Refrens Blong Kristin Wok Mo Laef Miting Wokbuk
© 2024 Watch Tower Bible and Tract Society of Pennsylvania
6-12 JENUWARE
OL SAS SAMTING LONG BAEBOL OL SAM 127-134
Ol Perens—Lukaot Gud Long Nambawan Presen Ya
Glad Se Yu Pat Blong Famle Blong Jehova
9 Jehova i mekem we ol man oli naf blong gat pikinini, mo i givim wok ya long olgeta blong oli save tijim pikinini blong i lavem Jehova mo wosipim hem. Sipos yu yu wan perens, ?yu yu glad long nambawan presen ya? Nating se Jehova i wokem ol enjel we oli gat paoa blong mekem plante gudfala samting, be hem i no givim raet long olgeta blong gat pikinini. From samting ya, sipos yu yu wan perens, yu mas glad long privilej ya blong lukaot long ol pikinini. Jehova i givim wan impoten responsabiliti long ol perens blong oli “stretem mo givim woning long [ol pikinini] folem tingting blong Jehova.” (Efes. 6:4; Dut. 6:5-7; Sam 127:3) Blong givhan long ol perens, oganaesesen blong Jehova i givim plante tul we i stanap long Baebol olsem ol buk, ol video, miusik, mo ol atikol long websaet. I klia se Papa blong yumi long heven mo Boe blong hem i lavem tumas ol yangfala. (Luk 18:15-17) Taem ol perens oli dipen long Jehova mo oli mekem bes blong olgeta blong lukaot gud long ol pikinini blong olgeta, Jehova i glad tumas. !Mo oli stap givhan long pikinini tu blong i gat janis ya blong kam pat blong famle blong Jehova olwe!
Papa Mo Mama, Trenem Pikinini Blong i Lavem Jehova
20 Savegud pikinini blong yu. Ol Sam 127 i tokbaot ol pikinini se oli olsem ol ara. (Ridim Ol Sam 127:4.) Ol man oli save wokem ol ara wetem plante defren samting mo long defdefren saes. Long sem fasin, wanwan pikinini i defdefren. Taswe, papa mama i mas tingbaot olsem wanem blong tijim wanwan long ol pikinini blong tufala. Wan kapol long Isrel we tufala i gat tu pikinini we naoia oli stap mekem wok blong Jehova, oli tokbaot samting we i givhan long tufala se, “Mitufala i no mekem Baebol stadi blong tufala pikinini wanples. Mitufala i seraotem tufala.” I tru, wanwan hed blong famle i save jusum se bambae oli mekem stadi blong ol pikinini wanples o oli seraotem.
Ol Gudgudfala Samting
it-1 543
Ol Plant We Baebol i Tokbaot
Man blong raetem Ol Sam i tokbaot blesing we ol man we oli fraet long Jehova bambae oli kasem, i se: “Ol boe blong yu bambae oli olsem ol niufala sut blong oliftri raon long tebol blong yu.” (Sam 128:1-3) Ol man oli stap katem ol han blong oliftri mo planem blong mekem se i gat sam moa niufala oliftri. Mo tu, taem wan oliftri i kam olfala, ol niufala sut oli save kamaot long rus blong hem blong mekem se tri ya i gohed blong laef. Ol boe oli olsem ol niufala sut ya from we oli joenem papa blong olgeta blong mekem ol wok insaed long famle mo mekem se famle i glad.
13-19 JENUWARE
OL SAS SAMTING LONG BAEBOL OL SAM 135-137
“Masta Blong Yumi i Hae Moa i Winim Ol Narafala God”
it-2 661 ¶4-5
Paoa, Ol Wok We Oli Soemaot Paoa
God i naf blong kontrolem olgeta samting. Samtaem Jehova i kontrolem ol samting we hem i wokem blong pruvum se hem nao i tru God. Hem i mekem olsem blong leftemap nem blong hem. (Sam 135:5, 6) Jehova i mekem se san, mun, ol planet, mo ol sta oli folemgud wan plan, mo weta i folem loa we hem i putum blong mekem se i gat win, ren, mo ol narafala weta. Hem i mekem tu se ol lokis oli flae tugeta long wan grup, mo ol pijin oli save travel i go long ol narafala ples. Nating se i olsem, be taem ol man oli sakem doti long nem blong Jehova, ol samting ya nomo oli no naf blong mekem nem blong Jehova i stap tabu.
