Winim Ol Traem Long Fasin Blong Stap Strong Oltaem
“Yufala i mas putum nyufala fasin blong laef we God i wokem i stret olsem we hem i wantem. Fasin blong laef ya i kamaot long trufala stret fasin mo fasin blong stap strong long God oltaem.”—EFESAS 4:24, NW.
1. ?From wanem i stret we yumi stap strong long Jeova oltaem?
I GAT plante rod we yumi save folem blong winim ol traem long fasin blong stap strong oltaem. Samting we i impoten moa, hemia blong winim ol samting we oli traem fasin blong yumi blong stap strong oltaem long Jeova God. Tru tumas, taem yumi tingbaot se Jeova i hu, wanem we hem i bin mekem blong yumi, mo from we yumi givim laef blong yumi finis long hem, yumi mas stap strong long hem oltaem. ?Olsem wanem yumi save soemaot se yumi stap strong long Jeova God oltaem? Faswan rod, hemia se yumi mas stap strong oltaem long ol stret rul blong Jeova.
2, 3. ?Long wanem rod fasin blong stap strong oltaem i joen long stret fasin?
2 Blong winim traem ya, yumi mas folem ol tok we oli stap long 1 Pita 1:15, 16, se: “God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala tu i mas klin gud. Long Baebol God i talem finis se, ‘Yufala i mas tabu, yufala i mas klin gud, olsem we mi mi tabu, mi mi klin gud.’ ” Fasin blong stap strong long Jeova God oltaem, bambae i pusum yumi blong obei oltaem long hem, bambae i mekem tingting, toktok, mo fasin blong yumi i laenap wetem ol tabu samting we hem i wantem. Samting ya i minim se, oltaem yumi mas gat wan tingting we i no jajem yumi. Taswe, 1 Timote 1:3-5 i givim advaes ya long yumi, i se: “Mi mi stap tok long yu olsem [hemia blong no tijim ol defren bilif mo blong no lesin long ol gyaman storeyan] from wan samting nomo, blong bambae fasin blong laekem tumas ol man i save kamtru moa. Be fasin ya i stap kamaot taem we tingting blong man i klin, i no stap jajem hem, mo bilif blong hem i no blong gyaman.” I tru se, i no gat wan long yumi we i stretgud olgeta, be yumi mas traem bes blong yumi blong mekem olsem.
3 Fasin stap strong long Jeova bambae i blokem yumi blong no sakem ol stret rul blong hem from fasin blong tingbaot yumi wan nomo. Yes, fasin blong stap strong long God oltaem bambae i blokem yumi blong no gat tu fes. Man blong raetem Ol Sam i stap tingbaot fasin blong stap strong long God, taem hem i singsing se: “O Jeova, tijim mi long rod blong yu. Bambae mi wokbaot long trutok blong yu. Yu mekem se mi wantem tumas long hat blong mi blong ona long nem blong yu.” (Ol Sam 86:11, NW) Blong stap strong long God oltaem, yumi nidim samting we yumi save talem se “fasin obei long ol loa we oli stap long hat.”
4, 5. ?Fasin blong stap strong long God oltaem bambae i blokem yumi blong no mekem wanem rong fasin?
4 Fasin blong stap strong long Jeova God oltaem bambae i blokem yumi blong no mekem eni samting we i save sakem doti long nem mo Kingdom blong Hem. Eksampel, wan taem i gat tu Kristin we tufala i rao, nao tufala i mekem i no stret from we tufala i tekem bisnes ya i go long kot we oli jajem man folem loa blong wol. Jaj i askem se, ‘?Yutufala tugeta i Wetnes blong Jeova?’ I klia se hem i no kasem save from wanem tufala i pas long kot. !Samting ya i rili sakem doti long nem blong Jeova! Sipos tufala brata ya, tufala i gat fasin blong stap strong long Jeova God oltaem, bambae tufala i folem advaes ya blong aposol Pol, se: “Fasin ya we yufala i stap pas long kot blong stretem ol rao blong yufala, hem i soemaot i klia we yufala i foldaon finis. ?Weswe yufala i no save letem sam long yufala i mekem i no stret long yufala? ?Weswe yufala i no save letem sam long yufala i stil long yufala? Hemia i moa gud, i winim fasin ya blong yufala.” (1 Korin 6:7) Yes, fasin ya blong stap strong long Jeova God oltaem i minim se yumi rere blong lusum sam samting blong yumi wan, i bitim we yumi sakem doti long nem blong Jeova mo ogenaesesen blong hem.
