Lot i stap wetem Ebraham we i brata blong papa blong hem, long kantri ya Kenan. Sloslo, ol buluk, ol sipsip, mo ol nani blong tufala oli kam plante we i plante, nao ples blong olgeta i smol. Ale Ebraham i talem long Lot se: ‘Yumitu no moa save stap wanples. Plis, yu jusum weples yu wantem go long hem, mo mi bae mi tekem narafala ples.’ Ebraham i tingbaot Lot fastaem. !I gud a!

Lot i luk wan gudfala ples klosap long taon ya Sodom. Long ples ya i gat plante wota mo gras. Ale hem i jusum ples ya, mo hem wetem famle blong hem oli muv i go long hem.

Ol man long tufala taon ya Sodom mo Gomora, oli nogud tumas. Taswe, Jehova i wantem spolem tufala, be hem i wantem sevem Lot mo famle blong hem. Ale hem i sanem tu enjel i go blong talem long Lot se: ‘Jehova bae i spolem taon ya. !Yu kamaot! !Yu hariap!’

Lot i no aot kwik, hem i stap tektaem. Nao tufala enjel ya oli holem han blong Lot mo woman blong hem mo tufala gel blong tufala, mo oli pulum olgeta oli go afsaed long taon. Nao oli talem se: ‘!Yufala i spid! Yufala i resis blong sevem laef blong yufala, mo yufala i no lukluk i gobak biaen. !Sipos yufala i lukbak, bambae yufala i ded!’

Taem oli kamtru long taon ya Joa, Jehova i mekem faea mo salfa i folfoldaon olsem ren long Sodom mo Gomora. Hem i spolem gud tufala taon ya. Woman blong Lot i no obei long Jehova, hem i lukluk i gobak biaen. Taem hem i mekem olsem, sol i folfoldaon long hem, nao hem i kam strong olsem ston. Be Lot mo tufala gel blong hem, trifala i sef from we trifala i obei long Jehova. Ating trifala i harem nogud taem mama blong olgeta i no obei. Be trifala i glad se trifala i lesin long Jehova.

Ebraham i tijim Aesak blong i lavem Jehova mo i trastem ol promes blong hem. Be taem Aesak i gat 25 yia, Jehova i askem long Ebraham blong i mekem wan samting we i had we i had. ?Wanem samting ya?

God i talem se: ‘Plis, yu tekem pikinini blong yu i go long wan hil long ples ya Moria, mo yu kilim hem blong mekem sakrefaes.’ Ebraham i no save nating from wanem Jehova i askem long hem blong i mekem olsem. Be hem i obei nomo.

Long nekis dei, long eli moning, Ebraham i tekem Aesak mo tufala man blong wok blong hem, nao oli aot blong wokbaot i go long ples ya Moria. Afta we oli wokbaot blong tri dei, oli luk ol hil oli stap longwe. Nao Ebraham i talem long tufala man blong wok blong hem blong tufala i wet long ples ya fastaem, be hem wetem Aesak bambae tufala i go mekem sakrefaes. Ebraham i tekem wan naef, mo i givim faeawud long Aesak blong i karem. Aesak i askem long papa blong hem se: ‘?Wehem sipsip blong mekem sakrefaes?’ Ebraham i ansa se: ‘Boe blong mi, Jehova nomo bambae i givim.’

Taem tufala i kasem hil ya, tufala i wokem wan olta. Nao Ebraham i fasem tufala han mo tufala leg blong Aesak, mo i putum hem antap long olta.

Nao Ebraham i holem naef blong hem. Stret long taem ya, wan enjel blong Jehova we i stap long heven i singaot long hem se: ‘!Ebraham! !Yu no kilim boe ya! Naoia mi save se yu yu bilif long God, from we yu rere nomo blong kilim pikinini blong yu blong mekem sakrefaes.’ Nao Ebraham i luk wan man sipsip we hon blong hem i fas long han blong wan smol tri. Kwiktaem nomo, hem i tekemaot rop we i fasem Aesak, mo i kilim man sipsip ya blong mekem sakrefaes.

Stat long taem ya, Jehova i singaot Ebraham se fren blong hem. ?Yu save from wanem? From we Ebraham i mekem evri samting we Jehova i askem, nating se hem i no kasem save from wanem Jehova i askem long hem.

Nao Jehova i talem promes blong hem bakegen long Ebraham, i se: ‘Bae mi blesem yu, mo mi mekem se yu yu gat plante pikinini.’ Hemia i min se Jehova bambae i yusum laen blong Ebraham blong blesem ol gudfala man.