Taswe samtaem Jehova i yusum ol samting we hem i wokem long wan fasin we i spesel, blong pruvum se hem nao i tru God. Hem i save kontrolem ol samting ya blong mekem se oli hapen long wan stret taem we hem i talemaot finis. Nating se i nomol blong gat ol draetaem, ol strong win mo ren, mo ol narafala weta olsem, be taem Jehova i mekem ol samting ya oli hapen long wan stret taem, hemia i pruvum se hem i naf blong kontrolem ol samting ya. (Skelem wetem 1Ki 17:1; 18:1, 2, 41-45.) Mo tu, plante taem hem i mekem ol samting we i neva hapen bifo. Maet hem i mekem ol samting ya long wan fasin we i bigwan moa bitim oltaem, (Eks 9:24) long wan fasin we i narakaen, o long wan taem we i no stret taem blong olgeta.—Eks 34:10; 1Sa 12:16-18.
?I Minim Wanem Se Jehova i Lavem Man Oltaem?
16 Yumi harem se yumi sef taem yumi save se Jehova i ples blong haed blong yumi. Samtaem, yumi harem nogud mo maet i tekem longtaem blong yumi harem gud bakegen. Long taem olsem, ?Jehova bambae i mekem wanem? (Ridim Ol Sam 136:23.) Bambae hem i putum han blong hem aninit long yumi, i leftemap yumi sloslo, mo i halpem yumi blong harem gud bakegen. (Sam 28:9; 94:18) ?Hemia i halpem yumi olsem wanem?: Taem yumi luksave se yumi save dipen oltaem long God, hemia i halpem yumi long tu rod. Faswan, nomata weples yumi stap long hem, yumi save se oltaem Jehova bambae i protektem yumi. Nambatu, Papa blong yumi long heven i kea bigwan long yumi.
Ol Gudgudfala Samting
it-1 1248
Jah
Plante taem ol man oli yusum sot nem ya Jah taem oli presem God, oli singsing, mo oli prea blong askem wan samting long Jehova. Oli yusum sot nem ya blong soemaot se oli glad from we God i sevem olgeta mo i mekem oli win long faet, o blong talem tangkiu long God from bigfala paoa blong hem. I gat plante eksampol blong ol defdefren taem we oli yusum sot nem ya. Long buk blong Ol Sam, oli yusum tok ya “!Presem Jah!” (Halelujah) olsem wan toktok blong presem God, mo tok ya i kamaot fastaem long Ol Sam 104:35. Long sam narafala ples long Ol Sam, tok ya i stap nomo long stat (Sam 111, 112), wanwan taem i stap long medel blong ol vas (135:3), o samtaem i stap nomo long en (Sam 104, 105, 115-117), be plante taem i stap long stat mo long en (Sam 106, 113, 135, 146-150). Long buk blong Revelesen, olgeta we oli stap long heven oli talem tok ya plante taem blong presem Jehova.—Re 19:1-6.
Oli yusum sot nem ya “Jah” long ol narafala ples tu taem oli singsing blong presem Jehova mo taem oli prea. Eksampol, Moses i yusum sot nem ya taem hem i singsing blong presem Jehova from i sevem hem. (Eks 15:2) Long ol singsing we Aesea i raetem, hem i yusum tufala nem ya tugeta se “Jah Jehova,” blong makem moa nem ya. (Aes 12:2; 26:4) Hesekia i raetem wan poem blong presem Jehova afta we Jehova i mekem wan merikel blong hilim hem long wan strong sik. Mo hem i ripitim nem ya Jah blong soemaot bigfala glad we hem i gat. (Aes 38:9, 11) Taswe Ol Sam i talem se ol man we oli ded oli no save presem Jah, be olgeta we oli laef oli save presem Jah. (Sam 115:17, 18; 118:17-19) I gat sam narafala vas long Ol Sam tu we i yusum sot nem ya taem man i prea long God blong talem tangkiu from we God i sevem hem, i protektem hem, mo i stretem hem.—Sam 94:12; 118:5, 14.
20-26 JENUWARE
OL SAS SAMTING LONG BAEBOL OL SAM 138-139
No Letem Fraet i Blokem Yu
Presem Jehova Long Kongregesen
10 ?Yu yu harem se hat blong yu i pam taem yu wantem leftemap han blong yu? Sipos yes, i no yu wan nomo. Blong talem stret, bighaf blong yumi i fraet taem yumi givim ansa. Blong winim fraet ya, yu mas save fastaem samting we i mekem yu yu fraet. ?Yu yu fraet se bambae yu fogetem samting we yu wantem talem, o bambae yu talem wan rong ansa? ?Yu yu wari se bambae yu no givim wan gudfala ansa olsem ol narafala? Blong talem stret, i gud blong fraet olsem. Hemia i soemaot se yu gat tingting daon mo yu luk ol narafala se oli gud moa long yu. Jehova i laekem fasin ya. (Sam 138:6; Fil. 2:3) Be Jehova i wantem tu se yu presem hem, mo yu leftemap tingting blong ol brata mo sista long miting. (1 Tes. 5:11) Hem i lavem yu mo bambae i mekem tingting blong yu i strong.