5 Fasin blong stap strong long Jeova God oltaem i minim tu se, yumi no mas letem fasin fraet long man i winim yumi. “Fasin fraet long fes blong ol man, hemia nao i wan trap, be man we i trastem Jeova, bambae i kasem ples blong sef.” (Proveb 29:25) Taswe, yumi no mas lego bilif blong yumi taem ol man oli mekem i nogud long yumi, be yumi folem eksampel blong ol Wetnes blong Jeova we oli stap long ples we bifo oli kolem Soviet Yunion, long Malawi, long Itiopia, mo long plante narafala kantri bakegen.
6. ?Fasin blong stap strong long God oltaem bambae i blokem yumi blong no joen wetem hu?
6 Sipos yumi stap strong long Jeova God oltaem, bambae yumi no fren wetem ol enemi blong hem. Hemia nao risen from wanem disaepol Jemes i raetem se: “Yufala i olsem woman we i stap mekem i krangke long man blong hem, i stap slip wetem narafala man. ?Weswe yufala i no save? Man we i stap folem ol fasin blong wol, olsem we i mekem fren wetem olgeta, wantaem nomo hem i mekem badfren long God. Taem yufala i mekem fren wetem ol fasin blong wol, semtaem nomo yufala i mekem badfren long God.” (Jemes 4:4) Yumi wantem gat fasin blong stap strong long God oltaem olsem King Deved i soemaot, taem hem i talem se: “Hae God, mi mi no laekem nating olgeta ya we oli no laekem yu, mi mi agens long olgeta from we oli stap agens long yu. Oltaem mi stap harem nogud from we olgeta ya oli stap mekem i nogud long yu. Mi mi no laekem olgeta we mi no laekem olgeta nating, oltaem mi stap makem olgeta se ol enemi blong mi nomo.” (Ol Sam 139:21, 22) Yumi no wantem kampani blong haremgud wetem eni man we i wantem mekem sin oltaem, from we oli no sem mak long yumi. Fasin blong stap strong long God bambae i blokem yumi blong no joen blong haremgud wetem ol enemi ya blong Jeova, nating se yumi kampani wetem olgeta stret, no tru long televisin.
Blokem Ol Tok We Oli Agensem Jeova
7. ?Fasin blong stap strong long God oltaem bambae i halpem yumi blong mekem wanem long saed blong Jeova, mo olsem wanem Elaehu i mekem samting ya?
7 Fasin blong stap strong long God oltaem bambae i pusum yumi blong blokem enikaen tok we i agensem Jeova God. !Elaehu i wan nambawan eksampel long saed ya! Job 32:2, 3 i talem long yumi se: “Elaehu . . . i kam kros we i kros. Hem i kros tumas long Job taem hem i stap talemaot se hem wan i stret bitim God. Mo tu, hem i kros tumas long trifala fren blong hem from we oli no faenem wan ansa, be oli gohed blong talem se God i mekem i no stret.” Long Job japta 32 kasem japta 37, Elaehu i blokem ol tok we oli agensem Jeova. Eksampel, hem i talem se: “Mekem tingting blong yu i longfala mo wet smol, mo bambae mi soemaot long yu se i gat sam tok yet blong talem long saed blong God. . . . Bambae mi talemaot se Man we i Wokem mi, hem i gat stret fasin. . . . Hem i no save tanem baksaed long wan stret man.”—Job 36:2-7.
8. ?From wanem yumi mas blokem ol tok we oli agensem Jeova?
