Japta 121

Long Fes Blong Sanhedrin, Mo Long Fes Blong Paelet

KOLOSAP nao bambae i brok delaet. Tri taem finis Pita i haedem Jisas, se hem i no save hem. Ol memba blong Sanhedrin oli mekem miting finis blong jajem Jisas, be kot ya i no stret nating. Nao oli go wanwan. Long Fraede moning, taem i brok delaet, oli kam wanples bakegen, long haos we kot ya Sanhedrin i mekem miting long hem oltaem. Ating oli mekem miting bakegen blong traem soemaot se kot we oli bin mekem long naet i stret nomo long loa. Ale oli tekem Jisas i go stanap long fes blong Kaonsel ya. Nao oli talem sem samting bakegen we oli bin talem long naet, se: “Sipos yu yu Mesaea, yu talemaot long mifala.”

Jisas i talem se: “Sipos mi mi talemaot long yufala, bambae yufala i no save bilif long mi. Mo sipos mi askem kwestin long yufala, bambae yufala i no save ansa.” Be Jisas i no fraet blong talemaot se hem i hu. Hem i talem se: “Be i stat naoia, bambae mi, mi Pikinini blong Man, mi save go sidaon long raet saed blong God ya we i gat paoa.”

Nao olgeta evriwan oli askem long hem se: “?Olsem wanem? ?Yu yu Pikinini blong God?”

Jisas i ansa i se: “Yufala ya i talem finis. Hemia mi ya.”

Ol man ya oli gat wan tingting nomo, oli wantem kilim Jisas i ded. Taswe long tingting blong olgeta, ansa ya we Jisas i givim i naf blong pruvum se hem i man blong tok nogud long God. Ale oli askem se: “?Weswe yumi stap lukaot tok blong narafala wetnes bakegen? Yumi ya, yumi harem tok ya long maot blong hem nomo.” Nao oli fasem Jisas, oli tekem hem, oli putum hem long han blong Paelet, hed gavman blong ol man Rom long ples ya.

Nao Judas, man ya we i letem Jisas i go long han blong ol enemi blong hem, hem i harem we olgeta ya oli jajem Jisas finis, se hem i mas ded. Nao hem i harem nogud. Hem i tekem tate selva mane ya, i go givimbak long ol jif pris mo ol elda. Hem i talem se: “Mi mi mekem i nogud ya. Mi mi gyaman, nao man ya we i no gat poen long hem, bambae i ded from.”

Be olgeta ya oli no sore long hem. Oli talem nomo se: “?Weswe yu yu kam krae long mifala? Hemia i bisnes blong yu nomo.” Nao Judas i sakemdaon selva mane ya insaed long haos blong God, i go afsaed, i go hangem hem long rop, blong i ded. Be i luk olsem we han blong tri we Judas i fasem rop long hem i brok, from we hem i foldaon long ol ston daon, bel blong hem i brok, nao wantaem nomo gat blong hem i kamaot.

Nao ol jif pris oli no save se bambae oli mekem olsem wanem wetem ol mane ya. Oli se: “I no stret long loa blong yumi, blong yumi putum mane ya i go wetem mane blong haos blong God, from we hemia i mane blong pem laef blong man, i gat blad blong man i stap long hem.” Ale oli tokbaot, nao oli tekem mane ya, oli go pem pis graon ya we bifo, nem blong hem “Graon blong wokem graonpot”, nao oli yusum graon ya blong beregraon blong ol strenja. Taswe, afta, ol man oli stap talem pis graon ya, se “Graon blong blad.”

Nao oli tekem Jisas, oli go long haos blong hed gavman blong ol man Rom long ples ya. Hemia i brok delaet finis. Be ol man Isrel we oli holem Jisas oli no go insaed long haos ya, i tabu long olgeta. Oli ting se sipos oli go insaed long haos blong hiten man, bambae oli doti long fes blong God. From samting ya, Paelet i kam afsaed blong luk olgeta. Nao hem i askem se: “?Wanem poen long man ya we yufala i trabol long hem from?”

Olgeta oli ansa long hem se: “Sipos man ya i no man blong mekem nogud, bambae mifala i no save tekem i kam long ples ya. Hemia wan man blong mekem nogud ya.”

Paelet i no wantem kam insaed long bisnes ya, taswe hem i talem se: “I gud yufala i tekem, yufala i go jajem hem long ol loa blong yufala.”

Nao trufala tingting blong ol man Isrel i kam long klia ples. Oli wantem kilim Jisas i ded nomo. Oli talem se: “Be mifala i no gat raet blong jajem man se ‘Man ya i mas ded.’ ” Tru ya, sipos oli kilim Jisas i ded long Lafet blong Pasova, samting ya i save mekem bigfala trabol i kamaot, from we fulap man oli tinghae long Jisas. Be sipos oli save pulum gavman blong Rom blong kilim hem i ded from we hem i mekem wan samting agens long gavman, nao oli no gat poen long fes blong ol man.

Ol lida ya blong skul oli no talem long Paelet se oli jajem Jisas finis se hem i man nogud we i tok nogud long God. Taswe naoia oli talemaot tri narafala poen agens long Jisas se: “Mifala i faenem we [1] man ya i stap pulum ol man ples blong mifala oli go krangke, oli agens long gavman. [2] Hem i stap blokem mifala se mifala i no save pem takis long Sisa, hed gavman ya blong yufala man Rom. [3] Mo i stap talemaot se hem i Mesaea, we hemia king ya.”

Namba tri poen ya se Jisas i stap talemaot se hem i king, samting ya nao i mekem tingting blong Paelet i trabol. Ale Paelet i go insaed long haos blong hem bakegen, mo i singaot Jisas blong i kam stanap long fes blong hem. Nao hem i askem long Jisas se: “?Yu yu king blong ol man Isrel?” I olsem we Paelet i stap askem long Jisas se ‘?Yu yu brekem loa blong gavman ya? ?Yu yu stap talem se yu king we yu agensem Sisa?’

Jisas i wantem faenemaot se Paelet i harem wanem toktok finis long saed blong hem. Taswe hem i askem se: “?Kwestin ya i kamaot long yu nomo, no yu stap askem from we ol man oli stap tokbaot mi long yu olsem?”

Paelet i mekem olsem we hem i no save wan samting long saed blong Jisas mo we hem i wantem faenemaot wanem i tru mo wanem i no tru. Hem i ansa se: “?Wanem? !Mi mi no man Isrel! Ol man ples blong yu, mo ol jif pris oli putum yu long han blong mi. ?Yu yu mekem wanem?”

