Refrens Blong Kristin Wok Mo Laef Miting Wokbuk
© 2024 Watch Tower Bible and Tract Society of Pennsylvania
4-10 NOVEMBA
OL SAS SAMTING LONG BAEBOL OL SAM 105
“Hem i Tingbaot Kontrak Blong Hem Olwe”
Bilif Strong Moa Long Promes Blong Jehova Long Saed Blong Niufala Wol
11 Traem tingbaot sam long ol promes we Jehova i talem long ol man blong hem we i luk olsem se i no posibol blong i kamtru. Hem i talem long Ebraham mo Sera se bambae tufala i gat wan boe taem tufala i olfala. (Jen. 17:15-17) Mo tu, hem i talem long Ebraham se bambae hem i givim kantri ya Kenan, long ol pikinini we bambae oli kamaot biaen long hem. Long olgeta yia ya we ol pikinini blong Ebraham, hemia ol man Isrel, oli slef long Ijip, i luk olsem se promes ya blong Jehova bambae i neva kamtru. Be i no olsem. Biaen, Jehova i talemaot long olfala Elisabet se bambae hem i bonem wan pikinini. Mo tu hem i talem long Meri, wan yang gel we i no save man yet, se bambae hem i bonem wan boe. Hemia bambae i mekem promes ya we Jehova i talemaot plante taosen yia bifo long garen blong Iden i kamtru.—Jen. 3:15.
12 Taem yumi tingbaot ol promes we Jehova i mekem, mo olsem wanem hem i mekem oli kamtru, bambae yumi bilif strong se hem i gat paoa blong mekem promes ya blong niufala wol i kamtru. (Ridim Josua 23:14; Aesea 55:10, 11.) Mo hemia bambae i givhan long yumi blong rere gud mo halpem ol narafala blong olgeta tu oli bilif se promes ya blong niufala wol, i no wan drim o wan kastom stori. Jehova hem wan i mekem promes ya long saed blong niufala heven mo niufala wol, mo hem i talem se: “Ol tok ya . . . oli tru mo ol man oli save trastem.”—Rev. 21:1, 5.
it-2 1201 ¶2
Tok
Ol samting long kriesen we oli laef, mo ol samting we oli no laef, oli obei long tok blong God, mo hem i save yusum ol samting ya blong mekem samting we hem i wantem i kamtru. (Sam 103:20; 148:8) Man i save trastem tok blong hem, from we taem God i mekem wan promes, hem i tingbaot blong mekem samting ya we hem i promes blong mekem. (Dut 9:5; Sam 105:42-45) Olsem we hem i talem, tok blong hem bambae “i stap olwe,” bambae i neva kambak long hem sipos i no mekem samting we hem i wantem i kamtru.—Aes 40:8; 55:10, 11; 1Pi 1:25.
Ol Gudgudfala Samting
w86 11/1 19 ¶15
Wok Blong Ol Yangfala Insaed Long Wan Famle We i Glad Mo i Joen Gud
15 “Oli fasemtaet leg blong hem [Josef] long ol jen, mo oli putum nek blong hem long ol aean. Gogo kasem taem we tok blong hem i kamtru, tok blong Jehova nao i mekem hem i kam gud moa, olsem gol we man i bonem, i kam klin gud.” (Ol Sam 105:17-19) Blong 13 yia, Josef i safa olsem wan slef mo i stap long kalabus go kasem we promes blong Jehova i kamtru. Ol trabol we hem i fesem, oli mekem hem i kam gud moa, olsem gol we man i bonem, i kam klin gud. Jehova i no mekem o letem ol trabol ya oli hapen from wan risen. ?Olsem wanem? ?Josef bambae i gohed blong putum tingting blong hem i stap long “tok blong Jehova,” nating se hem i stap long rabis kalabus ya? ?Bambae hem i soemaot ol gudfala fasin we i makemaot se hem i bigman, mo i wokem ol fasin olsem longfala tingting, tingting daon, gat strong bilif, mo strong tingting blong mekem wok ya we i had? Josef i kamaot olsem wan gol we faea i mekem i klin gud. Yes, hem i klin gud mo hem i sas moa long God, taswe God i yusum hem blong mekem sam nambawan wok biaen.—Jenesis 41:14, 38-41, 46; 42:6, 9.
11-17 NOVEMBA
OL SAS SAMTING LONG BAEBOL OL SAM 106
“Oli Fogetem God We i Sevia Blong Olgeta”
‘?Hu i Stap Long Saed Blong Jehova?’
13 Ol man Isrel oli fraet long paoa blong God, taem hem i soemaot hem long olgeta, ale Moses nomo i go antap long Hil ya Sinae mo i toktok wetem Jehova long bihaf blong olgeta. (Eksodas 20:18-21) Be Moses i no kambak kwiktaem long kamp blong olgeta. I olsem se i no gat man blong lidim ol man Isrel. ?Bambae oli mekem wanem? Maet ol man Isrel oli no lukluk i go long Jehova, be oli lukluk moa i go long Moses. Tingting blong olgeta i trabol nao oli talem long Eron se: “Moses ya i tekemaot yumi long Ijip, i lidim yumi i kam long ples ya, be naoia yumi no moa save wanem i mekem hem. Mifala i wantem yu yu wokem wan god blong yumi, blong i lidim yumi.”—Eksodas 32:1, 2.