8 ?From wanem i nidim blong blokem ol tok we oli agensem Jeova? Tede, ol man oli stap tok nogud long God blong yumi, Jeova, long plante rod. Oli talem se hem i no stap nating, hem i haf blong wan Triniti, hem i save mekem man i harem nogud blong olwe long hel faea, hem i no naf blong jenisim wol i kamgud, hem i no kea long ol man, mo plante narafala samting bakegen. Yumi soemaot se yumi stap strong oltaem long Jeova, taem yumi blokem ol rabis tok ya mo yumi pruvum se Jeova i rili stap; hem i wan God we i waes, i stretgud, i gat olgeta paoa, mo i gat lav; hem i putum wan stret taem blong mekem evri samting; mo se long stret taem blong hem, bambae hem i finisim olgeta rabis fasin mo mekem fulwol i kam wan paradaes. (Eklesiastis 3:1) Samting ya i minim se yumi mas yusumgud evri jans we yumi gat blong talemaot nem mo Kingdom blong Jeova.
Stap Strong Long Ogenaesesen Blong Jeova Oltaem
9. ?Wanem ol risen we oli mekem se sam man oli lego fasin blong stap strong oltaem?
9 Naoia bambae yumi tokbaot fasin blong stap strong long ogenaesesen blong Jeova long wol ya. Yes, yumi mas stap strong oltaem long ogenaesesen ya, wetem “slef ya we i stret mo waes,” we tru long hem nao, Kristin kongregesen i stap kasem kakae long saed blong speret. (Matyu 24:45-47) Tingbaot sipos wan poen i kamaot long ol buk blong Watch Tower we yumi no kasem savegud mo yumi no agri long hem taem yumi ridim. ?Bambae yumi mekem wanem? ?Bambae yumi kam kros mo lego ogenaesesen? Hemia nao fasin we samfala oli mekem taem Wajtaoa, plante yia bifo, i talem se nyufala kontrak i stret long olgeta man we bambae oli laef long Rul Blong Wan Taosen Yia. Sam narafala oli kam kros, from samting we wantaem, Wajtaoa i talem long saed blong fasin blong no joen long faet. Sipos olgeta we oli trabol from bisnes ya oli bin stap strong long ogenaesesen mo long saed blong ol brata blong olgeta, bambae oli wet long Jeova blong i kliarem bisnes ya. Yes, long stret taem blong hem, Jeova i kliarem bisnes ya. Taswe, fasin blong stap strong oltaem, i minim tu se yumi mas gat longfala tingting mo wet kasem taem we slef we i stret mo waes i givim moa save long wan poen.
10. ?Fasin blong stap strong oltaem bambae i blokem yumi blong no wantem save long wanem samting?
10 Fasin blong stap strong oltaem long ogenaesesen blong Jeova long wol, i minim tu se yumi no mas joen nating wetem ol man blong apostasi.a Ol Kristin we oli stap strong long God oltaem, bambae oli no traem save wanem we ol man ya blong apostasi oli stap talem. I tru se, ol man we Jeova God i stap yusum blong lidim wok blong hem long wol ya, oli no stretgud olgeta. ?Be, Tok blong God i talem se yumi mas mekem wanem? ?Yumi lego ogenaesesen blong God? No gat. Lav long ol brata mo sista, i mas mekem se yumi stap strong oltaem long ogenaesesen ya, mo yumi mas gohed blong ‘laeklaekem yumi long olgeta hat blong yumi.’—1 Pita 1:22.
Stap Strong Oltaem Long Ol Elda We Oli Stap Strong
11. ?Fasin blong stap strong oltaem bambae i halpem yumi blong blokem wanem tingting we i no stret?
11 Taem wan tok no wan fasin i kamaot long kongregesen we yumi no kasem save long hem, fasin blong stap strong oltaem bambae i blokem yumi blong no jajem narafala. Be, bambae hem i halpem yumi blong tingting se maet fasin ya i kamaot from we i no gat fasin luksave. I moa gud blong makem ol gudfala fasin blong ol elda mo narafala man blong bilif, i bitim we yumi stap makem ol mastik blong olgeta. !Yes, yumi wantem blokem ol tingting ya we oli no stret, from we oli joen wetem fasin blong no stap strong oltaem! Fasin blong stap strong oltaem bambae i halpem yumi tu blong obei long advaes blong Pol se, yumi no mas “tok nogud long nem blong narafala man.”—Taetas 3:1, 2.