Leftemap Tingting Blong Ol Narafala Long Ol Miting
7 Maet yu save faenem sam gudfala advaes long ol Wajtaoa blong yumi. Eksampol, yu mas rere gud. (Prov. 21:5) Sipos yu save gud samting we atikol i tokbaot, bambae i moa isi blong yu givim ansa. Mo tu, i gud yu givim wan sot ansa nomo. (Prov. 15:23; 17:27) Bambae yu no fraet tumas sipos ansa blong yu i sot. Sipos ansa blong yumi i sot, ol brata sista bambae oli kasemsave moa long hem i bitim wan ansa we i longfala mo i gat tumas poen long hem. Sipos yu givim wan sot ansa long prapa tok blong yu, hemia i soemaot se yu rere gud mo yu kasemsave gud long atikol we yumi stadi long hem.
Ol Gudgudfala Samting
it-1 862 ¶4
Fasin Blong Fogif
Mo tu, ol Kristin oli mas gohed blong fogivim narafala we i mekem i no stret long olgeta, nating se hem i mekem samting ya plante taem. (Lu 17:3, 4; Ef 4:32; Kol 3:13) God i no save fogivim wan man we i no wantem fogivim ol narafala. (Mt 6:14, 15) Nating se i olsem, sipos wan man i mekem wan bigfala sin nao kongregesen i putumaot hem, be biaen hem i tanem tingting blong hem, Jehova bambae i fogivim hem. Long taem ya, kongregesen i save tekembak hem mo soemaot se oli lavem hem. (1Ko 5:13; 2Ko 2:6-11) Be ol Kristin oli no nid blong fogivim ol man we oli gohed nomo blong mekem wan bigfala sin, mo oli no wantem tanem tingting blong olgeta. Ol man olsem oli kam ol enemi blong God.—Hib 10:26-31; Sam 139:21, 22.
27 JENUWARE–2 FEBRUARI
OL SAS SAMTING LONG BAEBOL OL SAM 140-143
Wok Folem Ol Prea Blong Yu
“Yu Lesin Gud Long Toktok Blong Ol Waes Man”
13 Tingbaot advaes we yu kasem olsem wan rod we i soemaot se God i lavem yu. Jehova i wantem se yumi gat gudfala laef. (Prov. 4:20-22) Taem hem i yusum Tok blong hem, wan buk blong yumi, o wan Kristin we i gat ekspiriens blong givim advaes long yumi, hemia i soemaot se hem i lavem yumi. Olsem Hibru 12:9, 10 i talem, “oltaem hem i stap stretem yumi blong mekem i gud long yumi.”
14 Tingbaot advaes, be i no fasin blong man blong givim advaes. Samtaem, maet yumi harem se fasin we man i folem blong givim advaes long yumi i no stret. I tru se eniman we i givim advaes, i sud mekem long wan fasin we bambae i isi blong yumi akseptem. (Gal. 6:1) Be sipos yumi nao yumi kasem advaes, yumi mas tingbaot moa mesej, nating we yumi ting se man ya i sud talem long wan fasin we i gud moa. Maet yumi save askem se: ‘Sipos mi no laekem fasin blong man ya blong givim advaes, ?be i gat sam samting long advaes ya we i save givhan long mi? ?Mi mi naf blong no tingbaot fasin blong man ya blong givim advaes mo lanem lesen from advaes ya?’ Yumi waes sipos yumi traehad blong faenem gudfala samting long eni advaes we narafala i givim long yumi.—Prov. 15:31.
w10 3/15 32 ¶4
Gohed Blong Gat “Wan Hat We i Klin” Nating Se Laef i Had
Sam man blong God oli harem nogud tumas from narafala i agensem olgeta, oli sot long mane, o oli kasem ol strong sik. Hemia i mekem se samtaem hat blong olgeta i trabol. King Deved tu i gat sem filing olsem. Hem i talem se: “Naoia tingting blong mi i foldaon, mo hat blong mi i nam.” (Sam 143:4) ?Wanem i givhan long Deved blong i no moa harem nogud? Deved i tingbaot ol samting we God i mekem blong sevem hem mo ol man blong hem bifo. Oltaem Deved i tingting dip long ol samting we Jehova i mekem blong leftemap nem blong Hem mo ol wok blong Hem. (Sam 143:5) Long sem fasin, sipos yumi gohed blong tingting dip long ol fasin blong God mo ol samting we hem i mekem bifo mo long taem blong yumi, hemia bambae i givhan long yumi blong stanap strong long ol hadtaem.
Mared Long Wan “Man Blong Masta” ?Advaes Ya i Gud Yet?
