Japta 113

Tingting Daon Long Las Pasova

JISAS i talem long Pita mo Jon blong tufala i go long Jerusalem blong mekemrere ol samting blong lafet ya blong Pasova. Ale tufala i kamtru long Jerusalem, nao tufala i stap mekem olsem Jisas i talem. I luk olsem we ol ten narafala aposol oli kamtru wetem Jisas, let long aftenun long sem dei ya. Taem Jisas wetem kampani blong hem oli stap wokbaot i godaon long bigfala Hil blong ol Oliftri, san i stap go slip. Hemia lastaem long delaet, we Jisas i stanap long hil ya, mo i lukluk i godaon long Jerusalem. Bambae hem i no moa mekem olsem gogo hem i laef bakegen long ded.

I no longtaem Jisas mo kampani blong hem oli kamtru long taon ya. Oli go long haos we bambae oli mekem Lafet blong Pasova long hem. Nao oli go antap long wan bigfala rum long haos ya. Long ples ya, evri samting i stap rere blong mekem Lafet blong Pasova. Hem i wantem tumas blong mekem lafet ya, taswe hem i talem se: “Long tingting blong mi, mi mi wantem tumas blong yumi kakae kakae ya blong Pasova fastaem, nao biaen bambae olgeta oli mekem mi mi harem nogud long bodi blong mi.”

Kastom blong olgeta i blong dring fo kap waen taem oli mekem Lafet blong Pasova. Nao Jisas i tekem namba tri kap, i talem tangkyu long God from, nao i talem se: “Yufala i tekem, yufala i seraot kap ya long yufala. From we mi mi talem long yufala, i stat naoia bambae mi mi no moa save dring waen bakegen, gogo [Kingdom blong God i kamtru, NW].”

Olgeta oli stap kakae yet. Nao Jisas i aot long tebel, i stanap, i tekemaot kot blong hem, i tekem wan taoel mo wan besin, nao i kafsaedem wora i go long besin ya. Long kastom blong olgeta, man we i singaot ol narafala man blong kam kakae long haos blong hem, hem nao i mas wasem leg blong ol man ya. Be long taem ya, i no gat wan man we i bin singaot olgeta blong kakae long haos blong hem. Taswe Jisas i lukaot long bisnes ya blong wasem leg blong olgeta. Eniwan long olgeta aposol oli save tekem jans ya blong mekem olsem. Be no gat. I luk olsem we sam long olgeta oli holem tingting ya yet se oli hae moa long ol narafala. Nao taem Jisas i stat wasem leg blong olgeta, oli sem.

Taem Jisas i kam long Saemon Pita, Pita i talem long hem, i se: “Bambae yu no save wasem leg blong mi samtaem.”

Be Jisas i ansa long hem, i se: “Sipos mi mi no wasem leg blong yu, yu yu no save kam man blong mi.”

Nao Pita i talem long hem, i se: “Ale, Masta, be yu no wasem leg blong mi nomo, yu wasem han blong mi mo hed blong mi tu.”

Jisas i talem long hem, i se: “Man we i swim finis i no save wasem bodi blong hem bakegen. Hem i klin finis. Leg blong hem nomo bambae hem i save wasem bakegen. Yufala i klin finis, be i no yufala evriwan.” Jisas i save finis se Judas Iskariot i stap mekem plan blong letem hem i go long han blong ol enemi blong hem. Taswe hem i talem se: “I no yufala evriwan.”

Ale, Jisas i wasem leg blong olgeta evriwan. Mo hem i wasem leg blong Judas tu, we hem i rere blong putum Jisas long han blong ol enemi blong hem. Nao hem i putum kot blong hem bakegen, i go tekem ples blong hem long tebel. Nao hem i askem se: “?Yufala i save mining blong samting ya we mi jes mekem long yufala, no yufala i no save? Yufala i stap singaot mi se ‘Tija’, mo ‘Masta’, mo hemia i gud nomo, from we mi mi stap holem tufala nem ya. Be from we mi, mi Masta mo Tija blong yufala, mi wasem leg blong yufala, yufala tu i mas waswasem leg blong yufala. Mi mi putum wan eksampel blong yufala, blong bambae yufala i save mekem sem fasin ya nomo we mi mi mekem long yufala. Tru mi talem long yufala, i no gat man blong wok we i hae moa long masta blong hem. Mo i no gat man blong karem tok we i hae moa long man we i sanem hem. Naoia yufala i savegud ol samting ya. Oraet, sipos yufala i stap mekem olgeta, bambae yufala i save harem gud.”

!Jisas i givim wan gudfala lesen, olsem wanem oli save kam ol man blong wok we tingting blong olgeta i stap daon! Ol aposol oli no mas traem kasem fas ples. Oli no mas ting se oli hae moa long ol narafala, we ol narafala oli mas mekem wok blong olgeta. Olgeta oli mas folem eksampel blong Jisas. Hemia i no olsem wan kastom nomo we oli mas folem, blong wasem leg blong ol narafala. No gat. Hemia wan tingting we oli mas holem. Oli mas rere blong kam olsem man blong mekem wok blong narafala. Oli mas mekem i sem mak long olgeta man. Nating we wok ya i no impoten tumas, no oli no laekem, be oli mas glad blong mekem. Matyu 26:20, 21; Mak 14:17, 18; Luk 22:14-18; 7:44; Jon 13:1-17.

▪ Jisas i stap wokbaot i godoan long Hil blong ol Oliftri blong mekem Lafet blong Pasova long Jerusalem. ?Taem hem i lukluk i go long Jerusalem, from wanem taem ya i defren long ol narafala taem we hem i mekem olsemia?

▪ ?Taem oli stap mekem Pasova, Jisas i talem tangkyu long God, nao hem i givim wanem kap long ol twelef aposol blong hem, blong oli seraot long olgeta?

▪ ?Taem Jisas i stap long wol, wanem kastom blong ol man taem oli singaot sam man oli kam long haos blong olgeta? ?From wanem i no gat man we i mekem olsem long Jisas mo ol aposol long lafet blong Pasova?

▪ ?From wanem Jisas i mekem wok ya we i no wok blong haeman, blong wasem leg blong ol aposol blong hem?

Japta 114

Lodsapa

JISAS i wasem leg blong ol aposol blong hem. Nao hem i talemaot profet tok ya blong Sam 41:9, i se: “Man ya we bifo mitufala i kakae long wan plet nomo, naoia hem i tanem tingting blong hem, hem i agens long mi.” Nao tingting blong hem i kam hevi, mo hem i talem se: “Wan long yufala bambae i letem mi mi go long han blong ol enemi blong mi.”

Nao ol man blong hem oli sore tumas, oli stap askem wanwan long hem se: “?Masta, be hu? ?Mi?” Judas Iskariot tu i askem sem samting long Jisas. Jon i stap sidaon kolosap long Jisas. Nao hem i lei long jes blong Jisas, i askem long hem se: “?Masta, hu man ya?”

Jisas i ansa se: “Hem i wan long yufala ol twelef man blong mi, we yumi stap tekem supsup long bred blong yumi long wan dis nomo. Mi, mi Pikinini blong Man, bambae mi mas ded olsem we Baebol i talem, be sore tumas long man ya we bambae i letem mi mi go long han blong olgeta. Bambae i moa gud sipos man ya i no bon.” Nao Setan i kam strong long Judas bakegen. Hat blong Judas i kam nogud finis, ale Setan i tekem jans ya blong yusum hem. Biaen, long sem naet, Jisas i kolem Judas se “man blong lus.” Jisas i talem i stret nomo.

Nao Jisas i talem long Judas, i se: “Samting ya we bambae yu mekem, yu hareap long hem.” I no gat wan long ol narafala aposol blong Jisas we oli save mining blong tok ya. Judas i stap lukaot long basket blong mane blong olgeta. Nao sam long olgeta oli ting se Jisas i talem long Judas blong i go pem sam samting blong oli kakae, no blong i go givim mane long ol puaman.

Taem Judas i go afsaed finis, Jisas i mekem wan lafet wetem ol trufala aposol blong hem. Lafet ya i wan nyufala samting olgeta. I olsem wan memori long olgeta. Hem i tekem bred, i talem tangkyu long God from, hem i brekem, i givim long ol man blong hem. Mo i talem se: “Yufala i tekem, yufala i kakae.” Nao hem i eksplenem moa, i se: “Hemia i minim bodi blong mi, we bambae mi givim from yufala. Yufala i mas stap mekem samting ya blong tingbaot mi bakegen.” (NW)

Taem olgeta oli kakae bred ya finis, Jisas i tekem kap blong waen, hemia namba fo kap we oli stap yusum long Lafet blong Pasova. Hem i talem tangkyu long God from, nao i pasem hem i go long olgeta. Hem i talem long olgeta blong dring long hem, nao hem i se: “Kap ya i olsem nyufala promes blong God, [nyufala kontrak, NW] we blad blong mi, we bambae i ron from yufala, hem bambae i mekem i stanap.”

Lodsapa ya i memori blong ded blong Jisas. Ol disaepol blong Jisas oli mas mekem samting ya bakegen evri yia, long Naesan 14. Olsem Jisas i talem, oli mas stap mekem samting ya blong tingbaot hem bakegen. Lodsapa ya i save pulum olgeta blong tingtingbak long samting we Jisas mo Papa blong hem long heven tufala i mekem blong sevem ol man, oli no moa kasem ded. Ol man Jyu we oli folem Kraes, bambae oli no moa mekem Lafet blong Pasova. Bambae oli mekem Lodsapa nomo.

