Refrens Blong Kristin Wok Mo Laef Miting Wokbuk
© 2024 Watch Tower Bible and Tract Society of Pennsylvania
6-12 MEI
OL SAS SAMTING LONG BAEBOL OL SAM 36-37
“Yu No Mas Harem Nogud From Ol Rabis Man”
?Wanem Bambae i Lus Taem Kingdom Blong God i Kam?
4 ?Ol rabis man oli mekem wanem long yumi? Aposol Pol i talem se long ol las dei, “laef long wol ya bambae i kam strong tumas.” Hem i gohed se: “Ol man nogud wetem ol man blong giaman, bambae oli save gohed blong mekem i mowas olgeta.” (2 Timoti 3:1-5, 13) ?Yu yu luksave samting ya? Plante long yumi oli bin kasem trabol from ol rabis man. I gat ol stronghed we oli mekem man i fraet, mo ol man we oli agensem narafala from kala blong skin, mo ol man blong stil mo blong kilim man. Sam long olgeta oli mekem ol rabis wok ya long klia ples nomo. Sam narafala oli giaman se oli wantem givhan long yumi, be oli gat rabis tingting. Nating se ol rabis man ya oli no mekem wan samting long yumi stret, be oli spolem yumi yet. Yumi harem nogud tumas taem yumi kasem nius blong ol rabis samting we ol man ya oli mekem long ol pikinini, ol olfala, mo olgeta we oli no naf blong stanap strong agens long olgeta. Ol rabis man ya oli gat fasin olsem ol wael animol mo ol rabis enjel. (Jemes 3:15) Be i gud tumas we i gat ol gudfala promes long Tok blong Jehova.
Jehova i Blesem Olgeta We Oli Fogivim Narafala
10 Yumi spolem yumi wan taem yumi holemtaet kros. Fasin blong kros i olsem wan hevi baden, mo Jehova i wantem se yumi sakemaot fasin ya, blong yumi save gat pis. (Ridim Efesas 4:31, 32.) Hem i talem long yumi blong ‘livim fasin blong kros, mo fasin blong kros bitim mak.’ (Sam 37:8) Sipos yumi folem advaes ya, bambae yumi harem gud. Sipos yumi gohed blong kros long man we i mekem yumi harem nogud, hemia i save spolem tingting mo bodi blong yumi. (Prov. 14:30) Yes, taem yumi holemtaet kros, hemia i sem mak olsem we yumi dring posen, mo hemia i spolem yumi wan be i no narafala. Be taem yumi fogivim narafala, yumi stap mekem i gud long yumi wan. (Prov. 11:17) Yumi gat pis long tingting mo hat blong yumi, mo yumi naf blong gohed long wok blong Jehova.
‘Luk Long Jehova Blong i Mekem Yu Yu Glad’
20 Ale, “ol man we tingting blong olgeta i stap daon, bambae oli tekem graon ya i blong olgeta.” (Ol Sam 37:11a) ?Be hu ya ol man ya we “tingting blong olgeta i stap daon”? Tok ya we yumi tanem i kam ‘tingting we i stap daon’ i kamaot from wan narafala tok we rili mining blong hem se man “we i kasem kil, we narafala i bos antap long hem, no we narafala i daonem hem.” Yes, ol man we “tingting blong olgeta i stap daon” oli man we oli stap wet nomo long Jehova blong stretem ol rong we narafala i mekem long olgeta. “Nao bambae oli harem gud, from we oli stap gud, mo oli gat plante samting.” (Ol Sam 37:11b) Naoia finis yumi stap faenem pis insaed long trufala Kristin kongregesen we i olsem wan paradaes long saed blong spirit.
Ol Gudgudfala Samting
it-2 445
Bigfala Hil
No muv, strong, o hae. Tok ya no muv mo strong, oli yusum blong tokbaot ol bigfala hil. (Aes 54:10; Hab 3:6; skelem wetem Sam 46:2.) Taswe, man blong raetem sam i tokbaot stret fasin blong Jehova, se i olsem “ol bigfala hil blong God.” (Sam 36:6, Futnot.) Maet hemia i min se stret fasin blong Jehova i no save jenis. O i tokbaot stret fasin blong God se i olsem bigfala hil we i hae, mo hemia i blong makem se stret fasin blong God i hae moa long fasin blong ol man. (Skelem wetem Aes 55:8, 9.) Folem Revelesen 16:20, yumi luk se “ol bigfala hil tu oli lus,” afta we God i kafsaedem ol seven bol ya we oli pijarem bigfala kros blong hem. Hemia i soemaot se i no gat wan samting we i hae olsem ol bigfala hil, we i naf blong ronwe taem God i kafsaedem bigfala kros blong hem.—Skelem wetem Jer 4:23-26.
13-19 MEI
OL SAS SAMTING LONG BAEBOL OL SAM 38-39
Yu No Mas Gohed Blong Harem Se Yu Gilti Bitim Mak
“Lukluk i Go Stret Nomo” Long Fiuja
12 Ridim 1 Jon 3:19, 20. I nomol blong filim gilti from mastik we yu bin mekem. Eksampol, samfala oli filim gilti from ol samting we oli bin mekem bifo we oli lanem trutok. Sam narafala oli filim gilti from ol mastik we oli mekem afta we oli baptaes. Mo i nomol blong gat ol filing olsem. (Rom 3:23) I tru, yumi wantem mekem samting we i stret. Be “yumi evriwan i stambol plante taem.” (Jem. 3:2; Rom 7:21-23) Nating se yumi no laekem filing ya blong gilti, be filing ya i save givhan long yumi. ?From wanem? From we i save halpem yumi blong mekem sam jenis long laef, mo gat strong tingting blong no mekem ol sem mastik ya bakegen.—Hib. 12:12, 13.
