Josef i wan long ol lasbon boe blong Jekob. Ol bigfala brata blong hem oli luk se papa blong olgeta i laekem hem moa. ?Yu ting se oli laekem Josef? Nogat, oli jalus long hem mo oli agensem hem. Taem Josef i luk sam narakaen drim, hem i talemaot long ol brata blong hem. Olgeta oli ting se ol drim ya oli soemaot se wan dei bambae oli bodaon long hem. !Nao oli aqensem hem moa!

Wan dei, ol brata blong Josef oli stap lukaot long ol sipsip klosap long taon ya Sekem. Jekob i sanem Josef i go blong luk sipos oli oraet. Taem Josef i stap longwe long olgeta yet, oli luk hem, mo oli talem se: “!Yufala i luk! !Man blong drim i stap kam! I gud yumi kilim hem i ded.” Ale, oli holem hem, mo oli sakem hem i go long wan wel we i drae finis. Be wan long ol brata ya we nem blong hem Juda, i talem se: ‘!Yumi no kilim hem i ded! !I moagud yumi salem hem blong i kam wan slef!’ Nao oli salem Josef long ol man Midian we oli pas blong go mekem bisnes long Ijip. Ol man ya oli givim 20 pis silva long olgeta, nao oli tekem Josef i go.

Ol brata blong Josef oli draonem kot blong hem long blad blong wan nani, mo oli sanem i go long papa blong olgeta. Oli talem se: ‘Yu traem luk. ?Hemia i kot blong Josef?’ Nao Jekob i ting se wan wael anamol i kakae Josef. Hem i harem nogud bitim mak. I no gat wan man we i save mekem hem i harem gud bakegen.

Ol man Midian oli tekem Josef i go long Ijip, nao oli salem hem i go long wan haeman we nem blong hem Potifa, blong i kam slef blong hem. Be Jehova i stap wetem Josef. Potifa i luk se Josef i wok gud mo hem i trastem hem. I no longtaem, hem i putumap Josef blong i lukaot long evri samting blong hem.

Woman blong Potifa i luk se Josef i naes mo bodi blong hem i strong. Evri dei hem i askem long Josef blong i slip wetem hem. ?Josef i mekem wanem? Hem i no wantem. Hem i talem se: ‘!Nogat! !Hemia i rong ya! Masta blong mi i trastem mi, mo yu yu woman blong hem. Sipos mi slip wetem yu, bae mi mekem sin agens long God.’

Wan dei, woman blong Potifa i traem fosem Josef blong i slip wetem hem. Hem i holem Josef long kot blong hem, be Josef i ronwe. Taem Potifa i kambak long haos, woman blong hem i talem se Josef i traem fosem hem blong i slip wetem hem. Be woman ya i giaman. Potifa i kros we i kros, nao i sakem Josef i go long kalabus. Be Jehova i no fogetem Josef.

Taem Josef i stap long kalabus, Fero we i king blong Ijip, i luk sam drim, be i no gat wan man we i save mining blong olgeta. Wan slef i talem long Fero se, Josef i save talemaot mining blong ol drim. Wantaem nomo, Fero i sanem sam man blong hem blong oli tekem Josef i kam.

Fero i askem long hem se: ‘?Yu save talemaot mining blong ol drim blong mi?’ Josef i talem se: ‘Hemia mining blong ol drim ya. Blong seven yia, bambae i gat plante kakae long Ijip, be afta, blong seven yia bakegen, bae i gat hadtaem blong kasem kakae. Yu mas jusumaot wan man we i waes blong i hivimap kakae mo i putum gud blong ol yia we i no gat kakae.’ Fero i talem se: ‘!Mi mi jusumaot yu! Yu bae yu kam nambawan haeman blong mi.’ ?Olsem wanem Josef i save mining blong ol drim blong Fero? Jehova i givhan long hem.

Long ol seven yia we i gat kakae, Josef i hivimap plante kakae. Biaen, i gat hadtaem blong kasem kakae long evri ples long wol, olsem Josef i talem finis. Plante man oli aot long olgeta ples, oli kam blong pem kakae long Josef. Jekob i harem nius se i gat kakae long Ijip, ale hem i sanem ten boe blong hem oli go blong pem kakae.

Ol boe blong Jekob oli go luk Josef. Wantaem nomo Josef i luksave olgeta. Be ol brata blong hem oli no luksave hem. Nao oli bodaon long hem olsem we drim blong hem i soemaot taem hem i yangfala. Josef i wantem traem ol brata blong hem blong luk sipos oli jenisim fasin blong olgeta. Ale hem i talem long olgeta se: ‘!Yufala ol spae ya! Yufala i wantem faenemaot sipos mifala i strong, blong yufala i save kam mekem faet long mifala.’ Oli talem se: ‘!Nogat! Mifala i 12 brata, be wan long mifala i ded, mo lasbon i stap wetem papa blong mifala long Kenan.’ Josef i talem se: ‘Yufala i go tekem lasbon blong yufala i kam, nao bae mi luk sipos tok blong yufala i tru.’ Ale oli gobak long papa blong olgeta.

Taem famle blong Jekob i sot long kakae bakegen, hem i sanem ol boe blong hem oli gobak long Ijip. Be long taem ya, oli karem lasbon blong olgeta, Benjamin, i go wetem olgeta. Nao Josef i traem ol brata blong hem bakegen. Hem i haedem silva kap blong hem long bag we Benjamin i karem kakae long hem, nao hem i talem long ol brata blong hem se oli stilim kap ya. Taem ol man blong Josef oli faenem kap ya long bag blong Benjamin, ol brata blong hem oli sek nogud. Oli askem strong long Josef blong i no panisim Benjamin, be i panisim olgeta.

Naoia Josef i save se fasin blong olgeta i jenis. Josef i no moa save blokem filing blong hem, nao hem i krae bigwan, mo i talem se: ‘Mi mi Josef, brata blong yufala. ?Papa blong mi i laef yet?’ Ol brata blong hem oli sapraes tumas. Nao Josef i talem se: ‘Yufala i no harem nogud. God nao i sanem mi mi kam fastaem long ples ya, blong mi save sevem laef blong yufala. Yufala i go tekem papa blong mi i kam.’

Nao oli go talemaot gud nius ya long papa blong olgeta, mo oli tekem hem i go long Ijip. Plante yia, Jekob i no moa luk boe blong hem, be naoia i luk hem bakegen.