Taem Aesak i gat 40 yia, hem i mared long Rebeka. Hem i lavem Rebeka tumas. Biaen, tufala i gat tu boe, we tufala i twin.

Fasbon long tufala twin ya hemia Esao, mo sekenbon hemia Jekob. Esao i laekem blong go wokbaot long bus, mo kilim ol anamol blong kakae. Be Jekob i wan kwaet man we i laekem blong stap long haos nomo.

Long taem bifo, taem wan papa i ded, hem i lego graon mo mane blong hem i go long fasbon boe blong hem. Hemia raet blong fasbon. Be long famle blong Aesak, fasbon i gat raet tu blong kasem ol promes we Jehova i mekem long Ebraham. Esao i no tinghevi long ol promes ya, be Jekob i save se oli impoten tumas.

Wan dei, Esao i kambak long haos, mo hem i taed we i taed. Hem i smelem gudfala kakae we Jekob i stap kukum, mo i talem se: ‘!Mi hanggri we mi hanggri! !Givim red supsup ya, bae mi kakae!’ Jekob i talem se: ‘Bae mi givim, be fastaem yu givim raet blong fasbon long mi.’ Esao i talem se: ‘!Mi no wantem save long raet blong fasbon! Yu tekem. Mi wantem kakae nomo.’ ?Yu ting se Esao i waes? Nogat. Esao i givim samting we i sas tumas blong kasem smol supsup nomo.

Aesak i kam olfala, mo i taem nao blong hem i blesem fasbon blong hem. Be Rebeka i givhan long Jekob we i sekenbon, blong hem i kasem blesing ya. Taem Esao i faenemaot samting ya, hem i kros we i kros mo i mekem plan blong kilim brata blong hem i ded. Aesak mo Rebeka tufala i wantem we Jekob i stap sef, ale tufala i talem long hem se: ‘Yu go stap wetem brata blong mama blong yu, Laban, go kasem taem we kros blong Esao i godaon.’ Jekob i lesin long advaes blong papa mo mama blong hem, mo i ronwe blong sevem laef blong hem.

Jehova i promes long Jekob se bambae i lukaot gud long hem, olsem we hem i lukaot gud long Ebraham mo Aesak. Jekob i go stap long ples ya Haran, hem i mared, i gat plante pikinini, mo i kam rij we i rij.

Afta we plante yia i pas, Jehova i talem long Jekob se: ‘Yu gobak long kantri blong yu.’ Ale, Jekob mo famle blong hem oli wokbaot i go. Long rod, samfala oli kam talem long Jekob se: ‘!Brata blong yu Esao i stap kam, mo i gat 400 man wetem hem!’ Jekob i fraet se Esao bambae i mekem faet long hem mo famle blong hem, ale hem i prea long Jehova se: ‘Plis yu tekemaot mi long han blong brata blong mi, yu sevem mi.’ Long nekis dei, Jekob i sanem plante sipsip, nani, buluk, kamel, mo dongki, oli go long Esao olsem presen.

!Long naet ya, taem Jekob i stap hem wan, hem i luk wan enjel! Nao tufala i resling, mo tufala i gohed go kasem moning. Jekob i kasem kil be hem i no lego. Enjel i talem se: “Yu letem mi mi go.” Be Jekob i talem se: ‘!Nogat! !Mi no save letem yu yu go! !Yu mas blesem mi fastaem!’

Ale, enjel ya i blesem Jekob. Nao Jekob i save se Jehova bambae i no letem Esao i spolem hem.

Long moning, Jekob i luk Esao mo 400 man blong hem oli stap kam longwe. Nao Jekob i go fastaem long famle blong hem, mo i bodaon seven taem long Esao. Esao i resis i kam long Jekob, mo i putum han blong hem i goraon long hem. Nao tufala i krae we i krae, mo Jekob i mekem pis wetem Esao. ?Yu ting se Jehova i glad long Jekob from fasin we hem i mekem long brata blong hem?

Biaen, Esao i gobak long ples blong hem, mo Jekob tu i go long ples blong hem. Jekob i gat 12 pikinini boe we nem blong olgeta se: Ruben, Simeon, Livae, Juda, Dan, Naftali, Gad, Asere, Isakara, Sebulun, Josef, mo Benjamin. Jehova i yusum Josef blong sevem ol man blong Hem. ?Yu save wanem we hem i mekem? Bambae yumi luk long nekis stori.