13 Be samtaem yumi save gohed blong filim gilti bitim mak, nating se yumi tanem tingting blong yumi, mo Jehova i soem se hem i fogivim yumi finis. (Sam 31:10; 38:3, 4) ?Olsem wanem samting ya i save hapen? Tingbaot eksampol blong wan sista we oltaem i filim gilti from ol nogud samting we i mekem bifo. Hem i se: “Mi harem se i blong nating nomo we mi stap traehad blong mekem moa long wok blong Jehova, from we i let finis blong hem i sevem mi.” Ating plante long yumi i gat sem filing olsem. Taswe i impoten we yumi lukaotgud blong no foldaon long trap ya blong filim gilti bitim mak. ?From wanem? From we Setan bambae i glad tumas sipos yumi stop blong mekem wok blong Jehova, nating we Jehova i fogivim yumi finis.—Skelem 2 Korin 2:5-7, 11.
?Olsem Wanem Blong Mekem Jehova i Glad Long Ol Dei Blong Laef Blong Yumi?
OL DEI long laef blong yumi oli sot mo oli pas kwiktaem nomo. Deved i tingbaot laef ya we i sot tumas, mo long wan Sam hem i prea se: “Hae God. ?Bambae mi stap gogo kasem wetaem? ?Wetaem bambae mi mi ded? Plis yu talemaot long mi wetaem laef blong mi bambae i finis. Naoia yu mekem laef blong mi i kam sotwan we i sotwan olgeta. Long fes blong yu, taem ya blong mi i olsem nating nomo.” Deved i wantem tumas we ful laef blong hem, ol toktok mo aksen blong hem tu, i mekem God i glad. Hem i talem se hem i dipen long God i se: “Mi mi putum tingting blong mi i stap long yu nomo.” (Ol Sam 39:4, 5, 7) Jehova i lesin long Deved. Hem i rili luklukgud long ol wok blong Deved, mo i blesem hem from.
I isi nomo blong stap bisi evri dei, mo blong foldaon long trap ya we laef blong yumi i spid tumas mo i fulap long plante defdefren samting blong mekem. Samting ya i save pulum yumi blong wari tumas, from we i gat plante samting blong mekem, be i no gat naf taem. ?Yumi gat tingting olsem Deved? ?Yumi wantem tumas blong yusum laef blong yumi blong mekem God i glad? Yes, Jehova i stap luklukgud mo i skelem yumi evriwan. Klosap 3,600 yia bifo, Job, wan man we i fraetgud long God, i luksave we Jehova i stap lukluk hem mo i stap skelem ol wok blong hem. Job i talem se: “?Sipos God i jajem mi bambae mi mi talem wanem?” (Job 31:4-6, 14) Yumi save mekem Jehova i glad long ol dei blong laef blong yumi, sipos yumi putum ol wok long saed blong spirit fastaem, mo sipos yumi obei long ol loa blong God mo yumi yusum taem blong yumi long waes fasin. Bambae yumi luklukgud long ol defren poen ya.
Bildim Bak Frensip Blong Yu Wetem Jehova
Prea long Jehova oltaem. Papa blong yu i kasemsave se sipos yu gohed blong harem nogud from samting we yu mekem, bambae i had blong yu prea long hem. (Rom 8:26) Be yu mas “prea oltaem,” yu talemaot long Jehova se yu wantem tumas blong kam fren blong hem. (Rom 12:12) Andrej i tingtingbak mo i talem se: “Mi mi harem se mi gilti mo mi sem bitim mak, be evritaem we mi prea, mi harem gud bakegen. Mi harem se mi gat pis long tingting.” Sipos yu no save wanem blong prea from, yu save ridim ol prea blong King Deved long Ol Sam 51 mo 65, we hem i mekem afta we hem i tanem tingting blong hem.
Ol Gudgudfala Samting
Soemaot Se Narafala i Save Trastem Yu
16 Bos long tingting i wan impoten fasin we yumi mas gat sipos yumi wantem se narafala i trastem yumi. Fasin ya bambae i halpem yumi blong stap kwaet taem yumi harem se yumi wantem talemaot wan samting we yumi no sud talem. (Ridim Ol Proveb 10:19.) Samtaem i had blong bos long tingting blong yumi taem yumi yusum sosol media. Sipos yumi no lukaot gud, yumi save talemaot long plante man wantaem wan samting we yumi no sud talem. Mo taem yumi talemaot wan samting olsem long sosol media, yumi no moa save kontrolem, mo yumi no save hamas problem i save kamaot from. Bos long tingting bambae i halpem yumi tu blong stap kwaet taem ol man blong agens oli traem trikim yumi, blong talemaot ol infomesen we i save spolem ol brata mo sista. Samting olsem i save hapen sipos yumi laef long wan kantri we oli putum tabu long wok blong yumi, mo ol polis oli stap kwestinim yumi. Long taem olsem mo long ol narafala taem tu, yumi save folem advaes ya blong “blokem maot blong [yumi] long strap blong blokem maot blong animol.” (Sam 39:1) Nating se yumi stap wetem ol famle, ol fren, ol brata mo sista o eni narafala man, yumi wantem se oli trastem yumi. Mo yumi mas bos long tingting blong yumi blong oli save trastem yumi.
20-26 MEI
OL SAS SAMTING LONG BAEBOL OL SAM 40-41
?From Wanem Yumi Halpem Ol Narafala?
Man i Harem Gud Taem i Givim Samting Long Gladhat
16 Man we i glad blong givim samting, bambae i no wet blong narafala i givim samting bakegen long hem. Jisas i talem se: “Taem yu mekem lafet, yu invaetem ol puaman, ol man we oli handikap, ol man we leg blong olgeta i nogud, mo ol blaenman. Nao bambae yu yu glad tumas, from we olgeta oli no gat samting blong givim long yu, olsem jenis blong samting we yu mekem long olgeta.” (Luk 14:13, 14) Baebol i talem se: ‘Man we i givim samting long gladhat blong hem, God bambae i blesem hem.’ Mo tu i se: “Ol man we oli stap tingbaot ol puaman, oli save harem gud.” (Ol Proveb 22:9; Ol Sam 41:1) Samting we i mas pusum yumi blong givim samting, hemia se yumi wantem givhan long ol narafala.