Jisas i no traem ronwe long kwestin ya se hem i king no no gat. Paelet i mas sapraes long ansa we Jisas i givim long hem long taem ya. Luk 22:66 kasem 23:3; Matyu 27:1-11; Mak 15:1; Jon 18:28-35; Ol Wok 1:16-20.

▪ ?From wanem Sanhedrin i mekem miting bakegen long moning?

▪ ?Judas i ded olsem wanem? ?Oli mekem wanem wetem tate selva mane?

▪ Ol man Isrel oli ting se i moa gud we gavman blong Rom i kilim Jisas i ded, i bitim we olgeta nomo oli kilim hem i ded. ?From wanem?

▪ ?Wanem trifala poen we ol man Isrel oli talemaot agens long Jisas?

Japta 122

Long Fes Blong Herod, Mo Long Fes Blong Paelet Bakegen

LONG fes blong Paelet, Jisas i no traem haedem se hem i wan king. Be hem i eksplenem se Kingdom blong hem i no agensem gavman blong Rom. Hem i se: “Kingdom blong mi i no haf long wol ya. Sipos Kingdom blong mi i haf blong wol ya, bambae ol man blong mi oli save faet blong blokem olgeta ya we oli wantem putum mi long han blong ol lida ya blong ol man Isrel. Be Kingdom blong mi i no kamaot long wol ya.” (NW) Tri taem long tok ya Jisas i talemaot se hem i gat wan Kingdom. Be Kingdom ya i no blong wol ya.

Be Paelet i go moa i askem se: “?Oraet, be yu yu wan king?” Hem i minim se, ‘?Nating we Kingdom blong yu i no haf long wol ya, be stil, yu yu wan king?’

Blong soemaot se Paelet i kasem stret mining blong tok blong hem, Jisas i talem long hem se: “Yu ya yu talem we mi mi king. Mi mi bon, mi kam long wol ya blong wan samting nomo, blong mi talemaot ol tok blong leftemap trutok. Mo man we i man blong holem trutok, hem i save harem ol tok blong mi.”

Yes, Jisas i kam long wol blong wetnes long “trutok.” Bigfala trutok, hem i long saed blong Kingdom. Jisas i rere blong holemtaet trutok ya, nating we hem i save ded from. Nao Paelet i askem long Jisas se: “?Wanem ya trutok ya?” Be hem i no wet blong harem ansa long kwestin ya. Hem i ting se ol samting we hem i harem finis i naf blong hem i save jajem Jisas.

Nao Paelet i go afsaed bakegen long ol man we oli stap stanap afsaed long haos blong hem. Jisas i stap stanap kolosap long hem. Nao Paelet i talem long ol jif pris mo olgeta man, i se: “Mi mi no faenem we man ya i brekem loa.”

Be olgeta oli kros long disisin ya, oli tok strong long hem se: “No, be hem i stap go olbaot long Judia, i stat long Galili, i kam kasem ples ya, mo i stap tijim ol man, i stap mekem tingting blong olgeta i go olbaot.”

Paelet i mas sapraes tumas long krangke tingting ya blong ol man Isrel. Taswe taem ol jif pris mo ol elda oli stap gohed long fasin ya, oli stap singaot bigfala, Paelet i lukluk Jisas, nao hem i askem long hem se: “?Olsem wanem? ?Yu no harem ol tok blong olgeta? Oli talemaot plante poen blong yu.” Be Jisas i no givim wan ansa nating long hem. Taem Paelet i luk we tingting blong Jisas i stap kwaet nomo mo hem i no kros, Paelet i sapraes tumas.

Taem Paelet i harem we Jisas i man Galili, hem i ting se hemia i rod blong pasem bisnes ya i go long han blong narafala. Long taem ya, rula blong Galili, nem blong hem Herod Antipas (pikinini blong Bigfala Herod), i stap long Jerusalem. Hem i kam blong mekem Lafet blong Pasova. Ale Paelet i sanem Jisas i go luk hem. Bifo finis, Herod Antipas i katemaot hed blong Jon Baptaes. Afta, hem i harem nyus long ol bigfala merikel we Jisas i stap mekem. Nao hem i fraet, from we hem i ting se maet man ya Jisas, hem i Jon Baptaes we i laef bakegen long ded.

Nao Herod i glad tumas blong luk Jisas. Hemia i no from we hem i wantem givhan long Jisas, no from we hem i wantem faenemaot sipos ol rabis poen agens long hem oli tru no oli no tru. No gat. Hem i wantem luk hem from we hem i stap harem ol nyus blong hem mo i stap tingbaot se maet i save luk Jisas i mekem wan merikel.

Be Jisas i no mekem. Herod i askem plante kwestin long hem, be Jisas i no givim ansa long hem nating. From samting ya, Herod i harem nogud. Nao hem wetem ol soldia blong hem oli stap lukluk nogud long Jisas, mo oli stap laf long hem. Oli putum wan flas kot long hem, nao oli stap mekem plei long hem. Afta, oli sanem hem i gobak long Paelet. Fastaem, Herod mo Paelet tufala i badfren. Be nao long taem ya, tufala i frengud bakegen.

Taem Jisas i kambak bakegen long Paelet, Paelet i singaot ol jif pris mo ol lida blong ol man Isrel oli kam wanples, wetem olgeta man. Nao hem i talem long olgeta, i se: “Man ya we yufala i tekem i kam stanap long fes blong mi, yufala i stap talem se hem i stap pulum ol man ples blong yufala oli go krangke. Be mi mi luklukgud long ol bisnes blong hem finis long fes blong yufala, mo mi no faenem we hem i brekem loa. Ol poen ya we yufala i talem oli no tru. Mo Herod tu i no faenem sam rabis poen long hem, from we hem i sanem i kambak long yumi. Nao i klia gud we man ya i no mekem wan samting we i stret blong hem i ded from. Oraet, bambae ol man blong mi oli wipim hem, mo biaen oli letem hem i gofri.”

Hemia i seken taem we Paelet i talemaot se Jisas i no mekem wan samting we hem i mas ded from. Hem i wantem letem Jisas i gofri, from we hem i save se olgeta pris oli putum Jisas long han blong hem from jelas nomo. Ale Paelet i gohed blong traem faenem wan rod blong lego Jisas. Semtaem, hem i kasem wan mesej we i mekem tingting blong hem i strong moa long poen ya. Taem hem i stap sidaon long bigfala jea blong hem long ples blong jajem man, woman blong hem i sanem tok i kam long hem, i se: “Bambae yu no mekem wan samting long man ya we i no gat poen long hem. Las naet, mi mi luk hem long drim blong mi [i klia se God i givim drim ya long hem], mo naoia mi harem i nogud tumas from.”