Ol Gudgudfala Samting
Ol Bigfala Poen Long Buk Tri Mo Fo Blong Ol Sam
106:36, 37 (NW). Ol vas ya oli joenem fasin blong wosip long ol aedol wetem fasin blong mekem sakrefaes long ol dimon. Hemia i soemaot se wan man we i yusum ol aedol long wosip blong hem i save kam aninit long paoa blong ol dimon. Baebol i givim woning ya se: “Yufala i mas lukaot gud blong no mekem wosip long ol aedol.”—1 Jon 5:21, NW.
18-24 NOVEMBA
OL SAS SAMTING LONG BAEBOL OL SAM 107-108
“Talem Tangkiu Long Jehova, From Hem i Gud”
Kongregesen Bambae i Presem Jehova
2 Kongregesen i no wan ples blong joen wetem ol fren nomo. Hem i no wan klab we ol man we oli gat semkaen laef no semkaen intres long saed blong spot no narafala samting, oli kam joen wanples, nogat. Bigfala risen blong kongregesen i blong presem Jehova God. Hemia i olsem longtaem finis i kam, olsem buk blong Ol Sam i soemaot. Long Ol Sam 35:18 yumi ridim se: “Bambae mi talem tangkiu long yu long [“bigfala kongregesen,” NW], bambae mi presem yu long fes blong olgeta evriwan.” Long sem fasin, Ol Sam 107:31, 32 i pulum yumi se: “I gud [ol man] oli talem tangkiu long Hae God from fasin blong hem we oltaem hem i lavem olgeta tumas, mo from ol bigbigfala samting we hem i stap mekem blong givhan long olgeta. I gud olgeta oli leftemap hae nem blong hem long medel blong [“kongregesen,” NW].”
Yumi Talem Tangkiu Long Jehova Mo Harem Gud
4 I gat sam samting we oli save pulum yumi blong talem tangkiu long Jehova. Fastaem, yumi wanwan i mas tingbaot ol blesing we Jehova i givim long yumi. Afta, yumi mas tingbaot olsem wanem ol blesing ya oli soemaot se God i lavem yumi tumas. Taem man blong raetem Ol Sam i mekem olsem, hem i sapraes long ol bigbigfala samting we Jehova i mekem long hem.—Ridim Ol Sam 40:5; 107:43.
Ol Gudgudfala Samting
it-2 420 ¶4
Moab
Long taem we Deved i rul olsem king, i gat faet tu bitwin ol man Isrel mo Moab. Be hem i winim fulwan ol man Moab mo i mekem oli pem takis long hem. I luk olsem se long en blong faet ya, Deved i seraotem ol man blong faet blong ol man Moab long tri grup, nao i mekem oli ledaon laen long graon, mo i makemaot tu grup we bambae oli kilim olgeta oli ded, mo hem i letem nambatri grup oli laef i stap. (2Sa 8:2, 11, 12; 1Kro 18:2, 11) I luk olsem se long semfala faet ya, Benaea we i boe blong Jehoeada, i “kilim i ded tufala boe blong Ariel we i blong Moab.” (2Sa 23:20; 1Kro 11:22) Faet ya we Deved i winim agensem ol man Moab, i mekem profet tok we Balam i talemaot bitim 400 yia i pas, i kamtru we i se: “Wan sta bambae i kamaot long Jekob, mo wan septa bambae i kamaot long Isrel. Mo bambae hem i brebrekem hed blong Moab, mo i smasem bun blong hed blong olgeta boe we oli stap mekem faet.” (Nam 24:17) Mo tu, i luk olsem se afta we Deved i winim faet ya, man blong raetem sam i talem se God i luk Moab se i olsem “besin blong wasem han mo leg” blong hem.—Sam 60:8; 108:9.
25 NOVEMBA–1 DISEMBA
OL SAS SAMTING LONG BAEBOL OL SAM 109-112
!Sapotem Jisas We i King!
Ol Bigfala Poen Long Buk Faef Blong Ol Sam
110:1, 2—?Jisas Kraes we i “Masta blong [Deved]” i mekem wanem taem hem i stap sidaon long raet saed blong God? Afta we Jisas i laef bakegen, hem i go antap long heven mo i wet long raet saed blong papa blong hem kasem 1914, nao hem i stat rul olsem King. Long taem ya we Jisas i stap wet, hem i rul long ol man blong hem we tabu spirit i makemaot olgeta, i lidim olgeta long wok blong prij mo blong tijim ol man, mo tu hem i stap rerem olgeta blong oli rul wetem hem long Kingdom blong hem.—Matiu 24:14; 28:18-20; Luk 22:28-30.
!Ol Man Blong Faet Agensem God Oli No Save Win!