17 Taem Pol i talem bakegen ol tok blong Jisas we i se, “man i harem gud moa taem hem i givim samting long narafala, i bitim we hem i kasem samting,” hem i no jes minim ol samting long saed blong bodi. Yumi save leftemap tingting blong narafala, givim advaes we i kamaot long Baebol, mo mekem samting blong halpem man. (Ol Wok 20:31-35) Samting we Pol i talem mo i mekem, i tijim yumi se i impoten blong lavem narafala, mo yusum taem mo paoa blong yumi blong givhan long olgeta.
18 Ol man blong mekem risej we oli stadi long fasin blong ol man, oli faenemaot se taem man i givim samting long narafala, hem i save glad. Wan buk i talem se, ol man oli harem gud moa taem oli mekem wan gudfala samting blong narafala. Ol man blong mekem risej oli talem se, taem yumi halpem narafala, yumi harem se laef blong yumi gat mining. Sam man blong hae save oli talem se, ol man oli mekem wok blong volontia from we oli wantem stap helti mo glad. Be ol save ya oli no mekem yumi sapraes, from we Man ya we i wokem yumi, hemia Jehova God, i bin talemaot finis se taem yumi givim samting, yumi glad.—2 Timoti 3:16, 17.
Jehova Bambae i Givhan Long Yu
7 Be sipos yu sik, Jehova bambae i givhan long yu mo i lukaot long yu, olsem hem i mekem long ol man blong hem bifo. King Deved i talem se: “Ol man we oli stap tingbaot ol puaman, oli save harem gud. Sipos oli stap long trabol, Hae God bambae i givhan long olgeta. Hem bambae i blokem olgeta, i lukaot gud long laef blong olgeta.” (Ol Sam 41:1, 2) ?Tok ya i min se wan gudfala man we i tingbaot ol puaman bambae i no save ded? Nogat. Ale, ?Jehova i givhan olsem wanem long ol gudfala man olsem? Deved i talem se: “Taem oli sik, hem bambae i givhan long olgeta.” (Ol Sam 41:3) Jehova i save gud trabol blong ol man blong hem, mo hem i no save fogetem olgeta. Hem i save givim waes long olgeta mo mekem tingting blong olgeta i strong. Mo tu, Jehova i mekem bodi blong man long fasin we sam samtaem i save kam gud hem wan.
Folem Fasin Sore Blong Jehova
17 I tru, taem yumi soemaot sore, yumi mekem i gud long yumi bakegen. Be, bigfala risen blong soemaot sore, hemia blong folem fasin blong Jehova, mo givim ona long hem. Hem nao i Stamba blong lav mo sore. (Ol Proveb 14:31) Hem i soemaot nambawan eksampol long yumi. Taswe, i gud yumi mekem bes blong yumi blong folem fasin blong hem blong soemaot sore. Olsem nao, bambae yumi lavem moa ol brata mo sista, mo bambae yumi fren gud wetem ol man raonabaot long yumi.—Galesia 6:10; 1 Jon 4:16.
Ol Gudgudfala Samting
it-2 16
Jehova
Evri samting we Baebol i tokbaot oli joen gud blong leftemap hae rul blong Jehova, mo hemia i soemaot klia stamba tingting blong Jehova God, hemia blong mekem nem blong hem i stap tabu. Mo blong nem ya i stap tabu, i min se God i mas tekemaot olgeta giaman tok we Setan i talem blong spolem nem blong Hem. Be i no hemia nomo, olgeta laef samting long heven mo long wol tu oli mas ona long tabu nem ya. Hemia i min se oli luksave mo oli glad nomo blong respektem Jehova olsem hae rula blong olgeta, oli wantem wosipim hem, oli glad nomo blong mekem wil blong hem, mo oli mekem olsem from we oli lavem hem. Prea blong Deved long Sam 40:5-10, i soemaot klia se hemia nao ol samting we hem i mekem mo i talem blong mekem nem blong Jehova i stap tabu. (Makem se long Hib 10:5-10, wan aposol i yusum sam haf blong ol sam ya, blong tokbaot Jisas Kraes.)
27 MEI–2 JUN
OL SAS SAMTING LONG BAEBOL OL SAM 42-44
Folem Ol Gudfala Advaes We Yumi Kasem Long Jehova
Ol Bigfala Poen Long Buk Tu Blong Ol Sam
42:4, 5, 11; 43:3-5. Sipos wan samting i hapen we i mekem se yumi no save joen wetem Kristin kongregesen blong smoltaem, i gud yumi tingtingbak long ol gudgudfala taem we yumi bin spenem wetem ol Kristin brata sista blong yumi long kongregesen, samting ya i save givim paoa long yumi. I tru, maet fastaem ol memori olsem oli save mekem yumi sore mo yumi harem nogud, be, ol memori ya oli sud mekem yumi tingting tu, se God hem i sefples blong yumi mo yumi mas wet oltaem long hem blong i sevem yumi.
w12 1/15 15 ¶2
Mekem Taem Blong Stadi i Kam Wan Taem Blong Glad Mo Kasem Gudfala Samting From
PREA: Faswan samting blong mekem hemia blong prea. (Sam 42:8) ?From wanem? Yumi mas tingbaot se taem yumi stadi long Baebol, hemia i wan haf blong wosip blong yumi. Taswe, i gud yumi askem Jehova blong i givim tabu spirit long yumi, mo givhan long yumi blong rerem tingting mo hat blong yumi from samting we bambae yumi stadi long hem. (Luk 11:13) Barbara, wan sista we i mekem wok blong misinari longtaem, i talem se: “Oltaem mi prea bifo we mi rid o stadi long Baebol. Afta long hem, mi harem save se Jehova i stap wetem mi mo i glad long samting we mi stap mekem.” Taem yumi prea bifo we yumi stadi, hemia i rerem tingting mo hat blong yumi blong akseptem fulwan ol samting we bambae yumi stadi long hem.