Paelet i save se i stret blong letem man ya we i no gat poen long hem i gofri nomo. ?Be olsem wanem hem i save mekem olsem ya? Jon 18:36-38; Luk 23:4-16; Matyu 27:12-14, 18, 19; 14:1, 2; Mak 15:2-5.

▪ ?Olsem wanem Jisas i ansa long kwestin ya se hem i king no no gat?

▪ ?Wanem ya “trutok ya” we Jisas i wetnes long hem long laef blong hem long wol?

▪ ?Taem Paelet i jajem Jisas, wanem disisin blong hem? ?Ol man oli tingting ­wanem long disisin ya? ?Nao Paelet i mekem wanem long Jisas?

▪ ?Herod Antipas hem i hu? ?From wanem hem i glad tumas blong luk Jisas? ?Hem i mekem wanem long Jisas?

▪ ?From wanem Paelet i wantem tumas blong letem Jisas i gofri?

Japta 123

“Yufala i Luk. Hemia Man Ya.”

PAELET i laekem kwaet fasin blong Jisas. Mo hem i luksave se Jisas i no mekem wan samting we i stret blong hem i ded from. Taswe Paelet i stap lukaot wan narafala rod blong letem hem i gofri. Hem i talem long olgeta man se: “Be long kastom blong yufala long taem blong Pasova, oltaem mi save letem wan man long kalabus we yufala i wantem, hem i gofri.”

Nao long kalabus, i gat wan man i stap we olgeta man oli harem store blong hem se hem i man blong kilim man i ded, nem blong hem Barabas. Ale Paelet i askem long olgeta i se: “?Yufala i wantem mi mi letem hu man i gofri, . . . Barabas ya, no Jisas ya we oli stap singaot hem se Mesaea?”

Nao ol jif pris mo ol elda oli pulum ol man, blong oli askem long Paelet blong i letem Barabas i gofri, i kilim Jisas i ded. Be Paelet i no finis yet, i askem bakegen long olgeta, i se: “?Yufala i wantem mi mi letem hu man long tufala ya i gofri?”

Nao olgeta oli singaot bigfala se: “Barabas.”

Tingting blong Paelet i hevi, ale hem i talem se: “?Ale, be bambae mi mekem olsem wanem long Jisas ya we oli stap singaot hem se Mesaea?”

Nao olgeta oli singaot bigfala olsem wan voes nomo se: “!Nilim long [pos, NW]! !Nilim long [pos, NW]!”

Paelet i save se oli wantem kilim i ded wan man we i no gat poen long hem. Taswe hem i tok long olgeta bakegen, i se: “?From wanem? ?Wanem samting nogud we hem i mekem? Mi mi no faenem wan samting we hem i mekem, we i stret blong hem i ded from. Bambae ol man blong mi oli wipim hem, mo biaen bambae oli letem i gofri.”

Nating we Paelet i traehad, be hem i no save kwaetem ol man ya. Ol lida blong skul blong ol man Isrel oli stap pulum olgeta, nao oli kros tumas, oli stap singaot bigfala se: “!Nilim long [pos, NW]!” Ol pris oli pusum ol man ya blong oli singaot moa, oli rao, oli wantem mekem blad i ron. Traem tingbaot. Faef dei bifo nomo, taem Jisas i kam insaed long Jerusalem, ating sam long ol man ya oli stap wetem olgeta we oli bin ona long Jisas olsem King. Be naoia oli wantem kilim hem i ded. Maet sam disaepol blong Jisas oli stap long ples ya, be oli haed lelebet mo oli stap kwaet nomo.

Nao Paelet i luk we hem i no save winim olgeta. Olgeta oli rere blong mekem bigfala rao. Nao Paelet i tekem wan besin wora. Long fes blong olgeta man, hem i wasem han blong hem, mo i talem se: “Bambae i no gat poen long mi from ded blong man ya, blad blong hem i no stap long mi. Hemia i bisnes blong yufala nomo.” Nao olgeta man oli ansa se: “Ded blong hem i bisnes blong mifala, blad blong hem bambae i stap long mifala wetem ol pikinini blong mifala.”

Nao Paelet i letem Barabas i gofri, olsem we olgeta oli wantem. Hem i save se samting ya i no stret. Be hem i wantem we ol man oli glad long hem. Nao hem i talem long ol soldia blong tekemaot ol klos blong Jisas mo blong wipim hem. Wip we oli yusum i wan spesel kaen wip. Buk ya (The Journal of the American Medical Association) i tokbaot fasin blong ol man Rom blong wipim man, i se:

“Oli yusum wan smol wip we i gat plante rop blong hem. (Nem blong hem flagrum, no flagellum.) Sam rop ya oli longfala, sam oli sot nomo. Oli wokem ol rop ya long skin blong buluk. Long sam rop wanwan oli fasem smol aean. Mo long ol narafala smol rop ya oli fasem sam haf blong bun blong sipsip, we oli sap tumas. . . . Taem ol soldia blong ol man Rom oli wipim baksaed blong man wetem ful paoa blong olgeta, ol smol aean ya oli mekem baksaed i solap mo i soa tumas. Mo ol haf blong wip we oli fasem bun blong sipsip long hem, oli katem skin blong man mo ol smol string aninit long skin tu. Oli gohed blong wipim man gogo oli terem mit blong hem we i stap dip long bodi kolosap long ol bun. Nao skin mo mit blong man ya i stap hang long ol smol pis nomo, we blad i stap ron long hem.”

Traem tingbaot olsem wanem Jisas i harem i soa long bodi blong hem taem oli wipim hem olsem ya. Nao biaen, ol soldia oli tekem Jisas i go insaed long yad blong bigfala haos blong hed gavman. Nao oli singaot ful kampani blong ol soldia oli kam. Long ples ya ol soldia oli mekem i nogud long hem bakegen. Oli tekem rop we i gat nil, oli wokem wan hat long hem we i olsem hat blong king, nao oli pusum hat ya i go long hed blong hem. Mo oli putum wan stik long raethan blong hem, blong i holem. Mo oli putum wan red kot long hem, olsem kot blong king. Nao oli nildaon long hem, oli stap mekem plei long hem se: “Mifala i ona yu, yu king blong ol man Isrel.” Nao oli spet long hem, mo oli slavem fes blong hem. Oli tekemaot stik ya long han blong hem, oli stap kilim hem long hed blong hem. From samting ya, ol ropnil we oli wokem “hat blong king” long olgeta blong jikim Jisas, oli stikim hed blong hem moa.

