Long kantri ya Uj, i gat wan man we i wosipim Jehova, nem blong hem Job. Hem i wan rijman mo i gat plante pikinini. Hem i kaen, i givhan long ol puaman, ol woman we man blong olgeta i ded finis, mo ol pikinini we oli no gat papa mo mama. ?Be olsem wanem? ?From we Job i mekem samting we i stret, hem i no kasem trabol samtaem?

Job i no save se Setan i stap wajem hem. Jehova i talem long Setan se: ‘?Yu luk gudfala man blong mi Job? I no gat wan man long wol we i olsem hem. Hem i stap obei long mi mo i mekem i stret.’ Setan i ansa se: ‘Be yes, hem i obei long yu nomo from we yu lukaot gud long hem mo yu blesem hem. Yu givim graon long hem mo plante sipsip mo buluk. Be yu traem tekemaot ol samting ya. Bae yu luk we hem i no moa wosipim yu.’ Jehova i talem se: ‘Yu save traem Job. Be bae mi no letem yu yu kilim hem i ded.’ ?From wanem Jehova i letem Setan i traem Job? Jehova i save se Job bambae i no lego hem.

Setan i mekem plante trabol long Job. Fastaem hem i sanem ol man Seba blong stilim ol buluk mo dongki blong Job. Afta, laetning i kilim ol sipsip blong hem oli ded. Ol man Koldia oli kam stilim ol kamel blong hem, mo oli kilim i ded ol man we oli stap lukaot long ol kamel ya. Afta, wan samting we i moa nogud i hapen. Olgeta pikinini blong Job oli ded, taem haos we oli stap mekem lafet long hem i foldaon antap long olgeta. Job i harem nogud tumas, be hem i no lego Jehova.

Setan i wantem se Job i harem nogud moa. Ale hem i mekem ol boela oli kamkamaot olbaot long bodi blong hem. Job i harem i soa bitim mak. Hem i no save from wanem ol trabol ya i stap kasem hem. Nating se i olsem, hem i gohed blong wosipim Jehova. Jehova i luk samting ya, mo hem i glad long Job.

Afta, Setan i sanem tri man blong traem Job. Trifala i talem se: ‘Yu yu mekem wan sin mo yu haedem. Nao God i stap panisim yu.’ Job i talem se: ‘Mi no mekem wan nogud samting.’ Nao Job i ting se Jehova i stap mekem ol trabol oli kasem hem, mo i talem se God i mekem i no stret.

Wan yang man, nem blong hem Elihu, i stap lesin long storian blong trifala man ya wetem Job. Nao Elihu i toktok, i se: ‘Samting we yufala i talem i no stret. Jehova i hae moa i bitim save blong yumi. Hem i no save mekem wan nogud samting. Hem i stap luk evri samting, mo i stap givhan long ol man we oli trabol.’

Nao Jehova i toktok long Job, i se: ‘?Taem we mi mi mekem heven mo wol, yu yu stap wea? ?From wanem yu stap talem se mi mekem i no stret? Yu stap toktok, be yu no save from wanem ol samting ya i hapen.’ Job i luksave se hem i rong, mo i talem se: ‘Mi mi rong. Mi harem ol narafala man nomo oli tokbaot yu, be naoia mi mi save gud yu. I no gat wan samting we yu yu no save mekem. Sore, mi stap tokbaot ol samting we mi no save.’

Taem ol trabol we Setan i mekem long Job i finis, Jehova i mekem Job i kam strong bakegen mo i givim plante moa samting i bitim fastaem. Job i laef longtaem mo i hapi. Jehova i blesem Job from we i obei long hem, nating se samtaem i had. ?Bambae yu yu mekem olsem Job? ?Bambae yu gohed blong wosipim Jehova, nomata wanem samting i hapen?

Long Ijip, ol man oli singaot famle blong Jekob se ol man Isrel. Afta we Jekob mo Josef i ded, wan narafala Fero i rul. Hem i fraet se ol man Isrel bambae oli kam plante tumas, nao oli gat moa paoa i bitim ol man Ijip. Ale hem i mekem ol man Isrel oli kam slef. Hem i fosem olgeta blong oli wokem ol brikis, mo blong oli wok had long ol plantesen. Be ol man Isrel oli kam plante moa, nating se ol man Ijip oli fosem olgeta blong oli wok strong. Fero i no glad, ale hem i talem long ol man blong hem se, oli mas kilim i ded ol pikinini boe we ol woman Isrel oli bonem. Yu traem tingbaot olsem wanem ol man Isrel oli fraet.

Wan woman Isrel, nem blong hem Jokebed, i bonem wan naes smol boe. Hem i no wantem se pikinini ya i ded, ale hem i putum hem long wan basket, mo i haedem hem long ol longlongfala gras long saed blong Nael Reva. Sista blong smol boe ya, Meriam, i stanap klosap blong luk wanem bambae i hapen long hem.

Taem gel blong Fero i kam swim, hem i luk basket ya. Nao hem i openem, i luk smol boe ya we i stap krae, mo i sore long hem. Meriam i askem long hem se: ‘?Yu wantem se mi go lukaot wan woman we i save givim titi long pikinini ya?’ Gel blong Fero i talem yes, ale Meriam i go tekem mama blong hem Jokebed, i kam. Gel blong Fero i talem long Jokebed se: ‘Yu tekem pikinini ya, yu givim titi long hem, mo bae mi pem yu.’

Taem pikinini ya i kam bigwan, Jokebed i tekem hem i go long gel blong Fero. Gel ya i putum nem blong hem se Moses, mo i lukaot long hem olsem stret pikinini blong hem. Moses i gruap olsem wan boe blong king. Hem i save gat evri samting we hem i wantem. Be hem i no fogetem Jehova. Hem i save se hem i no man Ijip, be hem i man Isrel. Mo hem i jus blong wosipim Jehova.

Taem Moses i gat 40 yia, hem i wantem givhan long ol man Isrel. Wan dei, hem i luk we wan man Ijip i stap wipim wan man Isrel, nao hem i kilim man Ijip ya i ded, mo i berem hem long sanbij. Taem Fero i faenemaot samting ya, hem i traem blong kilim Moses i ded. Be Moses i girap, i ronwe i go long kantri ya Midian. Jehova i lukaot gud long hem long ples ya.