3 Ol man blong Jehova oli stap kasem trabol finis, long stat blong ol yia 19 handred. Long plante kantri, ol man we oli gat rabis plan, oli traem faenem rod blong spolem, no blong satem maot, blong olgeta we oli stap talemaot gud nius blong Kingdom blong God. Devel Setan nao i stap pulum ol man ya blong mekem olsem. Hem i Bigfala Enemi ya we i stap ‘raon long yumi oltaem, i olsem wan laeon we i stap singaot bigwan, i stap lukaot man blong i kakae.’ (1 Pita 5:8) Afta we “ol taem we God i makem long ol hiten man” oli finis long 1914, God i putumap Pikinini blong hem olsem niufala King blong wol, mo i givim oda ya long hem se: “Yu yu go rul long medel blong ol enemi blong yu, nao yu winim olgeta.” (Luk 21:24, NW; Ol Sam 110:2, NW) Kraes i yusum paoa we hem i kasem, blong sakemaot Setan long heven i kamdaon long wol ya. From we Devel Setan i save se taem blong hem i sot, hem i mekem kros blong hem i kamaot long ol tabu Kristin mo ol fren blong olgeta. (Revelesen 12:9, 17) ?Wanem i kamaot taem ol man ya blong faet agensem God oli stap mekem trabol bakegen mo bakegen long ol Kristin ya?
Gohed Gud Mo Traehad Blong Kam Gud Moa
Advaes ya blong yusum gud presen we God i givim long yu, i soemaot se yu wan yu mas mekem sam samting. ?Yu yu stap mekem plan blong prij wetem ol narafala? ?Yu yu lukaot sam rod blong givhan long ol niuwan long kongregesen, wetem ol yangfala, ol olfala, mo olgeta we oli sik tu? ?Yu yu rere oltaem blong givhan blong klinim Haos Kingdom, mo blong givhan long ol defren wok long taem blong asembli? ?Long sam manis, yu yu joen long wok blong haftaem paenia? ?Yu yu naf blong mekem wok blong fultaem paenia, no blong muv i go long wan kongregesen we i nidim moa man blong prij? Sipos yu yu wan brata, ?yu stap traem blong wokem ol fasin we Baebol i talem se yu mas gat blong yu save kam wan man blong givhan no wan elda? Taem yu yu rere blong givhan long narafala mo yu glad blong mekem wok, hemia i soemaot se yu stap gohed gud.—Sam 110:3.
Ol Gudgudfala Samting
it-1 524 ¶2
Kontrak
Kontrak Blong Kam Wan Pris Olsem Melkisedek. Kontrak ya i stap long Ol Sam 110:4, mo man we i raetem buk blong Hibru, i talem se Hibru 7:1-3, 15-17 i tokbaot we Kraes nao i joen long kontrak ya. Kontrak ya, Jehova i mekem wetem Jisas nomo. Maet Jisas i stap tokbaot kontrak ya nao taem hem i mekem wan kontrak blong Kingdom wetem ol man blong hem. (Lu 22:29) Folem promes ya we Jehova i mekem, Jisas Kraes, we hem i Boe blong God long heven, bambae i kam wan pris olsem Melkisedek. Melkisedek i wan king mo pris blong God long wol. Jisas Kraes bambae i holem tufala posisen ya tugeta, bambae hem i wan King mo Hae Pris, i no long wol be long heven. Hem i mekem wok ya olwe, afta we hem i go antap long heven. (Hib 6:20; 7:26, 28; 8:1) Kontrak ya i blong olwe, from we Jisas bambae i folem tingting blong Jehova, hemia blong mekem wok olsem King mo Hae Pris blong olwe.—Hib 7:3.
2-8 DISEMBA
OL SAS SAMTING LONG BAEBOL OL SAM 113-118
?Bambae Mi Givim Wanem Long Jehova Olsem Pei?
Lav i Mekem Yumi Kam Strong Moa
13 Tok blong Jisas i soemaot klia se fastaem yumi mas lavem Jehova. Be, taem yumi bon, lav ya we yumi gat long Jehova i no fulwan yet. Hemia wan fasin we yumi mas wokem. Long faswan taem we yumi harem nius long saed blong hem, nius ya i pulum yumi i kam long hem. Sloslo, yumi lanem olsem wanem hem i bin rerem wol ya blong olgeta man. (Jenesis 2:5-23) Yumi lanem se, taem sin i kasem olgeta man, Jehova i no sakemaot yumi be i wokem rod blong pemaot yumi. (Jenesis 3:1-5, 15) Hem i mekem i gud tumas long olgeta we oli stap tru long hem, mo biaen hem i givim stret Pikinini blong hem, wan nomo we hem i gat, blong mekem rod blong fogivim ol sin blong yumi. (Jon 3:16, 36) Ol save ya we yumi kasem, oli mekem se yumi gat bigfala tangkiu long Jehova. (Aesea 25:1) King Deved i talem se hem i lavem Jehova from we Hem i gat lav mo i keagud long ol man. (Ol Sam 116:1-9) Tede, Jehova i keagud long yumi, hem i stap lidim yumi, i stap givim paoa long yumi, mo i stap leftemap tingting blong yumi. Taem yumi kasem moa save long saed blong hem, bambae lav we yumi gat long hem i kam moa strong.—Ol Sam 31:23; Sefanaea 3:17; Rom 8:28.