Nyufala kontrak ya we i stanap from blad blong Jisas, hem i tekem ples blong olfala kontrak blong Loa. Jeova God i mekem kontrak ya wetem ol 144,000 Kristin we hem i makemaot olgeta wetem tabu speret. Be i olsem we Jisas Kraes i tekem ol 144,000 man ya oli kam joen wetem God blong mekem kontrak ya. Promes ya bambae i mekem se God i save fogivim ol sin blong olgeta. Mo tu, hem i mekem se wan nesen blong ol king mo pris i save stanap long heven. Matyu 26:21-29; Mak 14:18-25; Luk 22:19-23; Jon 13:18-30; 17:12; 1 Korin 5:7.

▪ ?Jisas i talemaot wanem profet tok blong Baebol long saed blong wan fren blong hem? ?Hem i talem se profet tok ya bambae i kamtru olsem wanem?

▪ ?From wanem ol aposol oli sore tumas? ?Olgeta wanwan oli stap askem wanem?

▪ ?Jisas i talem wanem long Judas? ?Ol narafala aposol oli ting se Jisas i stap ­talem wanem long hem?

▪ ?Taem Judas i go afsaed finis, Jisas i mekem wanem nyufala lafet? ?From ­wanem hem i stanemap lafet ya?

▪ ?Hu i mekem nyufala kontrak? ?Mo hem i mekem kontrak ya wetem hu? ?Bambae wanem i kamaot from nyufala kontrak ya?

Japta 115

Wan Rao i Kamaot

LONG dei ya, Jisas i wasem leg blong ol aposol blong hem blong tijim wan gudfala lesen long olgeta: Oli mas mekem tingting blong olgeta i stap daon olsem ol man blong mekem wok blong narafala man. Afta, hem i stanemap Lodsapa blong bambae oli save tingbaot ded blong hem bakegen. Taem yumi tingbaot ol samting ya we Jisas i jes mekem, yumi sapraes long nekiswan samting we i kamaot. Ol aposol oli stat rao from wan kwestin blong olgeta: “?Hu man long yumi we i hae moa?” I luk olsem we oli stap rao longtaem finis from kwestin ya.

Tingbaot: Antap long hil, taem bodi blong Jisas i jenis i kam narakaen, ol aposol oli rao from kwestin ya. Mo tu, Jemes mo Jon tufala i askem long Jisas blong givim ples long tufala we i hae moa long ol narafala long Kingdom. From samting ya, ol aposol oli rao bakegen. Nao, long las naet we Jisas i stap wetem olgeta, ating hem i sore tumas blong luk we oli rao bakegen. ?Ale, hem i mekem wanem?

Jisas i no tok strong long ol aposol blong hem from fasin blong olgeta. Be wan moa taem bakegen hem i soemaot longfala tingting, nao hem i eksplenem long olgeta se: “Ol king blong ol hiten man oli gat paoa long ol man blong olgeta. Mo ol haeman blong olgeta oli wantem kasem nem se ‘Fren blong ol man.’ Be fasin blong yufala bambae i no olsem. . . . ?Hu man we i hae moa, man we i stap kakae long tebel, no man we i stap karem kakae i kam? Ol man oli save talem se man we i stap kakae long tebel.” Nao hem i pulum olgeta blong tingbaot eksampel blong hem, i se: “Be mi mi stap long medel blong yufala, mi olsem man blong karem kakae nomo.”

Nating we ol aposol oli mekem sam mastik, be oli bin fasgud long Jisas long ol traem we hem i kasem. Taswe hem i talem se: “Nao olsem we Papa blong mi i mekem wan kontrak wetem mi, mi tu mi mekem wan kontrak wetem yufala, from wan Kingdom.” (NW) Kontrak ya we Jisas i mekem wetem ol tru man blong hem, i joenem olgeta wetem Jisas. Bambae oli save rul wetem hem long Kingdom blong hem. Hem i mekem kontrak ya wetem 144,000 man nomo.

Nating we Jisas i mekem nambawan promes long olgeta se bambae oli rul wetem hem long Kingdom, be naoia oli stap slak long saed blong speret. Jisas i talem se: “Long naet ya, bambae bilif blong yufala evriwan i save foldaon from mi.” Be Jisas i talem long Pita se hem i prea finis from hem, blong bilif blong hem bambae i no save foldaon olgeta. Nao hem i talem long hem se: “Mo taem yu tanem tingting blong yu, yu kambak, yu biaen long mi bakegen, bambae yu mas mekem tingting blong ol brata blong yu oli strong moa.”

Jisas i gohed moa i se: “Ol pikinini blong mi, bambae mi mi no save stap longtaem bakegen wetem yufala. Mo bambae yufala i save lukaot mi. Be mi mi talem sem tok long yufala naoia, we bifo mi talem long ol lida blong ol man Isrel, se ‘Ples ya we mi mi stap go long hem, yufala i no save go long hem.’ Mi mi givim wan nyufala loa long yufala se ‘Yufala i mas laeklaekem yufala.’ Olsem we mi mi laekem yufala, ale long sem fasin, yufala i mas laeklaekem yufala. Nao from we yufala i stap laeklaekem yufala, bambae olgeta man oli luksave se yufala i man blong mi.”

Nao Pita i askem long hem se: “?Masta, bambae yu yu go long weples?”

Jisas i ansa long hem, i se: “Ples ya we mi mi stap go long hem, naoia yu yu no save biaen long mi. Biaen, bambae yu save biaen long mi.”

Nao Pita i askem long hem, i se: “?Masta from wanem mi mi no save kam biaen long yu naoia? Mi mi glad nomo blong mi ded blong givhan long yu.”

Jisas i ansa long hem i se: “?Yu yu talem se yu glad nomo blong yu ded blong givhan long mi? Tru mi talem long yu, bambae long naet ya nomo, taem faol i no singaot tu taem yet, be yu bambae yu save haedem mi tri taem, se yu no save mi.”

Nao Pita i talem long hem se: “Sipos olgeta oli wantem kilim mi wetem yu, be bambae mi mi no save haedem yu, se mi no save yu.” Ol narafala aposol tu oli talem sem samting. Be Pita i tok flas, i se: “Maet bilif blong olgeta ya evriwan i save foldaon, be bilif blong mi bambae i no save foldaon samtaem.”

Nao Jisas i tokbaot taem we hem i sanemaot olgeta aposol ya oli go prij long Galili. Olgeta oli no karem paos mo basket we i fulap blong kakae. Nao Jisas i askem long olgeta se: “?Be yufala i sot long sam samting?”

Olgeta oli talem se: “No gat.”

Nao hem i talem long olgeta, i se: “Be naoia, man we i gat paos blong hem mo basket blong hem i mas karem. Mo man we i no gat naef blong faet blong hem, i gud hem i salem kot blong hem, i go pem wan. Mi mi talem long yufala, tok ya blong Baebol we i talem se ‘Olgeta we oli kaontem hem wetem ol man blong brekem loa,’ hem bambae i kamtru long mi. From we olgeta tok we oli bin raetem long Baebol blong talem mi, bambae oli save kamtru.”

Jisas i stap tokbaot taem we bambae oli nilim hem long pos, kolosap long ol man blong brekem loa. Mo tu, hem i stap talem long ol man blong hem se bambae olgeta tu oli kasem strong trabol. Nao olgeta oli talem se: “Masta, yu luk. I gat tu naef blong faet i stap.”

Nao hem i talem se: “Oraet, i naf ya.” Bambae yumi luk we naef blong faet blong olgeta i givim jans long Jisas blong tijim long olgeta wan impoten lesen bakegen. Matyu 26:31-35; Mak 14:27-31; Luk 22:24-38; Jon 13:31-38; Revelesen 14:1-3.

▪ ?From wanem yumi sapraes we ol aposol oli stat rao?

▪ ?Taem rao i kamaot, Jisas i mekem wanem?

▪ ?Blong wanem Jisas i mekem kontrak wetem ol disaepol blong hem?

▪ ?Jisas i givim wanem nyufala loa? ?Loa ya i impoten olsem wanem?

▪ ?Olsem wanem Pita i tok flas? ?Jisas i talem wanem long hem?

▪ Jisas i talem se naoia oli mas karem paos mo basket we i gat kakae long hem. ?From wanem ol rul ya oli defren long ol rul we hem i stanemap fastaem?

Japta 116

Hem i Talem Long Ol Aposol Se Bambae Hem i Livim Olgeta

JISAS wetem ol aposol blong hem oli mekem Lodsapa finis. Oli stap yet long rum antap long wan haos. I no longtaem, bambae Jisas i no moa stap wetem olgeta. Be hem i gat plante samting blong talem long olgeta yet. Hem i leftemap tingting blong olgeta, i se: “Bambae yufala i no letem tingting blong yufala i trabol. Yufala i mas bilif long God.” Be hem i go moa, i se: “Mo yufala i mas bilif long mi tu.”

Nao Jisas i talem se: “Long haos blong Papa blong mi, i gat plante rum i stap. . . . Naoia bambae mi go mekem ples i stap rere blong yufala. . . . Blong bambae yufala i save stap long ples ya we mi bambae mi stap long hem. Ples ya we bambae mi mi go long hem, yufala i save finis rod blong hem.” Ol aposol oli no save se Jisas i stap tokbaot taem we bambae hem i go antap long heven. Taswe Tomas i askem long hem se: “Masta, mifala i no save ples ya we bambae yu yu go long hem. ?Olsem wanem bambae mifala i save rod blong hem?”

Jisas i ansa long hem, i se: “Rod ya, mi ya. Trutok ya, mi ya. Laef ya, mi ya.” Yes, oli mas bilif long hem mo folem eksampel blong hem. Long rod ya nomo, oli save go insaed long haos blong Papa long heven. Olsem Jisas i talem, se: “I no gat man i save kam long Papa blong mi, sipos mi mi no tekem hem.”