‘Yu No Letem Han Blong Yu i Slak’
11 Jehova i yusum ol miting, ol asembli, mo ol skul we ogenaesesen blong hem i stanemap blong givim paoa long yumi. Ol tijing we yumi kasem oli givhan long yumi blong mekem wok blong Jehova wetem stret tingting, mo yumi gohed blong putum ol mak, mo blong lukaot gud long ol wok we Jehova i givim long yumi. (Ol Sam 119:32) ?Olsem wanem? ?Yu yu wantem tumas se ol tijing blong Jehova oli givhan long yu?
12 Jehova i givhan long ol man blong hem blong oli winim ol man Amalek mo ol man Itiopia. Mo tu, hem i givim paoa long Nehemaea mo ol man Jiu blong oli finisim stonwol blong Jerusalem. Long sem fasin, bambae Jehova i givim paoa long yumi blong gohed blong prij nating se yumi wari, ol man oli agensem yumi, mo ol narafala oli no intres long yumi. (1 Pita 5:10) Jehova bambae i no mekem wan merikel blong tekemaot ol problem blong yumi. Be yumi mas mekem sam samting. ?Wanem ol samting ya? Yumi mas ridim Baebol evridei, yumi rerem mo go long ol miting oltaem, yumi gohed blong mekem prapa stadi blong yumi mo famle wosip, mo yumi prea oltaem long Jehova. Yumi neva mas letem wan samting i blokem yumi long ol samting we Jehova i givim blong mekem yumi kam strong mo leftemap tingting blong yumi. Sipos yu no moa gohed blong mekem ol samting ya, i gud yu askem long Jehova blong i givhan long yu. Nao bambae yu luk olsem wanem spirit blong God i ‘stap wok long laef blong yu, blong mekem yu glad blong obei long hem, mo blong givim paoa long yu blong wok.’ (Filipae 2:13) ?Olsem wanem? ?Yu save mekem ol narafala oli strong?
Ol Gudgudfala Samting
it-1 1242
Wael Dog Ya Jakol
Plante taem, Baebol i yusum toktok ya “wael dog ya jakol” olsem wan pijatok. Eksampol, taem Job i stap tokbaot nogud situesen we hem i fesem, hem i talem se hem i kam olsem, “brata blong ol wael dog ya jakol.” (Job 30:29) Taem ol man blong God oli lus long faet, man blong raetem sam i harem nogud tumas mo i tokbaot situesen blong olgeta se i olsem wan ples blong faet we ol wael dog ya jakol oli kam hivap long hem blong kakae ol dedbodi (skelem wetem Sam 68:23), hem i se: “Yu yu smasem nogud mifala, long ples we ol wael dog ya jakol oli stap long hem.” (Sam 44:19) Babilon i winim Jerusalem long 607 B.K.T. mo hemia i mekem se i gat hadtaem blong kasem kakae, nao ol mama oli stap tritim nogud ol pikinini blong olgeta. Taswe Jeremaea i talem se fasin blong “ol man blong mi” i raf tumas, taem hem i skelem wetem fasin blong ol wael dog ya jakol we oli lukaot gud long ol pikinini blong olgeta.—Kra 4:3, 10.
3-9 JUN
OL SAS SAMTING LONG BAEBOL OL SAM 45-47
Wan Singsing We i Tokbaot Mared Blong Wan King
!Yumi Glad Tumas Taem Smol Sipsip i Mared!
8 Ridim Ol Sam 45:13, 14. Woman ya i naes we i naes. Oli “flasemgud hem blong i go mitim man blong hem.” Long Revelesen 21:2, Baebol i tokbaot wan taon, hemia niufala Jerusalem, se hem i olsem woman ya we bambae i mared. Taon ya i stap long heven, mo i gat bigfala laet we i kamaot long God i stap saenaot i kam long taon ya, nao hem i “saen olsem wan gudfala ston, olsem gudfala ston ya jaspa we i klia gud, i olsem glas.” (Rev. 21:10, 11) Buk blong Revelesen i tokbaot niufala Jerusalem se hem i naes tumas. (Rev. 21:18-21) !Tru ya, woman ya i “naes we i naes”! Yumi save se i mas olsem from we mared ya i stap long heven.
9 Oli tekem woman ya i go long man blong hem, hemia Mesaea King. King i rerem woman ya blong i mared long hem, taem hem i yusum ‘tok blong God’ blong mekem hem i klin. Nao, woman ya i ‘tabu, mo i no gat samting we i spolem hem.’ (Efes. 5:26, 27) Oli mas flasem gud woman ya tu. Ol klos blong hem oli “somap long ol tred we i gat plante kala long hem, blong flasem gud,” mo “oli tekem hem i go long king.” Ol klos ya oli “klin gud, oli saen.” Ol gudfala klos ya, hemia ol gudfala fasin we ol man blong God oli mekem.—Rev. 19:8.
?Revelesen i Tokbaot Wanem Long Saed Blong Fiuja Blong Yu?
10 ?Jehova bambae i mekem wanem long taem blong atak ya? Hem i talem long yumi se: “Bigfala kros blong mi bambae i girap kwiktaem nomo.” (Esik. 38:18, 21-23) Revelesen japta 19 i tokbaot nekiswan samting we i hapen. Jehova i sanem Pikinini blong hem blong protektem ol man blong hem mo winim ol enemi blong hem. Long taem ya “ol ami long heven,” hemia ol enjel mo ol 144,000 bambae oli joen wetem Jisas blong faet agensem Gog Blong Magog. (Rev. 17:14; 19:11-15) ?Wanem risal blong faet ya? !Olgeta man mo ol oganaesesen we oli agensem Jehova, bambae oli lus blong olwe!—Ridim Revelesen 19:19-21.
11 Traem tingbaot filing blong ol man blong Jehova we oli laef tru long taem ya we God i spolem ol enemi blong hem. !Yes, bambae evriwan i glad tumas! Olgeta long heven tu oli bambae glad taem oli luk we Bigfala Babilon i lus, be i gat wan narafala samting tu we bambae i mekem se oli glad moa. (Rev. 19:1-3) Hemia wan impoten taem we buk blong Revelesen i tokbaot, “hemia mared blong Smol Sipsip.”—Rev. 19:6-9.