w09 7/15 29 ¶4-5
Glad Blong Akseptem Mo Givim Long Fulhat
Man blong raetem sam i stap tingting se: “?Bambae mi givim wanem long Jehova olsem pei, blong ol gudfala samting we hem i bin mekem blong mi?” (Sam 116:12) ?Nao hem i kasem wanem? Jehova i lukaot gud long hem taem ‘trabol i spolemgud hem mo hem i harem nogud tumas.’ Mo tu, Jehova i bin “tekemaot [hem] long ded.” Taswe, naoia hem i wantem “givim samting long Jehova olsem pei.” ?Hem i save mekem wanem? Hem i talem se: “Bambae mi mekem olgeta samting we mi promes long Jehova.” (Sam 116:3, 4, 8, 10-14) Hem i gat strong tingting blong holemtaet olgeta promes we hem i mekem long Jehova, mo blong mekem olgeta samting we hem i promes blong mekem.
Yu tu yu save mekem sem mak. ?Yu save mekem samting ya olsem wanem? Hemia blong mekem se oltaem fasin blong laef blong yu i mas laenap wetem ol loa mo ol stamba trutok blong hem. Mo tu, yu mas meksua se yu putum wosip blong hem i stap fasples long laef blong yu, mo yu letem tabu spirit i lidim yu long evri samting we yu mekem. (Pri. 12:13; Gal. 5:16-18) Be blong talem stret, i tru se yu no save pembak Jehova fulwan from ol samting we hem i mekem blong yu. Be yet, ‘hat blong Jehova i glad’ taem hem i luk se yu mekem wok blong hem long fulhat blong yu. (Prov. 27:11) !I wan nambawan blesing blong mekem samting olsem, blong Jehova i glad!
Samting We Yumi Lanem Long Buk Blong Levitikas
9 Seken samting we yumi lanem: Yumi mekem wok blong Jehova blong talem tangkiu long hem. Blong kasem save samting ya, bambae yumi tokbaot wan narafala impoten samting long wosip blong ol man Isrel, hemia sakrefaes ya we oli bonem haf mo oli kakae haf. Buk blong Levitikas i talem se wan man Isrel i save mekem sakrefaes ya “blong talem tangkiu” long Jehova. (Lev. 7:11-13, 16-18) Hem i mekem sakrefaes ya from we hem nomo i wantem, i no from we hem i mas mekem. Mo tu, from we hem i lavem God blong hem Jehova. Man ya, famle blong hem, mo ol pris, oli kakae mit blong animol ya, be oli givim sam haf i go long Jehova. ?Weswan haf?
10 Namba tri samting we yumi lanem: From we yumi lavem Jehova, yumi givim sakrefaes we i beswan. Long tingting blong Jehova, ol haf blong animol we i beswan, hemia ol gris. Hem i talem tu se sam haf insaed, olsem tufala kidni, oli spesel. (Ridim Levitikas 3:6, 12, 14-16.) Taswe, taem wan man Isrel i givim ol kidni mo gris i go long Jehova, Jehova i glad tumas. Man we i mekem sakrefaes olsem, i soemaot se hem i wantem givim bes blong hem long God. Long sem fasin, Jisas i glad blong givim bes blong hem long Jehova, taem hem i mekem wok blong Jehova long ful laef blong hem from we i lavem Hem. (Jon 14:31) Jisas i harem gud tumas blong mekem samting we God i wantem, mo hem i lavem loa blong God. (Sam 40:8) !Jehova i mas harem gud tumas blong luk we Jisas i glad blong mekem wok blong hem!
11 Ol sakrefaes ya we oli bonem haf mo oli kakae haf, oli sem mak long wok we yumi mekem blong Jehova, from we oli soemaot tingting we yumi gat long hem. Yumi givim bes blong yumi long Jehova, from we yumi lavem hem long olgeta hat blong yumi. !Jehova i mas harem gud tumas blong luk plante milian man we oli mekem wok blong hem from we oli lavem hem! Hem i tinghae long wok we yumi mekem, mo tingting we i pusum yumi blong mekem wok. !Samting ya i leftemap tingting blong yumi! Yu traem tingbaot, sipos yu yu wan olfala we yu no moa save mekem plante wok, yu save sua se Jehova i kasemsave long yu. Maet yu ting se sakrefaes blong yu i smol tumas, be Jehova i luk bigfala lav we i pusum yu blong mekem samting we yu naf blong mekem. Hem i glad taem yu mekem bes blong yu.
Ol Gudgudfala Samting
Wan Kwestin
Man blong raetem Ol Sam i singsing se: “Jehova i tinghae long ded blong ol man blong hem we oli stap tru long hem.” (Sam 116:15, NW) Jehova i tinghae long laef blong olgeta man blong hem wanwan, we oli wosipim hem long fulhat blong olgeta. Be Ol Sam 116 i no blong tokbaot ded blong wan man nomo.