Samtaem maet yu save gat sem tingting olsem Deved we i se: “!Hae God, plis yu kwik! !Plis yu harem krae blong mi! Tingting blong mi i foldaon olgeta. !Plis yu no haedem fes blong yu long mi!” (Ol Sam 143:5-7, 10) Yu no mas lego. I gud yu letem sam taem i pas blong Jehova i soemaot samting we hem i wantem yu blong mekem. Yu lesin long Jehova, taem yu ridim Baebol mo yu tingting dip long hem. Hemia bambae i givhan long yu blong save samting we Jehova i wantem yu blong mekem. Mo tu, i givhan long yu blong luk olsem wanem hem i givhan long ol man blong bifo. Taem yu lesin long hem, bambae tingting blong yu i strong blong yu wantem gohed blong obei long hem.
Ol Gudgudfala Samting
it-2 1151
Posen
?I Pija Blong Wanem? Ol giaman tok blong spolem nem blong narafala i olsem posen blong snek we i save kilim man i ded. (Sam 58:3, 4) Baebol i tokbaot ol man we oli stap talem ol giaman tok blong spolem narafala se “i gat posen blong snek insaed long maot blong olgeta.” (Sam 140:3; Ro 3:13) Posen blong snek i stap insaed long maot blong hem, biaen long tufala sap tut blong hem. Man we i stap tokbaot nogud narafala, spolem narafala, talem ol giaman tijing, o mekem narafala i harem nogud, tang blong hem “i fulap long posen we i save kilim man i ded.”—Jem 3:8.
3-9 FEBRUARI
OL SAS SAMTING LONG BAEBOL OL SAM 144-146
“!Ol Man We Jehova i God Blong Olgeta Oli Glad!”
Kwestin
2. Jenis ya i mekem se ol vas ya oli joen gud moa wetem ol nara vas blong Ol Sam 144. Long stat blong vas 12, oli yusum tok ya “nao” blong mekem i klia se ol blesing we vas 12 kasem 14 i tokbaot i go long ol stret man, hemia olgeta we oli askem God blong i ‘sevem mo tekemaot’ olgeta long han blong ol rabis man (vas 11). Jenis ya i mekem i klia tu se tok ya “glad” we i stap long tufala sentens blong vas 15, i stap tokbaot ol sem man nomo, hemia “ol man we Jehova i God blong olgeta.” Mo tu, i gud blong tingbaot se long ol olfala hanraet long Hibru i no gat ol mak olsem kwotesen mak. Taswe blong ol transleta oli kasemsave stret mining blong wan vas, oli mas tingbaot stael blong ol man Hibru blong raetem ol poem, ol vas raonabaot, mo olsem wanem vas ya i joen wetem ol narafala haf blong Baebol.
3. Jenis ya i laenap wetem ol narafala haf blong Baebol we oli tokbaot ol blesing we ol gudfala man bambae oli kasem. From we oli jenisim fasin blong transletem tok ya asher, naoia ol vas ya oli laenap wetem hop we Deved i gat, hemia se afta we God i sevem nesen blong Isrel long ol enemi blong olgeta, bambae Hem i blesem olgeta mo i mekem se oli gat plante samting. (Lev. 26:9, 10; Du 7:13; Sam 128:1-6) Eksampol, Dutronome 28:4 i talem se: “Bambae ol pikinini blong yu, ol frut long graon blong yu, ol pikinini blong ol animol blong yu, ol yang buluk mo sipsip blong yu, oli kasem blesing.” Hemia i kamtru long taem we boe blong Deved, Solomon i rul. Long taem ya, nesen blong Isrel i stap long pis mo oli gat plante samting. Rul blong Solomon i pija blong ol samting we bambae oli hapen taem Mesaea i rul.—1 Ki. 4:20, 21; Sam 72:1-20.
Mekem Hop Blong Yu i Stap Strong
16 Hop blong laef olwe hem i wan sas presen we God i givim. Yumi wantem tumas blong luk nambawan fiuja ya, we yumi sua se bambae i kamtru. Hop i olsem angka blong yumi, i mekem yumi stanap strong taem yumi fesem ol bigfala trabol, taem oli ronem mo kilim yumi, mo taem yumi fesem ded. Mo tu, hop i olsem wan hat blong faet, i protektem tingting blong yumi, nao yumi sakemaot ol samting we i rong, mo yumi gohed blong mekem samting we i stret. Hop ya we Baebol i givim, i halpem yumi blong save gud God, mo i soemaot se hem i lavem yumi tumas. Hop ya i givhan bigwan long yumi sipos yumi mekem se i stap strong, mo i klia gud long tingting blong yumi.