12, 13. ?Wanem wan bigfala traem we ol elda oli mas winim?
12 Fasin blong stap strong oltaem i rili wan traem long ol elda. Wan long ol traem ya hemia se oli no mas talemaot olbaot ol tok we i blong olgeta nomo. Maet wan memba blong kongregesen i talemaot problem blong hem long wan elda. Sipos elda ya i stap strong oltaem long man ya, bambae hem i no save brekem rul blong no talemaot olbaot ol tok we oli blong hem nomo. Bambae hem i folem advaes we i stap long Proveb 25:9, se: “Yu no mas talemaot olbaot ol tok we narafala i talem long yu nomo.” !Samting ya i minim tu se, hem i no mas tokbaot bisnes ya long waef blong hem!
13 Ol elda oli mas winim sam narafala samting we i traem fasin blong olgeta blong stap strong oltaem. ?Bambae oli man blong mekem narafala i glad nomo? no ?bambae oli kaengud blong givhan long olgeta we oli nidim fasin stretem, wetem strong tingting mo kwaet fasin, nating se oli ol stret famle no ol gudfala fren blong olgeta? Fasin blong stap strong oltaem long ogenaesesen blong Jeova bambae i pusum ol elda blong traem halpem olgeta we oli nidim help long saed blong speret. (Galesia 6:1, 2) Nating se yumi kaengud long narafala, be fasin blong stap strong oltaem bambae i mekem se yumi toktok stret wetem ol elda, olsem Pol we hem i tok stret wetem aposol Pita. (Galesia 2:11-14) Defren nao, ol elda oli mas lukaotgud, sipos oli mekem ol samting long fasin we i no waes mo oli laekem wan man i bitim narawan, no oli yusum paoa blong olgeta long fasin we i no stret, bambae i hadwok long ol man we oli stap long kea blong olgeta blong stap strong long ogenaesesen blong God oltaem.—Filipae 4:5.
14, 15. ?Wanem sam samting we maet oli traem fasin blong stap strong blong ol memba blong kongregesen?
14 I gat sam narafala rod we yumi save folem blong winim ol samting we oli save traem fasin blong stap strong oltaem long kongregesen mo long ol elda. Sipos i gat samkaen trabol long kongregesen, samting ya i givim jans long yumi blong soemaot fasin blong stap strong oltaem long Jeova mo long olgeta we oli stap wok long nem blong hem. (Lukluk Wajtaoa, Jun 15, 1987, pej 15 go kasem 17, Engglis mo Franis.) Taem kongregesen i sakemaot wan man, fasin blong stap strong oltaem bambae pusum yumi blong sapotem ol elda, i no blong traem faenemaot sipos kongregesen i sakemaot hem from gudfala risen no no gat.
15 Fasin blong stap strong long kongregesen oltaem, i minim tu se yumi mas sapotem ol faef miting we yumi gat evri wik, sipos yumi naf mo sipos ol samting long laef blong yumi oli letem yumi blong mekem olsem. Samting ya i minim se yumi mas go oltaem long ol miting ya, mo mekemrere olgeta blong givim ol ansa we oli leftemap tingting.—Hibrus 10:24, 25.
Fasin Blong Stap Strong Oltaem Insaed Long Mared
16, 17. ?Ol Kristin we oli mared oli mas winim wanem traem long fasin blong olgeta blong stap strong oltaem?
