Japta 103

Long Haos Blong God Bakegen

JISAS wetem ol disaepol blong hem oli aot long Jeriko, oli wokbaot go kasem Betani. Nao oli stap tri dei long Betani. Long moning blong namba fo dei, hemia Mande Naesan 10, olgeta oli aot long Betani, oli folem rod we i go kasem Jerusalem. Nao Jisas i hanggri. Ale hem i luk wan tri i stap, we nem blong hem figtri. Tri ya i karem fulap lif, taswe Jisas i go kolosap long tri ya blong traem faenem sam frut long hem.

I no stret taem yet blong tri ya i putum ol lif blong hem. Hem i eli tumas. Stret taem blong tri ya i gat frut, hemia Jun. Naoia hem i Maj nomo. Be nating, Jisas i ting se maet tri ya i karem frut eli, from we hem i gat lif finis. Be no gat. Tri ya i stap gyaman long hem, from we hem i gat plante lif, be hem i no gat frut. Taswe Jisas i tok nogud long tri ya, i se: “Bambae yu yu no gat frut bakegen samtaem.” Long nekis moning nomo, bambae ol man oli lanem mining blong tok blong hem mo samting we hem i mekem.

Ale Jisas wetem ol disaepol blong hem oli gohed, mo i no longtaem oli kamtru long Jerusalem. Nao Jisas i go long haos blong God. Wan dei bifo, long aftenun, hem i bin wokbaot nomo insaed long haos ya. Be naoia hem i go blong mekem wan samting, olsem we hem i bin mekem tri yia bifo, taem hem i kam blong mekem Lafet blong Pasova long yia 30 K.T. Hem i ronemaot ol man we oli stap mekem maket long vranda blong haos ya. Hem i kafsaedem ol tebel blong ol man we oli stap jenisim mane, mo ol jea blong olgeta we oli stap salem nawemba. Mo i blokem ol man we oli stap karem sam samting, oli pastru long yad blong haos blong God, blong oli no yusum yad ya olsem rod blong olgeta.

Nao hem i tok agens long olgeta we oli stap mekem maket mo jenisim mane long haos ya, i se: “Yufala i luk. Oli raetem long Baebol we God i talem se ‘Haos blong mi, bambae ol man oli talem hem se haos blong prea blong olgeta man.’ Be yufala i tanem hem finis i kam ples blong haed blong ol man blong stil.” Yes, olgeta oli mekem fasin olsem ol stil man nomo, from we oli stap askem praes we i antap tumas long olting we oli stap salem. Ol man oli no gat narafala rod blong pem anamol blong mekem sakrafaes long God. Ale oli mas pem bigfala praes ya we oli stap askem. Taswe Jisas i talem se oli stap mekem bisnes blong stilim mane long ol man.

Taem ol jif pris mo ol tija blong Loa oli harem nyus long samting we Jisas i jes mekem, ale bakegen, oli stat lukaot sam rod blong kilim hem i ded. Samting ya i soemaot se oli no save jenisim rabis fasin blong olgeta. Be oli no save olsem wanem blong faenem wan rod blong kilim Jisas i ded, from we taem hem i stap tij, fulap man oli stap kam long hem, oli glad blong harem tok blong hem.

I no ol man Jyu nomo we oli kam long Jerusalem blong mekem Lafet blong Pasova. I gat sam man blong ol narafala laen tu. Baebol i kolem olgeta “proselaet.” Tok ya i min se fastaem oli stap long ol skul blong olgeta, be biaen oli jenis, oli joen long skul blong ol man Jyu. Sam man Gris we oli ‘proselaet’ oli kam long Filip, nao oli talem long hem se oli wantem luk Jisas. Nao Filip i girap, i go talemaot long Andru. Ating hem i wantem askem long Andru sipos i stret we Jisas i mitim olgeta. Ol man Gris oli save luk Jisas i stap yet long haos blong God.

Jisas i save we sam dei biaen hem i mas ded. Taswe hem i talem wan gudfala pija tok long saed ya, i se: “Naoia, taem i kamtru finis blong God i leftemap nem blong mi, mi Pikinini blong Man. Tru mi talem long yufala, sid blong wit, hem i mas foldaon long graon, i mas ded. Sipos no, bambae hem i stap hem wan, we i no gat frut blong hem. Be sipos i ded olsem, bambae hem i gat plante frut blong hem.”

Wan sid blong wit i nating nomo. ?Be olsem wanem nao sipos wan man i planem sid ya long graon? I olsem we hem i “ded,” hem i no moa wan sid. Ale biaen hem i gru, mo biaen bakegen, hem i karem plante frut. Olsem nao, Jisas i wan stret man nomo. Be sipos hem i fasgud long God gogo ded blong hem, hem i save givim laef blong olwe long olgeta we oli bilif long hem. Olgeta ya, hemia ol man we oli gat fasin olsem hem, oli rere blong livim ol samting we olgeta nomo oli wantem. Ale Jisas i talem se: “Man we i laekem laef blong hem tumas, hem bambae i lusum laef blong hem. Be man we i no laekem laef blong hem long wol ya olsem, hem bambae i holem laef blong hem gogo i kasem laef ya we i no save finis.”