17 Long leta we aposol Pol i raetem long ol Kristin long Rom, hem i talem se: “Yufala i mas glad from we yufala i gat hop.” (Rom 12:12) Pol i glad from we hem i sua se sipos hem i stap holemstrong long God, bambae hem i kasem laef olwe long heven. Yumi tu, yumi save glad long hop blong yumi, from we yumi sua se Jehova bambae i mekem ol promes blong hem oli kamtru. Wan man blong raetem Ol Sam i talem se: “Man we . . . i glad, hem i putum hop blong hem long Jehova we i God blong hem, . . . Man ya we i stap holem promes blong hem oltaem.”—Sam 146:5, 6.
?Wanem Kaen Lav i Givim Trufala Glad?
19 Ol man oli safa blong 6,000 yia finis long wol blong Setan. Naoia long ol las dei, wol i fulap long ol man we oli tingbaot olgeta nomo, oli laekem mane tumas, mo oli laekem moa ol samting we oli save harem gud long hem. Oli tingbaot nomo ol samting we oli save kasem mo ol samting we oli wantem. !Be ol man olsem oli no glad! Baebol i tokbaot man we i glad se: ‘Jehova i God blong Jekob. Hem i mekem skae, mo graon, mo solwota, wetem olgeta samting we i stap long trifala, mo man we i putum tingting blong hem i stap long hem, hem bambae i harem gud.’—Ol Sam 146:5.
20 Ol man blong Jehova oli lavem hem tumas, mo evri yia, plante moa man oli kasem save long Jehova mo lavem hem. !Hemia i soemaot se Kingdom blong God i stap rul, mo i no longtaem bambae i givim ol blesing we oli bitim tingting blong yumi! Taem yumi mekem samting we Jehova i wantem, hem i glad, mo yumi tu yumi glad. !Ol man we oli lavem Jehova bambae oli glad gogo i no save finis! Long nekis stadi, bambae yumi tokbaot ol nogud fasin we oli kamaot taem man i tingbaot hem wan nomo. Mo bambae yumi luk olsem wanem ol fasin ya oli defren long ol gudfala fasin blong ol man blong Jehova.
Ol Gudgudfala Samting
it-1 111 ¶9
Animol
Baebol i talem bakegen mo bakegen se yumi mas mekem i gud long ol animol. Jehova hem wan i soemaot se hem i kea long ol animol mo i givim ol samting we oli nidim. (Pro 12:10; Sam 145:15, 16) Loa blong Moses i talem se ol man oli mas lukaot gud long ol animol blong olgeta. Loa i talem se sipos wan man i faenem animol blong narafala we i lus, hem i mas tekem i gobak long ona blong hem, o sipos animol blong wan man i foldaon from i karem wan hevi samting, man we i luk i mas givhan long hem. (Eks 23:4, 5) Man i no mas mekem i strong tumas long ol animol blong hem. (Du 22:10; 25:4) Long Sabat dei, ol animol tu oli mas spel. (Eks 20:10; 23:12; Du 5:14) Sipos wan animol i stap givim kil long ol man, ona blong hem i mas kontrolem animol ya o oli mas kilim animol ya i ded. (Je 9:5; Eks 21:28, 29) Mo tu, oli no mas mekem tu defren kaen animol i klaem long tufala.—Le 19:19.
10-16 FEBRUARI
OL SAS SAMTING LONG BAEBOL OL SAM 147-150
Yumi Gat Plante Risen Blong Presem Jah
‘!Presem Ja!’—?From Wanem?
5 Jehova i mekem neson blong Isrel i harem gud bakegen, be antap long samting ya, hem i mekem olgeta wanwan oli harem gud. I sem mak tede. Man we i raetem Sam 147 i talem se, Jehova “i stap mekem olgeta we oli harem nogud, oli harem gud bakegen, mo i stap fasem ol soa blong olgeta.” (Ol Sam 147:3) Taem yumi sik no tingting blong yumi i foldaon, Jehova i tingbaot yumi. Hem i wantem mekem yumi harem gud bakegen, olsem we hem i fasem ol soa blong yumi. (Ol Sam 34:18; Aesea 57:15) Hem i givim waes mo paoa, blong yumi save stanap strong, nomata wanem trabol yumi kasem.—Jemes 1:5.
6 Nao man blong raetem Sam ya i lukluk i go antap long skae, mo i talem se Jehova “i makem namba blong ol sta, mo i putum nem blong olgeta wanwan.” (Ol Sam 147:4) Man ya i luk ol sta, be hem i no save hamas sta oli stap. Tede, ol saentis oli talem se i gat plante bilian sta we yumi save luk. !Be i gat plante plante bilian sta bakegen we yumi no save luk! Ol man oli no save kaontem ol sta ya, be Jehova i save hamas sta i stap, mo i putum nem blong olgeta wanwan. (1 Korin 15:41) God ya we i save gud evri sta, i save gud yu tu. !Oltaem hem i save se yu stap wea, yu harem olsem wanem, mo i save ol samting we yu nidim!