Nating se wan man blong Jehova i stap tru long Jehova gogo i ded, i no stret blong wan Kristin we i mekem tok blong ded, i yusum Ol Sam 116:15 blong tokbaot man ya. ?From wanem i no stret? From we ol tok ya i no stap tokbaot ol man blong God wanwan. Be ol tok blong vas ya i min se God i tinghae long ful grup blong ol man blong hem we oli stap tru long hem. Bambae hem i no save letem olgeta evriwan i ded.—Plis lukluk Ol Sam 72:14; 116:8.
9-15 DISEMBA
OL SAS SAMTING LONG BAEBOL OL SAM 119:1-56
“Olsem Wanem Wan Yang Man i Save Mekem Laef Blong Hem i Stap Klin?”
w87 11/1 18 ¶10
?Yu Yu Stap Klin Long Evri Haf Blong Laef Blong Yu?
10 Long Efesas 5:5, Pol i givim woning se: “Man we i griri, i olsem we hem i stap wosipim ol aedol. Be yufala i kasem save mo yufala i save se ol man olsem, wetem ol man we oli stap mekem ol doti fasin blong seks, mo ol man we oli no klin, bambae oli no kasem Kingdom blong Kraes mo God.” Nating se i olsem, evri yia, kongregesen i stretem o i putumaot plante taosen man from oli stap mekem enikaen doti fasin blong seks. Yes, oli stap ‘mekem sin agensem prapa bodi’ blong olgeta. (1 Korin 6:18) Plante taem, hemia i hapen from we man i no “mekem laef blong hem i laenap wetem ol tok blong [God].” (Ol Sam 119:9) Eksampol, long taem blong holide, plante brata oli no moa holemtaet ol gudfala fasin. Oli lego ol man blong Jehova, mo oli go joen wetem ol man blong wol long ol ples we oli go spel long hem. Oli stap tingting se ol man ya oli ‘ol gudfala man,’ mo sam Kristin oli joen wetem olgeta blong mekem sam samting tugeta. Long sem fasin, sam narafala oli fren gud tumas wetem ol fren long wok. Wan Kristin elda i fren gud tumas wetem wan woman long ples blong wok, nao hem i lego famle blong hem mo i stap wetem woman ya. From samting ya, kongregesen i putumaot hem. !Yes, Baebol i tok tru nomo taem i talem se: “Ol rabis fren oli save spolem ol gudfala fasin”!—1 Korin 15:33.
“Mi Mi Laekem Tumas Ol Tok We Yu Talem Bakegen Mo Bakegen”
JEHOVA i stap talem bakegen mo bakegen ol tok blong hem, blong halpem ol man blong hem blong winim ol traem long taem ya we laef i strong. Evri taem we yumi ridim Baebol, yumi ridim bakegen ol tok ya. Yumi harem ol tok ya bakegen mo bakegen long ol Kristin miting, mo long ansa we ol narafala oli givim long miting. Plante samting we yumi ridim no harem, yumi save finis. Ating yumi bin stadi bifo long ol tok ya. Be yumi evriwan i save fogetem samting. Taswe yumi mas tingting bakegen long ol plan blong Jehova, ol loa blong hem, mo ol tijing we hem i givim. Yumi mas gat tangkiu from ol tok we God i talem bakegen mo bakegen long yumi. Oli mekem tingting blong yumi i strong from we oli halpem yumi blong tingbaot from wanem yumi bin jenisim laef blong yumi blong mekem i laenap wetem samting we God i wantem. Taswe, man blong raetem Sam 119 i singsing long Jehova se: “Mi mi laekem tumas ol tok we yu talem bakegen mo bakegen.”—Ol Sam 119:24, NW.
!Blokem Ae Blong Yu Long Ol Samting We Oli Nating Nomo!
2 Be ol samting we ae blong yumi i luk, oli save spolem yumi tu, from we ol samting we yumi luk oli save gat bigfala paoa long tingting blong yumi. Taem yumi luk wan samting, tingting blong yumi i save stat blong wantem samting ya, mo maet yumi stat traehad blong kasem samting ya. Taswe, moa we bambae yumi lukluk samting ya, moa we bambae tingting blong yumi i kam strong long hem. Wol ya we i stap long han blong Setan, i fulap long ol rabis fasin, mo ol man blong hem oli lukaot rod blong kasem samting we olgeta nomo oli wantem. Taswe, evri dei, wol ya i wantem we yumi lukluk ol pija mo karem ol tingting we oli save pulum yumi, yumi gowe long stret rod. Mo nating sipos ae blong yumi i fas long ol samting ya blong smoltaem nomo, be ol samting ya oli save spolem yumi. (1 Jon 5:19) Taswe yumi no sapraes we man blong raetem Sam i prea strong long God se: “Plis yu blokem [“ae blong,” NW] mi blong mi no save folem [“lukluk,” NW] ol fasin ya we i no gat wan gudfala samting i save kamaot long hem. Plis yu mekem we mi mi gat gudfala laef, we i folemgud ol fasin blong yu.”—Sam 119:37.