12 ?Wetaem mared ya bambae i hapen? Smoltaem bifo we faet blong Amagedon i stat, olgeta 144,000 man bambae oli stap finis long heven. Nating se i olsem, hemia i no stret taem yet blong Smol Sipsip i mared. (Ridim Revelesen 21:1, 2.) Smol Sipsip bambae i mared afta we faet blong Amagedon i finis mo God i distroem olgeta enemi blong hem.—Sam 45:3, 4, 13-17.
it-2 1169
Wo
Afta long bigfala faet blong God, ol man long wol bambae oli harem gud long pis blong wan taosen yia. Man blong raetem sam i talem se “[Jehova] i stap finisim ol wo long olgeta ples long wol. Hem i stap brekem ol bonara mo i brebrekem ol spia. Hem i stap bonem ol kat blong faet, long faea.” Faswan taem we tok ya i kamtru, hemia taem God i brebrekem ol tul blong faet blong ol enemi, nao i mekem se ol man Isrel oli laef long pis. Afta we Kraes bambae i winim ol enemi blong hem long Amagedon, ol man long olgeta ples long wol bambae oli harem gud fulwan mo oli gat pis. (Sam 46:8-10) Ol man we bambae oli kasem laef we i no save finis, hemia olgeta we oli hamarem “ol naef blong faet blong olgeta i kam aean blong plao, mo ol spia blong olgeta i kam ol huknaef blong katemaot ol branj” mo oli “no moa lanem blong faet.” “From we maot blong Jehova komanda blong ol ami i talem olsem.”—Aes 2:4; Maeka 4:3, 4.
Ol Gudgudfala Samting
?Wanem Bambae i Lus Taem Kingdom Blong God i Kam?
9 ?Wanem bambae i tekem ples blong ol ogenaesesen we oli gat kruked fasin? ?Afta Amagedon, bambae i gat wan ogenaesesen long wol? Baebol i talem se: “God i promes finis blong putum niufala skae mo niufala wol, we stret fasin nomo bambae i stap long hem.” (2 Pita 3:13) Olfala heven mo wol, hemia ol gavman we oli gat kruked fasin mo ol man we oli sapotem olgeta. Afta we oli lus, ?wanem bambae i tekem ples blong olgeta? “Niufala skae mo niufala wol.” Niufala skae i minim wan niufala gavman, hemia Kingdom we Jisas Kraes mo ol 144,000 man oli joen long hem. Niufala wol i minim ol man we Kingdom ya i rul long olgeta. Jisas mo olgeta we oli rul wetem hem, bambae oli folemgud fasin blong Jehova God, we i no olbaot, be i wok folem plan. (1 Korin 14:33) Taswe long “niufala wol,” ol man bambae oli wok folem plan. Bambae i gat ol gudfala man blong lukaot long wok ya. (Ol Sam 45:16) Jisas Kraes mo ol 144,000 bambae oli lidim ol man ya. !Yu traem tingbaot taem ya we ol ogenaesesen we oli gat kruked fasin oli lus finis! !Long ples blong olgeta, bambae i gat wan ogenaesesen nomo we ol man blong hem oli joen gud, mo neva bambae oli mekem kruked fasin!
10-16 JUN
OL SAS SAMTING LONG BAEBOL OL SAM 48-50
Ol Perens—Halpem Famle Blong Yu Blong Oli Trastem Oganaesesen Blong Jehova
Tru Wosip Bambae i Givhan Blong Mekem Yu Glad Moa
11 Yumi wosipim Jehova, taem yumi stadi long Tok blong hem mo yumi tokbaot hem long ol pikinini blong yumi. Long sabat dei, ol man Isrel oli no wok mo oli yusum dei ya blong mekem frensip blong olgeta wetem Jehova i kam strong moa. (Eks. 31:16, 17) Mo tu, oli tijim ol pikinini blong olgeta long saed blong Jehova mo ol fasin blong hem. Tede tu, yumi mas tekem taem blong ridim mo stadi long Tok blong God. Hemia i wan haf blong wosip we yumi mekem i go long Jehova, mo i halpem yumi blong kam klosap long hem. (Sam 73:28) Taem yumi stadi tugeta olsem wan famle, yumi stap halpem ol pikinini blong oli frengud wetem Papa blong yumi long heven we i lavem yumi.—Ridim Ol Sam 48:13.
w11 3/15 19 ¶5-7
Yufala i Gat Wan Risen Blong Glad
“Yufala i maj i goraon long Saeon, yufala i raonem gud, yufala i kaontem ol taoa blong hem. Yufala i tingting gud long ol graon ya we oli hivimap raon long hem. Yufala i jekemgud ol strong taoa blong hem, blong yufala i save tokbaot olgeta long ol jeneresen long fiuja.” (Sam 48:12, 13) Man blong raetem sam, i stap leftemap tingting blong ol man Isrel blong oli lukluk gud Jerusalem. !Traem tingbaot filing blong ol famle long Isrel we oli bin travel i go long tabu taon ya blong mekem lafet ya we oli stap mekem evri yia, mo oli bin luk naesfala tempol ya! !Hemia i wan nambawan memori! Mo i sua se hemia i pulum olgeta blong ‘tokbaot ol samting ya long ol jeneresen long fiuja.’
Traem tingbaot kwin blong Seba. Taem hem i harem ol ripot long saed blong gudfala rul blong Solomon mo bigfala waes blong hem, fastaem hem i no bilivim. ?Be wanem i mekem se naoia hem i bilivim ol tok ya? Hem i talem se: “Mi mi no bilivim ol tok ya go kasem we mi kam long ples ya mo mi luk long prapa ae blong mi.” (2 Kron. 9:6) Yes, samting we yumi luk wetem “prapa ae” blong yumi, i save gat bigfala paoa long yumi.
