Folem Fasin Blong Jadok We i No Fraet

1-2. ?Hu ya Jadok? (1 Kronikel 12:​22, 26-28)

TRAEM pijarem taem ya. I gat wan bigfala grup we i gat bitim 340,000 man oli kam wanples blong mekem Deved i kam king blong ol man Isrel. Blong tri dei, i gat bigfala noes blong ol man we oli stap toktok, oli laf, mo oli stap singsing presem Jehova antap long ol hil klosap long Hebron. (1 Kron. 12:39) Be long medel blong bigfala grup ya, i gat wan man tu i stap we nem blong Jadok, we maet ol man oli no luksave. Be Jehova i wantem we yumi save se hem tu i stap long taem ya. (Ridim 1 Kronikel 12:​22, 26-28.) ?Hu ya Jadok?

² Jadok i wan pris we i wok wetem Hae Pris Abiata. Jadok tu i wan man blong luk vison, mo hem i naf blong kasemsave long wil blong Jehova. (2 Saml. 15:27) Ol man oli stap go luk Jadok taem oli nidim advaes. Mo tu, Jadok i wan man we i no fraet. Mo hemia nao gudfala fasin blong hem we bambae yumi tokbaot long stadi ya.

3. (1) ?From wanem ol man blong Jehova oli mas gat strong tingting mo no fraet? (2) ?Bambae yumi tokbaot wanem long stadi ya?

³ Long ol las dei ya, Setan bambae i traehad moa blong atakem ol man blong God. (1 Pita 5:8) Taswe, yumi mas gat strong tingting mo no fraet taem yumi stap wet blong Jehova i finisim Setan mo rabis sistem blong hem. (Sam 31:24) Naoia, i gud yumi tokbaot tri rod we yumi save folem fasin blong Jadok blong no fraet.

SAPOTEM KINGDOM BLONG GOD

4. ?From wanem ol man blong Jehova oli nidim strong tingting blong sapotem Kingdom blong God? (Mo tu, yu luk pija.)

⁴ Yumi ol man blong Jehova, yumi sapotem fulwan Kingdom blong God. Be plante taem yumi nidim strong tingting blong mekem olsem. (Mat. 6:33) Eksampol, long rabis wol ya yumi nidim strong tingting blong yumi save folem ol rul blong Jehova mo talemaot gud nius blong Kingdom. (1 Tes. 2:2) Mo plante taem i nidim strong tingting blong no joen long ol samting blong politik we i stap seraotem ol man tede. (Jon 18:36) Plante long ol man blong Jehova oli fesem problem long saed blong mane, ol man oli kilim olgeta, mo putum olgeta long kalabus from we oli no wantem joen long politik o joen long ami.

5. ?From wanem Jadok i nidim strong tingting?

⁵ Jadok i go long Hebron i no blong mekem lafet nomo from Deved i kam king. Be hem i karem ol tul blong faet blong hem tu mo i rere blong faet. (1 Kron. 12:38) Hem i glad blong folem Deved mo faet agensem ol enemi blong ol man Isrel. I luk olsem se Jadok i no gat gudhan blong faet, be hem i gat strong tingting mo i no fraet nating.

6. ?Olsem wanem Deved i wan gudfala eksampol long Jadok? (Ol Sam 138:3)

⁶ ?Olsem wanem wan pris olsem Jadok i lanem blong gat strong tingting mo no fraet? Hem i stap wetem ol man we oli gat strong tingting mo oli no fraet. Taswe, i sua se eksampol blong olgeta i givhan bigwan long hem. Eksampol, Deved i gat strong tingting mo i no fraet blong “lidim ol man Isrel oli go faet.” Taswe, hemia i pulum ol man Isrel blong oli sapotem hem fulwan. (1 Kron. 11:​1, 2) Oltaem Deved i dipen long Jehova blong i halpem hem blong faet agensem ol enemi blong hem. (Sam 28:7; ridim Ol Sam 138:3.) Mo i gat sam narafala man tu we oli olsem ol gudfala eksampol long Jadok. I gat Jehoeada, mo boe blong hem Benaea, wetem 22 lida blong ol traeb we oli sapotem gud Deved. (1 Kron. 11:​22-25; 12:​26-28) Ol man ya oli gat strong tingting blong sapotem Deved olsem king blong olgeta.