Nating we oli stap mekem i nogud tumas long Jisas, be hem i stanap strong mo hem i stap kwaet. Paelet i sapraes tumas long samting ya, taswe hem i traem wan moa taem bakegen blong blokem olgeta. Hem i talem long ol man ya se: “!E, olgeta! Bambae mi tekem man ya i kam afsaed bakegen, blong yufala i luk we mi no save faenem wan rabis poen long hem nating.” Ating hem i ting se sipos oli luk we Jisas i harem nogud tumas long bodi blong hem from ol samting we oli bin mekem long hem, maet oli sore long hem. Ale Jisas i kam afsaed we hem i gat hat ya we i olsem hat blong king we oli wokem long rop we i gat nil, mo i gat kot ya we i red olsem kot blong king. Blad i stap ron long fes blong hem, mo fes blong hem i nogud from we hem i harem i soa tumas long bodi blong hem. Be ol man ya oli no gat sore long hem. Paelet i talem long olgeta se: “E, olgeta. Yufala i luk. Hemia man ya.”

Nating we bodi blong hem i solap mo blad i stap ron olbaot long bodi blong hem, be man ya we i stanap fored long olgeta hem i nambawan long olgeta man we oli laef bifo mo biaen long hem. Tru, hem i hae moa i bitim ol narafala man. From we hem i stanap strong long kwaet fasin, Paelet tu i luksave se man ya i hae moa i winim ol narafala man. Taswe tok blong Paelet i soemaot se hem i gat respek long hem mo hem i sore long hem tu. Jon 18:39 kasem 19:5; Matyu 27:15-17, 20-30; Mak 15:6-19; Luk 23:18-25.

▪ ?Olsem wanem Paelet i traehad blong faenem wan rod blong letem Jisas i gofri?

▪ ?Paelet i mekem wanem blong traem soemaot se blad blong Jisas i no stap long hem?

▪ ?Long taem ya oli wipim man olsem wanem?

▪ ?Taem oli wipim Jisas finis, oli jikim hem olsem wanem?

▪ ?Paelet i mekem wanem bakegen blong traem letem Jisas i gofri?

Japta 124

Paelet i Letem Olgeta Oli Tekem Jisas i Go

NATING we oli kilim nogud Jisas, be hem i stap kwaet mo hem i stap stanap strong. Paelet i laekem gudfala fasin ya blong Jisas, taswe hem i traem wan moa taem bakegen blong letem hem i gofri. Be ol jif pris oli kam kros moa. Oli no save letem wan samting i blokem rabis plan blong olgeta. Oli stap singaot bigfala bakegen se: “!Nilim long [pos, NW]! !Nilim long [pos]!”

Paelet i talem se: “Ale, yufala nomo i tekem, yufala i go nilim hem long [pos].” (Defren long tok we oli bin talem bifo, ol man Jyu oli gat raet blong kilim i ded ol man blong brekem loa, sipos ol man ya oli bin mekem bigfala sin agens long skul blong olgeta.) Nao Paelet i talemaot bakegen se Jisas i no mekem wan samting we i mas ded from. Hemia namba faef taem we hem i mekem olsem. Hem i se: “Mi mi no faenem wan rabis poen long hem nating.”

Ol man Isrel oli bin talemaot se Jisas i agensem gavman. Be oli luk we ol gyaman ripot ya oli no win. Taswe naoia oli talem bakegen sem tok we oli bin talemaot long fored blong kot ya Sanhedrin, sam haoa bifo. Oli talem se Jisas i mekem i no stret from we hem i stap talem se hem i pikinini blong God. Oli se: “Mifala i gat wan loa blong mifala we i talem se hem i mas ded, from we hem i stap talem se ‘Mi mi Pikinini blong God.’ ”

Hemia fastaem we Paelet i harem tok ya, nao hem i fraet moa. Hem i luksave se Jisas i no olsem ol narafala man, hem i wan spesel man. Ol gudfala fasin blong Jisas oli pruvum samting ya. Mo drim we waef blong Paelet i luk, hem tu i pruvum samting ya. ?Be weswe hem i save talem se hem i “Pikinini blong God”? Paelet i save se Jisas i kamaot long Galili. ?Maet hem i laef ples fastaem? Nao hem i tekem Jisas i go insaed long haos blong hem bakegen, i askem long Jisas se: “?Yu yu kamaot long weples?”

Jisas i no ansa. Hem i talem finis long Paelet se hem i king, mo Kingdom blong hem i no blong wol ya. Hem i no nidim blong eksplenem moa. Paelet i harem nogud from we Jisas i no ansarem kwestin blong hem. Nao hem i faerap long Jisas, i se: “?Weswe yu no save talem long mi? ?Yu yu no save we mi mi gat paoa blong letem yu yu gofri, mo mi gat paoa blong nilim yu long [pos]?”

Jisas i gat respek, i ansa se: “Sipos God i no givim paoa ya long yu fastaem, bambae yu yu no gat paoa long mi nating, be hem i givim paoa ya long yu.” Hem i soemaot we God i letem ol haeman blong wol oli rul long ol man. Nao Jisas i talem se: “From samting ya, sin blong man ya we i putum mi long han blong yu i nogud moa.” Tru ya, hae pris Kaeafas mo ol man blong hem mo Judas Iskariot, olgeta oli mekem nogud moa i bitim Paelet, from we ol samting we oli mekem long Jisas oli no stret nating.

Paelet i sek moa long Jisas nao. Mo hem i fraet moa se maet Jisas i kamaot long God. Ale hem i traehad bakegen blong letem hem i gofri. Be ol man Isrel oli agensem Paelet. Oli talem bakegen se Jisas i agensem gavman. Oli tok strong blong trikim Paelet, oli se: “Sipos yu letem man ya i gofri, hemia yu yu no fren blong Sisa. Man we i stap talem se ‘Mi mi king,’ hem i enemi blong Sisa ya.”

Nating we oli save mekem i nogud long Paelet from, be hem i tekem Jisas i kam afsaed bakegen. Hem i traehad bakegen blong pulum olgeta i se: “E, olgeta. Yufala i luk. Hemia king blong yufala ya.”

Be oli singaot, oli se: “!Tekemaot hem! !Tekemaot hem! !Nilim long [pos]!”

Paelet i konfyus, i se: “?Yufala i wantem blong mi nilim king blong yufala long [pos]?”

Ol man Isrel i harem nogud aninit long rul blong ol man Rom. !Tru ya, oli no laekem nating gavman blong Rom! Be ol jif pris ya oli gat tu fes, oli se: “Mifala i no gat king. Sisa nomo i king blong mifala.”