?Olsem wanem yu save halpem ol pikinini blong yu blong oli luk wetem “prapa ae” blong olgeta, ol gudfala samting we oganaesesen blong Jehova i stap mekem? Sipos haos blong yufala i stap klosap long wan branj ofis blong ol Witnes blong Jehova, i gud yu traehad blong tekem olgeta i go visitim. Traem tingbaot eksampol blong Mandy mo Bethany, we i laef samwe 1,500 kilometa longwe long Betel. Plante taem, perens blong tufala i mekem plan blong oli go visitim Betel, speseli taem tufala i stap gruap. Tufala i talem se: “Bifo we mifala i visitim Betel, mitufala i ting se bambae i boring mo se hemia i blong ol olfala nomo. !Be mitufala i mitim ol yangfala we oli wok had long wok blong Jehova mo oli glad! Mitufala i luk se oganaesesen blong Jehova i bigwan moa i bitim smol eria ya we mifala i laef long hem, mo evritaem we mifala i visitim Betel, hemia i givim paoa long mitufala blong gohed long saed blong spirit.” Taem Mandy mo Bethany i kasem save gud long oganaesesen blong Jehova, hemia i pulum tufala blong statem wok blong paenia, mo oli invaetem tufala blong go wok wanwan taem long Betel.
!Yu Mas Gat Fasin Blong Wan Sitisen Blong Kingdom!
5 Yu mas save histri. Man we i wantem kam sitisen blong wan kantri, hem i mas save histri blong kantri ya. From we yumi wantem kam sitisen blong Kingdom blong God, yumi mas savegud Kingdom ya. Yumi mas folem eksampol blong ol pikinini blong Kora long Isrel bifo. Oli laekem tumas Jerusalem mo ples blong wosip blong hem. Mo oli laekem tokbaot histri blong taon ya, i no from we taon ya i naes, be from we hem i taon blong Jehova. Ples blong wosip long Jerusalem hem i ples we ol man oli lanem Loa blong Jehova mo oli wosipim hem. King blong Jerusalem i rul long ol man we Jehova i glad long olgeta mo i lavem olgeta. (Ridim Ol Sam 48:1, 2, 9, 12, 13.) Tede tu, God i lidim ol man blong hem long wol. Olsem ol pikinini blong Kora, yumi mas wantem save histri blong ol man blong Jehova, mo yumi mas tokbaot histri ya long ol narafala. Sipos yumi mekem olsem, bambae yumi bilif strong se Kingdom blong God i tru. Nao bambae yumi gat strong tingting blong talemaot gud nius blong Kingdom ya.—Jer. 9:24; Luk 4:43.
Ol Gudgudfala Samting
it-2 805
Ol Rij Samting
Ol man Isrel oli gat plante gudfala samting, mekem se oli naf blong harem gud long ol kakae mo dring (1Ki 4:20; Pri 5:18, 19), mo i protektem olgeta blong oli no kasem ol problem we i save kamaot from fasin pua. (Pro 10:15; Pri 7:12) Hemia nao stamba tingting blong Jehova, hem i wantem se ol man Isrel oli harem gud long ol samting we oli wok had from (skelem wetem Pro 6:6-11; 20:13; 24:33, 34), be nating se i olsem, hem i wonem olgeta tu se oli no mas stat blong trastem ol rij samting ya mo fogetem se hem nao i Stamba blong ol rij samting ya. (Du 8:7-17; Sam 49:6-9; Pro 11:4; 18:10, 11; Jer 9:23, 24) Hem i talem long olgeta tu se ol rij samting ya oli blong smoltaem nomo (Pro 23:4, 5), oli no save givim ol samting ya long God olsem wan ransom blong oli no ded (Sam 49:6, 7), mo taem man i ded ol samting ya oli nating nomo (Sam 49:16, 17; Pri 5:15). Hem i soemaot long olgeta se sipos oli tingbaot nomo ol rij samting blong olgeta, hemia i save lidim olgeta blong trikim man, mo Jehova bambae i no glad long olgeta. (Pro 28:20; skelem wetem Jer 5:26-28; 17:9-11.) Hem i leftemap tingting blong olgeta tu blong “givim ol gudgudfala samting blong [olgeta] long Jehova blong ona long hem.”—Pro 3:9.
17-23 JUN
OL SAS SAMTING LONG BAEBOL OL SAM 51-53
Ol Samting We Yu Mas Mekem Blong Blokem Ol Bigfala Mastik
?Olsem Wanem Blong Lukaot Gud Long Hat Blong Yu?
4 Long Ol Proveb 4:23, tok ya “hat” i minim “ol fasin we oli haed” o “ol tingting.” (Ridim Ol Sam 51:6, NW.) Taswe, yumi save talem se “hat” i minim ol tingting we oli haed, ol filing, ol samting we yumi wantem, mo risen from wanem yumi mekem samting. Hem i no minim nomo ol samting long saed blong yumi we ol man oli luk, be i minim tu ol samting insaed we oli no save luk.
5 Blong luksave olsem wanem ol fasin we oli haed oli impoten, traem tingbaot helt blong yumi. Yumi mas kakae gud mo mekem eksasaes blong ol haf insaed long bodi oli wok gud. Long sem fasin, blong frengud wetem God, oltaem yumi mas tekem ol gudfala kakae long Tok blong hem Baebol, mo mekem ol wok we oli soemaot bilif. Yumi soemaot bilif taem yumi mekem ol samting we yumi lanem i wok long laef blong yumi, mo yumi tokbaot bilif blong yumi. (Rom 10:8-10; Jem. 2:26) Narafala samting se, maet yumi ting se yumi helti from we i luk olsem se bodi i strong, be maet wan sik i stap insaed long bodi mo i stap spolem yumi. Long sem fasin, maet yumi ting se bilif blong yumi i strong from we yumi folem wan gudfala program blong wosip, be maet yumi stat blong wantem ol samting we oli nogud. (1 Kor. 10:12; Jem. 1:14, 15) Yumi no mas fogetem se Setan i wantem we yumi folem tingting blong hem we i save spolem yumi. ?Olsem wanem hem i traem mekem samting ya? ?Mo olsem wanem yumi save protektem yumi?
