EKSPLENESEN BLONG OL VAS
Rom 10:13—“Singaot Long Nem Blong Masta”
“Olgeta man we oli singaot long nem blong Jehova, bambae hem i sevem olgeta.”—Rom 10:13, Niu Wol Translesen.
“Eni man we i singaot long nem blong Masta, hem bambae i sef.”—Rom 10:13, King James Version.
Mining Blong Rom 10:13
God i mekem i sem mak long olgeta man, mo hem i givim janis long olgeta blong oli sef mo kasem laef blong olwe, nomata se oli kamaot long wanem kantri, kala blong skin i defren, mo oli rij o oli pua. Be blong kasem blesing ya, yumi mas singaot long nem blong Jehova, we hemia prapa nem blong God Ya We i Gat Olgeta Paoa.a—Ol Sam 83:18, NW.
Long Baebol, tok ya “singaot long nem blong Jehova” i no jes minim se yumi save nem blong God, mo yumi yusum nem ya taem yumi wosipim hem. (Ol Sam 116:12-14) Be i minim tu se yumi trastem God mo yumi lukluk i go long hem blong i halpem yumi.—Ol Sam 20:7; 99:6.
Jisas Kraes tu i luk nem blong God se i impoten. Faswan toktok we hem i talem long Lodsprea, hemia se: “Papa blong mifala long heven, plis yu mekem we nem blong yu i tabu,” o i holi. (Matiu 6:9) Mo tu, Jisas i soemaot se yumi mas save, obei, mo lavem Jehova, sipos yumi wantem kasem laef blong olwe.—Jon 17:3, 6, 26.
Long King James Version, vas blong Rom 10:13 i yusum tok ya “Masta,” be hemia nao ples we nem blong Jehova i sud stap long hem. ?Olsem wanem yumi save samting ya? From we ol tok ya oli kamaot long buk blong Joel 2:32, we long faswan Hibru hanraet,b nem blong God i stap long hem be i no taetel ya “Masta.”
Ol Vas Raonabaot Long Rom 10:13
Long Rom japta 10, Baebol i soemaot se blong God i glad long wan man, hem i mas bilif long Jisas Kraes. (Rom 10:9) Plante vas we oli stap long haf ya we ol man oli singaot se Oltesteman, oli sapotem tingting ya tu. Wan man i save soemaot bilif ya taem hem i ‘talemaot tok long fes blong ol man,’ hemia i minim tu se i talemaot gud nius long ol man nogud se God i save sevem olgeta. Long rod ya, ol narafala tu oli save gat janis blong wokem bilif ya we i save lidim olgeta blong kasem laef.—Rom 10:10, 14, 15, 17.
Ridim Rom japta 10 mo ol futnot blong hem wetem ol kros-refrens.
a Nem blong God i kamaot samwe 7,000 taem long ol olfala hanraet blong Baebol. Long lanwis Hibru, oli raetem nem ya long fo leta, we oli singaot se Tetragramaton. Plante man oli transletem nem ya i kam “Jehovah” long Inglis. Be sam man blong stadi dip long Baebol oli laekem moa blong tanem nem ya se “Yahweh.”
b I luk olsem se ol man we oli raetem Grik Haf Blong Baebol, oli yusum nem blong God taem oli yusum ol vas blong “Oltesteman” we i gat nem blong God long olgeta. Buk ya The Anchor Bible Dictionary i talem se: “I gat sam pruf we oli soem se ol fofala leta blong nem blong God, Yahweh, i stap long sam o bighaf blong ol vas blong Oltesteman we biaen oli kamaot long Niutesteman, taem oli stat blong raetem Niutesteman.” (Volium 6, pej 392) Blong save moa, yu luk haf ya “Nem Blong God, Matiu Kasem Revelesen” we i stap long buklet ya Buk We i Givhan Blong Stadi Baebol, pej 6-11.