?Yu Stap Folem Jeova Fulwan?

“OL STRET man oli olsem wan yangfala laeon we i gat strong tingting.” (Proveb 28:1) Ol stret man ya oli soem bilif, oli dipen nomo long Tok blong God, mo oli strong blong gohed long wok blong Jeova long taem blong trabol.

Taem ol man Isrel oli stap long Sinae, hemia afta we God i tekemaot olgeta long kalabus long Ijip long ol yia bitwin 1600 B.K.T mo 1500 B.K.T., i gat tu man nomo we tufala i soem se tufala i gat strong tingting olsem ol laeon. Tufala i soem se tufala i holemstrong bilif long Jeova long taem blong trabol. Wan hem i Josua laen blong Efrem, we hem i stap givhan long Moses mo biaen Moses i putumap hem blong tekem ples blong hem. (Eksodas 33:11; Namba 13:​8, 16; Dutronome 34:9; Josua 1:​1, 2) Narafala hem i Kaleb, pikinini blong Jefune we i kam long laen blong Juda.​—Namba 13:6; 32:12.

Kaleb i holemstrong mo i gat strong tingting blong mekem wil blong Jeova. Longfala laef we hem i spenem long wok blong God i mekem se hem i save talem se hem i bin ‘folem Jeova fulwan.’ (Josua 14:8) “Mi mi stap holemstrong fulwan long MASTA, God blong mi,” (The New American Bible). Kaleb “i stap obei,” no hem i “stap holemstrong blong mekem plan blong,” Jeova God. (Today’s English Version; The New English Bible) Blong talem long narafala fasin, Kaleb i talem se: “Mi mi . . . folem MASTA God blong mi wetem fulhat blong mi.” (New International Version) ?Olsem wanem long yu? ?Yu yu folem Jeova fulwan?

Mekem Spae long Kantri Ya

Tingbaot se yu stap long medel blong ol man Isrel i no longtaem afta we Jeova i mekem olgeta oli fri long wok slef long ol man Ijip. Yu luk we profet Moses i folemgud ol advaes we God i givim. Yes, mo makem bilif blong Kaleb se Jeova i stap wetem ol man blong Hem.

Hem i long namba tu yia afta we oli mekem longfala trep (Eksodas) aot long Ijip, mo ol man Isrel oli stap slip long haos tapolen long Kades-Banea hemia long drae ples blong Paran. Oli stanap long ples we i seraotem Promes Lan. God i givim oda, nao Moses i rere blong sanem 12 man blong spae i go insaed long Kenan. Hem i talem se: “Yufala i mas go long Negeb, mo yufala i mas go long ol hil. Mo yufala i mas go luk se kantri ya mo ol man blong hem oli olsem wanem, oli strong no oli no strong, oli plante no oli no plante; mo ples ya we oli stap laef long hem, hem i gudfala ples no no gat, mo luk olsem wanem long ol taon we oli stap laef long hem, oli stap long ol haos tapolen no ol ston wol oli blokem olgeta; mo olsem wanem long kantri, ol anamol oli fatfat no oli bunbun, i gat ol tri no i no gat. Mo yu mas gat strong tingting mo tekem sam frut we oli stap long kantri ya.”​—Namba 13:​17-20.

Ol 12 man ya oli statem had trep ya blong olgeta. Trep blong olgeta i tekem 40 dei. Long Hebron, oli luk sam man we oli gat bigfala bodi. Long vale ya blong Eskol, oli luk plante frut we graon ya i givim mo oli tekem sam frut blong gobak wetem. !Wan han blong ol frut ya grep i hevi tumas mekem se oli mas hangem long wan stik blong tu man i karem!​—Namba 13:​21-25.

Taem ol spae oli kambak long ples blong slip blong ol man Isrel, oli talem se: “Mifala i go insaed long kantri ya we yu sanem mifala i go long hem, mo i tru ya hem i fulap long melek mo hani, mo hemia frut we i gru long hem. Be, blong talem stret se ol man we oli stap laef long kantri ya oli strong, mo ol taon blong olgeta oli bigwan tumas; mo tu, mifala i luk ol bigbigfala man we oli kam long laen blong Anak. Ol man Amalekaet oli stap long ples ya Negeb, mo ol man Hitaet mo ol man Jebusaet mo ol man Amoraet oli stap long ol hil, mo ol man Kenan oli stap kolosap long solwora mo kolosap long reva Jodan.” (Namba 13:​26-29) I gat ten spae oli no rere blong akseptem oda blong God blong go insaed long Promes Lan.

“Jeova I Stap Wetem Yumi”

Be wetem bilif long Jeova God, Kaleb, spae ya we i no fraet i talem se: “Yumi go, mo bambae yumi save tekem kantri ya, from we yumi save winim.” Be ol ten spae oli no agri, oli talem se ol man Kenan oli strong moa long ol man Isrel. Ol spae ya we oli fraet mo oli no gat bilif oli ting se oli olsem lokis nomo long fored blong ol man Kenan.​—Namba 13:​30-33.

