Wok Blong Talemaot Kingdom​—Gud Nius i Kasem Olgeta Ples Long Wol

LONG wan dei we yu no wok, yu girap long eli moning, mo yu stat mekem rere blong go prij. Yu harem se yu taed smol. !Yu wantem spel nomo! Be yu prea, nao tingting blong yu i kam strong blong go prij. Long wok blong prij, yu wok wetem wan olfala sista, we hem i kaen tumas mo i gohed longtaem finis long wok blong Jehova. Fasin blong hem i tajem hat blong yu. Taem yutufala i stap prij, yu stap tingbaot se ol brata mo sista long olgeta ples long wol oli stap talemaot sem trutok olsem yutufala, oli stap yusum ol semfala buk, mo oli kasem semfala trening. Taem yu gobak long haos, yu no moa taed. !Yu yu glad tumas se yu go prij!

Wok blong prij, hem i bigfala wok we Kingdom blong God i stap mekem naoia. Jisas i talem se long ol las dei, gud nius ya bambae i kasem olgeta ples long wol. (Mat. 24:14) ?Profet tok ya i kamtru olsem wanem? Long haf ya, bambae yumi tokbaot wok blong prij we ol tru Kristin oli mekem. Wok ya i givhan long plante milian man blong oli bilif se Kingdom blong God i wan prapa gavman we i stap rul. Bambae yumi tokbaot ol man we oli mekem wok ya, ol rod blong prij, mo ol samting we oli yusum blong mekem wok ya.