‘!Presem Ja!’—?From Wanem?
7 Jehova i kasem save long ol problem blong yu, mo hem i gat paoa blong givhan long yu. (Ridim Ol Sam 147:5.) Maet yu harem se ol problem blong yu oli bigwan tumas mo yu no naf blong winim. God i save se yumi no naf blong mekem plante samting, “i stap tingbaot we yumi kamaot long asis nomo.” (Ol Sam 103:14) From we yumi sinman, yumi mekem ol semfala mastik bakegen mo bakegen, mo tingting blong yumi i save foldaon from. Yumi sore from ol nogud tok we yumi talem, no from yumi wantem mekem samting we i no stret, no from we yumi jalus. Nating se Jehova i no gat slak fasin, be hem i kasem save fulwan long filing blong yumi.—Aesea 40:28.
‘!Presem Ja!’—?From Wanem?
18 Man we i raetem Sam ya, i save se Jehova i jusum ol man Isrel bifo blong oli kam ol man blong hem. I no gat wan narafala neson we God i givim “tok blong hem” long olgeta, mo i eksplenem “ol rod blong hem” long olgeta. (Ridim Ol Sam 147:19, 20.) Tede, God i putum nem blong hem long yumi nomo. Hemia wan bigfala blesing. Mo tu, yumi glad tumas se yumi save hem, mo yumi gat Tok blong hem blong lidim yumi, mo yumi save fren gud wetem hem. Olsem man we i raetem Sam 147, yumi gat plante risen blong “!Presem Ja!” mo pulum ol narafala tu blong oli mekem olsem.
Ol Gudgudfala Samting
it-1 316
Pijin
Man blong raetem Sam i tokbaot ol “pijin we oli gat wing” se oli presem Jehova, (Sam 148:1, 10) from we Jehova i wokem olgeta long wan fasin we i spesel. Wan pijin i save gat 1,000 go kasem samwe 20,000 feta. Long medel blong wan feta i gat wan samting we i strong olsem wan bun, mo long saedsaed blong hem i gat plante handred branj we oli kamaot long hem. Long wanwan long ol branj ya, i gat plante handred smosmol branj bakegen we long en blong olgeta i gat ol smosmol samting we oli olsem ol huk. Long wan feta nomo we longfala blong hem i samwe 15 sentimeta, i save gat plante handred taosen smosmol branj mo plante milian smosmol huk. Jehova i wokem wing mo bodi blong ol pijin long wan fasin we i spesel, from we oli save flae spid mo oli no yusum tumas paoa blong olgeta. Hemia i gud moa i bitim ol plen we ol man oli wokem. Mo tu, i gat hol insaed long ol bun blong ol pijin we i mekem se ol pijin oli no hevi tumas. Taswe nating se longfala blong tufala wing blong wan pijin i kasem 2 meta, be hevi blong ol bun blong hem i samwe 110 gram nomo. Insaed long hol blong bun blong ol pijin we oli gat ol longlongfala wing, i gat ol samting we oli olsem tras blong wan haos. Ol tras ya oli sapotem ol wing blong hem olsem ol aean we oli sapotem ol wing blong wan plen.
17-23 FEBRUARI
OL SAS SAMTING LONG BAEBOL OL PROVEB 1
Ol Yangfala—?Bambae Yufala i Lesin Long Hu?
Yu No Letem Wan Samting i Tekemaot Praes Ya
16 Sipos yu wan yangfala, maet yu ting se papa mo mama blong yu i no kasem save long yu mo tufala i strong tumas. Maet yu kam kros, nao yu no moa save sipos yu wantem gohed blong wosipim Jehova. Be sipos yu lego Jehova, bambae yu luk se i no gat wan man long wol we i lavem yu olsem papa mo mama blong yu, mo ol brata mo sista long kongregesen.
17 Traem tingbaot: Sipos papa mo mama blong yu i neva stretem yu, ating bambae yu no save sipos tufala i kea long yu. (Hibrus 12:8) I tru se tufala i no stret gud, taswe maet fasin blong tufala blong stretem yu i mekem yu yu harem nogud. Be i nogud yu tingting tumas long samting ya. I moa gud yu stap kwaet, yu no kam kros, mo yu traem kasem save from wanem tufala i stretem yu. Baebol i talem se: ‘Man we i savegud ol samting we hem i stap mekem, hem i no save toktok tumas, i save stap kwaet. Man olsem i luksave mining blong ol had samting.’ (Ol Proveb 17:27) Traehad blong kam wan bigman long tingting blong yu, we yu lesin long advaes mo lanem samting, nating se man we i givim i strong lelebet. (Ol Proveb 1:8) Yu no mas fogetem se taem yu gat wan papa mo mama we i lavem Jehova, hemia i olsem wan presen we i sas we i sas. Tufala i wantem we yu kasem praes blong laef.