Kaleb mo Josua tufala i talem long olgeta se, “Jeova i stap wetem yumi. Yufala i no mas fraet long olgeta.” Oli no wantem lesin long ol tok blong tufala. Taem ol man ya oli talem se bambae oli stonem tufala, God i blokem mo i talem tok panis long ol man ya blong toktok agens, se: “Bambae yufala i no go insaed long kantri ya we mi bin mekem promes blong mi i stap wetem yufala long hem, be Kaleb pikinini boe blong Jefune mo Josua pikinini boe blong Nun. Mo ol smol pikinini blong yufala . . . bambae mi tekem olgeta i go insaed, mo bambae oli rili save kantri ya we yufala i no wantem. . . . Mo ol pikinini boe blong yufala bambae oli kam man blong lukaot long sipsip fote yia long drae ples, . . . go go kasem we yufala evriwan i ded long drae ples ya. Long namba blong dei we yufala i tekem blong spae long kantri ya, fote dei, wan dei i blong wan yia, wan dei i blong wan yia, bambae yufala i ansa from sin blong yufala fote yia.”​—Namba 14:​9, 30-34.

Holemstrong Yet long Sam Yia Biaen

Panis blong 40 yia i gohed, mo ol man blong toktok agens oli ded evriwan. Be Kaleb mo Josua tufala i stap holemstrong yet long God. Long flat ples ya blong Moab, Moses mo Hae Pris Eleasara tufala i kaontem ol man blong faet we oli gat 20 yia mo i go antap. Long wanwan laen blong Isrel, God i talem nem blong wanwan man we bambae i kasem haf long pis graon blong Promes Lan. Nem blong Kaleb, Josua, mo Eleasara oli stap tu. (Namba 34:​17-29) Nating se naoia hem i gat 79 yia, bodi blong Kaleb i strong yet, hem i holemstrong, mo hem i gat strong tingting.

Taem Moses mo Eron tufala i kaontem ol man long Sinae jes bifo we oli bin fraet mo oli no wantem go insaed long kantri ya Kenan, namba blong ol man blong faet blong Isrel i kasem 603,550 man. Afta fote yia long drae ples, i gat 601,730 man blong ami nomo. (Namba 1:​44-46; 26:51) Nating se i olsem, Josua we i lidim olgeta mo man blong bilif ya Kaleb i wan bigman tu insaed long ami, ol man Isrel oli go insaed long Promes Lan mo haremgud long ol faet we oli stap winim. Olsem we Josua mo Kaleb tufala i stap tingbaot oltaem se, Jeova nao i stap winim ol faet ya long ol man blong Hem.

Taem oli gokros long Reva Jodan wetem ol man blong faet blong Isrel, olfala Josua mo Kaleb tufala i mekem bigfala wok blong lukaot long ol faet. Be afta sikis yia blong faet, i gat plante graon we i stap blong oli tekem. Jeova bambae i ronemaot ol man we oli stap laef long olgeta be naoia hem i talem se oli mas seraot kantri ya long ol wanwan laen blong Isrel.​—Josua 13:​1-7.

Hem i Folem Jeova Fulwan

Olsem wan man we i gat ekspiryens long plante faet, Kaleb i stanap fored long Josua mo i talem se: “Mi gat fote yia taem Moses man blong Jeova i sanem mi mi aot long Kades-Banea blong spae long kantri ya, mo mi gobak mi talem ol tok olsem we i stap long hat blong mi. Mo ol brata blong mi we oli go wetem mi oli mekem ol man oli fraet long hat blong olgeta, be mi mi folem Jeova God blong mi fulwan.” (Josua 14:​6-8) Yes, Kaleb i bin folem Jeova fulwan, i holemstrong blong mekem wil blong God.

Kaleb i gohed i se, “From samting ya, Moses i promes long dei ya, se, ‘Ples we bambae yu purumbut long hem, bambae i kam ples blong yu mo ol pikinini blong yu’ olsem prapa ples blong yu gogo i no save finis, from we yu yu folem Jeova God blong mi fulwan.’ Mo naoia Jeova i mekem se mi stap laef yet, olsem we hem i promes, fotefaef yia stat long taem ya we Jeova i mekem promes ya long Moses taem Isrel i stap wokbaot long drae ples, mo naoia mi gat eitefaef yia. Tede mi mi strong yet, mi strong olsem long dei ya we Moses i sanem mi blong kam long ples ya. Olsem paoa blong mi long taem ya, naoia mi gat paoa ya blong faet, blong goaot mo tu blong kam insaed. Mo naoia givim teritori ya long hil we Jeova i bin mekem promes long dei ya bifo long mi, from yu wan yu harem se i gat ol bigbigfala man (Anakim) oli stap long ples ya mo ol bigfala strong taon. Bambae Jeova i stap wetem mi, mo bambae mi ronemaot olgeta, olsem we Jeova i bin promes.” Nao Kaleb i tekem Hebron olsem prapa ples blong hem.​—Josua 14:​9-15.