Paelet i no wantem lusum haeples mo haenem blong hem. Taswe taem ol man Isrel oli gohed strong, tingting blong hem i kam slak, ale oli winim hem. Nao Paelet i putum Jisas long han blong olgeta. Nao ol soldia oli tekemaot red kot ya long Jisas, oli putum klos blong hem long hem bakegen. Nao oli lidim Jisas i goaot long taon, mo semtaem, hem i mas karem pos ya we bambae i ded long hem.

Dei ya i Fraede, Naesan 14. Ating naoia i kolosap long medel dei. I stat long eli moning long Tasde, Jisas i no slip nating, mo hem i harem i soa oltaem nomo. Taswe naoia paoa blong hem i godaon, mo wud ya i hevi. Ale hem i foldaon long rod, i no moa save karem wud ya. Nao oli luk wan man Afrika we i kamaot long taon ya Saerin, nem blong hem Saemon. Hem i stap wokbaot long rod, nao oli putum pos blong Jisas long solda blong hem, mo oli fosem hem blong karem pos ya. Plante man oli biaen long Jisas long rod. Mo tu, i gat plante woman we oli stap krae long hem, oli stap sore, oli stap kilim olgeta nomo from.

Be Jisas i tanraon, i talem long olgeta, i se: “Ol woman Jerusalem, yufala i no krae from mi. I moa gud yufala i stap krae from yufala, mo from ol pikinini blong yufala. Yufala i lesin. I gat taem i stap kam we bambae oli save talem se ‘Yufala we i no save karem pikinini, mo yufala we i no bonem pikinini samtaem, mo yufala we i no givim titi long pikinini samtaem, yufala i save harem gud.’ . . . Naoia wud i grin yet, be oli stap mekem olsem. Be sipos wud i drae, man, bambae oli save mekem i strong moa.”

Taem Jisas i stap tokbaot wud ya hem i minim nesen blong ol man Isrel. Jisas i stap yet long nesen ya, wetem wan smol kampani blong man we oli bilif long hem. Taswe i olsem we wud ya i grin yet, i gat sam laef i stap long hem yet. Be taem Jisas mo smol kampani ya oli kamaot long nesen ya, bambae wud ya i ded nomo long saed blong speret. Yes, nesen ya no ogenaesesen ya bambae i olsem wan wud we i drae finis. Bambae God i yusum ol ami blong ol man Rom blong spolem nesen blong ol man Isrel. !Long taem ya nao, bambae oli gat risen blong krae bigwan! Jon 19:6-17; 18:31; Luk 23:24-31; Matyu 27:31, 32; Mak 15:20, 21.

▪ Fastaem ol lida blong ol man Isrel oli talem se Jisas i agensem gavman. ?Be taem oli luk we oli no save win long poen ya, oli talemaot wanem poen bakegen?

▪ ?From wanem Paelet i fraet moa?

▪ ?Sin blong hu i bigwan moa, from ol samting we oli mekem long Jisas?

▪ ?Long en blong bisnes ya, ol pris oli talem wanem long Paelet blong hem i putum Jisas long han blong olgeta, blong oli kilim hem i ded?

▪ ?Jisas i talem wanem long ol woman we oli stap krae long hem? ?Taem hem i talem se wud i “grin yet,” hem i minim wanem? ?Olsem wanem bambae wud ya “i drae”?

Japta 125

Hem i Soa Bitim Mak Long Pos

OLI stap tekem Jisas wetem tufala man blong stil oli go long ples we bambae oli kilim trifala i ded. Afsaed long taon, i no longwe, oli kasem wan ples, nem blong hem Golgota, we narafala nem blong hem, ples blong “Bun blong hed blong man.”

Oli tekemaot klos blong trifala. Nao oli tekem sam waen we i gat drag ya mir long hem blong kilim bodi, blong i no soa. Ating ol woman Jerusalem oli mekemrere dring ya. Mo ol man Rom oli no blokem trifala we bambae oli hangem trifala long pos, oli letem trifala i dring. Be taem Jisas i testem waen ya, hem i no dring. ?From wanem? Hem i wantem holem klia tingting olwe taem bigfala trabol ya i traem bilif blong hem.

Nao oli mekem Jisas i slip long wud ya. Nao oli pulum tufala han blong hem i go antap long hed blong hem. Nao ol soldia oli tekem bigfala nil, oli nilim tufala han mo tufala leg blong Jisas. Taem ol nil ya oli stikim skin blong hem mo oli pastru long mit blong hem, bodi blong hem i muvmuf from soa. Nao oli stanemap pos ya. Soa ya i bitim mak, from we bodi blong Jisas i hevi, mo ol nil oli stap terem mit blong han mo leg blong hem. Be Jisas i no tok nogud long ol soldia blong Rom. Long defren fasin hem i prea long God i se: “Papa, plis yu fogivim olgeta ya, from we oli no save samting ya we oli stap mekem.”

Paelet i bin raetem wan tok, nao hem i talem long olgeta blong oli putum long pos. Tok ya i talem se: “Jisas, man Nasaret. Hemia i king blong ol man Isrel.” Paelet i raetem tok ya from we hem i gat respek long Jisas. Be i no hemia nomo. Paelet i no laekem nating ol pris blong ol man Isrel from we olgeta oli fosem hem gogo hem i jajem Jisas se bambae hem i ded. Blong olgeta man oli save ridim tok ya, Paelet i raetem long tri lanwis, long Hibru, long Latin we i lanwis blong gavman blong Rom, mo long Grik, lanwis ya we plante man oli stap yusum.

Be ol jif pris mo Kaeafas mo Anas tu, olgeta oli harem nogud. ?From wanem? Olgeta oli ting se oli win finis, be tok ya we Paelet i raetem i stap spolem glad blong olgeta. Taswe oli tok long Paelet, oli se: “Yu no raetem se ‘Hemia i king blong ol man Isrel.’ I moa gud yu raetem se ‘Man ya i stap talem se Mi mi king blong ol man Isrel.’ ” Paelet i harem nogud from we oli yusum hem finis blong kasem ol samting we olgeta nomo oli wantem. Nao Paelet i ansa stret long olgeta, long fasin we i no gat respek nating long olgeta. Hem i se: “Samting we mi raetem, mi raetem.”

