Ol Proveb 17:17—“Wan Fren i Lavem Yu Oltaem”

Mining blong Ol Proveb 17:17

Wan tru fren, hem i wan we yu save trastem mo dipen long hem. Hem i olsem wan stret brata o sista from we hem i kea long yu mo i no lego yu, speseli long taem blong trabol.

“Wan tru fren i soemaot lav oltaem.” Narafala rod blong tanem ol tok ya, hemia se “ol fren oli soemaot oltaem se oli lavem yu.” Hibru tok we i minim “lav” o “lavem” i no wan filing nomo. Hemia kaen lav ya we yu tingbaot narafala fastaem long yu wan mo yu soemaot samting ya long ol aksen blong yu. (1 Korin 13:4-7) Kaen lav ya i mekem se ol fren oli no lego olgeta taem oli fesem hadtaem long laef, o wan i no kasem save gud long tingting blong narawan. Mo tu, oli rere oltaem blong fofogivim olgeta. (Ol Proveb 10:12) Wan i no jalus long narawan taem wan gudfala samting i hapen long hem, be hem i glad tumas.—Rom 12:15.

“Wan tru fren . . . i wan brata we i kamtru long yu long taem blong trabol.” Proveb ya i stanap long trutok ya se ol stret brata mo sista oli laeklaekem olgeta tumas. Taswe taem yumi mekem bes blong yumi blong halpem wan fren we i stap gotru long hadtaem, yumi mekem fasin olsem wan stret brata o sista. Mo tu, taem wan problem i kamaot bitwin long ol tru fren, hemia i no mekem se oli no moa fren, be i mekem se oli fren moa, from we lav mo respek blong olgeta i kam strong moa.

Ol vas raonabaot long Ol Proveb 17:17

Long buk blong Ol Proveb, i gat ol waes tok mo advaes we oli raetem olsem ol naes vas, blong pulum tingting blong man we i ridim. King Solomon i raetem bighaf blong Ol Proveb ya. Hem i raetem long sem fasin olsem oli raetem ol naes vas long Hibru. Hem i no raetem olsem we saon blong wod long en blong wan laen i sem mak long saon blong wod long en blong narafala laen. Be hem i yusum fasin ya we las haf blong vas i ademap sam moa save blong makem gud tingting long fas haf blong vas, olsem long Ol Proveb 17:17. Sipos no, hem i yusum fasin ya we las haf blong vas i defren olgeta long fas haf, olsem Ol Proveb 18:24 we i talem se: “I gat sam fren we oli rere nomo blong spolem ol fren blong olgeta bakegen, be i gat wan fren we i klosap moa long yu i winim ol brata blong yu.”

Taem Solomon i raetem Ol Proveb 17:17, maet hem i stap tingbaot olsem wanem papa blong hem Deved i fren gud wetem Jonatan, we i boe blong King Sol. (1 Samuel 13:16; 18:1; 19:1-3; 20:30-34, 41, 42; 23:16-18) Deved mo Jonatan tufala i no famle, be tufala i fren moa i bitim tu stret brata. Jonatan i rere blong ded from yangfala fren blong hem.a

Ol Proveb 17:17 Long Sam Narafala Baebol

“Wan fren i soemaot lav oltaem, mo i kam wan brata long taem blong trabol.”—The Bible in Basic English.

“Wan fren i stap wan fren oltaem, hem i wan brata long taem blong trabol.”—The Moffatt Translation of the Bible.

“Wan fren i soemaot oltaem se hem i fren blong yu—wan brata [olsem] i bon blong givhan long yu long taem blong trabol.”—The Complete Jewish Study Bible.

Wajem sot video ya blong luk samting we buk blong Ol Proveb i tokbaot.