Nao Filip i talem long hem, i se: “Masta, plis yu soemaot Papa blong yu long mifala. Hemia bambae i naf blong mifala.” Ating Filip i wantem se Jisas i mekem wan samting blong oli save luk God, olsem we Moses, mo Elaeja, mo Aesea bifo oli luk God long wan samting olsem wan drim. Be ol aposol oli gat wan samting we i moa gud i bitim ol drim ya. Taswe Jisas i talem se: “Filip, mi mi stap longtaem finis wetem yufala. ?Olsem wanem yu yu no save mi yet? Man we i luk mi, hem i luk Papa blong mi.”

Fasin blong Jisas i sem mak nomo long fasin blong Papa blong hem. Taswe taem oli stap wetem hem mo oli lukluk ol fasin blong hem, i olsem we oli stap luk Papa blong hem. Be Jisas i soemaot se Papa i moa hae long Pikinini blong hem, i se: “Ol tok ya we mi stap talem long yufala, hemia i no kamaot long mi ya.” Jisas i givim ona long Papa blong hem nomo long heven from ol samting we hem i stap tijim.

Ol aposol ya oli mas harem gud taem Jisas i talem long olgeta se: “Man we i bilif long mi, hem bambae i save mekem ol wok ya we mi mi stap mekem. Yes, hem bambae i save mekem ol wok we oli strong moa blong mekem.” Jisas i no minim se ol man we oli folem hem bambae oli gat paoa blong mekem ol merikel we oli bigfala moa long olgeta we hem i mekem. No gat. Hem i minim se ol man blong hem bambae oli gohed longtaem moa long minista wok blong olgeta. Mo bambae oli mas go long plante moa ples mo prij long plante moa man bitim ol man we Jisas i prij long olgeta.

Bambae Jisas i no fogetem ol disaepol blong hem taem hem i livim olgeta. Hem i promes se: “Nao sipos yufala i askem samting long nem blong mi, wanem samting, be bambae mi mi mekem.” Mo hem i talem se: “Bambae mi mi askem long Papa blong mi, mo hem bambae i givim [wan narafala samting] i kam blong givhan long yufala. . . . Bambae hem i save stap oltaem wetem yufala. . . . Hem i Speret blong Trutok.” Biaen, taem Jisas i go antap long heven, hem i kafsaedem tabu speret i go long ol disaepol blong hem. Speret ya, hemia narafala samting ya we i blong givhan long olgeta.

Bambae i no longtaem, Jisas i livim olgeta, olsem hem i talem se: “Bambae i no longtaem, ol man blong wol ya oli no moa save luk mi.” Bambae Jisas i kam wan speret man, taswe ol man blong wol oli no save luk hem. Nao bakegen Jisas i mekem wan promes long ol aposol we oli stap tru long hem, i se: “Be yufala bambae i save luk mi yet. Mo from we mi bambae mi laef, yufala tu bambae i save laef.” Yes, taem Jisas i laef bakegen long ded, bambae hem i tekem wan bodi olsem man blong soemaot hem long olgeta. Be i no hemia nomo. Taem oli ded, bambae hem i givim laef bakegen long olgeta, nao hem i leftemap olgeta oli kam antap long heven olsem speret man.

Nao Jisas i talem wan isi rul, i se: “Man we i kasemgud ol loa blong mi, mo i stap obei long olgeta, hemia man we i laekem mi tumas. Mo man we i laekem mi tumas, Papa blong mi bambae i laekem hem tumas. Mo mi bambae mi laekem hem tumas, nao bambae mi save soemaot mi long hem, blong hem i savegud mi.”

Nao aposol ya Judas, we narafala nem blong hem se Tadeas, hem i blokem toktok blong Jisas i se: “?Masta, bambae yu mekem olsem wanem blong yu soemaot yu long mifala, be yu no soemaot yu long ol man blong wol?”

Nao Jisas i ansa long hem, i se: “Man we i laekem mi tumas, hem bambae i save obei long ol tok blong mi. Mo Papa blong mi bambae i laekem hem tumas. . . . Man we i no laekem mi, hem i no save obei long ol tok blong mi.” Ol man blong Jisas oli obei long ol tok blong hem, be ol man blong wol oli gat narafala fasin. Oli no wantem harem ol tijing blong Jisas. Taswe hem i no soemaot hem long olgeta.

Taem Jisas i stap mekem minista wok blong hem long wol, hem i tijim ol aposol blong hem long plante samting. ?Olsem wanem oli save rimemba olgeta samting ya, from we kam kasem taem ya, oli no kasem gud plante samting we Jisas i tijim long olgeta? I gud tumas we Jisas i promes long olgeta se: “Speret blong Givhan ya, we hemia Tabu Speret ya we bambae Papa blong mi i save sanem i kam long nem blong mi, bambae hem i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we bifo mi mi stap talem long yufala.”

Nao Jisas i leftemap tingting blong olgeta bakegen, i se: “Naoia we kolosap mi gowe long yufala, mi mi putum pis ya i stap wetem yufala. . . . Yufala i no letem tingting blong yufala i trabol.” Tru, Jisas bambae i gowe long olgeta, be hem i eksplenem se: “Sipos yufala i laekem mi tumas, bambae yufala i glad blong luk we mi stap go long Papa blong mi, from we hem i hae moa long mi.”

Jisas i gat smoltaem nomo i stap blong storeyan wetem olgeta. Hem i talem se: “Mi mi no save stap toktok longtaem bakegen wetem yufala naoia, from we Setan ya we i masta blong wol ya, hem i stap kam. Hem i no gat paoa long mi.” Devel Setan, we hem i go insaed long Judas mo i holem Judas aninit long paoa blong hem, hem i bos long wol ya. Be Jisas i no gat sin long bodi blong hem, taswe Setan i no save yusum wan rong tingting long Jisas blong pulum hem, i aot long wosip blong God.

Oli Harem Gud From We Oli Fren Gud Tugeta

Jisas wetem ol aposol blong hem oli mekem Lodsapa finis, nao Jisas i stap leftemap tingting blong olgeta. Toktok blong hem i isi mo i kamaot stret long hat blong hem. Ating medel naet i pas finis. Nao Jisas i talem long olgeta se: “Ale yumi girap, yumi aot long ples ya, yumi go.” Be bifo we oli girap blong goaot, Jisas i toktok moa wetem olgeta, from we hem i laekem olgeta tumas. Nao hem i talem wan pija tok long olgeta blong givim paoa long olgeta.

Hem i statem pija tok olsemia: “Prapa rop ya we oli mekem waen long frut blong hem, hemia mi ya. Mo man blong lukaot long rop ya, hemia Papa blong mi.” Man blong Lukaot long rop ya, Jeova God, hem i planem samting we i olsem rop taem hem i makemaot Jisas wetem tabu speret long baptaes blong hem long yia 29 K.T. Nao Jisas i gohed, i soemaot se rop ya i no minim hem nomo. Hem i se: “Evri han blong rop ya we oli drae, oli no save karem frut, hem i stap katemaot olgeta long mi. Mo evri han blong rop ya we oli stap karem frut, hem i stap klinim olgeta blong bambae oli save karem moa frut antap bakegen. . . . Olsem we han blong rop i no save karem frut sipos i no joengud long stampa blong rop, oraet, long sem fasin, laef blong yufala i no save karem frut sipos i no joengud long laef blong mi. Stampa blong rop, mi. Han blong rop, yufala.”

51 dei biaen, long Pentekos, ol aposol mo sam narafala man oli kam olsem han blong rop ya, taem oli kasem tabu speret. Bambae namba blong ol han blong rop ya i mas kasem 144,000 man. Olgeta wetem Jisas Kraes we hem i stampa blong rop, olgeta evriwan oli olsem rop ya we i karem frut blong Kingdom blong God.

Nao Jisas i talemaot bigfala samting we i save mekem olgeta oli karem frut, i se: “Man we laef blong hem i joen long laef blong mi, mo laef blong mi i joen long laef blong hem, laef blong hem bambae i save karem plante frut. Be sipos laef blong yufala i no joen long laef blong mi, yufala i no save mekem wan samting nating.” Nao sipos wan man i no karem frut, Jisas i talem se: “Hem i olsem wan han blong rop we oli sakemaot finis, i kam drae. Ol han blong rop olsem, ol man oli stap go pikimap olgeta, oli sakem olgeta long faea.” Be Jisas i mekem narafala promes long olgeta we oli karem frut, i se: “Sipos laef blong yufala i joen long laef blong mi, mo ol tok blong mi oli stap oltaem long yufala, wanem samting we yufala i wantem, be yufala i save askem, nao bambae yufala i kasem.”

Nao Jisas i go moa long toktok blong hem, i talem long ol aposol blong hem se: “Hemia i samting blong leftemap nem blong Papa blong mi, we laef blong yufala i karem plante frut, nao long fasin ya, yufala i kam man blong mi.” Frut ya we God i wantem se ol han blong rop oli karem, hemia ol fasin blong Kraes. Mo fasin we i impoten moa, se lav. Mo tu, from we Kraes i stap talemaot Kingdom blong God, haf blong frut ya we God i wantem se oli karem, hemia wok blong mekem disaepol olsem Jisas i bin mekem.

Nao Jisas i talem long olgeta, i se: “Yufala i mas stap long laef ya we mi mi laekem yufala tumas.” ?Olsem wanem ol aposol oli save mekem olsem? Hem i talem se: “Sipos yufala i stap obei long ol loa blong mi, bambae yufala i save stap long laef ya we mi mi laekem yufala tumas.” Nao Jisas i gohed, i eksplenem se: “Hemia loa blong mi, se ‘Yufala i mas laeklaekem yufala, olsem we mi mi laekem yufala.’ I no gat man we i laekem ol fren blong hem moa, i winim man we i givim laef blong hem blong i sevem ol fren blong hem.”

