Ol Gudfala Fasin We Kingdom i Leftemap​—Yumi Folem Stret Fasin Blong God

YU YU stap wokbaot long yad blong yu. Yu luk man ya we i stap long nekis yad, nao yu sakem han blong yu blong talem halo long hem. Hem i sakem han blong hem tu, mo i singaot yu yu kam. Yu tingbaot se long plante manis, man ya i stap wajem gud yu mo famle blong yu. Ale, hem i talem long yu se: “Mi luk se yufala i defren long ol narafala man. Mi harem oli talem se yufala i Witnes blong Jehova, ?i tru?” Yu ansa se: “Yes i tru.” Hem i gohed se: “Ol narafala skul oli mekem lafet long ol holide, oli joen long politik mo faet, mo oli smok. Be yufala i no olsem. Mo yufala i gat gudfala fasin insaed long famle. Mi wantem askem long yu se, ?From wanem yufala i defren long ol narafala?”

Yu yu save finis ansa blong kwestin ya: Yumi stap aninit long rul blong Kingdom blong God. Jisas, we i King blong yumi, i stap givhan long yumi blong yumi folem moa ol fasin blong hem. Taswe, yumi defren long ol man blong wol. Long haf ya, bambae yumi luk olsem wanem Kingdom ya i stap mekem ol man blong God oli kam klin long wosip mo fasin blong olgeta, mo i stap mekem ogenaesesen tu i klin moa. Ol samting ya i leftemap nem blong Jehova i go antap.