Ol Gudgudfala Samting
Trastem Tok Blong Jehova
2 Bigfala tingting insaed long Sam 119, hemia se tok no mesej blong God i gud tumas. Man we i wokem singsing ya, i raetem ol haf blong hem folem alfabet. Ating hem i raetem olsem blong mekem se i isi blong lanem. Ol 176 vas blong hem oli folem alfabet long Hibru lanwis. Long olfala lanwis ya, Sam ya i gat 22 haf blong hem, we i gat 8 laen long ol wanwan haf ya, mo ol 8 laen ya oli stat wetem semfala alfabet. Sam ya i tokbaot ol tok blong God, ol loa, ol rul, ol fasin, ol tijing, ol tingting, mo ol rod blong hem. Long stadi ya mo long nekis stadi, bambae yumi yusum wan Baebol we i tanem gud olfala Hibru hanraet blong Sam 119. Sipos yumi tingting dip long ol samting we i kamaot long laef blong ol man blong Jehova bifo mo naoia, bambae yumi kasem save moa long mining blong singsing ya we i kamaot long God, mo bambae yumi gat moa tangkiu from Tok blong God, Baebol.
16-22 DISEMBA
OL SAS SAMTING LONG BAEBOL OL SAM 119:57-120
?Olsem Wanem Blong Stanap Strong Long Ol Hadtaem?
“!Mi Mi Laekem Loa Blong Yu Tumas!”
2 Ating yu yu wantem save se: “?Olsem wanem loa blong God i mekem man ya i haremgud?” Taem man ya i ridim loa blong God, hem i luksave se God i wantem mekem i gud long hem, mo samting ya i givim paoa long hem. Loa ya i soemaot se God i lavem hem, taswe sipos hem i ridim loa ya bambae hem i glad, nating se ol man oli agensem hem mo oli stap mekem i nogud long hem. Hem i luksave se Jehova i mekem plante gudfala samting long hem finis. Mo tu, from we man ya i folem loa blong God, hem i waes moa i winim ol enemi blong hem. Antap long samting ya, loa ya i bin sevem laef blong hem. Mo from we hem i obei long loa ya, tingting blong hem i stap kwaet mo i stap klin long fes blong God.—Ol Sam 119:1, 9, 65, 93, 98, 165.
?Yu Yu Laekem Tumas Ol Tok We Jehova i Stap Talem Bakegen Mo Bakegen?
3 Ol tok we God i stap talem bakegen mo bakegen, oli sas long tingting blong man ya we i raetem Sam 119. Hem i singsing se: “Mi mi no tektaem, mi girap mi obei long ol tok we yu yu putum. Ol man nogud oli putum wan trap finis blong kasem mi, be mi mi no fogetem Loa blong yu.” (Ol Sam 119:60, 61) Ol tok we Jehova i stap talem bakegen mo bakegen, oli givhan long yumi blong stanap strong taem samfala oli agensem yumi, from we yumi savegud se Papa blong yumi long heven hem i naf blong spolem ol trap we ol enemi oli putum blong kasem yumi. Long stret taem blong hem, hem i tekemaot ol samting ya we oli save blokem yumi, nao yumi fri blong gohed long wok blong talemaot Kingdom.—Mak 13:10.
Ol Bigfala Poen Long Buk Faef Blong Ol Sam
119:71—?Olsem wanem panis no hadtaem i save mekem i gud long yumi? Hadtaem i save tijim yumi blong trastem Jehova moa, blong prea strong moa long hem, mo blong kamgud moa long fasin blong stadi long Baebol mo blong mekem wanem we Baebol i talem i wok long laef blong yumi. Antap long samting ya, fasin we yumi mekem taem yumi kasem hadtaem, i save mekem yumi luksave ol fasin we yumi nidim blong jenisim. Hadtaem we yumi kasem i no save spolem yumi sipos yumi luk traem ya olsem wan janis blong kamgud moa long sam fasin blong yumi.
“Krae Wetem Olgeta” We Oli Stap Krae
3 Papa blong yumi Jehova, i gat sore, mo hem nao i faswan blong givhan long yumi taem yumi nidim. (Ridim 2 Korin 1:3, 4.) I no gat wan narafala man we i kasem save long filing blong yumi, olsem Jehova. Hem i promes long ol man blong hem se: “!Mi nao mi stap mekem yufala i strong!”—Aesea 51:12; Ol Sam 119:50, 52, 76.
5 Yumi save bilif strong se Jehova bambae i givhan long yumi. Taswe yumi no mas fraet blong prea long hem blong talemaot ol filing blong yumi, taem yumi harem nogud tumas. !I gud tumas blong save se Jehova i kasem save long filing blong yumi, mo bambae i givhan long yumi olsem yumi nidim! ?Hem i givhan long yumi olsem wanem?
Ol Gudgudfala Samting
Ol Bigfala Poen Long Buk Faef Blong Ol Sam
119:96—?Wanem mining blong tok ya se ‘ol gudgudfala samting oli gat en blong olgeta’? Man blong raetem Sam ya i stap tokbaot ol samting we long lukluk blong ol man oli gudfala tumas. Ating hem i stap tingbaot we long tingting blong yumi ol man, ol gudgudfala samting oli no save stap olwe mo oli gud long sam fasin nomo, oli gat mak blong olgeta. Defren olgeta, ol loa blong Jehova oli no gat mak blong olgeta. Oli gud tumas long olgeta haf blong laef blong yumi.
