Klosap long Babel, i gat wan taon we nem blong hem Uru. Long ples ya, ol man oli wosipim plante giaman god. Be i gat wan man long Uru we i wosipim Jehova nomo, nem blong hem Ebraham.

Jehova i talem long Ebraham se: ‘Yu aot long ples blong yu mo long ol famle blong yu, yu go long ples we mi bae mi soem long yu.’ Mo God i promes se: ‘Bae mi mekem wan bigfala nesen i kamaot biaen long yu, mo from yu nao bae mi mekem i gud long olgeta man long wol.’

Ebraham i no save ples ya we Jehova bambae i soemaot long hem, be hem i trastem Jehova. Ale Ebraham mo woman blong hem Sera, wetem papa blong hem Tera, mo Lot we i boe blong brata blong Ebraham, oli obei long Jehova. Oli fulumap olting blong olgeta mo oli stat blong wokbaot.

Ebraham i gat 75 yia taem oli kamtru long kantri ya Kenan, we Jehova i soem long olgeta. Nao God i toktok bakegen long Ebraham, mo i promes se: ‘Olgeta graon ya we yu yu luk, bae mi givim long ol pikinini blong yu.’ Be Ebraham mo Sera tufala i olfala finis, mo tufala i no gat pikinini. ?Taswe, olsem wanem Jehova bambae i mekem promes ya i kamtru?

Ebraham mo Sera tufala i mared plante yia finis. Tufala i lego gudfala haos blong tufala long Uru, mo tufala i laef long ol haos tapolen nomo. Be Sera i no komplen, from we hem i save se sipos hem i obei long Jehova, bambae hem i kasem blesing.

Sera i wantem tumas blong gat wan pikinini, ale hem i talem long Ebraham se: ‘Sipos woman slef blong mi Hega i gat wan pikinini, bae i olsem pikinini blong mi nomo.’ Biaen, Hega i gat wan pikinini boe, nem blong hem Ismael.

Plante yia biaen, taem Ebraham i gat 99 yia mo Sera i gat 89 yia, tri man i kam luk tufala. Ebraham i talem long trifala blong trifala i spel fastaem long sed blong wan tri, mo hem i givim kakae long trifala. ?Yu save hu ya trifala man ya? !Oli ol enjel! Trifala i talem long Ebraham se: ‘Nekis yia, long sem taem olsem, bae yu mo Sera i gat wan pikinini boe.’ Sera i stap insaed, mo i stap lesin. Hem i laf smosmol mo i tingbaot se: ‘Mi mi olfala finis. ?Olsem wanem bae mi gat wan pikinini?’

Wan yia biaen, Sera i bonem wan pikinini boe, olsem enjel blong Jehova i promes. Ebraham i putum nem blong hem se Aesak, we i min se “Laf.”

Taem Aesak i gat faef yia, Sera i luk we Ismael i stap jikim hem. Hem i wantem lukaot gud long pikinini blong hem, ale hem i askem long Ebraham blong i sanemaot Hega mo Ismael. Ebraham i no wantem mekem olsem, be Jehova i talem long hem se: ‘Yu lesin long Sera. Mi bae mi lukaot long Ismael, be ol promes blong mi bae oli kamtru long Aesak.’