Nao ol pris wetem plante narafala man bakegen oli stap hivap long ples we oli kilim Jisas i ded. Mo ol pris ya oli tok agens long tok ya we i stap antap long hed blong Jisas. Oli talem bakegen gyaman poen ya agens long Jisas, we oli talemaot finis long kot ya Sanhedrin. Taswe yumi no sapraes we ol man we oli stap wokbaot long rod oli stap tok nogud long Jisas, oli stap saksakem hed blong olgeta. Oli stap laf long hem, oli se: “Yu yu man blong brekemdaon haos blong God, mo blong stanemap bakegen long tri dei nomo, ale, yu sevem laef blong yu nao. Sipos yu yu Pikinini blong God tru, yu aot long [pos] ya, yu kamdaon.”

Long sem fasin, ol jif pris mo ol fren blong olgeta oli stap laf long Jisas, oli se: “Hem i sevem plante narafala man finis, be i no naf blong sevem hem. !Hemia i king blong ol man Isrel ya! I gud hem i kamdaon long [pos] naoia, nao bambae yumi bilif long hem. Man ya i bilif long God. Sipos God i laekem hem, i gud hem i sevem hem naoia. From we man ya i stap talem se ‘Mi mi Pikinini blong God.’ ”

Ol soldia tu oli folem ol narafala, oli stap mekem plei long Jisas. Maot blong Jisas i drae we i drae. Ale, oli tekem sam waen we i konkon, oli holem i stap kolosap nomo long maot blong Jisas, nao oli laf long hem. Oli jikim hem, se: “Sipos yu yu king blong ol man Isrel, yu sevem yu.” Tufala man blong stil, wan we i stap hang long raetsaed blong Jisas mo wan we i stap hang long lefsaed blong Jisas, tufala tu i tok nogud long Jisas. !Tingbaot! Man ya i hae moa long olgeta man we oli laef bifo long hem mo olgeta man we oli laef biaen long hem. Yes, man ya i givhan long Jeova God blong wokem olgeta samting. !Be hem i rere blong harem i soa mo blong letem ol man oli mekem i nogud long hem bitim mak!

Nao ol soldia oli tekem ol klos blong Jisas, oli seraot olgeta long fo hip. Oli sakem daes blong faenemaot hu bambae i tekem ol klos ya. Be klos blong Jisas we hem i werem kolosap long bodi blong hem, oli wokem long wan pis nomo, oli no joenem kaliko blong hem samples blong somap. Taswe klos ya i sas tumas. Nao ol soldia ya oli taltalem long olgeta se: “I nogud yumi brekem samting ya. I moa gud yumi sakem daes. Man we i win i save tekem.” Olgeta oli stap mekem wan profet tok blong Baebol i kamtru, be oli no save. Profet tok ya i talem se: “Olgeta oli seraot ol klos blong mi oli go long olgeta. Mo oli sakem daes blong wan i tekem [klos, NW] blong mi.”

Smoltaem biaen, wan long tufala stil man i luksave se Jisas i rili wan king. Nao hem i blokem nogud tok ya blong narafala stil man, i se: “?Weswe? !Ating yu yu no fraet long God! Yumitrifala i gat sem panis ya. Be blong yumitufala i stret nomo, from we yumitufala i stap kasem stret panis nomo blong ol samting ya we yumitufala i mekem. Be man ya i no mekem wan samting nating we i no stret.” Nao hem i askem wan samting long Jisas, i se: “Jisas, taem we bambae yu yu kam insaed long kingdom blong yu, plis yu tingbaot mi bakegen.” (NW)

Nao Jisas i talem long hem, i se: “Tru mi mi talem long yu tede, se bambae yu yu stap wetem mi long Paradaes.” (NW) Taem Jisas i stap rul olsem king long heven, mo hem i givim laef bakegen long man ya blong brekem loa we hem i tanem tingting blong hem from ol sin blong hem, long taem ya nao, promes ya blong Jisas bambae i kamtru. Hemia nao taem we ol man we oli pastru long Amageden mo ol fren blong olgeta oli gat bigfala blesing blong mekem wol ya i kam olsem wan paradaes. Matyu 27:33-44; Mak 15:22-32; Luk 23:27, 32-43; Jon 19:17-24.

▪ ?From wanem Jisas i no dring waen we oli putum drag ya mir long hem?

▪ ?From wanem oli raetem sam tok long pos antap long Jisas? ?Samting ya i mekem se Paelet mo ol jif pris oli stap mekem toktok olsem wanem?

▪ ?Taem Jisas i stap hang long pos, oli mekem wanem moa long hem blong spolem hem? ?Wanem i pusum olgeta blong mekem olsemia?

▪ ?Samting we oli mekem wetem ol klos blong Jisas i mekem wanem profet tok i kamtru?

▪ ?Wan long tufala stil man ya i jenisim tingting blong hem olsem wanem? ?Bambae Jisas i mekem promes blong hem i kamtru long man ya olsem wanem?

Japta 126

“Tru Ya, Man Ya i Pikinini Blong God”

TAEM Jisas i bin hang smoltaem nomo long pos, wan narakaen samting i kamaot. Long medel dei, tudak i kam kavremap olgeta ples ya, nao i stap tri haoa olsem. Hemia i no olsem samting we i stap kamaot samtaem, taem mun i pas long fored blong san, ale i blokem laet blong san olgeta. Samting ya i save hapen long taem blong nyumun nomo. Be long taem blong Pasova, mun i fulwan. Mo tu, taem mun i kavremap san, samting ya i save stap blong sam menet nomo. !Taswe i klia se God nomo i mekem tudak ya i kamaot! Ating olgeta we oli stap laf long Jisas oli sek long samting ya, maet oli no moa jikim hem.

Maet narakaen samting ya i bin kamaot bifo we man blong brekem loa i tok long fren blong hem, mo i askem long Jisas blong tingbaot hem bakegen. Sipos i bin hapen olsemia, ating samting ya i pulum hem blong tanem tingting blong hem from sin blong hem. Ating long taem blong tudak ya, hemia taem we mama blong Jisas wetem sista blong hem, Salome, mo Meri we i woman Magdala, wetem Meri we i mama blong aposol Jemes ya we i namba tu Jemes, fofala woman ya i kam kolosap long pos we Jisas i stap hang long hem. Mo Jon, aposol ya we Jisas i laekem hem tumas, hem tu i stap wetem olgeta.

!Tru ya, samting ya we mama blong Jisas i luk i olsem ‘wan naef blong faet we i stikim hem’! Pikinini blong hem, we hem i bin lukaot gud long hem mo givim titi long hem, i stap hang long pos, i harem i soa bitim mak. Be Jisas i no stap tingbaot soa long bodi blong hem. Hem i stap tingting moa long mama blong hem. Taswe hem i traehad blong sakem hed blong hem long Jon, nao hem i talem long mama blong hem se: “Woman, hemia i pikinini blong yu.” Afta, hem i sakem hed blong hem long Meri, nao hem i talem long Jon se: “Hemia i mama blong yu.”