Olfala Kaleb i kasem wan ples we i strong moa i winim ol narafala ples​—wan teritori we i fulap long ol bigbigfala man. Be hemia i no hadwok tumas long Kaleb man ya blong faet we i gat 85 yia. Biaen hem i winim ol bigbigfala man we oli stap laef long Hebron. Otniel, pikinini boe blong yangfala brata blong Kaleb mo hem i wan jaj long Isrel, i winim ples ya Debir. Biaen ol Livaet oli laef long tufala taon ya, mo Hebron i kam wan taon blong man we i kilim man long akseden i save ron blong haed long hem.​—Josua 15:​13-19; 21:​3, 11-16; Jajes 1:​9-15, 20.

Folem Jeova Fulwan Oltaem

Kaleb mo Josua tufala i no stretgud olgeta. Be, tufala i holemstrong blong mekem wil blong Jeova. Bilif blong tufala i no kam slak long ol 40 yia we oli stap kasem hadtaem long drae ples we i kamaot from Isrel i no obei long God. Sem mak, ol man blong Jeova tede oli no letem samting i blokem olgeta long wok we oli mekem blong presem God. Oli luksave se wan faet i kamaot bitwin ogenaesesen blong God mo ogenaesesen blong Devel Setan, taswe oli holemstrong, oli wok tugeta blong mekem Papa blong olgeta long heven i glad long evri samting we oli mekem.

Eksampel, plante long ol man blong Jeova oli traehad blong mekem lafet blong Kakae blong Masta, no Memoriol blong ded blong Jisas Kraes, nating se ol man oli wantem spolem olgeta no kilim olgeta i ded. (1 Korin 11:​23-26) Long saed ya wan Kristin woman we i stap kalabus hem wan long wan nogud kalabus blong Nasi long taem blong Namba Tu Bigfala Faet Blong Wol, i talem se:

“Plan se evriwan i mas stap long ples blong wasem klos long 11 klok naet. Stret long 11 klok naet mifala i kam wanples, mifala 105 i stap. Mifala i stanap raon wanples, long medel i gat wan smol tebel blong putum leg mo wan waet kaliko olsem ol saen blong mekem lafet ya. Wan kandel i laet long rum ya, from ol man oli save kasem mifala sipos mifala i yusum lektrik laet. Mifala i harem olsem ol Kristin bifo insaed long ol rum aninit long graon. Hem i wan tabu lafet. Mifala i talem bakegen ol promes we i kamaot long hat blong mifala long Papa blong mifala, blong mifala i yusum olgeta paoa blong mifala blong leftemap tabu nem blong Hem, blong mifala i holemstrong long Tiokratik.”

Nating se yumi kasem trabol olsem ol man blong Jeova we ol narafala man oli stap ronem olgeta, yumi save dipen long paoa we God i givim blong yumi gat strong tingting blong mekem wok blong hem mo givim ona long tabu nem blong hem. (Filipae 4:13) Taem yumi stap traehad blong mekem Jeova i glad long yumi, i gud yumi tingbaot Kaleb. Eksampel blong Kaleb blong folem Jeova fulwan, i pulum wan yangfala man i mekem wok blong prij fultaem, hemia long 1921. Hem i raetem se:

“Nating se blong kam wan paenia mi mas livim gudfala wok blong mi long wan ples blong prentem ol buk long Koventri [Engglan], naoia mi neva sore from. Bisnes ya i stret finis taem mi givim laef blong mi; mi givim laef blong mi long God. Mi tingbaot Kaleb, we hem i go insaed long Promes Lan wetem Josua mo Baebol i tokbaot hem se, ‘Hem i folem Jeova fulwan.’ (Josua 14:8) Long mi hemia tingting we mi wantem. Mi save se fasin blong mekem wok blong God ‘fulwan’ bambae i mekem laef ya blong mi we mi givim finis long God i impoten moa; bambae hem i givim bigfala jans long mi blong wokem ol fasin blong laef we i makemaot wan Kristin.”

Kaleb i kasem blesing from we hem i holemstrong blong folem Jeova fulwan, oltaem hem i wantem blong mekem wil blong God. Olsem Kaleb, ol narafala man oli kasem bigfala glad mo gudfala blesing long wok blong God. I gud yu gat ekspiryens ya olsem wan man we i gohed oltaem blong folem Jeova fulwan.

[Tok Blong Pija Long Pej 27]

Kaleb mo Josua tufala i holemstrong long Jeova taem i gat traem. ?Olsem wanem long yu?