Holemtaet Ol Fasin We Oli Pruvum Se Yu Yu Kristin
11 Traehad blong mekem God i glad, i no ol man. Taem yumi joen wetem wan grup blong man, samting ya tu i soemaot se yumi hu. Hemia i gud nomo. Yumi evriwan i nidim ol fren, mo taem ol narafala oli wantem se yumi joen wetem olgeta, yumi haremgud. Taem yumi yangfala—mo biaen tu—ol fren oli save gat bigfala paoa long yumi, mekem se yumi wantem tumas blong folem fasin blong olgeta mo mekem olgeta oli glad. Be i no olgeta fren evriwan we oli wantem pulum yumi long gudfala rod. Samfala oli wantem nomo we yumi joenem olgeta long ol rabis fasin blong olgeta. (Ol Proveb 1:11-19) Taem wan Kristin i letem ol rabis fren oli pulum hem, klosap oltaem bambae hem i traem haedem se hem i wan Kristin. (Ol Sam 26:4) Aposol Pol i givim woning ya se: “Yufala i no mas letem fasin blong yufala i kam olsem fasin blong ol man long wol.” (Rom 12:2) Jeova i save givim paoa we yumi nidim blong stanap strong agensem ol rabis fren we oli traem pulum yumi blong folem olgeta.—Hibrus 13:6.
12 Taem yu luk se ol fren oli save spolem ol gudfala fasin we oli pruvum se yu yu Kristin, i gud blong rimemba se i moa impoten blong stap tru long God i bitim we yu folem tingting mo fasin blong bighaf blong ol man tede. Wan gudfala rul blong folem i stap long Eksodas 23:2: “Nating sipos bighaf blong ol man oli mekem samting we i no stret, . . . bambae yufala i no folem fasin blong olgeta.” Wan taem, bighaf blong ol man Isrel oli no moa gat strong tingting se Jeova i save mekem ol promes blong hem oli kamtru. Be Keleb i stanap strong, hem i no folem tingting blong ol man ya. Hem i trastem gud ol promes blong God, mo hem i kasem bigfala blesing from. (Namba 13:30; Josua 14:6-11) ?Olsem wanem long yu? ?Yu tu yu rere blong stanap strong agensem bighaf blong ol man, blong yu save holemtaet gudfala fasin fren we yu yu gat wetem God?
Ol Gudgudfala Samting
it-1 846
No Gat Hed
Taem Baebol i yusum tok ya “no gat hed,” hemia i no minim wan man we i no gat save, be i minim wan man we i no wantem lesin long ol gudfala advaes mo i jus blong mekem ol samting we God i no glad long hem. Long Hibru, i gat ol defdefren toktok blong tokbaot wan man olsem. Oli yusum tok ya kesilʹ we i minim ‘man we i stupid’ (Pro 1:22), ʼewilʹ we i minim “man we i no gat hed” (Pro 12:15), na·valʹ we i minim ‘man we i no tingting gud’ (Pro 17:7), mo lets we i minim “praod man” (Pro 13:1). Long Grik, tok ya aʹphron i minim ‘man we i no wantem save’ (Lu 12:20), a·noʹe·tos i minim ‘man we i no tingting gud’ (Ga 3:1), mo mo·rosʹ i minim “man we i no gat hed” o man we i “no waes” (Mt 23:17; 25:2).
24 FEBRUARI–2 MAJ
OL SAS SAMTING LONG BAEBOL OL PROVEB 2
?From Wanem i Gud Blong Putum Tingting Fulwan Long Prapa Stadi Blong Yu?
“Gohed Blong Wokbaot Long Trutok”
16 I no yumi evriwan we i laekem blong rid mo stadi. Be Jehova nao i askem blong yumi “gohed blong lukaotem” mo “gohed blong” traem kasemsave moa long trutok. (Ridim Ol Proveb 2:4-6.) Taem yumi traehad blong mekem olsem, oltaem i gat gudfala frut i kamaot from. Corey i talem se taem hem i stap mekem Baebol riding blong hem, hem i traem blong fokas long wanwan vas. Hem i eksplenem se: “Mi ridim evri futnot, mi lukluk ol kros refrens, mo mi mekem sam moa risej. . . . !Taem mi mekem olsem, mi lanem plante samting!” Nating se yumi yusum rod ya o narafala rod, be yumi soemaot se yumi tinghae long trutok taem yumi makemaot taem mo traehad blong stadi long hem.—Sam 1:1-3.