Yumi Save Stap Klin
5 Wan rod blong sakemaot ol rabis tingting hemia blong prea oltaem long Jehova blong i givhan long yumi. Jehova i givim tabu spirit blong mekem yumi gat strong tingting blong sakemaot ol rabis tingting mo blong stap klin. Taswe, i gud we long ol prea blong yumi, yumi talem long Jehova se yumi wantem we ol tingting blong yumi oli mekem hem i glad. (Ol Sam 19:14) I gud yumi askem long hem wetem wan tingting we i stap daon, blong hem i jekem hat blong yumi blong luk sipos yumi gat sam rabis tingting we i save pulum yumi blong mekem sin. (Ol Sam 139:23, 24) Yu mas gohed blong askem long Jehova blong i givhan long yu blong yu sakemaot ol rabis tingting, mo blong yu mekem samting we i stret taem ol samting oli traem yu.—Matiu 6:13.
6 Taem yumi no stadi Baebol yet, maet yumi laekem mekem ol samting we Jehova i no laekem, mo maet yumi stap traehad yet blong sakemaot ol nogud tingting. Be Jehova i save givhan long yumi blong yumi jenisim tingting blong yumi, mo yumi mekem samting we hem i glad long hem. King Deved i luksave samting ya, taswe afta we hem i slip wetem Batseba, hem i tanem tingting blong hem mo i plis long Jehova blong i ‘mekem tingting blong hem i klin’ mo blong i ‘mekem hat blong hem i kam niuwan bakegen blong i stap strong long Jehova oltaem.’ (Ol Sam 51:10, 12) Taswe, sipos yumi gat ol rabis tingting yet, mo yumi stap traehad blong sakemaot, Jehova i save givhan long yumi blong yumi gat tingting ya blong wantem obei long hem mo mekem samting we i stret. Hem i save givhan long yumi blong rabis fasin i no winim yumi.—Ol Sam 119:133.
Ol Gudgudfala Samting
it-1 644
Doeg
Hem i wan man Edom we i wok olsem bos blong ol man we oli stap lukaot long ol sipsip blong King Sol. (1Sa 21:7; 22:9) I klia se Doeg i wan proselaet, from we oli bin “holem hem blong i stap long fes blong Jehova” long Nob. Maet from wan promes we hem i bin mekem, hem i no klin, o i gat leprosi. Mo tu, Doeg i luk we Hae Pris Ahimelek i givim sobred mo naef blong faet blong Golaeat long Deved. Biaen, taem Sol i singaot ol man blong wok blong hem oli kam, mo i talem se oli stap mekem plan blong agensem hem, Doeg i talemaot olgeta samting we hem i bin luk long Nob. Mo afta we oli singaotem hae pris mo ol narafala pris blong Nob oli kam, mo oli kwestinim Ahimelek, Sol i givim oda long ol gad blong oli kilim i ded ol pris ya. Be from we olgeta oli fraet, Sol i givim oda long Doeg we i no fraet blong i kilim olgeta, mo hem i kilim i ded 85 pris. Afta long samting ya, hem i go long Nob, i kilim i ded olgeta man long taon ya, ol yangfala, olfala, mo tu ol animol.—1Sa 22:6-20.
Long supaskripsen blong Ol Sam 52, Deved i tokbaot Doeg se: “Tang blong yu i sap olsem resa, i stap mekem ol rabis plan mo i stap mekem ol giaman toktok. Yu laekem moa ol rabis fasin i winim ol gudfala fasin, yu laekem moa blong giaman i winim we yu talem ol tok we i stret. !O yu we tang blong yu i stap giaman! Yu yu laekem evri tok we i save spolem man.”—Sam 52:2-4.
24-30 JUN
OL SAS SAMTING LONG BAEBOL OL SAM 54-56
God i Stap Long Saed Blong Yu
!Kam Waes Mo Fraet Long God!
10 Wan taem, Deved i haed long ples blong King Akis, long wan taon blong ol man Filistia we nem blong hem Gat. Taon ya hem i ples blong Golaeat tu. (1 Samuel 21:10-15) Ol man blong wok blong King Akis oli tok agensem Deved se hem i enemi blong kantri blong olgeta. Laef blong Deved i stap long denja. ?Hem i mekem wanem? Hem i prea long Jehova, i talemaot evri samting we i stap long hat blong hem. (Ol Sam 56:1-4, 11-13) Blong sevem laef blong hem, hem i mekem olsem we hed blong hem i krangke. Be Deved i save se Jehova nomo i sevem hem, from we Hem nao i mekem se ol traehad blong Deved oli win. Deved i trastem Jehova wetem fulhat blong hem, hem i bilif fulwan long Jehova. Samting ya i soemaot se Deved i fraet long God.—Ol Sam 34:4-6, 9-11.
11 Yumi save fraet long God olsem Deved. Yumi mekem olsem taem yumi trastem promes blong God se bambae hem i givhan long yumi blong winim ol trabol blong yumi. Deved i talem se: “Yu mas givim laef blong yu long Hae God, yu mas trastem hem, nao bambae hem i halpem yu.” (Ol Sam 37:5) ?Olsem wanem? ?Vas ya i minim se yumi mas putum ol trabol blong yumi long han blong Jehova, nao yumi wet nomo, yumi no mekem wan samting blong traem winim trabol ya, ale Jehova bambae i jes stretem evri samting blong yumi? Nogat. Taem Deved i prea long God, hem i askem long Jehova blong halpem hem, be hem i no stop long ples ya. Hem i yusum tingting mo bodi we Jehova i givim long hem blong mekem samting blong traem winim trabol blong hem. Be Deved i save tu, se maet ol traehad blong hem oli no naf. Yumi tu yumi mas luksave samting ya. Yumi mas mekem evri samting we yumi naf blong mekem blong traem winim ol trabol blong yumi, nao biaen, yumi livim i stap nomo long han blong Jehova. Plante taem yumi no save mekem wan samting, yumi mas trastem Jehova nomo. Hemia nao taem we yumi wan i rili nidim fasin ya blong fraet long God. Ol tok we Deved i talem wetem fulhat blong hem, oli save leftemap tingting blong yumi, hem i se: “Yu [Jehova] yu fren blong olgeta we oli stap [“fraet,” NW] long yu.”—Ol Sam 25:14.