I klia se long taem ya, Meri i wan wido finis. Taem Jisas i talem tok ya i olsem we hem i putum mama blong hem long han blong aposol ya we hem i laekem hem tumas, blong hem i lukaot gud long hem. Hem i mekem olsem ya from we ol narafala pikinini blong Meri oli no bilif long Jisas yet. Ale hem i givim wan gudfala eksampel, from we hem i tingbaot ol nid blong mama blong hem long saed blong bodi. Be i no hemia nomo. Hem i tingbaot ol nid blong hem long saed blong speret tu.

Samwe long tri kilok long aftenun, Jisas i talem se: “Mi mi tosta.” Jisas i harem we paoa blong Papa blong hem i no moa stap wetem hem. I olsem we Papa i lego hem blong trabol ya i save traem bilif blong hem fulwan. Taswe Jisas i singaot bigfala i se: “?God blong mi, God blong mi, olsem wanem yu yu livim mi mi stap olsem ya?” Nao sam man we oli stap stanap long ples ya oli harem tok ya, oli talem se: “Hem i stap singaot long Elaeja ya.” Wantaem nomo, wan long olgeta i resis, i go tekem koten, i kafsaedem waen we i konkon i go long hem. Nao i putum koten ya long wan stik blong hisop tri, i pusum i go long Jisas blong hem i dring. Be sam narafala man oli talem se: “!Yu wet! Yumi traem luk se bambae Elaeja i kam sevem hem, no i no kam.”

Jisas i dring smol waen ya, nao hem i singaot bigfala, i se: “Olgeta samting i finis nao.” Tru ya, hem i finisim olgeta wok we Papa blong hem i sanem hem i kam long wol blong mekem. Las tok blong Jisas i olsem, se: “Papa, mi mi putum [speret blong mi, NW] long han blong yu.” Ale Jisas i livim paoa blong laef blong hem i stap long han blong God, hem i trastem God se bambae God i givim laef bakegen long hem. Hed blong hem i bendaon, nao hem i ded.

Semtaem nomo we Jisas i ded, graon i seksek bigwan, mo ol bigbigfala ston oli brobrok. Graon i seksek bigwan we i mekem ol gref long beregraon afsaed Jerusalem oli open, mo paoa blong hem i sakem plante dedbodi oli aot long gref blong olgeta. Plante man we oli pas long rod ya oli luk ol dedbodi ya, nao oli go talemaot long olgeta long taon ya.

Mo tu, semtaem we Jisas i ded, bigfala kaliko ya we i blokem Tabu Ples ya we i tabu tumas insaed long haos blong God, hem i brok olwe long tu haf, i stat antap, i finis daon. Kaliko ya we oli flasem gud, hem i samwe long 18 mita hae, mo hem i hevi tumas. Taswe bigfala merikel ya i soemaot se God i kros long olgeta we oli kilim Pikinini blong hem i ded. Be i no hemia nomo. Merikel ya i soemaot tu se rod blong kam insaed long Tabu Ples we i tabu tumas, hemia heven, i open nao from ded blong Jisas.

Taem ol man oli harem we graon i seksek bigwan, mo oli luk ol narafala samting we i hapen, oli fraet tumas. Kapten blong ol soldia we hem i lidim olgeta blong oli kilim Jisas i ded, hem i presem God. Hem i talem se: “Tru ya, hemia i Pikinini blong God.” Ating hem i stap long kot taem Jisas i stanap fored long Paelet, nao oli storeyan long poen ya, se Jisas i Pikinini blong God no no gat. Nao man ya i luksave se Jisas i Pikinini blong God tru. Yes, hem i luksave nao se man ya i moa hae i winim ol narafala man we oli laef samtaem.

Sam narafala tu oli luk ol merikel ya we oli kamaot, nao oli sapraes tumas, oli tanraon oli gohom we oli harem i nogud tumas. Oli stap kilkilim jes blong olgeta blong soemaot bigfala sore mo sem blong olgeta. Mo i gat sam woman we oli disaepol blong Jisas, oli stap stanap longwe lelebet, mo oli luk ol samting ya we i kamaot. Nao oli harem nogud tumas from. Mo aposol Jon, hem tu i stap stanap wetem olgeta. Matyu 27:45-56; Mak 15:33-41; Luk 23:44-49; 2:34, 35; Jon 19:25-30.

▪ Blong tri haoa, tudak i kam kavremap ples ya. ?From wanem yumi save talem se samting ya i no olsem samting we i stap hapen samtaem, we mun i save blokem laet blong san olgeta?

▪ ?Smoltaem bifo we Jisas i ded, hem i givim wanem gudfala eksampel long olgeta we papa mama blong olgeta i olfala finis?

▪ ?Wanem fo laswan samting we Jisas i talem, bifo we hem i ded?

▪ ?Taem graon i seksek bigwan, wanem i kamaot? ?Taem kaliko insaed long haos blong God i brok long tu haf, wanem mining blong samting ya?

▪ ?Taem kapten blong ol soldia we i lidim olgeta blong kilim Jisas i ded i luk ol merikel, hem i mekem wanem?

Japta 127

Long Fraede Oli Berem Hem—Long Sande Gref i Emti

HEMIA i Fraede aftenun, kolosap san i godaon. Taem san i godaon finis, Sabat blong Naesan 15 bambae i stat. Dedbodi blong Jisas i hang i stap long pos, i slak. Be tufala stilman we tufala i stap hang kolosap long hem, tufala i no ded yet. Fraede aftenun, hem i Taem blong Mekemrere evri samting. From we hemia taem we ol man oli mekemrere kakae, mo oli hareap blong finisim ol narafala wok we oli no save livim gogo Sabat dei i pas.

Sabat dei we kolosap i stat nao hem i speselwan. Hem i no olsem Sabat dei we oli mekem evri wik, long namba seven dei. Hemia i dabol Sabat, no “bigfala” Sabat dei. Naesan 15, hem i faswan dei blong lafet ya we i gohed seven dei, nem blong hem Lafet blong ol Kek we oli no gat Is long olgeta. Evritaem hem i wan Sabat dei, nomata wanem dei blong wik Naesan 15 i foldaon long hem. Be long yia ya, Naesan 15 i foldaon stret long wan Sabat dei we oli mekem evri wik tu. Taswe hem i wan “bigfala” Sabat dei.