Sam haoa biaen, Jisas i soemaot nambawan lav ya, from we hem i givim laef blong hem blong pemaot ol aposol blong hem mo ol narafala man we bambae oli gat bilif long hem. Eksampel blong hem i mas pulum ol man blong hem blong laeklaekem olgeta long sem fasin, we oli rere blong givim laef blong olgeta from ol brata blong olgeta. Lav ya bambae i makemaot olgeta, se oli man blong Jisas, olsem Jisas i talem finis se: “Nao from we yufala i stap laeklaekem yufala, bambae olgeta man oli luksave se yufala i man blong mi.”

?Hu ya ol fren blong Jisas? Hem i talem se: “Sipos yufala i stap mekem ol samting we mi mi givim loa blong hem long yufala, yufala ya i fren blong mi, we mi laekem yufala tumas. Mi mi no moa save singaot yufala se ol man blong wok blong mi, from we man blong wok, hem i no save ol samting we masta blong hem i stap mekem. Naoia mi mi stap singaot yufala se ol fren blong mi, from we mi talemaot olgeta samting ya finis long yufala we mi harem long Papa blong mi.”

!Blong fren gud wetem Jisas olsemia, hemia wan gudfala samting ya! Be blong gohed blong fren gud wetem hem olsem, ol man blong hem oli mas ‘gohed blong karem frut.’ Jisas i talem se sipos oli mekem olsem, ‘mo sipos oli askem samting long Papa blong hem long nem blong hem, bambae hem i save givim long olgeta.’ !Tru, hemia wan nambawan presen we bambae oli kasem from we oli karem frut blong Kingdom! Nao bakegen Jisas i talem long ol aposol blong hem se oli mas ‘laeklaekem olgeta,’ nao biaen hem i eksplenem se bambae ol man blong wol oli no laekem olgeta, oli agens long olgeta. Be hem i leftemap tingting blong olgeta, i se: “Sipos ol man blong wol oli no laekem yufala, oli agens long yufala, yufala i mas tingbaot we oli no laekem mi, oli agens long mi fastaem.” Nao Jisas i talemaot from wanem ol man blong wol oli no laekem nating ol man we oli biaen long hem, i se: “Mi mi jusumaot yufala finis, mo mi tekemaot yufala long ol man blong wol. Taswe ol man blong wol oli no laekem yufala, oli agens long yufala.”

Nao Jisas i eksplenem moa from wanem ol man blong wol oli no laekem ol man blong hem, i se: “Bambae olgeta oli save mekem ol samting ya long yufala, from we yufala i man blong mi. Bambae oli save mekem olsem from we oli no save hemia [Jeova God] we i sanem mi mi kam.” I olsem we ol merikel blong Jisas oli jajem olgeta we oli no laekem hem nating, olsem hem i talem, se: “Sipos mi no mekem ol wok ya long fes blong olgeta, we i no gat narafala man i save mekem olsem, bambae oli no gat poen long olgeta from ol sin blong olgeta, be mi mi mekem ol wok ya finis. Mo olgeta oli luk finis, be oli no laekem mi mo Papa blong mi, oli stap agens long mitufala yet.” Taswe, olsem Jisas i talem, fasin blong olgeta i mekem tok ya i kamtru we ol man blong bifo oli bin raetem, i se: “Oli no laekem mi, oli agens long mi, be from nating nomo.”

Nao Jisas i leftemap tingting blong olgeta bakegen, olsem hem i mekem finis. Hem i promes se bambae hem i sanem bigfala paoa blong God, tabu speret, blong givhan long olgeta. Hem i se: “Hem bambae i save talemaot mi. . . . Mo bambae yufala tu i mas talemaot mi.”

Moa Advaes Bifo We Hem i Livim Olgeta

Jisas wetem ol aposol blong hem oli stap rere blong goaot long rum we oli stap storeyan long hem, antap long wan haos. Nao Jisas i talem long olgeta se: “Mi mi stap talemaot ol samting ya long yufala blong bambae bilif blong yufala i no save foldaon.” Nao hem i givim wan strong woning long olgeta, i se: “Bambae olgeta oli save ronemaot yufala long ol haos blong prea blong olgeta. Mo i gat taem i stap kam we man we bambae i kilim yufala, hem bambae i ting se hem i stap mekem gudfala wok blong God.”

Ol aposol oli fraet long woning ya we Jisas i jes givim. Bifo finis, Jisas i talem se ol man blong wol bambae oli no laekem nating ol man blong hem, be hem i no talem klia long olgeta se bambae oli save kilim olgeta oli ded. Nao Jisas i eksplenem long olgeta, se: “Fastaem mi mi no talemaot ol samting ya long yufala, from we mi mi stap wetem yufala.” !Be naoia, hem i rere blong livim olgeta! Taswe i gud tumas we hem i talem ol samting ya long olgeta blong oli rere long tingting blong olgeta.

Jisas i gohed i se: “Bambae i no longtaem, mi mi aot, mi gobak long hemia we i sanem mi mi kam. Mo i no gat wan long yufala we i askem long mi se ‘?Bambae yu yu go wea?’ ” Long sem naet, oli bin askem finis long hem se ‘?Bambae yu yu go wea?’ be naoia, oli stap seksek tumas from ol samting we Jisas i jes talem long olgeta. Taswe oli no moa askem sam kwestin bakegen long saed blong bisnes ya. Jisas i talem se: “Be naoia, from we mi talem ol samting ya long yufala, tingting blong yufala i kam nogud.” Ol aposol oli harem nogud from tufala samting: Oli jes faenemaot se bambae ol man oli save mekem bigfala trabol long olgeta, oli save harem nogud long bodi blong olgeta, mo maet oli kilim samfala oli ded. Be tu oli harem nogud from we Masta blong olgeta bambae i livim olgeta.

Nao Jisas i talem long olgeta se: “I moa gud long yufala blong mi mi gowe long yufala, from we sipos mi mi no gowe long yufala, bambae Speret blong Givhan ya, hem i no save kam stap wetem yufala. Be sipos mi gowe, bambae mi sanem hem i kam stap wetem yufala.” Taem Jisas i stap long wol, hem i no save stap long olgeta ples wantaem. Hem i save stap long wan ples nomo. Be taem hem i stap long heven, hem i save sanem tabu speret blong God blong givhan long ol man blong hem long olgeta ples long wol. Taswe i moa gud we Jisas i gowe long olgeta.

Jisas i talem se tabu speret ya, bambae “i mas soemaot we ol man blong wol oli rong long ol samting ya. Oli rong long bisnes ya blong sin. Mo oli rong long bisnes ya blong hu man i mekem i stret. Mo oli rong long bisnes ya we God i stap jajem hu.” (GNB) Ol man blong wol oli mekem sin from we oli no bilif long Pikinini blong God. Bambae sin blong olgeta i kam long klia ples. Mo tu, taem Jisas i go antap long heven long Papa blong hem, samting ya bambae i soemaot we tok mo fasin blong Jisas oli stret. Mo from we Setan mo rabis wol blong hem oli no save brekemdaon bilif blong Jisas, samting ya i soemaot se God i jajem finis masta blong wol ya.

Nao Jisas i talem se: “Mi mi gat plante narafala samting yet blong talem long yufala. Be naoia yufala i no save kasem olgeta, oli strong tumas yet long yufala.” Taswe Jisas i promes se taem hem i givim paoa blong God, tabu speret, long olgeta, hem bambae i lidim olgeta blong oli kasem save long ol samting ya long stret taem we oli naf blong kasem save long ol.

Wan samting we ol aposol oli no kasem save long hem: Oli no kasem save se Jisas bambae i ded, mo biaen bambae hem i girap bakegen, mo bambae hem i soemaot hem long olgeta. From samting ya, oli stap asaskem long olgeta se: “?Tok ya i min wanem? Hem i talem long yumi, i se ‘Bambae i no longtaem yufala i no save luk mi. Ale biaen, bambae i no longtaem bakegen, yufala i save luk mi bakegen.’ Mo i talem se ‘From we bambae mi go long Papa blong mi.’ ”

Jisas i save finis we olgeta oli wantem askem kwestin long hem, nao hem i talem long olgeta, i se: “Tru mi talem long yufala, bambae yufala i save krae we wora i ron long ae blong yufala, be ol man blong wol bambae oli glad nomo. Bambae tingting blong yufala i hevi tumas, be biaen, tingting blong yufala i save kamgud bakegen nao yufala i glad.” Biaen, long sem dei, long aftenun, oli kilim Jisas i ded. Long taem ya, ol haeman blong skul oli glad, be ol disaepol blong Jisas bambae oli krae. Be biaen, bambae tingting blong olgeta i save kamgud bakegen, nao oli save glad from we bambae Jisas i laef bakegen long ded. Mo oli save stap glad from we long Pentekos bambae hem i givim tabu speret blong God long olgeta, nao bambae oli kasem paoa blong wetnes long hem.

Nao Jisas i talem long ol aposol blong hem se taem we oli stap long hem i olsem taem woman we i gat bel, kolosap i bonem pikinini blong hem. Jisas i talem se: “Taem woman we i gat bel i kam we kolosap pikinini blong hem i bon, tingting blong hem i save kam nogud, from we i kam taem blong hem i harem nogud tumas.” Be Jisas i talem se biaen, taem pikinini blong hem i bon, hem i no moa save tingbaot ol samting ya bakegen, we bifo hem i stap harem nogud from. Nao hem i leftemap tingting blong ol aposol blong hem, i se: “Nao long yufala i olsem nomo. Naoia, tingting blong yufala i hevi. Be biaen, bambae mi mi save luk yufala bakegen [taem mi mi laef bakegen long ded], nao bambae tingting blong yufala i fulap long glad. Mo glad ya, bambae i no gat man i save tekemaot long tingting blong yufala.”

Kam kasem naoia, ol aposol oli neva askem sam samting long God long nem blong Jisas. Be naoia hem i talem long olgeta se: “Sipos yufala i askem samting long Papa blong mi long nem blong mi, bambae hem i save givim long yufala. . . . From we Papa blong mi, hem i laekem yufala tumas. Hem i laekem yufala from we yufala i laekem mi, mo from we yufala i bilif we mi mi kamaot long God. Yes, mi mi aot long Papa blong mi, mi kam long wol ya. Mo bambae i no longtaem, mi mi aot long wol ya, mi gobak long Papa blong mi.”