7. (1) ?Wanem ol eksampol tede we i save halpem yumi blong gat strong tingting? (2) Folem video, ?yu lanem wanem long eksampol blong Brata Nsilu?

⁷ Yumi save kasem paoa mo strong tingting taem yumi stadi gud long eksampol blong ol man we oli no fraet blong sapotem rul blong Jehova. King blong yumi Jisas Kraes, i gat strong tingting blong no joen long ol samting blong politik we i stap wol blong Setan. (Mat. 4:​8-11; Jon 6:​14, 15) Oltaem hem i dipen long Jehova blong i givim paoa long hem. Mo tu, i gat plante gudfala eksampol blong ol yang man tede we oli gat strong tingting blong no joen long ami o politik. I gud yumi tekem taem blong ridim ekspiriens blong olgeta long jw.org.a

GIVHAN LONG OL BRATA MO SISTA

8. ?Wetaem ol elda oli nidim strong tingting blong halpem ol brata mo sista?

⁸ Ol man blong Jehova oli laekem tumas blong givgivhan long olgeta. (2 Kor. 8:4) Be samtaem, i nidim strong tingting blong mekem olsem. Eksampol, taem i gat wan wo i hapen, ol elda oli luksave se i nidim blong leftemap tingting blong ol brata mo sista, sapotem olgeta, mo givim samting we oli nidim long bodi mo spirit. From we ol elda oli lavem ol brata mo sista ya, oli putum laef blong olgeta long denja blong givim samting we oli nidim. (Jon 15:​12, 13) Taem oli mekem olsem, oli stap folem eksampol blong Jadok blong gat strong tingting mo no fraet.

9. Folem 2 Samuel 15:​27-29, ?Deved i askem Jadok blong mekem wanem? (Mo tu, yu luk pija.)

⁹ Laef blong Deved i stap long denja. Boe blong hem Absalom i wantem kilim hem i ded mo kam king long ples blong hem. (2 Saml. 15:​12, 13) !Taswe, Deved i mas aot kwiktaem long Jerusalem! Ale, hem i singaot i go long ol man blong wok blong hem se: “!Yufala i girap mo yumi ronwe, from we i no gat wan long yumi i save ronwe long Absalom!” (2 Saml. 15:14) Be taem oli stap ronwe, Deved i luksave se wan long olgeta i mas stap blong i save gohed blong talemaot ol plan blong Absalom long hem. Taswe, hem i sanem Jadok mo ol narafala pris oli gobak long taon blong oli save givim ol ripot i go long hem. (Ridim 2 Samuel 15:​27-29.) Oli mas waes gud taem oli mekem wok ya, from samting we Deved i askem olgeta blong mekem i denja. Mo tu, oli save lusum laef blong olgeta from. !Traem tingbaot samting we i save hapen sipos Absalom, we i wan rabis man, mo i selfis, i faenemaot se Jadok mo ol narafala pris oli stap spae long hem blong protektem Deved!

10. ?Olsem wanem Jadok mo ol narafala pris oli protektem Deved?

¹⁰ Deved i mekem wan plan mo i askem Husae we i wan narafala fren blong hem mo Jadok, blong tufala i folem plan ya. (2 Saml. 15:​32-37) Husae i folem plan ya. Hem i mekem se Absalom i trastem hem mo i givim advaes blong i gat wan grup blong ami oli agensem Deved, mo hemia i givim taem blong Deved i rerem hem from faet ya. Biaen, Husae i talemaot plan ya long Jadok mo Abiata. (2 Saml. 17:​8-16) Ale, tufala man ya i sanem mesej i go long Deved. (2 Saml. 17:17) Wetem help blong Jehova, Jadok mo ol narafala pris oli mekem wan impoten wok, hemia blong protektem laef blong Deved.—2 Saml. 17:​21, 22.