Loa blong God i talem se ol dedbodi oli no mas stap hang long pos long fulnaet. From samting ya, ol lida blong ol man Isrel oli go askem long Paelet blong i sanem ol man blong hem blong oli go brekem leg blong olgeta, blong olgeta i ded kwik. Nao ol soldia blong hem oli go, oli brekem leg blong tufala stilman ya. Taem oli kam long Jisas, oli luk we hem i ded finis, nao oli no brekem leg blong hem. Samting ya i mekem profet tok ya blong Baebol i kamtru we i talem se: “I no gat wan bun blong hem we bambae i brok.”

Be blong mekem se ol man oli luksave we Jisas i rili ded, wan long ol soldia ya i sperem saed blong Jisas long spia blong hem. Spia ya i stikim ples we hat blong Jisas i stap long hem, nao blad mo wora, tufala i kamaot wantaem, tufala i ron i godaon. Aposol Jon, we hem i stap lukluk ol samting ya, hem i raetemdaon se hemia i mekem wan narafala tok blong Baebol i kamtru, i se: “Bambae olgeta oli save lukluk man ya we oli sperem.”

Wan man Aramatia, nem blong hem Josef, hem tu i stap, taem oli kilim Jisas i ded. Hem i wan memba blong Kaonsel blong olgeta, Sanhedrin. Ol man oli stap ona long Josef. Hem i no agri wetem disisin we hae kot i mekem agens long Jisas, we i no stret nating. Josef i wan disaepol blong Jisas tu. Bifo, hem i stap haedem samting ya, hem i fraet blong talemaot. Be nao hem i no moa fraet, hem i go askem long Paelet blong i letem hem i tekemaot bodi blong Jisas. Nao Paelet i singaot kapten blong ol soldia blong hem, i askem long hem sipos i tru we Jisas i ded finis. Taem kapten i talem se: ‘Yes, hem i ded finis,’ Paelet i letem long Josef blong i tekem bodi blong Jisas.

Nao Josef i tekem bodi blong Jisas, i kavremap long wan gudfala kaliko we i waet, i klin gud. Nao hem i mekemrere bodi blong Jisas blong oli berem hem. Nikodimas, wan narafala memba blong Kaonsel ya Sanhedrin, hem i givhan long Josef. Nikodimas tu i haedem bilif blong hem long Jisas, from we hem i fraet se bambae oli tekemaot haenem blong hem. Be nao hem i karem wan bag we i fulap long tufala samting ya we i gat gudfala smel, nem blong tufala, mir mo alos, we i sas tumas. Bag ya i gat samting olsem 33 kilo long skel blong ol man Rom. Nao tufala i putum ol samting ya we i gat gudfala smel oli go insaed long plante longfala pis kaliko, stret long fasin blong ol man Isrel blong berem man. Nao oli kavremap bodi blong Jisas long ol longfala pis kaliko ya.

Kolosap long ples ya i gat wan garen. Long garen ya, Josef i gat wan hol i stap we i blong berem man, we oli jes katem long ston. Ale olgeta oli putum bodi blong Jisas i go long hol ya. Oli mas berem hem bifo we Sabat dei i stat, taswe oli hareap blong mekemrere bodi blong hem, blong oli berem hem. From samting ya, Meri, woman Magdala, wetem Meri, mama blong namba tu Jemes, oli hareap blong gobak long haos, nao oli stap mekemrere ol lif we i gat gudfala smel, mo ol pomad, blong bambae oli save go putum long bodi blong Jisas. Ating tufala ya i bin givhan finis long Josef mo Nikodimas blong mekemrere bodi blong Jisas, blong oli save berem hem. Tufala woman ya i mekem plan se taem Sabat dei i finis, bambae tufala i mekemrere sam moa lif, blong go putum long bodi blong Jisas. Hemia i blong mekem bodi blong Jisas i stap longtaem lelebet, i no sting.

Long nekis dei, Sarede we hem i Sabat dei, ol jif pris mo ol Farisi oli go long Paelet, oli talem se: “Masta, mifala i stap tingbaot man blong gyaman ya. Taem we hem i stap laef yet, hem i stap talem se ‘Biaen long tri dei, bambae God i mekem mi mi laef bakegen long ded.’ From samting ya, plis yu talem long ol man blong yu blong oli go lukaotgud long hol ya long ston, gogo kasem namba tri dei blong hem. Sipos no, maet ol man blong hem bambae oli go stilim bodi blong hem, nao bambae oli talemaot long ol man se ‘Hem i laef bakegen long ded.’ Sipos i olsem, bambae las gyaman ya blong hem i nogud moa, i winim hemia blong fastaem.”

Nao Paelet i talem long olgeta, i se: “Yufala i save tekem sam soldia. Yufala i go mekem evri samting we yufala i save, blong lukaotgud long ples ya.” Nao oli go, oli fasemgud ston we i blokem hol ya. Mo oli putum sam soldia blong Rom oli gad, oli stap lukaot long ples ya.

Long Sande moning, taem san i girap, Meri, woman Magdala, mo narafala Meri we hem i mama blong namba tu Jemes, wetem Salome, mo Joana, mo sam narafala woman tu, oli karem sam lif we i gat gudfala smel, blong go putum long bodi blong Jisas long beregraon. Nao long rod, oli stap asaskem long olgeta se: “?Hu bambae i save givhan long yumi blong tekemaot ston ya we i stap blokem maot blong hol?” Be taem oli kamtru long beregraon, oli luk we ston ya i kamaot finis. Graon i bin seksek bigfala, mo wan enjel blong Jeova i bin kam, i rolemaot ston ya we i blokem hol. !Ol gad oli no moa stap blong lukaot long hol ya, mo gref i emti nomo i stap! Matiu 27:57 kasem 28:2; Mak 15:42 kasem 16:4; Luk 23:50 kasem 24:3, 10; Jon 19:14, 31 kasem Jon 20:1; 12:42; Levitikas 23:5-7; Dutronome 21:22, 23; Ol Sam 34:20; Sekaraea 12:10.

▪ ?From wanem oli talem se Fraede hem i Taem blong Mekemrere evri samting? ?Wanem mining blong “bigfala” Sabat dei?

▪ ?Ol samting we oli mekem long bodi blong Jisas oli fulumap wanem profet tok?

▪ ?Josef mo Nikodimas tufala i mekem wanem long bodi blong Jisas? ?Bifo tufala i fren olsem wanem wetem Jisas?

▪ ?Ol jif pris oli askem wanem long Paelet? ?Paelet i talem wanem long olgeta?

▪ ?Long Sande moning, taem san i girap, wanem i hapen?