16 ?Yumi mas stap strong oltaem long hu bakegen? Sipos yumi mared, yumi mas winim olgeta traem long fasin blong stap strong oltaem long hasban no waef blong yumi, folem promes we yumi mekem long taem blong mared. Fasin blong stap strong oltaem long hasban no waef blong yumi bambae i blokem yumi blong no foldaon long mastik ya blong mekem narafala woman no man i glad long yumi i bitim we yumi mekem long prapa waef no hasban blong yumi. Fasin blong stap strong oltaem long hasban no waef blong yumi i minim tu se yumi no mas talemaot long ol narafala, ol slak fasin no ol mastik blong hasban no waef blong yumi. I moa isi blong tokbaot ol rong ya long ol narafala, i bitim we yumi wokhad blong holemtaet fasin blong toktokgud tugeta wetem hasban no waef blong yumi, we yumi mas mekem folem Golden Rul. (Matyu 7:12) Yes, mared i rili wan traem long Kristin fasin blong yumi blong stap strong oltaem.
17 Blong winim ol traem ya, yumi mas lukaotgud blong no mekem bigfala rong, be tu yumi mas bos long tingting mo filing blong yumi. (Ol Sam 19:14) Eksampel, sipos hat blong yumi we i save trik, i wantem tumas ol pleplei mo ol samting blong haremgud, bambae i isi nomo long yumi blong tingbaot yumi wan, mo tingting long samting ya gogo yumi wantem olgeta tumas. Taem King Solomon i stap tokbaot fasin blong stap tru long narafala insaed long mared, hem i givim advaes long ol hasban wetem pijatok ya se, ‘oli mas dring wora we i kamaot long wel blong olgeta nomo.’ (Proveb 5:15) Mo Jisas i talem se: “Man we i stap luk nogud long wan woman olsem we i wantem go long hem, hem i stilim woman ya finis, long tingting blong hem.” (Matyu 5:28) Ol hasban we oli stap lukluk ol buk we oli soem ol rabis pija long saed blong seks, maet samting ya i save pulum olgeta blong mekem nogud wetem wan narafala woman. Long fasin ya, i olsem we oli no stap tru mo oli no stap strong long waef blong olgeta. Long sem fasin, sipos wan waef i intres tumas blong lukluk ol film we oli soemaot store blong ol man we oli mared be oli stap slip olbaot, samting ya i save pulum hem blong i no stap strong long hasban blong hem. Be, taem yumi rili stap strong long hasban no waef blong yumi, yumi mekem mared i kam strong moa, mo yumi givgivhan long yumi blong traehad blong mekem Jeova God i glad long yumi.
Ol Samting We Oli Givhan Blong Stap Strong Oltaem
18. ?Blong halpem yumi blong stap strong oltaem, yumi mas luksave wanem samting?
18 ?Wanem bambae i halpem yumi blong winim ol traem long fasin blong stap strong oltaem long ol fofala ples ya: stap strong long Jeova, long ogenaesesen blong hem, long kongregesen, mo long hasban no waef blong yumi? Wan samting we i save givhan, hemia blong luksave se fasin ya blong winim ol traem long fasin blong stap strong oltaem, i joen wetem fasin blong leftemap hae rul blong Jeova. Yes, taem yumi stap strong oltaem, yumi soemaot se yumi luk Jeova olsem Hae Rula blong heven mo wol. Ale, yumi save gat respek long yumi wan mo gat hop blong kasem laef we i no save finis long nyufala wol blong Jeova. Taem yumi tingbaot ol nambawan eksampel long fasin blong stap strong oltaem, samting ya i givhan long yumi. I gat eksampel blong Jeova mo plante narafala eksampel we oli stap insaed long Baebol mo ol defren buk blong Watch Tower, olsem buk ya Yearbook.
19. ?Olsem wanem bilif i givhan long yumi blong stap strong oltaem?
19 Sipos yumi bilif strong long Jeova God mo fraet blong mekem hem i harem nogud, samting ya bambae i givhan long yumi blong winim ol traem long fasin blong stap strong oltaem. Bambae bilif blong yumi i kam moa strong mo yumi fraet moa long Jeova, taem yumi stadi oltaem long Tok blong God mo joen oltaem long Kristin minista wok. Samting ya bambae i halpem yumi blong wok folem advaes blong Pol long Efesas 4:23, 24, se: ‘Tingting blong yufala i mas kam nyuwan olgeta. Yufala i mas putum nyufala fasin blong laef we God i wokem i stret olsem we hem i wantem. Fasin blong laef ya i kamaot long trufala stret fasin mo fasin blong stap strong long God oltaem.’