I klia we Jisas i no stap tokbaot hem wan nomo, from we nao hem i talem se: “Man we i wantem mekem wok blong mi, hem bambae i biaen long mi. Nao weples we mi bambae mi stap long hem, be man blong wok blong mi, hem tu bambae i stap long ples ya. Mo man we i mekem wok blong mi, bambae Papa blong mi i leftemap nem blong hem.” !Traem tingbaot nambawan presen ya we man i save kasem from we hem i folem Jisas mo i mekem wok blong hem! Papa ya long heven bambae i leftemap hem i go antap blong rul wetem Kraes long Kingdom long heven.

Nao Jisas i stap tingbaot ol traem we hem i mas kasem. Hem i mas harem i soa long bodi blong hem, gogo hem i ded. Hem i talem se: “Naoia tingting blong mi i hevi tumas. ?Bambae mi save talem olsem wanem? Mi no save talem se ‘Papa, plis yu no letem ol trabol ya we oli stap kam long mi naoia oli kasem mi’, no gat.” !Maet i gud sipos Papa blong hem i blokem ol traem mo trabol we i mas kam long hem! Be no gat. Olsem hem i talem: “Mi mi kam long wol ya blong [ol trabol ya] oli kasem mi.” Jisas i agri long olgeta plan blong God, taswe hem i save se i mas ded blong pemaot ol man. Matyu 21:12, 13, 18, 19; Mak 11:12-18; Luk 19:45-48; Jon 12:20-27.

▪ ?From wanem Jisas i ting se hem i save faenem sam frut long figtri, nating we i no stret taem blong tri ya i karem frut?

▪ ?From wanem Jisas i talem long olgeta we oli mekem maket long haos blong God se oli “man blong stil”?

▪ ?Olsem wanem Jisas i olsem wan sid blong wit we hem i foldaon long graon, nao hem i ded?

▪ ?Wanem tingting blong Jisas long saed blong ol traem we hem i mas kasem mo ded blong hem?

Japta 104

Hemia Namba Tri Taem We God i Tok

TAEM Jisas i stap long haos blong God, tingting blong hem i hevi tumas from we hem i stap tingbaot ded blong hem we i kam kolosap nao. Be bigfala samting we hem i wantem, se ol samting we i hapen long hem oli leftemap nem blong Papa blong hem long fes blong ol man. Taswe hem i prea olsem: “Papa, plis yu leftemap nem blong yu.”

Nao wantaem nomo, wan bigfala voes i kamaot long heven, i talem se: “Mi mi leftemap nem blong mi finis, mo bambae mi save leftemap bakegen.”

Ol man we oli stap raonabaot, oli no save wanem samting i stap hapen. Samfala oli talem se: “Hemia wan enjel i stap tok long hem.” Samfala oli ting se hemia wan tanda. !Be hemia voes blong Jeova God nomo ya! Hemia i no fastaem we samfala oli harem voes blong God, taem hem i tokbaot Jisas.

Tri yia haf bifo, taem Jisas i tekem baptaes, Jon Baptaes i harem voes blong God. Hem i tokbaot Jisas, i se: ­“Hemia pikinini blong mi, we mi laekem hem tumas. Tingting blong mi i harem gud tumas long hem.” Mo tu, samtaem biaen long laswan Lafet blong Pasova, taem bodi blong Jisas i jenis i kam narakaen, Jemes mo Jon mo Pita trifala i harem voes blong God, taem hem i se: “Hemia pikinini blong mi, we mi laekem hem tumas, tingting blong mi i harem gud tumas long hem. Yufala i mas lesingud long hem.” Naoia, long Naesan 10, fo dei bifo we Jisas i ded, God i tok long heven blong namba tri taem, mo samfala oli harem voes blong hem. Be long taem ya fulap man oli harem voes blong hem from we Jeova i toktok bigwan.

Nao Jisas i eksplenem se: “Tok ya i no kam blong mi ya mi harem. Hem i kam blong yufala i harem.” Tok ya we God i talem i blong pruvum se Jisas i Pikinini blong hem mo hem i Mesaea we ol profet bifo oli bin tokbaot. Nao Jisas i gohed long tok blong hem, i se: “Long taem ya nao, God i stap jajem ol man long wol ya. Naoia bambae God i brekem paoa blong masta blong wol ya Setan.” From we Jisas i stap tru long God long ful laef blong hem, hem i soemaot se i stret nomo we God i “brekem paoa” blong masta blong wol ya Devel Setan. Yes, i stret nomo we bambae Setan i lus.