11. Taem yumi stap halpem ol brata mo sista, ?olsem wanem yumi save folem fasin blong Jadok blong gat strong tingting mo no fraet?

¹¹ Sipos oli askem yumi blong givhan long ol brata mo sista long wan taem we i denja, ?olsem wanem yumi save soemaot se yumi no fraet mo yumi gat strong tingting olsem Jadok? (1) Folem gud advaes we yumi kasem. Long ol taem olsem, i impoten we yumi joen gud tugeta. Mo folem gud ol advaes we yumi kasem long branj ofis. (Hib. 13:17) Oltaem ol elda oli mas lukluk bakegen long ol samting we ol brata mo sista oli mas mekem bifo long wan disasta, o long taem we disasta i stap hapen. (1 Kor. 14:​33, 40) (2) Yumi mas gat strong tingting be yumi lukaotgud tu. (Prov. 22:3) Yumi mas yusum gud tingting blong yumi. Mo yumi no mekem samting olbaot. (3) Dipen long Jehova. Tingbaot se Jehova i wantem tumas se yu mo ol brata mo sista, yufala i stap sef. Taswe, hem i save halpem yu taem yu stap givhan long ol brata mo sista blong oli stap sef.

12-13. ?Yu lanem wanem long ekspiriens blong Viktor mo Vitalii? (Mo tu, yu luk pija.)

¹² Traem tingbaot tufala brata ya Viktor mo Vitalii, we tufala i stap givimaot ol kakae mo wota long ol brata mo sista long Yukren. Viktor i talem se: “Mitufala i lukaot kakae long evri ples. Mo plante taem mitufala i harem ol man oli stap sut long masket klosap long mitufala. Be biaen, wan brata i tekem ol kakae we hem i bin putumgud i stap, mo i givim long mitufala. Taem mitufala i stap putum ol kakae ya long trak, wan bom i foldaon samwe 20 meta longwe long mitufala. Long dei ya, mi askem long Jehova blong i givhan long mi blong gat strong tingting blong mi gohed blong halpem ol brata mo sista. Mo ol kakae we brata ya i givim, i givhan long plante pablisa blong sam taem.”

¹³ Vitalii i talem se: “Faswan trip we mi mekem, i tekem 12 aoa. Taswe, long ful trip ya mi prea long Jehova blong i givim strong tingting long mi.” Vitalii i gat strong tingting be hem i lukaot gud tu. Hem i gohed i se: “Mi gohed blong askem long Jehova blong i mekem se mi waes mo mi tingting gud. Mi draev nomo long ol rod we gavman i talem blong ol man oli folem. Mi glad tumas taem mi luk we ol brata mo sista oli wok gud tugeta. Oli tekemaot ol samting we i blokem rod, oli givhan long mitufala blong putum ol kakae, klos, mo ol narafala samting long trak, mo oli givim kakae mo dring long mitufala, mo oli letem mitufala i save slip long haos blong olgeta.”

GOHED BLONG HOLEMSTRONG LONG JEHOVA

14. ?Yumi save gat wanem filing sipos wan we yumi lavem hem i lego Jehova?

¹⁴ Sam long ol traem we yumi fesem, oli save mekem yumi harem nogud moa i bitim we yumi harem nogud from wan famle o wan gudfala fren we i lego Jehova. (Sam 78:40; Prov. 24:10) Taem yumi fren gud moa wetem man ya, bambae i had moa blong yumi stanap strong long traem ya. Sipos yu bin fesem wan samting olsem finis, eksampol blong Jadok blong holemstrong long Jehova i save halpem yu blong stanap strong.

