LESEN 16
?Taem Jisas i Stap Long Wol, Hem i Mekem Wanem?
Plante man oli tingbaot Jisas olsem wan bebi, wan waes profet, o wan man we oli nilim hem blong i ded. Be, ?i gat sam moa samting we yumi save lanem long saed blong hem? Long lesen ya, bambae yumi tokbaot sam impoten samting we Jisas i bin mekem, mo olsem wanem ol samting ya oli save halpem yu.
1. ?Wanem men wok blong Jisas long wol?
Men wok blong Jisas i blong “talemaot gud nius blong Kingdom blong God.” (Ridim Luk 4:43.) Hem i talemaot se God bambae i stanemap wan kingdom, o gavman, we bambae i finisim evri problem.a Blong tri yia haf, Jisas i wok strong blong talemaot gudfala mesej ya long ol man.—Matiu 9:35.
2. ?From wanem Jisas i mekem ol merikel?
Baebol i talem se, God “i givim paoa long [Jisas] blong i mekem ol merikel mo ol samting blong sapraes mo ol saen.” (Ol Wok 2:22) Mo wetem paoa ya, Jisas i naf blong mekem plante samting olsem kontrolem weta, fidim plante taosen man, hilim ol sikman, mo mekem ol dedman oli laef bakegen. (Matiu 8:23-27; 14:15-21; Mak 6:56; Luk 7:11-17) Ol merikel blong Jisas oli pruvum se God i sanem hem. Mo tu, oli soem se Jehova i gat paoa blong finisim evri problem blong yumi.
3. ?Yumi save lanem wanem long ol fasin blong Jisas?
Jisas i obei long Jehova long evri situesen. (Ridim Jon 8:29.) Hem i mekem evri samting we Papa blong hem i askem, nating se ol man oli traem stopem hem. Hem i mekem olsem, go kasem we hem i ded. Mo hem i pruvum se i posibol blong ol man oli obei long God, nating se oli fesem sam hadtaem. Long rod ya, Jisas i “soem eksampol long [yumi] blong [yumi] folemgud trak blong leg blong hem.”—1 Pita 2:21.
DIGIM MOA
Makem olsem wanem Jisas i talemaot gud nius mo i mekem ol merikel.
4. Jisas i talemaot gud nius
Jisas i wokbaot plante handred kilometa long rod we i gat das, blong faenem moa man blong talemaot gud nius long olgeta. Ridim Luk 8:1, mo tokbaot ol kwestin ya:
?Jisas i prij nomo long ol man we oli kam blong lesin long hem?
?Jisas i mekem wanem blong faenem ol man?
God i bin talem finis se Mesaea bambae i talemaot gud nius. Ridim Aesea 61:1, 2, mo tokbaot ol kwestin ya:
?Olsem wanem Jisas i mekem profet tok ya i kamtru?
?Yu ting se ol man tede oli nidim blong harem gud nius ya?
5. Jisas i tijim ol impoten lesen
Jisas i talemaot gud nius blong Kingdom, mo antap long wok ya, hem i givim ol advaes we oli save givhan long yumi. Tingbaot sam eksampol we i stap long Toktok Blong Jisas Antap Long Hil. Ridim Matiu 6:14, 34 mo 7:12, mo tokbaot ol kwestin ya:
?Jisas i givim wanem advaes long ol vas ya?
?Yu ting se ol advaes ya oli save givhan long ol man tede?
6. Jisas i mekem ol merikel
Jehova i givim paoa long Jisas blong mekem plante merikel. Blong luk wan eksampol, ridim Mak 5:25-34 o plei VIDEO. Biaen tokbaot ol kwestin ya.
?Woman ya long video, i bilif long wanem?
?Yu yu laekem wanem long merikel ya?
Ridim Jon 5:36, mo tokbaot kwestin ya:
?Ol merikel we Jisas i mekem “oli witnes” o oli pruvum wanem long saed blong hem?
?Yu yu save?
Plante save long saed blong Jisas, i stap long ol fofala buk blong Baebol we oli kolem ol Gospel, hemia Matiu, Mak, Luk, mo Jon. Wanwan man blong raetem Gospel i fokas long ol defdefren samting long laef blong Jisas. Taem yumi ridim olgeta, yumi save moa long saed blong hem.
MATIU
i raetem Gospel blong hem fastaem. Hem i fokas long ol tijing blong Jisas, speseli tijing long saed blong Kingdom blong God.
MAK
i raetem Gospel we i sot moa. Hem i tokbaot ol intresting aksen we oli hapen.
LUK
i tokbaot moa ol prea mo fasin we Jisas i mekem long ol woman.
JON
i tokbaot moa ol fasin blong Jisas, hem i mekem olsem taem i raetem ol storian we Jisas i gat wetem ol gudfala fren blong hem mo ol narafala.
SAM MAN OLI SE: “Jisas i wan gudfala man, be hem i no Mesaea.”
?Wanem tingting blong yu?
SAMARI
Jisas i talemaot Kingdom blong God, i mekem ol merikel, mo i obei long Jehova long evri situesen.
Tingtingbak
?Wanem men wok blong Jisas taem hem i stap long wol?
?Ol merikel we Jisas i mekem oli pruvum wanem?
?Wanem ol advaes we Jisas i givim?
FAENEMAOT
?Wanem topik we Jisas i tokbaot moa?
“God’s Kingdom—What It Means to Jesus” (Wajtaoa, 1 Oktoba 2014)
Faenemaot from wanem yumi save sua se ol merikel blong Jisas oli rili hapen.
“Ol Merikel Blong Jisas—?Oli Tijim Yu Long Wanem Samting?” (Wajtaoa, 15 Julae 2004)
Faenemaot olsem wanem eksampol blong Jisas blong tingbaot narafala, i givhan long wan man.
Luk lis blong ol impoten samting we Jisas i mekem, folem stret oda blong olgeta.
“Ol Impoten Samting Long Laef Blong Jisas Long Wol” (Baebol Long Niu Wol Translesen, Apendiks A7)
a Lesen 31-33 bambae i tokbaot moa long saed blong Kingdom blong God.