wetem fulhat blong hem, blong askem God blong sevem hem. God i ansa se: “Mi mi harem prea blong yu, mo mi luk we yu harem nogud tumas, yu stap krae. Bambae mi mekem yu yu kam oraet bakegen.” (2 King 20:1-6) Sam narafala man mo woman we oli onagud long God tu, oli bin luk we God i mekem wan samting blong halpem olgeta.—1 Samuel 1:1-20; Daniel 10:2-12; Ol Wok 4:24-31; 10:1-7.
Ol Gudgudfala Samting
it-2 240 ¶1
Tul Blong Levelem Samting
Ol man oli save yusum tul blong levelem samting blong bildim gud wan haos o jekem sipos i stret blong kipim o distroem. Jehova i talem se bambae hem i “yusum teplaen we i blong Sameria” mo “tul blong levelem samting we i blong haos blong Ehab, blong levelem Jerusalem.” God i pulum teplaen long Sameria mo long haos blong King Ehab nao i faenem se fasin blong olgeta i no stret, from samting ya oli lus. Long sem fasin, God bambae i jajem Jerusalem mo ol lida blong hem, blong soemaot ol rabis fasin blong olgeta mo blong mekem taon ya i lus. Ol samting ya i hapen long yia 607 B.K.T. (2Ki 21:10-13; 10:11) God i yusum Aesea blong talemaot trabol we bambae i kasem ol flas man blong Jerusalem wetem ol lida blong olgeta. Hem i se: “Mo bambae mi mekem jastis i kam teplaen, mo stret fasin i kam tul blong levelem samting.” God ya we i stamba blong tru jastis mo stret fasin, bambae i soemaot ol trufala man blong hem we bambae hem i kipim mo ol man we oli no blong hem we bambae hem i distroem.—Aes 28:14-19.