cl 243 ¶9
I No Gat Wan Samting i Save “Tekemaot Yumi Long Lav Ya Blong God”
9 Jehova i tinghae long fasin blong yumi blong stanap strong. (Matiu 24:13) Tingbaot se Setan i wantem se yu tanem baksaed long Jehova. Taswe taem yu gohed blong holemstrong long Jehova evri dei, yu stap givhan blong ansarem ol giaman tok ya we Setan i stap talem agensem Jehova. (Ol Proveb 27:11) Be samtaem i no isi blong stanap strong. Evri dei tingting blong yumi i foldaon, yumi stap fesem ol problem blong helt, mane, mo plante narafala problem. Mo yumi save harem nogud tu, taem wan samting we yumi wet from i no kamtru kwik. (Ol Proveb 13:12) Be taem yumi stanap strong long ol problem olsem, Jehova i tinghae long fasin ya. Hemia nao from wanem King Deved i askem long Jehova blong i fulumap wota blong ae blong hem i go long wan “skin botel,” mo hem i trastem Jehova fulwan taem hem i talem se: “Yu yu makemdaon olgeta long buk blong yu finis” (Ol Sam 56:8) Yes, Jehova i tingbaot evri wota blong ae blong yumi mo olgeta problem we i mekem yumi safa, mo i tinghae long yumi taem yumi stanap strong mo gohed blong holemstrong long hem.
?Olsem Wanem Lav i Halpem Yumi Blong Winim Fraet?
16 Setan i save se yumi tinghae long laef blong yumi. Taswe, hem i talem se bambae yumi lego evri samting, inkludum frensip blong yumi wetem Jehova, blong sevem laef blong yumi. (Job 2:4, 5) !Be hem i rong! Setan i gat “i gat paoa blong mekem man i ded,” hem i traem blong yusum filing ya blong fraet blong ded, blong mekem yumi lego Jehova. (Hib. 2:14, 15) Samtaem Setan i yusum ol man blong oli talem se bambae oli kilim yumi, sipos yumi no lego bilif blong yumi. Mo samtaem, hem i luk we yumi kasem wan bigfala sik we yumi nidim help kwiktaem, mo hem i traem yusum samting ya blong pulum yumi blong brekem loa blong Jehova. Ol dokta mo ol famle blong yumi we oli no bilif, maet oli fosem yumi blong akseptem blad transfusen we i agensem loa blong God. O maet wan man i traem blong fosem yumi blong akseptem wan tritmen we i agensem ol rul blong Baebol.
17 Nating se yumi no wantem ded, be yumi save se Jehova bambae i no stop blong lavem yumi sipos yumi ded. (Ridim Rom 8:37-39.) Taem ol fren blong Jehova oli ded, hem i gohed blong tingbaot olgeta olsem we oli laef yet. (Luk 20:37, 38) Mo hem i wantem tumas blong mekem olgeta oli laef bakegen. (Job 14:15) Jehova i pem wan hae praes, blong yumi save “kasem laef we i no save finis.” (Jon 3:16) Hemia i mekem yumi luksave se Jehova i lavem yumi mo i kea bigwan long yumi. So i bitim we yumi lego Jehova taem yumi sik o taem narafala i talem se bambae i kilim yumi, yumi mas dipen long Jehova blong i mekem yumi harem gud, i givim waes mo paoa long yumi. Hemia nao samting we Valérie mo hasban blong hem i mekem.—Sam 41:3.
Ol Gudgudfala Samting
it-1 857-858
Folem Plan, Jusumaot Finis
Samting we Judas Iskariot i mekem blong salem Jisas, i mekem wan profet tok i kamtru, mo hemia i folem plan blong Jehova mo Boe blong hem. (Sam 41:9; 55:12, 13; 109:8; Wok 1:16-20) Be yumi no save talem se God i jusumaot finis o talemaot finis se Judas nao bambae i mekem samting ya. Ol profet tok oli talemaot se wan gudfala fren blong Jisas bambae i salem hem, be oli no talem stret nem blong man we bambae i mekem samting ya. I gat ol stamba trutok blong Baebol we oli soemaot bakegen se God i no jusumaot fastaem se Judas nao bambae i mekem samting ya. God i yusum wan aposol blong raetem se: “Yu no hariap tumas blong putum han blong yu long wan man. Mo yu no joen long sin blong ol narafala man. Yu mas stap klin.” (1Ti 5:22; skelem wetem 3:6.) Blong pruvum se Jisas i tingting gud mo i jusum gud ol 12 aposol blong hem, hem i spenem ful naet blong prea long Papa blong hem, bifo we hem i mekem desisen blong hem. (Lu 6:12-16) Sipos God i bin jusumaot finis se Judas nao bambae i salem Jisas, bambae Hem i no save lidim Jisas mo agri long desisen blong hem. Mo folem rul we i stap, hemia i save mekem se God i joen long sin blong Judas.
I luk olsem se long taem ya we Jisas i bin jusum Judas blong i kam wan aposol, hem i no gat eni nogud tingting long hat blong hem. Be Judas i letem wan ‘tri we rus blong hem i posen i gru’ long hat blong hem, mo i mekem hem i kam doti. From samting ya, hem i mekem wan samting we i narakaen. Hem i no letem God i lidim hem, be hem i letem Devel i lidim hem blong stil mo salem Jisas. (Hib 12:14, 15; Jon 13:2; Wok 1:24, 25; Jem 1:14, 15) Ol aksen blong Judas nao oli mekem se Jisas i naf blong luksave samting we i stap long hat blong Judas, mo talem se Judas nao bambae i salem hem.—Jon 13:10, 11.