Ol tok blong Jisas oli leftemap tingting blong ol aposol bigwan. Olgeta oli talem se: “From samting ya, mifala i save we yu yu kamaot long God.” Jisas i ansa long olgeta, i se: “?Man, naoia nao yufala i bilif long mi? Yufala i lesin. I gat taem i stap kam, yes i kamtru finis, we ol man oli save ronem yufala evriwan i go wanwan. Bambae yufala evriwan i save go wanwan long ol ples blong yufala, gogo mi nomo mi stap, mi wan.” !I strong blong bilif, be long sem naet nomo, samting ya i hapen!

Nao Jisas i talem se: “Mi mi talemaot ol samting ya finis long yufala, blong bambae tingting blong yufala i save stap kwaet.” Nao hem i finisim toktok blong hem, i se: “Bambae ol samting blong wol ya oli save mekem yufala i harem nogud tumas long bodi blong yufala. Be yufala i no fraet. Mi mi winim ol samting blong wol ya finis.” Yes, Jisas i winim ol samting blong wol ya finis, from we hem i stap tru long God gogo hem i finisim ol wok we God i givim long hem blong mekem, nating we Setan mo wol blong hem i traehad blong brekemdaon bilif blong Jisas.

Laswan Prea Long Rum Antap

Jisas i laekem tumas ol aposol blong hem, taswe hem i bin storeyan wetem olgeta blong oli tingtingrere long samting we bambae i kamaot i no longtaem, taem Jisas bambae i livim olgeta. Jisas i storeyan wetem olgeta longtaem blong leftemap tingting blong olgeta mo blong givim advaes long olgeta. Nao biaen, hem i lukluk i go antap long heven, nao hem i askem long Papa blong hem se: “Mi wantem blong yu leftemap nem blong mi, mi Pikinini blong yu, blong mi, mi Pikinini blong yu, mi save leftemap nem blong yu. Yu yu putumap mi, mi gat paoa long olgeta man, blong mi save givim laef ya we i no save finis, long olgeta ya we yu givim olgeta long mi.”

Stampa tok blong prea blong Jisas i wekemap tingting blong man: !Laef we i no save finis! God i putumap Jisas, i gat “paoa long olgeta man.” Nao from sakrafaes blong hem, Jisas i save givim blesing long ol man we bambae oli ded. Be hem i givim “laef ya we i no save finis” long olgeta ya nomo we Papa blong hem i glad long olgeta. Nao Jisas i gohed blong prea, i stap toktok yet long saed blong laef ya we i no save finis, i se:

“Mo hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” Yes, blong kasem laef ya we i no save finis, man i mas gat save long saed blong God mo Pikinini blong hem. Be fulap save nomo i no naf, hem i nidim sam samting moa.

Man i mas save gud tufala ya, hem i mas wokem wan gudfala fasin fren wetem tufala. Man ya i mas gat sem tingting mo filing olsem tufala long olgeta samting. Mo samting we i impoten moa, man ya i mas traehad blong soemaot ol fasin blong tufala long ol narafala man, olsem we tufala i mekem long ol man.

Nao Jisas i gohed long prea blong hem i se: “Mi mi leftemap nem blong yu long wol ya, mo mi finisim ol wok ya we yu givim long mi blong mi mekem.” Kam kasem taem ya, Jisas i finisim ol wok we God i givim long hem. Mo hem i save se bambae hem i winim ol traem we oli mas kasem hem yet, taswe hem i save askem long Papa blong hem se: “Papa, naoia i taem blong yu yu leftemap nem blong mi, yu givim hae nem long mi, olsem we mi gat fastaem, taem we wol i no stap yet.” Yes, hem i stap askem long God blong givim laef bakegen long hem blong hem i save kasem bakegen glori blong hem long heven, olsem we hem i gat fastaem.

Nao Jisas i talemaot bigfala wok we hem i bin mekem long wol, i se: “Mi mi stap talemaot nem blong yu, blong mekem ol man ya we yu yu tekemaot olgeta long han blong wol blong givim long mi, oli save yu. Fastaem, olgeta ya oli man blong yu, be yu yu putum olgeta long han blong mi, oli man blong mi. Olgeta oli stap obei long ol tok blong yu.” Long minista wok blong hem, Jisas i yusum prapa nem blong God, Jeova, mo hem i talemaot nem ya i stret long lanwis blong ol man Isrel. Be hem i mekem sam samting moa blong talemaot nem blong God long ol aposol blong hem. Hem i givhan long olgeta blong kasem bigfala save moa long saed blong Jeova, mo ol fasin blong hem mo ol plan blong hem.

Jisas i save se Jeova i hae moa long hem, mo hem i stap wok aninit long han blong Jeova. Taswe, from tingting ya we i stap daon, Jisas i talem se: “Mi mi talemaot ol tok ya long olgeta we yu yu talem long mi, mo oli kasemgud. Nao oli save se i tru we mi mi kamaot long yu, mo oli bilif we yu yu sanem mi mi kam.”

Nao Jisas i soemaot se tingting blong ol man blong hem i defren long tingting blong ol narafala man. Hem i prea, i se: “Mi no prea from ol man blong wol, mi stap prea from olgeta ya we yu yu givim long mi. . . . Taem we mi stap wetem olgeta yet, mi stap holem olgeta oli sef. . . . Mi stap lukaotgud long olgeta ya, mi no lusum wan long olgeta. Wan nomo i lus, hemia man ya we i man blong lus.” Jisas i stap tokbaot Judas Iskariot. Jisas i stap talem tok ya, be long semtaem nomo, Judas i stap wokem rabis plan blong hem blong putum Jisas long han blong enemi blong hem. Judas i no luksave, be hem i stap mekem profet tok blong Baebol i kamtru.

Jisas i gohed long prea blong hem, i se: “Ol man blong wol oli no laekem olgeta, oli stap agens long olgeta. . . . Mi mi no askem long yu blong yu tekemaot olgeta long wol ya. Mi wantem blong yu blokem prapa man nogud ya Setan i no kam spolem olgeta, yu holem olgeta oli sef.” Ol man blong Jisas oli mas stap laef long wol, long medel blong ol man we Setan i masta long olgeta. Be oli mas stap longwe long ol rabis fasin blong wol ya, mo oli mas gohed blong mekem olsem.

Nao Jisas i talem se: “Plis yu makemaot olgeta long trutok, blong oli tabu, oli man blong yu. Tok blong yu, hemia trutok ya.” Oltaem Jisas i talemaot tok we oli raetemdaon long fas haf blong Baebol long Hibru lanwis. Nao Jisas i talem se tok ya, hemia “trutok ya.” Be ol samting we hem i tijim ol disaepol blong hem long olgeta, mo ol samting we biaen God i talem long olgeta blong raetemdaon long seken haf blong Baebol long Grik lanwis, olgeta samting ya tu hemia “trutok ya.” Trutok ya i save mekem man i tabu, jenisim laef blong hem olgeta, mo mekem fasin blong hem i defren olgeta long fasin blong ol man blong wol.

Be Jisas i “no prea from olgeta ya nomo.” Hem i “stap prea tu from ol man ya we bambae oli save bilif long [hem] from tok blong olgeta.” Ale, Jisas i stap prea from olgeta we bambae tabu speret i makemaot olgeta, mo from ol disaepol blong hem we long fyuja bambae oli hivap long “wan kampani nomo.” ?Hem i askem God blong mekem wanem long olgeta ya?

“Mi mi prea blong olgeta evriwan oli save stap wan nomo. Papa, laef blong yu i joen long laef blong mi, mo laef blong mi i joen long laef blong yu. Mo long sem fasin, mi mi prea blong laef blong olgeta ya i save joen long laef blong yumi, . . . blong oli save stap wan nomo, olsem we yumitufala i wan nomo.” Jisas wetem Papa blong hem, tufala i no wan bodi nomo. No gat. Be tufala i gat wan tingting long olgeta samting. Jisas i prea se ol man blong hem tu oli joen long wan tingting “blong ol man blong wol oli save luksave we yu yu sanem mi mi kam, mo we yu laekem olgeta ya, stret olsem we yu laekem mi.”

Long saed blong ol man blong Jisas we tabu speret i makemaot olgeta, Jisas i askem wan samting long Papa blong hem long heven. ?Hem i askem wanem? “Blong oli save stap long ples ya we bambae mi mi stap long hem, blong oli save luk bigfala paoa blong heven we mi mi gat. Paoa ya, yu yu givim long mi from we yu laekem mi tumas, bifo olgeta, [taem we wol i jes stat, NW].” Hemia taem we Adam mo Iv tufala i stat karem pikinini. Bifo long taem ya, longtaem finis, God i laekem tumas Pikinini blong hem, wan nomo we hem i gat, we biaen hem i kam Jisas Kraes.

Blong finisim prea blong hem, Jisas i makem poen ya bakegen: “Mi mi [talemaot nem blong yu long olgeta ya finis, NW]. Mo bambae mi mekem olsem bakegen, blong oli save laekem mi olsem we yu yu laekem mi, mo blong laef blong mi i save joen long laef blong olgeta.” Taem ol aposol ya oli lanem prapa nem blong God, samting ya i min se olgeta wanwan oli lanem blong save gud God, oli kasem save long lav blong God. Jon 14:1 kasem 17:26; 13:27, 35, 36; 10:16; Luk 22:3, 4; Eksodas 24:10; 1 King 19:9-13; Aesea 6:1-5; Galesia 6:16; Ol Sam 35:19; 69:4; Proveb 8:22, 30.