Trufala Waestok i Stap Singaot Bigwan
3 Fasin waes i min se yumi yusum save we yumi gat blong mekem ol gudfala desisen. Be mining blong trufala waes i bigwan moa. Baebol i talem se: “Fasin blong fraet long Jehova hem i stat blong waes, mo ol save long saed blong Man Ya We i Tabu We i Tabu, i mekem man i kasemsave samting.” (Prov. 9:10) Taswe taem yumi mekem wan impoten desisen, fastaem yumi sud faenemaot tingting blong Jehova, hemia “save . . . blong Man Ya We i Tabu We i Tabu.” Yumi faenemaot tingting blong Jehova taem yumi stadi Baebol mo ol buk we oli eksplenem Baebol. Taem yumi mekem olsem, yumi stap soemaot trufala waes.—Prov. 2:5-7.
4 Jehova nomo i save givim trufala waes. (Rom 16:27) ?From wanem yumi talem se hem i Stamba blong fasin waes? Faswan risen se, hem i Krieta, taswe hem i gat olgeta save long saed blong ol samting we hem i krietem. (Sam 104:24) Seken risen se, evri aksen blong Jehova i soemaot se hem i waes. (Rom 11:33) Nambatri risen se, oltaem waes advaes blong Jehova i givhan long olgeta we oli folem. (Prov. 2:10-12) Sipos yumi wantem kam waes, yumi mas akseptem ol stamba trutok ya, mo letem olgeta oli lidim yumi long ol desisen mo aksen we yumi mekem.
Ol Yangfala, Mekem Bilif i Strong Moa
2 Plante man tede oli no bilif se God i mekem yumi. Sipos yu yu wan yangfala Kristin we yu mekem wok blong Jehova no yu stap stadi, maet samtaem yu stap tingbaot olsem wanem blong pruvum se God nao i wokem olgeta samting. Baebol i givhan long yumi blong tingting gud long ol samting we yumi harem no ridim, mo blong yumi traem kasemsave long hem. Baebol i talem se: “Fasin ya we yu luksave ol samting mo we yu savegud ol mining blong hem, hem bambae i stap lukaot long yu.” ?Olsem wanem fasin ya i save lukaotgud long yu? Taem yu savegud mining blong ol samting, hemia bambae i givhan long yu blong blokem ol giaman tingting mo i mekem bilif blong yu i strong moa.—Ridim Ol Proveb 2:10-12.
3 Sipos yumi wantem se bilif blong yumi i strong, yumi mas savegud Jehova. (1 Timoti 2:4) Taswe, taem yu stadi long Baebol mo ol buk blong yumi, i impoten blong stop smol mo tingting dip long ol samting we yu stap ridim. Yu traem kasemsave long samting we yu stap ridim. (Matiu 13:23) Sipos yu folem fasin ya blong stadi, bambae yu faenem ol pruf we oli soemaot se Jehova i Man ya we i wokem olgeta samting mo Baebol i kamaot long hem. (Hibrus 11:1) I gud yumi tokbaot olsem wanem yumi save mekem olsem.
Ol Gudgudfala Samting
it-1 1211 ¶4
Holemstrong Long God
Man i no naf blong holemstrong long God long prapa paoa blong hem nomo, be hem i mas gat strong bilif mo trastem Jehova. (Sam 25:21) God i promes se bambae Hem i kam “wan sil” mo “wan strong ples blong haed” blong protektem olgeta we oli stap wokbaot folem rod we i stret. (Pro 2:6-8; 10:29; Sam 41:12) Ol man olsem oli tingbaot oltaem blong mekem Jehova i glad, mo hemia i givhan long olgeta blong oli gat wan gudfala laef mo gohed blong folem stret rod. (Sam 26:1-3; Pro 11:5; 28:18) I tru, samtaem ol gudfala man tu oli safa aninit long paoa blong ol rabis man mo oli ded tu wetem olgeta. Taem Job i luk samting ya, hem i harem nogud. Be Jehova i tinghae long laef blong ol gudfala man, mo i promes se long fiuja bambae oli gat pis mo oli kasem ol gudfala samting. (Job 9:20-22; Sam 37:18, 19, 37; 84:11; Pro 28:10) Stori blong Job i soemaot se samting we God i tinghae long hem, hemia fasin blong man blong holemstrong, be i no ol samting we man i gat. (Pro 19:1; 28:6) Wan man we i holemstrong long God i gat gudnem mo ol narafala oli respektem hem. Hemia i mekem se ol pikinini blong hem oli glad from we olgeta tu oli gat gudnem mo oli gat wan gudfala eksampol we oli save folem. (Pro 20:7)