Nao Jisas i gohed blong tokbaot samting we bambae i kamaot from ded blong hem, i se: “Taem we ol man bambae oli leftemap mi mi hang antap, mi bambae mi pulum olgeta man oli kam long mi.” Ded i no save spolem plan blong Jisas nating. Be ded blong hem bambae i pulum plante man oli kam long hem, blong oli save kasem laef we i no save finis.

Be ol man oli ansa long hem se: “Mifala i harem finis long Loa blong yumi, we taem Mesaea ya i kam, hem bambae i save stap olwe, gogo i no save finis. ?Olsem wanem yu yu save talem se ‘Bambae ol man oli leftemap Pikinini blong Man blong i ded’? ?Pikinini blong Man ya, hemia hu ya?”

Nating we ol man ya oli luk plante saen we Jisas i mekem, mo oli harem voes blong God hem wan, be bighaf blong olgeta oli no bilif yet se Jisas hem i trufala Pikinini blong man, hemia Mesaea we ol profet bifo oli tokbaot. Sikis manis bifo long Lafet we oli Wokem ol Wansaed Haos, Jisas i bin talem se hem i olsem “laet” long ol man long wol. Naoia hem i tokbaot sem samting bakegen, mo hem i pulum ol man we oli stap lesin long hem, i se: “Taem we laet i stap yet wetem yufala, yufala i mas bilif long laet, blong yufala i save kam man blong laet.” Taem Jisas i talem ol tok ya finis, hem i gowe long olgeta, i go haed, from we hem i save se oli wantem kilim hem i ded.

Jisas i mekem plante saen finis blong soemaot paoa blong God long ol man Isrel, be olgeta oli no bilif long hem. Fasin blong olgeta i stret long profet tok blong Aesea bifo, taem hem i talem se ‘ae blong ol man i kam blaen, mo hat blong olgeta i kam strong, taswe oli no save tanem tingting blong olgeta from ol sin blong olgeta blong oli harem gud bakegen.’ Long wan samting olsem drim, Aesea i luk ples blong Jeova long heven. Hem i luk Jisas Kraes tu wetem paoa blong hem, taem hem i stap wetem Jeova, bifo we hem i kam long wol. Be olsem Aesea i talem finis, ol man Isrel oli stronghed tumas, oli no wantem luksave ol saen we Jisas i mekem we oli soemaot se hem i man blong sevem ol man.

Samfala nomo oli gat narafala tingting. Sam haeman blong ol man Isrel [sam memba blong Kaonsel blong ol man Isrel we oli kolem Sanhedrin] oli bilif long Jisas. Nikodimas mo Josef, wan man Aramatia, tufala i haeman, mo tufala ya i bilif long Jisas. Be ol haeman ya oli no talemaot bilif blong olgeta yet, from we oli fraet se bambae oli lusum haenem blong olgeta long haos prea blong ol man Isrel. !Man, olgeta ya oli mestem bigwan!

Nao Jisas i talem long olgeta i se: “Man we i bilif long mi, hem i no bilif long mi nomo ya, i bilif long hemia we i sanem mi mi kam. Mo man we i luk mi, hem i luk hemia we i sanem mi mi kam. . . . Man we i harem tok blong mi, be i no save obei long hem, bambae wan i save jajem hem, be i no mi ya. From we mi mi no kam long wol ya blong jajem ol man long wol, mi kam blong mi sevem olgeta. . . . Bambae long Lasdei, ol tok ya blong mi oli save jajem olgeta.”

Jeova i laekem tumas ol man, taswe hem i sanem Jisas, blong ol man oli save wokem strong bilif long hem, nao bilif ya i save sevem olgeta. Samting we bambae i sevem man, hemia we man ya i obei long ol tok blong Jisas, we God i givim long hem. Jajmen blong ol man bambae i kamaot “long Lasdei,” hemia long Wan Taosen Yia Rul blong Kraes.

Las tok blong Jisas i olsem: “Ol tok ya blong mi oli no kamaot long mi nomo, no gat. Papa ya blong mi we i sanem mi mi kam, hem i talemaot long mi wanem fasin blong tok bambae mi folem, mo wanem tok bambae mi talem. Mo mi mi save finis we tok ya we hem i talem i stap tekem laef ya we i no save finis i kamtru. Nao from samting ya, ol tok ya we mi mi stap talemaot, hemia ol tok ya we Papa blong mi i talemaot long mi finis blong mi talem.” Jon 12:28-50; 19:38, 39; Matyu 3:17; 17:5; Aesea 6:1, 8-10.

▪ I gat tri taem we sam man oli harem voes blong God, taem hem i tokbaot Jisas. ?Wanem trifala taem ya?

▪ ?Olsem wanem profet Aesea i luk paoa blong Jisas?

▪ ?Hu ya ol haeman we oli bilif long Jisas? ?Be from wanem oli no talemaot bilif blong olgeta?

▪ ?“Lasdei” hem i wetaem? ?Long taem ya, wanem samting we bambae i save sevem man?