▪ ?Jisas bambae i go wea? ?Jisas i givim wanem ansa long Tomas long saed blong rod blong go long ples we Jisas bambae i go long hem?

▪ ?Samting we Filip i askem long Jisas i soemaot se hem i wantem we Jisas i mekem wanem?

▪ ?Olsem wanem man we i luk Jisas, i olsem we hem i luk Papa blong hem tu?

▪ ?Olsem wanem ol man blong Jisas bambae oli mekem wok we i strong moa i bitim wok we Jisas i mekem?

▪ ?Olsem wanem Setan i no gat paoa long Jisas?

▪ ?Wetaem Jeova i planem samting we i olsem rop we oli mekem waen long frut long hem? ?Mo olsem wanem sam narafala man bambae oli joen long rop ya? ?Wetaem?

▪ ?Bambae rop ya i gat hamas han blong hem?

▪ ?God i wantem we ol han blong rop ya oli karem wanem frut?

▪ ?Olsem wanem yumi save fren gud wetem Jisas?

▪ ?From wanem ol man blong wol oli no laekem nating ol man blong Jisas?

▪ ?Jisas i givim wanem woning we i mekem tingting blong ol aposol blong hem i kam hevi?

▪ ?From wanem ol aposol blong Jisas oli no askem sam moa kwestin long saed blong ples we bambae hem i go long hem?

▪ ?Wanem samting we ol aposol oli no kasem save long hem?

▪ ?Jisas i talem wanem pija tok blong soemaot se fastaem ol aposol bambae oli krae, be biaen bambae oli glad?

▪ ?Jisas i talem long ol aposol blong hem se i no longtaem bambae oli mekem wanem?

▪ ?Olsem wanem Jisas i winim ol samting blong wol ya?

▪ ?Olsem wanem Jisas i “gat paoa long olgeta man”?

▪ ?Blong kasem save long God mo Pikinini blong hem, man i mas mekem wanem?

▪ ?Wanem ol rod we Jisas i yusum blong talemaot nem blong God?

▪ ?Wanem ya “trutok ya”? ?Mo olsem wanem hem i save mekem Kristin man i “tabu”?

▪ ?Olsem wanem God, Pikinini blong hem, mo olgeta trufala man blong tufala oli save joen olsem wan nomo?

▪ ?“Taem wol i jes stat,” i minim wetaem?

Japta 117

Long Garen Jisas i Harem Nogud Tumas

JISAS i prea finis, nao hem wetem ol leven aposol we oli stap tru long hem, oli singsing blong presem Jeova. Biaen oli goaot long rum we oli bin stap long hem, antap long wan haos. Naet i kolkol lelebet mo ples i tudak. Nao olgeta oli aot long taon, oli gokros long narasaed long wan krik, nem blong hem Kedron. Oli stap folem rod we i go long taon ya Betani, be long haf rod, oli stop long wan ples we olgeta oli laekem tumas, nem blong hem, garen blong Getsemane. Ples ya i kolosap long Hil blong ol Oliftri. Plante taem, Jisas wetem ol man blong hem oli stap storeyan long ples ya, long plantesen blong ol oliftri.

Ating oli stap samples kolosap long get blong garen ya, nao Jisas i talem long eit aposol blong hem, i se: “Yufala i sidaon long ples ya fastaem, bambae mi mi go longwe lelebet, mi prea.” Nao hem i tekem Pita mo Jemes mo Jon, ale olgeta oli wokbaot smol moa i go. Nao tingting blong Jisas i kam hevi tumas, hem i harem nogud tumas. Hem i talem long trifala ya, i se: “Tingting blong mi i hevi tumas, we kolosap mi mi ded from. Yufala i stap wet long ples ya, yufala i stap lukaot gud, i nogud yumi slip.”

Jisas i wokbaot smol moa i go, nao i foldaon, i slip long fes blong hem blong i prea. Hem i talem se: “Papa, sipos yu save mekem samting ya, plis yu tekemaot kap ya, blong bambae mi mi no dring long hem. Be yu no mekem olsem we mi mi wantem, yu mekem olsem we yu nomo yu wantem.” ?Jisas i minim wanem? ?From wanem “tingting blong hem i hevi tumas, we kolosap hem i ded from”? ?Hem i no moa holem strong disisin blong hem se hem i mas ded blong pemaot olgeta man?

!No gat! Jisas i no stap askem long God blong blokem ded. Bifo finis Pita i talem long Jisas se God i mas blokem samting ya blong i no save kamtru long Jisas. Be Jisas i no wantem nating blong harem tingting ya blong Pita. Jisas i save se i no longtaem, bambae oli kilim hem i ded, olsem wan man nogud. Hem i harem nogud from we hem i no wantem se fasin we oli yusum blong kilim hem i ded, bambae i mekem sem long nem blong Papa blong hem. Hem i haremsave se sam haoa biaen nomo bambae oli nilim hem long wan wud, olsem we hem i rabis olgeta, i tok nogud long God. Hemia nao samting we i mekem hem i harem nogud tumas.

Jisas i prea longtaem lelebet, nao hem i kambak long trifala man blong hem, i luk we trifala i slip finis. Nao hem i talem long Pita, i se: “?Olsem wanem yufala i no save lukluk blong wan haoa nomo wetem mi? Yufala i mas lukaot gud, yufala i mas prea, blong bambae ol samting blong traem yufala oli no mekem yufala i foldaon.” Jisas i save se olgeta tu oli harem nogud, mo i let long naet, taswe hem i talem se: “Tru, tingting blong yufala i strong, be bodi blong yufala i slak.”

Nao, seken taem, Jisas i go longwe lelebet bakegen, mo i askem long God blong tekemaot “kap ya” blong bambae hem i no dring long hem. Kap ya i minim wok we God i makemaot se hem i mas mekem. Nao hem i kambak bakegen, i luk we trifala ya i slip bakegen. Hem i talem finis long trifala se trifala i mas prea, blong bambae ol samting blong traem trifala oli no mekem trifala i foldaon. Taem Jisas i tok long trifala, trifala i no save givim ansa long hem.

Nao hem i livim trifala, i go longwe lelebet bakegen, hemia i mekem tri taem blong hem. Nao hem i nildaon, mo i prea strong we i stap krae bigfala, we wora i stap kamaot long ae blong hem. Hem i se: “Papa, sipos yu save letem, plis yu tekemaot kap ya, blong bambae mi mi no dring long hem.” Tingting blong Jisas i hevi tumas from we sipos oli kilim hem i ded olsem wan man nogud nomo, samting ya bambae i mekem bigfala sem long nem blong Papa blong hem. Bambae oli jajem hem se hem i no gat respek long God, hem i tok nogud long God. !Hemia i tumas ya!

Be nating, Jisas i gohed long prea blong hem, i se: “Be yu no mekem olsem we mi mi wantem, yu mekem olsem we yu nomo yu wantem.” Jisas i rere blong obei long God, hem i putum hem i stap daon aninit long han blong God. Nao wan enjel i aot long heven i kamtru long Jisas, i toktok gud long hem blong mekem hem i strong bakegen. Ating enjel ya i talem long Jisas se Papa blong hem i glad tumas long hem.

!Tru ya, wan bigfala hevi samting i stap long solda blong Jisas! Laef blong olwe we hem i save kasem mo laef blong olwe we ol man long wol oli save kasem i dipen long hem nomo. Tingting blong hem i trabol tumas, taswe hem i stap prea i strong moa, we swet blong hem we i drop, i foldaon long graon, i olsem blad nomo. Wan buk (The Journal of the American Medical Association) i talem se: “Samting ya, we swet blong man i kam olsem blad, i no hapen plante taem. Sam samtaem nomo samting ya i save hapen, . . . taem tingting blong man i hevi tumas we i harem nogud bitim mak.”

Nao namba tri taem Jisas i kambak long trifala aposol, mo bakegen, hem i luk we trifala i stap slip. Bodi blong trifala i hevi tumas, from we trifala ya tu i stap harem nogud tumas. Nao hem i talem long trifala, i se: “?Weswe yufala i stap slip?” Nao hem i gohed i se: “Ol samting ya i finis. Taem blong hem i stret finis. Naoia i taem blong man ya i letem mi, mi Pikinini blong Man, mi go long han blong ol man nogud. Yufala i stanap, yumi go. Yufala i luk. Man ya we i glad blong letem mi mi go long han blong ol enemi blong mi, hem i stap kolosap.”

Taem Jisas i stap tok yet, Judas Iskariot wetem fulap narafala man oli kamtru long ples ya. Olgeta ya i stap karem ol laet mo ol stik faea, mo ol samting blong faet blong olgeta. Matyu 26:30, 36-47; 16:21-23; Mak 14:26, 32-43; Luk 22:39-47; Jon 18:1-3; Hibrus 5:7.

▪ ?Taem Jisas i aot long rum we i stap antap long wan haos, hem i lidim ol aposol blong hem oli go wea? ?Long ples ya, hem i mekem wanem?

▪ ?Taem Jisas i stap prea, ol aposol blong hem oli mekem wanem?

▪ ?From wanem Jisas i harem nogud tumas long tingting blong hem? ?Hem i askem God blong mekem wanem?

▪ ?Taem swet blong Jisas i kam olsem blad, samting ya i soemaot wanem?

Japta 118

Gyaman Fren i Kam, Ol Man Oli Holem Jisas

MEDEL naet i pas finis. Judas i kamtru long garen blong Getsemane, mo hem i gat wan bigfala kampani oli biaen long hem. Hem i tekem sam soldia, sam jif pris blong ol man Isrel, mo sam Farisi, nao olgeta oli kam long ples ya. Ol pris ya oli agri finis blong pem tate selva mane long Judas sipos hem i letem Jisas i go long han blong olgeta.