23-29 DISEMBA
OL SAS SAMTING LONG BAEBOL OL SAM 119:121-176
No Harem Nogud From Ol Samting We Oli No Impoten
Trenem Tingting Folem Ol Loa Mo Ol Stamba Trutok Blong Baebol
5 Sipos yumi wantem se ol loa blong God oli halpem yumi, i no naf blong ridim Baebol mo save ol loa ya nomo. Yumi mas lavem mo respektem olgeta tu. Baebol i talem se: “Fasin we i no stret, yufala i mas tanem baksaed long hem, be fasin we i stret, yufala i mas glad long hem.” (Amos 5:15) ?Be olsem wanem blong mekem? Yumi mas traehad blong gat tingting blong Jehova long evri samting. Traem tingbaot se, yu no stap slipgud, nao dokta i talem se yu mas kakae gud, mekem eksasaes, mo mekem sam jenis long laef blong yu. !Yu folem advaes blong hem, mo yu luk se i wok gud! Ating bambae yu glad tumas long advaes ya.
6 Long sem fasin, God i stanemap ol loa blong mekem laef blong yumi i kam gud moa, from we oli protektem yumi long ol rabis frut blong sin. Traem tingbaot: Baebol i talem se yumi no mas giaman, stil, mekem rabis fasin blong seks, faet, o mekem wok blong rabis spirit. (Ridim Ol Proveb 6:16-19; Revelesen 21:8) Sipos yumi obei mo yumi luk gudfala frut we i kamaot, bambae yumi lavem moa Jehova mo ol loa blong hem.
?Ol Yangfala—Yufala i Folem Wanem Rod?
12 Samting we impoten moa se, yu mas lanem blong no laekem nating, mo no wantem samting we i nogud. (Ol Sam 97:10) ?Olsem wanem blong no laekem nating wan samting we bifo yu laekem no yu stap haremgud long hem? !Sipos yu stap tingbaot ol frut we bambae i kamaot biaen! “Yufala i no mastik long samting ya. I no gat man i save giaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae. Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we i ded nomo. Be sipos hem i planem fasin we tabu sperem i wantem, tabu sperem bambae i givim kakae long hem, we i no save finis.” (Galesia 6:7, 8) Taem ol traem ya oli pulum yu blong yu foldaon long rabis fasin we yu laekem, tingbaot nogud frut we bambae i kamaot—samting ya bambae i mekem Jehova God i harem nogud. (Lukluk Ol Sam 78:41.) Tingbaot tu se yu save gat bel nating se yu no wantem olsem no yu save kasem wan sik, olsem AIDS. Tingbaot ol nogud filing mo bambae yu harem nogud from we yu no moa holem gudfala fasin. Maet i save gat ol nogud frut blong hem we i stap longtaem. Wan Kristin woman i talemaot stret se: “Mi mo hasban blong mi mitufala i bin mekem nogud long saed blong seks wetem ol narafala bifo we mitufala i mared. Nating se tede mitufala evriwan i Kristin, rabis fasin long seks bifo i stamba blong plante faet mo fasin jalus long mared blong mitufala.” !Mo tu yu no mas fogetem se yu save lusum ol gudfala wok blong tiokratik no maet oli save putumaot yu long Kristin kongregesen! (1 Korin 5:9-13) ?Fasin blong haremgud smoltaem long bodi i impoten moa long ol samting ya?
Ol Gudgudfala Samting
Trastem Se Tok Blong God “Hem i Trutok”
2 Yumi ol man blong Jehova, yumi trastem se hem i “God blong trutok” mo se oltaem hem i mekem samting blong givhan long yumi. (Sam 31:5; Aes. 48:17) Yumi save se yumi save trastem ol samting we yumi ridim long Baebol. Yumi bilif se “stamba blong tok blong [God], hem i trutok.” (Ridim Ol Sam 119:160.) Yumi agri wetem tok blong wan Baebol skola we i talem se: “I no gat wan samting we God i talem we i no tru o we bambae i no kamtru. Ol man blong God oli trastem samting we hem i talem from we oli trastem God we i talem samting ya.”
30 DISEMBA–5 JENUWARE
OL SAS SAMTING LONG BAEBOL OL SAM 120-126
Oli Krae Taem Oli Saksakem Sid, Be Oli Glad Taem Oli Tekemaot Kakae
Olgeta We Oli Presem God Bambae Oli Kasem Blesing
10 Taem yumi tekem yok ya we Jisas i wantem givim long yumi, we i min se yumi kam ol disaepol blong hem, yumi stap faet agensem Setan. Jemes 4:7 i mekem promes ya long yumi se: “Yufala i mas blokem Setan, nao hem bambae i ronwe long yufala.” Ol tok ya oli no min se bambae i isi nomo blong faet agensem Setan. Nogat. Man we i wantem mekem wok blong God bambae hem i mas wok had. (Luk 13:24) Be Baebol i mekem promes ya long Ol Sam 126:5 se: ‘I gat ol man we, taem oli stap planem kakae long garen blong olgeta, oli stap krae. Be taem oli tekemaot kakae long garen ya, oli glad.’ Yes, God ya we yumi stap wosip long hem, hem i wan God we i gat fasin tangkiu. Hem “i stap mekem i gud long olgeta we oli stap traem faenem hem,” mo i stap blesem olgeta we oli leftemap hem.—Hibru 11:6.