20. Antap long ol narafala samting, ?wanem fasin bambae i halpem yumi blong stap strong oltaem long Jeova mo ol narafala we yumi mas soemaot fasin ya long olgeta?
20 Sipos yumi gat tangkyu from ol gudfala fasin blong Jeova, bambae samting ya i halpem yumi blong stap strong oltaem. Antap long hemia, yumi save stap strong oltaem sipos yumi gat lav long Papa blong yumi long heven we yumi no tingbaot yumi nomo, gat tangkyu from olgeta samting we hem i mekem long yumi, mo laekem hem wetem ful hat, laef, maen, mo paoa blong yumi. Mo tu, taem yumi gat lav ya we Jisas i talem se bambae i makemaot ol man blong hem, samting ya bambae i halpem yumi blong stap strong long olgeta Kristin long kongregesen mo long famle blong yumi. Blong talem long narafala rod, yumi soem se yumi no tingbaot yumi wan nomo. Fasin blong no stap strong, i minim se man i tingbaot hem wan nomo. Fasin blong stap strong oltaem i minim se man i no tingbaot hem wan nomo.—Mak 12:30, 31; Jon 13:34, 35.
21. ?Olsem wanem yumi save talem bakegen olgeta bigfala poen long saed blong fasin blong stap strong oltaem?
21 Blong talem bakegen ol bigfala poen: Fasin blong stap strong oltaem i wan nambawan fasin we Jeova God, Jisas Kraes, mo olgeta trufala man blong Jeova, oli soemaot. Sipos yumi wantem frengud wetem Jeova God, yumi mas winim ol traem long fasin blong yumi blong stap strong long hem oltaem. Hemia i minim se yumi mas folem olgeta stret loa blong hem, no joen nating wetem ol enemi blong hem, mo blokem ol tok we oli agensem Jeova taem yumi stap prij long ol haos wanwan no yumi tekem jans blong prij. Yumi mas winim tu ol samting we oli save traem fasin blong yumi blong stap strong oltaem long ogenaesesen blong Jeova long wol. Yumi mas stap strong oltaem long kongregesen mo long hasban no waef blong yumi. Taem yumi winim ol traem ya, yumi stap leftemap hae rul blong Jeova, mo yumi tekem saed blong hem long bisnes ya. Ale, bambae yumi save mekem hem i glad mo bambae yumi kasem praes ya, laef we i no save finis. Ol tok we aposol Pol i talem long saed blong fasin fasgud long God, oli stret long yumi taem yumi winim ol traem long fasin blong yumi blong stap strong oltaem. Fasin ya i impoten long laef blong yumi naoia mo long laef we bambae i kam long fyuja.—Ol Sam 18:25; 1 Timote 4:8.
[Futnot]
a Fasin blong lego trufala bilif mo agensem hem.
?Bambae Yu Ansa Olsem Wanem?
◻ ?Wanem ol rod we yumi save folem blong winim ol traem long fasin blong stap strong long God oltaem?
◻ ?Yumi mas mekem wanem blong stap strong oltaem long ogenaesesen blong Jeova?
◻ ?Olsem wanem ol elda oli save winim ol samting we oli traem fasin blong olgeta blong stap strong oltaem?
◻ ?Wanem sam traem long fasin blong stap strong we ol Kristin we oli mared oli mas winim?
◻ ?Wanem ol fasin we bambae oli halpem yumi blong winim ol traem long fasin blong yumi blong stap strong oltaem?
[Tok Blong Pija Long Pej 17]
Fasin blong stap strong long ol memba blong kongregesen bambae i blokem ol elda blong no talemaot ol tok we i blong olgeta nomo
[Tok Blong Pija Long Pej 18]
Fasin blong stap strong long hasban no waef i mekem mared i kam strong moa