Taem Jisas i stap mekem Pasova wetem ol aposol blong hem, nao Judas i girap i go afsaed, i klia we hem i go stret long ol jif pris. Wantaem nomo, olgeta oli singaot ol kapten blong olgeta wetem wan kampani blong ol soldia oli kam wanples. Fastaem, ating Judas i lidim olgeta oli go long ples we Jisas i mekem Pasova wetem ol aposol blong hem. Be oli faenemaot se olgeta oli aot long ples ya finis. Nao bigfala kampani ya we oli stap karem ol samting blong faet, ol laet mo ol stik faea, oli biaen long Judas, oli aot long Jerusalem oli gokros long narasaed long krik ya, nem blong hem Kedron.

Judas i stap lidim olgeta oli go antap long Hil blong ol Oliftri. Hem i save weples i mas go blong faenem Jisas. Long wik we i pas finis, taem Jisas wetem ol aposol blong hem oli stap go long Betani mo oli stap kambak long Jerusalem, plante taem oli spel long garen blong Getsemane blong storeyan tugeta. Be ples ya i tudak, mo ating Jisas i stap aninit long ol oliftri tu. ?Olsem wanem ol soldia bambae oli luksave hem? Maet olgeta ya oli neva bin luk hem samtaem. Taswe Judas i bin givim wan tok long olgeta finis, se: “Man ya we bambae mi mi kis long hem, hemia nao man ya. Yufala i mas tekem hem, mo taem yufala i tekem i go, yufala i mas holemgud hem.”

Nao Judas i lidim kampani blong ol man ya oli go long garen, nao taem hem i luk Jisas wetem ol aposol blong hem, wantaem nomo hem i kam long Jisas. Hem i talem se: “Halo, Tija.” Nao i kis long hem.

Nao Jisas i askem long hem se: “?Fren, yu kam blong mekem wanem bisnes ya?” (NW) Nao Jisas nomo i ansarem kwestin blong hem, i se: “Judas, mi mi Pikinini blong Man, be yu yu kam blong kis long mi, blong letem mi mi go long han blong ol enemi blong mi.” !Inaf long man ya we i gat tu fes! Nao Jisas i wokbaot i go long olgeta ya, we oli save luk hem klia long laet blong ol stik faea mo ol laet we oli stap karem. Nao hem i askem long olgeta se: “?Yufala i stap lukaot hu?”

Olgeta oli ansa long hem se: “Wan man Nasaret, nem blong hem Jisas.”

Jisas i no fraet, i stanap strong, i talem long fes blong olgeta se: “Mi mi stap.” Ol man ya oli sek from we Jisas i no fraet blong tok long olgeta, mo from we olgeta oli fraet. Nao oli step bak mo oli foldaon long graon.

Jisas i tok slou nomo, i se: “Mi mi talem finis long yufala se mi mi stap. Oraet, sipos yufala i stap lukaot mi, i gud yufala i letem ol narafala man ya oli gohom.” I no longtaem, Jisas i bin prea long Papa blong hem long rum antap long wan haos, nao hem i bin talem long Papa blong hem se hem i lukaot gud long olgeta aposol blong hem we i no lusum wan long olgeta. “Wan nomo i lus, hemia man ya we i man blong lus.” Blong mekem ol tok ya i kamtru, hem i askem olgeta blong letem ol man blong hem oli gohom.

Ale, ol soldia oli stanap, oli go blong holem Jisas mo fasem hem. Nao ol aposol oli luksave wanem i save kamaot. Nao oli askem long Jisas se: “?Masta, olsem wanem? ?Mifala i yusum ol naef blong faet blong mifala?” Jisas i no ansa yet, be Pita i girap, i pulumaot wan long tufala naef blong faet we ol aposol oli karem i kam, nao hem i katem wan slef blong hae pris, nem blong hem Malkas. Pita i mestem hed blong slef ya, be hem i katemaot raetsaed sora blong hem.

Jisas i blokem hem i se: “E, finis. I naf ya.” Nao hem i putum han blong hem long sora blong man ya, i mekem i gud bakegen. Nao hem i tijim wan bigfala lesen long ol aposol blong hem. Hem i talem long Pita, i se: “Yu putumgud naef blong yu long paos blong hem bakegen. Man we i stap tekem naef blong faet, hem bambae i ded long naef blong faet. ?Yufala i ting se mi no save singaot long Papa blong mi blong i givhan long mi? Sipos mi singaot long hem, wantaem nomo bambae hem i sanem ol enjel, we oli moa long twelef ami, oli kam lukaot long mi.”

Jisas i rere blong letem ol man oli holem hem, from we hem i talem se: “?Be sipos mi mekem olsem, ol tok ya blong Baebol we i bin talemaot bifo we ol samting ya bambae i kamtru, hem bambae i kamaot olsem wanem? Bambae i no moa gat rod nao.” Mo hem i go moa i se: “Trabol ya i olsem kap blong mi we Papa blong mi i givim long mi. ?Yu ting se i nogud mi mi dring long hem?” !Yes, Jisas i agri fulwan wetem samting we God i wantem se hem i mekem!

Nao Jisas i tok long kampani blong ol man we oli kam blong holem hem. Hem i talem se: “?Olsem wanem? ?Yufala i kam blong holem mi, be from wanem yufala i stap holem naef blong faet mo nalnal olsem? ?Yufala i ting se mi mi man blong stil mo kilim man?” Mo hem i talem se: “Evri dei, mi mi stap sidaon insaed long haos blong God, mi stap tij, be yufala i no holem mi. Be olgeta samting ya oli kamtru blong mekem ol tok blong Baebol i kamtru we ol profet oli bin talemaot bifo.”

Nao ol soldia wetem kapten blong olgeta, wetem ol soldia blong ol man Isrel oli holem Jisas. Oli fasem gud hem. Taem ol aposol oli luk samting ya, oli livim Jisas, oli ronwe long hem. Be i gat wan yangfala man i stap, maet hem i wan disaepol blong Jisas we nem blong hem Mak. Maet hem i stap long haos ya we Jisas i mekem Pasova long hem. Mo afta, maet hem i biaen long bigfala kampani we oli aot long ples ya oli kam. Naoia ol man oli luksave hem, ale oli traem holem hem tu. Be hem i lego long klos blong hem, i ronwe we i neked nomo. Matyu 26:47-56; Mak 14:43-52; Luk 22:47-53; Jon 17:12; 18:3-12.

▪ ?From wanem Judas i save se bambae hem i faenem Jisas long garen blong Getsemane?

▪ ?Olsem wanem Jisas i soemaot se hem i stap tingbaot ol aposol blong hem?

▪ ?Pita i mekem wanem blong traem blokem ol man oli no holem Jisas? ?Be Jisas i talem wanem long Pita long saed ya?

▪ ?Olsem wanem Jisas i soemaot se hem i agri fulwan wetem samting we God i wantem se hem i mekem?

▪ ?Taem ol aposol oli livim Jisas oli ronwe, hu i stap? ?Mo wanem i kamaot long hem?

Japta 119

Oli Tekem Hem i Kam Long Anas, Afta Long Kaeafas

OLGETA we oli holem Jisas, oli fasem hem olsem we hem i man blong brekem loa. Nao oli tekem hem i kam long wan hae man we i gat bigfala paoa. Bifo, man ya i hae pris, nem blong hem Anas. Taem Jisas i gat 12 yia nomo, mo ol tija long haos blong God oli sapraes long waes blong hem, long taem ya nao, Anas i hae pris. Biaen sam pikinini blong Anas tu oli mekem wok blong hae pris. Mo naoia man blong gel blong Anas, nem blong hem Kaeafas, hem i holem wok ya.

Longtaem finis, hae pris Anas i gat bigfala paoa long skul blong ol man Isrel. Taswe fastaem ating oli lidim Jisas i go long haos blong hem. Ale oli stop smoltaem blong luk Anas. Samting ya i givim taem long hae pris Kaeafas, blong hem i hivimap ol memba blong Kaonsel ya Sanhedrin. Hemia hae kot blong ol man Isrel, we i gat 71 memba blong hem. Mo tu, Kaeafas i gat taem blong lukaot sam man we oli save talem sam gyaman poen agens long Jisas.

Nao jif pris Anas i askem sam kwestin long Jisas, from ol man blong hem mo from ol tok we hem i stap tijim olgeta long hem. Jisas i ansa long hem, i se: “Mi mi stap talem tok blong mi long fes blong olgeta man. Oltaem mi stap tijim ol man insaed long ol haos blong prea mo insaed long haos blong God, we olgeta man Isrel oli stap kam oltaem. Mi mi no talem tok blong mi long bak blong ol man. ?From wanem yu stap askem ol kwestin ya long mi? I gud yu go askem long olgeta ya we oli harem mi. I gud yu askem tok ya we mi talem long olgeta. Oli savegud ol samting ya we mi stap talem.”

Taem Jisas i talem tok ya, wan soldia we i stap stanap long ples ya, hem i slavem Jisas long fes blong hem, i se: “?Weswe yu yu stap ansa long hae pris olsem?”

Jisas i ansa long hem, i se: “Sipos mi talem sam tok we i no stret, i gud yu soemaot long mi. ?Be sipos ol tok blong mi i stret nomo, from wanem yu yu slavem mi?” Nao Anas i sanem Jisas i go long Kaeafas, mo ol rop blong hem oli stap long hem yet.

Nao ol jif pris mo ol olfala mo ol tija blong ol man Isrel, yes, olgeta memba blong hae kot ya, Sanhedrin, oli stap kam wanples. Oli mekem miting long haos blong Kaeafas. I agensem loa blong ol man Isrel blong mekem kot long naet blong Pasova olsem ya. Be samting ya i no blokem ol lida blong skul ya, oli gohed nomo blong wokem rabis plan blong olgeta.