15. ?From wanem Jadok i nidim strong tingting blong i save gohed blong holemstrong long Jehova? (1 King 1:​5-8)

¹⁵ Jadok i gohed blong holemstrong long Jehova taem gudfala fren blong hem Abiata i jusum blong lego olgeta. Hemia i hapen long en blong rul blong Deved. Taem Deved i stap ledaon long bed blong hem we klosap i ded, boe blong hem Adonaejah i traehad blong kam king, nating se Jehova i promes se Solomon nao bambae i kam king. (1 Kron. 22:​9, 10) Abiata i jusum blong sapotem Adonaejah. (Ridim 1 King 1:​5-8.) Taem hem i mekem olsem, hem i soemaot se hem i no holemstrong long Deved mo long Jehova tu. I sua se Jadok i harem nogud tumas from we hem mo Abiata i bin wok tugeta olsem ol pris blong bitim 40 yia. (2 Saml. 8:17) Tufala i bin wok tugeta blong lukoat long “Bokis blong tru God.” (2 Saml. 15:29) Mo fastaem, tufala tugeta i sapotem gud rul blong Deved, mo tufala i mekem plante moa samting.—2 Saml. 19:​11-14.

16. ?Wanem i halpem Jadok blong i gohed blong holemstrong long Jehova?

¹⁶ Jadok i gohed blong holemstrong long Jehova nating se Abiata i jusum blong lego Jehova. Deved i trastem fulwan se Jadok bambae i neva lego hem. Taem rabis plan blong Adonaejah i kamaot long klia ples, Deved i askem Jadok, Natan, mo Benaea blong oli makemaot Solomon i kam king. (1 King 1:​32-34) From we Jadok i stap wetem ol gudfala man we oli wosipim Jehova, olsem Natan mo ol narafala man we oli sapotem King Deved, hemia i mekem hem i harem gud mo i leftemap tingting blong hem. (1 King 1:​38, 39) Taem Solomon i kam king, hem i “putumap Jadok blong i kam pris long ples blong Abiata.”—1 King 2:35.

17. ?Sipos wan we yu lavem hem i lego Jehova, olsem wanem yu save folem fasin blong Jadok?

¹⁷ ?Olsem wanem yu save folem fasin blong Jadok? Sipos wan we yu lavem hem i jusum blong lego Jehova, i gud yu soemaot klia se yu holemstrong long Jehova. (Jos. 24:15) Jehova bambae i givim paoa mo strong tingting blong yu mekem samting we i stret. Dipen long hem tru long prea, mo stap klosap long ol gudfala fren we oli holemstrong long hem. Jehova i glad tumas taem i luk we yu holemstrong long hem, mo bambae hem i blesem yu from.—2 Saml. 22:26.

18. ?Yu lanem wanem long ekspiriens blong Marco mo Sidse?

¹⁸ Traem tingbaot eksampol blong Marco mo waef blong hem Sidse, we tufala gel blong tufala i lego trutok. Marco i talem se: “Long dei we ol pikinini blong yu oli bon, yu lavem olgeta tumas. Mo bambae yu mekem eni samting blong lukaot gud long olgeta. Taswe, taem oli jusum blong lego Jehova, hemia i brekem hat blong yu. Be Jehova i stap long saed blong mitufala. Hem i meksua se taem mi harem nogud, waef blong mi leftemap tingting blong mi, mo taem hem i harem nogud, mi mi leftemap tingting blong hem.” Sidse i talem se: “Bambae mitufala i no naf blong stanap strong sipos Jehova i no bin givim paoa we mitufala i nidim. Plante taem, mi harem olsem se hemia i fol blong mi, mo mi talemaot filing blong mi long Jehova. Sam dei afta, taem mi go long Haos Kingdom, wan sista we mi no luk hem blong plante yia, i kam long mi, i putum han blong hem i goraon long solda blong mi, i lukluk mi mo i talem se, ‘!Tingbaot Sidse, hemia i no fol blong yu!’ Yes, wetem help blong Jehova, mi naf blong gohed long wok blong hem we mi glad nomo.”

19. ?Yu gat strong tingting blong mekem wanem?

¹⁹ Jehova i wantem se evri man we i wosipim hem oli no fraet mo gat strong tingting olsem Jadok. (2 Tim. 1:7) Mo tu, hem i no wantem we yumi dipen long prapa paoa blong yumi, be yumi dipen long hem. Taswe, taem yu fesem wan situesen we yu nidim strong tingting, i gud yu lukluk i go long Jehova. !Yu save sua se hem bambae i mekem se yu no fraet mo yu gat strong tingting olsem Jadok!—1 Pita 5:10.