?Bilif Blong Yu Bambae i Strong Olsem Wanem?
17 ?Yu yu stap harem nogud from wan famle o fren we i ded? Tekem taem blong ridim ol stori blong Baebol we i tokbaot olgeta we oli laef bakegen, hemia bambae i mekem bilif blong yu long laef bakegen i kam strong. ?Yu yu harem nogud from wan memba blong famle i bin disfelosip? I gud yu stadi blong pruvum se fasin blong God blong stretem man, oltaem i beswan. Nomata wanem problem yu fesem, tekem olsem wan janis blong mekem bilif blong yu i kam strong moa. Talemaot filing blong yu long Jehova. Mo yu no stap yu wan, be yu gohed blong stap klosap long ol brata mo sista. (Prov. 18:1) Mekem ol samting we oli save halpem yu blong stanap strong, nating sipos yu krae from yu tingbaot samting we i bin hapen. (Sam 126:5, 6) Gohed blong go long ol miting, joen long wok blong prij, mo ridim Baebol. Mo gohed blong tingbaot ol nambawan blesing we Jehova i promes blong givim long yu long fiuja. Taem yu luk olsem wanem Jehova i halpem yu naoia, bambae bilif blong yu long hem i kam strong moa.
!Gohed Blong Tekem Kakae Long Garen!
13 Ol Sam 126:5, 6 i rili leftemap tingting blong ol man blong God we oli stap tekem kakae long garen, antap moa, olgeta we narafala i stap mekem i nogud long olgeta. Vas ya i talem se: “I gat ol man blong mifala we taem oli stap planem kakae long garen blong olgeta, oli stap harem nogud, oli stap krae. Be taem oli tekemaot kakae long garen ya, plis yu mekem olgeta oli glad. . . . Ol man ya, taem oli go planem kakae long garen, oli stap harem nogud, oli stap krae. Be biaen, taem oli go tekemaot kakae long garen ya oli karem i kam, bambae oli singsing from we oli glad we i glad long kakae ya.” Ol tok ya we man blong raetem Ol Sam i talem long saed blong fasin blong planem mo tekem kakae long garen, oli soemaot se Jehova i kea mo i stap blesem smol grup blong ol prisena we oli aot long Babilon, oli gobak long kantri blong olgeta. Olgeta ya oli glad tumas taem oli aot long Babilon, be maet oli krae taem oli stap planem sid long graon blong olgeta we oli no bin wokem long ol 70 yia we oli kalabus. Be olgeta we oli no lego wok ya blong planem kakae long garen mo bildim bakegen ol haos, oli kasem gudfala frut mo oli haremgud tumas from hadwok blong olgeta.
14 I tru, yumi harem nogud taem yumi kasem traem. Yumi harem nogud tu, taem yumi, no ol brata sista blong yumi i safa from we yumi traem holem ol gudfala fasin. (1 Pita 3:14) Long wok ya blong tekem kakae long garen, maet fastaem i hadwok from we i luk olsem se i nogat wan samting we i soem se bambae wok blong yumi i karem frut. Be sipos yumi gohed blong planem sid mo putum wota long hem, bambae God i mekem sid ya i gru, nomata we yumi ting se i no save gru. (1 Korin 3:6) Ol gudfala frut we oli kamaot from wok we yumi stap mekem blong seremaot Baebol mo ol buk we oli tokbaot Baebol, oli soemaot samting ya.
Ol Gudgudfala Samting
cl 73 ¶15
Paoa We i Protektem Man—“God i Ples Blong Haed Blong Yumi”
15 Fastaem bambae yumi luk se Jehova i protektem yumi long saed blong bodi. Yumi ol man blong Jehova, yumi save se Jehova i save protektem yumi olsem wan grup. Sipos hem i no protektem yumi, bambae i isi nomo blong Setan i atakem yumi. Traem tingbaot: Setan we i “rula blong wol ya,” i wantem tumas blong finisim tru wosip. (Jon 12:31; Revelesen 12:17) Sam gavman we oli gat bigfala paoa long wol, oli putum tabu long wok blong prij mo traem blong stopem yumi fulwan. Be ol man blong Jehova oli gohed blong stanap strong mo oli gohed nomo blong prij. ?From wanem ol nesen we oli strong, oli no naf blong stopem wok blong wan smol grup blong ol Kristin ya we i luk olsem se i no gat man blong protektem olgeta? !Hemia from we Jehova nao i stap protektem yumi long ol strong wing blong hem!—Ol Sam 17:7, 8.