?Ol Witnes Blong Jehova Oli Kristin?

Yes. Mifala i Kristin from ol risen ya:

Mifala i traem folem gud ol tijing mo fasin blong Jisas Kraes.—1 Pita 2:21.
Mifala i bilif se Jisas hem i rod blong God i save sevem ol man, mo “i no gat wan narafala man nating we i save sevem yumi, from we olbaot long wol ya, God i no givim nem blong wan narafala man nating long yumi, we hem i stap yusum blong sevem yumi.”—Ol Wok 4:12.
Taem wan man i kam wan Witnes blong Jehova, hem i baptaes long nem blong Jisas.—Matiu 28:18, 19.
Mifala i prea long nem blong Jisas.—Jon 15:16.
Mifala i bilif se Jisas i hed blong man. God i putumap hem i hae moa long ol man.—1 Korin 11:3.

Be long plante narafala fasin, mifala i defren long ol narafala skul we oli talem se oli Kristin. Mifala i bilif we Baebol i tijim se Jisas i Pikinini blong God, hem i no wan Triniti. (Mak 12:29) Mifala i bilif se sol i save ded, mo i no gat wan vas blong Baebol we i talem se God bambae i bonem ol man nogud long wan faea blong oli harem nogud long hem blong olwe. Mifala i no bilif se ol man oli mas singaot olgeta we oli gat wok long jos long sam spesel nem, blong leftemap olgeta.—Prija 9:5; Esikel 18:4; Matiu 23:8-10.