Sam wik bifo, taem Jisas i mekem Lasros i laef bakegen long ded, tingting blong ol memba blong Sanhedrin i strong finis se hem i mas ded. Mo tu dei bifo, long Wenesdei, ol hae man blong skul oli mekem miting, oli tokrere blong holem Jisas blong kilim hem i ded, be long rod blong stil. Traem tingbaot. !Jisas i no pas long kot yet, be oli jajem hem finis!

Nao oli traehad blong faenem sam man we oli save talem sam poen agens long Jisas, blong oli save kilim hem from. Be oli no save faenem wan. Tru i gat sam wetnes we oli save tok agens long hem, be oli stap gyaman nomo, ale tok blong olgeta i no joen gud. Nao tu wetnes i stanap, oli talemaot poen ya agens long hem se: “Mifala i harem hem we i talem se ‘Haos ya blong God we ol man oli wokem, bambae mi mi brekemdaon. Mo biaen long tri dei, bambae mi stanemap wan nyuwan bakegen, we i no gat man i wokem.’ ”

Nao Kaeafas i askem se: “?Weswe yu no ansa? ?Olsem wanem long ol poen ya we oli stap talemaot?” Be Jisas i stap kwaet, hem i no ansa. Long gyaman poen ya tu, ol wetnes oli no save mekem ol tok blong olgeta i joen gud. Hemia i mekem bigfala sem long kot ya Sanhedrin. Nao hae pris ya i traem wan narafala rod.

Kaeafas i save se ol man Isrel oli no laekem man we hem i talem se hem nao i stret Pikinini blong God. Tu taem finis, olgeta oli talem long Jisas se hem i man blong tok nogud long God, we hem i mas ded from. Wan taem oli ting se hem i stap talem se hem i gat paoa olsem God. Tingting blong olgeta i rong olgeta. Nao Kaeafas i traem trikim Jisas i se: “Mi mi talem nem blong God ya we i laef we i no save ded, yu yu mas talem trutok. ?Olsem wanem? !Yu talem long mifala! ?Yu yu Mesaea, Pikinini blong God, no yu no hem?”

Nating we ol man Isrel ya oli tingting olsem wanem, be Jisas hem i trufala Pikinini blong God. Sipos Jisas i stap kwaet, oli save ting se hem i stap talem we hem i no Mesaea. Taswe Jisas i no fraet blong tok, hem i talem se: “Hemia nao we yu yu talem. Be mi mi talem long yufala, biaen long taem ya, bambae yufala i save luk mi, mi Pikinini blong Man, bambae mi sidaon long raet saed blong God ya we i gat paoa. Mo bambae mi kamaot long klaod long skae.”

Nao long fes blong ol man ya, hae pris Kaeafas i terem klos blong hem, nao i talem se: “Hemia tok nogud long God ya. ?Weswe yumi stap lukaot wetnes bakegen? Yufala i harem finis. Hem i tok nogud long God ya. ?Yufala i ting olsem wanem? ?Bambae yumi mekem olsem wanem long man ya?”

Ol memba blong Sanhedrin oli talem se: “Hem i mas ded.” Nao olgeta oli laf long hem, oli jikim hem, mo oli talem plante nogud samting agens long hem. Oli spet long fes blong hem, mo samfala oli slavem hem. Samfala oli fasem ae blong hem, oli kilim hem, nao oli talem se: “E, Mesaea, yu talemaot. ?Hu ya i kilim yu?” Ol rabis tok ya mo fasin ya oli agensem loa blong olgeta. Ol samting ya oli kamaot long naet ya we oli stap mekem kot. Matyu 26:57-68; 26:3, 4; Mak 14:53-65; Luk 22:54, 63-65; Jon 18:13-24; 11:45-53; 10:31-39; 5:16-18.

▪ ?Fastaem oli tekem Jisas i go wea? ?Long ples ya, oli mekem wanem long hem?

▪ ?Biaen oli tekem Jisas i go wea? ?From wanem?

▪ ?Olsem wanem Kaeafas i pulum ol memba blong Sanhedrin blong oli jajem Jisas se hem i mas ded?

▪ ?Long naet ya we oli stap mekem kot, oli mekem wanem rabis tok mo fasin we i agensem loa blong olgeta?

Japta 120

Long Yad, Hem i Talem Se Hem i No Save Jisas

LONG garen blong Getsemane, taem oli kam blong holem Jisas, Pita mo Jon mo ol narafala aposol oli fraet, nao oli girap, oli ronwe. Be biaen Pita mo Jon tufala i kambak. Maet tufala i faenem Jisas bakegen taem ol man oli stap tekem Jisas i kam long haos blong Anas. Nao Anas i sanem Jisas i go long Kaeafas we hem i hae pris. Pita mo Jon, tufala i biaen long hem, be tufala i no go kolosap long hem. I luk olsem we tufala i gat tu tingting. Tufala i fraet se bambae oli kilim tufala i ded tu. Be semtaem, tufala i wari tumas long Masta blong tufala, se bambae oli mekem wanem long hem.

Ale oli kamtru long bigfala haos blong Kaeafas. Jon i save go insaed long yad blong haos ya, from we hae pris ya i save hem finis. Be oli livim Pita i stap afsaed long get. Be i no longtaem Jon i go afsaed bakegen, i tok long haosgel we i stap lukaot long get, nao oli letem Pita i kam insaed.

Hemia koltaem ya, mo ol man blong hae pris wetem ol soldia oli mekem wan faea blong wom. Nao oli stap stanap raon long faea, oli stap wom long hem. Nao Pita tu i go stanap wetem olgeta, blong hem tu i wom. Hem i stap wet blong harem nyus se oli jajem Jisas olsem wanem. Haosgel ya we i letem Pita i kam insaed long yad ya, hem i save luklukgud long Pita nao, from we Pita i stap sidaon long laet blong faea. Nao hem i talem se: “!E, yu tu yu wetem man Galili ya, Jisas!”

Pita i kros from we gel ya i luksave hem. Nao long fes blong olgeta evriwan, Pita i haedem samting ya, i talem se: “Mi no save samting ya we yu stap talem.”

Nao hem i aot, i godaon long get blong yad ya. Nao wan narafala gel i luk hem, mo i talem long ol man we oli stap kolosap, i se: “Man ya i wetem man Nasaret ya, Jisas.” Be Pita i haedem samting ya bakegen, i mekem strong tok, i talem se: “Tru, mi no save man ya.”

Pita i stap insaed long yad ya, be hem i traem haed lelebet. I no brok delaet yet, be ating long taem ya nao, Pita i sek, from we hem i harem faol i singaot. Kot i stap gohed yet. I klia se oli stap mekem kot long wan rum antap long haos ya. Mo Pita wetem ol narafala oli wet daon, oli stap luk ol man we oli stap kam blong wetnes long fes blong kot ya.

Samwe long wan haoa i pas finis, i stat long taem we seken gel i talemaot se Pita i stap kampani wetem Jisas. Nao ol man ya we oli stap kolosap oli kam long Pita, oli talem long hem se: “Yes, yu yu wan blong olgeta, from we tang blong yu i soemaot we yu yu man ples blong olgeta.” Wan man long grup ya hem i famle blong man ya, Malkas, we Pita i bin katemaot wansaed sora blong hem. Nao hem i talem se: “?Weswe? ?Mi mi luk yu, yu wetem hem long plantesen, a?”

Be Pita i mekem strong tok, i talem se: “Mi mi no save man ya.” Pita i go moa, hem i stap mekem strong tok olsem ‘tru antap,’ blong olgeta oli save bilif se oli rong. Pita i talem se sipos tok blong hem i no tru, bambae wan nogud samting i mas kamaot long hem.

Hemia namba tri taem we Pita i haedem samting ya. Taem hem i stap tok yet, faol i singaot bakegen. I luk olsem we Jisas i kamaot long kot finis, i stap stanap long wan vranda antap long yad. Nao stret long taem ya we faol i singaot, Jisas i tanraon, i luk stret long Pita. Wantaem nomo, Pita i tingbaot tok ya we Jisas i bin talem long hem, sam haoa bifo nomo, taem oli hivap long rum antap long wan haos. Hem i bin talem se: “Taem faol i no singaot tu taem yet be yu bambae yu save haedem mi tri taem, se yu no save mi.” Pita i harem nogud tumas from bigfala sin ya we hem i bin mekem. Nao hem i go afsaed, mo hem i krae tumas.

?Olsem wanem samting ya i save hapen? Fastaem Pita i ting se hem i strong long saed blong speret, we hem i save stanap strong long enikaen traem. ?Olsem wanem Pita i save haedem Masta blong hem, se hem i no save hem? ?Olsem wanem hem i save mekem samting ya tri taem bakegen? I klia se Pita i no rere blong winim wan traem olsem. Ol man ya oli stap gyaman, oli stap mekem olsem we Jisas i wan rabis man blong brekem loa. Ol samting we i stret, oli stap mekem i luk olsem we i no stret. Man we i no gat poen, oli stap mekem olsem we hem i man nogud. Ol samting ya i hevi long Pita, nao tingting blong hem i olbaot. Wantaem nomo, gudfala tingting we hem i mas fasgud long ol stret rul i lus. Sore tumas, be fraet blong man i mekem se tingting blong Pita i meksap olgeta. Pita i no moa save tingting stret. !Neva yumi mas letem samting ya i hapen long yumi! Matyu 26:57, 58, 69-75; Mak 14:30, 53, 54, 66-72; Luk 22:54-62; Jon 18:15-18, 25-27.

▪ ?Olsem wanem Pita mo Jon tufala i go insaed long yad blong haos blong hae pris?

▪ ?Taem Pita mo Jon tufala i stap long yad ya, wanem i stap gohed insaed long haos?

▪ ?Faol i singaot hamas taem? ?Mo hamas taem Pita i haedem Kraes, se hem i no save hem?

▪ ?Taem Pita i mekem strong tok, hem i mekem wanem?

▪ ?Wanem stampa blong sin we Pita i mekem, taem hem i talem se hem i no save Jisas?